ܒܪܝܬܐ 19

ܠܘܿܛ ܩܲܒܘܼܠܹܐ ܠܬܪܹܝ ܡܲܠܲܐܟܹ̈ܐ

1ܘܐ݇ܬܹܐ ܠܗܘܿܢ ܐܵܢܝܼ ܬܪܹܝ ܡܲܠܲܐܟܹ̈ܐ ܠܣܕܘܿܡ ܒܪܲܡܫܵܐ، ܘܠܘܿܛ ܝ݇ܬܝܼܒ݂ܵܐ ܝܗ݇ܘܵܐ ܩܵܕ݇ܡ ܕܲܪܘܵܙܵܐ ܕܡܕܝܼܢ݇ܬܵܐ؛ ܚܸܙܝܲܝ ܠܹܗ ܠܘܿܛ ܘܩܝܼܡ ܠܹܗ ܠܩܵܕ݇ܡܵܝܘܼܬܲܝܗܝ، ܘܡܘܼܟܸܦܵܐ ܠܹܗ ܦܵܬܹܗ ܠܐܲܪܥܵܐ، 2ܘܐ݇ܡܝܼܪܹܗ، ”ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ ܡܵܪ̈ܵܘܵܬܝܼ، ܬܹܝܡܘܼܢ ܠܒܲܝܬܵܐ ܕܪܹܓܵܘܟ݂ܘܿܢ، ܘܦܘܼܫܘܼܢ ܒܠܲܝܠܹܐ، ܘܚܲܠܸܠܘܼܢ ܐܲܩܠܵܬܵܘ̈ܟ݂ܘܿܢ، ܘܩܵܝܕܲܡܬܵܐ ܓ̰ܲܠܕܹܐ ܐܵܙܠ݇ܝܼܬܘܿܢ ܒܐܘܼܪܚܵܘܟ݂ܘܿܢ.“ ܓ̰ܘܼܘܸܒ ܠܗܘܿܢ، ”ܠܵܐ، ܒܥܵܠܘܿܠܵܐ ܒܸܬ ܦܵܝܫܲܚ ܒܠܲܝܠܹܐ.“ 3ܘܡܘܼܠܝܸܨ ܠܹܗ ܐܸܠܲܝܗܝ ܪܵܒܵܐ، ܗܲܠ ܕܕܝܼܪܗܘܿܢ ܠܟܸܣ ܠܹܗ ܘܥܒ݂ܝܼܪܗܘܿܢ ܠܒܲܝܬܹܗ. ܥܒ݂ܝܼܕ ܠܹܗ ܐܸܠܲܝܗܝ ܐܲܪܚܘܼܬܵܐ، ܘܝ݇ܦܹܐ ܠܹܗ ܦܲܛܝܼܪܹ̈ܐ، ܘܐ݇ܟ݂ܝܼܠ ܠܗܘܿܢ.

