LU:KKC 1
1
1Sc:kobulu lendodokkcbong amikkokki ka:nckvdvnga:nc odokkc agomdok lutadbigo:ncp ika:ji, bulu ngolum luyirkamdcmpc, 2ngoluk ara:lo aropc badnc agomkvdv:dok kvlenkvangcm adlenpc cmna bojcrungc adrobto; 3Cdcmpiga:lok, airu:pc mcnggcnam O Tiopilus, no oko oko luyircm pa:tonc, odokbuluk kvnggv:tarvngcm no kindopc. 4Ngo:sin lendodokkcbong appvng agomcm aiyo:pc magabbomna, nokkolo:pc aborkolok lcdulo aborko adnamcm aidopc ka:to.
5Judia:dok migom, Herodkc migom dododcm, Jakaria: cmnam mo ager gergcncko dungai, Abija:kolokkc lennc; odokkc bvk amincm Elijabet cmtagai. 6Odokkc bulu Ru:ncpvnckc kangkolo dormokannai, Ru:tumkc lulvgnam appv:dcm odokkc anguru:pc lunam lujvg lurokvdv:dcm aimang cmna lukosuma:pc incgvnnai. 7Cmpige:la bulukkc ko:kang kamangai, kapila:nc Elijabetbv ommang kamangai, odokkc anyipakdc mincmvjv:la gvbomdungaboi.
8Cdcmpc bv Ru:ncpvnckc ka:de:pc dormo ager gergcbomla du:dom, bvk gerpcnam ager lendom, 9dormoager gernamlok itcng gvtcngcmpc, bv Ru:tummc kumko okumdo gva:la dunangcm rompc cmna ikang. 10Odokkc yadkumsunc tani:appv:dc dup-dunang romdo ayirdo ru:yido kumna dungai.
11Odokkc odo dup-dunang romkodok lagbvg atakdo bvm Ru:tumkc taycng among lutad luncko dakkansubito. 12Odokkc Jakaria:bv mcngkin mc:para:tomang bvm ka:pangge:la, odokkc bvkkc pcsoko angkang. 13“Cmpige:la cdc taycng among lutad luncdc bvm luto, Pcsoyoka, Jakarianga, kapila:nc nok kumnamdcm tatto, odokkc nok nc:ng Elijabetbv milbong ko:ko pa:yc, odokkc no bvk, amincm Jo:n cmna minnvglang.
14Odokkc no mc:pomcngancm pa:ycpc,
odokkc bvm ododo bojcrung tani:yc mc:poyc;
15Kapila:nc bv Ru:tumkc kangkolo bottcpakyc,
odokkc bv apongcmmanggom angur alang vrncm tv:ma:yc.
Odokkc Bvk ancdok aki:ara:bo du:dodokkcboi
Angunnc Yalodc bvkkolo bi:danna du:yc.
16Odokkc Bv Israeldok bojcrungko ommangcm buluk
Ru:tum Ru:ncpvnckolo:pc gvlatboycku,
17Odokkc bv Elija:kc yalodokki Bvm gvpo:la gvyc,
abukvdv:dok asinkvdv:dcm awokvdv:do:pc mc:latmokupc,
odokkc Ru:ncpvnckcpc tani:kvdv:dcm mosv:pc cmna agom lukamdcmpc,
tadma:nckvdv:dcm dormo kanckvdv:dok agom kinnam-pa:nam kvdv:do:pc.”
18Odo Jakaria:bv taycng among lutad luncdcm luto, “kapc ngo cdcm kinycn? Kapila:nc ngo mvjvng tani:yc, odokkc ngok nc:dcsin sv:tcrsula mincka:bong.” 19Odokkc taycng among lutad luncdc bvm lubito, “Ngo Gabrielbv, Ru:ncpvnckc kangkolo sc:ko dakkansudu:nc; odokkc ngom nokkolo:pc tadponc lutadscm luta:ka cmna mclvgtung. 20Odokkc ka:langka, no aso:pc du:ycpc odokkc agomcm lula:ma:pc iycpc sc agomkvdv:sc aropc badma:sisscm, lcga:dc no ngok agomkvdv:dcm mc:jvgtomang, okokvdv:dc odokkbuluk ayirdo lukamdcmpc ingapycpc.”
21Odokkc tani:kvdv:dc Jakaria:mc toya:la dungapdungai, odokkc bulu kumko okum ara:do du:barnamdcm mcngapla:tomang. 22Odokkc bv gvlendokudo, bv bulum agomcm lubisula:tomang, odokkc bulu mcngkintomang jc bv kumko okum ara:do o:kai kangorko ka:to; odokkc bv bulum kanggod-mogoddcm lcngkanbito odokkc agom lula:ma:pc dungka. 23Odokkc bvk kumnam ager gernamdok ayirc gvngapdodcm, bvk okumpc bv gvkangku.
24Odo longcdok lcdudokkc bvk nc:ng Elijabetbv amvrro dungkang, odokkc po:lo pvngokopc bv avdc lc:sisuto, scmpc lula, 25“Ru:tumbv ngom ka:nam longc kvdv:so scmpc ito, ngok kolokkcm anyvngcm la:pakpc cmna.”
