ܒܪܝܬܐ 29
29
ܝܲܥܩܘܿܒ݂ ܒܸܐܬܵܝܵܐ ܠܗܵܪܵܢ
1ܘܐ݇ܙܝܼܠ ܠܹܗ ܝܲܥܩܘܿܒ݂ ܒܐܘܼܪܚܹܗ ܘܐ݇ܬܹܐ ܠܹܗ ܠܐܲܪܥܵܐ ܕܡܲܕܢܚܵܐ. 2ܓܘܼܫܸܩ ܠܹܗ ܘܚܙܹܐ ܠܹܗ ܒܹܐܪܵܐ ܓܵܘ ܕܸܫܬܵܐ، ܘܗܵܐ، ܬܵܡܵܐ ܬܠܵܬܵܐ ܦܸܣܩܹ̈ܐ ܕܥܸܪ̈ܒܹܐ ܕܡܝܼܟܹܐ ܠܟܸܣ ܠܹܗ، ܣܵܒܵܒ ܡ̣ܢ ܗ̇ܘ ܒܹܐܪܵܐ ܟܹܐ ܡܲܫܬܝܼ ܗ݇ܘܵܘ ܦܸܣܩܹ̈ܐ. ܐܝܼܬ ܗ݇ܘܵܐ ܟܹܐܦܵܐ ܓܘܼܪܵܐ ܥܲܠ ܦܘܼܡܵܐ ܕܒܹܐܪܵܐ، 3ܘܐܝܼܡܲܢ ܓ̰ܵܡܥܝܼ ܗ݇ܘܵܘ ܟܠܲܝܗܝ ܦܸܣܩܹ̈ܐ ܬܵܡܵܐ، ܪ̈ܵܥܝܹܐ ܟܹܐ ܡܲܚܕܸܪܝܼ ܗ݇ܘܵܘ ܠܟܹܐܦܵܐ ܡ̣ܢ ܥܲܠ ܦܘܼܡܵܐ ܕܒܹܐܪܵܐ ܘܡܲܫܬܝܼ ܗ݇ܘܵܘ ܠܥܸܪ̈ܒܹܐ، ܘܡܲܕܸܪܝܼ ܗ݇ܘܵܘ ܠܹܗ ܟܹܐܦܵܐ ܠܕܘܼܟܹܗ ܒܦܘܼܡܵܐ ܕܒܹܐܪܵܐ. 4ܒܘܼܩܸܪܹܗ ܡܸܢܲܝܗܝ ܝܲܥܩܘܿܒ݂، ”ܐܲܚܘܿܢܘܵܬܝܼ̈، ܡ̣ܢ ܐܲܝܟܵܐ ܝܬܘܿܢ؟“ ܐ݇ܡܝܼܪܗܘܿܢ، ”ܡ̣ܢ ܚܵܪܵܢ ܝܼܘܲܚ.“ 5ܒܘܼܩܸܪܹܗ ܡܸܢܲܝܗܝ، ”ܟܹܐ ܝܵܕܥܝܼܬܘܿܢ ܠܠܵܒ݂ܵܢ ܒܪܘܿܢܵܐ ܕܢܵܚܘܿܪ؟“ ܐ݇ܡܝܼܪܗܘܿܢ، ”ܟܹܐ ܝܵܕܥܲܚ ܠܹܗ.“ 6ܒܘܼܩܸܪܹܗ ܡܸܢܲܝܗܝ، ”ܒܫܠܵܡܵܐ ܝܠܹܗ؟“ ܓ̰ܘܼܘܸܒ ܠܗܘܿܢ، ”ܒܫܠܵܡܵܐ ܝܠܹܗ. ܘܗܵܐ، ܪܵܚܹܝܠ ܒܪܵܬܹܗ ܒܹܐܬܵܝܵܐ ܝܠܵܗ̇ ܥܲܡ ܥܸܪ̈ܒܹܐ.“ 7ܐ݇ܡܝܼܪܹܗ ܐܸܠܲܝܗܝ، ”ܗܹܫ ܝܵܘܡܵܐ ܪܵܡܵܐ ܝܠܹܗ. ܠܹܐ ܝܠܵܗ̇ ܥܕܵܢܵܐ ܕܦܵܝܫܝܼ ܓ̰ܘܼܡܥܹܐ ܦܸܣܩܹ̈ܐ. ܡܲܫܬܸܝܡܘܼܢ ܠܥܸܪ̈ܒܹܐ، ܘܙܹܠ݇ܡܘܼܢ ܡܲܪܥܸܝܡܘܼܢ ܠܗܘܿܢ.“ 8ܐ݇ܡܝܼܪܗܘܿܢ، ”ܠܹܐ ܡܵܨܲܚ ܗܲܠ ܕܦܵܝܫܝܼ ܓ̰ܘܼܡܥܹܐ ܟܠܲܝܗܝ ܦܸܣܩܹ̈ܐ. ܗ̇ܝܓܵܗ ܡܲܚܕܸܪܲܚ ܠܟܹܐܦܵܐ ܡܥܲܠ ܦܘܼܡܵܐ ܕܒܹܐܪܵܐ ܘܡܲܫܬܲܚ ܠܥܸܪ̈ܒܹܐ.“
