ܒܪܝܬܐ 30
30
ܒܸܠܗܵܐ ܗܲܨܘܼܠܹܐ ܒܢܘܿܢܹ̈ܐ ܠܝܲܥܩܘܿܒ݂
1ܐܝܼܡܲܢ ܕܚܙܹܐ ܠܵܗ̇ ܪܵܚܹܝܠ ܕܠܹܐ ܝܗ݇ܘܵܐ ܗܲܨܘܼܠܹܐ ܒܢܘܿܢܹ̈ܐ ܠܝܲܥܩܘܿܒ݂، ܒܘܼܚܸܠ ܠܵܗ̇ ܒܚܵܬܘܼܗ̇؛ ܘܐ݇ܡܝܼܪܵܗ̇ ܠܝܲܥܩܘܿܒ݂، ”ܗܲܒ݂݇ܠ ܠܝܼ ܒܢܘܿܢܹ̈ܐ، ܐܸܢ ܠܵܐ ܒܸܬ ܡܵܝܬܵܢ.“ 2ܘܠܒ݂ܝܼܟ݂ ܠܵܗ̇ ܟܲܪܒܵܐ ܕܝܲܥܩܘܿܒ݂ ܥܲܠ ܪܵܚܹܝܠ، ܘܐ݇ܡܝܼܪܹܗ، ”ܩܵܡܘܿܕܝܼ ܠܫܵܘܦܵܐ ܕܐܲܠܵܗܵܐ ܝܘܸܢ ܐܵܢܵܐ، ܗ̇ܘ ܕܚܣܝܼܟ݂ ܠܹܗ ܡܸܢܵܟ݂ܝ ܛܥܘܼܢܬܵܐ ܕܟܹܪ݇ܣܵܐ؟“ 3ܘܐ݇ܡܝܼܪܵܗ̇ ܐܸܠܹܗ، ”ܗܵܐ، ܚܹܕܲܡܬܝܼ ܒܸܠܗܵܐ، ܥܒ݂ܘܿܪ ܠܟܸܣ ܠܘܼܗ̇، ܕܝܵܠܕܵܐ ܩܵܬܝܼ، ܕܐܘܼܦ ܐܵܢܵܐ ܗܵܘܹܐ ܠܝܼ ܒܢܘܿܢܹ̈ܐ ܡܸܢܘܼܗ̇.“ 4ܘܝܘܼܗ݇ܒ݂ܵܐ ܠܵܗ̇ ܐܸܠܹܗ ܒܸܠܗܵܐ، ܚܹܕܲܡܬܘܼܗ̇ ܠܒܲܟ݂ܬܵܐ، ܘܥܒ݂ܝܼܪܹܗ ܠܟܸܣ ܠܘܼܗ̇ ܝܲܥܩܘܿܒ݂. 5ܘܒܛܝܼܢܵܗ̇ ܒܸܠܗܵܐ ܘܝ݇ܠܝܼܕ ܠܵܗ̇ ܒܪܘܿܢܵܐ ܠܝܲܥܩܘܿܒ݂. 6ܘܐ݇ܡܝܼܪܵܗ̇ ܪܵܚܹܝܠ، ”ܕܲܝܵܢܝܼ ܝܠܹܗ ܐܲܠܵܗܵܐ، ܘܫܡܝܼܥ ܠܹܗ ܩܵܠܝܼ ܘܝܘܼܗ݇ܒܸܠ ܠܹܗ ܐܸܠܝܼ ܒܪܘܿܢܵܐ.“ ܒܘܼܬ ܐܵܗܵܐ ܩܪܹܐ ܠܵܗ̇ ܫܸܡܹܗ ”ܕܵܢ.“#30:6 ܥܸܒ݂ܪܵܐܝܼܬ ܒܡܲܥܢܵܝܵܐ: ܕܝܵܢܬܵܐ 7ܒܛܝܼܢܵܗ̇ ܡܸܢܕܪܸܫ ܒܸܠܗܵܐ، ܚܹܕܲܡܬܵܐ ܕܪܵܚܹܝܠ، ܘܝ݇ܠܝܼܕ ܠܵܗ̇ ܒܪܘܿܢܵܐ ܕܬܪܹܝ ܠܝܲܥܩܘܿܒ݂. 