ܒܪܝܬܐ 31
31
ܝܲܥܩܘܿܒ݂ ܒܸܦܠܵܛܵܐ ܒܛܸܫܘܵܐ ܡ̣ܢ ܠܟܸܣ ܠܵܒ݂ܵܢ
1ܫܡܝܼܥ ܠܹܗ ܝܲܥܩܘܿܒ݂ ܗܹܡܸܙܡܵܢܹ̈ܐ ܕܒܢܘܿܢܹ̈ܐ ܕܠܵܒ݂ܵܢ، ܒܹܐܡܵܪܵܐ، ”ܝܲܥܩܘܿܒ݂ ܫܩܝܼܠ ܠܹܗ ܟܠ ܡܸܢܕܝܼ ܕܝܼܗ݇ܘܵܐ ܕܒܵܒܲܢ؛ ܘܡ̣ܢ ܡܸܢܕܝܼ ܕܒܵܒܲܢ ܩܢܹܐ ܠܹܗ ܟܠܹܗ ܐܵܗܵܐ ܥܘܼܬܪܵܐ.“ 2ܘܚܙܹܐ ܠܹܗ ܝܲܥܩܘܿܒ݂ ܕܠܵܒ݂ܵܢ ܠܹܐ ܝܗ݇ܘܵܐ ܥܲܡܹܗ ܐܲܝܟ݂ ܩܵܕ݇ܡܵܝܬܵܐ. 3ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܝܲܥܩܘܿܒ݂، ”ܕܘܼܪ ܠܐܲܪܥܵܐ ܕܒܵܒܵܘܵܬܘܼ̈ܟ݂ ܘܠܫܲܪܒܬܘܼܟ݂، ܘܒܸܬ ܗܵܘܹܝܢ ܥܲܡܘܼܟ݂.“ 4ܘܫܘܼܕܸܪܹܗ ܝܲܥܩܘܿܒ݂ ܘܩܪܹܐ ܠܹܗ ܠܪܵܚܹܝܠ ܘܠܠܲܝܵܐ، ܕܐܵܬܝܼ ܠܕܸܫܬܵܐ ܟܸܣ ܥܸܪ̈ܒܘܼܗܝ. 5ܐ݇ܡܝܼܪܹܗ ܐܸܠܲܝܗܝ، ”ܒܸܚܙܵܝܵܐ ܝܘܸܢ ܕܒܵܒܵܘܟ݂ܘܿܢ ܠܹܐ ܝܠܹܗ ܡܝܲܩܘܼܪܝܼ ܐܲܝܟ݂ ܩܵܕ݇ܡܵܝܬܵܐ. ܐܝܼܢܵܐ ܐܲܠܵܗܵܐ ܕܒܵܒܝܼ ܗܘܝܼܵܐ ܝܠܹܗ ܥܲܡܝܼ. 6ܐܲܚܬܘܿܢ ܒܝܼܕܵܥܵܐ ܝܬܘܿܢ ܕܦܠܝܼܚܵܐ ܝܘܸܢ ܩܵܐ ܒܵܒܵܘܟ݂ܘܿܢ ܡ̣ܢ ܟܠܹܗ ܚܲܝܠܝܼ؛ 7ܐܝܼܢܵܐ ܒܵܒܵܘܟ݂ܘܿܢ ܥܒ݂ܝܼܕ ܠܹܗ ܠܹܐܒܹ̈ܐ ܥܲܠܝܼ، ܘܫܘܼܚܠܸܦ ܠܹܗ ܗܵܩܝܼ ܥܸܣܪܵܐ ܓܵܗܹ̈ܐ، ܐܝܼܢܵܐ ܐܲܠܵܗܵܐ ܠܵܐ ܫܒ݂ܝܼܩ ܠܹܗ ܕܥܵܒܹܕ ܣܪܝܼܬܵܐ ܥܲܠܝܼ. 