ܒܪܝܬܐ 35
35
ܝܲܥܩܘܿܒ݂ ܒܸܒܢܵܝܵܐ ܡܲܕܒܚܵܐ ܓܵܘ ܒܹܝܬ ܐܹܝܠ
1ܐ݇ܡܝܼܪܹܗ ܐܲܠܵܗܵܐ ܠܝܲܥܩܘܿܒ݂، ”ܩܘܼܡ ܐ݇ܣܘܿܩ ܠܒܹܝܬ ܐܹܝܠ، ܘܝ݇ܬܘܿܒ݂ ܬܵܡܵܐ، ܘܥܒ݂ܘܿܕ ܬܵܡܵܐ ܡܲܕܒܚܵܐ ܠܐܲܠܵܗܵܐ ܕܦܝܼܫ ܠܹܗ ܚܸܙܝܵܐ ܐܸܠܘܼܟ݂ ܐܝܼܡܲܢ ܕܥܪܝܼܩ ܠܘܼܟ݂ ܡ̣ܢ ܩܵܕ݇ܡ ܥܹܣܘܿ ܐܲܚܘܿܢܘܼܟ݂.“ 2ܘܐ݇ܡܝܼܪܹܗ ܝܲܥܩܘܿܒ݂ ܠܒܢܲܝ̈ ܒܲܝܬܹܗ ܘܠܟܠܲܝܗܝ ܕܝܼܗ݇ܘܵܘ ܥܲܡܹܗ، ”ܪܲܦܸܝܡܘܼܢ ܐܲܠܵܗܹ̈ܐ ܢܘܼܟ݂ܪ̈ܵܝܹܐ ܕܝܼܢܵܐ ܓܵܘܵܘܟ݂ܘܿܢ، ܘܕܲܟܸܝܡܘܼܢ ܓܵܢܵܬܵܘ̈ܟ݂ܘܿܢ، ܘܫܲܚܠܸܦܘܼܢ ܓ̰ܘܼܠܵܘ̈ܟ݂ܘܿܢ؛ 3ܘܩܵܝܡܲܚ ܘܐܵܣܩܲܚ ܠܒܹܝܬ ܐܹܝܠ، ܘܒܸܬ ܥܵܒ݂ܕܹܢ ܬܵܡܵܐ ܡܲܕܒܚܵܐ ܠܐܲܠܵܗܵܐ ܕܓ̰ܘܼܘܸܒ ܠܹܗ ܐܸܠܝܼ ܒܝܵܘܡܵܐ ܕܐܘܼܠܨܵܢܝܼ، ܘܕܗܘܹܐ ܠܹܗ ܥܲܡܝܼ ܒܐܘܼܪܚܵܐ ܕܐ݇ܙܝܼܠ ܠܝܼ.“ 4ܘܝܘܼܗ݇ܒܸܠ ܠܗܘܿܢ ܠܝܲܥܩܘܿܒ݂ ܟܠܲܝܗܝ ܐܲܠܵܗܹ̈ܐ ܢܘܼܟ݂ܪ̈ܵܝܹܐ ܕܐܝܼܬ ܗ݇ܘܵܘ ܠܟܸܣ ܠܲܝܗܝ، ܘܩܢܲܫܝܵܬܹ̈ܐ ܕܝܼܗ݇ܘܵܘ ܒܢܵܬܝܵܬܲܝ̈ܗܝ، ܘܛܘܼܡܪܲܝ ܠܹܗ ܝܲܥܩܘܿܒ݂ ܬܚܘܿܬ ܒܲܠܘܼܛܵܐ ܕܝܼܗ݇ܘܵܐ ܩܘܼܪܒܵܐ ܠܫܟܹܝܡ.
