MARKA 4
4
Helei Ka’nrukpeu gu Sam’nda
(Mat 13.1-9; Luk 8.4-8)
1Zai sungkling kunghia gene pa mâ-geteiruachu kadai de lei. Zai pe taige baudime misongga ze wang’nduigit kai bei dege, sungkling ge ’nnei poine bambe ge pa â gut ze ’ntau di lei; zai baudime â ’nneigiam ge bam lei. 2Zai pa ne penui je sam ramme misongga ze sam’nda ne geteilia de lei, zai penui je pa geteiliabe ge acheu sa ze: 3“’Ngking le lau! Helei ka’nrukpeu helei ’nruk ra tat ti de lei. 4Zai pa ’nruk kai dege, helei gêsa â ’mpuî’ntai-taige keu gai de lei, zai ’nruine ramme ne wang ze chize teu ’ndi lei. 5Zai helei gêsa â tingchuterazeu kedei kahepeube ge keu gai lei, zai kedei kahepeu dadege luakatne puakchurâp ti de lei; 6zai naimik huchu ze naichiê ne pukî ’ndi de lei. Zai pema teringhi mak dege lai gai di lei. 7Zai helei gêsa â hetuzeu ge keu gai de lei, zai hetubang ramme chîngchu dege chi helei je zin nan ze, pebuî ’mbuî mak tai lei. 8Zai helei gêsa â kedei keyibe ge keu gai lei; chize puakpat ze, chîngchu lu, perachî misongga ’nchi ze, gêsa â bak himreu, zai bak riakseruk, zai bak haî kat pat lei,” kacheu de lei. 9Dadege Isua ne, “Mi-mige de seu ra pe kun bambe kau â, peize seu le lau,” kacheu de lei.
Sam’nda ramme Bambe Tak
(Mat 13.10-17; Luk 8.9-10)
10Zai Isua pe runne bambe luage, pe taige bamme hangkereu-ze-kename zai penui dage bamme baudime ’nteumena ne sam’nda ramme tedeu ge pechu sam ka’nneu de lei. 11Zai pa ne penui je, “Hera gu heguangram gu hekimsam ze â ningnui je pei gai ’nde lei, kane hela ge bamme hang â getaleine sam’nda ramme ge bam di de lei; 12chidezai penui ngau â ngau gu, kane ’nningchi ra mak, zai seu â seu gu, kane seuchi ra mak lei; maklaîzai â, penui ’nreiwang ze penui je lun gai bu de lei,” kacheu de lei.
Helei Ka’nrukpeu gu Sam’nda Rang’nchigaibe
(Mat 13.18-23; Luk 8.11-15)
13Dadege pa ne penui je, “Aipau sam’nda ze ningnui seuchi mak mei? Chigum dizai â, ’ndaigum ze sam’nda ramme leine ze ningnui seuchi le ra lau? 14Helei ka’nrukpeu ne sam ze ka’nruk lei. 15Zai ’mpuî’ntai-taige chize ’nrukkaibe ze â, aime de lei; sam ze penui seu dege, luakatne Satan wang lu penui dage sam ’nrukkaibe ze lutat ti de lei. 16Chipau luigum ze tingchuterazeu ge ’nrukkaibe ze du chigum chang lei, penui ne sam ze seu lu dege, luakatne penui suiyi-’nnang gai ze sam ze luteu de lei; 17zai penui runne ne pema teringhi mak lei, kane beting keduîne hang bam gai lei; zai chi sam ziegene kahereube mei, nune tewsabe mei wang bei dege, luakatne penui kâukeu gai di lei. 18Zai kêdabe ramme â hetuzeu ge ’nrukkaibe ramme ze de lei; penui ne sam ze seu lu, 19kane ai kedeirei gu ’nningkahereube ramme, zai keheube je ka’nchiebe zai mâkedabe merua ramme luneibe penui dage gut ze sam ze zin nan ze perachî ’nchi mak lei. 20Kane kedei keyibe ge ’nrukkaibe ze â sam ze seu lu, luteu ze penui chî ’nchipat ze bak himreu, bak riakseruk, bak haî ngau de lei,” kacheu de lei.