8ܐܸܢ ܗܲܕܟ݂ܵܐ ܐ݇ܡܝܼܪܹܗ، ’ܥܸܪ̈ܒܹܐ ܡܵܪܹܐ ܒܸܛܹ̈ܐ ܗܵܘܝܼ ܗܵܩܘܼܟ݂،‘ ܗ̇ܝܓܵܗ ܝ݇ܠܝܼܕ ܠܗܘܿܢ ܟܠܲܝܗܝ ܥܸܪ̈ܒܹܐ ܡܵܪܹܐ ܒܸܛܹ̈ܐ؛ ܘܐܸܢ ܗܲܕܟ݂ܵܐ ܐ݇ܡܝܼܪܹܗ، ’ܥܸܪ̈ܒܹܐ ܡܵܪܹܐ ܙܘܼܠܹ̈ܐ ܗܵܘܝܼ ܗܵܩܘܼܟ݂،‘ ܗ̇ܝܓܵܗ ܝ݇ܠܝܼܕ ܠܗܘܿܢ ܟܠܲܝܗܝ ܥܸܪ̈ܒܹܐ ܙܘܼܠܹ̈ܐ ܙܘܼܠܹ̈ܐ. 9ܫܩܝܼܠ ܠܹܗ ܐܲܠܵܗܵܐ ܦܸܣܩܹ̈ܐ ܕܒܵܒܵܘܟ݂ܘܿܢ ܘܝܘܼܗܒܲܝ ܠܹܗ ܐܸܠܝܼ. 10ܘܗܘܹܐ ܠܵܗ̇ ܒܥܕܵܢܵܐ ܕܙܘܼܘܸܓ ܠܗܘܿܢ ܥܸܪ̈ܒܹܐ، ܡܘܼܪܸܡ ܠܝܼ ܥܲܝܢܝܼ̈ ܘܚܙܹܐ ܠܝܼ ܒܚܸܠܡܵܐ، ܘܗܵܐ ܬܲܝܫܹ̈ܐ ܙܲܘܘܼܓܹܐ ܥܲܡ ܦܸܣܩܹ̈ܐ، ܕܗܵܘܝܼ ܙܘܼܠܹ̈ܐ ܙܘܼܠܹ̈ܐ، ܒܸܛܹ̈ܐ ܒܸܛܹ̈ܐ، ܘܒܲܠܩܹ̈ܐ. 11ܐ݇ܡܝܼܪܹܗ ܐܸܠܝܼ ܡܲܠܲܐܟ݂ܵܐ ܕܐܲܠܵܗܵܐ ܒܚܸܠܡܵܐ، ’ܝܲܥܩܘܿܒ݂،‘ ܘܐ݇ܡܝܼܪܝܼ، ’ܗܵܐ ܐܵܢܵܐ.‘ 12ܐ݇ܡܝܼܪܹܗ ܡܲܠܲܐܟ݂ܵܐ، ’ܡܲܪܸܡ ܥܲܝܢܘܼ̈ܟ݂ ܘܚܙܝܼ ܕܟܠܲܝܗܝ ܬܲܝܫܹ̈ܐ ܙܲܘܘܼܓܹܐ ܝܢܵܐ ܥܲܡ ܥܸܪ̈ܒܹܐ، ܙܘܼܠܹ̈ܐ ܙܘܼܠܹ̈ܐ ܝܢܵܐ، ܒܸܛܹ̈ܐ ܒܸܛܹ̈ܐ ܘܒܲܠܩܹ̈ܐ؛ ܣܵܒܵܒ ܚܙܹܐ ܠܝܼ ܟܠ ܡܸܢܕܝܼ ܕܠܵܒ݂ܵܢ ܥܒ݂ܝܼܕ ܠܹܗ ܐܸܠܘܼܟ݂. 13ܐܵܢܵܐ ܝܘܸܢ ܐܲܠܵܗܵܐ ܕܒܹܝܬ ܐܹܝܠ، ܐܲܝܟܵܐ ܕܡܫܝܼܚ ܠܘܼܟ݂ ܬܵܡܵܐ ܩܵܝܸܡܬܵܐ ܘܢܕܝܼܪܘܼܟ݂ ܐܸܠܝܼ ܢܸܕܪܵܐ. ܐܵܕܝܼܵܐ ܩܘܼܡ ܘܦܠܘܿܛ ܡ̣ܢ ܕܐܵܗܵܐ ܐܲܪܥܵܐ ܘܕܘܼܪ ܠܐܲܪܥܵܐ ܕܡܵܘܠܵܕܘܼܟ݂.‘“ 14ܓ̰ܘܼܘܸܒ ܠܗܘܿܢ ܪܵܚܹܝܠ ܘܠܲܝܵܐ ܒܹܐܡܵܪܵܐ ܐܸܠܹܗ، ”ܐܝܼܬ ܦܵܝܫܵܐ ܐܸܠܲܢ ܣܵܗܡܵܐ ܘܝܵܪܬܘܼܬܵܐ ܓܵܘ ܒܲܝܬܵܐ ܕܒܵܒܲܢ؟ 15ܠܹܐ ܝܘܲܚ ܦܝܼܫܹܐ ܚܫܝܼܒܹܐ ܢܘܼܟ݂ܪ̈ܵܝܹܐ ܒܝܼܹܗ؟ ܣܵܒܵܒ ܩܲܡ ܙܲܒܸܢܲܢ، ܘܐܘܼܦ ܐ݇ܟ݂ܝܼܠ ܠܹܗ ܠܙܘܼܙܹ̈ܐ ܕܫܩܝܼܠ ܠܹܗ. 16ܟܠܹܗ ܥܘܼܬܪܵܐ ܕܫܩܝܼܠ ܠܹܗ ܐܲܠܵܗܵܐ ܡ̣ܢ ܒܵܒܲܢ ܕܝܼܲܢ ܝܠܹܗ ܘܕܒܢܘܿܢܲܢ̈. ܐܵܕܝܼܵܐ ܟܠ ܡܸܢܕܝܼ ܕܐ݇ܡܝܼܪܹܗ ܐܸܠܘܼܟ݂ ܐܲܠܵܗܵܐ، ܥܒ݂ܘܿܕ.“