5ܟܲܕ ܦܠܝܼܛ ܠܗܘܿܢ، ܘܗܘܹܐ ܠܵܗ̇ ܙܕܘܼܥܬܵܐ ܕܐܲܠܵܗܵܐ ܥܲܠ ܡܕܝܼܢܵܬܹ̈ܐ ܕܝܼܗ݇ܘܵܘ ܠܚܵܕܸܪ̈ܘܵܢܲܝܗܝ، ܘܠܵܐ ܢܦܝܼܠ ܠܗܘܿܢ ܒܵܬ݇ܪ ܒܢܘܿܢܹ̈ܐ ܕܝܲܥܩܘܿܒ݂. 6ܐ݇ܬܹܐ ܠܹܗ ܝܲܥܩܘܿܒ݂ ܠܠܘܿܙ، ܕܝܼܠܵܗ̇ ܒܹܝܬ ܐܹܝܠ، ܕܒܐܲܪܥܵܐ ܕܟܢܲܥܢ، ܗ̇ܘ ܘܟܠܹܗ ܟܸܢܫܵܐ ܕܝܼܗ݇ܘܵܐ ܥܲܡܹܗ. 7ܘܒܢܹܐ ܠܹܗ ܬܵܡܵܐ ܡܲܕܒܚܵܐ، ܘܩܪܹܐ ܠܹܗ ܠܗ̇ܝ ܕܘܼܟܵܐ، ܐܹܝܠ ܒܹܝܬ ܐܹܝܠ،#35:7 ܥܸܒ݂ܪܵܐܝܼܬ ܒܡܲܥܢܵܝܵܐ: ܐܲܠܵܗܵܐ ܕܒܹܝܬ ܐܲܠܵܗܵܐ ܣܵܒܵܒ ܬܵܡܵܐ ܦܝܼܫ ܠܹܗ ܓܸܠܝܵܐ ܐܲܠܵܗܵܐ ܐܸܠܹܗ، ܐܝܼܡܲܢ ܕܥܪܝܼܩ ܠܹܗ ܡ̣ܢ ܩܵܕ݇ܡ ܐܲܚܘܿܢܘܼܗܝ. 8ܘܡܝܼܬ ܠܵܗ̇ ܕܒ݂ܘܼܪܵܐ ܡܲܡܸܨܵܢܬܵܐ ܕܪܲܦܩܵܐ، ܘܦܝܼܫ ܠܵܗ̇ ܩܒ݂ܝܼܪܬܵܐ ܠܠܬܸܚܬ ܡ̣ܢ ܒܹܝܬ ܐܹܝܠ، ܬܚܘܿܬ ܒܲܠܘܼܛܵܐ؛ ܘܩܪܹܐ ܠܗܘܿܢ ܫܸܡܵܐ ܕܗ̇ܝ ܕܘܼܟܵܐ ”ܐܲܠܘܼܢ ܒܵܟ݂ܘܼܬ.“#35:8 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܲܠܘܼܛܵܐ ܕܒܸܟ݂ܝܵܐ
ܐܲܠܵܗܵܐ ܒܲܪܘܼܟܹܐ ܠܝܲܥܩܘܿܒ݂
9ܦܝܼܫ ܠܹܗ ܚܸܙܝܵܐ ܐܲܠܵܗܵܐ ܠܝܲܥܩܘܿܒ݂ ܡܸܢܕܪܸܫ ܟܲܕ ܐ݇ܬܹܐ ܠܹܗ ܡ̣ܢ ܦܵܕܵܢ ܐܵܪܵܡ، ܘܒܘܼܪܸܟ݂ ܠܹܗ ܐܸܠܹܗ. 10ܘܐ݇ܡܝܼܪܹܗ ܐܸܠܹܗ ܐܲܠܵܗܵܐ، ”ܫܸܡܘܼܟ݂ ܝܲܥܩܘܿܒ݂ ܝܼܠܹܗ؛ ܐ݇ܚܹܪ݇ܢܵܐ ܠܵܐ ܦܵܐܹܫ ܩܸܪܝܵܐ ܫܸܡܘܼܟ݂ ܝܲܥܩܘܿܒ݂، ܐܸܠܵܐ ܝܼܣܪܵܝܹܠ#35:10 ܥܸܒ݂ܪܵܐܝܼܬ ܒܡܲܥܢܵܝܵܐ: ܗ̇ܘ ܕܟܵܬܹܫ ܥܲܡ ܐܲܠܵܗܵܐ ܗܵܘܹܐ ܫܸܡܘܼܟ݂،“ ܘܩܪܹܐ ܠܹܗ ܫܸܡܹܗ ”ܝܼܣܪܵܝܹܠ.