AGER KVDVNG 16
16
Timoti:bv Poulkclang Sila:kc Lcdulo Gvmvnnam
1Odokkc bv Derbi:do:pclang Listra:do:pcsin gvto odo agom tadjvgla gvmvnnc tani: ako dungai, Timoti: cmnamko, Jiwu nc:ng akodok awokonc sc:kobv mc:jvgnc tani:ka:ji; cmpige:la bvk abudc Girikkai. 2Listra:do:lang bvrokvdv:dc bvm aipc aincko cmna lunamkai. 3Poulbv Timoti:mc bvm gvjonsudopc mato; odokkc bvm bv goga:to odokkc odok mo:takdok Jiwukvdv:dok lcgangc bvm gadpukto, kapila:nc bulu appv:dc kindagai jc bvk abudc Girikkai. 4Bulu nogordok buluk gvtc:dok gvbomnammc, bulu bulum kangkvycpc cmna ru:lennamkvdv:dc lubito okodcm mclvgla ager germonam kvdv:dokkilang abv:nc kvdv:dokki sc:kobulu Jerusalemdo dungaji. 5Cdcmpila mondoli: kvdv:dcm mc:jvgkokki kvnggv:moto, odokkc bulu longgcm longgcm bojcbomkang.
Troa:do Poulkc Kangorka:nam
6Odokkc bulu Pirgiangclang Galatiang mo:takvkvdv:do gvgo:to Asiado agomdcm lubinamdcm Angunnc Yalodokki lutumla:yam. 7Odokkc cdvlo bulu Misia:dok kekonpc gvtoji, bulu Bitinia:pc gva:pc cmna kangkvto, cmpige:la Jisukc Yalodc bulum gvmotomang; 8cdcmpila, Misia:dok gvpatla gvla, bulu Troa:pc gvtokto. 9Odokkc yumcdo Poulmc kangorkonc lcngkansuto: Makedonia:dok tani:konc dagge:la bvm kumna:sola gogto odokkc scmpc lula, “Makedonia:so:pc gvtok odokkc ngolum ka:dumsuteika.” 10Odokkc cdvlo bv kangordcm ka:toji oddung ngolu Makedonia:pc gvpc cmna mato, Ru:tumbv ngolum tadponc lutaddcm bulum lubita:ka cmna gogtung cmna ru:scgge:la.
Pilippi:do: Lidia:kc Mc:jvgcla Gvmvnnam
11Troa:dokkc ko:la gvla:yam, ngolu yvggcmpc Samotra:spc ko:la gvto, odokkc odok longkondo Neapoli:pc, 12odokkc Pilippi:pc, okodc Makedonia jiladok bottcya:nc nogorcji, odokkc Roman Pa:m dokka:ji. Ngolu nogordo lowum lo:pi:ko du:tedto. 13Odokkc ager germa:pc yodla du:do longcdo gvlenna mo:ro:pc a:nc ru:yido:pc gvto, okolo ngolu mc:dungaji kumko mo:takko du:pc cmna, odokkc ngolu teda:la lckopc gvkumsunc nc:ngkvdv:dcm luto. 14Noluk agom tadnckvdv:dok akonc Tiatira nogordok Lidia cmnam nc:ngkai, ba:yomcmpc genc attarcm konckonc, sc:kobv Ru:ncpvncmc kumncka:ji. Ru:tumbv bvk asindcm Poulbv okodcm lubitoji cdcm tadgapdopc kuge:moto. 15Odokkc bvm cdvlo baptismo bitoji, bvk crang appv:dokki lckopc, bv ngolum kumna luto, scmpc lula, “Nolu ngom Ru:tummc mc:jvgla mc:ncko cmna mc:tomvlo, ngok okumpc gvla du:ta:ka.” Odokkc bv ngolum airu:pc lutvto.
Pilippi:dok Makana:lo
16Ngolu kumko okumdo:pc gvla du:namc, ngolum pagnc ko:ncngkonc rvgsuto sckkc aima:nc ager gernc yaloko dungaji odokkc bvk ru:tumdcm uiagomcm lula aipc arrcm pa:modungaji. 17Bv Poulkclang ngoluk lcdu lcdulo gvmvnto, scmpc jc:la lula: lula, “Sc tani:kvdv:sc Appvngcmyam Owudyangkodo Du:ncdok Ru:ncpvnckc ager gerya:nc, sc:kobulu turnamdok lambcdcm nolum lutadla lubidu:ji.” 18Odokkc cdcm bv bojcrung longcko lutvto. Cmpige:la Poulmc lugo-luroto, odokkc ngengkutsula yalodcm luto, “Ngo lurvdla ludung nom Jisu Kristokc aminno gvlentok.” Odokkc cdc odo ayirardo gvlenkang.