ܐ݇ܢܵܫܹ̈ܐ ܒܝܼܫܹ̈ܐ ܕܣܕܘܿܡ ܡܘܼܣܡܝܼܹܐ

4ܡ̣ܢ ܩܵܕ݇ܡ ܕܕܵܡܟ݂ܝܼ ܗ݇ܘܵܘ، ܟܪܝܼܟ݂ ܠܗܘܿܢ ܠܒܲܝܬܵܐ ܐ݇ܢܵܫܹ̈ܐ ܕܡܕܝܼܢ݇ܬܵܐ، ܐ݇ܢܵܫܹ̈ܐ ܕܣܕܘܿܡ، ܡ̣ܢ ܥܠܲܝܡܵܐ ܘܗܲܠ ܣܵܒ݂ܵܐ، ܟܠܲܝܗܝ ܐ݇ܢܵܫܹ̈ܐ، ܗܲܠ ܗ̇ܘ ܐ݇ܚܵܪܵܝܵܐ. 5ܩܪܹܐ ܠܗܘܿܢ ܠܠܘܿܛ ܘܐ݇ܡܝܼܪܗܘܿܢ ܐܸܠܹܗ، ”ܐܲܝܟܵܐ ܝܢܵܐ ܐܵܢܝܼ ܐ݇ܢܵܫܹ̈ܐ ܕܥܒ݂ܝܼܪܗܘܿܢ ܠܒܲܝܬܘܼܟ݂ ܒܐܵܗܵܐ ܠܲܝܠܹܐ؟ ܦܲܠܸܛ ܠܗܘܿܢ ܠܟܸܣ ܠܲܢ ܕܡܲܒܣܸܡܲܚ ܒܝܼܲܝܗܝ.“ 6ܘܦܠܝܼܛ ܠܹܗ ܠܟܸܣ ܠܲܝܗܝ ܠܘܿܛ ܠܩܵܕ݇ܡ ܬܲܪܥܵܐ، ܘܕܒ݂ܝܼܪܹܗ ܠܬܲܪܥܵܐ ܒܵܬ݇ܪܹܗ، 7ܘܐ݇ܡܝܼܪܹܗ، ”ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ ܐܲܚܘܿܢܘܵܬܝܼ̈، ܠܵܐ ܥܵܒ݂ܕܝܼܬܘܿܢ ܗܲܕܟ݂ܵܐ ܒܝܼܫܬܵܐ. 8ܗܵܐ ܐܝܼܬ ܠܝܼ ܬܲܪܬܹܝ ܒܢܵܬܹ̈ܐ ܒܬܘܼܠܵܬܹ̈ܐ؛ ܦܲܠܛܸܢܗܘܿܢ ܠܟܸܣ ܠܵܘܟ݂ܘܿܢ ܘܥܒ݂ܘܿܕܘܼܢ ܒܝܼܲܝܗܝ ܐܲܝܟ݂ ܕܒܵܣܡܵܐ ܠܵܘܟ݂ܘܿܢ. ܐܲܚܟ̰ܝܼ ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ ܕܠܵܐ ܥܵܒ݂ܕܝܼܬܘܿܢ ܡܸܢܕܝܼ ܠܐܲܢܹܐ ܐ݇ܢܵܫܹ̈ܐ ܒܗ̇ܝ ܕܥܒ݂ܝܼܪܗܘܿܢ ܬܚܘܿܬ ܫܟܘܼܪܝܼ.“ 9ܐܝܼܢܵܐ ܐܵܢܝܼ ܐ݇ܡܝܼܪܗܘܿܢ، ”ܟܠܝܼ ܠܚܲܕ ܓܹܒܵܐ.“ ܘܐ݇ܡܝܼܪܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܐܵܗܵܐ ܐ݇ܢܵܫܵܐ ܐ݇ܬܹܐ ܠܹܗ ܠܐܲܟ݂ܵܐ ܐܲܝܟ݂ ܚܲܕ ܡܵܫܵܚܲܛ، ܘܒܵܥܹܐ ܕܗܵܘܹܐ ܐܸܠܲܢ ܕܲܝܵܢܵܐ. ܘܐܵܕܝܼܵܐ ܒܸܬ ܥܵܒ݂ܕܲܚ ܐܸܠܘܼܟ݂ ܒܝܼܫܬܵܐ ܒܘܼܫ ܪܵܒܵܐ ܡ̣ܢ ܠܐܵܢܝܼ.“ ܗ̇ܝܓܵܗ ܚܘܼܪܙܸܦ ܠܗܘܿܢ ܪܵܒܵܐ ܠܠܘܿܛ، ܘܩܘܼܪܒܸܢܗܘܿܢ ܠܸܬܒ݂ܵܪܵܐ ܠܬܲܪܥܵܐ. 10ܘܦܘܼܫܸܛ ܠܗܘܿܢ ܐܵܢܝܼ ܐ݇ܢܵܫܹ̈ܐ ܐܝܼܕܵܬܲܝ̈ܗܝ ܘܡܘܼܥܒܸܪܗܘܿܢ ܠܠܘܿܛ ܠܟܸܣ ܠܲܝܗܝ ܓܵܘ ܒܲܝܬܵܐ، ܘܕܒ݂ܝܼܪܗܘܿܢ ܠܬܲܪܥܵܐ. 11ܘܡܚܹܐ ܠܗܘܿܢ ܠܐ݇ܢܵܫܹ̈ܐ ܕܝܼܗ݇ܘܵܘ ܩܵܕ݇ܡ ܬܲܪܥܵܐ ܒܣܸܡܝܘܼܬܵܐ، ܡ̣ܢ ܙܥܘܿܪܵܐ ܘܗܲܠ ܓܘܼܪܵܐ، ܗܵܕܵܐ ܕܟܟ̰ܝܼܚ ܠܗܘܿܢ ܪܵܒܵܐ ܡ̣ܢ ܛܥܵܝܵܐ ܒܵܬ݇ܪ ܬܲܪܥܵܐ.

