ܒܪܝܬܐ 32

ܚܸܙܘܵܐ ܕܝܲܥܩܘܿܒ݂

1ܐ݇ܙܝܼܠ ܠܹܗ ܝܲܥܩܘܿܒ݂ ܒܐܘܼܪܚܹܗ، ܘܬܦܝܼܩ ܠܗܘܿܢ ܒܝܼܹܗ ܡܲܠܲܐܟܹ̈ܐ ܕܐܲܠܵܗܵܐ. 2ܟܲܕ ܚܸܙܝܲܝ ܠܹܗ ܝܲܥܩܘܿܒ݂، ܐ݇ܡܝܼܪܹܗ، ”ܡܲܫܪܝܼܬܵܐ ܕܐܲܠܵܗܵܐ ܝܠܵܗ̇ ܐܵܗܵܐ.“ ܘܩܪܹܐ ܠܹܗ ܫܸܡܵܐ ܕܗ̇ܝ ܕܘܼܟܵܐ، ”ܡܲܚܢܲܝܸܡ.“#32‏:2 ܥܸܒ݂ܪܵܐܝܼܬ ܒܡܲܥܢܵܝܵܐ، ܬܲܪܬܹܝ ܡܲܫܪ̈ܝܼܵܬܹܐ

ܝܲܥܩܘܿܒ݂ ܫܲܕܘܼܪܹܐ ܐܝܼܙܓܲܕܹ̈ܐ ܠܟܸܣ ܥܹܣܘܿ

3ܫܘܼܕܸܪܹܗ ܝܲܥܩܘܿܒ݂ ܐܝܼܙܓܲܕܹ̈ܐ ܡ̣ܢ ܩܵܕ݇ܡ ܡܸܢܹܗ ܠܟܸܣ ܥܹܣܘܿ ܐܲܚܘܿܢܘܼܗܝ، ܠܐܲܪܥܵܐ ܕܣܵܥܝܼܪ، ܒܕܸܫܬܵܐ ܕܐܲܕܘܿܡ. 4ܦܩܝܼܕ ܠܹܗ ܐܸܠܲܝܗܝ ܒܹܐܡܵܪܵܐ، ”ܗܲܕܟ݂ܵܐ ܐܵܡܪܝܼܬܘܿܢ ܠܡܵܪܝܼ، ܥܹܣܘܿ، ܕܐ݇ܡܝܼܪܹܗ ܪܹܓܘܼܟ݂ ܝܲܥܩܘܿܒ݂، ’ܡܘܼܫܚܸܛ ܠܝܼ ܠܟܸܣ ܠܵܒ݂ܵܢ، ܘܦܝܼܫ ܠܝܼ ܗܲܠ ܐܵܕܝܼܵܐ. 5ܗܘܹܐ ܠܵܗ̇ ܠܝܼ ܬܵܘܪܹ̈ܐ، ܘܚܡܵܪܹ̈ܐ، ܘܥܸܪ̈ܒܹܐ، ܘܪܹ̈ܓܵܘܵܬܹܐ ܘܚܹܕܲܡܝܵܬܹ̈ܐ؛ ܘܫܘܼܕܪܵܐ ܝܘܸܢ ܕܡܲܕܥܸܢ ܐܵܗܵܐ ܠܡܵܪܝܼ، ܘܕܡܲܫ݇ܟ̰ܚܸܢ ܫܵܦܵܩܲܬ ܒܥܲܝܢܘܼ̈ܟ݂.‘“

