AGER KVDVNG 14
14
Ikoniumdo
1Cdcmpinamc Ikoniumdo bulu lckopc Jiwukvdv:dok Ru:ncpvncmc kumko okumdo gva:to, odokkc cdcmpc agomcm lutonc jc bojcrungko tani:yc mc:jgto, Jiwuyclang Girik anyipaklokkc. 2Cmpige:la mc:jvgma:nc Jiwukvdv:dc Ru:ncpvncmc kinma:nc ope:kvdv:dcm nvgurlvgto odokkc bvrokvdv:dok tadma:pc buluk asinkvdv:dcm dvgammoto. 3Cmpige:la bulu bojcrung ayirkopc Ru:tumkc lcgangc agom lula du:to, sc:ko aya:nam agomdok lukamcm lubitoji, kanggodcmnang kangaksunamcm buluk alakvdv:dokki gerra:dopc bila. 4Cmpige:la nogordok tani:kvdv:dc gvpansukang; akedc Jiwukvdv:dokkcpc kckang, odokkc akedc mclvgla ager gerdop tolvgnamkvdv:dok kcrc:pc.
5Cdvlo Jiwuclang Girikkvdv:dok anka:la ka:namko itoji, buluk migomdonckvdv:dokki, bulum iki:siyatpc cmna odokkc bulum vlvngki crkepc cmna, 6bulu cdcm kinsuto odokkc Listra:pclang Derbi:pc odokkc, dungo:ycgo:dok do:lungkvdv:do:pc; 7odokkc olo bulu tadponc do:yv:dcm lutadbito.
Listra:do:lang Derbi:do
8Cdcmpc idodcm Listrado tani:akonc tedla dungai, sc:kobv bvk alcdokki gvmangaji; bv ododokkcbong lcbe:ru:dagai. 9Bv Poulmc lunamdcm tadto; odokkc Poulbv, bvm ka:jon joronna dungge:la bvkkc csangkunanc mc:jvgc dung cmna kangge:la, bottapakpc bc:dopc luto; 10“Darobtok nok alcdokki dagrasula.” Odo bv sumrobkang odokkc lambc gvgongkang. 11Odokkc cdvlo cdc Poulbv okkom itoji ka:tonc, buluk agomcm jc:la lurobbomkang, scmpc Likoniang agomki lula, “Uikvdv:dc ngolukkolo:pc gvngapdo tani:kvdv:dcmpc ilang ila!” 12Barnaba:mc bulu Jius cmna gogdungai odokkc Poulmc, bv agom lunckvdv:dok bottarya:ncpc ila:yam, bulu Hermes cmna gogdungai. 13Odokkc Jiusdok dormo ager gerncdok bottarya:ncdc, okodok kumko okumdc nogordok kangga:pc dungaji, so:bomlang appvng madoli:ycm yabgo gvangkodo:pc langa:to odokkc tani:kvdv:dokki palvgcm papc cmna mc:tungai.
14Cmpige:la cdvlo mclvgla ager germonam tani:kvdv:dc Barnaba: bv:lang Poulbv cdcm tattoji, bulu buluk gcnam attarkvdv:dcm bupedamsuto odokkc yadkumsunc tani:kvdv:dokkc bulu daglenamkang, jc:la: jc:la:, “Tani:kvdvnga, nolu kapila scmpc idu:n? 15Ngolusin tani:yvngc, nolugvngkcmpc innc, odokkc nolum tadponc lutadko bombitung, nolujen scm cmmum ager sokkc turnc Ru:ncpvnckolo:pc gva:yckupc sc:kobv taycng amo:tcmna mo:pvscm ru:tu:ji odokkc siycngcmna odok du:nc appv:dcm. 16Leketo:dvkc opvn kvdv:dcm ope:appv:dcm buluk av avkc gvlvngko lambckvdv:do:pc gvmoto; 17Cmpidaggom bulu Bv avdc lukan luma:pc mctomang, kapila:nc Bv nolum aincm ibito odokkc nolum taycng amo:tokkc pcdongcmna: a:yc e:monc dv:tag ayircm bito, noluk asinkvdv:dcm mc:lvgsudopc donam tv:namkila: mc:pomcngankokki.” 18Odo agom kvdv:dokki bulu tani:kvdv:dcm palvgcm pama:dopc lutumto.
19Cmpige:la Jiwukvdv:dc odopc Antiokdokkclang Ikoniumdokkc gvto; odokkc tani:kvdv:dcm luwurlvgla, Poulmc bulu vlvngkokki crtapto odokkc bvm nogordok ru:yipc solennvgto, bv sika:bong cmna mc:la. 20Cmpige:la cdvlo agom tadjvgla gvmvnnc kvdv:dc bvk kcra:do dakkumsuka:ji, bv darobto odokkc nogordo:pc gva:toku; odokkc longkondo bv Barnaba:kokki Derbido:pc gvto.
Siria:dok Atiokdo:pc Gvlattoku
21Cdvlo bulu tadponc lutaddcm odo nogordo lubitoji odokkc bojcrungko agom tadjvgla gvmvnncm gvmvnmotoji, bulu Listra:pc odokkc Ikoniumpc odokkc Antiokpc, gvlattoku, 22agom tadjvgla gvmvnnc kvdv:dok yalokvdv:dcm kvnggv:mola, bulum mc:jvgnamlo du:tvdopc luyir luyirla, odokkc kvnggv:pc mc:namsagnamkipak ngolu Ru:ncpvnckc migom doko mo:pvdo:pc gva:rungkupcnammc cmna. 23Odokkc cdvlo bulu mondoli: appv:lo buluk lcgangc abv:nc ka:sv:ncm agercm togc:lvgotonc, doma:pc menna kumnamki, bulu Ru:tumkolo tolvgto sc:kom bulu mc:jvgtoji.
24Odokkc bulu Pisidia:dok gvbomna gvto, odokkc Pampilia:pc gvto. 25Odokkc cdvlo bulu Perga:do agom lutoji bulu Attalia:pc gvkang; 26odokkc bulu Antiokpc ko:la gvkang, okolo bulum Ru:ncpvnckc ayangcm pa:dopc lulvgtoji oko agerdcm bulu gerpvttoji.
27Odokkc cdvlo bulu ko:pv:toji, bulu mondoli:dok tani:kvdv:dcm lckko:pc gokkumsuto odokkc Ru:ncbv bulukkokki gernam appv:dcm lubiamtoku, odokkc kapc Bv tani:kvdv:dok ara:lo mc:jvglok yabgoko moge:toji. 28Odokkc bulu agom tadjvgla gvmvnnc tani:kvdv:dok lcdulo adjio:kosin du:mvntomang.
Currently Selected:
AGER KVDVNG 14: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