17ܗ̇ܝܓܵܗ ܩܝܼܡ ܠܹܗ ܝܲܥܩܘܿܒ݂ ܘܡܘܼܬܸܒ݂ ܠܹܗ ܠܒܢܘܿܢܘܼ̈ܗܝ ܘܠܒܲܟ݂ܬܵܬܹ̈ܗ ܥܲܠ ܓܘܼܡܠܹ̈ܐ؛ 18ܘܠܘܼܒܸܠ ܠܹܗ ܠܟܠܹܗ ܪܸܣܩܹܗ ܘܠܟܠ ܡܸܢܕܝܼ ܕܩܸܢܝܹܗ ܝܗ݇ܘܵܐ، ܪܸܣܩܵܐ ܕܩܸܢܝܹܗ ܝܗ݇ܘܵܐ ܒܦܵܕܵܢ ܐܵܪܵܡ، ܠܸܕܝܵܪܵܐ ܠܟܸܣ ܐܝܼܣܚܵܩ ܒܵܒܘܼܗܝ، ܠܐܲܪܥܵܐ ܕܟܢܲܥܢ. 19ܠܵܒ݂ܵܢ ܐ݇ܙܝܼܠܵܐ ܝܗ݇ܘܵܐ ܠܸܓܪܵܥܵܐ ܥܸܪ̈ܒܘܼܗܝ، ܘܪܵܚܹܝܠ ܓܢܝܼܒ݂ ܠܵܗ̇ ܨܵܢܲܡܹ̈ܐ ܕܒܲܝܬܵܐ ܕܒܵܒܘܼܗ̇. 20ܘܥܘܼܠܕܹܐ ܠܹܗ ܝܲܥܩܘܿܒ݂ ܠܠܵܒ݂ܵܢ ܐܵܪܵܡܵܝܵܐ، ܣܵܒܵܒ ܠܵܐ ܡܘܼܕܸܥ ܠܹܗ ܐܸܠܹܗ ܕܒܸܥܪܵܩܵܐ ܝܗ݇ܘܵܐ. 21ܘܥܪܝܼܩ ܠܹܗ، ܗ̇ܘ ܥܲܡ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ. ܥܒ݂ܝܼܪܹܗ ܒܢܲܗܪܵܐ ܕܦܪܵܬ، ܒܹܐܙܵܠܵܐ ܠܛܘܼܪ̈ܵܢܹܐ ܕܓܸܠܥܵܕ.
ܠܵܒ݂ܵܢ ܒܸܬܒܵܥܵܐ ܠܝܲܥܩܘܿܒ݂
22ܦܝܼܫ ܠܵܗ̇ ܡܘܼܕܸܥܬܵܐ ܠܠܵܒ݂ܵܢ ܒܝܵܘܡܵܐ ܕܬܠܵܬܵܐ ܕܥܪܝܼܩ ܠܹܗ ܝܲܥܩܘܿܒ݂. 23ܫܩܝܼܠ ܠܹܗ ܠܚܸܙܡܵܢܘܼ̈ܗܝ ܥܲܡܹܗ ܘܢܦܝܼܠ ܠܹܗ ܒܵܬ݇ܪ ܝܲܥܩܘܿܒ݂ ܐܘܼܪܚܵܐ ܕܫܲܒ݂ܥܵܐ ܝܵܘܡܵܢܹ̈ܐ، ܘܡܛܹܐ ܠܹܗ ܐܸܠܹܗ ܒܪ̈ܘܼܡܝܵܬܹܐ ܕܓܸܠܥܵܕ. 24ܐܝܼܢܵܐ ܐ݇ܬܹܐ ܠܹܗ ܐܲܠܵܗܵܐ ܠܠܵܒ݂ܵܢ ܐܵܪܵܡܵܝܵܐ ܓܵܘ ܚܸܠܡܵܐ ܒܠܲܝܠܹܐ، ܘܐ݇ܡܝܼܪܹܗ ܐܸܠܹܗ، ”ܗܘܝܼ ܗܸܫܝܵܪ، ܠܵܐ ܗܵܘܝܵܐ ܕܗܲܡܙܸܡܸܬ ܥܲܡ ܝܲܥܩܘܿܒ݂ ܡܸܢܕܝܼ ܨܦܵܝܝܼ ܝܲܢ ܣܸܪܝܵܐ.