MARKKC 10
10
Jisubv Nc:ng Mcpakkunamcm Luyirnam
(Met 19.1-12; Lu:k 16.18)
1Odokkc Bv cdcm mcto odokkc Judia dunggo:-ycgodo:pc odokkc Jordandcm gvbadla gvkang, odokkc yadkumsunc tani:yc lckoda bvm yadrumbomkang; odokkc lckoda Bvk lukampc, Bv bulum luyirto.
2Odokkc Parisi:kvdv:dc gva:la Bvm ankang kangkvpc cmna tawuto, “Tani:akolokkcpc nc:ngcm mcpakkunamdc lujvg luro lunamdcmpc idang?”
3Bv bulum lubito, “Mose:bv nolum okkom lulvgtagan?”
4Bulu luto, “Mose:bv tani: akonc mcpakkunamlok agom adgabnam puti:ko admodag, odokkc bvm mcpakmodoku.”
5Cmpige:la Jisubv bulum lubito, “Noluk asinkvdv:dok mcnga:ma:namloksin mcnga:ma:namki tada:ma:namloksin tadama:namkokki bv cdc lulvgdcm nolum adto. 6Cmpige:la runga:dodokkc ‘Ru:ncsa:ncbv bulum milbo:pcla: ncngpc ru:to.’ 7‘Odok lcgangc tani: akonc bvk abudcmnang ancdcm mcdo odokkc bvk nc:dokki lckodo. 8Odokkc cdc anyidc amvr akkongkopc iyc.’ Cdcmpila bulu anyima:bong cmpige:la amvr akkongc. 9Okodcm cdcmipdag Ru:ncsa:ncbv lckopc ru:pumsudagnc cdcm tani:yc angu angu cmpa:mang.”
10Odokkc okum ara:do Bvk agom tadjvgla gvmvnnc tani:kvdv:dc lckoda cdc agomdcm tawutoku. 11Odokkc Bv bulum luto, “Sc:kobvi bvk nc:ngcm mcpakdokunc odokkc akonko midangcm modokunc, bvm la:pa:ma:pc la:nampc idag; 12odokkc bvk milbo:dcm bv mcpakyckumvlo odokkc akonkolo gvkumvlo, bv la:pa:manampc idag.”
Jisubv Adjionc Ko:kvdv:dcm Akirba:d Binam
(Met 19.13-15; Lu:k 18.15-17)
13Odokkc bulu ko:kangkvdv:dcm Bvkkolo:pc gva:boto, Bv:jen bulum ri:yidycpc cmna; odokkc agom tadjvgla gvmvnnc tani:kvdv:dc ge:rvdto. 14Cmpige:la Jisubv cdcm kangge:la kvnggv:pc aglvng sangkang, odokkc bulum luto, “Ko:kangkvdv:dcm ngokkoso:pc gva:motoka, bulum lutumyok; kapila:nc cdcmpinc kvdv:dokkcpcmvn Ru:ncsa:nckc migom doko mo:pvdc. 15Aropakpc, ngo nolum lubidung, sc:kobvi ko:kangcmpc ima:ycnc Ru:ncsa:nckc migomdokodo:pc gva:langkuma:yc.” 16Odokkc Bv bulum alakdo boge:la, buluk taycdo alagso:nyidcm pigabge:la gerka: pungka:langka cmbito.
Mircmnc Tani:dc
(Met 19.16-30; Lu:k 18.18-30)
17Odokkc Bvk gvtc:lok gvbomnammc, tani:akonc duga:la Bvk kcra:do lcbvng tumangkang, odokkc Bvm tawuto, “Airu:nc Luyirna, turyarla turnamdcm pa:pc ngo okkardcm ipcru:nammcn?”
18Odokkc Jisubv bvm luto, “Kapila no ngom airu:nc cmdang? Ru:ncsa:ncbv:ma:mvlo sc:kobv:sin aimang. 19No lulvgnam kvdv:dcm kindoyc: ‘Tani:ycm mokeyoka, la:pa:ma:pc nc:ngcm la:yoka, Dopso:yoka, Lume:pc amikc agomcm lukanbiyoka, yadgo:-mogo:yoka, Nok abbomnang anncm mcnggclangka.’ ”
20Odokkc bv luto, “Luyirna, cdc appv:dcm ngok ya:me:dokkcbong lukamdcmpci ila dung.”