ܠܘܿܛ ܦܝܵܫܵܐ ܦܘܼܠܛܵܐ ܡ̣ܢ ܡܕܝܼܢ݇ܬܵܐ

12ܘܐ݇ܡܝܼܪܗܘܿܢ ܐܵܢܝܼ ܐ݇ܢܵܫܹ̈ܐ ܠܠܘܿܛ، ”ܡܵܢܝܼ ܐ݇ܚܹܪ݇ܢܵܐ ܐܝܼܬ ܠܘܼܟ݂ ܠܐܲܟ݂ܵܐ؟ ܚܸܬܢܵܘܵܬܹ̈ܐ، ܒܢܘܿܢܹ̈ܐ، ܒܢܵܬܹ̈ܐ، ܟܠ ܕܐܝܼܬ ܠܘܼܟ݂ ܓܵܘ ܡܕܝܼܢ݇ܬܵܐ، ܦܲܠܸܛ ܠܗܘܿܢ ܡ̣ܢ ܐܵܗܵܐ ܕܘܼܟܵܐ. 13ܣܵܒܵܒ ܡܲܚܪܘܼܒ݂ܘܼܗ̇ ܝܘܲܚ ܐܵܗܵܐ ܕܘܼܟܵܐ؛ ܣܵܒܵܒ ܙܝܼܕ ܠܵܗ̇ ܡܲܩܘܲܚܬܵܐ ܠܕܲܠܩܘܼܒ݂ܠܲܝܗܝ ܩܵܕ݇ܡ ܡܵܪܝܵܐ، ܘܡܵܪܝܵܐ ܩܵܕ݇ܡ ܫܲܕܸܪܲܢ ܕܡܲܚܪܸܒܲܚ ܠܵܗ̇.“ 14ܘܦܠܝܼܛ ܠܹܗ ܠܘܿܛ ܘܗܘܼܡܙܸܡ ܠܹܗ ܥܲܡ ܚܸܬܢܵܘܵܬܹ̈ܗ، ܐܵܢܝܼ ܕܓܵܒ݂ܪܝܼ ܗ݇ܘܵܘ ܒܢܵܬܘܼ̈ܗܝ، ܘܐ݇ܡܝܼܪܹܗ، ”ܩܘܼܡܘܼܢ ܦܠܘܿܛܘܼܢ ܡ̣ܢ ܕܐܵܗܵܐ ܕܘܼܟܵܐ، ܣܵܒܵܒ ܒܸܬ ܡܲܚܪܸܒ݂ ܠܵܗ̇ ܡܵܪܝܵܐ ܡܕܝܼܢ݇ܬܵܐ.“ ܐܝܼܢܵܐ ܡܘܼܒܝܸܢܹܗ ܒܸܥܒ݂ܵܕܵܐ ܓܸܚܟܘܼܬܵܐ ܒܥܲܝܢܹ̈ܐ ܕܚܸܬܢܵܘܵܬܹ̈ܗ.

