ܒܪܝܬܐ 22
22
ܐܲܒ݂ܪܵܗܵܡ ܡܲܩܪܘܼܒܹܐ ܒܪܘܿܢܹܗ ܐܝܼܣܚܵܩ ܕܸܒ݂ܚܵܐ
1ܘܗܘܹܐ ܠܵܗ̇ ܡ̣ܢ ܒܵܬ݇ܪ ܕܐܲܢܹܐ ܡܸܢܕܝܼܵܢܹ̈ܐ، ܐܲܠܵܗܵܐ ܓ̰ܘܼܪܸܒ ܠܹܗ ܠܐܲܒ݂ܪܵܗܵܡ، ܘܐ݇ܡܝܼܪܹܗ ܐܸܠܹܗ، ”ܐܲܒ݂ܪܵܗܵܡ.“ ܘܐ݇ܡܝܼܪܹܗ، ”ܗܵܐ ܐܵܢܵܐ.“ 2ܐ݇ܡܝܼܪܹܗ ܐܲܠܵܗܵܐ، ”ܫܩܘܿܠ ܠܒܪܘܿܢܘܼܟ݂ ܝܼܚܝܼܕܵܝܵܐ ܐܝܼܣܚܵܩ، ܕܟܹܐ ܡܲܚܸܒܸܬ ܠܹܗ، ܘܙܹܠ݇ ܠܘܼܟ݂ ܠܐܲܪܥܵܐ ܕܡܘܼܪܝܼܵܐ، ܘܡܲܐܣܸܩ ܠܹܗ ܬܵܡܵܐ ܠܕܸܒ݂ܚܵܐ ܡܘܼܩܕܵܐ، ܥܲܠ ܚܲܕ ܡ̣ܢ ܛܘܼܪ̈ܵܢܹܐ ܕܐܵܡܪܹܢܘܼܟ݂.“ 3ܘܩܝܼܡ ܠܹܗ ܐܲܒ݂ܪܵܗܵܡ ܓ̰ܲܠܕܹܐ ܒܨܲܦܪܵܐ، ܘܣܘܼܪܸܓ ܠܹܗ ܠܚܡܵܪܹܗ. ܫܩܝܼܠ ܠܹܗ ܬܪܹܝ ܡ̣ܢ ܥܠܲܝܡܘܼ̈ܗܝ ܥܲܡܹܗ، ܘܠܐܝܼܣܚܵܩ ܒܪܘܿܢܹܗ، ܘܟ̰ܠܝܼܦ ܠܹܗ ܩܲܝܣܹ̈ܐ ܕܕܸܒ݂ܚܵܐ ܡܘܼܩܕܵܐ، ܘܩܝܼܡ ܠܹܗ ܘܐ݇ܙܝܼܠ ܠܹܗ ܠܕܘܼܟܵܐ ܕܐ݇ܡܝܼܪܹܗ ܐܸܠܹܗ ܐܲܠܵܗܵܐ. 4ܒܝܵܘܡܵܐ ܕܬܠܵܬܵܐ ܡܘܼܪܸܡ ܠܹܗ ܐܲܒ݂ܪܵܗܵܡ ܥܲܝܢܘܼ̈ܗܝ، ܘܚܙܹܐ ܠܹܗ ܠܗ̇ܝ ܕܘܼܟܵܐ ܡ̣ܢ ܪܸܚܩܵܐ. 5ܐ݇ܡܝܼܪܹܗ ܐܲܒ݂ܪܵܗܵܡ ܠܥܠܲܝܡܘܼ̈ܗܝ، ”ܟܠܹܝܡܘܼܢ ܐܲܚܬܘܿܢ ܠܐܲܟ݂ܵܐ ܥܲܡ ܚܡܵܪܵܐ، ܘܐܵܢܵܐ ܘܝܵܠܵܕ݇ܐ ܒܸܬ ܐܵܙܲܠ݇ܚ ܗܲܠ ܬܵܡܵܐ ܕܣܵܓ݂ܕܲܚ، ܘܒܸܬ ܕܵܝܪܲܚ ܠܟܸܣ ܠܵܘܟ݂ܘܿܢ.