MARKKC 7
7
Lekekc Lenpo:nc Tani:kvdv:dok Agom Luyir
(Met 15.1-9)
1Cdcmpc idodcm Parisikvdv:dc Bvk kcra:do gvkumsuto, poyirnckvdv:dok akkem gvtc:bola, sc:kobulu Jerusalemdokkc gvdaganc, 2bulu ka:to jc Bvk agom tadjvgla gvmvnnc tani: ckkcnc lasug suma:nam allakki doto-tv:to, cdc:, vrpu:suma:nammc.
3(Kapila:nc Parisikvdv:dc, odokkc Jiwudi: appv:dc, buluk alakkvdv:dcm vrpu:suma:sisscm doma:-tv:mang, abv:nc kvdv:dok leketo:dvlokkcbong itcng gvtcngnam kvdv:dcm ila:yam; 4odokkc bulu attar kokolokkc gvdokuwcm, bulu avyc angumokuma:sisscm dokutvngkumang; odokkc buluk inam itcng gvtcng bojcrungkoda dung, bati:ycmna ki:lvngcm vrpu:nammc odokkc pitol attarcm.)
5Odokkc Parisikvdv:dc:lang poyirnckvdv:dc bvm tawuto, “Nok agom tadjvgla gvmvnnc tani:kvdv:dc mvjvng kvdv:dok itcng gvtc:dcmpc kapila imang-gvma:n, cmpige:la vrpusuma:nam alakkoki dodag tv:dagnc?”
6Odokkc Bv bulum lubito, “Nolu lc:sula agom lunc kvdv:dok agomcm Isaia:bv aiyo:pc lungorcm luto, cdcm adla lc:namdcmpc:
‘Sc tani:kvdv:sc ngom nabberdokki luyit ludag, cmpige:la buluk asinkvdv:dc ngokkolokkc mo:tc:ru:pc dung;
7bulu cmmumpc ngom kumdag;
tani:kvdv:dok luyir agomkvdv:dcm
totto agom cmna luyirdag.’
8“Nolu Ru:ncsa:nckc lulvg agomdcm mcpakdag, odokkc tani:kvdv:dok itcng–gvtc:dcm kvnggv:pc gaggapla du:dag.”
9Odokkc Bv bulum luto, “Nolukkc Ru:ncsa:nckc lulvgnamdcm tadma:pc mc:nanc ainc lambc dung, noluk itcng-gvtcng kvdv:dcm itvla du:pc cmna. 10Kapila:nc Mose:bv lutagai, ‘Nok anncmlang abbom’ mcnggclangka odokkc, ‘Sc:kobv abbom manggom anncm aima:pc luycnc bv sika:ru:langka:’ 11‘Cmpige:la nolu ludag, tani:akonc bvk abudcm manggom ancdcm luyc, okodcm ngolukkolokkc pa:ycnc cdc korbanc’ (cdc, Ru:ncpvnckolo:pc pvtomnammc,) 12odo nolu bvm atvkosin bvk abudok manggom ancdok lcga:pc imoma:bong, 13cdcmpc nolu itcng gvtcngcm iyir-gvyir kvdv:dokki Ru:ncsa:nckc agomcm motumdung. Odokkc cdcmpinc bojcrungko agercm nolu gerdag.”
Tani:akoncm Narc:ma:pc Imonc Attarc
(Met 15.10-20)
14Odokkc Bv tani:kvdv:dcm Bvkkolo:pc lckoda goga:toku, odokkc bulum luto, “Ngok agomcm tattoka, nolu appvngc odokkc mcngkintok: 15Okkosin tani: akoncm ru:yidokkc ara:bo:pc gva:la bvm narc:ma:pc imopc kamang; 16ckvdaggom tani:akolok ara:bokkc gvlennc okkai kvdv:dc:na bvm narc:ma:pc imonkvdv:dc.”
17Odokkc cdvlo Bv okum ara:do gva:tonc, odokkc tani: kvdv:dcm mcpaktonc, Bvk agom tadjvgla gmvnnc tani:kvdv:dc kvkan do:yv:dok agomdcm tawutoku. 18Odokkc Bv bulum luto, “Cmpcmvlo nolusinnci mcngkinma:danci? Nolu ka:begma:lang oko okko tani:akolok ara:pc ru:yidokkc gva:dagnc bvm narc:ma:pc imola:mang, 19cdc asin ara:bo:pc a:ma:la:yam cmpige:la bvk aki: ara:pcmvn, odokkc gvbadla gvdagnc?” (Cdcmpc bv appvng donam tv:namcm narc:dag cmna lukanbito.)