15ܘܟܲܕ ܙܪܝܼܩ ܠܵܗ̇ ܩܵܝܕܲܡܬܵܐ، ܡܘܼܠܝܸܙ ܠܗܘܿܢ ܡܲܠܲܐܟܹ̈ܐ ܠܠܘܿܛ، ܒܹܐܡܵܪܵܐ، ”ܩܘܼܡ ܫܩܘܿܠ ܒܲܟ݂ܬܘܼܟ݂ ܘܬܲܪܬܹܝ ܒܢܵܬܘܼ̈ܟ݂ ܕܝܼܢܵܐ ܠܐܲܟ݂ܵܐ، ܕܠܵܐ ܗܵܘܝܵܐ ܕܦܵܝܫܹܬ ܛܘܼܠܩܵܐ ܒܥܵܘܠܵܐ ܕܡܕܝܼܢ݇ܬܵܐ.“ 16ܐܝܼܢܵܐ ܠܘܿܛ ܥܲܪܩܘܼܠܹܐ ܝܗ݇ܘܵܐ؛ ܘܕܒ݂ܝܼܩ ܠܗܘܿܢ ܐܵܢܝܼ ܐ݇ܢܵܫܹ̈ܐ ܒܐܝܼܕܹܗ ܘܒܐܝܼܕܵܐ ܕܒܲܟ݂ܬܹܗ، ܘܒܐܝܼܕܵܐ ܕܬܲܪܬܹܝ ܒܢܵܬܘܼ̈ܗܝ، ܟܲܕ ܥܒ݂ܝܼܕ ܠܹܗ ܡܵܪܝܵܐ ܪ̈ܲܚܡܹܐ ܥܲܠܘܼܗܝ ܘܦܘܼܠܸܛ ܠܗܘܿܢ ܘܡܘܼܬܸܒ݂ ܠܗܘܿܢ ܐܸܠܹܗ ܠܒܲܕܲܪ ܡ̣ܢ ܡܕܝܼܢ݇ܬܵܐ. 17ܘܐܝܼܡܲܢ ܕܦܘܼܠܸܛ ܠܗܘܿܢ ܐܸܠܹܗ ܠܒܲܕܲܪ، ܐ݇ܡܝܼܪܗܘܿܢ، ”ܡܲܥܪܸܩ ܠܵܗ̇ ܓܵܢܘܼܟ݂، ܘܠܵܐ ܚܵܝܪܹܬ ܠܒܵܬ݇ܪܘܼܟ݂، ܘܠܵܐ ܟܵܠܹܝܬ ܒܟܠܵܗ̇ ܕܸܫܬܵܐ. ܥܪܘܿܩ ܠܛܘܼܪܵܐ، ܕܠܵܐ ܗܵܘܝܵܐ ܕܛܵܠܩܹܬ.“ 18ܘܐ݇ܡܝܼܪܹܗ ܠܘܿܛ ܐܸܠܲܝܗܝ، ”ܠܵܐ، ܝܵܐ ܡܵܪ̈ܵܘܵܬܝܼ. 19ܗܵܐ، ܦܲܪܦܘܼܠܹܐ ܝܘܸܢ، ܡܘܼܫ݇ܟ̰ܸܚ ܠܹܗ ܪܹܓܘܼܟ݂ ܫܵܦܵܩܲܬ ܒܥܲܝܢܘܼ̈ܟ݂، ܘܡܘܼܚܙܹܐ ܠܘܼܟ݂ ܐܸܠܝܼ ܪ̈ܲܚܡܹܐ ܒܦܵܪܲܩܬܵܐ ܕܓܵܢܝܼ؛ ܐܝܼܢܵܐ ܠܹܐ ܡܵܨܹܝܢ ܕܥܵܪܩܹܢ ܠܛܘܼܪܵܐ، ܕܠܵܐ ܗܵܘܝܵܐ ܡܵܛܝܵܐ ܠܝܼ ܒܝܼܫܬܵܐ ܘܡܵܝܬܹܢ. 20ܚܙܝܼ، ܐܵܗܵܐ ܡܵܬܵܐ ܩܘܼܪܒܵܐ ܝܠܵܗ̇ ܠܸܥܪܵܩܵܐ ܐܸܠܘܼܗ̇، ܘܙܥܘܿܪܬܵܐ ܝܠܵܗ̇. ܫܒ݂ܘܿܩ ܥܵܪܩܹܢ ܬܵܡܵܐ ܘܒܸܬ ܦܵܨܝܵܐ ܓܵܢܝܼ. ܗܵܐ ܠܹܐ ܝܠܵܗ̇ ܙܥܘܿܪܬܵܐ؟“ 21ܐ݇ܡܝܼܪܹܗ ܐܸܠܹܗ، ”ܐܘܼܦ ܐܵܗܵܐ ܛܵܒ݂ܬܵܐ ܒܸܬ ܥܵܒ݂ܕܹܢܵܗ̇ ܥܲܡܘܼܟ݂، ܠܹܐ ܡܲܚܪܸܒܸܢ ܠܡܵܬܵܐ ܕܗܘܼܡܙܸܡ ܠܘܼܟ݂ ܒܘܼܬ ܕܝܼܘܼܗ̇. 22ܡܲܠܝܸܙ ܘܥܪܘܿܩ ܠܬܵܡܵܐ؛ ܣܵܒܵܒ ܠܹܐ ܡܵܨܹܝܢ ܕܥܵܒ݂ܕܹܢ ܡܸܢܕܝܼ ܗܲܠ ܕܥܵܒ݂ܪܹܬ ܠܬܵܡܵܐ.“ (ܒܘܼܬ ܐܵܗܵܐ ܩܪܹܐ ܠܗܘܿܢ ܫܸܡܵܐ ܕܗ̇ܝ ܡܵܬܵܐ ”ܨܘܿܥܵܪ.“)#19‏:22 ܚܲܒܪܵܐ ܕܨܘܿܥܵܪ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܙܥܘܿܪܬܵܐ ܒܠܸܫܵܢܵܐ ܥܸܒ݂ܪܵܝܵܐ 23ܫܸܡܫܵܐ ܙܪܝܼܩܵܐ ܝܗ݇ܘܵܐ ܥܲܠ ܐܲܪܥܵܐ ܟܲܕ ܠܘܿܛ ܥܒ݂ܝܼܪܹܗ ܠܨܘܿܥܵܪ.