“ 6ܗ̇ܝܓܵܗ ܫܩܝܼܠ ܠܹܗ ܠܩܲܝܣܹ̈ܐ ܕܕܸܒ݂ܚܵܐ ܡܘܼܩܕܵܐ ܘܡܘܼܛܥܸܢܲܝ ܠܹܗ ܥܲܠ ܐܝܼܣܚܵܩ ܒܪܘܿܢܹܗ؛ ܘܫܩܝܼܠ ܠܹܗ ܒܐܝܼܕܹܗ ܠܢܘܼܪܵܐ ܘܠܣܟܝܼܢܵܐ، ܘܐ݇ܙܝܼܠ ܠܗܘܿܢ ܬܸܪܘܲܝܗܝ ܡܸܚܕܵܕܹ̈ܐ. 7ܐ݇ܡܝܼܪܹܗ ܐܝܼܣܚܵܩ ܠܐܲܒ݂ܪܵܗܵܡ ܒܵܒܘܼܗܝ، ”ܒܵܒܝܼ.“ ܓ̰ܘܼܘܸܒ ܠܹܗ ܐܲܒ݂ܪܵܗܵܡ، ”ܗܵܐ ܐܵܢܵܐ، ܒܪܘܿܢܝܼ.“ ܒܘܼܩܸܪܹܗ ܐܝܼܣܚܵܩ ܡܸܢܹܗ، ”ܗܵܐ، ܢܘܼܪܵܐ ܘܩܲܝܣܹ̈ܐ، ܐܝܼܢܵܐ ܐܲܝܟܵܐ ܝܠܹܗ ܦܹܐܪܵܐ ܩܵܐ ܕܸܒ݂ܚܵܐ ܡܘܼܩܕܵܐ؟“ 8ܓ̰ܘܼܘܸܒ ܠܹܗ ܐܲܒ݂ܪܵܗܵܡ، ”ܒܪܘܿܢܝܼ، ܐܲܠܵܗܵܐ ܒܓܵܢܹܗ ܒܸܬ ܬܲܪܣܹܐ ܦܹܐܪܵܐ ܩܵܐ ܕܸܒ݂ܚܵܐ ܡܘܼܩܕܵܐ.“ ܘܐ݇ܙܝܼܠ ܠܗܘܿܢ ܬܸܪܘܲܝܗܝ ܡܸܚܕܵܕܹ̈ܐ.
9ܟܲܕ ܐ݇ܬܹܐ ܠܗܘܿܢ ܠܕܘܼܟܵܐ ܕܐ݇ܡܝܼܪܵܐ ܝܗ݇ܘܵܐ ܐܸܠܹܗ ܐܲܠܵܗܵܐ؛ ܒܢܹܐ ܠܹܗ ܐܲܒ݂ܪܵܗܵܡ ܬܵܡܵܐ ܡܲܕܒܚܵܐ، ܘܚܪܝܼܙ ܠܹܗ ܩܲܝܣܹ̈ܐ. ܐ݇ܣܝܼܪܹܗ ܠܐܝܼܣܚܵܩ ܒܪܘܿܢܹܗ ܘܡܘܼܬܸܒ݂ ܠܹܗ ܥܲܠ ܡܲܕܒܚܵܐ، ܥܲܠ ܩܲܝܣܹ̈ܐ. 10ܦܘܼܫܸܛ ܠܹܗ ܐܲܒ݂ܪܵܗܵܡ ܐܝܼܕܹܗ ܘܫܩܝܼܠ ܠܹܗ ܠܣܟܝܼܢܵܐ ܠܸܦܪܵܡܵܐ ܠܒܪܘܿܢܹܗ. 11ܐܝܼܢܵܐ ܩܪܹܐ ܠܹܗ ܐܸܠܹܗ ܡܲܠܲܐܟ݂ܵܐ ܕܡܵܪܝܵܐ ܡ̣ܢ ܫܡܲܝܵܐ، ܒܹܐܡܵܪܵܐ، ”ܐܲܒ݂ܪܵܗܵܡ، ܐܲܒ݂ܪܵܗܵܡ.“ ܗ̇ܘ ܓ̰ܘܼܘܸܒ ܠܹܗ، ”ܗܵܐ ܐܵܢܵܐ.