AGER KVDVNG 17
17
Tissalonika:do
1Cdcmpc bulu cdvlo Ampipolisdo:lang Apollonia:dok ko:la gvtoji, bulu Tissalonika:do:pc gvto, okolo Jiwukvdv:dokkc kumko okumko dungaji. 2Odokkc Poulbv gva:to, bvk agin gvkamv:pc, odokkc kvnvd longc awumkopc buluk lcdulo bv agomcm svgka:mvnsuto astro:dok lcganc, 3Kristokcpc ipusire: pangge:la sikolokkc turkupcnamai cmnamdcm lulen-lua:la lubila, odokkc scmpc lula, “Sc Jisuscm sc:kom ngo nolum lutadcm lubidu:ji, bv:na Kristodc.” 4Odokkc bulukkodok akedcm lula mcnga:moto odokkc Poulkclang Sila:kc lcdulo lckokang; Girik kvdv:dok mcnggab garabnc kvdv:dc odokkc nc:ng kvdv:dok bottc bottcnc kvdv:dc.
5Cmpige:la Jiwukvdv:dc ncdagai odokkc tani:kcrc:dok aima:n ajonckkc jonsuge:la, bulu tani:kvdv:dcm kcrcngkopc yadkumsumoto, nogorpakdcm jcnggumna jc:moto, odokkc Jasonkc okumdcm moa:bomkang, bulum tani:kvdv:dok kangkolo:pc la:lenpc cmna mala. 6Odokkc bulu bulum mabegla:ma:la:yam, bulu Jasonmc:lang bvrrangkvdv:dok akkem nogordok migomdonc kvdv:dok kcra:lo:pc tvglenamto, scmpc jc:la, “sctani:kvdv:sc sc:kobulu mo:pvscm kukup-kulab-modu:nc so:pcsin gvdung, 7odokkc Jasonbv bulum torvgsuto; odokkc bulu appv:dc Kaesarkc lulvgnamdcm tadma:pc agercm idung, scmpc lula jc migom akoda dung Jisu cmnamko.” 8Odokkc nogordok migom donckvdv:dc:lang tani:kvdv:dc cdcm tadge:la mcngkin-mc:para:tomang. 9Odokkc bulu Jasonkolok odokkc akedok atvkosin ima:nam agomdcm pa:toji, bulu bulum mclvgtoku.
Birea:do
10Bvrrangkvdv:dc lomdanna Poulmclang Sila:mc yumcdo Birea:pc mcgcnnvgla mclvgto; odokkc cdvlo gvpv:toji bulu Jiwu kvdv:dok kumko okum kvdv:do gva:to. 11Cdcmpc inamc cdc Jiwukvdv:dc Tissalonika kvdv:dok Jiwukvdv:dcmyam asin aiya:dagai, kapcnc bulu airu:pc longgcm longgcm astorong agomkvdv:dcm lukamdcmpc idagji ima:ji cmna ka:la tadtvla agomdcm torvgsuto. 12Bulukkolok bojcrungc cdcmpila mc:jvgto, Girikkvdv:dok nc:ng ckkc amin gvnnc odokkc milbong ckkcsin. 13Ckvdaggom cdvlo Tissalonika:dok Jiwukvdv:dc kintoji Birea:do:sin Poulbv Ru:ncpvnckc agomdcm lutadbito, bulu odopcsin gvto, nvgur nvgbarlvgla odokkc yadkumsunc tani:kvdv:dcm lubonnvgla. 14Odo bvrokvdv:dc lomdanna Poulmc siycngpc mclvgto, cmpige:la Sila:lang Timoti:bv odo du:pakkang. 15Cdc sc:kobulu Poulmc gvlenbotoji Etenpc pv:lenboto; odokkc Sila:bv:lang Timoti:mc bvkkolo:pc gvdopc cddvko lomna gvla:dagji gvdopc lulvgnamdcm tadge:la gvpakkangku.
