ܒܪܝܬܐ 15
15
ܩܵܘܠܵܐ ܕܒܪܘܿܢܵܐ ܠܐܲܒ݂ܪܵܡ
1ܡ̣ܢ ܒܵܬ݇ܪ ܕܐܲܢܹܐ ܡܸܢܕܝܼܵܢܹ̈ܐ، ܗܘܹܐ ܠܹܗ ܚܲܒܪܵܐ ܕܡܵܪܝܵܐ ܠܐܲܒ݂ܪܵܡ ܒܚܸܙܘܵܐ، ܒܹܐܡܵܪܵܐ، ”ܠܵܐ ܙܵܕܥܹܬ ܐܲܒ݂ܪܵܡ، ܐܵܢܵܐ ܝܘܸܢ ܡܵܛܵܠܵܐ ܐܸܠܘܼܟ݂، ܘܦܘܼܪܥܵܢܘܼܟ݂ ܒܸܬ ܗܵܘܹܐ ܓܘܼܪܵܐ ܪܵܒܵܐ.“ 2ܐ݇ܡܝܼܪܹܗ ܐܲܒ݂ܪܵܡ، ”ܝܵܐ ܡܵܪܝܵܐ ܐܲܠܵܗܵܐ، ܡܘܿܕܝܼ ܒܸܬ ܝܵܗ݇ܒܹܬ ܠܝܼ؟ ܙܲܪܥܵܐ ܠܲܝܬ ܠܝܼ، ܘܝܵܪܘܿܬܵܐ ܕܒܲܝܬܝܼ ܐܹܠܝܼܥܵܙܲܪ ܕܲܪܡܣܘܿܩܵܝܵܐ ܝܠܹܗ. 3ܗܵܐ ܠܵܐ ܩܲܡ ܝܵܗ݇ܒܹܬ ܠܝܼ ܙܲܪܥܵܐ، ܘܪܹܓܵܐ ܒܸܪܝܵܐ ܓܵܘ ܒܲܝܬܝܼ ܒܸܬ ܗܵܘܹܐ ܝܵܪܘܿܬܵܐ ܐܸܠܝܼ.“ 4ܘܗܘܹܐ ܠܹܗ ܚܲܒܪܵܐ ܕܡܵܪܝܵܐ ܐܸܠܹܗ ܒܹܐܡܵܪܵܐ، ”ܐܵܗܵܐ ܠܹܐ ܝܵܪܹܬ ܐܸܠܘܼܟ݂، ܐܸܠܵܐ ܒܪܘܿܢܵܐ ܕܒܸܬ ܐܵܬܹܐ ܡ̣ܢ ܚܲܨܘܼܟ݂ ܒܸܬ ܗܵܘܹܐ ܝܵܪܘܿܬܵܐ ܐܸܠܘܼܟ݂.“ 5ܘܦܘܼܠܸܛ ܠܹܗ ܐܸܠܹܗ ܠܒܲܕܲܪ ܘܐ݇ܡܝܼܪܹܗ، ”ܚܘܼܪ ܠܫܡܲܝܵܐ ܘܡܢܝܼ ܟܵܘܟ݂ܒܹ̈ܐ، ܐܸܢ ܡܵܨܹܝܬ ܠܸܡܢܵܝܲܝ.“ ܗ̇ܝܓܵܗ ܐ݇ܡܝܼܪܹܗ ܐܸܠܹܗ، ”ܗܲܕܟ݂ܵܐ ܒܸܬ ܗܵܘܹܐ ܙܲܪܥܘܼܟ݂.“ 6ܘܗܘܼܡܸܢܹܗ ܐܲܒ݂ܪܵܡ ܒܡܵܪܝܵܐ، ܘܚܘܼܫܒܸܢܵܐ ܠܹܗ ܡܵܪܝܵܐ ܐܸܠܹܗ ܠܙܲܕܝܼܩܘܼܬܵܐ.