“ 12ܐ݇ܡܝܼܪܹܗ ܡܲܠܲܐܟ݂ܵܐ، ”ܠܵܐ ܦܲܫܛܸܬ ܐܝܼܕܘܼܟ݂ ܠܝܵܠܵܕ݇ܐ، ܘܠܵܐ ܥܵܒ݂ܕܹܬ ܐܸܠܹܗ ܡܸܢܕܝܼ، ܣܵܒܵܒ ܐܵܕܝܼܵܐ ܝ݇ܕܝܼܥ ܠܝܼ ܕܙܵܕܥܵܢܵܐ ܡ̣ܢ ܐܲܠܵܗܵܐ ܝܘܸܬ، ܘܠܵܐ ܚܣܝܼܟ݂ ܠܘܼܟ݂ ܠܒܪܘܿܢܘܼܟ݂، ܠܝܼܚܝܼܕܵܝܘܼܟ݂، ܡܸܢܝܼ.“ 13ܘܡܘܼܪܸܡ ܠܹܗ ܐܲܒ݂ܪܵܗܵܡ ܥܲܝܢܘܼ̈ܗܝ ܘܚܙܹܐ ܠܹܗ، ܘܗܵܐ، ܒܲܪܥܵܢܵܐ ܠܒܵܬ݇ܪܹܗ، ܕܒ݂ܝܼܩܵܐ ܒܣܲܢܝܵܐ ܒܝܲܕ ܩܵܪ̈݇ܢܵܢܘܼܗܝ؛ ܘܐ݇ܙܝܼܠ ܠܹܗ ܐܲܒ݂ܪܵܗܵܡ ܘܫܩܝܼܠ ܠܹܗ ܠܒܲܪܥܵܢܵܐ ܘܡܘܼܩܪܸܒ݂ ܠܹܗ ܕܸܒ݂ܚܵܐ ܡܘܼܩܕܵܐ ܒܫܵܘܦܵܐ ܕܒܪܘܿܢܹܗ. 14ܘܩܪܹܐ ܠܹܗ ܐܲܒ݂ܪܵܗܵܡ ܫܸܡܵܐ ܕܗ̇ܝ ܕܘܼܟܵܐ، ”ܡܵܪܝܵܐ ܒܸܬ ܬܲܪܣܹܐ،“ ܕܟܹܐ ܦܵܝܫܵܐ ܐ݇ܡܝܼܪܬܵܐ ܐܸܕܝܘܿܡ ܝܵܘܡܵܐ، ”ܒܛܘܼܪܵܐ ܕܡܵܪܝܵܐ ܒܸܬ ܦܵܐܹܫ ܬܘܼܪܣܝܼܵܐ.“
ܐܲܒ݂ܪܵܗܵܡ ܦܝܵܫܵܐ ܒܘܼܪܟ݂ܵܐ ܡܸܢܕܪܸܫ
15ܘܩܪܹܐ ܠܹܗ ܡܲܠܲܐܟ݂ܵܐ ܕܡܵܪܝܵܐ ܠܐܲܒ݂ܪܵܗܵܡ ܓܵܗܵܐ ܕܬܲܪܬܹܝ ܡ̣ܢ ܫܡܲܝܵܐ، 16ܒܹܐܡܵܪܵܐ، ”ܝ݇ܡܹܐ ܠܝܼ ܒܓܵܢܝܼ، ܒܹܐܡܵܪܵܐ ܝܠܹܗ ܡܵܪܝܵܐ، ܣܵܒܵܒ ܥܒ݂ܝܼܕ ܠܘܼܟ݂ ܐܵܗܵܐ ܡܸܢܕܝܼ، ܘܠܵܐ ܚܣܝܼܟ݂ ܠܘܼܟ݂ ܠܒܪܘܿܢܘܼܟ݂، ܠܝܼܚܝܼܕܵܝܘܼܟ݂؛ 17ܒܲܪܘܼܟܹܐ ܒܸܬ ܒܲܪܟܸܢܘܼܟ݂، ܘܡܲܙܝܘܼܕܹܐ ܒܸܬ ܡܲܙܝܸܕܸܢ ܠܙܲܪܥܘܼܟ݂ ܐܲܝܟ݂ ܟܵܘܟ݂ܒܹ̈ܐ ܕܫܡܲܝܵܐ، ܘܐܲܝܟ݂ ܣܹܠܵܐ ܕܥܲܠ ܣܸܦܬܵܐ ܕܝܵܡܵܐ، ܘܒܸܬ ܝܵܪܹܬ ܙܲܪܥܘܼܟ݂ ܠܬܲܪܥܵܐ ܕܕܸܫܡܸܢܘܼ̈ܗܝ. 18ܘܒܸܬ ܦܵܝܫܝܼ ܒܘܼܪܟܹܐ ܒܙܲܪܥܘܼܟ݂ ܟܠܲܝܗܝ ܐܸܡܘܵܬܹ̈ܐ ܕܐܲܪܥܵܐ، ܣܵܒܵܒ ܫܡܝܼܥ ܠܘܼܟ݂ ܠܩܵܠܝܼ.“
19ܘܕܝܼܪܹܗ ܐܲܒ݂ܪܵܗܵܡ ܠܟܸܣ ܥܠܲܝܡܘܼ̈ܗܝ، ܘܩܝܼܡ ܠܗܘܿܢ ܘܐ݇ܙܝܼܠ ܠܗܘܿܢ ܡܸܚܕܵܕܹ̈ܐ ܠܒܹܪܫܒܲܥ؛ ܘܝ݇ܬܝܼܒ݂ ܠܹܗ ܐܲܒ݂ܪܵܗܵܡ ܓܵܘ ܒܹܪܫܒܲܥ.
ܬܵܘܠܕܵܬܹ̈ܐ ܕܢܵܚܘܿܪ
20ܘܗܘܹܐ ܠܵܗ̇ ܡ̣ܢ ܒܵܬ݇ܪ ܕܐܲܢܹܐ ܡܸܢܕܝܼܵܢܹ̈ܐ، ܦܝܼܫ ܠܹܗ ܡܘܼܕܸܥܵܐ ܠܐܲܒ݂ܪܵܗܵܡ، ”ܗܵܐ ܡܸܠܟܵܐ، ܐܘܼܦ ܗ̇ܝ ܝ݇ܠܝܼܕܬܵܐ ܝܠܵܗ̇ ܒܢܘܿܢܹ̈ܐ ܠܢܵܚܘܿܪ ܐܲܚܘܿܢܘܼܟ݂: 21ܠܥܘܼܨ ܒܘܼܟ݂ܪܹܗ، ܘܠܒܘܼܙ ܐܲܚܘܿܢܘܼܗܝ، ܘܠܩܡܘܼܐܹܝܠ ܒܵܒܵܐ ܕܐܵܪܵܡ، 22ܘܠܟܵܣܵܕ، ܘܠܚܲܙܘܿ، ܘܠܦܲܠܕܵܫ، ܘܠܝܲܕܠܵܦ، ܘܠܒܬܘܼܐܹܝܠ.“ 23ܒܬܘܼܐܹܝܠ ܡܘܼܠܸܕ ܠܹܗ ܠܪܲܦܩܵܐ. ܐܲܢܹܐ ܬܡܵܢܝܵܐ ܝ݇ܠܝܼܕ ܠܵܗ̇ ܡܸܠܟܵܐ ܠܢܵܚܘܿܪ ܐܲܚܘܿܢܵܐ ܕܐܲܒ݂ܪܵܗܵܡ. 24ܐܘܼܦ ܕܪܘܼܟ݂ܬܹܗ، ܕܫܸܡܘܼܗ̇ ܝܼܗ݇ܘܵܐ ܪܐܘܼܡܵܐ، ܐܘܼܦ ܗ̇ܝ ܝ݇ܠܝܼܕ ܠܵܗ̇ ܠܛܵܒ݂ܵܚ، ܘܠܓܵܚܵܡ، ܘܠܬܵܚܵܫ ܘܠܡܲܥܟܵܐ.
Currently Selected:
ܒܪܝܬܐ 22: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