ܡܵܪܝܵܐ ܡܲܚܪܘܼܒܹܐ ܣܕܘܿܡ ܘܥܵܡܘܿܪܵܐ

24ܘܡܵܪܝܵܐ ܡܘܼܥܪܹܐ ܠܹܗ ܥܲܠ ܣܕܘܿܡ ܘܥܲܠ ܥܵܡܘܿܪܵܐ ܟܸܒܪܝܼܬ ܘܢܘܼܪܵܐ ܡ̣ܢ ܠܟܸܣ ܡܵܪܝܵܐ ܡ̣ܢ ܫܡܲܝܵܐ. 25ܘܡܘܼܚܪܸܒ݂ ܠܹܗ ܠܐܵܢܝܼ ܡܕܝܼܢܵܬܹ̈ܐ، ܘܠܟܠܵܗ̇ ܕܸܫܬܵܐ، ܘܠܟܠܲܝܗܝ ܥܵܡܪ̈ܵܢܹܐ ܕܡܕܝܼܢܵܬܹ̈ܐ، ܘܠܟܠ ܡܸܢܕܝܼ ܕܡܘܼܓ̰ܝܸܢܵܐ ܝܗ݇ܘܵܐ ܥܲܠ ܐܲܪܥܵܐ. 26ܐܝܼܢܵܐ ܒܲܟ݂ܬܵܐ ܕܠܘܿܛ، ܕܝܼܗ݇ܘܵܐ ܒܵܬ݇ܪܹܗ، ܚܝܼܪܵܗ̇ ܠܵܒܵܬ݇ܪܵܐ، ܘܗܘܹܐ ܠܵܗ̇ ܩܵܝܸܡܬܵܐ ܕܡܸܠܚܵܐ.

