ܒܪܝܬܐ 27
27
ܝܲܥܩܘܿܒ݂ ܒܸܓܢܵܒ݂ܵܐ ܒܘܼܟ݂ܪܘܼܬܵܐ ܕܥܹܣܘܿ
1ܗܘܹܐ ܠܵܗ̇ ܟܲܕ ܣܝܼܒ݂ ܠܹܗ ܐܝܼܣܚܵܩ ܘܚܘܼܫܟܸܢܗܘܿܢ ܥܲܝܢܘܼ̈ܗܝ ܡ̣ܢ ܠܸܚܙܵܝܵܐ، ܩܪܹܐ ܠܹܗ ܠܥܹܣܘܿ ܒܪܘܿܢܹܗ ܓܘܼܪܵܐ ܘܐ݇ܡܝܼܪܹܗ ܐܸܠܹܗ، ”ܒܪܘܿܢܝܼ.“ ܓ̰ܘܼܘܸܒ ܠܹܗ، ”ܗܵܐ ܐܵܢܵܐ.“ 2ܐ݇ܡܝܼܪܹܗ، ”ܗܵܐ ܣܝܼܒ݂ ܠܝܼ ܐܵܢܵܐ، ܘܠܹܐ ܝܵܕܥܹܢ ܠܝܵܘܡܵܐ ܕܡܵܘܬܝܼ. 3ܐܵܕܝܼܵܐ ܫܩܘܿܠ ܙܲܝܢܘܼ̈ܟ݂، ܚܸܠܬܹ̈ܐ ܕܓܹܐܪ̈ܘܼܟ݂، ܘܩܸܫܬܘܼܟ݂، ܘܦܠܘܿܛ ܠܕܸܫܬܵܐ ܘܨܘܼܕ ܠܝܼ ܨܲܝܕܵܐ. 4ܘܒܲܫܸܠ ܠܝܼ ܒܘܼܫܵܠܵܐ ܛܲܥܡܵܢܬܵܐ ܕܟܹܐ ܡܲܚܸܒܸܢܵܗ̇؛ ܘܡܲܝܬܝܼ ܠܝܼ ܕܐܵܟ݂ܠܹܢ، ܕܒܲܪܟ݂ܵܐ ܠܘܼܟ݂ ܓܵܢܝܼ ܡ̣ܢ ܩܵܕ݇ܡ ܕܡܵܝܬܹܢ.“
5ܪܲܦܩܵܐ ܒܸܫܡܵܥܵܐ ܝܗ݇ܘܵܐ ܒܗ̇ܝ ܥܕܵܢܵܐ ܕܐܝܼܣܚܵܩ ܗܲܡܙܘܼܡܹܐ ܝܗ݇ܘܵܐ ܥܲܡ ܥܹܣܘܿ ܒܪܘܿܢܹܗ. ܘܦܠܝܼܛ ܠܹܗ ܥܹܣܘܿ ܠܕܸܫܬܵܐ ܠܸܨܝܵܕܵܐ ܨܲܝܕܵܐ ܕܡܲܝܬܹܐ ܠܹܗ. 6ܘܐ݇ܡܝܼܪܵܗ̇ ܪܲܦܩܵܐ ܠܝܲܥܩܘܿܒ݂ ܒܪܘܿܢܘܼܗ̇، ”ܫܡܝܼܥ ܠܝܼ ܒܵܒܘܼܟ݂ ܗܲܡܙܘܼܡܹܐ ܥܲܡ ܥܹܣܘܿ ܐܲܚܘܿܢܘܼܟ݂، ܒܹܐܡܵܪܵܐ، 7’ܡܲܝܬܝܼ ܠܝܼ ܨܲܝܕܵܐ، ܘܒܲܫܸܠ ܠܝܼ ܡܹܐܟ݂ܘܼܠܬܵܐ ܛܲܥܡܵܢܬܵܐ ܕܐܵܟ݂ܠܹܢ، ܘܒܲܪܟܸܢܘܼܟ݂ ܩܵܕ݇ܡ ܡܵܪܝܵܐ ܡ̣ܢ ܩܵܕ݇ܡ ܕܡܵܝܬܹܢ.‘ 8ܐܵܕܝܼܵܐ ܫܡܸܥ ܒܪܘܿܢܝܼ ܡܸܢܕܝܼ ܕܐܵܡܪܵܢܘܼܟ݂. 