ܒܪܝܬܐ 48

ܝܲܥܩܘܿܒ݂ ܒܲܪܘܼܟܹܐ ܠܡܢܲܫܹܐ ܘܠܐܲܦܪܹܝܡ

1ܘܗܘܹܐ ܠܵܗ̇ ܡ̣ܢ ܒܵܬ݇ܪ ܕܐܲܢܹܐ ܡܸܢܕܝܼܵܢܹ̈ܐ، ܦܝܼܫ ܠܹܗ ܐ݇ܡܝܼܪܵܐ ܠܝܵܘܣܸܦ، ”ܗܵܐ ܒܵܒܘܼܟ݂ ܡܪܝܼܥܵܐ ܝܠܹܗ.“ ܘܫܩܝܼܠ ܠܹܗ ܠܬܸܪܘܲܝܗܝ ܒܢܘܿܢܘܼ̈ܗܝ، ܡܢܲܫܹܐ ܘܐܲܦܪܹܝܡ، ܥܲܡܹܗ، ܘܐ݇ܙܝܼܠ ܠܹܗ. 2ܘܦܝܼܫ ܠܹܗ ܐ݇ܡܝܼܪܵܐ ܠܝܲܥܩܘܿܒ݂، ”ܗܵܐ ܒܪܘܿܢܘܼܟ݂ ܝܵܘܣܸܦ ܐ݇ܬܹܐ ܠܹܗ ܠܟܸܣ ܠܘܼܟ݂.“ ܓ̰ܘܼܡܸܥ ܠܹܗ ܚܲܝܠܹܗ ܠܓܵܢܹܗ ܝܼܣܪܵܝܹܠ ܘܝ݇ܬܝܼܒ݂ ܠܹܗ ܥܲܠ ܫܘܝܼܬܵܐ. 3ܐ݇ܡܝܼܪܹܗ ܝܲܥܩܘܿܒ݂ ܠܝܵܘܣܸܦ، ”ܐܹܝܠ ܫܲܕܲܝ ܦܝܼܫ ܠܹܗ ܚܸܙܝܵܐ ܐܸܠܝܼ ܒܠܘܿܙ، ܒܐܲܪܥܵܐ ܕܟܢܲܥܢ، ܘܒܘܼܪܸܟ݂ ܠܹܗ ܐܸܠܝܼ، 4ܒܹܐܡܵܪܵܐ ܐܸܠܝܼ، ’ܗܵܐ ܐܵܢܵܐ ܒܸܬ ܡܲܦܪܸܝܢܘܼܟ݂ ܘܡܲܙܝܸܕܸܢܘܼܟ݂، ܘܒܸܬ ܥܵܒ݂ܕܹܢ ܡܸܢܘܼܟ݂ ܪܵܒܵܐ ܥܲܡܡܹ̈ܐ، ܘܒܸܬ ܝܵܗ݇ܒܹܢ ܐܵܗܵܐ ܐܲܪܥܵܐ ܠܙܲܪܥܘܼܟ݂ ܡ̣ܢ ܒܵܬ݇ܪ ܡܸܢܘܼܟ݂، ܝܵܪܬܘܼܬܵܐ ܠܥܵܠܲܡ.‘ 5ܘܐܵܕܝܼܵܐ ܬܸܪܘܲܝܗܝ ܒܢܘܿܢܘܼ̈ܟ݂ ܕܦܝܼܫ ܠܗܘܿܢ ܝ݇ܠܝܼܕܹܐ ܐܸܠܘܼܟ݂ ܒܐܲܪܥܵܐ ܕܡܸܨܪܹܝܢ ܡ̣ܢ ܩܵܕ݇ܡ ܕܐܵܬܹܝܢ ܗ݇ܘܵܐ ܠܡܸܨܪܹܝܢ، ܕܝܼܝܼ ܝܢܵܐ؛ ܐܲܦܪܹܝܡ ܘܡܢܲܫܹܐ ܕܝܼܝܼ ܝܢܵܐ، ܐܲܝܟ݂ ܪܐܘܼܒܸܢ ܘܫܸܡܥܘܿܢ ܕܕܝܼܝܼ ܝܢܵܐ. 6ܘܝܵܠܹ̈ܕ݇ܐ ܕܦܵܝܫܝܼ ܝ݇ܠܝܼܕܹܐ ܐܸܠܘܼܟ݂ ܡ̣ܢ ܒܵܬ݇ܪ ܡܸܢܲܝܗܝ ܒܸܬ ܗܵܘܝܼ ܕܝܼܘܼܟ݂؛ ܘܒܸܬ ܦܵܝܫܝܼ ܩܸܪܝܹܐ ܒܫܸܡܵܐ ܕܐܲܚܘܿܢܘܵܬܲܝ̈ܗܝ ܒܝܵܪܬܘܼܬܲܝܗܝ. 7ܒܗ̇ܝ ܕܐܝܼܡܲܢ ܕܐ݇ܬܹܐ ܠܝܼ ܡ̣ܢ ܦܵܕܵܢ، ܒܐܘܼܪܚܵܐ ܡܝܼܬ ܠܵܗ̇ ܥܲܠܝܼ ܪܵܚܹܝܠ ܒܐܲܪܥܵܐ ܕܟܢܲܥܢ، ܐܝܼܡܲܢ ܕܗܹܫ ܐܝܼܬ ܗ݇ܘܵܐ ܚܲܕ ܡܸܬܚܵܐ ܕܐܘܼܪܚܵܐ ܠܹܐܙܵܠܵܐ ܠܐܵܦܪܵܬ؛ ܘܩܒ݂ܝܼܪܵܐ ܠܝܼ ܬܵܡܵܐ ܒܐܘܼܪܚܵܐ ܠܐܵܦܪܵܬ، ܕܝܼܠܵܗ̇ ܒܹܝܬܠܚܸܡ.“

