AGER KVDVNG 15
15
Jerusalemdo Kcbangc
1Cmpige:la Judia:dokkc tani:ckkc gvla bvrokvdv:dcm luyirra dungai, “Mose:kc itcnggvtc:dcmpc nolu gatpukma:mvru:lo nolum moturma:yc,” 2odokkc Poulbv:lang Barnaba:bv adji:okosin luka:mvnsutomang, Poulbv:lang Barnaba:bv odokkc angu akke Jerusalempc gvdopc lulvgto mclvgla ager germonam kvdv:do:pc odokkc abv:nc kvdv:do:pc cdc tawunam agomdok lcga:pc.
3Cdcmpila, mondoli:dc bulum buluk lambcdo mclvgnammc, bulu Poenisiangdoklang Samaria:dok gvpatla gvto, Angu tani:kvdv:dcmsin asin mc:latsulangkula gvangkunamdok agomcm lubi lubila, odokkc bulu bvrrangkvdv:dcm kvnggv:pc mc:pom bito. 4Cdvlo bulu Jerusalempc gvpv:toji, bulum mondoli:dc odokkc odok abv:nc ager germonam kvdv:dc airu:dag cmna torvgsuto, odokkc bulu Ru:ncpvnckc inam appv:dcm lugo:bito. 5Cmpige:la Parisi:kvdv:dok lckopc gvnc mc:jvgla gvmvnnckc dagrobkang odokkc luto, “Bulum gatpukpcnamc, odokkc bulum Mose:kc lujvglurodcm tadtvla du:dopc lupcnammc.”
6Mclvgla ager germonam kvdv:dc:lang abv:nckvdv:dc lckopc gvkumsukang cdc agomdcm ru:sukapc. 7Odokkc odo bojcrungko luka:mvnsula dungge:la, Pitorbv darobkang odokkc bulum luto, “Bvrrang kvdvnga, nolu kindag jc leke-to:dcmbong Ru:ncpvncbv noluk ara:lokkcm la:to, jc ngok nappangkokki Angunc tani: opvnkvdv:dc tadponc lutaddok agomdcm tadpcnammc odokkc mcjvgpcnamc. 8Odokkc Ru:ncpvncbv sc:ko asincm kindagji bulum lukancm lubito, ngolum bikamarcmpc Angunnc Yalodcm bulum bige:la; 9Odokkc Bv bulukkoloklang ngolukkolok oko angucmsin du:motomang, cmpige:la buluk asinkvdv:dcm mc:jvgkokki mopu:to. 10Su:pak cmpila kapila nolu Ru:ncpvncmc ankang kangkvla agom tadjvgla gvmvnnckvdv:dok lv:po:do jungoli:ko tulvgkvge:la okodcm ngoluk jo:la:toma:ji? 11Ckvdaggom ngolu mc:jvgdo:jc ngolum Ru:tum Jisukc ayangkokki moturyc bulum moturarkamcmpc.”
12Odokkc kcba:dok appv:dc aso:pc dungapto; odokkc bulu Barnaba:mclang Poulkc lunamdcm tatto bulu angu tani:kvdv:dok dungkolo oko kanggodcmnang kangaksunamcm lcngkanto cmna lubila:yam. 13Buluk lungapdodcm, Jakobbv lubito, “Bvrokvdvnga, ngom tadtok, 14Simionbv lukanbito kapc Ru:ncpvncbv Bvm kinma:nckvdv:dcm gvla ka:toji, bulum Bvk amin lcgangc la:lenpc. 15Odokkc lungor lunckvdv:dok sc agomkvdv:sokki tolvgsula, cdcm kapc adla lc:tagji,
16‘Sok lcdupc ngo gvlatycku,
odokkc ngo Dawidkc dungkodcm motenycku,
Okodc openka:ji; Ngo odok open-orenncdcm motenycku,
odokkc ngo cdcm mosv:ycku,
17odomvlo ake tani:kvdv:dc ru:tummc maycpc,
odokkc Ru:ncmc kinma:nc tani:appv:dc sc:kobulu
ngok aminno minycji,
18Ru:tumbv ludag, sc:kobv sc attarkvdv:scm
lekelokkcbong kinabmotoji.’
19“Cdcmpidag ngok mcnggodc jc ngolum angu tani: opvn kvdv:dcm mc:dvrmopc lagimang sc:kobulu Ru:ncpvnckolo:pc gvlatdungkuji. 20Ckvdaggom bulukkolo:pc adpcnammc murti:ycm kumlusula kumnamcm mcpakdopc odokkc nc:ngcm aima:pc mc:boka:bo kolokkc odokkc okodc okkom yumkela dodagji odokbulukkc. 21Kapila:nc lekekc opvnkvdv:dokkcbong Mose:kcdc appvng nogor nogorlo dungai sc:kobulu bvm luyir lukaji, kapila:nc cdcm ager germa:pc yodla du:do longc appv:do kumko okumkvdv:do podungai.”