9ܙܹܠ݇ ܠܓܘܼܡܵܐ ܕܥܸܪ̈ܒܹܐ، ܘܡܲܝܬܝܼ ܠܝܼ ܡ̣ܢ ܬܵܡܵܐ ܬܪܹܝ ܓܸܕܝܹ̈ܐ ܕܥܸܙܹ̈ܐ ܨܦܵܝܝܼ، ܕܬܲܪܨܵܢܗܘܿܢ ܒܘܼܫܵܠܵܐ ܛܲܥܡܵܢܬܵܐ ܠܒܵܒܘܼܟ݂ ܐܲܝܟ݂ ܕܟܹܐ ܡܲܚܸܒ ܠܵܗ̇. 10ܡܲܝܬܸܝܬ ܠܵܗ̇ ܠܒܵܒܘܼܟ݂ ܕܐܵܟܹܠ، ܩܵܐ ܕܒܲܪܸܟ݂ ܠܘܼܟ݂ ܡ̣ܢ ܩܵܕ݇ܡ ܡܵܘܬܹܗ.“ 11ܘܐ݇ܡܝܼܪܹܗ ܝܲܥܩܘܿܒ݂ ܠܪܲܦܩܵܐ ܝܸܡܹܗ، ”ܥܹܣܘܿ ܐܲܚܘܿܢܝܼ ܐ݇ܢܵܫܵܐ ܡܸܙܬܵܢܵܐ ܝܠܹܗ، ܘܐܵܢܵܐ ܠܹܐ ܝܘܸܢ ܡܸܙܬܵܢܵܐ. 12ܩܵܘܡܵܐ ܕܦܲܠܬܸܫ ܠܝܼ ܒܵܒܝܼ، ܘܒܸܬ ܗܵܘܹܝܢ ܒܥܲܝܢܘܼ̈ܗܝ ܐܲܝܟ݂ ܡܲܣܚܸܪܵܢܵܐ، ܘܒܸܬ ܡܲܝܬܸܝܢ ܥܲܠܝܼ ܠܵܘܛܬܵܐ ܡ̣ܢ ܓܹܒܵܐ ܕܒܘܼܪܟܬܵܐ.“ 13ܘܐ݇ܡܝܼܪܵܗ̇ ܐܸܠܹܗ ܝܸܡܹܗ، ”ܠܵܘܛܬܘܼܟ݂ ܥܲܠܝܼ ܒܪܘܿܢܝܼ، ܐܲܚܟ̰ܝܼ ܥܒ݂ܘܿܕ ܐܲܝܟ݂ ܕܐܵܡܪܵܢܘܼܟ݂. ܙܹܠ݇ ܘܡܲܝܬܝܼ ܠܗܘܿܢ ܐܸܠܝܼ.“ 14ܘܐ݇ܙܝܼܠ ܠܹܗ ܘܫܩܝܼܠ ܠܹܗ ܠܓܸܕܝܹ̈ܐ ܘܡܘܼܐܬܲܝ ܠܹܗ ܠܝܸܡܹܗ؛ ܘܬܘܼܪܸܨ ܠܵܗ̇ ܝܸܡܹܗ ܒܘܼܫܵܠܵܐ ܛܲܥܡܵܢܬܵܐ ܕܵܐܟ݂ܝܼ ܕܟܹܐ ܡܲܚܸܒ ܗ݇ܘܵܐ ܠܵܗ̇ ܒܵܒܘܼܗܝ. 15ܗ̇ܝܓܵܗ ܫܩܝܼܠ ܠܵܗ̇ ܪܲܦܩܵܐ ܓ̰ܘܼܠܹ̈ܐ ܫܲܦܝܼܪܹ̈ܐ ܕܥܹܣܘܿ، ܒܪܘܿܢܘܼܗ̇ ܓܘܼܪܵܐ، ܕܝܼܗ݇ܘܵܘ ܠܟܸܣ ܠܘܼܗ̇ ܒܒܲܝܬܵܐ، ܘܡܘܼܠܒܸܫܲܝ ܠܵܗ̇ ܠܝܲܥܩܘܿܒ݂ ܒܪܘܿܢܘܼܗ̇ ܙܥܘܿܪܵܐ. 