ܒܪܝܬܐ 16
16
ܗ݇ܘܵܝܬܵܐ ܕܐܝܼܫܡܲܥܹܝܠ
1ܣܲܪܲܝ ܒܲܟ݂ܬܵܐ ܕܐܲܒ݂ܪܵܡ ܠܵܐ ܝ݇ܠܝܼܕ ܠܵܗ̇ ܩܵܬܹܗ ܝܵܠܹ̈ܕ݇ܐ. ܘܐܝܼܬ ܗ݇ܘܵܐ ܠܵܗ̇ ܚܹܕܲܡܬܵܐ ܡܸܨܪܵܝܬܵܐ، ܘܫܸܡܘܼܗ̇ ܗܵܓ݂ܵܪ. 2ܘܐ݇ܡܝܼܪܵܗ̇ ܣܲܪܲܝ ܠܐܲܒ݂ܪܵܡ، ”ܡܘܼܟܠܝܼܵܐ ܝܠܹܗ ܡܵܪܝܵܐ ܐܸܠܝܼ ܡ̣ܢ ܗܲܨܘܼܠܹܐ ܝܵܠܹ̈ܕ݇ܐ؛ ܐܵܕܝܼܵܐ ܥܒ݂ܘܿܪ ܠܟܸܣ ܚܹܕܲܡܬܝܼ، ܩܵܘܡܵܐ ܕܗܵܘܹܐ ܠܝܼ ܝܵܠܹ̈ܕ݇ܐ ܡܸܢܘܼܗ̇.“ ܘܫܡܝܼܥ ܠܹܗ ܐܲܒ݂ܪܵܡ ܠܚܲܒܪܵܐ ܕܣܲܪܲܝ. 3ܗܲܕܟ݂ܵܐ، ܡ̣ܢ ܒܵܬ݇ܪ ܕܥܡܝܼܪܵܐ ܝܗ݇ܘܵܐ ܐܲܒ݂ܪܵܡ ܥܸܣܪܵܐ ܫܸܢܹ̈ܐ ܒܐܲܪܥܵܐ ܕܟܢܲܥܢ، ܫܩܝܼܠ ܠܵܗ̇ ܣܲܪܲܝ ܒܲܟ݂ܬܹܗ ܠܗܵܓ݂ܵܪ ܡܸܨܪܵܝܬܵܐ، ܚܹܕܲܡܬܘܼܗ̇، ܘܝܘܼܗ݇ܒ݂ܵܐ ܠܵܗ̇ ܠܐܲܒ݂ܪܵܡ ܓܲܒ݂ܪܘܼܗ̇ ܠܒܲܟ݂ܬܵܐ. 4ܘܥܒ݂ܝܼܪܹܗ ܠܟܸܣ ܗܵܓ݂ܵܪ، ܘܒܛܝܼܢܵܗ̇. ܘܟܲܕ ܚܙܹܐ ܠܵܗ̇ ܕܒܛܝܼܢܬܵܐ ܝܗ݇ܘܵܐ، ܓܘܼܫܸܩ ܠܵܗ̇ ܒܥܲܝܢܵܐ ܕܡܲܣܠܵܝܬܵܐ ܠܡܵܪܬܘܼܗ̇. 5ܘܐ݇ܡܝܼܪܵܗ̇ ܣܲܪܲܝ ܠܐܲܒ݂ܪܵܡ، ”ܗܵܘܹܐ ܥܲܠܘܼܟ݂ ܛܠܘܼܡܝܵܐ ܕܗܘܹܐ ܠܹܗ ܥܲܠܝܼ. ܐܵܢܵܐ ܝܘܼܗ݇ܒܸܠ ܠܝܼ ܚܹܕܲܡܬܝܼ ܓܵܘ ܥܘܼܒܘܼܟ݂، ܘܟܲܕ ܚܙܹܐ ܠܵܗ̇ ܕܒܛܝܼܢܵܗ̇، ܓܘܼܫܸܩ ܠܵܗ̇ ܥܲܠܝܼ ܒܥܲܝܢܵܐ ܕܡܲܣܠܵܝܬܵܐ. ܕܵܐܹܢ ܡܵܪܝܵܐ ܒܹܝܠܝܼ ܘܒܹܝܠܘܼܟ݂.“ 6ܘܐ݇ܡܝܼܪܹܗ ܐܲܒ݂ܪܵܡ ܠܣܲܪܲܝ، ”ܗܵܐ ܚܹܕܲܡܬܵܟ݂ܝ ܒܐܝܼܕܵܟ݂ܝ ܝܼܠܵܗ̇؛ ܥܒ݂ܘܿܕ ܒܝܼܘܼܗ̇ ܐܲܝܟ݂ ܕܒܵܣܡܵܐ ܠܵܟ݂ܝ.“ ܗ̇ܝܓܵܗ ܡܘܼܠܝܸܨ ܠܵܗ̇ ܣܲܪܲܝ ܐܸܠܘܼܗ̇، ܘܗ̇ܝ ܥܪܝܼܩ ܠܵܗ̇ ܡܸܢܘܼܗ̇.