6ܕܝܼܪܗܘܿܢ ܐܝܼܙܓܲܕܹ̈ܐ ܠܟܸܣ ܝܲܥܩܘܿܒ݂ ܘܐ݇ܡܝܼܪܗܘܿܢ، ”ܐ݇ܙܝܼܠ ܠܲܢ ܠܟܸܣ ܐܲܚܘܿܢܘܼܟ݂ ܥܹܣܘܿ، ܘܗܵܐ، ܐܘܼܦ ܗ̇ܘ ܒܹܐܬܵܝܵܐ ܝܠܹܗ ܠܐܘܼܪܚܘܼܟ݂، ܘܐܲܪܒܲܥܡܵܐܐ ܐ݇ܢܵܫܹ̈ܐ ܥܲܡܹܗ.“ 7ܙܕܝܼܥ ܠܹܗ ܝܲܥܩܘܿܒ݂ ܪܵܒܵܐ ܘܥܝܼܩ ܠܵܗ̇ ܐܸܠܹܗ؛ ܘܦܘܼܠܸܥ ܠܹܗ ܠܐ݇ܢܵܫܹ̈ܐ ܕܝܼܗ݇ܘܵܘ ܥܲܡܹܗ، ܘܠܦܸܣܩܹ̈ܐ ܘܠܒܸܩܪ̈ܵܬܹܐ ܘܠܓܘܼܡܠܹ̈ܐ ܠܬܲܪܬܹܝ ܡܲܫܪ̈ܝܼܵܬܹܐ، 8ܘܐ݇ܡܝܼܪܹܗ، ”ܐܸܢ ܐܵܬܹܐ ܥܹܣܘܿ ܥܲܠ ܚܕܵܐ ܡܲܫܪܝܼܬܵܐ ܘܡܵܚܹܐ ܠܵܗ̇، ܗ̇ܝ ܡܲܫܪܝܼܬܵܐ ܐ݇ܚܹܪ݇ܬܵܐ ܒܸܬ ܦܵܪܩܵܐ.“

9ܗ̇ܝܓܵܗ ܐ݇ܡܝܼܪܹܗ ܝܲܥܩܘܿܒ݂، ”ܝܵܐ ܐܲܠܵܗܵܐ ܕܒܵܒܝܼ ܐܲܒ݂ܪܵܗܵܡ ܘܐܲܠܵܗܵܐ ܕܒܵܒܝܼ ܐܝܼܣܚܵܩ، ܡܵܪܝܵܐ ܕܐ݇ܡܝܼܪܹܗ ܐܸܠܝܼ، ’ܕܘܼܪ ܠܐܲܪܥܘܼܟ݂ ܘܠܫܲܪܒܬܘܼܟ݂، ܘܒܸܬ ܥܵܒ݂ܕܹܢ ܛܵܒ݂ܬܵܐ ܥܲܡܘܼܟ݂،‘ 10ܠܹܐ ܝܘܸܢ ܚܫܝܼܚܵܐ ܠܟܠܵܗ̇ ܫܵܦܵܩܲܬ ܘܟܠܹܗ ܫܪܵܪܵܐ ܕܥܒ݂ܝܼܕܵܐ ܝܘܸܬ ܥܲܡ ܪܹܓܘܼܟ݂؛ ܣܵܒܵܒ ܒܚܲܕ ܚܘܼܛܪܝܼ ܐܲܚܟ̰ܝܼ ܥܒ݂ܝܼܪܝܼ ܐܵܗܵܐ ܝܘܿܪܕܢܵܢ، ܘܐܵܕܝܼܵܐ ܐܝܼܬ ܠܝܼ ܬܲܪܬܹܝ ܡܲܫܪ̈ܝܼܵܬܹܐ. 11ܦܲܪܦܘܼܠܹܐ ܝܘܸܢ، ܦܲܨܝܼ ܠܝܼ ܡ̣ܢ ܐܝܼܕܵܐ ܕܐܲܚܘܿܢܝܼ ܥܹܣܘܿ، ܣܵܒܵܒ ܒܸܙܕܵܥܵܐ ܝܘܸܢ ܡܸܢܹܗ، ܠܵܐ ܗܵܘܹܐ ܕܐܵܬܹܐ ܘܡܵܚܹܐ ܠܲܢ ܟܠܲܢ، ܝܸܡܵܬܹ̈ܐ ܥܲܡ ܒܢܘܿܢܹ̈ܐ. 12ܐܲܢ݇ܬ ܐ݇ܡܝܼܪܘܼܟ݂، ’ܒܸܬ ܥܵܒ݂ܕܹܢ ܛܵܒ݂ܬܵܐ ܥܲܡܘܼܟ݂، ܘܒܸܬ ܥܵܒ݂ܕܹܢ ܠܙܲܪܥܘܼܟ݂ ܐܲܝܟ݂ ܣܹܠܵܐ ܕܝܵܡܵܐ، ܕܠܹܐ ܦܵܐܹܫ ܡܸܢܝܵܐ ܡ̣ܢ ܒܘܼܫܵܝܘܼܬܵܐ.‘“