Jisumc Onamdcm Lungorla Lunam
26Po:lo pvkc:do taycng among lutad lunc Gabrielmc Ru:ncsa:nckolokkc Galildok Najaret cmnam nogorolo:pc mclvgtungai, 27Josep cmnam tani:kolok lcgang tadpvrnam ko:ncngko Dawidkc ope:lokkcm; odokkc cdc ko:nc:dok amincm Meri: cmtagai. 28Odokkc bvkkolo:pc bv gvangge:la luto, “C:i, airu:pc ayang abonamma, Ru:tumbv nok lcdulo dung!” 29Cmpige:la bv cdcmpc lunamdo airu:pc mcngkin mc:para:tomang, odokkc cdc kapinc tadponc lutadkonc cmna bvk asinbo mc:suto. 30Odokkc taycng among lutad luncdc bvm luto, “pcsoma:pcka, Meri:a, kapila:nc no Ru:ncsa:nckolok ayangabbom pa:to. 31Odokkc ka:toka, nok aki:bo ommang du:yc odokkc milbong awoko pa:yc, odokkc no Bvk amincm Jisu cmna minnvglang.
32“Bv bottcru:nckopc iyc, odokkc Tayc:rung yangkotok Du:ncdok Awodc cmna gogyc:
Odokkc Ru:tum Ru:ncpvncbv Bvm Bvk abu Dawidkc migom dungkodcm biyc,
33Odokkc Bv Jakobkc ope:dcm lo:dvpc ka:bom-dagbomyc;
odokkc Bvk migom dotc:dc cdvlosin yogma:yc.”
34Odokkc Meri:bv taycng among lutad luncdcm luto, “Kapc cdcmpc ila:ycncm, ngokkc milbongci kama:dapc?”
35Odokkc taycng lutad luncdc bvm luto,
“Angunnc Yalodc nom pa:yc, odokkc Tayc:rungyankotok owudya:nardok ilang-gvlang ugyumdc nom vgtidyc.
“Cdcmpidag cdc opcnam ko:dcm angunnc cmna luyc,
“Ru:ncpvnckc Awodc cmna. 36Odokkc ka:toka, nok ope:ncgvng nc:ng Elijabet bvk minc ncdoso:sin awoko amvrro du:nc; odokkc sc:kom ommang kama:nc cmtungaji po:lo pvkcngko ika:bong du:namc. 37Kapila:nc Ru:ncsa:nckcpc okkosin ilanggvla:ma:namc kamang.” 38Odokkc Meri:bv luto, “Ka:tok ngo Ru:tumkc alagpc lagbomnam pagnc; nok agom lukamdcmpci ngom imoteika.” Odokkc taycng among lutad luncdc odokkc gvpakkangku.
Meri:bv Elijabetmc Gvka:la Ka:nam
39Odo longckvdv:do Meri:bv darobla lomdanna adi: among dungko Judia:dok nogorkolo:pc gvkang, 40Odokkc Jakaria:kc okumpc gva:to odokkc Elijabetmc kumrvgsuto. 41Odokkc Elijabetbv Meri:kc kumrvgsunamdcm tadbegnammci, bvk aki:ara:bok ko:dc sumcsumkurkang; 42Odokkc Elijabetmc Angunnc Yalodc pv:namkopc pa:la:yam odokkc bottcru:pc jc:la lukang, “Nc:ngkvdv:dok ara:lo no gerncpu:nc, odokkc nok aki:bokkc lenncdc gerncpu:nc! 43Odokkc kapila scmpc mclvgtagncm, ngok Ru:tumkc ancdc:jc ngokkoso:pc gvdu:nc? 44Kapila:nc kangkvtoka, nok kumrvgsumamdok gomugdcm ngok yeru:so tadbegnammci, ngok aki:ara:bok ko:bc mc:pola sumc-sumkurkang. 45Odokkc Ru:nckolokkc okkom lutunganc cdc lunamdcmpc iycpc cmna mc:jvgncdc gerncpu:nc.”
Meri:kc Ru:ncpvncmc Kumna Monam Ni:tom
46Odokkc Meri:bv luto,
“Ngok asinsc luyiddung,
47Odokkc ngok asinsc Ru:ncsa:nckolo mc:podung ngok Moturnckolo,
48Kapila:nc Bvk ager gerya:nc ko:nc:dok
adji:opc du:nam dagnamdcm mcngkvbito.
Kapila:nc ka:toka, sukkolokkc appvng opvnc ngom gerncpu:nc cmyc;
49Kapila:nc sc:kobv bottcrungcnc Bv ngok lcga:pc
bottcru:nc agerko gerto,
odokkc Bvk amindc angunnc.
50Odokkc Bvk ayangc ope:lokkc
ope:akonlo:pc du:yc sc:kobulu Bvm pcsodagnc.