ܡܲܠܲܐܟ݂ܵܐ ܗܲܡܙܘܼܡܹܐ ܥܲܡ ܗܵܓ݂ܵܪ
7ܘܡܘܼܫ݇ܟ̰ܸܚ ܠܹܗ ܡܲܠܲܐܟ݂ܵܐ ܕܡܵܪܝܵܐ ܠܗܵܓ݂ܵܪ ܥܲܠ ܥܲܝܢܵܐ ܕܡ̈ܝܼܵܐ ܓܵܘ ܒܲܪܝܼܵܐ، ܥܲܝܢܵܐ ܕܝܼܠܵܗ̇ ܒܐܘܼܪܚܵܐ ܕܫܘܼܪ. 8ܘܐ݇ܡܝܼܪܹܗ، ”ܗܵܓ݂ܵܪ، ܚܹܕܲܡܬܵܐ ܕܣܲܪܲܝ، ܡ̣ܢ ܐܲܝܟܵܐ ܐ݇ܬܹܐ ܠܵܟ݂ܝ، ܘܠܐܲܝܟܵܐ ܒܹܐܙܵܠܵܐ ܝܘܲܬܝ؟“ ܓ̰ܘܼܘܸܒ ܠܵܗ̇ ܗܵܓ݂ܵܪ، ”ܒܸܥܪܵܩܵܐ ܝܘܵܢ ܡ̣ܢ ܩܵܕ݇ܡ ܡܵܪܬܝܼ ܣܲܪܲܝ.“ 9ܐ݇ܡܝܼܪܹܗ ܐܸܠܘܼܗ̇ ܡܲܠܲܐܟ݂ܵܐ ܕܡܵܪܝܵܐ، ”ܕܘܼܪܝ ܠܟܸܣ ܡܵܪܬܵܟ݂ܝ ܘܫܠܘܿܡܝ ܐܸܠܘܼܗ̇.“ 10ܘܐܘܼܦ ܐ݇ܡܝܼܪܹܗ ܐܸܠܘܼܗ̇ ܡܲܠܲܐܟ݂ܵܐ ܕܡܵܪܝܵܐ، ”ܡܲܙܝܘܼܕܹܐ ܒܸܬ ܡܲܙܝܸܕܸܢܹܗ ܙܲܪܥܵܟ݂ܝ ܕܠܵܐ ܦܵܐܹܫ ܡܸܢܝܵܐ ܡ̣ܢ ܒܘܼܫܵܝܘܼܬܹܗ.“ 11ܘܐ݇ܡܝܼܪܹܗ ܐܸܠܘܼܗ̇ ܡܲܠܲܐܟ݂ܵܐ ܕܡܵܪܝܵܐ،
”ܗܵܐ ܒܛܝܼܢܬܵܐ ܝܘܲܬܝ،
ܘܒܸܬ ܝܵܠܕܲܬܝ ܒܪܘܿܢܵܐ،
ܘܒܸܬ ܩܵܪܝܲܬܝ ܫܸܡܹܗ ܐܝܼܫܡܲܥܹܝܠ،#16:11 ܫܸܡܵܐ ܕܐܝܼܫܡܲܥܹܝܠ ܩܵܠܹܗ ܒܸܕܡܵܝܵܐ ܝܠܹܗ ܠܗܹܡܸܙܡܵܢ ܕܟܹܐ ܫܵܡܹܥ ܐܲܠܵܗܵܐ ܒܠܸܫܵܢܵܐ ܥܸܒ݂ܪܵܝܵܐ
ܣܵܒܵܒ ܫܡܝܼܥ ܠܹܗ ܡܵܪܝܵܐ ܐܘܼܠܨܵܢܵܟ݂ܝ.