13ܦܝܼܫ ܠܹܗ ܬܵܡܵܐ ܒܗ̇ܘ ܠܲܝܠܹܐ، ܘܫܩܝܼܠ ܠܹܗ ܡ̣ܢ ܡܸܢܕܝܼ ܕܐܝܼܬ ܗ݇ܘܵܐ ܠܹܗ ܡܵܘܗܲܒ݂ܬܵܐ ܠܥܹܣܘܿ ܐܲܚܘܿܢܘܼܗܝ؛ 14ܬܪܲܝܡܵܐܐ ܥܸܙܹ̈ܐ ܘܥܸܣܪܝܼ ܬܲܝܫܹ̈ܐ، ܘܬܪܲܝܡܵܐܐ ܘܲܥܢܹ̈ܐ ܘܥܸܣܪܝܼ ܒܲܪ̈ܥܵܢܹܐ، 15ܘܬܠܵܬܝܼ ܓܘܼܡܠܹ̈ܐ ܡܲܡܸܨܵܢܹ̈ܐ ܥܲܡ ܙܲܥܝܲܝ̈ܗܝ، ܘܐܲܪܒܥܝܼ ܬܵܘܸܪ̈ܝܵܬܹܐ ܘܥܸܣܪܝܼ ܬܵܘܪܹ̈ܐ، ܘܥܸܣܪܝܼ ܚܡܵܪ̈ܝܵܬܹܐ ܘܥܸܣܪܵܐ ܚܡܵܪܹ̈ܐ. 16ܣܘܼܦܝܲܝ ܠܹܗ ܒܐܝܼܕܵܐ ܕܪܹ̈ܓܵܘܵܬܹܗ، ܟܠ ܦܸܣܩܵܐ ܒܢܲܦ̮ܫܹܗ، ܘܐ݇ܡܝܼܪܹܗ ܐܸܠܲܝܗܝ، ”ܥܒ݂ܘܿܪܘܼܢ ܩܵܕ݇ܡܵܐ ܩܵܕ݇ܡܝܼ، ܘܥܒ݂ܘܿܕܘܼܢ ܥܵܪܵܐ ܒܹܝܠ ܦܸܣܩܵܐ ܠܦܸܣܩܵܐ.“ 17ܘܦܩܝܼܕ ܠܹܗ ܠܗ̇ܘ ܩܵܕ݇ܡܵܝܵܐ ܒܹܐܡܵܪܵܐ، ”ܐܝܼܡܲܢ ܕܬܵܦܹܩ ܒܝܼܘܼܟ݂ ܥܹܣܘܿ ܐܲܚܘܿܢܝܼ، ܘܒܲܩܸܪܘܼܟ݂، ܒܹܐܡܵܪܵܐ، ’ܕܡܵܢܝܼ ܝܘܸܬ؟ ܘܠܐܲܝܟܵܐ ܝܘܸܬ ܒܹܐܙܵܠܵܐ؟ ܘܕܡܵܢܝܼ ܝܢܵܐ ܐܲܢܹܐ ܕܝܼܢܵܐ ܩܵܕ݇ܡܘܼܟ݂؟‘ 18ܐܵܡܪܹܬ، ’ܕܪܹܓܘܼܟ݂ ܝܲܥܩܘܿܒ݂ ܝܢܵܐ، ܘܡܵܘܗܲܒ݂ܬܵܐ ܝܢܵܐ ܠܡܵܪܝܼ ܥܹܣܘܿ، ܘܗܵܐ، ܐܘܼܦ ܗ̇ܘ ܒܹܐܬܵܝܵܐ ܝܠܹܗ ܒܵܬ݇ܪܲܢ.