ܝܲܥܩܘܿܒ݂ ܒܸܬܦܵܩܵܐ ܒܪܵܚܹܝܠ
9ܗܹܫ ܗ̇ܘ ܗܲܡܙܘܼܡܹܐ ܝܗ݇ܘܵܐ ܥܲܡܲܝܗܝ، ܐ݇ܬܹܐ ܠܵܗ̇ ܪܵܚܹܝܠ ܥܲܡ ܥܸܪ̈ܒܹܐ ܕܒܵܒܘܼܗ̇، ܣܵܒܵܒ ܪܵܥܝܼܬܵܐ ܝܗ݇ܘܵܐ. 10ܘܗܘܹܐ ܠܵܗ̇ ܟܲܕ ܚܙܹܐ ܠܹܗ ܝܲܥܩܘܿܒ݂ ܠܪܵܚܹܝܠ، ܒܪܵܬܵܐ ܕܠܵܒ݂ܵܢ ܐܲܚܘܿܢܵܐ ܕܝܸܡܹܗ، ܥܲܡ ܥܸܪ̈ܒܹܐ ܕܠܵܒ݂ܵܢ، ܩܘܼܪܒܸܢܹܗ ܝܲܥܩܘܿܒ݂ ܘܡܘܼܚܕܸܪܹܗ ܠܟܹܐܦܵܐ ܡܥܲܠ ܦܘܼܡܵܐ ܕܒܹܐܪܵܐ ܘܡܘܼܫܬܹܐ ܠܹܗ ܠܥܸܪ̈ܒܹܐ ܕܠܵܒ݂ܵܢ. 11ܗ̇ܝܓܵܗ ܢܫܝܼܩ ܠܹܗ ܝܲܥܩܘܿܒ݂ ܠܪܵܚܹܝܠ، ܘܡܘܼܪܸܡ ܠܹܗ ܩܵܠܹܗ ܘܒܟܹܐ ܠܹܗ، 12ܘܡܘܼܕܸܥ ܠܹܗ ܝܲܥܩܘܿܒ݂ ܠܪܵܚܹܝܠ ܕܚܸܙܡܵܐ ܕܒܵܒܘܼܗ̇ ܝܗ݇ܘܵܐ، ܘܒܪܘܿܢܵܐ ܕܪܲܦܩܵܐ؛ ܘܗ̇ܝ ܪܚܝܼܛ ܠܵܗ̇ ܘܡܘܼܕܸܥ ܠܵܗ̇ ܠܒܵܒܘܼܗ̇. 13ܗܘܹܐ ܠܵܗ̇ ܟܲܕ ܫܡܝܼܥ ܠܹܗ ܠܵܒ݂ܵܢ ܒܘܼܬ ܝܲܥܩܘܿܒ݂ ܒܪܘܿܢܵܐ ܕܚܵܬܹܗ، ܪܚܝܼܛ ܠܹܗ ܠܐܘܼܪܚܹܗ، ܘܚܦܝܼܩ ܠܹܗ ܘܢܫܝܼܩ ܠܹܗ ܐܸܠܹܗ ܘܡܘܼܐܬܹܐ ܠܹܗ ܠܒܲܝܬܹܗ. ܘܗܘܼܩܹܐ ܠܹܗ ܝܲܥܩܘܿܒ݂ ܠܠܵܒ݂ܵܢ ܒܘܼܬ ܟܠ ܡܸܢܕܝܼ. 14ܐ݇ܡܝܼܪܹܗ ܐܸܠܹܗ ܠܵܒ݂ܵܢ، ”ܫܲܪܝܼܪܵܐܝܼܬ ܕܸܡܝܼ ܘܒܸܣܪܝܼ ܝܘܸܬ.“ ܘܝ݇ܬܝܼܒ݂ ܠܹܗ ܝܲܥܩܘܿܒ݂ ܠܟܸܣ ܠܹܗ ܚܲܕ ܝܲܪܚܵܐ.
ܝܲܥܩܘܿܒ݂ ܒܸܦܠܵܚܵܐ ܩܵܐ ܠܵܒ݂ܵܢ
15ܐ݇ܡܝܼܪܹܗ ܠܵܒ݂ܵܢ ܠܝܲܥܩܘܿܒ݂، ”ܣܵܒܵܒ ܐܲܚܘܿܢܝܼ ܝܘܸܬ، ܒܸܬ ܦܵܠܚܹܬ ܐܸܠܝܼ ܚܘܼܪܵܝܝܼ؟ ܡܲܕܸܥ ܠܝܼ ܡܘܿܕܝܼ ܝܠܹܗ ܦܘܼܪܥܵܢܘܼܟ݂؟“ 16ܠܵܒ݂ܵܢ ܐܝܼܬ ܗ݇ܘܵܐ ܠܹܗ ܬܲܪܬܹܝ ܒܢܵܬܹ̈ܐ؛ ܫܸܡܵܐ ܕܗ̇ܝ ܓܘܼܪܬܵܐ ܠܲܝܵܐ ܝܗ݇ܘܵܐ، ܘܫܸܡܵܐ ܕܗ̇ܝ ܙܥܘܿܪܬܵܐ ܪܵܚܹܝܠ. 17ܥܲܝܢܹ̈ܐ ܕܠܲܝܵܐ ܫܸܛܪ̈ܵܢܹܐ ܝܗ݇ܘܵܘ، ܐܝܼܢܵܐ ܪܵܚܹܝܠ ܫܲܦܝܼܪܬܵܐ ܝܗ݇ܘܵܐ ܒܩܵܘܡܬܵܐ ܘܒܚܸܙܘܵܐ. 18ܡܘܼܚܸܒ ܠܹܗ ܝܲܥܩܘܿܒ݂ ܠܪܵܚܹܝܠ؛ ܘܐ݇ܡܝܼܪܹܗ، ”ܒܸܬ ܦܵܠܚܹܢ ܐܸܠܘܼܟ݂ ܫܒܲܥ ܫܸܢܹ̈ܐ ܒܘܼܬ ܪܵܚܹܝܠ، ܒܪܵܬܘܼܟ݂ ܙܥܘܿܪܬܵܐ.“ 19ܘܐ݇ܡܝܼܪܹܗ ܠܵܒ݂ܵܢ، ”ܒܘܼܫ ܨܦܵܝܝܼ ܝܠܵܗ̇ ܕܝܵܗ݇ܒܹܢܵܗ̇ ܐܸܠܘܼܟ݂ ܡ̣ܢ ܕܝܵܗ݇ܒܹܢܵܗ̇ ܠܚܲܕ ܐ݇ܚܹܪ݇ܢܵܐ؛ ܦܘܼܫ ܟܸܣ ܠܝܼ.“ 20ܘܦܠܝܼܚ ܠܹܗ ܝܲܥܩܘܿܒ݂ ܫܒܲܥ ܫܸܢܹ̈ܐ ܒܘܼܬ ܪܵܚܹܝܠ؛ ܐܝܼܢܵܐ ܡܘܼܒܝܸܢܗܘܿܢ ܒܥܲܝܢܘܼ̈ܗܝ ܐܲܝܟ݂ ܚܲܕ݇ܟܡܵܐ ܝܵܘܡܵܢܹ̈ܐ، ܣܵܒܵܒ ܟܹܐ ܡܲܚܸܒ ܗ݇ܘܵܐ ܠܵܗ̇.