12ܗ̇ܘ ܒܸܬ ܗܵܘܹܐ ܐ݇ܢܵܫܵܐ ܚܡܵܪܵܐ ܟܹܘܝܼ، ܐܝܼܕܹܗ ܥܲܠ ܟܠ ܐ݇ܢܵܫܵܐ،
ܘܐܝܼܕܵܐ ܕܟܠ ܐ݇ܢܵܫܵܐ ܥܲܠܘܼܗܝ،
ܘܥܲܠ ܬܚܘܼܡܵܐ ܕܟܠܲܝܗܝ ܐܲܚܘܿܢܘܵܬܹ̈ܗ ܒܸܬ ܫܵܪܹܐ.“
13ܘܩܪܹܐ ܠܵܗ̇ ܗܵܓ݂ܵܪ ܫܸܡܵܐ ܕܡܵܪܝܵܐ ܕܗܘܼܡܙܸܡ ܠܹܗ ܥܲܡܘܼܗ̇، ”ܐܲܢ݇ܬ ܝܼܘܸܬ ܐܲܠܵܗܵܐ ܕܚܙܹܐ ܠܝܼ،“ ܣܵܒܵܒ ܐ݇ܡܝܼܪܵܗ̇، ”ܐܘܼܦ ܠܐܲܟ݂ܵܐ ܚܙܹܐ ܠܝܼ ܠܗ̇ܘ ܕܩܲܡ ܚܵܙܹܐ ܐܸܠܝܼ.“ 14ܒܘܼܬ ܐܵܗܵܐ ܦܝܼܫ ܠܹܗ ܩܸܪܝܵܐ ܒܹܐܪܵܐ ”ܒܹܪ ܠܲܚܲܝ ܪܘܿܐܝܼ.#16:14 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܹܐܪܵܐ ܕܐܲܠܵܗܵܐ ܚܵܝܵܐ ܚܵܙܝܵܢܝܼ “ ܗܵܐ، ܒܹܝܠ ܩܕܸܫ ܝܼܠܹܗ ܘܒܵܪܵܕ.
15ܘܝ݇ܠܝܼܕ ܠܵܗ̇ ܗܵܓ݂ܵܪ ܒܪܘܿܢܵܐ ܠܐܲܒ݂ܪܵܡ، ܘܩܪܹܐ ܠܹܗ ܐܲܒ݂ܪܵܡ ܫܸܡܵܐ ܕܒܪܘܿܢܹܗ ܕܝ݇ܠܝܼܕ ܠܵܗ̇ ܗܵܓ݂ܵܪ ”ܐܝܼܫܡܲܥܹܝܠ.“ 16ܐܲܒ݂ܪܵܡ ܒܲܪ ܬܡܵܢܝܼ ܘܐܸܫܸܬ ܫܸܢܹ̈ܐ ܝܗ݇ܘܵܐ ܟܲܕ ܝ݇ܠܝܼܕ ܠܵܗ̇ ܗܵܓ݂ܵܪ ܠܐܝܼܫܡܲܥܹܝܠ ܩܵܬܹܗ.
Currently Selected:
ܒܪܝܬܐ 16: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
