ܒܪܝܬܐ 28
28
ܐܝܼܣܚܵܩ ܒܲܪܘܼܟܹܐ ܠܝܲܥܩܘܿܒ݂ ܘܫܲܕܘܼܪܹܗ ܠܦܵܕܵܢ ܐܵܪܵܡ
1ܩܪܹܐ ܠܹܗ ܐܝܼܣܚܵܩ ܠܝܲܥܩܘܿܒ݂، ܘܒܘܼܪܸܟ݂ ܠܹܗ، ܘܦܩܝܼܕ ܠܹܗ، ܒܹܐܡܵܪܵܐ، ”ܠܵܐ ܫܵܩܠܹܬ ܒܲܟ݂ܬܵܐ ܡ̣ܢ ܒܢܵܬܹ̈ܐ ܕܟܢܲܥܢ. 2ܩܘܼܡ ܙܹܠ݇ ܠܦܵܕܵܢ ܐܵܪܵܡ، ܠܒܲܝܬܵܐ ܕܒܬܘܼܐܹܝܠ ܒܵܒܵܐ ܕܝܸܡܘܼܟ݂، ܘܫܩܘܿܠ ܐܸܠܘܼܟ݂ ܒܲܟ݂ܬܵܐ ܡ̣ܢ ܬܵܡܵܐ، ܡ̣ܢ ܒܢܵܬܹ̈ܐ ܕܠܵܒ݂ܵܢ ܐܲܚܘܿܢܵܐ ܕܝܸܡܘܼܟ݂. 3ܐܲܠܵܗܵܐ ܚܲܝܠܬܵܢܵܐ ܒܲܪܸܟ݂ ܠܘܼܟ݂ ܘܡܲܦܪܹܐ ܠܘܼܟ݂ ܘܡܲܙܝܸܕ ܠܘܼܟ݂، ܘܗܵܘܹܝܬ ܟܸܢܫܵܐ ܕܥܲܡܡܹ̈ܐ؛ 4ܘܝܲܗ݇ܒܸܠ ܠܘܼܟ݂ ܒܘܼܪܟܬܵܐ ܕܐܲܒ݂ܪܵܗܵܡ، ܐܸܠܘܼܟ݂ ܘܠܙܲܪܥܘܼܟ݂ ܥܲܡܘܼܟ݂، ܕܝܵܪܬܹܬ ܠܐܲܪܥܵܐ ܕܡܵܫܵܚܲܛܘܼܬܘܼܟ݂، ܗ̇ܝ ܕܝܘܼܗ݇ܒ݂ܵܐ ܠܹܗ ܐܲܠܵܗܵܐ ܠܐܲܒ݂ܪܵܗܵܡ.“ 5ܘܫܘܼܕܸܪܹܗ ܐܝܼܣܚܵܩ ܠܝܲܥܩܘܿܒ݂. ܘܐ݇ܙܝܼܠ ܠܹܗ ܗ̇ܘ ܠܦܵܕܵܢ ܐܵܪܵܡ ܠܟܸܣ ܠܵܒ݂ܵܢ، ܒܪܘܿܢܵܐ ܕܒܬܘܼܐܹܝܠ ܐܵܪܵܡܵܝܵܐ، ܐܲܚܘܿܢܵܐ ܕܪܲܦܩܵܐ، ܝܸܡܵܐ ܕܝܲܥܩܘܿܒ݂ ܘܕܥܹܣܘܿ.
6ܚܙܹܐ ܠܹܗ ܥܹܣܘܿ ܕܒܘܼܪܸܟ݂ ܠܹܗ ܐܝܼܣܚܵܩ ܠܝܲܥܩܘܿܒ݂، ܘܫܘܼܕܸܪܹܗ ܠܦܵܕܵܢ ܐܵܪܵܡ ܠܸܫܩܵܠܵܐ ܒܲܟ݂ܬܵܐ ܡ̣ܢ ܬܵܡܵܐ، ܘܟܲܕ ܗ̇ܘ ܒܲܪܘܼܟܹܗ، ܦܩܝܼܕ ܠܹܗ ܐܸܠܹܗ، ܒܹܐܡܵܪܵܐ، ”ܠܵܐ ܫܵܩܠܹܬ ܒܲܟ݂ܬܵܐ ܡ̣ܢ ܒܢܵܬܹ̈ܐ ܕܟܢܲܥܢ.“ 7ܘܫܡܝܼܥ ܠܹܗ ܝܲܥܩܘܿܒ݂ ܠܒܵܒܘܼܗܝ ܘܠܝܸܡܹܗ، ܘܐ݇ܙܝܼܠ ܠܹܗ ܠܦܵܕܵܢ ܐܵܪܵܡ. 8ܐܝܼܡܲܢ ܕܚܙܹܐ ܠܹܗ ܥܹܣܘܿ ܕܣܸܪ̈ܝܹܐ ܝܗ݇ܘܵܘ ܒܢܵܬܹ̈ܐ ܕܟܢܲܥܢ ܒܥܲܝܢܵܐ ܕܐܝܼܣܚܵܩ ܒܵܒܘܼܗܝ، 9ܐ݇ܙܝܼܠ ܠܹܗ ܠܟܸܣ ܐܝܼܫܡܲܥܹܝܠ ܘܫܩܝܼܠ ܠܹܗ ܐܸܠܹܗ ܒܲܟ݂ܬܵܐ ܙܵܘܕܵܐ ܥܲܠ ܒܲܟ݂ܬܵܬܹ̈ܐ ܕܐܝܼܬ ܗ݇ܘܵܐ ܠܹܗ، ܡܲܚܠܲܬ، ܒܪܵܬܵܐ ܕܐܝܼܫܡܲܥܹܝܠ، ܒܪܘܿܢܵܐ ܕܐܲܒ݂ܪܵܗܵܡ، ܚܵܬܵܐ ܕܢܒ݂ܝܼܘܿܬ.
