AGER KVDVNG 13
13
Barnaba:mclang Soulmc Balenna Mclvgnam
1Cdcmpidodcm Antiokdok du:nc mondoli:do lungor lunnclang poyirnc dungai, Barnaba:bv, Simionbv sc:kom Niger cmna gogdagaji, Sirene:dok Lusiubv, Mana-en-bv Herodkc mo:tak appi:lok migom kcbang bangko okumdok amikonc, odokkc Soulbv. 2Bulu kumna odokkc doma:tvma:pc du:dom, Angunnc Yalodc luto, “Ngok lcga:pc Barnaba:mclang Soulmc langutei oko ager lcgangc bulum ngo gogtu:ji.” 3Doma:tv:ma:pc dungge:la kumdag lcdudcm odokkc buluk tayc:lo alagcm pigabge:la kumto odokkc bulum mcpaglvgto.
Sipru:do
4Cdcmpc Angunnc Yalodokki mclvgla:yam, bulu Selusia:pc gvto; odokkc bulu Sipru:pc ko:to. 5Bulu cdvlo Salami:pc ko:pv:toji, bulu Jiwukvdv:dok kumko okumkvdv:do Ru:ncpvnckc agomcm lutadbigo:to. Odokkc buluk lcdulo Jo:nbv bulum gvdumsupc dungai.
6Bulu di:p appv:do gvgo:la Pa:phodo:pc cdvlo pvngka:ji, bulu montorong kinnc tani:ko rvgsuto, Bar-Jisu cmnam Jiwulok lume:pc lungor luncko. 7Bv among akonkolok migom donckolok du:mvndungai, Sergiu Poulubv, atv atv agomcm kinnckonc, sc:ko Barnaba:mclang Soulmc goga:tonc odokkc Ru:ncpvnckc agomcm tadpc cmna mato. 8Cmpige:la montorong inc Elima:bv (kapcnc cdc amindok lukur agomdcai) bulum lcdulo dagtumto, among akonlok migom doncdcm mc:jvglokkcm lutumpc. 9Cdcmpila Soulbv sc:kom Poul cmna gogtungaji, Angunnc Yalodokki bi:la bvm ka:mi:miri:la ka:to odokkc luto, 10“C:i uikc aowa no appvng dormo kanamlok mirua, yadnam agom kannc odokkc lujcgjcgmona, Ru:tumkc lambcdcm gc:yodgc:madmonamdcm ingasuma:ycbonci! 11Odokkc su:pak, ka:tok, Ru:tumkc alagdc nokkolo lagjcmdung, odokkc no miglula ayir asudkopc do:nyitcm ka:begma:pc iyc.” Vgcmpc mugsub-mugyubcla kcmmo bvkkolo owangkang odokkc bvm alakdok sobomla gvbodopc tani:cm magongkang. 12Odokkc cdc among mo:taklok migom doncdc mc:jvgto, cdvlo okko kapc ika:ji cdcm ka:begge:la, kapila:nc Ru:tumkc poyirnamdcm ka:la kangaksukang.
Pisidia:dok Antiokdo
13Cdcmpidodcm Poulbv:la bvk ajondc Pa:phosdokkc kongkangku, odokkc Pampiliadok Pergado:pc gvto. Odokkc Jo:nbv bulum mcpakto odokkc Jerusalempc gvlatkangku; 14cmpige:la bulu Perga:dokkc gvtvto odokkc Pisidiadok Antiokdo:pc gvto. Odokkc yodla ager germa:pc du:do longcdo bulu kumko okumkvdv:do:pc gva:to odokkc teda:to. 15Lujvglurodcm poge:la odokkc lungor lunam kvdv:dcm kumko okumdok ka:sv:mosv:nc kvdv:dc bulukkolo:pc tani:ycm scmpc lula mclvgto, “Bvrokvdvnga, nolukkc tani:kvdv:dokkcpc atv luyir agomko du:mvlo, cdcm lutok.” 16Cdcmpila Poulbv dagrobkang, odokkc bvk alagdcm lagyi:-lagsa:la luto:
“Israelsok tani:kvdvnga, odokkc nolu sc:kobulu Ru:ncpvncmc pcsodonc, tadtoka. 17Sc Israel tani:kvdv:sok Ru:ncpvncdc ngoluk abukvdv:dcm balenna la:to odokkc Igiptolo du:dodcm bottaru:pc badmoto, odokkc alag-lagtvngc kvnggv:la Bv bulum gvlenmotoku. 18Odokkc yv:pi dv:takkvramkopc Bv buluk yumra:do ka:sv:mosv:to. 19Odokkc Kanna:do cdvlo Bv opvn kvnvdkopc momvg-mosvgtonc, Bv buluk amo:dc buluk du:tcng dagtcngcmpc bito, lvngko appi:kolang yingo dv:takkvramkopc. 20Odokkc odok lcdupc Bv bulum kcba:ba:ncm bito lungor lunc Samuelbv pvnga:ma:dapc.