16ܘܡܘܼܠܒܸܫ ܠܵܗ̇ ܓܸܠܕܹ̈ܐ ܕܓܸܕܝܹ̈ܐ، 17ܘܝܘܼܗ݇ܒܸܠ ܠܵܗ̇ ܠܒܘܼܫܵܠܵܐ ܛܲܥܡܵܢܬܵܐ ܘܠܠܲܚܡܵܐ ܕܬܘܼܪܸܨܬܹܗ ܝܗ݇ܘܵܐ ܠܐܝܼܕܵܐ ܕܝܲܥܩܘܿܒ݂ ܒܪܘܿܢܘܼܗ̇. 18ܘܐ݇ܬܹܐ ܠܹܗ ܝܲܥܩܘܿܒ݂ ܠܟܸܣ ܒܵܒܘܼܗܝ، ܘܐ݇ܡܝܼܪܹܗ، ”ܒܵܒܝܼ.“ ܘܐ݇ܡܝܼܪܹܗ، ”ܗܵܐ ܐܵܢܵܐ. ܡܵܢܝܼ ܝܘܸܬ، ܒܪܘܿܢܝܼ؟“ 19ܐ݇ܡܝܼܪܹܗ ܝܲܥܩܘܿܒ݂ ܠܒܵܒܘܼܗܝ، ”ܐܵܢܵܐ ܝܘܸܢ ܥܹܣܘܿ ܒܘܼܟ݂ܪܘܼܟ݂. ܥܒ݂ܝܼܕ ܠܝܼ ܐܲܝܟ݂ ܕܗܘܼܡܙܸܡ ܠܘܼܟ݂ ܥܲܡܝܼ. ܩܘܼܡ، ܦܲܪܦܘܼܠܹܐ ܝܘܸܢ، ܝ݇ܬܘܿܒ݂ ܘܐ݇ܟ݂ܘܿܠ ܡ̣ܢ ܨܲܝܕܝܼ، ܕܒܲܪܟ݂ܵܐ ܠܝܼ ܓܵܢܘܼܟ݂.“ 20ܒܘܼܩܸܪܹܗ ܐܝܼܣܚܵܩ ܡ̣ܢ ܒܪܘܿܢܹܗ، ”ܕܐܲܝܟ݂ ܗܘܹܐ ܠܵܗ̇ ܕܒܓ̰ܲܠܕܘܼܬܵܐ ܡܘܼܫ݇ܟ̰ܸܚ ܠܘܼܟ݂ ܨܲܝܕܵܐ، ܒܪܘܿܢܝܼ؟“ ܓ̰ܘܼܘܸܒ ܠܹܗ، ”ܣܵܒܵܒ ܡܵܪܝܵܐ ܐܲܠܵܗܘܼܟ݂ ܡܘܼܬܦܸܩ ܠܹܗ ܒܝܼܝܼ.“ 21ܐ݇ܡܝܼܪܹܗ ܐܝܼܣܚܵܩ ܠܝܲܥܩܘܿܒ݂، ”ܩܲܪܒܸܢ ܕܦܲܠܬܸܫܸܢܘܼܟ݂، ܒܪܘܿܢܝܼ، ܕܝܵܕܥܹܢ ܐܸܢ ܐܲܢ݇ܬ ܝܼܘܸܬ ܒܪܘܿܢܝܼ ܥܹܣܘܿ، ܝܲܢ ܠܵܐ.“ 22ܘܩܘܼܪܒܸܢܹܗ ܝܲܥܩܘܿܒ݂ ܠܟܸܣ ܐܝܼܣܚܵܩ ܒܵܒܘܼܗܝ، ܘܗ̇ܘ ܦܘܼܠܬܸܫ ܠܹܗ ܐܸܠܹܗ، ܘܐ݇ܡܝܼܪܹܗ، ”ܩܵܠܵܐ، ܩܵܠܵܐ ܕܝܲܥܩܘܿܒ݂ ܝܼܠܹܗ، ܐܝܼܢܵܐ ܐܝܼܕܵܬܹ̈ܐ، ܐܝܼܕܵܬܹ̈ܐ ܕܥܹܣܘܿ ܝܢܵܐ.