8ܐܝܼܡܲܢ ܕܚܙܹܐ ܠܹܗ ܝܼܣܪܵܝܹܠ ܠܒܢܘܿܢܹ̈ܐ ܕܝܵܘܣܸܦ ܒܘܼܩܸܪܹܗ، ”ܡܵܢܝܼ ܝܢܵܐ ܐܲܢܹܐ؟“ 9ܓ̰ܘܼܘܸܒ ܠܹܗ ܝܵܘܣܸܦ ܠܒܵܒܘܼܗܝ، ”ܐܲܢܹܐ ܒܢܘܿܢܝܼ̈ ܝܢܵܐ ܕܝܘܼܗܒܲܝ ܠܹܗ ܐܸܠܝܼ ܐܲܠܵܗܵܐ ܠܐܲܟ݂ܵܐ.“ ܐ݇ܡܝܼܪܹܗ، ”ܡܲܝܬܹܐ ܠܗܘܿܢ ܠܐܲܟ݂ܵܐ ܠܟܸܣ ܠܝܼ ܕܒܲܪܟܸܢܗܘܿܢ.“ 10ܥܲܝܢܹ̈ܐ ܕܝܼܣܪܵܝܹܠ ܝܘܼܩܪܸܢܹܐ ܝܗ݇ܘܵܘ ܡ̣ܢ ܣܲܝܒܘܼܬܵܐ، ܘܠܹܐ ܡܵܨܹܐ ܗ݇ܘܵܐ ܠܸܚܙܵܝܵܐ. ܩܘܼܪܒܸܢܲܝ ܠܹܗ ܝܵܘܣܸܦ ܠܟܸܣ ܠܹܗ؛ ܘܗ̇ܘ ܢܫܝܼܩܲܝ ܠܹܗ ܘܚܦܝܼܩܲܝ ܠܹܗ. 11ܘܐ݇ܡܝܼܪܹܗ ܝܼܣܪܵܝܹܠ ܠܝܵܘܣܸܦ، ”ܠܹܐ ܝܘܸܢ ܗ݇ܘܵܐ ܚܫܝܼܒ݂ܵܐ ܕܒܸܬ ܚܵܙܹܝܢܵܗ̇ ܦܵܬܘܼܟ݂؛ ܐܝܼܢܵܐ ܐܲܠܵܗܵܐ ܩܲܡ ܡܲܚܙܹܐ ܠܝܼ ܐܘܼܦ ܙܲܪܥܘܼܟ݂.“ 12ܘܡܘܼܩܸܡܲܝ ܠܹܗ ܝܵܘܣܸܦ ܡ̣ܢ ܥܲܠ ܒܘܼܪ̈ܟܵܟܘܼܗܝ، ܘܡܘܼܟܸܦܵܐ ܠܹܗ ܦܵܬܹܗ ܠܐܲܪܥܵܐ. 13ܗ̇ܝܓܵܗ ܫܩܝܼܠ ܠܹܗ ܝܵܘܣܸܦ ܠܬܸܪܘܲܝܗܝ، ܐܲܦܪܹܝܡ ܒܝܲܡܝܼܢܹܗ ܡ̣ܢ ܣܸܡܵܠܵܐ ܕܝܼܣܪܵܝܹܠ، ܘܡܢܲܫܹܐ ܒܣܸܡܵܠܹܗ ܡ̣ܢ ܝܲܡܝܼܢܵܐ ܕܝܼܣܪܵܝܹܠ، ܘܩܘܼܪܒܸܢܲܝ ܠܹܗ ܠܟܸܣ ܠܹܗ. 14ܐܝܼܢܵܐ ܫܘܼܚܠܸܦܲܝ ܠܹܗ ܝܼܣܪܵܝܹܠ ܐܝܼܕܵܬܹ̈ܗ، ܘܦܘܼܫܸܛ ܠܹܗ ܐܝܼܕܹܗ ܕܝܲܡܝܼܢܵܐ ܘܡܘܼܬܒ݂ܵܐ ܠܹܗ ܥܲܠ ܪܹܫܵܐ ܕܐܲܦܪܹܝܡ، ܕܝܼܗ݇ܘܵܐ ܙܥܘܿܪܵܐ، ܘܐܝܼܕܹܗ ܕܣܸܡܵܠܵܐ ܡܘܼܬܒ݂ܵܐ ܠܹܗ ܥܲܠ ܪܹܫܵܐ ܕܡܢܲܫܹܐ، ܐܵܦܸܢ ܕܡܢܲܫܹܐ ܒܘܼܟ݂ܪܵܐ ܝܗ݇ܘܵܐ. 15ܘܒܘܼܪܸܟ݂ ܠܹܗ ܠܝܵܘܣܸܦ، ܒܹܐܡܵܪܵܐ،