ܝܲܥܩܘܿܒ݂ ܦܝܵܫܵܐ ܥܘܼܠܕܝܼܵܐ
21ܗ̇ܝܓܵܗ ܐ݇ܡܝܼܪܹܗ ܝܲܥܩܘܿܒ݂ ܠܠܵܒ݂ܵܢ، ”ܗܲܒ݂݇ܠ ܠܝܼ ܒܲܟ݂ܬܝܼ ܕܥܵܒ݂ܪܹܢ ܠܟܸܣ ܠܘܼܗ̇، ܣܵܒܵܒ ܬܘܼܡܸܡ ܠܗܘܿܢ ܝܵܘܡܵܢܝܼ̈.“ 22ܓ̰ܘܼܡܸܥ ܠܹܗ ܠܵܒ݂ܵܢ ܠܟܠܲܝܗܝ ܐ݇ܢܵܫܹ̈ܐ ܕܗ̇ܝ ܕܘܼܟܵܐ ܘܥܒ݂ܝܼܕ ܠܹܗ ܐܲܪܚܘܼܬܵܐ. 23ܐܝܼܢܵܐ ܗܘܹܐ ܠܵܗ̇ ܒܪܲܡܫܵܐ، ܫܩܝܼܠܵܐ ܠܹܗ ܠܲܝܵܐ ܒܪܵܬܹܗ ܘܝܘܼܗ݇ܒ݂ܵܐ ܠܹܗ ܠܝܲܥܩܘܿܒ݂، ܘܥܒ݂ܝܼܪܹܗ ܠܟܸܣ ܠܘܼܗ̇. 24ܝܘܼܗ݇ܒ݂ܘܼܗ̇ ܝܗ݇ܘܵܐ ܠܵܒ݂ܵܢ ܙܸܠܦܵܐ ܚܹܕܲܡܬܹܗ ܕܗܵܘܝܵܐ ܗ݇ܘܵܐ ܚܹܕܲܡܬܵܐ ܠܠܲܝܵܐ ܒܪܵܬܹܗ. 25ܘܗܘܹܐ ܠܵܗ̇ ܒܨܲܦܪܵܐ ܝ݇ܕܝܼܥ ܠܹܗ ܝܲܥܩܘܿܒ݂ ܕܠܲܝܵܐ ܝܗ݇ܘܵܐ. ܘܐ݇ܡܝܼܪܹܗ ܠܠܵܒ݂ܵܢ، ”ܐܵܗܵܐ ܡܘܿܕܝܼ ܥܒ݂ܝܼܕ ܠܘܼܟ݂ ܐܸܠܝܼ؟ ܠܹܐ ܝܗ݇ܘܵܐ ܒܘܼܬ ܪܵܚܹܝܠ ܦܠܝܼܚ ܠܝܼ ܐܸܠܘܼܟ݂؟ ܩܵܡܘܿܕܝܼ ܥܒ݂ܝܼܕ ܠܘܼܟ݂ ܠܹܐܒܹ̈ܐ ܐܸܠܝܼ؟“ 26ܐ݇ܡܝܼܪܹܗ ܠܵܒ݂ܵܢ، ”ܠܲܝܬ ܗܲܕܟ݂ܵܐ ܥܝܵܕܵܐ ܒܐܵܗܵܐ ܕܘܼܟܬܵܐ، ܕܝܵܗ݇ܒܲܚ ܗ̇ܝ ܙܥܘܿܪܬܵܐ ܡ̣ܢ ܩܵܕ݇ܡ ܗ̇ܝ ܓܘܼܪܬܵܐ. 27ܬܲܡܸܡ ܫܵܒ݂ܘܿܥܵܐ ܕܚܠܘܼܠܵܐ ܕܐܵܗܵܐ ܒܪܵܬܵܐ، ܘܒܸܬ ܝܵܗ݇ܒܲܚ ܐܸܠܘܼܟ݂ ܐܘܼܦ ܗ̇ܝ ܙܥܘܿܪܬܵܐ ܐܝܼܡܲܢ ܕܦܵܠܚܹܬ ܫܒܲܥ ܫܸܢܹ̈ܐ ܐ݇ܚܹܪ̈݇ܢܹܐ ܐܸܠܝܼ.“ 28ܘܥܒ݂ܝܼܕ ܠܹܗ ܝܲܥܩܘܿܒ݂ ܗܲܕܟ݂ܵܐ؛ ܬܘܼܡܸܡ ܠܹܗ ܫܵܒ݂ܘܿܥܵܐ ܕܠܲܝܵܐ، ܘܝܘܼܗ݇ܒܸܠ ܠܹܗ ܠܵܒ݂ܵܢ ܐܸܠܹܗ ܠܪܵܚܹܝܠ ܒܪܵܬܹܗ ܠܒܲܟ݂ܬܵܐ. 29ܝܘܼܗ݇ܒ݂ܘܼܗ̇ ܝܗ݇ܘܵܐ ܠܵܒ݂ܵܢ ܒܸܠܗܵܐ ܚܹܕܲܡܬܹܗ ܠܪܵܚܹܝܠ ܕܗܵܘܝܵܐ ܗ݇ܘܵܐ ܚܹܕܲܡܬܵܐ ܐܸܠܘܼܗ̇. 30ܘܥܒ݂ܝܼܪܹܗ ܝܲܥܩܘܿܒ݂ ܐܘܼܦ ܠܟܸܣ ܪܵܚܹܝܠ؛ ܘܡܘܼܚܸܒ ܠܹܗ ܠܪܵܚܹܝܠ ܒܘܼܫ ܙܵܘܕܵܐ ܡ̣ܢ ܠܲܝܵܐ. ܘܦܠܝܼܚ ܠܹܗ ܠܠܵܒ݂ܵܢ ܫܒܲܥ ܫܸܢܹ̈ܐ ܐ݇ܚܹܪ̈݇ܢܹܐ.