‘“ 19ܘܦܩܝܼܕ ܠܹܗ ܐܘܼܦ ܠܗ̇ܘ ܕܬܪܹܝ، ܐܘܼܦ ܠܗ̇ܘ ܕܬܠܵܬܵܐ، ܘܟܠܲܝܗܝ ܐܵܙܵܠ݇ܢܹ̈ܐ ܕܒܵܬ݇ܪ ܦܸܣܩܹ̈ܐ ܒܹܐܡܵܪܵܐ، ”ܗܲܕܟ݂ܵܐ ܐܵܡܪܝܼܬܘܿܢ ܠܥܹܣܘܿ ܐܝܼܡܲܢ ܕܚܵܙܹܝܬܘܿܢ ܠܹܗ. 20ܘܐܵܡܪܝܼܬܘܿܢ، ’ܗܵܐ ܐܘܼܦ ܪܹܓܘܼܟ݂ ܝܲܥܩܘܿܒ݂ ܒܹܐܬܵܝܵܐ ܝܠܹܗ ܒܵܬ݇ܪܲܢ.‘“ ܣܵܒܵܒ ܐ݇ܡܝܼܪܹܗ، ”ܩܵܘܡܵܐ ܕܡܲܦܝܸܚܸܢ ܟܲܪܒܹܗ ܒܡܵܘܗܲܒ݂ܬܵܐ ܕܒܹܐܙܵܠܵܐ ܝܠܵܗ̇ ܩܵܕ݇ܡܝܼ؛ ܘܒܵܬ݇ܪ ܗܵܕܵܐ ܒܸܬ ܚܵܙܹܝܢܵܗ̇ ܦܵܬܹܗ، ܩܵܘܡܵܐ ܩܲܒܸܠ ܠܝܼ.“ 21ܫܘܼܕܸܪܹܗ ܠܡܵܘܗܲܒ݂ܬܵܐ ܠܩܵܕ݇ܡܘܼܗܝ، ܘܓܵܢܹܗ ܦܝܼܫ ܠܹܗ ܒܗ̇ܘ ܠܲܝܠܹܐ ܓܵܘ ܡܲܫܪܝܼܬܵܐ. 22ܘܩܝܼܡ ܠܹܗ ܒܗ̇ܘ ܠܲܝܠܹܐ ܘܫܩܝܼܠ ܠܹܗ ܠܬܲܪܬܹܝ ܒܲܟ݂ܬܵܬܹ̈ܗ ܘܠܬܲܪܬܹܝ ܚܹܕܲܡܝܵܬܹ̈ܗ ܘܠܚܲܕܸܥܣܲܪ ܒܢܘܿܢܘܼ̈ܗܝ، ܘܥܒ݂ܝܼܪܹܗ ܠܥܲܒ݂ܘܼܪܵܐ ܕܝܵܒ݂ܵܩ. 23ܫܩܝܼܠܲܝ ܠܹܗ ܘܡܘܼܥܒܸܪܲܝ ܠܹܗ ܡ̣ܢ ܢܲܗܪܵܐ، ܘܡܘܼܥܒܸܪܹܗ ܠܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ.