Etendo
16Cdcmpidodcm Poulbv Etendo bulum toya:la du:dodcm, bvk yalodc bvm lubito jc cdc nogordc murti:yc bi:la dung. 17Cdcmpila kumko okumdo Jiwu kvdv:dokki agom svgka:mvnsuto odokkc ainc agom aipc mc:nc tani:kvdv:dokki, odokkc attar kokorcko mo:takkvdv:do longgcm longgcm sc:kobulum odo rvgsutoji. 18Ipikuriang kvdv:dokkclang Istoik kvdv:dok mc:lenna agom lunckvdv:dc bvm rvgsuto. Odokkc akke luto, “Sc belbelaincsc okkom ludagji?” Akke luto, “Bv ami mongkvlok taycng among agom lutadbinc koncmpc idag–” kapila:nc bv Jisumclang Bvk sige:la turkunamdcm lutadbidag. 19Odokkc bulu bvm sogabge:la Are-opagu:pc boma:to, scmpc lula, “Ngolu nok sc anu luyir lubinamscm kinna:ycnci? 20Kapcnc no ngoluk yeru:so anu agomko tadbegmodung; ngolu cdcmpidag sc luyirsc okko cmdagji kinnv:dung.” 21Cdcmpidodcm Eteniang appv:dc odokkc ami amo:lok tani:kvdv:dc sc:kobulu odo dunggaji cmmumpc buluk ayircm o:kaiko luma:pc manggom atv anuko tadma:pc gvmomangai.
22Cdcmpila Poulbv, Are-opagu:dok pongkokdo dagge:la, luto: “Etensok tani:kvdvnga, ngo ka:to jc nolu appvng agerlo dormo kadag. 23Kapcnc ngo gvgo:la gvnamc odokkc noluk kumnam attarkvdv:dcm ka:namc, ngo scmpc adnam kumgcngko gvpa:suto, ‘Kinma:nam Uikolo:pc.’ Nolu cdcmpila okodcm kinma:pc kumdonc, cdcm ngo nolum lutadbidung. 24Ru:ncpvncbv sc:ko mo:pvscm motoji odokkc odok du:nc appv:dcm, tayctokkclang mo:pvsok Ru:tumpc ila, tani: monam uikumko okumlo du:mang, 25cdcmanggom tani: alakkoki ila:sa:la binammang, bv atvko madaggomci bvci appvng tani:ycm turnamcm bidag odokkc nganamcm odokkc appvngcm. 26Odokkc Bv appvngcm opvncm ako tani:olokkcm mo:pvsok appv:so du:dopc moto, buluk du:nam ayirkvdv:dcm ru:bila, jc bulu Ru:ncpncmc mapa:do, 27bulu Bvk mcngkampc mc:mvnycpc cmna odokkc Bvm pa:ycpc cmna mc:la. Ckvdaggom Bv ngoluk appvnglokkc mo:tc:mang 28kapcnc,
“ ‘Bvkkolo ngolu turdo odokkc gvgo:do odokkc ngolu turra du:namdcm pa:do;’ noluk kobitang adnckvdv:dc:sin lunamdcmpc,
“‘Kapila:nc ngolu aropakpci Bvkkolokkc lennc.’
29“Ru:nc pvnckolokkc lenncpc ige:la, ngolu mc:pa:mang jc taycngtok Ru:ncpvncdc avncmpc idag cmna, cdcmanggom silborcmpc; cdcmanggom vlvngcmpc, modun mola molennamdc dunggc:bila odokkc tani:lok mc:len mcngangai, 30kinma:pc du:nam ayirdcm Ru:ncpvncbv mc:yinsutobong, cmpige:la su:pak appv:lo Bv tani: appvngcm asin mcdvrla mc:latsutokuka cmna lulvgcm ludag, 31kapila:nc Bv mo:pvscm bvk mclvgnam tani: akokokki dormokokki kcbangcm bangkupc cmna longcko mctung, odokkc odokki Bv tani: appvngcm aroru:dcm lubitung bvm sikolokkcm darobmolangge:kula.”
32Cdcmpidodcm cdvlo bulu sinc tani:yc turkunamdcm tadtoji, akedc yirka:la luto; ckvdaggom akedc luto, “Ngolu lckoda sok agomcm tadycku.” 33Cdcmpila Poulbv bulukkolokkc gvlenna gvpakkang. 34Ckvdaggom tani: akke bvk lcdulo gvmvnkang odokkc mc:jvgto, odokbuluk Dionisiubv Are-opagdokkc odokkc Damari cmnam nc:ngkonc odokkc buluk lcdulo akkeda.
Currently Selected:
AGER KVDVNG 17: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