ܠܲܝܵܐ ܗܲܨܘܼܠܹܐ ܒܢܘܿܢܹ̈ܐ
31ܟܲܕ ܚܙܹܐ ܠܹܗ ܡܵܪܝܵܐ ܕܠܲܝܵܐ ܦܝܵܫܵܐ ܝܗ݇ܘܵܐ ܣܢܝܼܬܵܐ، ܦܬܝܼܚ ܠܹܗ ܡܲܪܒܥܘܼܗ̇؛ ܐܝܼܢܵܐ ܪܵܚܹܝܠ ܥܩܲܪܬܵܐ ܝܗ݇ܘܵܐ. 32ܒܛܝܼܢܵܗ̇ ܠܲܝܵܐ ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܩܪܹܐ ܠܵܗ̇ ܫܸܡܹܗ ”ܪܐܘܼܒܸܢ؛“#29:32 ܥܸܒ݂ܪܵܐܝܼܬ ܒܡܲܥܢܵܝܵܐ: ܚܙܝܼ ܒܪܘܿܢܵܐ ܣܵܒܵܒ ܐ݇ܡܝܼܪܵܗ̇، ”ܚܝܼܪܹܗ ܡܵܪܝܵܐ ܒܐܘܼܠܨܵܢܝܼ̈، ܘܐܵܕܝܼܵܐ ܒܸܬ ܡܲܚܸܒ ܠܝܼ ܓܲܒ݂ܪܝܼ.“ 33ܘܒܛܝܼܢܵܗ̇ ܡܸܢܕܪܸܫ ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܐ݇ܡܝܼܪܵܗ̇، ”ܣܵܒܵܒ ܫܡܝܼܥ ܠܹܗ ܡܵܪܝܵܐ ܕܦܝܵܫܵܐ ܝܘܵܢ ܣܢܝܼܬܵܐ، ܝܘܼܗ݇ܒܸܠ ܠܹܗ ܐܸܠܝܼ ܐܘܼܦ ܐܵܗܵܐ ܒܪܘܿܢܵܐ.“ ܘܩܪܹܐ ܠܵܗ̇ ܫܸܡܹܗ ”ܫܸܡܥܘܿܢ.“#29:33 ܥܸܒ݂ܪܵܐܝܼܬ ܒܡܲܥܢܵܝܵܐ: ܫܡܵܥܬܵܐ 34ܘܒܛܝܼܢܵܗ̇ ܡܸܢܕܪܸܫ ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܐ݇ܡܝܼܪܵܗ̇، ”ܐܵܕܝܼܵܐ ܒܐܵܗܵܐ ܓܵܗܵܐ ܒܸܬ ܐܵܣܹܪ ܒܝܼܝܼ ܓܲܒ݂ܪܝܼ، ܣܵܒܵܒ ܝ݇ܠܝܼܕܬܵܐ ܝܘܵܢ ܐܸܠܹܗ ܬܠܵܬܵܐ ܒܢܘܿܢܹ̈ܐ.“ ܒܘܼܬ ܐܵܗܵܐ ܩܪܹܐ ܠܵܗ̇ ܫܸܡܹܗ ”ܠܹܘܝܼ.“#29:34 ܥܸܒ݂ܪܵܐܝܼܬ ܒܡܲܥܢܵܝܵܐ: ܐ݇ܣܝܼܪܵܐ؛ ܩܕܝܼܚܵܐ؛ ܚܠܝܼܨܵܐ 35ܒܛܝܼܢܵܗ̇ ܡܸܢܕܪܸܫ ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܐ݇ܡܝܼܪܵܗ̇، ”ܒܐܵܗܵܐ ܓܵܗܵܐ ܒܸܬ ܫܲܟܪܵܢ ܠܡܵܪܝܵܐ.“ ܒܘܼܬ ܐܵܗܵܐ ܩܪܹܐ ܠܵܗ̇ ܫܸܡܹܗ ”ܝܼܗܘܼܕܵܐ.“#29:35 ܫܸܡܵܐ ܕܝܼܗܘܼܕܵܐ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܫܵܟܲܪܬܵܐ ܒܠܸܫܵܢܵܐ ܥܸܒ݂ܪܵܝܵܐ ܘܠܵܐ ܝ݇ܠܝܼܕ ܠܵܗ̇ ܒܵܬ݇ܪ ܗܵܕܵܐ.
Currently Selected:
ܒܪܝܬܐ 29: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
