ܒܪܝܬܐ 21
21
ܗ݇ܘܵܝܬܵܐ ܕܐܝܼܣܚܵܩ
1ܡܵܪܝܵܐ ܣܘܼܚܒܸܪܹܗ ܠܣܲܪܵܐ ܕܵܐܟ݂ܝܼ ܕܐ݇ܡܝܼܪܵܐ ܝܗ݇ܘܵܐ، ܘܥܒ݂ܝܼܕ ܠܹܗ ܡܵܪܝܵܐ ܐܸܠܘܼܗ̇ ܕܵܐܟ݂ܝܼ ܕܗܘܼܡܙܸܡܵܐ ܝܗ݇ܘܵܐ. 2ܘܒܛܝܼܢܵܗ̇ ܣܲܪܵܐ ܘܝ݇ܠܝܼܕ ܠܵܗ̇ ܒܪܘܿܢܵܐ ܠܐܲܒ݂ܪܵܗܵܡ ܒܣܲܝܒܘܼܬܹܗ، ܒܙܲܒ݂ܢܵܐ ܕܗܘܼܡܙܸܡ ܠܹܗ ܐܲܠܵܗܵܐ ܥܲܡܹܗ. 3ܩܪܹܐ ܠܹܗ ܐܲܒ݂ܪܵܗܵܡ ܫܸܡܵܐ ܕܒܪܘܿܢܹܗ ܕܗܘܹܐ ܠܹܗ ܐܸܠܹܗ، ܕܝ݇ܠܝܼܕ ܠܵܗ̇ ܣܲܪܵܐ ܐܸܠܹܗ، ܐܝܼܣܚܵܩ،#21:3 ܥܸܒ݂ܪܵܐܝܼܬ ܒܡܲܥܢܵܝܵܐ: ܗ̇ܘ ܕܟܹܐ ܓܵܚܹܟ 4ܘܓܙܝܼܪܹܗ ܐܲܒ݂ܪܵܗܵܡ ܠܐܝܼܣܚܵܩ ܒܪܘܿܢܹܗ ܐܝܼܡܲܢ ܗܘܹܐ ܠܹܗ ܬܡܵܢܝܵܐ ܝܵܘܡܵܢܹ̈ܐ، ܕܵܐܟ݂ܝܼ ܕܦܘܼܩܸܕ ܠܹܗ ܐܸܠܹܗ ܐܲܠܵܗܵܐ. 5ܐܲܒ݂ܪܵܗܵܡ ܒܲܪ ܐܸܡܵܐܐ ܫܸܢܹ̈ܐ ܝܗ݇ܘܵܐ ܐܝܼܡܲܢ ܕܦܝܼܫ ܠܹܗ ܝ݇ܠܝܼܕܵܐ ܐܸܠܹܗ ܐܝܼܣܚܵܩ ܒܪܘܿܢܹܗ. 6ܘܐ݇ܡܝܼܪܵܗ̇ ܣܲܪܵܐ، ”ܥܒ݂ܝܼܕ ܠܹܗ ܐܲܠܵܗܵܐ ܐܸܠܝܼ ܓܸܚܟܵܐ؛ ܟܠ ܕܫܵܡܹܥ ܒܸܬ ܓܵܚܹܟ ܒܝܼܝܼ. 7ܡܵܢܝܼ ܒܸܬ ܐܵܡܹܪ ܗ݇ܘܵܐ ܠܐܲܒ݂ܪܵܗܵܡ ܕܣܲܪܵܐ ܒܸܬ ܡܲܡܸܨܵܐ ܒܢܘܿܢܹ̈ܐ؟ ܐܝܼܢܵܐ ܝ݇ܠܝܼܕ ܠܝܼ ܐܸܠܹܗ ܒܪܘܿܢܵܐ ܒܣܲܝܒܘܼܬܹܗ.“
ܗܵܓ݂ܵܪ ܘܐܝܼܫܡܲܥܹܝܠ ܦܝܵܫܵܐ ܛܪܝܼܕܵܐ