“ 23ܘܠܵܐ ܝ݇ܕܝܼܥ ܠܹܗ ܐܸܠܹܗ ܣܵܒܵܒ ܐܝܼܕܵܬܹ̈ܗ ܐܲܝܟ݂ ܐܝܼܕܵܬܹ̈ܐ ܕܥܹܣܘܿ ܐܲܚܘܿܢܘܼܗܝ ܡܸܙܬܵܢܹ̈ܐ ܝܗ݇ܘܵܘ. ܘܐ݇ܬܹܐ ܠܹܗ ܠܒܲܪܘܼܟܹܗ. 24ܐܝܼܢܵܐ ܒܘܼܩܸܪܹܗ، ”ܐܲܢ݇ܬ ܝܼܘܸܬ ܒܪܘܿܢܝܼ ܥܹܣܘܿ؟“ ܓ̰ܘܼܘܸܒ ܠܹܗ، ”ܐܵܢܵܐ ܝܘܸܢ.“ 25ܘܐ݇ܡܝܼܪܹܗ ܐܝܼܣܚܵܩ، ”ܡܲܝܬܝܼ ܩܘܼܪܒܵܐ ܠܟܸܣ ܠܝܼ، ܕܐܵܟ݂ܠܹܢ ܡ̣ܢ ܨܲܝܕܵܐ ܕܒܪܘܿܢܝܼ، ܘܕܒܲܪܟ݂ܵܐ ܠܘܼܟ݂ ܓܵܢܝܼ.“ ܘܡܘܼܐܬܹܐ ܠܹܗ ܩܘܼܪܒܵܐ ܠܟܸܣ ܠܹܗ ܘܐ݇ܟ݂ܝܼܠ ܠܹܗ، ܘܐܘܼܦ ܡܘܼܐܬܹܐ ܠܹܗ ܐܸܠܹܗ ܚܲܡܪܵܐ ܘܫܬܹܐ ܠܹܗ. 26ܗ̇ܝܓܵܗ ܐ݇ܡܝܼܪܹܗ ܐܸܠܹܗ ܐܝܼܣܚܵܩ ܒܵܒܘܼܗܝ، ”ܐܵܕܝܼܵܐ ܩܲܪܒܸܢ ܒܪܘܿܢܝܼ، ܘܢܫܘܿܩ ܠܝܼ.“ 27ܩܘܼܪܒܸܢܹܗ ܘܢܫܝܼܩ ܠܹܗ، ܘܫܩܝܼܠ ܠܹܗ ܐܝܼܣܚܵܩ ܪܹܝܚܵܐ ܕܓ̰ܘܼܠܘܼ̈ܗܝ، ܘܒܘܼܪܸܟ݂ ܠܹܗ ܐܸܠܹܗ، ܒܹܐܡܵܪܵܐ،
”ܚܙܝܼ، ܪܹܝܚܵܐ ܕܒܪܘܿܢܝܼ ܐܲܝܟ݂ ܪܹܝܚܵܐ ܕܕܸܫܬܵܐ ܝܠܹܗ ܕܒܘܼܪܟ݂ܵܐ ܠܹܗ ܡܵܪܝܵܐ.
28ܝܲܗ݇ܒܸܠ ܠܘܼܟ݂ ܐܲܠܵܗܵܐ ܡ̣ܢ ܛܠܘܼܠܵܐ ܕܫܡܲܝܵܐ،
ܘܡ̣ܢ ܫܲܡܝܼܢܘܼܝܵܬܹ̈ܐ ܕܐܲܪܥܵܐ،
ܘܡ̣ܢ ܦܸܪܝܘܼܬܵܐ ܕܕܲܚܠܵܐ ܘܕܚܲܡܪܵܐ.
29ܦܵܠܚܝܼ ܐܸܠܘܼܟ݂ ܥܲܡܡܹ̈ܐ،
ܘܟܵܝܦܝܼ ܩܵܕ݇ܡܘܼܟ݂ ܐܸܡܘܵܬܹ̈ܐ.
ܗܘܝܼ ܪܹܫܵܐ ܠܐܲܚܘܿܢܘܵܬܘܼ̈ܟ݂،
ܘܟܵܝܦܝܼ ܩܵܕ݇ܡܘܼܟ݂ ܒܢܘܿܢܹ̈ܐ ܕܝܸܡܘܼܟ݂.
