MARKKC 11
11
Jerusalempc Mopvnamlok Rc:batlvgla Gva:nam
(Met 21.1-11; Lu:k 19.28-40; Jo:n 12.12-19)
1Odokkc cdvlo bulu Jerusalem aninpc pvnga:tonc, Betpagi: odokkc Betani:pc, Olib Adi:do:pc, Bvk agom tadjvgla gvmvnnc tani:anyiko Bv mclvgto, odokkc bulum luto, 2“Noluk kcrangkc do:lungolo:pc gvkang, odokkc nolu olo gva:danycmvloi gado: gure: awo adorko rvnna lc:namko pa:ycpc, sc:kosin cdcm sangkvma:namko; cdcm sa:rge:la go:bomlangkuka. 3Sc:koiyc nolum ‘Kapila nolu cdcmpc idu:n?’ Cmna luycmvlo lulang, ‘Ru:tumbv cdcm madag odokkc lomdanna cdcm so:pc mclatlvgycku.’ ”
4Odokkc bulu gvkang, odokkc yabgo moro:lo ali:lo rvnna lc:nam gado: gure: awo adorko gvla pa:to; odokkc bulu cdcm sarto. 5Odokkc sc:kobulu odo dagla dungaji bulu luto, “Nolu okkom idu:n, gado gure: awodcm sarla?”
6Odo bulu bulum lubito Jisubv okodcm lukaji; odokkc bulu bulum gvmotoku. 7Odokkc bulu gado: gure: awodcm Jisukolo:pc go:bombitoku, odokkc bulu gcnam gasor attarkvdv:dcm odok tayc:do pulvgamto; odokkc odok tayc:do Bv sa:to. 8Odokkc bojcrungko buluk gasor attarkvdv:dcm ali: lambcdo pungapbito, odokkc akke annc kanc vsvng rcngke:ycm pulvgamto okodcm bulu arvglokkcm pakaji. 9Odokkc Bvm gvpo:la gvnckvdv:dc odokkc Bvk lcdu lcdulo gvmvnnckvdv:dc jc:robbomkang, “Kumtoka! Pu:pojarpa:ncdc Bv sc:kobv Ru:tumkc aminno gvdu:nc! 10Pu:pojarpa:nc ngoluk abu Dawidkc migom dotcngc pvnga:dobonc! Appvngcmyam owudyangkoto kumnamc!”
11Odokkc Bv Jerusalemdo gva:la kumko okumdo:pc gvto; odokkc cdvlo appv:dcm kanggongamtonc, do:nyc kamangabo:la, Bv vyvngkola: anyidcm Betani:pc gvbola gvkang.
Jisubv Tajvg Vsvng Amv:dcm Pelvgnam
(Met 21.18-19)
12Odok longkondo, bulu Betani:dokkc cdvlo gvtokunc, Bv Kcnongkangai. 13Odokkc motcngo:pc tajvg amvngko annckadopc ka:la, Bv o:kaikoba: pa:ycji cmna cdcm kangkapc odopc gva:nammc, Bv okkomsin ka:begma:pc annc anggara:dcm ka:begto, kapila:nc odo tajvg a:yc e:dvmangai. 14Odokkc Bv cdcm luto, “Nokkolokkcm lckoda sc:kosin a:ycm domangka:langka.” Odokkc Bvk agom tadjvgla gvmvnnc tani:kvdv:dc cdcm tatto.
Jisubv Kumko Okumdo:pc Gvnam
(Met 21.12-17; Lu:k 19.45-48; Jo:n 2.12-22)
15Odokkc bulu Jerusalempc gvtoku. Odokkc kumko okumdo:pc gvangge:la sc:kobulu kumko okumdo attarcm rcnam-konam idunganc cdcmbulum mcnnenam robbomkang, odokkc Bv murkong olainckvdv:dok tcbulkvdv:dcm kuladam bito odokkc parong konckvdv:dok dungkokvdv:dcm; 16Odokkc Bv sc:komsin kumko okum ara:dok okkomsin bommotomang. 17Odokkc Bv luyirto, odokkc bulum luto, “Cdcm adla lc:ma:lang, ‘Ngok okumdcm appvng opvnlok kumko okumc cmna luyc?’ Cmpige:la nolu ccdcm rotkudnckvdv:dok dungkopc ito.”
18Odokkc kumnam ager gernckvdv:dok bottarya:nckvdv:dc odokkc ainc agom luyirnckvdv:dc cdcm tatto odokkc Bvm mokenanc lambcko mago:to; kapila:nc bulu Bvm pcsokang, kapila:nc yadkumsunc tani:appv:dc Bvk luyirnamdcm mc:la mcngapla:ma:pc ikang. 19Odokkc yumc ayir a:namc nogordokkc gvpaktoku.
Tajvg Amv:dok Kinpcnam Agomdc
(Met 21.20-22)
20Ro:dcm bulu gvbatbomnamc, bulu tajvg amv:dcm appvrdokkcbong sanpakla du:dopc ka:begtoku. 21Odokkc Pitorbv mc:pa:toku odokkc Bvm luto, “Ru:tuma, Kangkvka! Nok pelvgnam tajvg amv:dc sanpakkang.”
22Odokkc Jisubv bulum lubito, “Ru:ncsa:ncmc mc:jvgsutoka. 23Aropakpc, ngo nolum lubidung, sc:kobvi sc adi:scm, ‘Benyakla kukpakka:langka odokkc siycng asilo ojvngka:langka,’ cmna luycnc, odokkc bvk asinbo mc:moko kama:yc, cmpige:la bv okodcm lutonc cdcmpci iyc, cdcm bvkkcpc ibiyc. 24Cdcmpiga:lok ngo nolum lubidung, nolu okodcmci kumdom koycnc, mc:jvglangka jc nolu cdcm pa:tobong cdcm, odokkc cdc nolukkcpc iycpc. 25Odokkc cdvloi nolu kumdom dagrobdonc, mc:yinsulang nokkc sc:kaikc mcngkamdcmpc mc:ma:namko du:mvlo; 26odomvlo noluk taycng amo:tok du:nc Abubv:sin noluk imursiyarlokkc mc:yinsuycpc.”
Jisukc Sotto Agomcm Tawunam
(Met 21.23-37; Lu:k 20.1-8)
27Odokkc bulu lckoda Jerusalempc gvtoku. Odokkc Bv kumko okumdo gvgo:la olo-tolopc gvi-gvsa:la du:namc, kumnam ager gernc bottarya:nc kvdv:dc odokkc ainc agom luyirnckvdv:dc odokkc mvjvgkvdv:dc Bvkkolo:pc gva:to, odokkc bulu Bvm luto, 28“No oko ilang-gvla:namki scmbulum idu:n, cdcmanggom sc:ko nom ilang-gvlangcm cdcmbulum idopc bitang?”
29Jisubv bulum luto, “Ngo nolum tawunam agom ako tadyc; ngom lutei, odokkc ngo nolum lubiyc oko ilang-gvlangki ngo scmbulum idoji. 30Jo:nkc Baptismo binamdc taycng amo:tokka:nci cdcmanggom tani:kvdv:dokka:nci? Ngom lutei.”
31Odo bulu akonc akoncm luka:mvnsuto cdcmpc cdcmpcmang cmna, “‘Taycng amo:tokkc,’ cmna ngolu lumvlo, Bv luyc, ‘Kapila nolu cmpcmvlo Bvm mc:tinsutoma:n?’ ” 32Ckvdaggom ngolu luycnci, “Tani:kvdv:dokkc cmna?” bulu tani:kvdv:dcm pcsokang, kapila:nc appvngc taddagai Jo:nbv aroru:pc agom lungornai. 33Cmpige:la bulu Jisumc lubito, “Ngolu kinmang.” Odo Jisubv bulum lubito, “Ngo:sin nolum lubige:mang oko ilang-gvla:namkokki ngo scmbulum idagji.”
Currently Selected:
MARKKC 11: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