19Ckvdaggom bvk ru:tumdc cdvlo ka:toji jc buluk pa:barra pa:pcnamdc gvpakkang, bulu Poulmclang Sila:mc ycnggabto odokkc bulum attar kokodo:pc sobomna gvkang migom donckvdv:dok kcra:pc; 20odokkc cdvlo bulum kcba: ba:dom tadya:nc odokkc lulvg luncdok kcra:do:pc bulum boma:toji bulu luto, “Sc tani:kvdv:sc Jiwuc odokkc bulu ngoluk nogorscm urusare:modung. 21Bulu itcng gvtcngcm luyirdag okodc ngolu Romankvdv:dokkcpc lujvg lurodok lukampc torvgsula:mang cdcmpcmanggom iyitgvyitmang.” 22Cdc yadkumsunc tani:kvdv:dc bulum dcmkodo dcmtc:mvnto; odokkc kcba: ba:dom tadya:nc odokkc lulvg lunc tani:dc bvk gcnam attarkvdv:dcm petsotsuto odokkc bulum yogvr danggi:koki dcmdopc lulvgto. 23Odokkc bulum makana:lo tumto, makana:dok kanggabya:ncdcm bulum aiyo:pc lc:dopc lurvdlvgla luge:la. 24Bv cdc lurvdnamdokki, bv bulum arangkc makana:do tumto odokkc buluk alckvdv:dcm yc:jonna lc:nancdo yc:jonna lc:to.
25Cmpige:la yumc kvdvsudodo Poulbv:lang Sila:bv Kumna:la Ru:ncpvnckolo:pc ni:tom mola dungai odokkc makana:dok tumnam kvdv:dc buluk monamdcm tadla dungai, 26odokkc vgcmpc bottc:ru:nc tarcmo:tonko odo tonkang, cdcmpc tonka:nc jc makana:dok mogabnanc kvdv:dci cngunkang; odokkc oddung yabgo appv:dc kugeyamkang odokkc appvngkc ikoli:kvdv:dc oge:yamkang. 27Makana:dcm kanggabya:ncdc cdvlo kinsuka:ji odokkc ka:to jc makana:dok yabgodc moge:la dung, bvk yoksadcm bv sadlenge:la bv avdc nvgkesula sipc cmna ito, makana:dok tumna lc:namkvdv:dc dugamkangku cmna mc:la. 28Cmpige:la Poulbv bottapakpc jc:la lusangkang, “No avyc mokesuyoka, kapila:nc ngolu sc appvngc dung.”
29Odokkc bv saki:ko mala koto odokkc duga:to, odokkc pcsola jinna Poulkcla: Sila:kc kcra:do bv kcdangkang, 30odokkc bulum la:lenbomge:kula luto, “Tani:kvdvnga, ngo o:karko ipcnammcn?” 31Odo bulu luto, “Ru:tum Jisukolo mc:jvgtoka, odo no turycpc, no:lang nok okum crangc.” 32Odokkc bulu Ru:tumkc agomdcm bvm lubito odokkc bvk okumdok du:nc appv:dcm. 33Odokkc bv odo yumc ayirv:do bulum gvbokang, odokkc buluk dcmjognam kvdv:dcm vrpu:bito, odokkc bvm bagcmpc baptismo bvk crang appv:dokki lckko:pc bito. 34Odokkc bv bulum bvk okumdo:pc gva:botoku, odokkc bulum donam tv:namcm bito; odokkc bvk okum cra:dok appv:dokki bv mc:pomcnganto bv:jc Ru:ncpvnckolo mcjvgto cmna.
35Ckvdaggom cdvlo pva:la longcka:ji, kcba: ba:dom tadya:ncdc sipai kvdv:dcm scmpc lula mclvgto, “Cdc tani:kvdv:dcm gvmotokuka.” 36Odokkc makana:dcm kanggabya:ncdc cdc agomdcm Poulmc lubito, scmpc lula, “Kcba: ba:dom tadya:ncdc nolum gvmodokupc mclvgtok; su:pak cdcmpila mcnganna gvlenna gvkangka.” 37Cmpige:la Poulbv bulum luto, “Bulu ngolum appvngkc ka:pc dcmto, aimang cmna luma:nam tani:kvdvngcm, sc:kobulu Roman tani:ycji, odokkc ngolum makana:lo tumto; odokkc bulu ngolum su:pak lc:silai mclvgyckun? Ma: bulum avkvdv:dcm gvmotok odokkc ngolum la:lenmotokuk.” 38Sipaikvdv:dc cdc agomkvdv:dcm kcbang agom tadya:ncdcm lubitoku, odokkc bulu Roman amo:lok tani:yc cmna tadla bulu pcsokang; 39cdcmpila bulu gvla bulum lude:suto odokkc bulu bulum la:lenge:la nogordokkc gvlenna gvdokupc luto. 40Cdcmpila bulu makana: dokkc gvlenna gvkangku, odokkc Lidia:dcm gvla ka:to, bulu bulum aipc luyirto odokkc gvpakkang.
Currently Selected:
AGER KVDVNG 16: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