ܠܵܝܛܵܢܘܼܟ݂ ܗܵܘܹܐ ܠܝܼܛܵܐ،
ܘܒܲܪܟ݂ܵܢܘܼܟ݂ ܗܵܘܹܐ ܡܒܘܼܪܟ݂ܵܐ.“
30ܟܲܕ ܦܪܝܼܩ ܠܹܗ ܐܝܼܣܚܵܩ ܡ̣ܢ ܠܒܲܪܘܼܟܹܐ ܠܝܲܥܩܘܿܒ݂، ܘܐܝܼܡܲܢ ܕܒܸܦܠܵܛܵܐ ܝܗ݇ܘܵܐ ܝܲܥܩܘܿܒ݂ ܡ̣ܢ ܩܵܕ݇ܡ ܐܝܼܣܚܵܩ ܒܵܒܘܼܗܝ، ܐ݇ܬܹܐ ܠܹܗ ܥܹܣܘܿ ܐܲܚܘܿܢܘܼܗܝ ܡ̣ܢ ܨܲܝܕܵܐ. 31ܐܘܼܦ ܗ̇ܘ ܒܘܼܫܸܠ ܠܹܗ ܒܘܼܫܵܠܵܐ ܛܵܥܡܵܢܬܵܐ ܘܡܘܼܐܬܝܵܐ ܠܹܗ ܠܒܵܒܘܼܗܝ، ܘܐ݇ܡܝܼܪܹܗ ܐܸܠܹܗ، ”ܩܵܐܹܡ ܒܵܒܝܼ ܘܐܵܟܹܠ ܡ̣ܢ ܨܲܝܕܵܐ ܕܒܪܘܿܢܹܗ، ܩܵܐ ܕܒܲܪܟ݂ܵܐ ܠܝܼ ܓܵܢܹܗ.“ 32ܘܒܘܼܩܸܪܹܗ ܡܸܢܹܗ ܐܝܼܣܚܵܩ ܒܵܒܘܼܗܝ، ”ܡܵܢܝܼ ܝܘܸܬ؟“ ܓ̰ܘܼܘܸܒ ܠܹܗ، ”ܐܵܢܵܐ ܝܘܸܢ ܒܪܘܿܢܘܼܟ݂ ܒܘܼܟ݂ܪܵܐ، ܥܹܣܘܿ.“ 33ܪܓܝܼܕ ܠܹܗ ܐܝܼܣܚܵܩ ܪܓܵܕܬܵܐ ܚܲܝܠܵܢܬܵܐ، ܘܐ݇ܡܝܼܪܹܗ، ”ܒܲܣ ܡܵܢܝܼ ܝܗ݇ܘܵܐ ܗ̇ܘ ܕܨܝܼܕ ܠܹܗ ܨܲܝܕܵܐ ܘܡܘܼܐܬܹܐ ܠܹܗ ܐܸܠܝܼ، ܘܐ݇ܟ݂ܝܼܠ ܠܝܼ ܟܠܹܗ، ܡ̣ܢ ܩܵܕ݇ܡ ܕܐܲܢ݇ܬ ܐܵܬܹܝܬ ܗ݇ܘܵܐ؟ ܗ̇ܘ ܕܩܲܡ ܒܲܪܟܸܢܹܗ ܐܵܢܵܐ، ܘܒܸܬ ܗܵܘܹܐ ܒܪܝܼܟ݂ܵܐ.“ 34ܟܲܕ ܫܡܝܼܥ ܠܹܗ ܥܹܣܘܿ ܗܹܡܸܙܡܵܢܹ̈ܐ ܕܒܵܒܘܼܗܝ، ܡܘܼܩܘܸܚ ܠܹܗ ܡܲܩܘܲܚܬܵܐ ܚܲܝܠܵܢܬܵܐ ܘܡܲܪܝܼܪܬܵܐ ܪܵܒܵܐ، ܘܐ݇ܡܝܼܪܹܗ ܠܒܵܒܘܼܗܝ، ”ܒܲܪܸܟ݂ ܐܘܼܦ ܐܸܠܝܼ، ܝܵܐ ܒܵܒܝܼ.“ 35ܐܝܼܢܵܐ ܐ݇ܡܝܼܪܹܗ ܒܵܒܘܼܗܝ، ”ܐ݇ܬܹܐ ܠܹܗ ܐܲܚܘܿܢܘܼܟ݂ ܒܦܸܠܡܵܐ ܘܫܩܝܼܠܵܐ ܠܹܗ ܒܘܼܪܟܬܘܼܟ݂.“ 36ܘܐ݇ܡܝܼܪܹܗ ܥܹܣܘܿ، ”ܠܹܐ ܝܠܹܗ ܫܲܪܝܼܪܵܐܝܼܬ ܦܝܼܫܵܐ ܩܸܪܝܵܐ ܝܲܥܩܘܿܒ݂؟