ܝܲܥܩܘܿܒ݂ ܒܸܕܒ݂ܵܩܵܐ ܟܘܼܫܬܝܼ ܥܲܡ ܡܲܠܲܐܟ݂ܵܐ

24ܦܝܼܫ ܠܹܗ ܝܲܥܩܘܿܒ݂ ܒܢܲܦ̮ܫܹܗ؛ ܘܕܒ݂ܝܼܩ ܠܹܗ ܟܘܼܬܵܫܵܐ ܚܲܕ ܐ݇ܢܵܫܵܐ ܥܲܡܹܗ ܗܲܠ ܐ݇ܣܵܩܬܵܐ ܕܨܲܦܪܵܐ. 25ܟܲܕ ܚܙܹܐ ܠܹܗ ܕܚܲܝܠܹܗ ܠܹܐ ܡܵܛܹܐ ܒܝܼܹܗ، ܕܩܝܼܪܹܗ ܒܚܵܫܘܿܠܬܵܐ ܕܥܸܛܡܵܐ ܕܝܲܥܩܘܿܒ݂، ܘܦܠܝܼܛ ܠܵܗ̇ ܚܵܫܘܿܠܬܵܐ ܕܥܸܛܡܹܗ ܡ̣ܢ ܕܘܼܟܬܘܼܗ̇، ܟܲܕ ܗ̇ܘ ܟܬܝܼܫܵܐ ܥܲܡܹܗ. 26ܐ݇ܡܝܼܪܹܗ ܐ݇ܢܵܫܵܐ، ”ܪܲܦܝܼ ܐܸܠܝܼ، ܣܵܒܵܒ ܗܘܹܐ ܠܹܗ ܨܲܦܪܵܐ.“ ܐ݇ܡܝܼܪܹܗ ܝܲܥܩܘܿܒ݂، ”ܠܹܐ ܪܲܦܹܝܢܘܼܟ݂ ܗܲܠ ܕܒܲܪܟܸܬ ܠܝܼ.“ 27ܒܘܼܩܸܪܹܗ ܡܸܢܹܗ، ”ܡܘܿܕܝܼ ܝܠܹܗ ܫܸܡܘܼܟ݂؟“ ܓ̰ܘܼܘܸܒ ܠܹܗ، ”ܝܲܥܩܘܿܒ݂.“ 28ܐ݇ܡܝܼܪܹܗ، ”ܐ݇ܚܹܪ݇ܢܵܐ ܠܹܐ ܦܵܐܹܫ ܩܸܪܝܵܐ ܫܸܡܘܼܟ݂ ܝܲܥܩܘܿܒ݂، ܐܸܠܵܐ ܝܼܣܪܵܝܹܠ،#32‏:28 ܥܸܒ݂ܪܵܐܝܼܬ ܒܡܲܥܢܵܝܵܐ: ܗ̇ܘ ܕܟܵܬܹܫ ܥܲܡ ܐܲܠܵܗܵܐ ܣܵܒܵܒ ܟܬܝܼܫ ܠܘܼܟ݂ ܥܲܡ ܐܲܠܵܗܵܐ ܘܥܲܡ ܐ݇ܢܵܫܹ̈ܐ ܘܓ݂ܠܝܼܒ ܠܘܼܟ݂.“ 29ܘܒܘܼܩܸܪܹܗ ܝܲܥܩܘܿܒ݂ ܡܸܢܹܗ، ”ܡܲܕܸܥ ܠܝܼ ܫܸܡܘܼܟ݂، ܦܲܪܦܘܼܠܹܐ ܝܘܸܢ ܒܝܼܘܼܟ݂.“ ܘܐ݇ܡܝܼܪܹܗ ܠܝܲܥܩܘܿܒ݂، ”ܩܵܡܘܿܕܝܼ ܒܲܩܘܼܪܹܐ ܝܘܸܬ ܠܫܸܡܝܼ؟“ ܘܒܘܼܪܸܟ݂ ܠܹܗ ܐܸܠܹܗ ܬܵܡܵܐ. 30ܘܩܪܹܐ ܠܹܗ ܝܲܥܩܘܿܒ݂ ܫܸܡܵܐ ܕܗ̇ܝ ܕܘܼܟܵܐ ”ܦܢܘܼܐܹܝܠ،“#32‏:30 ܥܸܒ݂ܪܵܐܝܼܬ ܒܡܲܥܢܵܝܵܐ: ܦܵܬܵܐ ܕܐܲܠܵܗܵܐ ܣܵܒܵܒ ܐ݇ܡܝܼܪܹܗ، ”ܚܙܹܐ ܠܝܼ ܐܲܠܵܗܵܐ ܦܵܬܵܐ ܠܦܵܬܵܐ، ܘܦܝܼܫ ܠܵܗ̇ ܦܘܼܨܝܼܬܵܐ ܓܵܢܝܼ.“ 31ܙܪܝܼܩ ܠܹܗ ܫܸܡܫܵܐ ܥܲܠܘܼܗܝ ܟܲܕ ܗ̇ܘ ܒܸܥܒ݂ܵܪܵܐ ܡ̣ܢ ܦܢܘܼܐܹܝܠ، ܠܲܢܓܘܼܠܹܗ ܡ̣ܢ ܥܸܛܡܹܗ. 32ܒܘܼܬ ܐܵܗܵܐ، ܗܲܠ ܐܸܕܝܘܿܡ ܝܵܘܡܵܐ ܠܹܐ ܐܵܟ݂ܠܝܼ ܒܢܲܝ̈ ܝܼܣܪܵܝܹܠ ܠܘܲܪܝܼܕܵܐ ܕܢܹܟܵܐ ܕܝܼܠܹܗ ܥܲܠ ܚܵܫܘܿܠܬܵܐ ܕܥܸܛܡܵܐ، ܣܵܒܵܒ ܦܝܼܫ ܠܹܗ ܕܩܝܼܪܵܐ ܝܲܥܩܘܿܒ݂ ܒܚܵܫܘܿܠܬܵܐ ܕܥܸܛܡܹܗ ܒܘܲܪܝܼܕܵܐ ܕܢܹܟܹܗ.

Currently Selected:

ܒܪܝܬܐ 32: ABTAB

Highlight

Compare

Copy