ܢܝܼܫܲܢܩܵܐ ܕܩܵܘܠܵܐ
7ܐ݇ܡܝܼܪܹܗ ܡܵܪܝܵܐ ܠܐܲܒ݂ܪܵܡ، ”ܐܵܢܵܐ ܝܘܸܢ ܡܵܪܝܵܐ، ܕܦܘܼܠܸܛ ܠܝܼ ܐܸܠܘܼܟ݂ ܡ̣ܢ ܐܲܪܥܵܐ ܕܟܲܠܕܵܝܹ̈ܐ، ܕܝܵܗ݇ܒܹܢܘܼܟ݂ ܐܵܗܵܐ ܐܲܪܥܵܐ ܕܗܵܘܝܵܐ ܝܵܪܬܘܼܬܵܐ ܐܸܠܘܼܟ݂.“ 8ܘܐ݇ܡܝܼܪܹܗ ܐܲܒ݂ܪܵܡ، ”ܝܵܐ ܡܵܪܝܵܐ ܐܲܠܵܗܵܐ، ܕܵܐܟ݂ܝܼ ܝܵܕܥܹܢ ܕܒܸܬ ܗܵܘܹܝܢ ܝܵܪܘܿܬܘܼܗ̇؟“ 9ܐ݇ܡܝܼܪܹܗ ܐܸܠܹܗ ܡܵܪܝܵܐ، ”ܫܩܘܿܠ ܠܝܼ ܫܲܪܸܚܬܵܐ ܒܲܪ ܬܠܵܬ ܫܸܢܹ̈ܐ، ܘܥܸܙܵܐ ܒܲܪ ܬܠܵܬ ܫܸܢܹ̈ܐ، ܘܒܲܪܥܵܢܵܐ ܒܲܪ ܬܠܵܬ ܫܸܢܹ̈ܐ، ܘܝܵܘܢܵܐ ܘܓܘܼܪܓܘܼܡܵܐ.“ 10ܘܫܩܝܼܠ ܠܹܗ ܐܸܠܹܗ ܟܠܲܝܗܝ ܐܲܢܹܐ، ܘܦܪܝܼܡܲܝ ܠܹܗ ܠܬܪܹܝ ܦܲܠܓܹ̈ܐ ܫܲܘܝܵܐܝܼܬ، ܘܡܘܼܬܸܒ݂ ܠܹܗ ܟܠ ܦܲܠܓܵܐ ܠܒܲܠܩܘܼܒ݂ܠ ܕܗ̇ܘ ܐ݇ܚܹܪ݇ܢܵܐ، ܐܝܼܢܵܐ ܠܵܐ ܦܪܝܼܡ ܠܹܗ ܠܛܲܝܪܹ̈ܐ ܠܬܪܹܝ ܩܸܛܥܵܛܹ̈ܐ. 11ܘܟܲܕ ܨܠܹܐ ܠܗܘܿܢ ܛܲܝܪܹ̈ܐ ܕܨܲܝܕܵܐ ܥܲܠ ܫܠܲܕܹ̈ܐ، ܟܘܼܫܟܸܫܲܝ ܠܹܗ ܐܲܒ݂ܪܵܡ. 12ܟܲܕ ܗܘܹܐ ܠܹܗ ܫܸܡܫܵܐ ܠܸܓܢܵܝܵܐ، ܫܸܢܬܵܐ ܝܲܩܘܼܪܬܵܐ ܢܦܝܼܠ ܠܵܗ̇ ܥܲܠ ܐܲܒ݂ܪܵܡ؛ ܘܗܵܐ ܙܕܘܼܥܬܵܐ ܘܚܸܫܟܵܐ ܓܘܼܪܵܐ ܢܦܝܼܠ ܠܗܘܿܢ ܥܲܠܘܼܗܝ. 13ܘܐ݇ܡܝܼܪܹܗ ܡܵܪܝܵܐ ܠܐܲܒ݂ܪܵܡ، ”ܗܘܝܼ ܚܲܬܝܼܬܵܐ، ܕܙܲܪܥܘܼܟ݂ ܒܸܬ ܗܵܘܝܼ ܡܵܫܵܚܲܛ ܒܐܲܪܥܵܐ ܕܠܹܐ ܝܠܵܗ̇ ܕܝܼܲܝܗܝ، ܘܒܸܬ ܗܵܘܝܼ ܥܲܒ݂ܕܹ̈ܐ ܘܒܸܬ ܦܵܝܫܝܼ ܡܘܼܠܝܸܨܹܐ ܐܲܪܒܲܥܡܵܐܐ ܫܸܢܹ̈ܐ؛ 14ܐܝܼܢܵܐ ܒܸܬ ܕܵܝܢܹܢ ܠܥܲܡܵܐ ܕܥܵܒ݂ܕܝܼ ܥܲܒ݂ܕܘܼܬܵܐ ܐܸܠܹܗ، ܘܡ̣ܢ ܒܵܬ݇ܪ ܗܵܕܵܐ ܒܸܬ ܦܵܠܛܝܼ ܒܩܸܢܝܵܢܵܐ ܓܘܼܪܵܐ. 15ܘܐܲܢ݇ܬ ܒܸܬ ܐܵܙܹܠ݇ܬ ܠܟܸܣ ܒܵܒܵܘܵܬܘܼ̈ܟ݂ ܒܫܠܵܡܵܐ؛ ܘܒܸܬ ܦܵܝܫܹܬ ܩܒ݂ܝܼܪܵܐ ܒܣܲܝܒܘܼܬܵܐ ܛܵܒ݂ܬܵܐ. 16ܒܕܵܘܪܵܐ ܕܐܲܪܒܥܵܐ ܒܸܬ ܕܵܝܪܝܼ ܠܐܲܟ݂ܵܐ، ܣܵܒܵܒ ܥܵܘܠܵܐ ܕܐܵܡܘܿܪ̈ܵܝܹܐ ܗܹܫ ܠܹܐ ܝܠܹܗ ܚܬܝܼܡܵܐ.“ 17ܘܗܘܹܐ ܠܵܗ̇ ܟܲܕ ܓܢܹܐ ܠܹܗ ܫܸܡܫܵܐ ܘܫܪܹܐ ܠܹܗ ܥܲܡܛܵܢܵܐ، ܬܲܢܘܼܪܵܐ ܬܸܢܵܢܵܐ ܘܡܲܫܥܵܠܵܐ ܕܢܘܼܪܵܐ ܥܒ݂ܝܼܪܗܘܿܢ ܒܹܝܠ ܕܐܵܢܝܼ ܩܸܛܥܵܛܹ̈ܐ. 18ܒܗ̇ܘ ܝܵܘܡܵܐ ܥܒ݂ܝܼܕ ܠܹܗ ܡܵܪܝܵܐ ܘܲܥܕܵܐ ܥܲܡ ܐܲܒ݂ܪܵܡ، ܒܹܐܡܵܪܵܐ، ”ܠܙܲܪܥܘܼܟ݂ ܝܘܼܗ݇ܒܸܠ ܠܝܼ ܐܵܗܵܐ ܐܲܪܥܵܐ، ܡ̣ܢ ܢܲܗܪܵܐ ܕܡܸܨܪܹܝܢ ܗܲܠ ܢܲܗܪܵܐ ܓܘܼܪܵܐ، ܢܲܗܪܵܐ ܕܦܪܵܬ: 19ܐܲܪܥܵܐ ܕܩܝܼܢܵܝܹ̈ܐ، ܘܕܩܲܢܙܵܝܹ̈ܐ، ܘܕܩܲܕ݇ܡܘܼܢܵܝܹ̈ܐ، 20ܘܕܚܹܝܬܵܝܹ̈ܐ، ܘܕܦܲܪ̈ܙܵܝܹܐ، ܘܕܪ̈ܦܵܝܹܐ، 21ܘܕܐܵܡܘܿܪ̈ܵܝܹܐ، ܘܕܟܢܲܥܢܵܝܹ̈ܐ، ܘܕܓܲܪ̈ܓܘܼܫܵܝܹܐ ܘܕܝܵܒ݂ܘܿܣܵܝܹ̈ܐ.“
Currently Selected:
ܒܪܝܬܐ 15: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