8ܓܘܼܪܘܸܣ ܠܹܗ ܝܵܠܵܕ݇ܐ، ܘܦܝܼܫ ܠܹܗ ܩܛܝܼܥܵܐ ܡ̣ܢ ܚܲܠܒ݂ܵܐ؛ ܘܥܒ݂ܝܼܕ ܠܹܗ ܐܲܒ݂ܪܵܗܵܡ ܐܲܪܚܘܼܬܵܐ ܓܘܼܪܬܵܐ ܒܝܵܘܡܵܐ ܕܦܝܼܫ ܠܹܗ ܩܛܝܼܥܵܐ ܡ̣ܢ ܚܲܠܒ݂ܵܐ ܐܝܼܣܚܵܩ. 9ܘܚܙܹܐ ܠܵܗ̇ ܣܲܪܵܐ ܠܒܪܘܿܢܵܐ ܕܗܵܓ݂ܵܪ ܡܸܨܪܵܝܬܵܐ، ܗ̇ܘ ܕܝ݇ܠܝܼܕ ܠܵܗ̇ ܠܐܲܒ݂ܪܵܗܵܡ، ܡܲܣܚܘܼܪܹܐ. 10ܐ݇ܡܝܼܪܵܗ̇ ܠܐܲܒ݂ܪܵܗܵܡ، ”ܛܪܘܿܕ ܠܐܵܗܵܐ ܚܹܕܲܡܬܵܐ ܘܠܒܪܘܿܢܘܼܗ̇؛ ܣܵܒܵܒ ܠܹܐ ܝܵܪܹܬ ܒܪܘܿܢܵܐ ܕܐܵܗܵܐ ܚܹܕܲܡܬܵܐ ܥܲܡ ܒܪܘܿܢܝܼ ܐܝܼܣܚܵܩ.“ 11ܐܵܗܵܐ ܡܸܢܕܝܼ ܡܘܼܒܝܸܢܹܗ ܪܵܒܵܐ ܚܸܪܒܵܐ ܠܐܲܒ݂ܪܵܗܵܡ، ܒܘܼܬ ܥܸܠܬܵܐ ܕܒܪܘܿܢܹܗ ܐܝܼܫܡܲܥܹܝܠ. 12ܐܝܼܢܵܐ ܐ݇ܡܝܼܪܹܗ ܐܲܠܵܗܵܐ ܠܐܲܒ݂ܪܵܗܵܡ، ”ܠܵܐ ܡܲܒܝܸܢܵܐ ܚܸܪܒܵܐ ܐܸܠܘܼܟ݂ ܒܘܼܬ ܝܵܠܵܕ݇ܐ ܘܒܘܼܬ ܚܹܕܲܡܬܘܼܟ݂؛ ܟܠ ܡܸܢܕܝܼ ܕܐܵܡܪܵܐ ܠܘܼܟ݂ ܣܲܪܵܐ، ܥܒ݂ܘܿܕ ܐܲܝܟ݂ ܕܐܵܡܪܵܐ ܠܘܼܟ݂، ܣܵܒܵܒ ܒܐܝܼܣܚܵܩ ܒܸܬ ܦܵܐܹܫ ܩܸܪܝܵܐ ܙܲܪܥܘܼܟ݂. 13ܘܐܘܼܦ ܠܒܪܘܿܢܵܐ ܕܚܹܕܲܡܬܵܐ ܒܸܬ ܥܵܒ݂ܕܹܢ ܐܘܼܡܬܵܐ، ܣܵܒܵܒ ܙܲܪܥܘܼܟ݂ ܝܼܠܹܗ.“
14ܘܩܝܼܡ ܠܹܗ ܐܲܒ݂ܪܵܗܵܡ ܓ̰ܲܠܕܹܐ ܒܨܲܦܪܵܐ، ܫܩܝܼܠ ܠܹܗ ܠܲܚܡܵܐ ܘܓܘܼܕܵܐ ܕܡ̈ܝܼܵܐ ܘܝܘܼܗ݇ܒܸܠ ܠܹܗ ܠܗܵܓ݂ܵܪ، ܡܘܼܬܒܲܝ ܠܹܗ ܥܲܠ ܪܘܼܦ̮ܫܘܼܗ̇، ܘܫܘܼܕܪܵܐ ܠܹܗ ܥܲܡ ܝܵܠܵܕ݇ܐ. ܐ݇ܙܝܼܠ ܠܵܗ̇ ܒܒܲܪܝܼܵܐ ܕܒܹܪܫܒܲܥ ܠܵܐ ܒܝܼܕܵܥܵܐ ܐܲܝܟܵܐ. 15ܘܦܪܝܼܩ ܠܗܘܿܢ ܡ̈ܝܼܵܐ ܡ̣ܢ ܓܘܼܕܵܐ، ܘܡܘܼܬܸܒ݂ ܠܵܗ̇ ܠܝܵܠܵܕ݇ܐ ܬܚܘܿܬ ܚܲܕ ܣܲܢܝܵܐ. 16ܘܗ̇ܝ ܐ݇ܙܝܼܠ ܠܵܗ̇ ܘܝ݇ܬܝܼܒ݂ ܠܵܗ̇ ܠܒܲܠܩܘܼܒ݂ܠܹܗ، ܪܸܚܩܵܐ ܐܲܝܟ݂ ܕܪܵܝܬܵܐ ܕܩܸܫܬܵܐ، ܣܵܒܵܒ ܐ݇ܡܝܼܪܵܗ̇، ”ܠܹܐ ܒܵܥܝܵܢ ܚܵܙܝܵܢ ܡܵܘܬܵܐ ܕܝܵܠܵܕ݇ܐ.“ ܘܟܲܕ ܝ݇ܬܝܼܒ݂ܬܵܐ ܠܒܲܠܩܘܼܒ݂ܠܹܗ، ܡܘܼܪܸܡ ܠܵܗ̇ ܩܵܠܘܼܗ̇ ܘܒܟܹܐ ܠܵܗ̇. 17ܫܡܝܼܥ ܠܹܗ ܐܲܠܵܗܵܐ ܩܵܠܵܐ ܕܝܵܠܵܕ݇ܐ؛ ܘܩܪܹܐ ܠܹܗ ܡܲܠܲܐܟ݂ܵܐ ܕܐܲܠܵܗܵܐ ܠܗܵܓ݂ܵܪ ܡ̣ܢ ܫܡܲܝܵܐ، ܘܐ݇ܡܝܼܪܹܗ ܐܸܠܘܼܗ̇، ”ܡܵܐ ܠܵܟ݂ܝ، ܗܵܓ݂ܵܪ؟ ܠܵܐ ܙܵܕܥܲܬܝ، ܣܵܒܵܒ ܫܡܝܼܥ ܠܹܗ ܐܲܠܵܗܵܐ ܩܵܠܵܐ ܕܝܵܠܵܕ݇ܐ ܒܕܘܼܟܵܐ ܕܝܼܠܹܗ. 18ܩܘܼܡܝ، ܫܩܘܿܠܝ ܠܝܵܠܵܕ݇ܐ، ܒܐܝܼܕܵܟ݂ܝ، ܣܵܒܵܒ ܒܸܬ ܥܵܒ݂ܕܹܢܹܗ ܐܘܼܡܬܵܐ ܓܘܼܪܬܵܐ.“ 19ܘܦܬܝܼܚ ܠܹܗ ܐܲܠܵܗܵܐ ܠܥܲܝܢܘܼ̈ܗ̇، ܘܚܙܹܐ ܠܵܗ̇ ܒܹܐܪܵܐ ܕܡ̈ܝܼܵܐ؛ ܐ݇ܙܝܼܠ ܠܵܗ̇ ܘܡܠܹܐ ܠܵܗ̇ ܠܓܘܼܕܵܐ ܡ̈ܝܼܵܐ ܘܡܘܼܫܬܹܐ ܠܵܗ̇ ܠܝܵܠܵܕ݇ܐ. 20ܗܘܹܐ ܠܹܗ ܐܲܠܵܗܵܐ ܥܲܡ ܝܵܠܵܕ݇ܐ، ܘܓܘܼܪܘܸܣ ܠܹܗ ܘܝ݇ܬܝܼܒ݂ ܠܹܗ ܓܵܘ ܒܲܪܝܼܵܐ؛ ܘܗܘܹܐ ܠܹܗ ܕܵܪܝܵܢܵܐ ܕܩܸܫܬܵܐ. 21ܘܟܲܕ ܒܸܥܡܵܪܵܐ ܝܗ݇ܘܵܐ ܒܒܲܪܝܼܵܐ ܕܦܵܪܵܢ، ܫܩܝܼܠ ܠܵܗ̇ ܝܸܡܹܗ ܒܲܟ݂ܬܵܐ ܐܸܠܹܗ ܡ̣ܢ ܐܲܪܥܵܐ ܕܡܸܨܪܹܝܢ.