#27:36 ܫܸܡܵܐ ܕܝܲܥܩܘܿܒ݂ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܕܵܒ݂ܩܵܢܵܐ ܕܥܸܩܒܵܐ ܒܠܸܫܵܢܵܐ ܥܸܒ݂ܪܵܝܵܐ، ܝܲܥܢܹܐ ܥܲܠܕܝܼܵܢܵܐ ܥܒ݂ܝܼܕ ܠܹܗ ܐܸܠܝܼ ܠܹܐܒܹ̈ܐ ܬܲܪܬܹܝ ܓܵܗܹ̈ܐ: ܫܩܝܼܠ ܠܹܗ ܒܘܼܟ݂ܪܘܼܬܝܼ، ܘܐܵܕܝܼܵܐ ܫܩܝܼܠ ܠܹܗ ܐܘܼܦ ܠܒܘܼܪܟܬܝܼ“ ܗ̇ܝܓܵܗ ܐ݇ܡܝܼܪܹܗ، ”ܠܲܝܬ ܠܘܼܟ݂ ܦܝܵܫܵܐ ܒܘܼܪܟܬܵܐ ܩܵܬܝܼ؟“ 37ܓ̰ܘܼܘܸܒ ܠܹܗ ܐܝܼܣܚܵܩ ܘܐ݇ܡܝܼܪܹܗ ܠܥܹܣܘܿ، ”ܥܒ݂ܝܼܕ ܠܝܼ ܐܸܠܹܗ ܡܵܪܵܐ ܥܲܠܘܼܟ݂، ܘܟܠܲܝܗܝ ܐܲܚܘܿܢܘܵܬܹ̈ܗ ܝܘܼܗ݇ܒܲܝ ܝܘܸܢ ܐܸܠܹܗ ܥܲܒ݂ܕܹ̈ܐ، ܘܣܢܝܼܕܹܗ ܝܘܸܢ ܒܕܲܚܠܵܐ ܘܚܲܡܪܵܐ. ܡܘܿܕܝܼ ܥܵܒ݂ܕܹܢ ܐܵܕܝܼܵܐ ܩܵܬܘܼܟ݂، ܒܪܘܿܢܝܼ؟“ 38ܐ݇ܡܝܼܪܹܗ ܥܹܣܘܿ ܠܒܵܒܘܼܗܝ، ”ܐܝܼܬ ܠܘܼܟ݂ ܐܲܚܟ̰ܝܼ ܚܕܵܐ ܒܘܼܪܟܬܵܐ، ܒܵܒܝܼ؟ ܒܲܪܸܟ݂ ܐܘܼܦ ܐܸܠܝܼ، ܒܵܒܝܼ.“ ܘܡܘܼܪܸܡ ܠܹܗ ܥܹܣܘܿ ܩܵܠܹܗ، ܘܒܟܹܐ ܠܹܗ. 39ܓ̰ܘܼܘܸܒ ܠܹܗ ܐܝܼܣܚܵܩ ܒܵܒܘܼܗܝ، ܒܹܐܡܵܪܵܐ،
”ܗܵܐ، ܡ̣ܢ ܫܲܡܝܼܢܘܼܝܵܬܹ̈ܐ ܕܐܲܪܥܵܐ ܗܵܘܹܝܬ ܒܸܚܵܝܵܐ،
ܘܡ̣ܢ ܛܠܘܼܠܵܐ ܕܫܡܲܝܵܐ ܡ̣ܢ ܠܥܸܠܸܠ؛
40ܥܲܠ ܣܲܝܦܘܼܟ݂ ܚܵܝܹܝܬ،
ܘܠܐܲܚܘܿܢܘܼܟ݂ ܦܵܠܚܹܬ؛
ܐܝܼܢܵܐ ܐܝܼܡܲܢ ܕܦܵܝܫܹܬ ܚܹܐܪܵܐ،
ܬܵܒ݂ܪܹܬ ܢܝܼܪܹܗ ܡܥܲܠ ܩܕܵܠܘܼܟ݂.“