’Ntui Lungge Hemibung bambe
(Luk 8.16-18)
21Dadege Isua ne penui je, “Hemibung ze pebâmrabe ge kai mak ze, ’ntui lungge mei, nune jeîkang ge mei ze kai ra hangge teiwang-wang mei? 22Teilia ra runne zangno mâ de teibaibe ga lei; zai kebabe ge wang ra runne zangno mâ de ’ngkimrabe zat ga lei. 23Mi-mige de seu ra pe kun bambe kau â, peize seu le lau,” kacheu de lei. 24Zai pa ne penui je, “Ningnui keseube ge ’ngking’mmi le lau; ningnui ’ndeu lu peibe riâ gene ningnui hang du ’ndeu gai dai bu lei, zai chi suadu kie ze ningnui je kaisuâ gai bu lei. 25Pe dage kebambe kau je â peisuâ gai bu lei; pe dage kegabe kau je â pe dage bambe ’nsangdu teitat ’ndu lei,” kacheu de lei.
Helei Chîngchube Sam’nda
26Zai pa ne. “Hera gu heguangram â mige hangkat ne kedei ge helei ’nruk kai lu ze, 27zai pa tingmuî benai tingbabe luage jeikau, zuachu ze, zai helei â chipau luage puakpat ze chîngchu ze bambe pa â chî mak ze bambe helî gum lei. 28Kedei gene perunne ze raîlangbe ge perau ’ntuapat dezai pebuî ze pemi-gesang chang di de lei. 29Zai pechêupum ze mei dadege â pa luakatne pe gu ’ngkuaine ne gatchu di de lei, hechit ting chang di dadegeu,” kacheu de lei.
’Njeyichêu gu Sam’nda
(Mat 13.31,32; Luk 13.18,19)
30Zai pa ne, “Hera gu heguangram je ’ndaikau ne anui teikedachi le ra lau, nune ’ndaikau gu sam’nda ne chize anui sa’ndachi le ra lau? 31Chize â ’nzeyichêu gum lei, chize â kedei ge linggaibe luage kedeirei ge helei ruage cheilangbe chang de lei; 32sede ling gai bei ze chîngchu dege â mâ-kiak ramme ruage dilangbe chang di ze ’nruine ramme bekeî ge penui chippua gai lu lei,” kacheu de lei.
33Aigumbe sam’nda ramme misongga ze penui suage pa salia de lei, penui seuchiduibe riâ geneu; 34sam’nda tei mak ze penui suage mâ de pa sam salia mak lei; kane pe gu kenieme penui runne bambe luagene penui dage pa ne rangkeli gai bei de lei.
Hedui Natri Tewka’nsaube
(Mat 8.23-27; Luk 8.22-25)
35Chipau mai hegî dege, pa ne penui je, “Sungkling wîgiam ’mbe anui kapat kei lei,” acheu bei de lei. 36Zai baudime je sâu gai nan ze ’nnei ge pa bambe luage, penui ne pechu nguatat ti de lei. Zai kêdabe ’nnei ramme du pechu nguaka’nzang de lei. 37Zai natri chi-kadesangbe nupwang ze, hedui kagesuâkbe ne ’nnei ze nupgetie bei dege ’nnei ze hedui ne pui di de lei. 38Kane pa â ’nnei mi ’mbe hekum ge ’ngkûm lu jeikeu di de lei; penui ne pechu ’ngkia ze, “Geteiliapeu gau, anui gaderabe ze nang ’nningtenang mak mei?” kacheu de lei. 39Dadege pa chu lu, tingkai je pa ne ’ngngiam bei, zai sungkling je, “Sauzîng de zu lau!” acheu bei de lei. Zai tingkai sauzîng gai di de lei. 40Zai pa ne penui je, “’Ndaitew ze ningnui hing lau? Ningnui keneibe ga mei?” acheu bei de lei. 41Zai penui hing’nteu nan ze, kat-kat je penui ’mpau ze, “Aipau peu ze châu rei se lau? Tingkai benai sungkling ’nsangnedu pe kuâ pheu bei zeu,” ze penui kacheu de lei.
Currently Selected:
MARKA 4: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