21Odo Jisubv bvm kangge:la ayangkang; odokkc luto bvm, “Nokkc abangko pv:ramdung; gvkangkuk, nokkc oko okko du:nc kopakta:ka, odokkc opan tani:kvdv:dcm bipakta:kuk,” 22Cdc lunamdokki bvk dumsimikmodc angukang, odokkc bv mc:dvrmc:so:la gvkangku; kapila:nc bvkkc bojcrungko mitcmircmc dungai.
23Jisubv olo-tolopc kango:suto odokkc Bvk agom tadjvgla gvmvnnc tani:kvdv:dcm luto, “Sc:kobulukkc mitcmircmc du:nc Ru:ncpvnckc migom dotc:do:pc gvangkupc cddvkojc gva:la:ma:pc idagnc!”
24Odo agom tadjvgla gvmvnnc tani:kvdv:dc Bvk agom kvdv:dcm mc:la mcngapla:tomang. Cmpige:la Jisubv bulum lckoda luto, “C: ko:kvdvnga, cdc cddvkojc gva:langkuma:namcnc Ru:ncsa:nckc migom dotc:do:pc! 25U:t gure:yc pcsi aru:lok gvko:pci gvko:poya:dag mircmnc tani:akonc Ru:ncsa:nckc migom dokodo gva:namdcmpcyam.”
26Odokkc bulu cmpcsin mcngapla:tomang, odokkc Bvm luto, “Cmpcmvlo sc:kobvm moturycn.”
27Jisubv bulum kangge:la luto, “Tani:kcpc cdc ila:ma:namc, cmpige:la Ru:ncsa:nckcpc ilang-gvla:ma:nammang; kapila:nc appvngcm Ru:ncsa:ncbv ila:dag.”
28Pitorbv Bvm lurobbomkang, “Ka:toka, ngolu appvngcm mcpakto odokkc nok lcdulo gvmvnto.”
29Jisubv luto, “Aropakpc, ngo nolum lubidung, okumcmmanggom bvrrangcm, bvrmangcm, anncm, abbom, ommangcm manggom amongcm ngok lcgangc odokkc tadponc lutaddok lcgangc lvngkokopc mcge:la, 30okumcmbulum, odokkc bvrrangcm odokkc bvrmangcm odokkc ancabbom odokkc ommangcmbulum, amongcmbulum, ipusire:ycm ikosutu:la, odokkc angkupcnc dv:tak kvdv:do turyarla turkunamdcm pangkuma:ycpc sc:kosin sc kamang, 31Ckvdaggom gvpo:nc bojcrungc lcddarpc iyckupc, odokkc lcddarkc kvdv:dc gvpongarncpc iycpc.”
Jisubv Lcumkopc Bvk Sinam Agom Lubisunam
(Met 20.17-19; Lu:k 18.31-34)
32Odokkc bulu ali: lambcdok Jerusalempc cmna gvdodcm, Jisubv bulum gvpong gvpo:la gvdungai; odokkc bulu mcngapla:tomang, odokkc Bvk lcdulo gvmvnnckvdv:dc pcssamkang. Odokkc kapc iycji cdcm lurrobomkang, scmpc lula, 33“Ka:toka, ngolu Jerusalempc gvdung; odokkc tani:kc Awodcm kumnam ager gernclok bottarya:nc tani:kvdv:dcm odokkc ainc agom poyirnckvdv:dcm togc:lvgyc, odokkc bulu bvm mokedopc lulvgyc odokkc Ru:ncsa:ncmc kumma:nc tani:kvdv:dcm togc:lvgyc; 34odokkc bulu Bvm moki:moadyc, odokkc Bvm takircm sukkatyc, odokkc Bvm sabukkoki dcmyc, odokkc mokeyc; odokkc lowum longc lcdulo Bv turycku.”