27ܘܐ݇ܙܝܼܠ ܠܹܗ ܐܲܒ݂ܪܵܗܵܡ ܩܵܝܕܲܡܬܵܐ ܓ̰ܲܠܕܹܐ ܠܕܘܼܟܵܐ ܕܟܸܠܝܵܐ ܝܗ݇ܘܵܐ ܬܵܡܵܐ ܩܵܕ݇ܡ ܡܵܪܝܵܐ؛ 28ܘܚܝܼܪܹܗ ܠܓܹܒܵܐ ܕܣܕܘܿܡ ܘܕܥܵܡܘܿܪܵܐ، ܘܥܲܠ ܟܠܵܗ̇ ܦܵܬܵܐ ܕܐܲܪܥܵܐ ܕܕܸܫܬܵܐ، ܘܚܙܹܐ ܠܹܗ، ܗܵܐ ܬܸܢܵܐ ܒܹܐܣܵܩܵܐ ܡ̣ܢ ܕܗ̇ܝ ܐܲܪܥܵܐ، ܐܲܝܟ݂ ܬܸܢܵܐ ܕܐܲܬܘܿܢܵܐ. 29ܘܗܘܹܐ ܠܵܗ̇ ܟܲܕ ܡܘܼܚܪܸܒ݂ ܠܹܗ ܐܲܠܵܗܵܐ ܠܡܕܝܼܢܵܬܹ̈ܐ ܕܕܸܫܬܵܐ، ܕܟ݂ܝܼܪܹܗ ܠܐܲܒ݂ܪܵܗܵܡ، ܘܦܘܼܠܸܛ ܠܹܗ ܠܠܘܿܛ ܡ̣ܢ ܐܵܢܝܼ ܡܕܝܼܢܵܬܹ̈ܐ ܕܡܘܼܚܪܸܒܲܝ ܠܹܗ، ܐܵܢܝܼ ܕܠܘܿܛ ܒܸܥܡܵܪܵܐ ܝܗ݇ܘܵܐ ܓܵܘܲܝܗܝ.