8ܘܐ݇ܡܝܼܪܵܗ̇ ܪܵܚܹܝܠ، ”ܟܘܼܬܵܫܵܐ ܪܲܒܵܐ ܥܒ݂ܝܼܕ ܠܝܼ ܥܲܡ ܚܵܬܝܼ، ܘܓ݂ܠܝܼܒ ܠܝܼ.“ ܒܘܼܬ ܐܵܗܵܐ، ܩܪܹܐ ܠܵܗ̇ ܫܸܡܹܗ ”ܢܲܦ̮ܬܵܠܝܼ.“#30:8 ܥܸܒ݂ܪܵܐܝܼܬ ܒܡܲܥܢܵܝܵܐ: ܦܠܵܫܵܐ، ܟܘܼܬܵܫܵܐ
ܙܸܠܦܵܐ ܗܲܨܘܼܠܹܐ ܒܢܘܿܢܹ̈ܐ ܠܝܲܥܩܘܿܒ݂
9ܐܝܼܡܲܢ ܕܚܙܹܐ ܠܵܗ̇ ܠܲܝܵܐ ܕܟܠܹܐ ܠܵܗ̇ ܡ̣ܢ ܗܲܨܘܼܠܹܐ، ܫܩܝܼܠ ܠܵܗ̇ ܠܙܸܠܦܵܐ ܚܹܕܲܡܬܘܼܗ̇ ܘܝܘܼܗ݇ܒ݂ܵܐ ܠܵܗ̇ ܒܲܟ݂ܬܵܐ ܠܝܲܥܩܘܿܒ݂. 10ܘܝ݇ܠܝܼܕ ܠܵܗ̇ ܙܸܠܦܵܐ، ܚܹܕܲܡܬܵܐ ܕܠܲܝܵܐ، ܒܪܘܿܢܵܐ ܠܝܲܥܩܘܿܒ݂. 11ܘܐ݇ܡܝܼܪܵܗ̇ ܠܲܝܵܐ، ”ܐ݇ܬܹܐ ܠܹܗ ܓܲܕܝܼ.“ ܘܩܪܹܐ ܠܵܗ̇ ܫܸܡܹܗ ”ܓܵܕ.“#30:11 ܥܸܒ݂ܪܵܐܝܼܬ ܒܡܲܥܢܵܝܵܐ: ܓܲܕܵܐ، ܐܸܩܒܲܠ 12ܘܝ݇ܠܝܼܕ ܠܵܗ̇ ܙܸܠܦܵܐ، ܚܹܕܲܡܬܵܐ ܕܠܲܝܵܐ، ܒܪܘܿܢܵܐ ܬܪܲܝܵܢܵܐ ܠܝܲܥܩܘܿܒ݂. 13ܘܐ݇ܡܝܼܪܵܗ̇ ܠܲܝܵܐ، ”ܛܘܼܒ݂ܵܐ ܐܸܠܝܼ، ܣܵܒܵܒ ܒܸܬ ܝܵܗ݇ܒ݂ܝܼ ܠܝܼ ܛܘܼܒ݂ܵܐ ܒܲܟ݂ܬܵܬܹ̈ܐ.“ ܘܩܪܹܐ ܠܵܗ̇ ܫܸܡܹܗ ”ܐܵܫܹܝܪ.“#30:13 ܥܸܒ݂ܪܵܐܝܼܬ ܒܡܲܥܢܵܝܵܐ: ܚܸܕܝܵܐ
ܠܲܝܵܐ ܗܲܨܘܼܠܹܐ ܒܢܘܿܢܹ̈ܐ