21“Odokkc bulu migom ako mato; odokkc Ru:ncpvncbv bulum Ki:skc awo Soulmc bito, Benjaminkc ope:dok tani:ako, dv:tak lvngko appi:kopc. 22Odokkc cdvlo Bv bvm la:paktoji; sc:kom bv ka:jvgka:rom lukanna lubitoji odokkc luto, ‘Ngo Jessi:kc awo Dawidkolo ngok asin mcngkolo mc:ncko pa:to, sc:kobv ngok asin mc:nam appv:dcmpc ipcnckoji.’ 23Cdc tani:dok pu:pojarponamki Ru:ncpvncbv Israeldo:pc Moturncko, Jisumc langa:to, Bvk pesubinamdcmpc. 24Bvk gvma:dapc Jo:nbv Israel tani: appv:do:pc asin mc:dvrra mc:latsukunamlok baptismo agomcm lutad luyirka. 25Odokkc Jo:nbv bvk lupcnamdcm lungapdodcm, bv tawuto, ‘Okkomna nolu ngom mc:dang? Ngo Bv:mang. Ma: ngok lcdupc akonc gvmvndung sc:kokc lcyugdok rvbvdcmci ngo sarbipc arckama:ncko.’
26“Bvrrang kvdvnga, Abrahamkc ope:lok awangkvdvnga, odokkc nolukkolok sc:kobulu Ru:ncpvncmc pcsodagnc, ngolukkolo:pc sc moturnam lutadscm mclvgtagai. 27Kapila:nc sc:kobulu Jerusalemdo du:donc odokkc buluk migom donckvdv:dc, Bvm bulu kangkinma:la:yam cdcmanggom ager germa:pc yodla du:dom lo:dcm ponam lungor lunckvdv:dcm tadkinma:la, sc bulum lukamdcmpc Bvm aima:ncko cmna moketo. 28Bulu Bvm sipcnam agom o:kosin lugc:la:tomanggom, ckvdaggom bulu Pilatmc Bvm mokedopc lulvgto. 29Odokkc Bvk agomcm adkam appv:dcmpc cdvlo ingapka:ji, bulu Bvm vsv:dokkcm la:yito, odokkc agokolo Bvm lc:to. 30Cmpige:la Ru:ncpvncbv Bvm sikolokkcm turmotoku; 31odokkc bojcrung longcko cdc sc:kobulu Bvk lcdulo Galildokkc Jerusalempc gvkaji lcngkansukaku, sc:kobulu su:pak tani:kvdv:dcm lupakbidu:ji. 32Odokkc ngolu nolum tadponc lutaddcm lubidu:bongkc cdc okodcm Ru:ncpvncbv abukvdv:dcm pesula lubikaji, 33cdcm ngolum buluk ommangkvdv:dcm lukamdcmpc ibito Jisumc turmolangkula; odokkc akon ni:tomdo:sin cdcm adla lc:tag,
‘No ngok Aowo,
silo nom ngo otobong.’
34“Odokkc Bvm sikolokkc Bv turmokunam agomdokki, aima:nc agerlo:pc gvlatkupcnammc kama:bong, Bv sc lugotsok luto,
‘Ngo Dawidkc angunnc odokkc
pa:pcru:nam akhirba:d kvdv:dcm biyc.’
35Cdcmpidag angu ni:tomkolo:sin Bv lutag,
‘Nok Angunnc Akodcm no yangkolo:pc mclvgma:yc.’
