AGER KVDVNG 10
10
Pitorbv:lang Korneliubv
1Kaesaria:do Korneliu cmnam tani:ko dungai, mimag monc lvngkolok gvgurboncko Itali:dok Vyv:lok ako mimag monc kcrc:lokkc, 2mc:dap-sirsirnc tani:konc sc:ko Ru:ncmc pcsodagaji bvk crang appv:dokki lckopc, ammem aya:la attar binamcm appvng tani:kvdv:dcm bitcr bitcr bidungai, odokkc lo:dcm Ru:ncpvncmc kumdagai. 3Longcdok konang ayirdo bv aiyo:pc kangorlo Ru:ncpvnck taycng among lutad luncko bvkkolo:pc gva:la “Korneliua” cmna luncko ka:begto.
4Odokkc bv bvm pcsola ka:jon joronna dungkang, odokkc luto, “Ru:tuma, cdc okkon?”
Odokkc bvm bv luto, “Nok kumnamdcmbulumnang ammem aya:la attar binamkvdv:dc Ru:ncpvnckc kcra:to:pc mc:begla du:dopc pv:sangka:bong. 5Odokkc su:pak Joppaolo:pc tani:ycm mclvgtok, odokkc Simon cmnamko sc:kom Pitor cmdagaji gogta:ka; 6bv Simonkc lcdulo du:mvndung, suktung ager gernckolo, sc:kokc okumc siycng ru:yido du:ji.” 7Cdc bvm agom lunc taycng among lutad luncdc cdvlo gvpakkangkuji, bv bvk ager gerya:nc tani: anyiko gogto odokkc bvm toya:la du:nc aipc mc:dap sirsirnc mimag moncko, 8odokkc appv:dcm bulum lubbiyamge:la, bv bulum Joppa:pc mclvgto.
9Longkondo, bulu lambcdcm gvla du:namc odokkc nogordok kcra:pc pvnga:nammc, Pitorbv okumkolok tayc:pc kumkapc gvsangkang, ayir kvnvdkvramdo. 10Odokkc kcno:la o:kai dolvngkang; cmpige:la cdvlo bulu dopc cmna mosv:tonc cdcm, 11bv okkomsin kinsuma:pc ipakkang odokkc taycng amo:tcm kuge:dopc ka:to, odokkc okkaiyc gvidopc ka:to, bottapaknc gasor aborkoncmpc, mo:pvsok sungken appi:do:pc pulubla ledyi:lvgdopc ka:to. 12Odok ara:do appvngcmpinc simvnc odokkc ngc:la gvnckvdvngc odokkc do:mvrtok pcttangkvdv:dc dungai. 13Odokkc gomukko bvkkolo:pc pvnga:do, “Darobtok, Pitora; dcmkege:la dotok.” 14“Ma, Ru:tuma; kapcnc ngo cdvlosin cmmumcm manggom narc:ma:nc okkomsin cdvlosin dokvmang.”
15Odo cdc gomugdc lckoda bvkkolo:pc pvngangkang, “Ru:ncpvncbv okodcm narc:motoji, cdcm no cmmumc cmna lupa:ru:ma:yc.” 16Cdcmpc lcumkopc ikang, odokkc vgcmpc cdc attardcm taycngamo:to:pc bompakkangku.
17Cdcmpc Pitorbv asin ara:bo mcngkin-mc:para:ma:pc cdc oko kangor ka:namka:ji cmna mc:la du:dodcm, ka:toka, Korneliukc mclvgnam tani:kdv:dc, Simonkc okumdcm mago:bomla gvla, 18yabgodo dagkang odokkc Simonbv Pitor cmna gognamdc odo du:ji kama:ji cmna?
19Odokkc Pitorbv kangor ka:namdcm mc:mi:la du:dodcmci, Yalodc bvm luto, “Ka:toka, tani: awumkonc nom mago:la gvdung. 20Darobtoka odokkc gvikang, odokkc mc:moma:pc buluk lcdulo gvmvnkang; kapila:nc ngo bulum mclvgtung.” 21Odokkc Pitorbv tani:kvdv:do:pc gvto odokkc luto, “Ngo:na sc:komc no kanggo:du:ji; no oko lcgangc gvdu:n?”
22Odokkc bulu luto, “Korneliu:bv lvngko mimagmoncdok mogcnckonc, aipc mc:jvgncko odokkc Ru:ncpvnck tani:konc, sc:kom Jiwutani: appv:dc aipc lugcdaggaji, angunnc taycng among lutad luncdc nokkolo:p mclvgtag bvk okumdo:pc gvdopc, no okodcmci luycji taddopc.” 23Cdcmpila bv bulum mibopc goga:to.