“ 25ܘܡܛܹܐ ܠܹܗ ܠܵܒ݂ܵܢ ܠܝܲܥܩܘܿܒ݂. ܝܲܥܩܘܿܒ݂ ܢܨܝܼܒ݂ܵܐ ܝܗ݇ܘܵܐ ܡܲܫܟܢܹܗ ܒܛܘܼܪ̈ܵܢܹܐ؛ ܘܠܵܒ݂ܵܢ ܥܲܡ ܚܸܙܡܵܢܘܼ̈ܗܝ ܢܨܝܼܒ݂ ܠܹܗ ܡܲܫܟܢܹܗ ܒܛܘܼܪܵܐ ܕܓܸܠܥܵܕ. 26ܐ݇ܡܝܼܪܹܗ ܠܵܒ݂ܵܢ ܠܝܲܥܩܘܿܒ݂، ”ܡܘܿܕܝܼ ܥܒ݂ܝܼܕ ܠܘܼܟ݂، ܥܘܼܠܕܹܐ ܠܘܼܟ݂ ܐܸܠܝܼ، ܘܠܘܼܒܸܠ ܠܘܼܟ݂ ܠܒܢܵܬܝܼ̈ ܐܲܝܟ݂ ܐܲܣܝܼܪܹ̈ܐ ܒܣܲܝܦܵܐ؟ 27ܩܵܡܘܿܕܝܼ ܒܛܸܫܘܵܐ ܥܪܝܼܩ ܠܘܼܟ݂، ܘܓܢܝܼܒ݂ ܠܘܼܟ݂ ܡܸܢܝܼ؟ ܠܵܐ ܡܘܼܕܸܥ ܠܘܼܟ݂ ܐܸܠܝܼ ܕܡܲܦܫܸܛܸܢ ܗ݇ܘܵܐ ܠܘܼܟ݂ ܒܚܲܕܘܼܬܵܐ ܘܒܙܡܵܪ̈ܝܵܬܹܐ، ܒܬܲܦܵܐ ܘܒܟܸܢܵܪܵܐ. 28ܠܵܐ ܫܒ݂ܝܼܩܸܢܘܼܟ݂ ܕܢܵܫܩܹܢ ܗ݇ܘܵܐ ܠܒܢܘܿܢܝܼ̈ ܘܠܒܢܵܬܝܼ̈ ܒܫܲܝܢܵܐ. ܐܵܕܝܼܵܐ ܥܒ݂ܝܼܕܵܐ ܝܘܸܬ ܣܲܟ݂ܠܘܼܬܵܐ. 29ܐܝܼܬ ܒܐܝܼܕܝܼ ܚܲܝܠܵܐ ܠܸܥܒ݂ܵܕܵܐ ܐܸܠܵܘܟ݂ܘܿܢ ܣܪܝܼܬܵܐ، ܐܝܼܢܵܐ ܐܲܠܵܗܵܐ ܕܒܵܒܵܘܟ݂ܘܿܢ ܐ݇ܡܝܼܪܹܗ ܐܸܠܝܼ ܒܪܲܡܫܵܐ، ’ܗܘܝܼ ܗܸܫܝܵܪ، ܠܵܐ ܗܲܡܙܸܡܸܬ ܥܲܡ ܝܲܥܩܘܿܒ݂ ܡܸܢܕܝܼ ܨܦܵܝܝܼ ܝܲܢ ܣܸܪܝܵܐ.‘ 30ܘܐܵܕܝܼܵܐ، ܐ݇ܙܵܠܵܐ ܐ݇ܙܝܼܠ ܠܘܼܟ݂ ܣܵܒܵܒ ܡܲܚܢܘܼܝܹܐ ܡܘܼܚܢܹܐ ܠܘܼܟ݂ ܡ̣ܢ ܒܲܝܬܵܐ ܕܒܵܒܘܼܟ݂. ܐܝܼܢܵܐ ܩܵܡܘܿܕܝܼ ܓܢܝܼܒ݂ ܠܘܼܟ݂ ܠܐܲܠܵܗܝܼ̈؟“ 31ܓ̰ܘܼܘܸܒ ܠܹܗ ܝܲܥܩܘܿܒ݂ ܘܐ݇ܡܝܼܪܹܗ ܠܠܵܒ݂ܵܢ، ”ܙܕܝܼܥ ܠܝܼ، ܣܵܒܵܒ ܐ݇ܡܝܼܪܝܼ، ’ܠܵܐ ܗܵܘܝܵܐ ܕܫܵܩܠܹܬ ܠܒܢܵܬܘܼ̈ܟ݂ ܒܚܲܝܠܵܐ ܡܸܢܝܼ.