AGER KVDVNG 11
11
Pitorkc Jerusalem Mondoli:do Lubikunam
1Cdcmpidodcm mclvgla ager germonam kvdv:dc:la bvrokvdv:dc sc:kobulu Judia:do dunganc Angunc ope:kvdv:dc:sin Ru:ncpvnckc agomcm torvgsuto cmna tadbegto. 2Cdcmpila Pitorbv cdvlo Jerusalempc gvlattokuji, gatpuknam kcrc:dc bvm lujcglurcgla luto, scmpc lula, 3“Kapila no gatpukma:nam tani:kvdv:do:pc gvkan odokkc buluk lcdulo domvnkan?” 4Cmpige:la Pitorbv bulum akon lcdulok akonpc lulen lua:la lurobbombikang:
5“Ngo Joppa nogordo kumna dungai; odokkc ngo kinsuma:pc singakla du:dom ngo kangorko ka:to, okkaiko oleddopc, bortapaknc gasorkoncmpc, taycng amo:tok su:k appi:lokkc ledyi:dopc; odokkc cdc ngokkolo:pc pv:yi:do. 6Cdcm ka:namc appvng simvnclang sirrc dcmpetla donamc odokkc amo:bo ngcnggo:nc odokkc do:mvrtok pcttangcbulu. 7Odokkc ngom lunc gomugko tadbegto, ‘Darobtok, Pitora; dcmkela dotok.’ 8Cmpige:la ngo luka, ‘Ma:, Ru:tuma; kapila:nc cmmumcmpinncm manggom narcma:ncm cdvlosin ngok nappa:sokki dokvmang.’ 9Ckvdaggom cdc gomugdc lckoda taycng tokkc lutvto, ‘Ru:ncpvncbv okodcm mopu:tobo:nc no cdcm cmmum cmpcru:ma:yc.’ 10Cdcmpc lcwumkopc ikang, odokkc appv:dcm taycngpc la:sangamtoku. 11Odo ayirardo odo okumdo:pc tani: awumko gvpv:do okolo ngolu dunggaji, ngokkolo:pc Kaesaria:dokkc mclvgnammc. 12Odokkc Yalodc ngom buluk lcdulo gvmvndopc luto, o:kosin angupc mc:mvnsuma:pc. Sc bvro akkc:sc:sin ngom gvbosuka, odokkc ngolu cdc tani:dok okumdo:pc gva:to. 13Odokkc kapc taycng among lutad luncdc bvk okumdo dagge:la ludagaji ngolum lubito, ‘Joppa:pc Mclvgla Simonmc Pitor cmnamdcm gogmotok. 14Bv nolum lutadko lubiycpc odokkci no:lang nok okum crang appv:dc turycpc.’ 15Ngo agomdcm lurobbomnamc, Angunnc Yalodc buluk tayc:lo dc:yi:kang ngolukkolo dc:yingarpo:dodcm ikamardcmpc. 16Odokkc ngo Ru:tumkc agomdcm mc:pa:toku, kapc bv lukaji, ‘Jo:nbv asilo baptismongcm bika, cmpige:la nolum Angunnc Yalodokki baptismongcm biyc.’ 17Ru:ncpvncbv c:mo:pinc amancm ngolum bikamv:pc bulumsin bidagmvlo ngolu Ru:tum Jisu Kristomc cdvlo mc:jvgtonc, ngo:nu sc:kon cmpcmvlo Ru:ncpvncmc motumpc!”
18Cdvlo bulu cdcm tadtoji bulu aso:pc dungapkang odokkc bulu Ru:ncpvncmc amincm gvmoto, scmpc lula, “Cmpcmvlo Angu opvnkvdv:dcmsin Ru:ncpvncbv turnamcm pa:dokupc asin mc:dvrra mcngkutsunamcm bitu:bong.”
Antiokdok Mondoli:
19Cdcmpidodcm sc:kobulu dugpitsuka:ji Stipenmc ipusire:ycm ila mokedodokkc Poenisialang Sipru appv:pc odokkc Antiokpc gvngapkang. 20Cmpige:la odokbuluk akke tani:yc dungai, Sipru dokkclang Sirene dokkc sc:kobulu Antiokdo:pc gvla Girikkvdv:dcmsin lutadto, Ru:tum Jisumc lutad luyirbila. 21Odokkc Ru:tumkc alagc bulum lagribomna dungai, odokkc odok bojcrungc mc:jvgnc kvdv:dc Ru:tumkolo:pc gvlattoku.
22Odok lutaddc Jerusalemdo du:nc mondoli:pc pvngkang, odokkc bulu Barnaba:mc Antiokpc mclvgto. 23Cdvlo bulu gvla Ru:ncpvnckc ayangcm ka:begtoji, bv mc:pokang; odokkc Ru:tummc mc:jvgla du:ncpc idopc luyircm luto lo:dvscm mc:la gvangkunamdcmpc du:dopc; 24Kapila:nc bv ainc tani:kai, Angunnc Yallolang mc:jvgc bi:danpc du:nc. Odokkc bottaru:nc mc:jvgnc kcrcngkonc Ru:tumkolo:pc gvsedangkang.
25Odokkc Barnaba:bv Soulmc makapc Tarsupc gvka; 26odokkc bvm cdvlo pa:toji, bvm bv Antiokpc gvbotoku. Dv:takpagdo bulu mondoli:dok lcdulo du:mvnto, odokkc tani:kvdv:dok bottcru:nc kcrcngcm poyirto; odokkc Antiokardo agom tadjvgla gvmvnnckvdv:dcm Kristanc cmna gogpo:to.
27Cdcmpidodcm odo longckvdv:do Lungor Lunckvdv:dc Jerusalemdokkc Antiokpc gvngapkang. 28Odokkc odokbuluk Agabu cmnamkonc dagrobla Yalodokki luno:bito jc mo:pvso bottcru:pc dopa:tv:pa:ma:namko lenyc; odokkc cdcmpc Klaudiukc ayirdo ikang. 29Odokkc agom tadjvgla gvmvnnckvdv:dc, appvngc av avkc ilang gvla:nammcmpc, Judia:dok du:nc bvrrang kvdv:do:pc dogangcm bisupc cmna ru:sula mclvgto; 30odokkc bulu cdcmv:pc ito, abv:nc kvdv:do:pc Barnaba:kclang Soulkc alaklo mclvgla.
Currently Selected:
AGER KVDVNG 11: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