41ܣܢܹܐ ܠܹܗ ܥܹܣܘܿ ܠܝܲܥܩܘܿܒ݂ ܒܘܼܬ ܒܘܼܪܟܬܵܐ ܕܩܵܕ݇ܡ ܒܲܪܸܟ݂ ܠܹܗ ܒܵܒܘܼܗܝ. ܘܐ݇ܡܝܼܪܹܗ ܥܹܣܘܿ ܒܠܸܒܹܗ، ”ܩܘܼܪܒܸܢܗܘܿܢ ܝܵܘܡܵܢܹ̈ܐ ܕܥܒ݂ܵܕܬܵܐ ܕܬܵܥܙܝܼ ܥܲܠ ܒܵܒܝܼ، ܘܡ̣ܢ ܒܵܬ݇ܪ ܗܵܕܵܐ ܒܸܬ ܩܵܛܠܹܢ ܠܝܲܥܩܘܿܒ݂ ܐܲܚܘܿܢܝܼ.“ 42ܦܝܼܫ ܠܗܘܿܢ ܡܘܼܕܸܥܹܐ ܠܪܲܦܩܵܐ ܗܹܡܸܙܡܵܢܹ̈ܐ ܕܥܹܣܘܿ، ܒܪܘܿܢܘܼܗ̇ ܓܘܼܪܵܐ؛ ܘܫܘܼܕܸܪܵܗ̇ ܘܩܪܹܐ ܠܵܗ̇ ܠܝܲܥܩܘܿܒ݂ ܒܪܘܿܢܘܼܗ̇ ܙܥܘܿܪܵܐ، ܘܐ݇ܡܝܼܪܵܗ̇ ܐܸܠܹܗ، ”ܗܵܐ، ܐܲܚܘܿܢܘܼܟ݂ ܥܹܣܘܿ ܒܝܼܵܗ݇ܒ݂ܵܐ ܝܠܹܗ ܠܸܒܵܐ ܠܓܵܢܹܗ ܒܘܼܬ ܕܝܼܘܼܟ݂ ܕܩܵܛܹܠ ܠܘܼܟ݂. 43ܐܵܕܝܼܵܐ ܒܪܘܿܢܝܼ، ܫܡܸܥ ܐܸܠܝܼ، ܩܘܼܡ ܘܥܪܘܿܩ ܠܚܵܪܵܢ ܠܟܸܣ ܠܵܒ݂ܵܢ ܐܲܚܘܿܢܝܼ. 44ܦܘܼܫ ܠܟܸܣ ܠܹܗ ܚܲܕ݇ܟܡܵܐ ܝܵܘܡܵܢܹ̈ܐ، ܗܲܠ ܕܦܵܝܚܵܐ ܟܲܪܒܵܐ ܕܐܲܚܘܿܢܘܼܟ݂؛ 45ܗܲܠ ܕܦܵܝܚܵܐ ܚܸܡܬܵܐ ܕܐܲܚܘܿܢܘܼܟ݂ ܡܸܢܘܼܟ݂، ܘܡܲܢܫܹܐ ܠܡܸܢܕܝܼ ܕܥܒ݂ܝܼܕ ܠܘܼܟ݂ ܐܸܠܹܗ؛ ܗ̇ܝܓܵܗ ܒܸܬ ܫܲܕܪܵܢ ܘܫܵܩܠܵܢܘܼܟ݂ ܡ̣ܢ ܬܵܡܵܐ. ܩܵܡܘܿܕܝܼ ܦܵܝܫܵܢ ܩܛܝܼܥܬܵܐ ܡ̣ܢ ܬܸܪܘܵܘܟ݂ܘܿܢ ܒܚܲܕ ܝܵܘܡܵܐ؟“
46ܘܐ݇ܡܝܼܪܵܗ̇ ܪܲܦܩܵܐ ܠܐܝܼܣܚܵܩ، ”ܣܩܝܼܕ ܠܝܼ ܡ̣ܢ ܚܲܝܝܼ̈ ܒܥܸܠܬܵܐ ܕܒܢܵܬܹ̈ܐ ܕܚܹܝܬ. ܐܸܢ ܝܲܥܩܘܿܒ݂ ܫܵܩܹܠ ܒܲܟ݂ܬܵܐ ܡ̣ܢ ܒܢܵܬܹ̈ܐ ܕܚܹܝܬ، ܐܲܝܟ݂ ܕܐܲܢܹܐ ܒܢܵܬܹ̈ܐ ܕܐܵܗܵܐ ܐܲܪܥܵܐ، ܩܵܡܘܿܕܝܼ ܝܢܵܐ ܚܲܝܝܼ̈ ܩܵܬܝܼ؟“
Currently Selected:
ܒܪܝܬܐ 27: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