51Bvk alakkvdv:dokki ilang-gvlangcm Bv lcngkanto,
Bv luyidlunamcm buluk asinkvdv:do mcangamlvgto,
52Bv kvnggv:pc ilang-gvlangkvdv:dcm buluk
migom dola dungko kvdv:dcm la:paggamlettoku,
odokkc cdc cmmum kvdv:dcm la:sangamlvgto;
53Bv kcno:nckvdv:dcm ainc attarcm bila dotv:sumoto,
odokkc mircmnc kvdv:dcm alag anggara:pc gvmotoku.
54Bvk ager gerya:nc Israeldcm gerdumsuto,
Bvk mc:yinsunamdcm mc:pa:la,
55Abrahammc odokkc Bvk awo ommang kvdv:do:pc lo:dv:pc
Bv ngoluk abukvdv:dcm lukamdcmpc.”
56Odokkc Meri:bv bvk lcdulo po:lo pvwumkvramkopc du:mvnto, odokkc bvk okumpc gvkangku.
Jo:n Baptismo Bincmc Onam
57Cdcmpidodcm Elijabetbv ko:pa:dvkang, odokkc bv milbong ko:ako oto. 58Odokkc bvk kumrv-ko:rv kvdv:dc:lang ope:ncgvng kvdv:dc Ru:tumbv bvm bottcru:nc ayangko bito cmna tadto, odokkc bvkkokki mc:poto.
59Odokkc pi:nyi longcdo bulu ko:dcm gadpuknam ager gerkapc gvto; odokkc bulu bvk abudok amin minkamv:pc Jakaria cmna minnvgpc itungai, 60cmpige:la bvk ancdc luto, “Cdcmpcmang; bvk amincm Jo:n cmna minyc.”
61Odokkc bulu bvm luto, “Nok avkc ope:ncgvng kvdv:dc cdc amindcm sckkcmsinci minnvgmang.” 62Odokkc bulu bvk abudcm sutkanna lcngkanto, okkomna bvm gogpcnammcji.
63Odokkc bv abvg adgc:nanc adtakko koto, odokkc adto, “Bvk amin Jo:nc.” Odokkc appvngc mc:lamcngapla:tomang. 64Odokkc oddung bvk nappa:dc kokakangku odokkc bvk ayodc rcmakkang, odokkc bv agom lutoku, Ru:ncsa:ncmc aipai cmna. 65Odokkc cdc appv:dok agomcm Judiang adi: among do:lungkvdv:do kvtagsukang; 66Odokkc buluk agom appv:dcm tadnc appv:dc buluk asinkvdv:do mcnggabamna lc:to, scmpc lula, “Cmpcmvlo sc ko:sc okopc iycji?” Kapila:nc Ru:tumkc alagdc bvk lcdulo dungai.
Jakaria:kc Lungorlunam
67Odokkc bvk abu Jakaria:bv Angunnc Yalodc gagla, odokkc lungorcm luto, scmpc lula,
68“Israeldok Ru:tum Ru:ncsa:ncb gerka:langka,
Kapila:nc Bvk tani:kvdv:dcm gvka:la Bv ka:to odokkc rclentoku,
69odokkc Bvk ager gerya:nc Dawidkc ope:do
ngoluk lcga:pc turkunamlok a:rcngko sa:moto,
70Lekelokkcbong Bvk lungor lunckvdv:dokki Bv lunamdcmpc,
71ngolujc ngoluk mirukvd:dokkc mopvsupcnammc,
odokkc ngolum tayumnckvdv:dok alagkvdv:dokkcm;
72ayangcm lcngkandopc ngoluk abukvdv:dcm pesubinamdcmpc,
odokkc bvk angunnc pesula lugoddcm mc:pa:dopc,
73ngoluk abu Abrahammc pesubinamdcm,
74ngolujc, ngoluk mirukvdv:dok alaglokkcm mopvkunamc,
Bvm pcsokama:pc Bvk agercm gerdopc,
75angunna odokkc dormokanamkokki Bvk
kcra:lo odokkc ngoluk turradu:dag appv:so.
76Odokkc no kowawnom, Appvngcmyam Owudyangkolo
du:ncdok lungor lunncmna gogyc;
Kapila:nc no Ru:tummc gvpo:la
Bvk lambcm mopungkapc gvycpc,
77Bvk tani:kvdv:dcm mopvkunamlok kinnamcm bikapc buluk pa:pkvdv:dcm mc:yinsubi-la:mvlo,
78ngoluk Ru:ncpvnckc rcmakpc mc:yinsunamdokki,
cdvlo cdc longcdc ngolukkolo
pvnga:ycnc taycng amo:tokkc
79Kcmolo odokkc siko ugyumlo tedla du:nckvdv:dcm pvangcm bikapc,
ngoluk alckvdv:dcm mc:pola dungkolo gvbodopc.”
80Odokkc cdc ko:dc bottala yaloki kvnggv:tarvngkang, odokkc bv yumrangolo du:to bvk Israel opvndcm lcngkansuma:dodo:pc.
Currently Selected:
LU:KKC 1: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