36“Kapcnc Dawidbv, Ru:ncpvnckc lukamdcmpc bvk avkc opvndo tadge:la, sikang, odokkc bvk abukvdv:dcm lcngkolo lc:to, odokkc ya:namcm ka:to; 37Cmpige:la sc:kobvm Ru:ncpvncbv turmotokunc ya:namcm ka:pa:tomang. 38Cdcm nolu kinka:langka cdcmpidag, bvrrangkvdvnga, jc cdc tani:dc pa:bcm mc:yinsukunam do:yingcm nolum lutadbidaggom, 39Odokkc Mose:kc lujvglurdokki okodcm nolu motubila:toma:ji mc:jvgnc takamcm motubito. 40Ansutoka, cdcmpiga:lok, ckvma:mvlo nolukkolo:pc lungor lunamdc okko cmdang pvnga:yc:
41‘Ka:toka, c:i lupaknckvdnga, odokkc mc:lamcngapla:
ma:pc mc:tok,
odokkc yogpagam ka:langka kapila:nc
Ngo noluk longckvdv:do agerko gerdo,
nolu cdvlosin mc:jvgma:nam agerko,
sc:kaiyc cdcm lutadbidaggomsinci.’ ”
42Bulu gvlenamdokudo cdc agomkvdv:dcm ager germa:pc yodla du:nam longkon longcdo lubilangkuka cmna kumna luto. 43Odokkc kumko okumdok tani: gvkumsunamdc gvpansurobbomnamc, bojcrungko Jiwuyclang Jiwu dormo inc Poulkclang Barnaba:kc lcdu lcdulo gvmvnkang, sc:kobulu bulum Ru:ncpvnckc aya:do du:tvla du:dopc lusv:lvgtoji.
44Odok lcdukc ager germa:pc yodla du:do longcdo nogordok appv:pakdci Ru:ncpvnckc agom tadkapc yadkumsuto. 45Cmpige:la cdvlo cdc yadkumsunc tani:kvdv:dcm Jiwukvdv:dc ka:begtoji, bulu ncrobbomkang, odokkc Poulbv okodcm lutoji lupagamto, odokkc bvm aima:si:ma:pc luto. 46Odokkc Paul bv:lang Barnaba:bv kvnggv:pc a:ng pvtala lubito, scmpc lula, “Ru:ncpvnckc agomdcm nolum lubipo:pcnammai. Nolu odokkcm nv:paksula:mvn, odokkc turyartvla turnamdcm turpc arckamang cmna asin kcbangcm ba:sula:mvn, ka:toka, ngolu Ru:ncmc kinma:nc Angu ope: kvdv:do:pc gvdag. 47Kapila:nc Ru:tumbv ngolum scmpc lula lulvgto,
‘Ngo nolum Ru:ncmc kinma:nc tani:kvdv:dok saki:pc motu:bong,
nolujen moturcm Mo:pv du:tcrkvdv:do:pc bompv:ycpc.’”
48Odokkc cdvlo Ru:ncmc kinma:nc tani:kvdv:dc cdcm tattoji, bulu mc:pokang odokkc Ru:ncpvnckc agomdcm amincm gvmoto; odokkc cddv cddvkonc turyartvla turnamdokki vrnama:ji mc:jvgto.
49Odokkc Ru:tumkc agomdc odo dungo:ycgo:do gvbungkang. 50Ckvdaggom Jiwukvdv:dc aipc mc:jubnc botta bottanc nc:ngkvdv:dcm odokkc nogordok igur gvgurbonc milbong amikvdv:dcm luwur-lubarlvgto, odokkc Poulmclang Barnaba:mc ipusire:ycm idopc mowurlvgto, odokkc bulum buluk jiladokkc mcnnenlvgto. 51Cmpige:la bulu buluk lukam tadma:pc alckvdv:dok koiyang amongkvdv:dcm danpaksuto, odokkc Ikoniumpc gvkang. 52Odokkc agom tadjvgla gvmvnnckvdv:dc mc:pola:la Angunnc Yalodc pa:la bingkang.
Currently Selected:
AGER KVDVNG 13: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
