MARKKC 8
8
Jisubv Lvngko Appi:ko Tani:ycm Domotv:monam
(Met 15.32-39)
1Odo longckvdv:do, lckoda bottcru:nc tani:kcrcngko yadkumsunamc, odokkc bulukkc donamc okkosin kama:nammc, Bvk ri:tomnam tani:kvdv:dcm Bvkkolo:pc goga:to, odokkc bulum luto, 2“Ngo yadkumsunc tani: kvdv:scm ayangabopc mc:dung, kapila:nc bulu ngok lcdulo lowumkopc du:mvnnammc ika:gbong, odokkc donam-tv:namc okkosin kama:bong; 3odokkc ngo bulum kcnong tv:lvngmotu:la okumpc mclvgkumvlo, bulu lambcdo bvpekbvyegamyc; odokkc buluk akedc mo:tc:ru:nc lambclokkc gvdung.”
4Odokkc Bvk agom tadjvgla gvmvnnc tani:kvdv:dc Bvm luto, “Kapc sokkvdvnc tani:kvdv:scm scmpinc sulli:so bila dotv:sumoycm?”
5Odokkc Bv bulum tawuto, “Nollukkc cddvkopc lu:b pitangc du:n?” Bulu lubito, “Kvnvdko.”
6Odokkc Bv yadkumsunc tani: kcrc:dcm amo:do tedtungamdopc lulvgto; odokkc Bv lu:b pitang kvdv:dcm la:to, odokkc aipai cmge:la Bv cdcmbulum pentungamto odokkc Bvk agom tadjvgla gvmvnnc tani:kvdv:dcm bito tani:kvdv:dcm ordopc; odokkc bulu yadkumsunc tani:kvdv:dcm orto. 7Odokkc bulukkc onggo adjiongko dungai; odokkc cdcmbulu aipai cmge:la, Bv cdcmbulumsin bulum ordopc lulvgto. 8Odokkc bulu doto, odokkc dotvngamsukang; odokkc bulu pentungamla mcpaknamkvdv:dcm la:sa:to, gempa bi:nc kvnvdkopc. 9Odokkc odo lvngko appi:kvramkopc tani:yc dungai. 10Odokkc Bv bulum mclvgamtoku; odokkc oddung lomdanna Bvk agomtadjvgla gvmvnnc tani:kvdv:dokki ollu:do a:la Dalmanuta jilado:pc gvkang.
Mcngapla:ma:nam Agerko Parisi:kvdv:dc ka:pc Cmna Manam
(Met 16.1-4)
11Parisi:kvdv:dc gva:la Bvm agom svgka:mvnsula lurobbomkang, taycng amo:tok kanggodko ka:pc cmna mala, Bvm ankang kangkvpcmna. 12Odokkc Bvk yalodokki Bv kvnggv:pc mcnga:la sagv gvto, odokkc luto, “Sc ope:ncgv:sc kapila kanggodko ka:pc cmna madagncm? Aropakpc, ngo nolum lubidung, oko kanggodcmsin sc ope:ncgv:scm bima:yc.”
13Odokkc Bv bulum mcpakto, odokkc ollung ara:do angge:la lckoda Bv kekonolo:pc kongkongkang.
Parisi:yclang Herodkc Komirang
(Met 16.5-12)
14Odo bulu pitangcm bompcnammcm mitpanto; odokkc bulukkc ollu:do lu:b pitang aborko dungai. 15Odokkc Bv bulum ansudopc luto, scmpc lula, “Ka:sulangka, Parisi:kvdv:dok komir go:sa:monc kvdv:dcm.”
16Odokkc cdcm bulu akon akonc kvka:mvnsuto, scmpc lula, “Ngolukkc pitangc kamang.”
17Odokkc cdcm ansula:yam, Jisubv bulum luto, “Nolu kapila do:yvng kvka:mvnsudu:n nolukkc pitang kamang cmnamdcm? Nolukkc mc:mila ka:namc cdcmanggom mcngkinnammc kama:nci? Noluk asinkvdv:dc tornam mole:la tadangge:mang cmnai mc:dang? 18Amigc dungge:la:sin nolu ka:begma:nci? Odokkc nolu mc:begma:nci? 19Ngok lu:b borngoko lvngko anggo lcngangc penmvgbinamdcm, cddv gempakopc bi:dopc nolu jo:sumsutoji?”
Bulu Bvm luto, “Pvyvngkola: pvnyiko.”
20“Odokkc kvnvddcm lvngko appi: lcgangc, cddv gempakopc bi:dopc nolu penmvgnammcm jo:sangkanc.”
Odokkc bulu Bvm luto, “Kvnvdkopc.”
