ܒܪܝܬܐ 34
34
ܕܝܼܢܵܐ ܦܝܵܫܵܐ ܡܘܼܣܪܝܼܬܵܐ
1ܦܠܝܼܛ ܠܵܗ̇ ܕܝܼܢܵܐ، ܒܪܵܬܵܐ ܕܠܲܝܵܐ، ܕܝ݇ܠܝܼܕܬܘܼܗ̇ ܝܗ݇ܘܵܐ ܠܝܲܥܩܘܿܒ݂، ܠܸܚܙܵܝܵܐ ܒܢܵܬܹ̈ܐ ܕܐܲܪܥܵܐ؛ 2ܘܚܸܙܝܵܐ ܠܹܗ ܫܟܹܝܡ، ܒܪܘܿܢܵܐ ܕܚܡܘܿܪ ܚܵܘܵܝܵܐ، ܓܘܼܪܵܐ ܕܗ̇ܝ ܐܲܪܥܵܐ، ܘܫܩܝܼܠܵܐ ܠܹܗ، ܘܕܡܝܼܟ݂ ܠܹܗ ܥܲܡܘܼܗ̇، ܘܟ̰ܘܼܦܠܸܢܵܐ ܠܹܗ. 3ܘܐ݇ܙܝܼܠ ܠܹܗ ܠܸܒܹܗ ܒܵܬ݇ܪ ܕܝܼܢܵܐ ܒܪܵܬܵܐ ܕܝܲܥܩܘܿܒ݂. ܡܘܼܚܸܒܵܐ ܠܹܗ ܚܵܡܬܵܐ، ܘܗܘܼܡܙܸܡ ܠܹܗ ܒܒܲܣܝܼܡܘܼܬܵܐ ܥܲܡܘܼܗ̇. 4ܘܐ݇ܡܝܼܪܹܗ ܫܟܹܝܡ ܠܚܡܘܿܪ ܒܵܒܘܼܗܝ، ”ܛܠܘܿܒ ܠܵܗ̇ ܐܵܗܵܐ ܒܪܵܬܵܐ ܕܗܵܘܝܵܐ ܒܲܟ݂ܬܵܐ ܐܸܠܝܼ.“
5ܫܡܝܼܥ ܠܹܗ ܝܲܥܩܘܿܒ݂ ܕܟ̰ܘܼܦܠܸܢܵܐ ܠܹܗ ܕܝܼܢܵܐ ܒܪܵܬܹܗ؛ ܐܝܼܢܵܐ ܟܲܕ ܒܢܘܿܢܘܼ̈ܗܝ ܥܲܡ ܪܸܣܩܵܐ ܝܗ݇ܘܵܘ ܒܕܸܫܬܵܐ، ܫܬܝܼܩ ܠܹܗ ܝܲܥܩܘܿܒ݂ ܗܲܠ ܕܐ݇ܬܹܐ ܠܗܘܿܢ. 6ܦܠܝܼܛ ܠܹܗ ܚܡܘܿܪ ܒܵܒܵܐ ܕܫܟܹܝܡ ܠܟܸܣ ܝܲܥܩܘܿܒ݂ ܠܗܲܡܙܘܼܡܹܐ ܥܲܡܹܗ. 7ܘܒܢܘܿܢܹ̈ܐ ܕܝܲܥܩܘܿܒ݂ ܐ݇ܬܹܐ ܠܗܘܿܢ ܡ̣ܢ ܕܸܫܬܵܐ ܒܗ̇ܝ ܥܕܵܢܵܐ ܕܫܡܝܼܥ ܠܗܘܿܢ ܒܘܼܬ ܐܵܗܵܐ، ܘܟܪܝܼܒ ܠܗܘܿܢ ܘܚܝܼܡ ܠܵܗ̇ ܐܸܠܲܝܗܝ ܪܵܒܵܐ ܒܘܼܬ ܟ̰ܲܦܵܠܘܼܬܵܐ ܕܥܒ݂ܝܼܕ ܠܹܗ ܫܟܹܝܡ ܓܵܘ ܝܼܣܪܵܝܹܠ، ܕܕܡܝܼܟ݂ ܠܹܗ ܥܲܡ ܒܪܵܬܵܐ ܕܝܲܥܩܘܿܒ݂، ܒܗ̇ܝ ܕܗܲܕܟ݂ܵܐ ܡܸܢܕܝܼ ܘܵܠܹܐ ܕܠܵܐ ܦܵܐܹܫ ܗ݇ܘܵܐ ܥܒ݂ܝܼܕܵܐ. 8ܗܘܼܡܙܸܡ ܠܹܗ ܥܲܡܲܝܗܝ ܚܡܘܿܪ، ܒܹܐܡܵܪܵܐ، ”ܢܦܝܼܠܵܐ ܝܠܹܗ ܒܚܘܼܒܵܐ ܒܪܘܿܢܝܼ ܫܟܹܝܡ ܥܲܡ ܒܪܵܬܵܘܟ݂ܘܿܢ. ܦܲܪܦܘܼܠܹܐ ܝܘܸܢ ܒܝܼܵܘܟ݂ܘܿܢ ܕܝܵܗ݇ܒ݂ܝܼܬܘܿܢ ܠܵܗ̇ ܐܸܠܹܗ ܠܒܲܟ݂ܬܵܐ. 9ܥܒ݂ܘܿܕܘܼܢ ܚܸܙܡܵܝܘܼܬܵܐ ܥܲܡܲܢ؛ ܗܲܒ݂݇ܠܘܼܢ ܒܢܵܬܵܘ̈ܟ݂ܘܿܢ ܐܸܠܲܢ، ܘܫܩܘܿܠܘܼܢ ܒܢܵܬܲܢ̈ ܐܸܠܵܘܟ݂ܘܿܢ. 10ܐܲܚܬܘܿܢ ܒܸܬ ܝܵܬܒ݂ܝܼܬܘܿܢ ܥܲܡܲܢ؛ ܘܐܲܪܥܵܐ ܦܬܝܼܚܬܵܐ ܝܠܵܗ̇ ܩܵܕ݇ܡܵܘܟ݂ܘܿܢ؛ ܝ݇ܬܘܿܒ݂ܘܼܢ، ܘܙܒ݂ܘܿܢܘܼܢ ܘܙܲܒܢܘܼܢ ܓܵܘܘܼܗ̇، ܘܗܵܘܝܵܐ ܐܸܠܵܘܟ݂ܘܿܢ ܠܝܵܪܬܘܼܬܵܐ.“ 11ܘܐ݇ܡܝܼܪܹܗ ܫܟܹܝܡ ܠܒܵܒܘܼܗ̇ ܘܠܐܲܚܘܿܢܘܵܬܘܼ̈ܗ̇، ”ܫܒ݂ܘܿܩܘܼܢ ܠܝܼ ܕܡܲܫ݇ܟ̰ܚܸܢ ܫܵܦܵܩܲܬ ܒܥܲܝܢܵܘ̈ܟ݂ܘܿܢ، ܘܡܸܢܕܝܼ ܕܛܵܠܒܝܼܬܘܿܢ ܡܸܢܝܼ ܒܸܬ ܝܵܗ݇ܒܹܢ ܐܸܠܵܘܟ݂ܘܿܢ. 12ܛܠܘܿܒܘܼܢ ܡܸܢܝܼ ܢܸܓܕܵܐ ܘܡܵܘܗܲܒ݂ܬܵܐ ܒܘܼܫ ܙܵܘܕܵܐ، ܘܒܸܬ ܝܵܗ݇ܒܹܢ ܕܵܐܟ݂ܝܼ ܕܛܵܠܒܝܼܬܘܿܢ، ܐܲܚܟ̰ܝܼ ܗܲܒ݂݇ܠܘܼܢ ܐܸܠܝܼ ܚܵܡܬܵܐ ܠܒܲܟ݂ܬܵܐ.“