“ 11ܘܐ݇ܡܝܼܪܹܗ ܐܸܠܹܗ ܐܲܠܵܗܵܐ، ”ܐܵܢܵܐ ܝܘܸܢ ܐܹܝܠ ܫܲܕܲܝ.#35:11 ܥܸܒ݂ܪܵܐܝܼܬ ܒܡܲܥܢܵܝܵܐ: ܐܲܠܵܗܵܐ ܚܲܝܠܬܵܢܵܐ ܦܪܝܼ ܘܙܘܼܕ؛ ܥܲܡܵܐ ܘܟܸܢܫܵܐ ܕܥܲܡܡܹ̈ܐ ܒܸܬ ܦܵܠܛܝܼ ܡܸܢܘܼܟ݂، ܘܡܲܠܟܹ̈ܐ ܡ̣ܢ ܚܲܨܘܼܟ݂ ܒܸܬ ܦܵܠܛܝܼ. 12ܐܲܪܥܵܐ ܕܝܘܼܗ݇ܒܸܠ ܠܝܼ ܠܐܲܒ݂ܪܵܗܵܡ ܘܠܐܝܼܣܚܵܩ، ܐܸܠܘܼܟ݂ ܒܸܬ ܝܵܗ݇ܒܹܢܵܗ̇، ܘܠܙܲܪܥܘܼܟ݂ ܡ̣ܢ ܒܵܬ݇ܪ ܡܸܢܘܼܟ݂ ܒܸܬ ܝܵܗ݇ܒܹܢܵܗ̇ ܐܵܗܵܐ ܐܲܪܥܵܐ.“ 13ܗ̇ܝܓܵܗ ܐ݇ܣܝܼܩ ܠܹܗ ܐܲܠܵܗܵܐ ܡ̣ܢ ܠܟܸܣ ܠܹܗ، ܒܕܘܼܟܵܐ ܕܗܘܼܡܙܸܡ ܠܹܗ ܥܲܡܹܗ. 14ܘܡܘܼܩܸܡ ܠܹܗ ܝܲܥܩܘܿܒ݂ ܩܵܝܸܡܬܵܐ ܒܕܘܼܟܵܐ ܕܗܘܼܡܙܸܡ ܠܹܗ ܥܲܡܹܗ، ܩܵܝܸܡܬܵܐ ܕܟܹܐܦܵܐ؛ ܘܫܘܼܦܸܟ݂ ܠܹܗ ܥܲܠܘܼܗ̇ ܢܘܼܩܵܝܵܐ، ܘܨܘܼܢܨܸܠ ܠܹܗ ܥܲܠܘܼܗ̇ ܡܸܫܚܵܐ. 15ܩܪܹܐ ܠܹܗ ܝܲܥܩܘܿܒ݂ ܫܸܡܵܐ ܕܗ̇ܝ ܕܘܼܟܵܐ ܕܗܘܼܡܙܸܡ ܠܹܗ ܬܵܡܵܐ ܥܲܡܹܗ ܐܲܠܵܗܵܐ ”ܒܹܝܬ ܐܹܝܠ.“#35:15 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܲܝܬܵܐ ܕܐܲܠܵܗܵܐ
ܪܵܚܹܝܠ ܗܲܨܘܼܠܹܐ ܒܸܢܝܵܡܹܝܢ