14ܒܝܵܘܡܵܢܹ̈ܐ ܕܚܸܨܕܵܐ ܕܚܸܛܹ̈ܐ ܐ݇ܙܝܼܠ ܠܹܗ ܪܐܘܼܒܸܢ، ܘܡܘܼܫ݇ܟ̰ܸܚ ܠܹܗ ܝܲܒ݂ܪ̈ܘܼܚܹܐ ܓܵܘ ܚܲܩܠܵܐ، ܘܡܘܼܐܬܲܝ ܠܹܗ ܠܟܸܣ ܠܲܝܵܐ ܝܸܡܹܗ. ܘܐ݇ܡܝܼܪܵܗ̇ ܪܵܚܹܝܠ ܠܠܲܝܵܐ، ”ܦܲܪܦܘܼܠܹܐ ܝܘܵܢ ܒܝܼܵܟ݂ܝ، ܗܲܒ݂݇ܠ ܠܝܼ ܚܲܕ݇ܟ̰ܵܐ ܡ̣ܢ ܝܲܒ݂ܪ̈ܘܼܚܹܐ ܕܒܪܘܿܢܵܟ݂ܝ.“ 15ܓ̰ܘܼܘܸܒ ܠܵܗ̇ ܐܸܠܘܼܗ̇ ܠܲܝܵܐ، ”ܚܲܕ݇ܟ̰ܵܐ ܝܠܵܗ̇ ܕܫܩܝܼܠܬܵܐ ܝܘܲܬܝ ܠܓܲܒ݂ܪܝܼ؟ ܒܵܥܝܲܬܝ ܕܫܵܩܠܲܬܝ ܐܘܼܦ ܠܝܲܒ݂ܪ̈ܘܼܚܹܐ ܕܒܪܘܿܢܝܼ؟“ ܐ݇ܡܝܼܪܵܗ̇ ܪܵܚܹܝܠ، ”ܫܒ݂ܘܿܩ ܕܵܡܹܟ݂ ܥܲܡܵܟ݂ܝ ܒܐܵܗܵܐ ܠܲܝܠܹܐ، ܡ̣ܢ ܓܹܒܵܐ ܕܝܲܒ݂ܪ̈ܘܼܚܹܐ ܕܒܪܘܿܢܵܟ݂ܝ.“ 16ܐܝܼܡܲܢ ܕܐ݇ܬܹܐ ܠܹܗ ܝܲܥܩܘܿܒ݂ ܒܪܲܡܫܵܐ ܡ̣ܢ ܕܸܫܬܵܐ، ܦܠܝܼܛ ܠܵܗ̇ ܠܲܝܵܐ ܠܐܘܼܪܚܹܗ ܘܐ݇ܡܝܼܪܵܗ̇، ”ܥܒ݂ܘܿܪ ܠܟܸܣ ܠܝܼ، ܣܵܒܵܒ ܕܒ݂ܝܼܩܬܘܼܟ݂ ܝܼܘܵܢ ܒܗܵܩܵܐ ܡ̣ܢ ܓܹܒܵܐ ܕܝܲܒ݂ܪ̈ܘܼܚܹܐ ܕܒܪܘܿܢܝܼ.“ ܘܕܡܝܼܟ݂ ܠܹܗ ܥܲܡܘܼܗ̇ ܒܗ̇ܘ ܠܲܝܠܹܐ. 17ܫܡܝܼܥ ܠܹܗ ܐܲܠܵܗܵܐ ܠܠܲܝܵܐ، ܘܒܛܝܼܢܵܗ̇ ܘܝ݇ܠܝܼܕ ܠܵܗ̇ ܒܪܘܿܢܵܐ ܕܚܲܡܫܵܐ ܠܝܲܥܩܘܿܒ݂. 18ܘܐ݇ܡܝܼܪܵܗ̇ ܠܲܝܵܐ، ”ܝܘܼܗ݇ܒܸܠ ܠܹܗ ܐܸܠܝܼ ܐܲܠܵܗܵܐ ܦܘܼܪܥܵܢܝܼ، ܣܵܒܵܒ ܝܘܼܗ݇ܒܸܠ ܠܝܼ ܚܹܕܲܡܬܝܼ ܠܓܲܒ݂ܪܝܼ.“ ܘܩܪܹܐ ܠܵܗ̇ ܫܸܡܹܗ ”ܐܝܼܣܵܟ݂ܵܪ.“#30:18 ܫܸܡܵܐ ܕܐܝܼܣܵܟ݂ܵܪ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܐ݇ܢܵܫܵܐ ܕܒ݂ܝܼܩܵܐ ܒܗܵܩܵܐ ܒܠܸܫܵܢܵܐ ܥܸܒ݂ܪܵܝܵܐ 19ܘܒܛܝܼܢܵܗ̇ ܡܸܢܕܪܸܫ ܠܲܝܵܐ ܘܝ݇ܠܝܼܕ ܠܵܗ̇ ܒܪܘܿܢܵܐ ܕܐܸܫܬܵܐ ܠܝܲܥܩܘܿܒ݂. 