20Odokkc Bv luto, “Okodc tani:lok aki: ara:bokkc lendagnc cdcna tani:ycm nac:ma:pc imodagnc. 21Kapila:nc ara:bokkc, tani:lok asin ara:bokkc, aisi:ma:pc mc:nam sagnam lendag, 22amilo gvma:-la:ma:dapc imvn-gvmvnsunamc, dopso:nammc, mokenammc, amikc nc:ngcm la:binammc, yadnamc, ka:bomc:bogo:la gvnamc pa:lv:nammc, aima:n agerc, ncsunammc, lume:pc aimang cmna lugo:nammc, bottapc lusunamc, monba:-ba:namc. 23Cdc aima:nc ager atv appv:dc ara:bokkc lendo, odokkc bulu tani:akoncm aima:pc imodag.”
Nc:ng Akolok Mc:jvgc
(Met 15.21-28)
24Odokkc Bv daropla Ti:rcla Sidon du:tc:do:pc gvpakto. Odokkc Bv okumkolo gva:to, odokkc cdcm sc:komsin kinkosutomang; ckvdaggom Bv gapsula:tomang. 25Cmpige:la vgcmpc nc:ng akonc, sc:k adjionc omc akoncm aima:nc uikonc pa:tonc, Bvk agomcm tadbegto, odokkc Bvkkolo:pc gva:la Bvk alcdo cgsora:to. 26Cdcmpc inamc nc:dc Girikai, Siria Poenikiang onamai. Odokkc bv uidcm bvk omcdokkcm mcmpakteika cmna Bvm kumna luto. 27Odokkc Bv bvm luto, “Ommang kvdv:dcm dopo:motok, kapila:nc ko:kang kvdv:dok pitangcm langge:la iki:kvdv:dcm crbipa:mang.”
28Cmpige:la bv Bvm luto, “C:lo, Ru:tuma; ckvdaggom tcbul kcvgbog du:nc iki:kvdv:dc ko:kang kvdv:dok dojcng kvdv:dcmci dodag.”
29Odokkc Bv bvm luto, “Cdc lunamdokki nok gvpckolok gvkangku; uidc nok omcdcm mcpakto.”
30Odokkc bv okumpc gvkangku, odokkc ko:nc:dcm asubdo kcdla du:dopc ka:begtoku, odokkc uidc gvpakkangku.
Jisubv Gomma:nc Ru:benc Tani:ko Csa:mokunam
31Odokkc Bv Ti:r dungo:ycgo:dokkc gvlattoku, odokkc Sidondok gvko:la Galil siycngdo:pc gvto, Dikapoli: dungo:ycgo:dok gvla. 32Odokkc bulu ru:benc tani:ko agomcmsin lula:ma:ncko Bvkkolo:pc gva:boto; odokkc bulu Bvk alagcm bvm ri:yitteika cmna kumna luto. 33Bvm odokkc yadkumsunc tani:kvdv:dcm angupc gvyotbola gvge:la Bv Bvk lakke: kvdv:dcm bvk yerungkvdv:do suda:to, odokkc takircm Bv sugge:la bvk ayodcm ri:yitto; 34Odokkc taycng amo:to:pc ka:sangge:la, Bv sagv gvto, odokkc bvm luto, “Eppa:ta,” cdc, “kokatoka!”
35Odokkc bvk yerungkvdv:dc tadbegkang, bvk ayodc cngunkangku odokkc bv aiyo:pc agom lukangku. 36Odokkc Bv bulum sc:komsin lubiyoka cmna lulvgto; cmpige:la cddvkoi Bv lutumtonc bulum, odokkvddvngko bulu kvnggv:ya:pc cdcm lugo:bito. 37Odokkc bulu mc:la mc:tcng tc:ma:pc mcngkintomang, scmpc lula, “Bv appvngcmci aipc ingapto; Bv ru:benckvdv:dcmci tadmotoku odokkc gommang ma:nckvdv:dcmci agom lumotoku.”
Currently Selected:
MARKKC 7: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