16ܫܘܼܢܹܐ ܠܗܘܿܢ ܡ̣ܢ ܒܹܝܬ ܐܹܝܠ، ܘܟܲܕ ܚܲܕ ܡܸܬܚܵܐ ܦܝܵܫܵܐ ܠܐܵܦܪܵܬ، ܢܦܝܼܠ ܠܗܘܿܢ ܚܸܒ݂ܠܹ̈ܐ ܒܪܵܚܹܝܠ، ܘܓ̰ܘܼܢܓ̰ܸܪܵܗ̇ ܒܗܵܨܲܠܬܘܼܗ̇. 17ܘܟܲܕ ܗ̇ܝ ܓ̰ܲܢܓ̰ܘܼܪܹܐ ܒܗܵܨܲܠܬܘܼܗ̇، ܐ݇ܡܝܼܪܵܗ̇ ܐܸܠܘܼܗ̇ ܚܲܝܬܵܐ، ”ܠܵܐ ܙܵܕܥܲܬܝ، ܣܵܒܵܒ ܡܸܢܕܪܸܫ ܒܸܬ ܗܵܘܹܐ ܠܵܟ݂ܝ ܒܪܘܿܢܵܐ.“ 18ܗܘܹܐ ܠܵܗ̇ ܟܲܕ ܒܸܦܠܵܛܵܐ ܝܗ݇ܘܵܐ ܓܵܢܘܼܗ̇ (ܣܵܒܵܒ ܡܝܼܬ ܠܵܗ̇)، ܩܪܹܐ ܠܵܗ̇ ܫܸܡܹܗ، ”ܒܸܢ ܐܘܿܢܝܼ؛“#35:18 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܪܘܿܢܵܐ ܕܚܲܫܝܼ ܐܝܼܢܵܐ ܒܵܒܘܼܗܝ ܩܪܹܐ ܠܹܗ ܫܸܡܹܗ، ”ܒܸܢܝܵܡܹܝܢ.“#35:18 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܪܘܿܢܵܐ ܕܝܲܡܝܼܢܵܐ
19ܟܲܕ ܡܝܼܬ ܠܵܗ̇ ܪܵܚܹܝܠ، ܦܝܼܫ ܠܵܗ̇ ܩܒ݂ܝܼܪܬܵܐ ܒܐܘܼܪܚܵܐ ܕܐܵܦܪܵܬ، ܕܝܼܠܵܗ̇ ܒܹܝܬܠܚܸܡ. 20ܘܡܘܼܩܸܡ ܠܹܗ ܝܲܥܩܘܿܒ݂ ܩܵܝܸܡܬܵܐ ܥܲܠ ܩܲܒ݂ܪܘܼܗ̇، ܕܟܹܐ ܦܵܝܫܵܐ ܝ݇ܕܝܼܥܬܵܐ ܩܵܝܸܡܬܵܐ ܕܪܵܚܹܝܠ ܗܲܠ ܐܸܕܝܘܿܡ ܝܵܘܡܵܐ. 21ܘܫܘܼܢܹܐ ܠܹܗ ܝܼܣܪܵܝܹܠ ܘܢܨܝܼܒ݂ ܠܹܗ ܡܲܫܟܢܹܗ ܠܗ̇ܘ ܓܹܒܵܐ ܕܒܘܼܪܓ̰ܵܐ ܕܥܹܕܸܪ.
ܒܢܘܿܢܹ̈ܐ ܕܝܲܥܩܘܿܒ݂
22ܟܲܕ ܝܼܣܪܵܝܹܠ ܫܸܪܝܵܐ ܝܗ݇ܘܵܐ ܒܗ̇ܝ ܐܲܪܥܵܐ، ܐ݇ܙܝܼܠ ܠܹܗ ܪܐܘܼܒܸܢ ܘܕܡܝܼܟ݂ ܠܹܗ ܥܲܡ ܒܸܠܗܵܐ، ܕܪܘܼܟ݂ܬܵܐ ܕܒܵܒܘܼܗܝ؛ ܘܫܡܝܼܥ ܠܹܗ ܝܼܣܪܵܝܹܠ.