20ܐ݇ܡܝܼܪܵܗ̇ ܠܲܝܵܐ، ”ܩܲܡ ܝܲܗ݇ܒܸܠ ܠܝܼ ܐܲܠܵܗܵܐ ܙܸܒ݂ܕܹ̈ܐ ܨܦܵܝܝܼ. ܒܐܵܗܵܐ ܓܵܗܵܐ ܒܸܬ ܡܝܲܩܸܪܝܼ ܓܲܒ݂ܪܝܼ ܣܵܒܵܒ ܝ݇ܠܝܼܕܬܵܐ ܝܘܵܢ ܩܵܬܹܗ ܐܸܫܬܵܐ ܒܢܘܿܢܹ̈ܐ.“ ܘܩܪܹܐ ܠܵܗ̇ ܫܸܡܹܗ ”ܙܒ݂ܘܿܠܘܿܢ.“#30:20 ܫܸܡܵܐ ܕܙܒ݂ܘܿܠܘܿܢ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܐ݇ܢܵܫܵܐ ܕܐܝܼܩܵܪܵܐ ܒܠܸܫܵܢܵܐ ܥܸܒ݂ܪܵܝܵܐ 21ܡ̣ܢ ܒܵܬ݇ܪ ܐܵܗܵܐ ܝ݇ܠܝܼܕ ܠܵܗ̇ ܒܪܵܬܵܐ، ܘܩܪܹܐ ܠܵܗ̇ ܫܸܡܘܼܗ̇ ܕܝܼܢܵܐ.
ܪܵܚܹܝܠ ܗܲܨܘܼܠܹܐ ܠܝܵܘܣܸܦ
22ܘܕܟ݂ܝܼܪܹܗ ܐܲܠܵܗܵܐ ܠܪܵܚܹܝܠ ܘܫܡܝܼܥܵܐ ܠܹܗ، ܘܦܬܝܼܚ ܠܹܗ ܠܡܲܪܒܥܘܼܗ̇. 23ܒܛܝܼܢܵܗ̇ ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܐ݇ܡܝܼܪܵܗ̇، ”ܫܩܝܼܠ ܠܹܗ ܐܲܠܵܗܵܐ ܠܠܵܘܡܝܼ.“ 24ܘܩܪܹܐ ܠܵܗ̇ ܫܸܡܹܗ ”ܝܵܘܣܸܦ،“#30:24 ܥܸܒ݂ܪܵܐܝܼܬ ܒܡܲܥܢܵܝܵܐ: ܡܲܙܝܸܕ ܗ̇ܘ ܒܹܐܡܵܪܵܐ، ”ܡܲܙܝܸܕ ܐܸܠܝܼ ܡܵܪܝܵܐ ܒܪܘܿܢܵܐ ܐ݇ܚܹܪ݇ܢܵܐ.“
ܘܲܥܕܵܐ ܚܵܕ݇ܬܵܐ ܕܠܵܒ݂ܵܢ