Jakobkclang Jo:nkc Lurcnam
(Met 20.20-28)
35Odokkc Jakoblang Jo:nbv Jebidi:kc awokvdv:dc, Bvk kcra:do:pc gva:to, odokkc Bvm luto, “Luyirna, ngolu okkom iteika cmna mc:du:nc no ibiteika cmna mc:dung.” Odokkc Bv bulum luto,
36“Ngo nolum okkom iteika cmna mc:dnag?”
37Odo bulu Bvm luto, “Ngolum dungkoko bi:ka, akoncm nok lagbvgpc odokkc akoncm nok lakkepc, nok angunna dungkodo du:dokudodo.” Cmpige:la Jisubv bulum luto. 38“Nolu kinmang okkom nolu kodu:song. Ngok tv:nanc bati:do nolu tv:la:dolang, cdcmanggom baptismongcm la:la:yclang ngo oko baptismongcm langkaji?”
39Odo bulu Bvm luto, “Ngolu tv:la:dag.” Odokkc Jisubv bulum luto, “Ngok tv:nanc bati:do nolu tv:yc; odokkc ngok baptismo la:namdcm nolu la:mvnyc; 40ckvdaggom ngok lagbvgpclang lakkepc tednamdc ngok bila:nammang, cmpige:la cdc sc:kobuluk lcgangc mosv:la lc:tagnc buluk lcgangc.”
41Odokkc cdcm cdc vyv:dc tannamc, bulu Jakoblang Jo:nmc kvnggv:pc aglvng sangkang. 42Odokkc Jisubv bulum Bvkkolo:pc goga:to odokkc bulum luto, “Ru:ncsa:ncmc kinma:nc tani:kvdv:dok migom donckvdv:dc buluk ru:tumc cmna nolu bulum kindag, odokkc buluk botta bottanc tani:kvdv:dc kvnggv:pc ilang gvlangcm buluk tayc:lo idag. 43Cmpige:la noluk ara:lo cdcmpc ima:yc; cmpige:la noluk sc:kobvi bottcncpc iycnc bv noluk ager gerya:ncpc iyc, 44odokkc sc:kobvi gvpongarncpc noluk ara:lo iycnc bv appvngkc ager gerya:ncpc ipa:ru:yc. 45Kapila:nc tani:kc awodc:sin atvko ila:sa:la binamko pangkapc gvmang cmpige:la atvko ila:sa:la bikapcmvn gvdu:n, odokkc Bv bojcru:lok turnam lcgangc rcpvtnanc arc bikapc.”
Jisubv Miglunc Bartimaeumc Ka:begmokunam
(Met 20.29-34; Lu:k 18.35-43)
46Odokkc bulu Jerikodo:pc gvto; odokkc Bv Jeriko:dcm mcge:la Bvk agom tadjvgla gvmvnnc tani:kvdv:dokki odokkc bottcru:nc yadkumsunc tani:kcrcngko; gvbola gvddom, miglunc kogo:nc Timaeukc awo Bartimaeumc ali:lambc ru:yido tedla du:dopc rvgsuto. 47Odokkc cdvlo bv cdc Najaretdok Jisubv cmna tattonc, bv jc:robbomkang odokkc luto, “O: Dawidkc Awo, Jisu, ngom aya:teipcn!”
48Odo bojcrungc bvm morvdto, bvm aso:pc du:tok cmnang cmna; cmpige:la bv bojcya:pc jc:robbomkang, “Dawidkc Awono, ngom aya:teika!”
49Odokkc Jisubv du:tedge:la luto, “Bvm gogtok.” Odokkc bulu miglunc tani:dcm goga:to, bvm scmpc lula, “Pesoma:pcka; darobtok, bv nom gogdung.”
50Odo bvk gasorcm crpaksudangge:la bv sumrobge:la Jisukolo:pc gva:to.
51Odokkc Jisubv bvm luto, “Ngo nom o:ko iteika cmna no mc:dang?” Odo cdc miglunc tani:dc Bvm luto, “Ru:tuma, ngok ka:begcm ngom ka:pa:moteikuka.” 52Odo Jisubv bvm luto, “Nok gvpckolok gvkang; nok mc:jvgnamdci nom csa:motoku.” Odokkc vgcmpc bv ka:begkangku odokkc Bvk lcdu lcdulo lambcdok gvmvnkang.
Currently Selected:
MARKKC 10: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
