ܒܪܝܬܐ 20
20
ܐܲܒ݂ܪܵܗܵܡ ܒܸܥܡܵܪܵܐ ܒܓܵܪܵܪ
1ܡ̣ܢ ܬܵܡܵܐ ܐ݇ܙܝܼܠ ܠܹܗ ܐܲܒ݂ܪܵܗܵܡ ܠܐܲܪܥܵܐ ܕܬܲܝܡܢܵܐ، ܘܝ݇ܬܝܼܒ݂ ܠܹܗ ܒܹܝܠ ܩܕܸܫ ܘܒܹܝܠ ܫܘܼܪ، ܘܡܘܼܫܚܸܛ ܠܹܗ ܒܓܵܪܵܪ. 2ܘܐ݇ܡܝܼܪܹܗ ܐܲܒ݂ܪܵܗܵܡ ܒܘܼܬ ܣܲܪܵܐ ܒܲܟ݂ܬܹܗ، ”ܚܵܬܝܼ ܝܠܵܗ̇.“ ܘܫܘܼܕܸܪܹܗ ܐܲܒ݂ܝܼܡܲܠܟ، ܡܲܠܟܵܐ ܕܓܵܪܵܪ، ܘܫܩܝܼܠ ܠܹܗ ܠܣܲܪܵܐ. 3ܐܝܼܢܵܐ ܐ݇ܬܹܐ ܠܹܗ ܐܲܠܵܗܵܐ ܠܐܲܒ݂ܝܼܡܲܠܟ ܒܚܸܠܡܵܐ ܕܠܲܝܠܹܐ، ܘܐ݇ܡܝܼܪܹܗ ܐܸܠܹܗ، ”ܗܵܐ ܐܲܢ݇ܬ ܡܝܼܬܵܐ ܝܘܸܬ، ܒܘܼܬ ܒܲܟ݂ܬܵܐ ܕܫܩܝܼܠ ܠܘܼܟ݂، ܒܗ̇ܝ ܕܐܝܼܬ ܠܵܗ̇ ܓܲܒ݂ܪܵܐ.“ 4ܐܲܒ݂ܝܼܡܲܠܟ ܠܹܐ ܝܗ݇ܘܵܐ ܩܘܼܪܒܸܢܵܐ ܐܸܠܘܼܗ̇، ܒܘܼܬ ܐܵܗܵܐ ܐ݇ܡܝܼܪܹܗ، ”ܝܵܐ ܡܵܪܝܵܐ، ܒܸܬ ܩܵܛܠܹܬ ܠܥܲܡܵܐ ܙܲܕܝܼܩܵܐ؟ 5ܠܵܐ ܗ̇ܘ ܒܓܵܢܹܗ ܐ݇ܡܝܼܪܹܗ ܐܸܠܝܼ، ’ܚܵܬܝܼ ܝܠܵܗ̇؟‘ ܐܘܼܦ ܗ̇ܝ ܒܓܵܢܘܼܗ̇ ܐ݇ܡܝܼܪܵܗ̇، ’ܐܲܚܘܿܢܝܼ ܝܠܹܗ.‘ ܒܨܸܦܝܘܼܬܵܐ ܕܠܸܒܝܼ ܘܒܕܸܟ݂ܝܘܼܬܵܐ ܕܐܝܼܕܵܬܝܼ̈ ܥܒ݂ܝܼܕ ܠܝܼ ܐܵܗܵܐ.“ 6ܐ݇ܡܝܼܪܹܗ ܐܸܠܹܗ ܐܲܠܵܗܵܐ ܒܚܸܠܡܵܐ، ”ܐܘܼܦ ܐܵܢܵܐ ܝ݇ܕܝܼܥ ܠܝܼ ܕܒܨܸܦܝܘܼܬܵܐ ܕܠܸܒܘܼܟ݂ ܥܒ݂ܝܼܕ ܠܘܼܟ݂ ܐܵܗܵܐ. ܒܘܼܬ ܐܵܗܵܐ ܚܣܝܼܟ݂ ܠܝܼ ܐܸܠܘܼܟ݂ ܕܠܵܐ ܚܵܛܹܝܬ ܗ݇ܘܵܐ ܥܲܠܝܼ، ܘܠܵܐ ܫܒ݂ܝܼܩ ܠܝܼ ܕܕܵܩܪܹܬ ܗ݇ܘܵܐ ܒܝܼܘܼܗ̇. 7ܘܐܵܕܝܼܵܐ ܡܲܕܸܪ ܠܒܲܟ݂ܬܵܐ ܕܐ݇ܢܵܫܵܐ، ܣܵܒܵܒ ܢܒ݂ܝܼܵܐ ܝܠܹܗ؛ ܘܒܸܬ ܦܲܪܦܸܠ ܒܘܼܬ ܕܝܼܘܼܟ݂، ܘܒܸܬ ܚܵܝܹܝܬ. ܐܝܼܢܵܐ ܐܸܢ ܠܵܐ ܡܲܕܸܪܸܬ ܠܵܗ̇، ܝ݇ܕܸܥ ܐܵܗܵܐ ܕܡܝܵܬܵܐ ܒܸܬ ܡܵܝܬܹܬ، ܐܲܢ݇ܬ ܘܟܠ ܕܐܝܼܬ ܠܘܼܟ݂.“
8ܘܩܝܼܡ ܠܹܗ ܐܲܒ݂ܝܼܡܲܠܟ ܓ̰ܲܠܕܹܐ ܒܨܲܦܪܵܐ، ܘܩܪܹܐ ܠܹܗ ܠܟܠܲܝܗܝ ܥܲܒ݂ܕܘܼ̈ܗܝ، ܘܐ݇ܡܝܼܪܹܗ ܐܸܠܲܝܗܝ ܟܠܲܝܗܝ ܐܲܢܹܐ ܗܹܡܸܙܡܵܢܹ̈ܐ، ܘܙܕܝܼܥ ܠܗܘܿܢ ܐܵܢܝܼ ܐ݇ܢܵܫܹ̈ܐ ܪܵܒܵܐ. 9ܘܩܪܹܐ ܠܹܗ ܐܲܒ݂ܝܼܡܲܠܟ ܠܐܲܒ݂ܪܵܗܵܡ ܘܐ݇ܡܝܼܪܹܗ ܐܸܠܹܗ، ”ܡܘܿܕܝܼ ܥܒ݂ܝܼܕ ܠܘܼܟ݂ ܐܸܠܲܢ؟ ܘܡܘܿܕܝܼ ܚܛܹܐ ܠܝܼ ܥܲܠܘܼܟ݂ ܕܡܘܼܐܬܹܐ ܠܘܼܟ݂ ܥܲܠܝܼ ܘܥܲܠ ܡܲܠܟܘܼܬܝܼ ܚܛܝܼܬܵܐ ܓܘܼܪܬܵܐ؟ ܦܠܝܼܚ ܠܘܼܟ݂ ܐܸܠܝܼ ܥܒ݂ܵܕܹ̈ܐ ܕܠܹܐ ܦܵܝܫܝܼ ܥܒ݂ܝܼܕܹܐ.“ 10ܘܐ݇ܡܝܼܪܹܗ ܐܲܒ݂ܝܼܡܲܠܟ ܠܐܲܒ݂ܪܵܗܵܡ، ”ܡܘܿܕܝܼ ܬܘܼܚܡܸܢܘܼܟ݂ ܕܥܒ݂ܝܼܕ ܠܘܼܟ݂ ܐܵܗܵܐ ܫܘܼܠܵܐ؟“ 11ܐ݇ܡܝܼܪܹܗ ܐܲܒ݂ܪܵܗܵܡ، ”ܥܒ݂ܝܼܕ ܠܝܼ ܐܵܗܵܐ ܣܵܒܵܒ ܚܫܝܼܒ݂ ܠܝܼ ܠܲܝܬ ܙܕܘܼܥܬܵܐ ܕܐܲܠܵܗܵܐ ܒܐܵܗܵܐ ܕܘܼܟܵܐ، ܘܒܸܬ ܩܵܛܠܝܼ ܠܝܼ ܒܘܼܬ ܒܲܟ݂ܬܝܼ. 