‘ 32ܠܟܸܣ ܡ̇ܢ ܕܡܲܫ݇ܟ̰ܚܸܬ ܐܲܠܵܗܘܼ̈ܟ݂، ܠܵܐ ܚܵܝܹܐ. ܩܵܕ݇ܡ ܐܲܚܘܿܢܘܵܬܲܢ̈، ܦܪܘܿܫ ܡܸܢܕܝܼܘܼܟ݂ ܕܝܼܠܹܗ ܠܟܸܣ ܠܝܼ، ܘܫܩܘܿܠ ܠܹܗ.“ ܐܝܼܢܵܐ ܠܹܐ ܝܵܕܹܥ ܗ݇ܘܵܐ ܝܲܥܩܘܿܒ݂ ܕܪܵܚܹܝܠ ܓܢܝܼܒ݂ܬܲܝ ܝܗ݇ܘܵܐ. 33ܘܥܒ݂ܝܼܪܹܗ ܠܵܒ݂ܵܢ ܓܵܘ ܡܲܫܟܢܵܐ ܕܝܲܥܩܘܿܒ݂، ܘܓܵܘ ܡܲܫܟܢܵܐ ܕܠܲܝܵܐ، ܘܓܵܘ ܡܲܫܟܢܵܐ ܕܬܸܪܘܲܝܗܝ ܚܹܕܲܡܝܵܬܹ̈ܐ، ܘܠܵܐ ܡܘܼܫ݇ܟ̰ܚܲܝ ܠܹܗ. ܘܦܠܝܼܛ ܠܹܗ ܡ̣ܢ ܡܲܫܟܢܵܐ ܕܠܲܝܵܐ ܘܥܒ݂ܝܼܪܹܗ ܓܵܘ ܡܲܫܟܢܵܐ ܕܪܵܚܹܝܠ. 34ܪܵܚܹܝܠ ܫܩܝܼܠܬܲܝ ܝܗ݇ܘܵܐ ܨܵܢܲܡܹ̈ܐ ܘܡܘܼܬܸܒ݂ܬܲܝ ܝܗ݇ܘܵܐ ܓܵܘ ܣܲܪܓܵܐ ܕܓܘܼܡܠܵܐ، ܘܝ݇ܬܝܼܒ݂ܬܵܐ ܝܗ݇ܘܵܐ ܥܲܠܲܝܗܝ. ܛܘܼܥܹܐ ܠܹܗ ܠܵܒ݂ܵܢ ܠܟܠܹܗ ܡܲܫܟܢܵܐ، ܘܠܵܐ ܡܘܼܫ݇ܟ̰ܚܲܝ ܠܹܗ. 35ܐ݇ܡܝܼܪܵܗ̇ ܠܒܵܒܘܼܗ̇، ”ܠܵܐ ܟܵܪܹܒ ܡܵܪܝܼ ܡܸܢܝܼ ܕܠܹܐ ܡܵܨܝܵܢ ܩܵܝܡܵܢ ܩܵܕ݇ܡܘܼܟ݂، ܣܵܒܵܒ ܒܐܘܼܪܚܵܐ ܕܒܲܟ݂ܬܵܬܹ̈ܐ ܝܘܵܢ.“ ܬܘܼܦ̮ܬܸܫ ܠܹܗ ܘܠܵܐ ܡܘܼܫ݇ܟ̰ܚܲܝ ܠܹܗ ܨܵܢܲܡܹ̈ܐ. 36ܟܪܝܼܒ ܠܹܗ ܝܲܥܩܘܿܒ݂ ܘܡܘܼܩܪܸܨ ܠܹܗ ܥܲܡ ܠܵܒ݂ܵܢ، ܘܐ݇ܡܝܼܪܹܗ ܐܸܠܹܗ، ”ܡܘܿܕܝܼ ܝܠܵܗ̇ ܓܢܵܗܝܼ؟ ܘܡܘܿܕܝܼ ܝܠܵܗ̇ ܚܛܝܼܬܝܼ، ܕܢܦܝܼܠܵܐ ܝܘܸܬ ܒܵܬ݇ܪܝܼ ܒܚܸܡܬܵܐ؟ 37ܛܘܼܥܹܐ ܠܘܼܟ݂ ܠܟܠ ܡܸܢܕܝܼ ܕܐܝܼܬ ܠܝܼ. ܡܘܿܕܝܼ ܡܘܼܫ݇ܟ̰ܸܚ ܠܘܼܟ݂ ܡ̣ܢ ܡܸܢܕܝܼ ܕܒܲܝܬܘܼܟ݂؟ ܡܲܬܸܒ݂ ܠܹܗ ܠܐܲܟ݂ܵܐ ܩܵܕ݇ܡ ܐܲܚܘܿܢܘܵܬܝܼ̈ ܘܚܸܙܡܵܢܘܼ̈ܟ݂، ܘܫܒ݂ܘܿܩ ܕܵܝܢܝܼ ܒܹܝܠ ܬܸܪܘܲܢ. 38ܐܲܢܹܐ ܥܸܣܪܝܼ ܫܸܢܹ̈ܐ ܐܵܢܵܐ ܥܲܡܘܼܟ݂ ܝܼܘܸܢ؛ ܥܸܪ̈ܒܘܼܟ݂ ܘܥܸܙܘܼ̈ܟ݂ ܠܹܐ ܝܢܵܐ ܡܘܼܪܚܸܫܹܐ، ܘܒܲܪ̈ܥܵܢܹܐ ܕܦܸܣܩܘܼܟ݂ ܠܹܐ ܝܘܸܢ ܐ݇ܟ݂ܝܼܠܵܐ. 39ܥܸܪܒܵܐ ܦܪܝܼܛܵܐ ܒܗܲܝܘܵܢ ܠܵܐ ܡܘܼܐܬܹܐ ܠܝܼ ܠܟܸܣ ܠܘܼܟ݂؛ ܐܵܢܵܐ ܩܘܼܒܸܠ ܠܝܼ ܚܘܼܣܪܵܢܹܗ. ܘܐܸܢ ܚܲܕ ܦܝܼܫܵܐ ܝܗ݇ܘܵܐ ܓܢܝܼܒ݂ܵܐ، ܐܸܢ ܒܐܝܼܡܵܡܵܐ ܝܲܢ ܒܠܲܝܠܹܐ، ܡ̣ܢ ܐܝܼܕܝܼ ܛܠܝܼܒ ܠܘܼܟ݂. 40ܗܲܕܟ݂ܵܐ ܗܘܹܐ ܠܵܗ̇ ܐܸܠܝܼ، ܕܒܝܵܘܡܵܐ ܚܸܡܵܐ ܘܒܠܲܝܠܹܐ ܩܲܪܬܵܐ ܩܲܡ ܐܵܟ݂ܠܝܼ ܠܝܼ؛ ܘܦܪܝܼܕ ܠܵܗ̇ ܫܸܢܬܵܐ ܡ̣ܢ ܥܲܝܢܝܼ̈. 41ܐܲܢܹܐ ܥܸܣܪܝܼ ܫܸܢܹ̈ܐ ܗܘܹܐ ܠܝܼ ܓܵܘ ܒܲܝܬܘܼܟ݂. ܦܠܝܼܚ ܠܝܼ ܐܸܠܘܼܟ݂ ܐܲܪܒܲܥܣܲܪ ܫܸܢܹ̈ܐ ܒܘܼܬ ܬܲܪܬܹܝ ܒܢܵܬܘܼ̈ܟ݂؛ ܘܐܸܫܬܵܐ ܫܸܢܹ̈ܐ ܒܘܼܬ ܥܸܪ̈ܒܘܼܟ݂؛ ܘܫܘܼܚܠܸܦ ܠܘܼܟ݂ ܗܵܩܝܼ ܥܸܣܪܵܐ ܓܵܗܹ̈ܐ. 42ܐܸܢ ܐܲܠܵܗܵܐ ܕܒܵܒܝܼ، ܐܲܠܵܗܵܐ ܕܐܲܒ݂ܪܵܗܵܡ، ܘܗ̇ܘ ܕܙܵܕܹܥ ܡܸܢܹܗ ܐܝܼܣܚܵܩ، ܠܵܐ ܗܵܘܹܐ ܗ݇ܘܵܐ ܠܓܹܒܝܼ، ܫܲܪܝܼܪܵܐܝܼܬ ܐܵܕܝܼܵܐ ܣܦܝܼܩܵܐ ܒܸܬ ܗܵܘܹܝܬ ܗ݇ܘܵܐ ܫܘܼܕܪܝܼ. ܐܝܼܢܵܐ ܐܲܠܵܗܵܐ ܚܙܹܐ ܠܹܗ ܠܐܘܼܠܨܵܢܝܼ ܘܠܦܘܼܠܚܵܢܵܐ ܕܐܝܼܕܵܬܝܼ̈، ܘܡܘܼܢܟܸܣ ܠܹܗ ܐܸܠܘܼܟ݂ ܒܪܲܡܫܵܐ ܕܕܲܥܒܲܪ.“
ܠܵܒ݂ܵܢ ܘܝܲܥܩܘܿܒ݂ ܒܸܥܒ݂ܵܕܵܐ ܘܲܥܕܵܐ