21Odokkc Bv bulum luto, “Nolu mcngkinma:lang?”
Jisubv Betsaida:do Miglunc Tani:ko Ka:begmokunam
22Odokkc bulu Betsaida:pc gvto. Odokkc tani:ckkc miglunc tani:koncm Bvkkolo:pc gva:boto, odokkc Bvm ri:yitteika cmna kumna luto. 23Odokkc Bv miglunc tani:dcm alagdok sogapto, odokkc do:lu:dokkcm gvlenboto; odokkc bvk amikdo takircm sukkatnammc odokkc Bvk tayc:lo ri:yitnammc, Bv bvm tawuto, “No o:kai ka:begdagnci.”
24Odo bv nge:sa:la luto, “Ngo tani:kvdvngcm ka:begdag; cmpige:la bulum vsvngcmpc ka:dag, lambc gvgo:dag.”
25Odo Bv lckoda bvm alagcm ri:yitto; odokkc Bv ka:mi:-miri:la ka:la ka:pvtokku, odokkc appvngcm aiyo:pc ka:begamtoku. 26Odokkc Bv okumpc bvm mclvgtoku, scmpc lula, “do:lungolo:sinci gva:yokuk.”
Pitorbv Jisukc Agomcm Lulennam
(Met 16.13-20; Lu:k 9.18-21)
27Odokkc Jisubv Bvk agom tadjvgla gvmvnnc tani:kvdv:dokki gvtvla du:to, Kaesaria Pilippi: do:lu:do:pc; odokkc lambcdo Bv bvk agom tadjvgla gvmvnnc tani:kvdv:dcm tawuto, “Tani:kvdv:dc ngo sc:kobv cmna ludang?”
28Odo bulu Bvm lubito, “Jo:n Baptismo bincbv; odokkc akedc ludag, Elija:bv; odokkc akke lungor lunckvdv:dok akonc cmna.”
29Odokkc Bv bulum tawuto, “Cmpige:la nolu sc:kobv cmna ngom mc:dang?” Pitorbv Bvm lubito,
30“No Kristodc.?” Odokkc Bvk agomcm sc:komsin lubiyoka cmna lutumna Bv luto.
Jisubv Bvk Ipusire:ycla Sinam Lubisunam
(Met 16.21-28; Lu:k 9.22-27)
31Odokkc bulum luyirrobbomkang jc tani:kc awodc bojcrung agom lcgangc ipusire:ycm pa:yc odokkc abv:nc kvdv:dokki, odokkc kumnam ager gergcnc bottarya:nckvdv:dokki odokkc luyirnckvdv:dokki odokkc mokeyc, odokkc lowum longcdo turradycku. 32Odokkc Bv cdcm tadde:pc luto. Odokkc Pitorbv Bvm gogcrbomkang, odokkc Bvm ge:robbomkang. 33Cmpige:la gvlatsulangkula odokkc Bvk agom tadjvgla gvmvnnc tani:kvdv:dcm kangge:la, Bv Pitormc ge:to, odokkc luto, “Ngok lamkupc gvkang, Satana! Kapila:nc no Ru:ncsa:nckcpc ima:ncko, cmpige:la tani:kcpc idung.”
34Odokkc Bv agom tadjvgla gvmvnnc tani:kvdv:dcm lckopc yadkumsunc tani:kvdv:dcm Bvkkolo:pc gogto, odokkc bulum luto, “Tani: akonc ngok lcdu lcdulo gvmvnpc mc:mvlo, bv avdc avycm cmmumc cmna mc:sumotok odokkc bvk kuruscm jo:motok odokkc ngok lcdulo gvmvnmotoka. 35Kapila:nc sc:kobvi bvk turnamcm pa:la dung cmna mc:ycnc bv cdcm yogmoyc; odokkc sc:kobvi bvk turnamcm ngok lcga:pc tolvgycnc odokkc tadponc lutaddok lcga:pc mclvgycnc cdcm moturyc. 36Kapila:nc tani: akolokkc oko la:bc du:ycn mo:pv appv:scm pangge:la:sin odokkc bvk turnamdcm yogmopcmvlo? 37Kapila:nc tani:akonc okkom bvk turnamdok lcgangc bila:dang? 38Kapila:nc sc:kobvi sc aminc:ng lango:nc odokkc pa:binc ope:kvdv:sok ara:lo ngomlang ngok agom lcgangc anyi:ycnc, bvmsin tani:kc Awodc anyi:ycku, cdvlo Bvk Abukc ka:de:pc angunnc taycng lutad lunckvdv:dokki gvyckuji.”
Currently Selected:
MARKKC 8: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