12ܐܘܼܦ ܫܲܪܝܼܪܵܐܝܼܬ ܚܵܬܝܼ ܝܠܵܗ̇، ܒܪܵܬܵܐ ܕܒܵܒܝܼ ܝܠܵܗ̇، ܐܝܼܢܵܐ ܠܵܐ ܒܪܵܬܵܐ ܕܝܸܡܝܼ؛ ܘܗܘܹܐ ܠܵܗ̇ ܐܸܠܝܼ ܒܲܟ݂ܬܵܐ. 13ܘܗܘܹܐ ܠܵܗ̇ ܐܝܼܡܲܢ ܕܐܲܠܵܗܵܐ ܩܲܡ ܦܲܠܸܛ ܠܝܼ ܡ̣ܢ ܒܲܝܬܵܐ ܕܒܵܒܝܼ، ܐ݇ܡܝܼܪܝܼ ܐܸܠܘܼܗ̇، ’ܥܵܒ݂ܕܲܬܝ ܐܵܗܵܐ ܛܵܒ݂ܬܵܐ ܐܸܠܝܼ: ܒܟܠ ܕܘܼܟܵܐ ܕܐܵܙܲܠ݇ܚ، ܐܵܡܪܲܬܝ ܒܘܼܬ ܕܝܼܝܼ ܕܐܲܚܘܿܢܵܟ݂ܝ ܝܘܸܢ.‘“
14ܘܫܩܝܼܠ ܠܹܗ ܐܲܒ݂ܝܼܡܲܠܟ ܥܸܪ̈ܒܹܐ ܘܩܸܢܝܵܢܹ̈ܐ، ܘܪܹ̈ܓܵܘܵܬܹܐ ܘܚܹܕܲܡܝܵܬܹ̈ܐ، ܘܝܘܼܗ݇ܒܸܠ ܠܹܗ ܠܐܲܒ݂ܪܵܗܵܡ، ܘܡܘܼܕܸܪܹܗ ܐܸܠܹܗ ܠܣܲܪܵܐ ܒܲܟ݂ܬܹܗ. 15ܘܐ݇ܡܝܼܪܹܗ ܐܲܒ݂ܝܼܡܲܠܟ، ”ܗܵܐ ܐܲܪܥܝܼ ܩܵܕ݇ܡܘܼܟ݂. ܕܘܼܟܵܐ ܕܚܵܙܹܝܬ ܠܵܗ̇ ܨܦܵܝܝܼ، ܝ݇ܬܘܿܒ݂ ܓܵܘܘܼܗ̇.“ 16ܘܐ݇ܡܝܼܪܹܗ ܠܣܲܪܵܐ، ”ܗܵܐ ܝܘܼܗ݇ܒܸܠ ܠܝܼ ܠܐܲܚܘܿܢܵܟ݂ܝ ܐܲܠܦܵܐ ܩܸܛܥܵܛܹ̈ܐ ܕܣܹܐܡܵܐ، ܦܪܵܥܬܵܐ ܠܕܲܟ݂ܵܝܬܵܟ݂ܝ ܩܵܕ݇ܡ ܥܲܝܢܹ̈ܐ ܕܟܠܲܝܗܝ ܐܵܢܝܼ ܕܝܼܢܵܐ ܥܲܡܵܟ݂ܝ؛ ܘܩܵܕ݇ܡ ܟܠܲܝܗܝ ܦܝܼܫܬܵܐ ܝܘܲܬܝ ܡܘܼܟܫܸܛܬܵܐ.“ 17ܘܦܘܼܪܦܸܠ ܠܹܗ ܐܲܒ݂ܪܵܗܵܡ ܒܐܲܠܵܗܵܐ، ܘܐܲܠܵܗܵܐ ܒܘܼܣܸܡ ܠܹܗ ܠܐܲܒ݂ܝܼܡܲܠܟ، ܘܠܒܲܟ݂ܬܹܗ، ܘܠܚܹܕܲܡܝܵܬܹ̈ܗ، ܗܵܕܵܐ ܕܗܘܼܨܸܠ ܠܗܘܿܢ ܝܵܠܹ̈ܕ݇ܐ، 18ܣܵܒܵܒ ܡܵܪܝܵܐ ܕܒ݂ܝܼܪܵܐ ܝܗ݇ܘܵܐ ܠܟܠ ܡܲܪܒܥܵܐ ܒܒܲܝܬܵܐ ܕܐܲܒ݂ܝܼܡܲܠܟ ܒܘܼܬ ܣܲܪܵܐ ܒܲܟ݂ܬܵܐ ܕܐܲܒ݂ܪܵܗܵܡ.
Currently Selected:
ܒܪܝܬܐ 20: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