25ܐܝܼܡܲܢ ܕܪܵܚܹܝܠ ܝ݇ܠܝܼܕ ܠܵܗ̇ ܠܝܵܘܣܸܦ، ܐ݇ܡܝܼܪܹܗ ܝܲܥܩܘܿܒ݂ ܠܠܵܒ݂ܵܢ، ”ܫܲܕܸܪܝܼ ܕܐܵܙܹܠ݇ܢ ܠܕܘܼܟܝܼ ܘܠܐܲܬܪܝܼ. 26ܗܲܒ݂݇ܠ ܠܝܼ ܒܲܟ݂ܬܵܬܝܼ̈ ܘܝܵܠܕ݇ܝܼ̈، ܕܒܘܼܬ ܕܝܼܲܝܗܝ ܦܠܝܼܚ ܠܝܼ ܐܸܠܘܼܟ݂، ܘܫܲܕܸܪܝܼ ܕܐܵܙܹܠ݇ܢ، ܣܵܒܵܒ ܐܲܢ݇ܬ ܟܹܐ ܝܵܕܥܹܬ ܠܦܘܼܠܚܵܢܝܼ ܕܦܠܝܼܚ ܠܝܼ ܐܸܠܘܼܟ݂.“ 27ܐ݇ܡܝܼܪܹܗ ܐܸܠܹܗ ܠܵܒ݂ܵܢ ”ܐܸܢ ܡܘܼܫ݇ܟ̰ܚܵܐ ܝܘܸܢ ܫܵܦܵܩܲܬ ܒܥܲܝܢܘܼ̈ܟ݂، ܦܘܼܫ، ܒܗ̇ܝ ܕܡ̣ܢ ܢܸܚܫܵܐ ܝ݇ܠܝܼܦ ܠܝܼ ܕܡܵܪܝܵܐ ܒܘܼܪܟ݂ܝܼ ܝܠܹܗ ܒܘܼܬ ܕܝܼܘܼܟ݂. 28ܐ݇ܡܘܿܪ ܐܸܠܝܼ، ܟܡܵܐ ܝܠܹܗ ܗܵܩܘܼܟ݂، ܘܒܸܬ ܝܵܗ݇ܒܹܢܹܗ ܐܸܠܘܼܟ݂.“ 29ܐ݇ܡܝܼܪܹܗ ܐܸܠܹܗ ܝܲܥܩܘܿܒ݂، ”ܒܓܵܢܘܼܟ݂ ܟܹܐ ܝܵܕܥܹܬ ܕܵܐܟ݂ܝܼ ܦܠܝܼܚ ܠܝܼ ܐܸܠܘܼܟ݂، ܘܕܵܐܟ݂ܝܼ ܦܪܹܐ ܠܹܗ ܪܸܣܩܘܼܟ݂ ܟܸܣ ܠܝܼ، 30ܣܵܒܵܒ ܒܵܨܘܿܪܵܐ ܐܝܼܬ ܗ݇ܘܵܐ ܠܘܼܟ݂ ܡ̣ܢ ܩܵܕ݇ܡ ܕܐܵܬܹܝܢ ܗ݇ܘܵܐ، ܘܙܝܼܕ ܠܹܗ ܪܵܒܵܐ، ܘܒܘܼܪܸܟ݂ ܠܹܗ ܐܸܠܘܼܟ݂ ܡܵܪܝܵܐ ܒܟܠ ܕܘܼܟܵܐ ܕܡܘܼܬܸܒ݂ ܠܝܼ ܐܲܩܠܝܼ. ܐܝܼܢܵܐ ܐܵܕܝܼܵܐ ܐܝܼܡܲܢ ܒܸܬ ܦܵܠܚܹܢ ܩܵܐ ܒܲܝܬܵܐ ܕܓܵܢܝܼ؟“ 31ܘܐ݇ܡܝܼܪܹܗ ܠܵܒ݂ܵܢ، ”ܡܘܿܕܝܼ ܒܵܥܹܝܬ ܕܝܵܗ݇ܒܹܢ ܐܸܠܘܼܟ݂؟