ܠܘܿܛ ܘܒܢܵܬܹ̈ܗ

30ܘܐ݇ܣܝܼܩ ܠܹܗ ܠܘܿܛ ܡ̣ܢ ܨܘܿܥܵܪ ܘܝ݇ܬܝܼܒ݂ ܠܹܗ ܒܛܘܼܪܵܐ، ܘܬܲܪܬܹܝ ܒܢܵܬܘܼ̈ܗܝ ܥܲܡܹܗ، ܣܵܒܵܒ ܒܸܙܕܵܥܵܐ ܝܗ݇ܘܵܐ ܕܥܵܡܹܪ ܗ݇ܘܵܐ ܓܵܘ ܨܘܿܥܵܪ، ܘܝ݇ܬܝܼܒ݂ ܠܹܗ ܓܵܘ ܓܸܦܝܼܬܵܐ ܥܲܡ ܬܲܪܬܹܝ ܒܢܵܬܘܼ̈ܗܝ. 31ܘܐ݇ܡܝܼܪܵܗ̇ ܗ̇ܝ ܓܘܼܪܬܵܐ ܠܙܥܘܿܪܬܵܐ، ”ܒܵܒܲܢ ܣܝܼܒ݂ܵܐ ܝܠܹܗ، ܘܠܲܝܬ ܐ݇ܢܵܫܵܐ ܥܲܠ ܐܲܪܥܵܐ ܕܥܵܒܹܪ ܠܟܸܣ ܠܲܢ ܐܲܝܟ݂ ܐܘܼܪܚܵܐ ܕܟܠܲܝܗܝ ܐ݇ܢܵܫܹ̈ܐ. 32ܬܵܐܝ ܡܲܫܬܲܚ ܠܒܵܒܲܢ ܚܲܡܪܵܐ، ܘܕܵܡܟܲܚ ܥܲܡܹܗ، ܕܢܵܛܪܲܚ ܡܸܢܹܗ ܙܲܪܥܵܐ.“ 33ܘܡܘܼܫܬܹܐ ܠܗܘܿܢ ܠܒܵܒܲܝܗܝ ܚܲܡܪܵܐ ܒܗ̇ܘ ܠܲܝܠܹܐ، ܘܥܒ݂ܝܼܪܵܗ̇ ܗ̇ܝ ܓܘܼܪܬܵܐ ܘܕܡܝܼܟ݂ ܠܵܗ̇ ܥܲܡܹܗ؛ ܘܠܵܐ ܝ݇ܕܝܼܥ ܠܹܗ ܐܝܼܡܲܢ ܕܡܝܼܟ݂ ܠܵܗ̇ ܘܐܝܼܡܲܢ ܩܝܼܡ ܠܵܗ̇. 34ܘܗܘܹܐ ܠܵܗ̇ ܒܝܵܘܡܵܐ ܐ݇ܚܹܪ݇ܢܵܐ، ܐ݇ܡܝܼܪܵܗ̇ ܗ̇ܝ ܓܘܼܪܬܵܐ ܠܙܥܘܿܪܬܵܐ، ”ܐܵܢܵܐ ܕܡܝܼܟ݂ ܠܝܼ ܒܪܲܡܫܵܐ ܥܲܡ ܒܵܒܝܼ؛ ܡܲܫܬܲܚ ܠܹܗ ܚܲܡܪܵܐ ܐܘܼܦ ܒܐܵܗܵܐ ܠܲܝܠܹܐ، ܘܥܒ݂ܘܿܪܝ ܐܲܢ݇ܬ ܘܕܡܘܿܟ݂ܝ ܥܲܡܹܗ، ܕܢܵܛܪܲܚ ܡܸܢܹܗ ܙܲܪܥܵܐ.“ 35ܘܡܘܼܫܬܹܐ ܠܗܘܿܢ ܚܲܡܪܵܐ ܠܒܵܒܲܝܗܝ ܐܘܼܦ ܒܗ̇ܘ ܠܲܝܠܹܐ، ܘܩܝܼܡ ܠܵܗ̇ ܐܘܼܦ ܗ̇ܝ ܙܥܘܿܪܬܵܐ ܘܕܡܝܼܟ݂ ܠܵܗ̇ ܥܲܡܹܗ، ܘܠܵܐ ܝ݇ܕܝܼܥ ܠܹܗ ܐܝܼܡܲܢ ܕܡܝܼܟ݂ ܠܵܗ̇ ܘܐܝܼܡܲܢ ܩܝܼܡ ܠܵܗ̇. 36ܘܒܛܝܼܢܗܘܿܢ ܬܸܪܘܲܝܗܝ ܒܢܵܬܹ̈ܐ ܕܠܘܿܛ ܡ̣ܢ ܒܵܒܲܝܗܝ. 37ܝ݇ܠܝܼܕ ܠܵܗ̇ ܗ̇ܝ ܓܘܼܪܬܵܐ ܒܪܘܿܢܵܐ، ܘܩܪܹܐ ܠܵܗ̇ ܫܸܡܹܗ ܡܘܼܐܵܒ݂.#19‏:37 ܚܲܒܪܵܐ ܕܡܘܼܐܵܒ݂ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܡ̣ܢ ܒܵܒܵܐ ܒܠܸܫܵܢܵܐ ܥܸܒ݂ܪܵܝܵܐ ܗ̇ܘ ܝܼܠܹܗ ܒܵܒܵܐ ܕܡܘܼܐܵܒ݂ܵܝܹ̈ܐ ܕܐܸܕܝܘܿܡ. 38ܐܘܼܦ ܗ̇ܝ ܙܥܘܿܪܬܵܐ ܝ݇ܠܝܼܕ ܠܵܗ̇ ܒܪܘܿܢܵܐ، ܘܩܪܹܐ ܠܵܗ̇ ܫܸܡܹܗ، ܒܸܢ ܥܲܡܝܼ.#19‏:38 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܪܘܿܢܵܐ ܕܛܵܝܸܦܝܼ ܗ̇ܘ ܝܼܠܹܗ ܒܵܒܵܐ ܕܒܢܲܝ̈ ܥܲܡܘܿܢ ܕܐܸܕܝܘܿܡ.

Currently Selected:

ܒܪܝܬܐ 19: ABTAB

Highlight

Compare

Copy