ܚܸܙܘܵܐ ܕܝܲܥܩܘܿܒ݂
10ܦܠܝܼܛ ܠܹܗ ܝܲܥܩܘܿܒ݂ ܡ̣ܢ ܒܹܪܫܒܲܥ ܘܐ݇ܙܝܼܠ ܠܹܗ ܠܚܵܪܵܢ. 11ܐ݇ܬܹܐ ܠܹܗ ܠܚܕܵܐ ܕܘܼܟܵܐ ܘܦܝܼܫ ܠܹܗ ܒܠܲܝܠܹܐ ܬܵܡܵܐ، ܣܵܒܵܒ ܓܢܹܐ ܠܹܗ ܫܸܡܫܵܐ. ܫܩܝܼܠ ܠܹܗ ܡ̣ܢ ܟܹܐܦܹ̈ܐ ܕܗ̇ܝ ܕܘܼܟܵܐ ܘܡܘܼܬܸܒ݂ ܠܹܗ ܬܚܘܿܬ ܪܹܫܹܗ، ܘܕܡܝܼܟ݂ ܠܹܗ ܬܵܡܵܐ. 12ܚܠܝܼܡ ܠܹܗ ܚܸܠܡܵܐ، ܘܚܙܹܐ ܠܹܗ، ܗܵܐ، ܣܹܡܲܠܬܵܐ ܡܘܼܟܠܝܼܬܵܐ ܥܲܠ ܐܲܪܥܵܐ ܘܪܹܫܘܼܗ̇ ܡܸܛܝܵܐ ܠܫܡܲܝܵܐ، ܘܗܵܐ، ܡܲܠܲܐܟܹ̈ܐ ܕܐܲܠܵܗܵܐ ܒܹܐܣܵܩܵܐ ܘܒܸܨܠܵܝܵܐ ܥܲܠܘܼܗ̇؛ 13ܘܗܵܐ، ܡܵܪܝܵܐ ܟܸܠܝܵܐ ܥܲܠܘܼܗ̇، ܘܐ݇ܡܝܼܪܹܗ، ”ܐܵܢܵܐ ܝܘܸܢ ܡܵܪܝܵܐ، ܐܲܠܵܗܵܐ ܕܐܲܒ݂ܪܵܗܵܡ ܒܵܒܘܼܟ݂ ܘܐܲܠܵܗܵܐ ܕܐܝܼܣܚܵܩ. ܐܲܪܥܵܐ ܕܕܡܝܼܟ݂ܵܐ ܝܘܸܬ ܥܲܠܘܼܗ̇، ܒܸܬ ܝܵܗ݇ܒܹܢܵܗ̇ ܐܸܠܘܼܟ݂ ܘܠܙܲܪܥܘܼܟ݂. 14ܘܒܸܬ ܡܲܦܪܸܝܢܹܗ ܙܲܪܥܘܼܟ݂ ܐܲܝܟ݂ ܥܲܦܪܵܐ ܕܐܲܪܥܵܐ، ܘܒܸܬ ܦܵܪܣܹܬ ܠܡܲܥܪܒ݂ܵܐ ܘܠܡܲܕܢܚܵܐ، ܘܠܓܲܪܒܝܵܐ ܘܠܬܲܝܡܢܵܐ؛ ܘܒܸܬ ܦܵܝܫܝܼ ܒܘܼܪܟܹܐ ܒܝܼܘܼܟ݂ ܘܒܙܲܪܥܘܼܟ݂ ܟܠܲܝܗܝ ܫܲܪ̈ܒܵܬܹܐ ܕܐܲܪܥܵܐ. 15ܘܗܵܐ، ܐܵܢܵܐ ܥܲܡܘܼܟ݂ ܝܼܘܸܢ، ܘܒܸܬ ܢܵܛܪܹܢܘܼܟ݂ ܒܟܠ ܕܘܼܟܵܐ ܕܐܵܙܹܠ݇ܬ، ܘܒܸܬ ܡܲܕܸܪܸܢܘܼܟ݂ ܠܐܵܗܵܐ ܐܲܪܥܵܐ، ܣܵܒܵܒ ܠܹܐ ܫܵܒ݂ܩܹܢܘܼܟ݂ ܗܲܠ ܕܥܵܒ݂ܕܹܢ ܡܸܢܕܝܼ ܕܗܘܼܡܙܸܡ ܠܝܼ ܥܲܡܘܼܟ݂.“ 16ܪܥܝܼܫ ܠܹܗ ܝܲܥܩܘܿܒ݂ ܡ̣ܢ ܫܸܢܬܹܗ، ܘܐ݇ܡܝܼܪܹܗ، ”ܫܲܪܝܼܪܵܐܝܼܬ ܡܵܪܝܵܐ ܒܐܵܗܵܐ ܕܘܼܟܵܐ ܝܠܹܗ، ܘܐܵܢܵܐ ܠܵܐ ܝ݇ܕܝܼܥ ܠܝܼ.