Longkondcm bv durobla buluk lcdulo gvmvnkang, odokkc Joppa:dok bvro ckkcnc bvk lcdulo gvmvnkang. 24Odokkc odok longkondo bulu Kaesaria:pc gvangkang. Korneliu:bv bulu gvycpc cmna toka:la dungai odokkc bvk ope:kvdv:dcmnang ajonkvdv:dcm gokkumsuto. 25Pitorbv cdvlo gva:toji, Korneliu:bv bvm rvgsuto odokkc alcbog tungangge:la cgsorra kumto. 26Ckvdaggom Pitorbv bvm, scmpc lula sosa:to, “Darobtok; ngo:sin tani:yvngc.” 27Odokkc bvk lcdulo bv luposuto, bv gva:to odokkc bojcrungko tani:yc gvkumsula du:namdcm ka:begto; 28Odokkc bv bulum luto, “Nolu avyc avycm kinsudag kapc Jiwuakonc angu ope:ko lckopcnamdc cdcmanggom crangkolo gva:pcnamdc lujvg luro lukamdcmpc gva:pa:ma:ji; cmpila Ru:ncpvncbv ngom lcngkanto jc ngo sc:ko tani:ycmsin cmmumc manggom narc:ma:nc cmpa:mang. 29Cdcmpila cdvlo ngom mclvgtoji ngo lujckko o:kosin lupaksuma:pc gvdung, odo ngo tauka kapila no ngom mclvgtu:n.”
30Odokkc Korneliubv luto, “Longc lo:piko po:pc, su:pakkc ayirso, ngo konang ayirdok kumnamdcm kumna dungai ngok okumdo; odokkc ka:to, unjerpc attar gcnc tani:konc ngok kcra:do dakkang, scmpc lula, 31‘Korneliua, nok kumnamdcm tadtobong odokkc Ru:ncpvnckc kcra:do nok aya:la ammem binam kvdv:dcm mc:pa:bitubong. 32Cdcmpidag Joppa:pc tani:cm mclvngtoka odokkc Simonmc sc:kom Pitor cmna gogdagaji gogmota:ka; bv Simonkc okumdo dung, suktung ager gernckonc, siycng ru:yido.’ 33Cdcmpila ngo nokkolo:pc vgcmpc gvto, odokkc aya:ru:la gvbito. Su:pak cdcmpila ngolu appvngc su:pak Ru:ncpv:nckc kangkolo dung, Ru:tumkc lulvgnam appv:dcm tadpc cmna.”
Pitorkc Lunam Agom
34Odo Pitorbv bvk nappangcm kosa:la luto: “Aroru:pc Ngo ludungkc Ru:ncpvncbv atckpc ka:namcm ka:mang, 35cmpige:la appvng opvnno sc:kobvi Bvm pcsogcycji odokkc okodc aidagji cdcm imvlo Bvkkcpc torvgsula:dag. 36Israelkvdv:pc oko agomcm mclvgtagji nolu kindag, Jisukokki mcngannok tadponc do:yv:dcm lutad lugo:bila (Bv appv:lok Ru:tumc,) 37Judiang appv:do oko agomdcm lutadgo:bikaji, Galildokkc okodcm Jo:nbv lutadggongkaji: 38kapc Najaretdok Jisumc vrtoji Angunnc Yalodokki odokkc ilang-gvlangkokki; kapc gvgongkaji ainc ager gergo:la odokkc csa:molangkula uipa:nam appv:dcm, kapila:nc Ru:ncpvncbv bvk lcdulo dunggai. 39Odokkc ngolu odo appv:dok ka:nc kvdv:dc dung Bvk Jiwukvdv:dok do:lung kvdv:do:lang Jirusalemdok anyi:pakdo inamkvdv:dcm. Bulu bvm ragsangge:la moketo; 40cmpige:la Runcpvncbv lowum longcdo turmotoku odokkc bvm ka:begmotoku; 41appvng tani:ycmmang cmpige:la ngolum sc:kobulum Ru:ncpvncbv lukanbidopc balentoji, Bv sikolokkc turdakku lcdulo sc:kobulu Bvk lcdulo doka-tvngkaji. 42Odokkc Bv tani:kvdv:dcm lutadgo:bidopc ngolum lulvgto, odokkc lukanbidopc jc Bv cdc Ru:ncpvnckokki vrnamdc turra du:nc kvdv:dcmna: sinkvdv:dok kcba:ba:ncpc. 43Bvkkcpc appvng lungor lunc kvdv:dc pa:pkvdv:dokkcm mc:yinsubidag Bvk aminki.”
Angu Tani:kvdv:dc Angunnc Yalodcm Torvgsunam
44Pitorbv cdcm lula du:dodcm Angunnc Yalodc tannc appv:dok tayc:do dc:yingkang. 45Odokkc gadpuknam kvdv:dok mc:jvgnckvdv:dc sc:kobulu Pitorkc lcdulo du:mvndungaji mc:la mcngabla:tomang, lcga:dc Angu opvn kvdv:dok tayc:lo:sinci Angunnc Yalodok amancm bito. 46Kapila:nc bulu bulum angu-angu agomcm ludopc tatto Ru:ncpvncmc airu:pc aidag cmna lubonna lula: lula. 47Odokkc Pitorbv lukanbito, “Sc:kaiyc asidcm motumma:yclang sc tani:kvdv:scm baptismo bimoma:pc sc:kobulu ngolugvngkcmpc Angunnc Yalodcm torvgsutoji?” 48Odokkc bv bulum lulvgto Jisu Kristokc aminno baptismo la:dopc. Odo bulu bvm buluk lcdulo asudowko du:mvndopc kumna luto.
Currently Selected:
AGER KVDVNG 10: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