ܐܝܼܬ ܗ݇ܘܵܐ ܠܹܗ ܝܲܥܩܘܿܒ݂ ܬܪܸܥܣܲܪ ܒܢܘܿܢܹ̈ܐ:
23ܒܢܘܿܢܹ̈ܐ ܕܠܲܝܵܐ: ܪܐܘܼܒܸܢ، ܒܘܼܟ݂ܪܵܐ ܕܝܲܥܩܘܿܒ݂، ܘܫܸܡܥܘܿܢ، ܘܠܹܘܝܼ، ܘܝܼܗܘܼܕܵܐ، ܘܐܝܼܣܵܟ݂ܵܪ. ܘܙܒ݂ܘܿܠܘܿܢ. 24ܒܢܘܿܢܹ̈ܐ ܕܪܵܚܹܝܠ: ܝܵܘܣܸܦ ܘܒܸܢܝܵܡܹܝܢ. 25ܒܢܘܿܢܹ̈ܐ ܕܒܸܠܗܵܐ ܚܹܕܲܡܬܵܐ ܕܪܵܚܹܝܠ: ܕܵܢ ܘܢܲܦ̮ܬܵܠܝܼ. 26ܒܢܘܿܢܹ̈ܐ ܕܙܸܠܦܵܐ ܚܹܕܲܡܬܵܐ ܕܠܲܝܵܐ: ܓܵܕ ܘܐܵܫܹܝܪ. ܐܲܢܹܐ ܝܢܵܐ ܒܢܘܿܢܹ̈ܐ ܕܝܲܥܩܘܿܒ݂، ܕܦܝܼܫ ܠܗܘܿܢ ܝ݇ܠܝܼܕܹܐ ܐܸܠܹܗ ܒܦܵܕܵܢ ܐܵܪܵܡ.
ܡܵܘܬܵܐ ܕܐܝܼܣܚܵܩ
27ܐ݇ܬܹܐ ܠܹܗ ܝܲܥܩܘܿܒ݂ ܠܟܸܣ ܐܝܼܣܚܵܩ ܒܵܒܘܼܗܝ ܠܡܲܡܪܹܐ، ܠܩܘܼܪܝܲܬ ܐܲܪܒܲܥ، ܕܝܼܠܵܗ̇ ܚܸܒ݂ܪܘܿܢ، ܐܲܝܟܵܐ ܕܥܡܝܼܪܗܘܿܢ ܐܲܒ݂ܪܵܗܵܡ ܘܐܝܼܣܚܵܩ. 28ܗܘܹܐ ܠܗܘܿܢ ܚܲܝܹ̈ܐ ܕܐܝܼܣܚܵܩ ܐܸܡܵܐܐ ܘܬܡܵܢܝܼ ܫܸܢܹ̈ܐ. 29ܘܣܘܼܦܝܵܐ ܠܹܗ ܪܘܼܚܹܗ ܐܝܼܣܚܵܩ ܘܡܝܼܬ ܠܹܗ، ܘܦܝܼܫ ܠܹܗ ܩܒ݂ܝܼܪܵܐ ܕܸܦܢܵܐ ܕܥܲܡܹܗ، ܣܝܼܒ݂ܵܐ ܘܣܒ݂ܝܼܥܵܐ ܕܝܵܘܡܵܢܹ̈ܐ. ܩܒ݂ܝܼܪܗܘܿܢ ܐܸܠܹܗ ܒܢܘܿܢܘܼ̈ܗܝ ܥܹܣܘܿ ܘܝܲܥܩܘܿܒ݂.
Currently Selected:
ܒܪܝܬܐ 35: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