“ ܐ݇ܡܝܼܪܹܗ ܝܲܥܩܘܿܒ݂، ”ܠܵܐ ܝܵܗ݇ܒܹܬ ܠܝܼ ܗܸܟ̃ ܡܸܢܕܝܼ؛ ܐܸܢ ܩܲܒܠܸܬ ܡܸܢܕܝܼ ܕܐܵܡܪܹܢܘܼܟ݂، ܒܸܬ ܕܵܝܪܹܢ ܘܡܲܪܥܸܝܢ ܥܸܪ̈ܒܘܼܟ݂ ܘܢܵܛܪܹܢܗܘܿܢ. 32ܫܒ݂ܘܿܩ ܠܝܼ ܕܥܵܒ݂ܪܹܢ ܓܵܘ ܟܠܲܝܗܝ ܥܸܪ̈ܒܘܼܟ݂ ܐܸܕܝܘܿܡ ܝܵܘܡܵܐ، ܘܦܵܪܫܹܢ ܡܸܢܲܝܗܝ ܟܠ ܥܸܪܒܵܐ ܡܵܪܹܐ ܒܸܛܹ̈ܐ ܘܒܲܠܩܵܐ، ܘܟܠ ܚܲܕ ܟܘܼܡܵܐ ܕܓܵܘ ܦܹܐܪܹ̈ܐ؛ ܘܟܠ ܚܲܕ ܡܵܪܹܐ ܒܸܛܹ̈ܐ ܘܒܲܠܩܵܐ ܕܓܵܘ ܥܸܙܹ̈ܐ. ܐܵܗܵܐ ܒܸܬ ܗܵܘܹܐ ܗܵܩܝܼ. 33ܗܲܕܟ݂ܵܐ ܡܗܘܼܡܢܘܼܬܝܼ ܒܸܬ ܝܵܗ݇ܒ݂ܵܐ ܣܵܗܕܘܼܬܵܐ ܥܲܠܝܼ ܐܝܼܡܲܢ ܕܐܵܬܹܝܬ ܒܚܲܪܬܵܐ ܠܗܲܡܙܘܼܡܹܐ ܒܘܼܬ ܗܵܩܝܼ. ܟܠ ܕܠܹܐ ܝܠܹܗ ܡܵܪܹܐ ܒܸܛܹ̈ܐ ܘܒܲܠܩܵܐ ܓܵܘ ܥܸܙܹ̈ܐ، ܘܟܘܼܡܵܐ ܓܵܘ ܦܹܐܪܹ̈ܐ، ܒܸܬ ܦܵܐܹܫ ܚܘܼܫܒܸܢܵܐ ܓܢܝܼܒ݂ܵܐ ܒܝܲܕ ܕܝܼܝܼ.“ 34ܐ݇ܡܝܼܪܹܗ ܠܵܒ݂ܵܢ، ”ܪܵܒܵܐ ܨܦܵܝܝܼ. ܗܵܘܹܐ ܐܲܝܟ݂ ܕܐ݇ܡܝܼܪܘܼܟ݂.“ 35ܐܝܼܢܵܐ ܒܗ̇ܘ ܝܵܘܡܵܐ ܦܪܝܼܫ ܠܹܗ ܠܵܒ݂ܵܢ ܬܲܝܫܹ̈ܐ ܙܘܼܠܹ̈ܐ ܙܘܼܠܹ̈ܐ ܘܒܲܠܩܹ̈ܐ، ܘܟܠܲܝܗܝ ܥܸܙܹ̈ܐ ܡܵܪܹܐ ܒܸܛܹ̈ܐ ܘܒܲܠܩܹ̈ܐ، ܟܠ ܕܐܝܼܬ ܗ݇ܘܵܐ ܚܘܵܪܵܐ ܒܝܼܘܼܗ̇، ܘܟܠ ܟܘܼܡܵܐ ܕܓܵܘ ܦܹܐܪܹ̈ܐ، ܘܣܘܼܦܝܲܝ ܠܹܗ ܒܐܝܼܕܵܬܹ̈ܐ ܕܒܢܘܿܢܘܼ̈ܗܝ. 36ܘܡܘܼܬܸܒ݂ ܠܹܗ ܐܘܼܪܚܵܐ ܕܬܠܵܬܵܐ ܝܵܘܡܵܢܹ̈ܐ ܒܹܝܠܹܗ ܘܒܹܝܠ ܝܲܥܩܘܿܒ݂؛ ܘܝܲܥܩܘܿܒ݂ ܡܲܪܥܘܼܝܹܐ ܝܗ݇ܘܵܐ ܦܵܝܫܵܢܹ̈ܐ ܕܥܸܪ̈ܒܹܐ ܕܠܵܒ݂ܵܢ.
