MARKKC 16
16
Turkunamdc
(Met 28.1-8; Lu:k 24.1-12; Jo:n 20.1-20)
1Odokkc yodla du:nam longcdc gvngapnammc, Magdalini Meri:bv odokkc Jakobkc anc Meri:bv, odokkc o:ri: attarcm rcto, Bvm gvla bulu amvrdo yonnvgkapc cmna. 2Odokkc longc kvnvddok a:pongarnc longcdo rokompc bulu agodo:pc gvkang do:nyc sa:lendodo. 3Odokkc bulu akoncm akonc luka:mvnsukang, “Ngolum sc:ko vlv:dcm kurpakbiycn agodok yabgodokkcm?” 4Odokkc bcrsa:la ka:namc cdc vlv:dcm kcdpakla lc:namdcm bulu ka:begto–cdc aipc pvtadagai. 5Odokkc agodok ara:do gva:nammc, bulu lagbvgpc ya:me:tani:ko tedla du:dopc ka:begto, kamponc attar gcncko; odokkc bulu kangaksukang.
6Odo bv bulum luto, “Kangaksuyoka; nolu Najaretolok Jisumc madung, sckom kuruslo pvtketonc. Bv darobkangku, Bv sc kamang; bulu okolo Bvm lc:taganc cdc mo:takdcm ka:ta:ka. 7Cmpige:la gvkangkuk, Bvk agom tadjvgla gvmvnnc tani:kvdv:dcm lubita:kuk odokkc Pitormc Bv:jc nolum gvpong gvpongo:la Galilpc gvyc cmna; olo Bvm nolu ka:begycpc, Bv nolum lukamdcmpc.”
8Odokkc bulu gvlentoku odokkc agodokkc dukkangku; kapila:nc bulukkc jinnamc odokkc mc:la mc:ngapla:ma:nampc ikang; odokkc bulu sc:komsin okkomsin lutomang, kapila:nc bulu pcsokangai.
Jisubv Magdalini Meri:mc Lcngkansunam
(Met 28.9-10; Jo:n 20.11-18)
9Bv cdcmpc longc kvnvddok a:pongarnc longcdo turlangkula, Bv Magdalini Meri:yarmc lcngkansuto, sckkolokkcm Bv kvnvdkopc uiycm mcnpakkaji. 10Bv gvkangku odokkc bvk lcdulo du:mvnnc kvdv:dcm lungapbitoku, bulu mc:dvrra odokkc kabla du:dodcm. 11Cmpige:la bulu Bv turradung odokkc bv ka:to cmna tadbegnammc, bulu cdcm mc:jvgtomang.
Jisubv Agom Tadjvgla Gvmvnnc Anyiko Lcngkansukunam
(Lu:k 24.13-35)
12Odok lcdupc angupc badge:la buluk anyidcm lcngkansuto, bulu do:lu:do:pc gvdokudodcm. 13Odokkc bulu gvlattoku odokkc akedcm lubitoku, ckvdaggom bulu mc:jvgtomang.
Jisub Vyvngkolang Akodcm Lcngkansunam
(Met 28.16-20; Lu:k 24.36-49; Jo:n 20.19-23; Ager 1.6-8)
14Odok lcdupc Bv vyvngkolang akodcm lcngkansuto bulu bullong tcbuldo dodotv:dom; odokkc Bv bulum luka:la luto buluk mc:jvgma:nam kvdv:dokki odokkc asinkvdv:dok tornamkvdv:dokki, lcga:dc bulu Bvk turnamdcm kangge:la:sin mc:jvgtomang. 15Odokkc Bv bulum luto, “Mo:pvsok appv:lo:pc gvkangka odokkc ru:nam appv:dcm tadponc lutaddcm lutadta:ka. 16Sc:kobv mc:jvgycnc odokkc baptismongcm la:ycnc bv moturnam pa:yc; cmpige:la sc:ko mc:jvgma:ycnc, sika:langka cmna tolvgyc. 17Odokkc mc:jvgnckvdv:dok lcdulo sc: kanggodkvdv:sc gvmvnycpc; ngok aminno bulu uiycm mcnpakyc; bulu anu ayoki agomcm luyc; 18bulu tabbcm gagsa:la:yc, odokkc bulu tvngkesula sipcnamko tv:mvlogom, cdc bulum tv:nvgsumoma:yc; bulu mola:ma:nc tani:kvdvdcm alagcm riyitbiyc bulu csa:ycku.”
Jisumc Taycng Amo:pc Dcsa:bomkunam
(Lu:k 24.50-53; Ager 1.9-11)
19Cmpige:la Ru:tum Jisubv, bulum Bv lungapdodcm taycng amo:c bompakkangku, odokkc Ru:ncsa:nckc lagbvgpc tedkang. 20Odokkc bulu gvngapkang odokkc appv:lo lutadbigo:to, Ru:tumbv buluk lcdulo germvnto odokkc lutad lunamdcm arro cmna odok kanggodkvdv:dokki lcngkanamto. Amen.
Currently Selected:
MARKKC 16: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