”ܐܲܠܵܗܵܐ، ܕܚܕܝܼܪܗܘܿܢ ܩܵܕ݇ܡܘܼܗܝ ܒܵܒܵܘܵܬܝܼ̈، ܐܲܒ݂ܪܵܗܵܡ ܘܐܝܼܣܚܵܩ،

ܐܲܠܵܗܵܐ ܕܬܘܼܪܣܝܼܵܐ ܝܠܹܗ ܐܸܠܝܼ ܡ̣ܢ ܝܵܠܕ݇ܘܼܬܝܼ ܘܗܲܠ ܐܸܕܝܘܿܡ ܝܵܘܡܵܐ،

16ܗ̇ܘ ܡܲܠܲܐܟ݂ܵܐ ܕܩܲܡ ܦܲܪܸܩ ܠܝܼ ܡ̣ܢ ܟܠܵܗ̇ ܒܝܼܫܬܵܐ، ܒܲܪܸܟ݂ ܠܝܵܠܹ̈ܕ݇ܐ؛

ܘܒܝܼܲܝܗܝ ܦܵܐܹܫ ܩܸܪܝܵܐ ܫܸܡܝܼ ܘܫܸܡܵܐ ܕܒܵܒܵܘܵܬܝܼ̈، ܐܲܒ݂ܪܵܗܵܡ ܘܐܝܼܣܚܵܩ؛

ܘܙܵܝܕܝܼ ܒܦܸܪܝܘܼܬܵܐ ܥܲܠ ܐܲܪܥܵܐ.“

17ܐܝܼܡܲܢ ܕܚܙܹܐ ܠܹܗ ܝܵܘܣܸܦ ܕܡܘܼܬܸܒ݂ ܠܹܗ ܒܵܒܘܼܗܝ ܐܝܼܕܹܗ ܕܝܲܡܝܼܢܵܐ ܥܲܠ ܪܹܫܵܐ ܕܐܲܦܪܹܝܡ، ܡܘܼܒܝܸܢܵܗ̇ ܚܸܪܒܵܐ ܒܥܲܝܢܘܼ̈ܗܝ؛ ܕܒ݂ܝܼܩ ܠܹܗ ܒܐܝܼܕܵܐ ܕܒܵܒܘܼܗܝ ܕܫܲܢܹܐ ܗ݇ܘܵܐ ܠܵܗ̇ ܡ̣ܢ ܪܹܫܵܐ ܕܐܲܦܪܹܝܡ ܥܲܠ ܪܹܫܵܐ ܕܡܢܲܫܹܐ. 18ܘܐ݇ܡܝܼܪܹܗ ܠܒܵܒܘܼܗܝ، ”ܠܵܐ ܗܲܕܟ݂ܵܐ، ܒܵܒܝܼ، ܣܵܒܵܒ ܐܵܗܵܐ ܝܠܹܗ ܒܘܼܟ݂ܪܵܐ. ܡܲܬܸܒ݂ ܐܝܼܕܘܼܟ݂ ܕܝܲܡܝܼܢܵܐ ܥܲܠ ܪܹܫܹܗ.“ 19ܐܝܼܢܵܐ ܡܘܼܚܦܸܠ ܠܹܗ ܒܵܒܘܼܗܝ، ܘܐ݇ܡܝܼܪܹܗ، ”ܒܝܼܕܵܥܵܐ ܝܘܸܢ، ܒܪܘܿܢܝܼ، ܒܝܼܕܵܥܵܐ ܝܘܸܢ؛ ܐܘܼܦ ܗ̇ܘ ܒܸܬ ܗܵܘܹܐ ܥܲܡܵܐ، ܘܒܸܬ ܓܲܪܘܸܣ؛ ܐܝܼܢܵܐ ܐܲܚܘܿܢܘܼܗܝ ܙܥܘܿܪܵܐ ܒܸܬ ܗܵܘܹܐ ܒܘܼܫ ܓܘܼܪܵܐ ܡܸܢܹܗ، ܘܙܲܪ̈ܥܘܼܗܝ ܒܸܬ ܗܵܘܝܼ ܥܲܡܡܹ̈ܐ ܦܸܪܝܹܐ.“ 20ܒܘܼܪܟܲܝ ܠܹܗ ܒܗ̇ܘ ܝܵܘܡܵܐ، ܒܹܐܡܵܪܵܐ، ”ܒܝܼܘܼܟ݂ ܒܸܬ ܒܲܪܟ݂ܝܼ ܒܢܲܝ̈ ܝܼܣܪܵܝܹܠ ܚܲܕ ܠܗ̇ܘ ܐ݇ܚܹܪ݇ܢܵܐ، ܒܹܐܡܵܪܵܐ، ’ܥܵܒܹܕ ܠܘܼܟ݂ ܐܲܠܵܗܵܐ ܐܲܝܟ݂ ܐܲܦܪܹܝܡ ܘܐܲܝܟ݂ ܡܢܲܫܹܐ.‘“ ܗܲܕܟ݂ܵܐ ܡܘܼܬܸܒ݂ ܠܹܗ ܠܐܲܦܪܹܝܡ ܡ̣ܢ ܩܵܕ݇ܡ ܡܢܲܫܹܐ. 21ܗ̇ܝܓܵܗ ܐ݇ܡܝܼܪܹܗ ܝܼܣܪܵܝܹܠ ܠܝܵܘܣܸܦ، ”ܗܵܐ ܐܵܢܵܐ ܒܸܡܝܵܬܵܐ ܝܘܸܢ، ܐܝܼܢܵܐ ܐܲܠܵܗܵܐ ܒܸܬ ܗܵܘܹܐ ܥܲܡܵܘܟ݂ܘܿܢ، ܘܒܸܬ ܡܲܕܸܪܵܘܟ݂ܘܿܢ ܠܐܲܪܥܵܐ ܕܒܵܒܵܘܵܬܵܘ̈ܟ݂ܘܿܢ. 22ܘܗܵܐ ܐܵܢܵܐ ܝܘܼܗ݇ܒܸܠ ܠܝܼ ܐܸܠܘܼܟ݂ ܣܵܗܡܵܐ ܒܘܼܫ ܓܘܼܪܵܐ ܡ̣ܢ ܕܝܘܼܗ݇ܒܸܠ ܠܝܼ ܠܐܲܚܘܿܢܘܵܬܘܼ̈ܟ݂، ܣܵܗܡܵܐ ܕܫܩܝܼܠ ܠܝܼ ܡ̣ܢ ܐܝܼܕܵܐ ܕܐܵܡܘܿܪ̈ܵܝܹܐ ܒܣܲܝܦܝܼ ܘܒܩܸܫܬܝܼ.“

Currently Selected:

ܒܪܝܬܐ 48: ABTAB

Highlight

Copy

Compare