“ 17ܘܙܕܝܼܥ ܠܹܗ ܘܐ݇ܡܝܼܪܹܗ، ”ܟܡܵܐ ܣܲܗܡܵܢܬܵܐ ܝܠܵܗ̇ ܐܵܗܵܐ ܕܘܼܟܵܐ! ܠܹܐ ܝܠܹܗ ܐܵܗܵܐ ܐܸܠܵܐ ܒܲܝܬܵܐ ܕܐܲܠܵܗܵܐ، ܘܐܵܗܵܐ ܝܠܹܗ ܕܲܪܘܵܙܵܐ ܕܫܡܲܝܵܐ.“
18ܩܝܼܡ ܠܹܗ ܝܲܥܩܘܿܒ݂ ܓ̰ܲܠܕܹܐ ܒܨܲܦܪܵܐ ܘܫܩܝܼܠ ܠܹܗ ܟܹܐܦܵܐ ܕܡܘܼܬܒܹܗ ܝܗ݇ܘܵܐ ܬܚܘܿܬ ܪܹܫܹܗ، ܘܡܘܼܟܠܹܐ ܠܹܗ ܐܲܝܟ݂ ܩܵܝܸܡܬܵܐ، ܘܨܘܼܢܨܸܠ ܠܹܗ ܡܸܫܚܵܐ ܥܲܠܘܼܗܝ. 19ܩܪܹܐ ܠܹܗ ܫܸܡܵܐ ܕܗ̇ܝ ܕܘܼܟܵܐ ”ܒܹܝܬ ܐܹܝܠ؛“#28:19 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܲܝܬܵܐ ܕܐܲܠܵܗܵܐ ܐܝܼܢܵܐ ܡܩܵܕ݇ܡ ܗܵܕܵܐ ܫܸܡܵܐ ܕܗ̇ܝ ܡܕܝܼܢ݇ܬܵܐ ܝܼܗ݇ܘܵܐ ”ܠܘܿܙ.“ 20ܘܢܕܝܼܪܹܗ ܝܲܥܩܘܿܒ݂ ܢܸܕܪܵܐ ܘܐ݇ܡܝܼܪܹܗ، ”ܐܸܢ ܗܵܘܹܐ ܐܲܠܵܗܵܐ ܥܲܡܝܼ ܘܢܵܛܹܪܝܼ ܒܐܵܗܵܐ ܐܘܼܪܚܵܐ ܕܐܵܢܵܐ ܒܹܐܙܵܠܵܐ ܝܘܸܢ، ܘܝܲܗ݇ܒܸܠ ܠܝܼ ܠܲܚܡܵܐ ܠܹܐܟ݂ܵܠܵܐ ܘܓ̰ܘܼܠܹ̈ܐ ܠܸܠܒ݂ܵܫܵܐ، 21ܘܕܵܝܪܹܢ ܒܫܠܵܡܵܐ ܠܒܲܝܬܵܐ ܕܒܵܒܝܼ، ܗ̇ܝܓܵܗ ܒܸܬ ܗܵܘܹܐ ܡܵܪܝܵܐ ܐܸܠܝܼ ܐܲܠܵܗܵܐ، 22ܘܐܵܗܵܐ ܟܹܐܦܵܐ ܕܡܘܼܬܒܹܗ ܝܘܸܢ ܩܵܝܸܡܬܵܐ، ܒܸܬ ܗܵܘܹܐ ܒܲܝܬܵܐ ܕܐܲܠܵܗܵܐ؛ ܘܟܠ ܡܸܢܕܝܼ ܕܝܵܗ݇ܒܹܬ ܠܝܼ ܡܲܥܣܵܪ̈ܘܼܗܝ ܒܸܬ ܝܵܗ݇ܒܹܢܗܘܿܢ ܐܸܠܘܼܟ݂.“
Currently Selected:
ܒܪܝܬܐ 28: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