13ܓ̰ܘܼܘܸܒ ܠܗܘܿܢ ܒܢܘܿܢܹ̈ܐ ܕܝܲܥܩܘܿܒ݂ ܠܫܟܹܝܡ ܘܠܚܡܘܿܪ ܒܵܒܘܼܗܝ ܒܦܸܠܡܵܐ، ܣܵܒܵܒ ܟ̰ܘܼܦܠܸܢܵܐ ܝܗ݇ܘܵܐ ܠܕܝܼܢܵܐ ܚܵܬܲܝܗܝ. 14ܐ݇ܡܝܼܪܗܘܿܢ ܐܸܠܲܝܗܝ، ”ܠܹܐ ܡܵܨܲܚ ܥܵܒ݂ܕܲܚ ܐܵܗܵܐ ܫܘܼܠܵܐ، ܕܝܵܗ݇ܒܲܚ ܚܵܬܲܢ ܠܚܲܕ ܕܠܹܐ ܝܠܹܗ ܓܙܝܼܪܵܐ، ܣܵܒܵܒ ܒܸܬ ܗܵܘܹܐ ܠܵܘܡܵܐ ܐܸܠܲܢ. 15ܐܲܚܟ̰ܝܼ ܒܐܵܗܵܐ ܒܸܬ ܣܲܙܓܸܪܲܚ ܥܲܡܵܘܟ݂ܘܿܢ، ܐܸܢ ܗܵܘܹܐ ܝܬܘܿܢ ܐܲܝܟ݂ ܕܝܼܲܢ، ܘܓܵܙܪܝܼܬܘܿܢ ܟܠ ܐܘܼܪܙܵܐ ܓܵܘܵܘܟ݂ܘܿܢ. 16ܗ̇ܝܓܵܗ ܒܸܬ ܝܵܗ݇ܒܲܚ ܒܢܵܬܲܢ̈ ܐܸܠܵܘܟ݂ܘܿܢ، ܘܫܵܩܠܲܚ ܒܢܵܬܵܘ̈ܟ݂ܘܿܢ ܐܸܠܲܢ؛ ܘܒܸܬ ܝܵܬܒܲܚ ܥܲܡܵܘܟ݂ܘܿܢ، ܘܒܸܬ ܗܵܘܲܚ ܚܲܕ ܥܲܡܵܐ. 17ܐܝܼܢܵܐ ܐܸܢ ܠܵܐ ܫܵܡܥܝܼܬܘܿܢ ܐܸܠܲܢ ܘܦܵܝܫܝܼܬܘܿܢ ܓܙܝܼܪܹܐ، ܒܸܬ ܫܵܩܠܲܚ ܒܪܵܬܲܢ ܘܒܸܬ ܐܵܙܲܠ݇ܚ.“ 18ܫܦܝܼܪܗܘܿܢ ܗܹܡܸܙܡܵܢܲܝ̈ܗܝ ܒܠܸܒܵܐ ܕܚܡܘܿܪ ܘܒܠܸܒܵܐ ܕܫܟܹܝܡ ܒܪܘܿܢܵܐ ܕܚܡܘܿܪ، 19ܘܠܵܐ ܥܘܼܪܩܸܠ ܠܹܗ ܥܠܲܝܡܵܐ ܡ̣ܢ ܠܸܥܒ݂ܵܕܵܐ ܐܵܗܵܐ ܫܘܼܠܵܐ، ܣܵܒܵܒ ܒܣܝܼܡ ܠܵܗ̇ ܠܹܗ ܒܒܪܵܬܵܐ ܕܝܲܥܩܘܿܒ݂؛ ܗ̇ܘ ܒܘܼܫ ܡܝܘܼܩܪܵܐ ܝܗ݇ܘܵܐ ܡ̣ܢ ܟܠܹܗ ܒܲܝܬܵܐ ܕܒܵܒܘܼܗܝ. 20ܘܐ݇ܬܹܐ ܠܗܘܿܢ ܚܡܘܿܪ ܘܫܟܹܝܡ ܒܪܘܿܢܹܗ ܠܬܲܪܥܵܐ ܕܡܕܝܼܢ݇ܬܵܐ، ܘܗܘܼܡܙܸܡ ܠܗܘܿܢ ܥܲܡ ܐ݇ܢܵܫܹ̈ܐ ܕܡܕܝܼܢ݇ܬܲܝܗܝ ܒܹܐܡܵܪܵܐ، 21”ܐܲܢܹܐ ܐ݇ܢܵܫܹ̈ܐ ܒܫܠܵܡܵܐ ܝܢܵܐ ܥܲܡܲܢ؛ ܫܒ݂ܘܿܩܘܼܢ ܕܝܵܬܒ݂ܝܼ ܓܵܘ ܐܵܗܵܐ ܐܲܪܥܵܐ، ܙܵܒ݂ܢܝܼ ܘܙܲܒܢܝܼ ܓܵܘܘܼܗ̇؛ ܒܗ̇ܝ ܕܐܲܪܥܵܐ ܪܘܝܼܚܬܵܐ ܝܠܵܗ̇ ܩܵܕ݇ܡܲܝܗܝ. ܫܵܩܠܲܚ ܠܒܢܵܬܲܝ̈ܗܝ ܒܲܟ݂ܬܵܬܹ̈ܐ ܐܸܠܲܢ ܘܝܵܗ݇ܒܲܚ ܒܢܵܬܲܢ̈ ܐܸܠܲܝܗܝ. 22ܐܲܚܟ̰ܝܼ ܒܐܵܗܵܐ ܒܸܬ ܣܲܙܓܸܪܝܼ ܐܲܢܹܐ ܐ݇ܢܵܫܹ̈ܐ ܕܝܵܬܒ݂ܝܼ ܥܲܡܲܢ ܕܗܵܘܲܚ ܚܲܕ ܥܲܡܵܐ: ܕܦܵܐܹܫ ܓܙܝܼܪܵܐ ܓܵܘܲܢ ܟܠ ܐܘܼܪܙܵܐ، ܕܵܐܟ݂ܝܼ ܕܐܵܢܝܼ ܓܙܝܼܪܹܐ ܝܢܵܐ. 23ܗܵܐ، ܠܹܐ ܗܵܘܝܼ ܕܝܼܲܢ ܩܸܢܝܵܢܲܝܗܝ، ܘܡܸܢܕܝܼܲܝܗܝ، ܘܟܠܹܗ ܪܸܣܩܲܝܗܝ؟ ܐܲܚܟ̰ܝܼ ܣܲܙܓܸܪܲܚ ܥܲܡܲܝܗܝ، ܘܒܸܬ ܝܵܬܒ݂ܝܼ ܠܟܸܣ ܠܲܢ.“ 24ܘܫܡܝܼܥ ܠܗܘܿܢ ܠܚܡܘܿܪ ܘܠܫܟܹܝܡ ܒܪܘܿܢܹܗ ܟܠܲܝܗܝ ܐ݇ܢܵܫܹ̈ܐ ܕܡܕܝܼܢ݇ܬܵܐ؛ ܘܦܝܼܫ ܠܗܘܿܢ ܓܙܝܼܪܹ̈ܐ ܟܠܲܝܗܝ ܐܘܼܪ̈ܙܹܐ ܕܡܕܝܼܢ݇ܬܵܐ.
ܒܢܘܿܢܹ̈ܐ ܕܝܲܥܩܘܿܒ݂ ܒܸܩܛܵܠܵܐ ܐ݇ܢܵܫܹ̈ܐ ܕܫܟܹܝܡ
25ܗܘܹܐ ܠܹܗ ܒܝܵܘܡܵܐ ܕܬܠܵܬܵܐ، ܗܹܫ ܐ݇ܢܵܫܹ̈ܐ ܠܵܐ ܒܣܝܼܡܹܐ ܡ̣ܢ ܓܙܘܼܪܬܵܐ، ܬܪܹܝ ܒܢܘܿܢܹ̈ܐ ܕܝܲܥܩܘܿܒ݂، ܫܸܡܥܘܿܢ ܘܠܹܘܝܼ، ܐܲܚܘܿܢܘܵܬܹ̈ܐ ܕܕܝܼܢܵܐ، ܫܩܝܼܠ ܠܗܘܿܢ ܣܲܝܦܲܝ̈ܗܝ ܘܐ݇ܬܹܐ ܠܗܘܿܢ ܥܲܠ ܡܕܝܼܢ݇ܬܵܐ ܡܸܢܫܸܠܬܵܢܹܐ، ܘܩܛܝܼܠ ܠܗܘܿܢ ܠܟܠ ܐܘܼܪܙܵܐ. 26ܘܩܛܝܼܠ ܠܗܘܿܢ ܠܚܡܘܿܪ ܘܠܫܟܹܝܡ ܒܪܘܿܢܹܗ ܒܣܲܝܦܵܐ، ܘܫܩܝܼܠ ܠܗܘܿܢ ܠܕܝܼܢܵܐ ܡ̣ܢ ܒܲܝܬܵܐ ܕܫܟܹܝܡ ܘܦܠܝܼܛ ܠܗܘܿܢ. 27ܗ̇ܝܓܵܗ ܐ݇ܬܹܐ ܠܗܘܿܢ ܒܢܘܿܢܹ̈ܐ ܕܝܲܥܩܘܿܒ݂ ܥܲܠ ܩܛܝܼܠܹ̈ܐ، ܘܣܠܝܼܒ ܠܗܘܿܢ ܠܡܕܝܼܢ݇ܬܵܐ، ܣܵܒܵܒ ܚܵܬܲܝܗܝ ܦܝܼܫܬܵܐ ܝܗ݇ܘܵܐ ܟ̰ܘܼܦܠܸܢܬܵܐ. 28ܫܩܝܼܠ ܠܗܘܿܢ ܠܦܸܣܩܲܝܗܝ، ܘܠܒܸܩܪ̈ܵܬܲܝܗܝ، ܘܠܚܡܵܪ̈ܲܝܗܝ، ܘܠܟܠ ܡܸܢܕܝܼ ܕܐܝܼܬ ܗ݇ܘܵܐ ܒܡܕܝܼܢ݇ܬܵܐ، ܘܠܟܠ ܕܐܝܼܬ ܗ݇ܘܵܐ ܒܕܸܫܬܵܐ، 29ܘܠܟܠܹܗ ܥܘܼܬܪܲܝܗܝ؛ ܘܠܟܠܲܝܗܝ ܝܵܠܵܕ݇ܝ̈ܗܝ ܘܠܒܲܟ݂ܬܵܬܲܝ̈ܗܝ ܠܘܼܒܠܲܝ ܠܗܘܿܢ ܐܲܣܝܼܪܹ̈ܐ؛ ܘܣܠܝܼܒ ܠܗܘܿܢ ܠܟܠ ܡܸܢܕܝܼ ܕܝܼܗ݇ܘܵܐ ܓܵܘ ܒܲܝܬܵܐ. 30ܘܐ݇ܡܝܼܪܹܗ ܝܲܥܩܘܿܒ݂ ܠܫܸܡܥܘܿܢ ܘܠܹܘܝܼ، ”ܚܘܼܙܕܸܓ ܠܵܘܟ݂ܘܿܢ ܐܸܠܝܼ، ܘܥܒ݂ܝܼܕ ܠܵܘܟ݂ܘܿܢ ܐܸܠܝܼ ܐܲܝܟ݂ ܚܲܕ ܐ݇ܢܵܫܵܐ ܚܡܝܼܩܵܐ ܓܵܘ ܝܵܬܒ݂ܵܢܹ̈ܐ ܕܐܲܪܥܵܐ، ܓܵܘ ܟܢܲܥܢܵܝܹ̈ܐ ܘܦܲܪ̈ܙܵܝܹܐ؛ ܐܵܢܵܐ ܒܵܨܘܿܪܵܐ ܝܘܸܢ ܒܡܸܢܝܵܢܵܐ، ܒܸܬ ܓ̰ܵܡܥܝܼ ܥܲܠܝܼ ܘܒܸܬ ܡܵܚܝܼ ܠܝܼ، ܘܒܸܬ ܦܵܝܫܹܢ ܛܘܼܠܩܵܐ، ܐܵܢܵܐ ܘܒܲܝܬܝܼ.“ 31ܓ̰ܘܼܘܸܒ ܠܗܘܿܢ، ”ܕܵܐܟ݂ܝܼ! ܐܲܝܟ݂ ܙܵܢܝܼܬܵܐ ܥܵܒܹܕ ܠܵܗ̇ ܚܵܬܲܢ؟“
Currently Selected:
ܒܪܝܬܐ 34: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