43ܓ̰ܘܼܘܸܒ ܠܹܗ ܠܵܒ݂ܵܢ ܘܐ݇ܡܝܼܪܹܗ ܠܝܲܥܩܘܿܒ݂، ”ܒܢܵܬܹ̈ܐ ܒܢܵܬܝܼ̈ ܝܢܵܐ؛ ܒܢܘܿܢܹ̈ܐ ܒܢܘܿܢܝܼ̈ ܝܢܵܐ. ܦܸܣܩܵܐ ܕܥܸܪ̈ܒܹܐ ܕܝܼܝܼ ܝܠܹܗ؛ ܟܠ ܡܸܢܕܝܼ ܕܐܲܢ݇ܬ ܒܸܚܙܵܝܵܐ ܝܘܸܬ ܕܝܼܝܼ ܝܠܹܗ. ܐܝܼܢܵܐ ܡܘܿܕܝܼ ܥܵܒ݂ܕܹܢ ܠܒܢܵܬܝܼ̈ ܐܸܕܝܘܿܡ ܝܵܘܡܵܐ، ܝܲܢ ܠܒܢܘܿܢܲܝ̈ܗܝ ܕܝ݇ܠܝܼܕܲܝ ܝܢܵܐ؟ 44ܐܵܕܝܼܵܐ ܬܵܐ ܩܵܛܥܲܚ ܘܲܥܕܵܐ ܐܵܢܵܐ ܘܐܲܢ݇ܬ، ܕܗܵܘܹܐ ܣܵܗܕܵܐ ܒܹܝܠܝܼ ܘܒܹܝܠܘܼܟ݂.“ 45ܘܫܩܝܼܠ ܠܹܗ ܝܲܥܩܘܿܒ݂ ܟܹܐܦܵܐ ܘܒܢܹܐ ܠܹܗ ܩܵܝܸܡܬܵܐ. 46ܘܐ݇ܡܝܼܪܹܗ ܝܲܥܩܘܿܒ݂ ܠܚܸܙܡܵܢܘܼ̈ܗܝ، ”ܓ̰ܲܡܸܥܡܘܼܢ ܟܹܐܦܹ̈ܐ.“ ܘܫܩܝܼܠ ܠܗܘܿܢ ܟܹܐܦܹ̈ܐ ܘܥܒ݂ܝܼܕ ܠܗܘܿܢ ܡܘܼܟܪܵܐ. ܘܐ݇ܟ݂ܝܼܠ ܠܗܘܿܢ ܬܵܡܵܐ ܒܕܸܦܢܵܐ ܕܡܘܼܟܪܵܐ. 47ܩܪܹܐ ܠܹܗ ܠܵܒ݂ܵܢ ܫܸܡܵܐ ܕܗ̇ܝ ܕܘܼܟܵܐ ”ܝܲܓܲܪ ܣܵܗܕܘܼܬܵܐ؛“#31:47 ܐܵܪܵܡܵܐܝܼܬ ܒܡܲܥܢܵܝܵܐ: ܡܘܼܟܪܵܐ ܕܣܵܗܕܘܼܬܵܐ ܘܝܲܥܩܘܿܒ݂ ܩܪܹܐ ܠܹܗ ܫܸܡܘܼܗ̇ ”ܓܲܠܥܸܕ.“#31:47 ܥܸܒ݂ܪܵܐܝܼܬ ܒܡܲܥܢܵܝܵܐ: ܡܘܼܟܪܵܐ ܕܣܵܗܕܘܼܬܵܐ 48ܐ݇ܡܝܼܪܹܗ ܠܵܒ݂ܵܢ، ”ܐܵܗܵܐ ܡܘܼܟܪܵܐ ܣܵܗܕܘܼܬܵܐ ܝܠܹܗ ܒܹܝܠܝܼ ܘܒܹܝܠܘܼܟ݂ ܐܸܕܝܘܿܡ ܝܵܘܡܵܐ.“ ܒܘܼܬ ܐܵܗܵܐ ܦܝܼܫ ܠܹܗ ܫܸܡܹܗ ”ܓܲܠܥܸܕ،#31:48 ܥܸܒ݂ܪܵܐܝܼܬ ܒܡܲܥܢܵܝܵܐ: ”ܡܘܼܟܪܵܐ ܕܣܵܗܕܘܼܬܵܐ“ “ 49ܘܩܪܹܐ ܠܹܗ ܐܘܼܦ ”ܡܸܨܦܵܐ،“#31:49 ܥܸܒ݂ܪܵܐܝܼܬ ܒܡܲܥܢܵܝܵܐ: ܕܘܼܟܵܐ ܕܩܲܙܕܵܢܵܐ، ܕܘܼܟܵܐ ܓܲܫܩܵܢܵܐ ܣܵܒܵܒ ܐ݇ܡܝܼܪܹܗ، ”ܒܵܚܹܪ ܡܵܪܝܵܐ ܒܹܝܠܝܼ ܘܒܹܝܠܘܼܟ݂ ܐܝܼܡܲܢ ܕܦܵܪܫܲܚ ܡܸܚܕܵܕܹ̈ܐ. 50ܐܸܢ ܡܲܠܝܸܨܸܬ ܠܒܢܵܬܝܼ̈، ܘܐܸܢ ܫܵܩܠܹܬ ܒܲܟ݂ܬܵܬܹ̈ܐ ܥܲܠ ܒܢܵܬܝܼ̈، ܕܟ݂ܘܿܪ، ܐܲܠܵܗܵܐ ܣܵܗܕܵܐ ܝܠܹܗ ܒܹܝܠܝܼ ܘܒܹܝܠܘܼܟ݂ ܐܘܼܦ ܐܸܢ ܠܲܝܬ ܐ݇ܢܵܫܵܐ ܠܟܸܣ ܠܲܢ.“ 51ܘܐ݇ܡܝܼܪܹܗ ܠܵܒ݂ܵܢ ܠܝܲܥܩܘܿܒ݂، ”ܚܙܝܼ ܠܐܵܗܵܐ ܡܘܼܟܪܵܐ ܘܠܐܵܗܵܐ ܩܵܝܸܡܬܵܐ ܕܡܘܼܬܒܲܝ ܝܘܸܢ ܒܹܝܠܝܼ ܘܒܹܝܠܘܼܟ݂. 52ܐܵܗܵܐ ܡܘܼܟܪܵܐ ܘܐܵܗܵܐ ܩܵܝܸܡܬܵܐ ܣܵܗܕܘܼܬܵܐ ܝܢܵܐ، ܕܐܵܢܵܐ ܠܹܐ ܥܵܒ݂ܪܹܢܹܗ ܐܵܗܵܐ ܡܘܼܟܪܵܐ ܒܘܼܬ ܒܝܼܫܬܵܐ ܠܟܸܣ ܠܘܼܟ݂، ܘܐܲܢ݇ܬ ܠܹܐ ܥܵܒ݂ܪܹܬ ܠܹܗ ܐܵܗܵܐ ܡܘܼܟܪܵܐ ܘܐܵܗܵܐ ܩܵܝܸܡܬܵܐ ܒܘܼܬ ܒܝܼܫܬܵܐ ܠܟܸܣ ܠܝܼ. 53ܐܲܠܵܗܵܐ ܕܐܲܒ݂ܪܵܗܵܡ، ܘܐܲܠܵܗܵܐ ܕܢܵܚܘܿܪ، ܐܲܠܵܗܵܐ ܕܒܵܒܵܘܵܬܲܝ̈ܗܝ ܕܵܐܹܢ ܒܹܝܠܲܢ.“ ܘܝ݇ܡܹܐ ܠܹܗ ܝܲܥܩܘܿܒ݂ ܒܙܕܘܼܥܬܵܐ ܕܒܵܒܘܼܗܝ ܐܝܼܣܚܵܩ. 54ܘܕܒ݂ܝܼܚ ܠܹܗ ܝܲܥܩܘܿܒ݂ ܕܸܒ݂ܚܵܐ ܒܛܘܼܪܵܐ؛ ܘܩܪܹܐ ܠܹܗ ܠܚܸܙܡܵܢܘܼ̈ܗܝ ܠܹܐܟ݂ܵܠܵܐ ܠܲܚܡܵܐ. ܘܐ݇ܟ݂ܝܼܠ ܠܗܘܿܢ ܠܲܚܡܵܐ، ܘܦܝܼܫ ܠܗܘܿܢ ܒܠܲܝܠܹܐ ܒܛܘܼܪܵܐ. 55ܩܝܼܡ ܠܹܗ ܠܵܒ݂ܵܢ ܓ̰ܲܠܕܹܐ ܒܨܲܦܪܵܐ، ܘܢܫܝܼܩ ܠܹܗ ܠܢܵܘܸܓܘܼ̈ܗܝ ܘܠܒܢܵܬܹ̈ܗ، ܘܒܘܼܪܟܲܝ ܠܹܗ. ܗ̇ܝܓܵܗ ܐ݇ܙܝܼܠ ܠܹܗ ܘܕܝܼܪܹܗ ܠܐܲܬܪܹܗ.
Currently Selected:
ܒܪܝܬܐ 31: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