ܘܲܥܕܵܐ ܕܐܲܒ݂ܝܼܡܲܠܟ ܥܲܡ ܐܲܒ݂ܪܵܗܵܡ
22ܘܗܘܹܐ ܠܵܗ̇ ܒܗ̇ܘ ܙܲܒ݂ܢܵܐ، ܐ݇ܡܝܼܪܗܘܿܢ ܐܲܒ݂ܝܼܡܲܠܟ، ܘܦܝܼܟܸܠ ܪܲܒ ܚܲܝܠܹܗ ܠܐܲܒ݂ܪܵܗܵܡ، ”ܐܲܠܵܗܵܐ ܥܲܡܘܼܟ݂ ܝܼܠܹܗ ܒܟܠ ܡܸܢܕܝܼ ܕܒܸܥܒ݂ܵܕܵܐ ܝܘܸܬ. 23ܐܵܕܝܼܵܐ ܝ݇ܡܝܼ ܠܐܲܟ݂ܵܐ ܐܸܠܝܼ ܒܐܲܠܵܗܵܐ ܕܠܹܐ ܥܵܒ݂ܕܹܬ ܦܸܠܡܵܐ ܐܸܠܝܼ، ܘܠܵܐ ܠܙܲܪܥܝܼ، ܘܠܵܐ ܠܫܲܪܒܬܝܼ. ܕܵܐܟ݂ܝܼ ܕܐܵܢܵܐ ܥܒ݂ܝܼܕ ܠܝܼ ܛܵܒ݂ܬܵܐ ܐܸܠܘܼܟ݂، ܗܵܕܵܐ ܥܵܒ݂ܕܹܬ ܥܲܡܝܼ، ܘܥܲܡ ܐܲܪܥܵܐ ܕܡܘܼܫܚܸܛ ܠܘܼܟ݂ ܓܵܘܘܼܗ̇.“ 24ܘܐ݇ܡܝܼܪܹܗ ܐܲܒ݂ܪܵܗܵܡ، ”ܐܵܢܵܐ ܒܸܬ ܝܵܡܹܝܢ.“
25ܘܡܘܼܢܟܸܣ ܠܹܗ ܐܲܒ݂ܪܵܗܵܡ ܠܐܲܒ݂ܝܼܡܲܠܟ ܒܘܼܬ ܒܹܐܪܵܐ ܕܡ̈ܝܼܵܐ ܕܫܩܝܼܠ ܠܗܘܿܢ ܒܚܲܝܠܵܐ ܪܹ̈ܓܵܘܵܬܹܐ ܕܐܲܒ݂ܝܼܡܲܠܟ. 26ܐ݇ܡܝܼܪܹܗ ܐܲܒ݂ܝܼܡܲܠܟ، ”ܠܹܐ ܝܵܕܥܹܢ ܡܵܢܝܼ ܥܒ݂ܝܼܕ ܠܹܗ ܐܵܗܵܐ ܫܘܼܠܵܐ؛ ܘܐܘܼܦ ܐܲܢ݇ܬ ܠܵܐ ܡܘܼܕܸܥ ܠܘܼܟ݂ ܐܸܠܝܼ، ܘܐܘܼܦ ܐܵܢܵܐ ܠܵܐ ܫܡܝܼܥ ܠܝܼ ܫܒ݂ܘܿܩ ܡ̣ܢ ܐܸܕܝܘܿܡ ܝܵܘܡܵܐ.“ 27ܘܫܩܝܼܠ ܠܹܗ ܐܲܒ݂ܪܵܗܵܡ ܥܸܪ̈ܒܹܐ ܘܬܵܘܪܹ̈ܐ ܘܝܘܼܗ݇ܒܸܠ ܠܹܗ ܠܐܲܒ݂ܝܼܡܲܠܟ، ܘܬܸܪܘܲܝܗܝ ܩܛܝܼܥ ܠܗܘܿܢ ܘܲܥܕܵܐ. 28ܦܪܝܼܫ ܠܹܗ ܐܲܒ݂ܪܵܗܵܡ ܫܒܲܥ ܦܹܐܪ̈ܵܬܹܐ ܕܥܸܪ̈ܒܹܐ ܒܢܲܦ̮ܫܲܝܗܝ. 29ܘܒܘܼܩܸܪܹܗ ܐܲܒ݂ܝܼܡܲܠܟ ܡ̣ܢ ܐܲܒ݂ܪܵܗܵܡ، ”ܡܘܿܕܝܼ ܝܢܵܐ ܐܲܢܹܐ ܫܒܲܥ ܦܹܐܪ̈ܵܬܹܐ ܕܡܘܼܟܠܝܼܲܝ ܝܘܸܬ ܒܢܲܦ̮ܫܲܝܗܝ؟“ 30ܓ̰ܘܼܘܸܒ ܠܹܗ، ”ܐܲܢܹܐ ܫܒܲܥ ܦܹܐܪ̈ܵܬܹܐ ܒܸܬ ܫܵܩܠܹܬ ܠܗܘܿܢ ܡ̣ܢ ܐܝܼܕܝܼ، ܕܗܵܘܹܝܬ ܣܵܗܕܵܐ ܐܸܠܝܼ ܕܐܵܢܵܐ ܝܘܸܢ ܚܦܝܼܪܹܗ ܐܵܗܵܐ ܒܹܐܪܵܐ.“ 31ܒܘܼܬ ܐܵܗܵܐ ܦܝܼܫ ܠܵܗ̇ ܩܪܝܼܬܵܐ ܗ̇ܝ ܕܘܼܟܵܐ، ܒܹܪܫܒܲܥ،#21:31 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܹܐܪܵܐ ܕܝ݇ܡܵܝܬܵܐ ܝܲܢ ܒܹܐܪܵܐ ܕܫܲܒ݂ܥܵܐ ܣܵܒܵܒ ܬܵܡܵܐ ܝ݇ܡܹܐ ܠܗܘܿܢ ܬܸܪܘܲܝܗܝ. 32ܥܒ݂ܝܼܕ ܠܗܘܿܢ ܘܲܥܕܵܐ ܒܒܹܪܫܒܲܥ. ܘܩܝܼܡ ܠܹܗ ܐܲܒ݂ܝܼܡܲܠܟ ܘܦܝܼܟܸܠ ܪܲܒ ܚܲܝܠܹܗ، ܘܕܝܼܪܗܘܿܢ ܠܐܲܪܥܵܐ ܕܦܠܸܫܬܵܝܹ̈ܐ. 33ܘܢܨܝܼܒ݂ ܠܹܗ ܐܲܒ݂ܪܵܗܵܡ ܠܘܼܙܵܐ ܒܒܹܪܫܒܲܥ، ܘܩܪܹܐ ܠܹܗ ܬܵܡܵܐ ܒܫܸܡܵܐ ܕܡܵܪܝܵܐ ܐܲܠܵܗܵܐ ܕܥܵܠܲܡ. 34ܘܡܘܼܫܚܸܛ ܠܹܗ ܐܲܒ݂ܪܵܗܵܡ ܝܵܘܡܵܢܹ̈ܐ ܪܵܒܵܐ ܒܐܲܪܥܵܐ ܕܦܠܸܫܬܵܝܹ̈ܐ.
Currently Selected:
ܒܪܝܬܐ 21: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