Angutani: Mc:jvgnckvdv:dopc Do:jvg Jvgnam
22Odo cdc mc:jvgla ager gernckvdv:dokkcpc aidopc ka:to odokkc cdc abv:nc kvdv:dokkcpc, mondoli:appv:dokki, buluk ara:dokkcm tani:ycm balenna la:pc odokkc bulum Antiokpc mclvgpc Poulkclang Barnaba:kc lcdulo. Bulu Juda:mc Barsabang cmnamdcm mclvgto, odokkc Sila:mc, bvrokvdv:dok gvgcboncko, 23kcvgkc do:jvgdcm bitc:lvgla: “Bvrokvdv:do:pc, mclvgla ager germonc kvdv:do:pc odokkc abv:nc kvdv:do:pc, Antiokdok, Siriadok odokkc Kilikiadok ope:kvdv:do:pc gvangkunc Angunc tani:kvdv:dok aipc lupangc. 24Nolum agomkokki ngolukkosok tani:ckkcnc mc:dvrmcso:moto cmna ngolu tadla:yam, noluk asinkvdv:dcm mc:sat-sula:ma:la, ngolu bulum oko luyircmsin lukailvgmanggom, 25cdc ngolukkcpc aidopc ka:to, asin atcrongkopc inamdc, tanickkc balendopc odokkc bulum ngolukkolo:pc mclvgdopc ngoluk aipc mc:nam Barnaba:mclang Poulmc, 26Ru:tum Jisu Kristokc lcgangc sc:ko tani:kvdv:dc buluk turnamcm sipcturpc cmna itoji. 27Cdcmpila ngolu Juda:mclang Sila:mc mclvgtung, sc:kobulu avkvdv:dc nolum cdc agomv:dcm nappangkokki lubiycpc. 28Kapila:nc Angunnc Yalodokkcpc odokkc ngolukkcpc noluk tayc:lo scmbulumyam oko bottaya:nc jo:namcsin jonggcmlvgla:ma:dopc: 29jc nolu okodcm murti:lo palvgtagji odokkc gertoka odokkc i:lokkc odokkc okodcm lv:polok yumna yumkedagji odokkc amikc nc:ngcm la:binamlokkc. Nolu avyc odokbulukkc odokkcm gc:rsula du:la:mvlo, nolu aincm iyc. Cdcbong.”
30Cdcmpila cdvlo bulum mclvgtokuji bulu Antiokpc gvkang; odokkc mondoli: tani:kvdv:dcm lckopc gvkumsumoge:la, bulu do:jvgdcm tamge:to. 31Odokkc cdvlo cdcm bulu potoji bulu luyirra adnamdo airu:pc mc:pokang. 32Odokkc Juda:lang Sila:bv, sc:kobulu av:kvdv:dci lungor lunna:nc, bvrokvdv:dcm bojcrungko agomki luyircm luto odokkc bulum kvnggv:moto. 33Odokkc bulu asudko du:namc, bulum bvrokvdv:dokki mcnganpc mclvgtoku sc:kobulu bulum mclvgtungaji. 34Cmpige:la cdc Sila:kcpc ollung du:namdc aiya:ncmpc idagai.
35Ckvdaggom Poulbv:lang Barnaba:bv Antiokdo du:pakto, Ru:tumkc agomcm luyirra lubila odokkc ake bojcru:lo:sin, lutadgo:bila.
Poulbv:lang Barnaba:bv Angunam
36Odokkc longc lo:pi:longoko lcdulo Poulbv Barnaba:mc luto, “Kajc, ngolu gvlatlangkula bvrokvdv:dcm gvla kangkakui nogor nogor appv:do okolo ngolu Ru:tumkc agomcm lutadgongkaji, odokkc bulu kapc idu:ji ka:lai.” 37Odokkc Barnaba:bv buluk lcdulo Jo:nmc sc:kom Mark cmna:sin gogdoji gvbolvngkang. 38Cmpige:la Poulbv mc:to buluk lcdulo gvboma:namdc aiya:yc sc:kobv Pampilia:dokkc gvngula du:pakka:ji, odokkc buluk lcdulo agerlo:pc gvmangaji. 39Odokkc kvnggv:pc luka:mvnsunam lenkang, cdcmpinamc bulu akonc akondcm mcpansuto; Barnaba:bv Markmc bvk lcdulo gvboto odokkc Sipru:pc ko:la gvkang, 40cmpige:la Poulbv Sila:mc bala la:to odokkc Ru:tumkc ayangki bvrokvdv:dc mclvgla:yam gvpansukang. 41Odokkc bv Siria:pclang Kilikia:dok gvko:la mondoli:kvdv:dcm kvnggv:mobomna gvkang.
Currently Selected:
AGER KVDVNG 15: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