ܝܲܥܩܘܿܒ݂ ܒܸܗܘܵܝܵܐ ܥܲܬܝܼܪܵܐ
37ܘܫܩܝܼܠ ܠܹܗ ܝܲܥܩܘܿܒ݂ ܩܲܛܝܼܥܵܐ ܕܠܸܒ݂ܢܵܐ ܬܲܠܝܼܠܵܐ، ܘܕܫܲܓ݂݇ܕܹ̈ܐ، ܘܕܟ̰ܸܢܵܪ، ܘܩܘܼܠܸܦ ܠܹܗ ܙܘܼܠܹ̈ܐ ܚܘܵܪܹ̈ܐ ܥܲܠܲܝܗܝ، ܡܲܚܙܘܼܝܹܐ ܚܘܵܪܘܼܬܵܐ ܕܩܲܛܝܼܥܵܐ. 38ܘܡܘܼܬܸܒ݂ ܠܹܗ ܩܵܛܝܼܹ̈ܐ ܕܩܘܼܠܦܲܝ ܠܹܗ ܓܵܘ ܕܘܼܟܵܢܹ̈ܐ ܕܫܬܵܝܬܵܐ، ܓܵܘ ܚܵܘܕܹ̈ܐ ܕܡ̈ܝܼܵܐ، ܩܵܕ݇ܡ ܥܸܪ̈ܒܹܐ، ܐܲܝܟܵܐ ܕܐܵܬܝܼ ܗ݇ܘܵܘ ܥܸܪ̈ܒܹܐ ܠܸܫܬܵܝܵܐ، ܘܬܵܡܵܐ ܟܹܐ ܙܲܘܸܓܝܼ ܗ݇ܘܵܘ. 39ܘܙܘܼܘܸܓ ܠܗܘܿܢ ܥܸܪ̈ܒܹܐ ܠܟܸܣ ܩܵܛܝܼܹ̈ܐ، ܘܝ݇ܠܝܼܕ ܠܗܘܿܢ ܙܘܼܠܹ̈ܐ ܙܘܼܠܹ̈ܐ، ܡܵܪܹܐ ܒܸܛܹ̈ܐ ܘܒܲܠܩܹ̈ܐ. 40ܘܦܪܝܼܫ ܠܹܗ ܝܲܥܩܘܿܒ݂ ܠܦܹܐܪܹ̈ܐ، ܘܡܘܼܬܸܒ݂ ܠܹܗ ܦܵܬܵܐ ܕܥܸܪ̈ܒܹܐ ܠܓܹܒܵܐ ܕܙܘܼܠܹ̈ܐ ܙܘܼܠܹ̈ܐ ܘܕܟܠ ܟܘܼܡܵܐ ܓܵܘ ܥܸܪ̈ܒܹܐ ܕܠܵܒ݂ܵܢ؛ ܘܦܪܝܼܫ ܠܹܗ ܦܸܣܩܹ̈ܐ ܕܓܵܢܹܗ ܒܢܲܦ̮ܫܲܝܗܝ، ܘܠܵܐ ܡܘܼܬܒܲܝ ܠܹܗ ܥܲܡ ܥܸܪ̈ܒܹܐ ܕܠܵܒ݂ܵܢ. 41ܒܟܠ ܥܕܵܢܵܐ ܕܙܲܘܸܓܝܼ ܗ݇ܘܵܘ ܥܸܪ̈ܒܹܐ ܚܲܝܠܵܢܹ̈ܐ، ܟܹܐ ܡܲܬܸܒ݂ ܗ݇ܘܵܐ ܝܲܥܩܘܿܒ݂ ܩܵܛܝܼܹ̈ܐ ܒܕܘܼܟܵܢܹ̈ܐ ܕܫܬܵܝܬܵܐ، ܩܵܕ݇ܡ ܥܲܝܢܹ̈ܐ ܕܥܸܪ̈ܒܹܐ، ܕܙܲܘܸܓܝܼ ܗ݇ܘܵܘ ܓܵܘ ܩܵܛܝܼܹ̈ܐ. 42ܘܒܟܠ ܥܕܵܢܵܐ ܕܥܸܪ̈ܒܹܐ ܙܲܒܘܼܢܹ̈ܐ ܙܲܘܸܓܝܼ ܗ݇ܘܵܘ، ܠܹܐ ܡܲܬܸܒ݂ ܗ݇ܘܵܐ ܩܵܛܝܼܹ̈ܐ. ܘܗܲܕܟ݂ܵܐ ܥܸܪ̈ܒܹܐ ܙܲܒܘܼܢܹ̈ܐ ܗܘܹܐ ܠܗܘܿܢ ܠܠܵܒ݂ܵܢ، ܘܚܲܝܠܵܢܹ̈ܐ ܩܵܐ ܝܲܥܩܘܿܒ݂. 43ܘܗܘܹܐ ܠܹܗ ܝܲܥܩܘܿܒ݂ ܥܲܬܝܼܪܵܐ ܪܵܒܵܐ؛ ܗܘܹܐ ܠܵܗ̇ ܠܹܗ ܥܸܪ̈ܒܹܐ ܪܵܒܵܐ، ܘܚܹܕܲܡܝܵܬܹ̈ܐ، ܘܪܹ̈ܓܵܘܵܬܹܐ، ܘܓܘܼܡܠܹ̈ܐ ܘܚܡܵܪܹ̈ܐ.
Currently Selected:
ܒܪܝܬܐ 30: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
