ܒܪܝܬܐ 47

ܝܵܘܣܸܦ ܡܲܕܘܼܥܹܐ ܒܵܒܘܼܗܝ ܘܐܲܚܘܿܢܘܵܬܹ̈ܗ ܠܦܸܪܥܘܿܢ

1ܐ݇ܬܹܐ ܠܹܗ ܝܵܘܣܸܦ ܠܟܸܣ ܦܸܪܥܘܿܢ ܘܐ݇ܡܝܼܪܹܗ ܐܸܠܹܗ، ”ܒܵܒܝܼ ܘܐܲܚܘܿܢܘܵܬܝܼ̈، ܥܲܡ ܦܸܣܩܲܝ̈ܗܝ ܘܒܸܩܪ̈ܵܬܲܝܗܝ، ܘܟܠ ܡܸܢܕܝܼ ܕܐܝܼܬ ܠܗܘܿܢ، ܐ݇ܬܝܼܹܐ ܝܢܵܐ ܡ̣ܢ ܐܲܪܥܵܐ ܕܟܢܲܥܢ، ܘܐܵܕܝܼܵܐ ܒܐܲܪܥܵܐ ܕܓܹܫܵܢ ܝܼܢܵܐ.“ 2ܘܡ̣ܢ ܐܲܚܘܿܢܘܵܬܹ̈ܗ ܫܩܝܼܠ ܠܹܗ ܚܲܡܸܫ ܓܵܢܵܬܹ̈ܐ ܘܡܘܼܟܠܝܼܲܝ ܠܹܗ ܩܵܕ݇ܡ ܦܸܪܥܘܿܢ. 3ܒܘܼܩܸܪܹܗ ܦܸܪܥܘܿܢ ܡ̣ܢ ܐܲܚܘܿܢܘܵܬܹ̈ܐ ܕܝܵܘܣܸܦ، ”ܡܘܿܕܝܼ ܝܠܹܗ ܫܘܼܠܵܘܟ݂ܘܿܢ؟“ ܓ̰ܘܼܘܸܒ ܠܗܘܿܢ، ”ܪܹ̈ܓܵܘܵܬܘܼܟ݂ ܡܲܪ̈ܥܝܼܵܢܹܐ ܕܥܸܪ̈ܒܹܐ ܝܢܵܐ، ܐܲܝܟ݂ ܕܝܼܗ݇ܘܵܘ ܒܵܒܵܘܵܬܲܢ̈.“ 4ܘܐ݇ܡܝܼܪܗܘܿܢ ܠܦܸܪܥܘܿܢ، ”ܐ݇ܬܝܼܹܐ ܝܘܲܚ ܠܸܥܡܵܪܵܐ ܒܐܵܗܵܐ ܐܲܪܥܵܐ، ܣܵܒܵܒ ܠܲܝܬ ܡܲܪܸܥܝܵܐ ܒܐܲܪܥܵܐ ܕܟܢܲܥܢ ܩܵܐ ܦܸܣܩܵܐ ܕܐܝܼܬ ܠܗܘܿܢ ܪܹ̈ܓܵܘܵܬܘܼܟ݂، ܣܵܒܵܒ ܟܸܦܢܵܐ ܝܲܩܘܼܪܵܐ ܝܠܹܗ ܬܵܡܵܐ. ܘܐܵܕܝܼܵܐ ܦܲܪܦܘܼܠܹܐ ܝܘܲܚ ܒܝܼܘܼܟ݂، ܫܒ݂ܘܿܩ ܠܪܹ̈ܓܵܘܵܬܘܼܟ݂ ܝܵܬܒ݂ܝܼ ܒܐܲܪܥܵܐ ܕܓܹܫܵܢ.“ 5ܘܐ݇ܡܝܼܪܹܗ ܦܸܪܥܘܿܢ ܠܝܵܘܣܸܦ، ”ܒܵܒܘܼܟ݂ ܘܐܲܚܘܿܢܘܵܬܘܼ̈ܟ݂ ܐ݇ܬܝܼܹܐ ܝܢܵܐ ܠܟܸܣ ܠܘܼܟ݂. 6ܐܲܪܥܵܐ ܕܡܸܨܪܹܝܢ ܩܵܕ݇ܡܘܼܟ݂ ܝܼܠܵܗ̇؛ ܡܲܬܸܒ݂ ܠܒܵܒܘܼܟ݂ ܘܠܐܲܚܘܿܢܘܵܬܘܼ̈ܟ݂ ܒܣܵܗܡܵܐ ܒܘܼܫ ܨܦܵܝܝܼ ܕܐܲܪܥܵܐ؛ ܫܒ݂ܘܿܩ ܕܝܵܬܒ݂ܝܼ ܒܐܲܪܥܵܐ ܕܓܹܫܵܢ؛ ܘܐܸܢ ܝܵܕܥܹܬ ܐܝܼܬ ܓܵܘܲܝܗܝ ܐ݇ܢܵܫܹ̈ܐ ܡܵܨܝܵܢܹ̈ܐ، ܡܲܬܸܒ݂ ܠܗܘܿܢ ܡܕܲܒܪ̈ܵܢܹܐ ܥܲܠ ܪܸܣܩܵܐ ܕܐܵܢܵܐ ܐܝܼܬ ܠܝܼ.“

7ܗ̇ܝܓܵܗ ܡܘܼܐܬܹܐ ܠܹܗ ܝܵܘܣܸܦ ܠܝܲܥܩܘܿܒ݂ ܒܵܒܘܼܗܝ ܘܡܘܼܟܠܹܐ ܠܹܗ ܩܵܕ݇ܡ ܦܸܪܥܘܿܢ، ܘܒܘܼܪܸܟ݂ ܠܹܗ ܝܲܥܩܘܿܒ݂ ܠܦܸܪܥܘܿܢ. 8ܒܘܼܩܸܪܹܗ ܦܸܪܥܘܿܢ ܡ̣ܢ ܝܲܥܩܘܿܒ݂، ”ܟܡܵܐ ܫܸܢܹ̈ܐ ܐܝܼܬ ܠܘܼܟ݂؟“ 9ܓ̰ܘܼܘܸܒ ܠܹܗ ܝܲܥܩܘܿܒ݂ ܠܦܸܪܥܘܿܢ ”ܚܲܝܹ̈ܐ ܕܡܵܫܵܚܲܛܘܼܬܝܼ ܐܸܡܵܐܐ ܘܬܠܵܬܝܼ ܫܸܢܹ̈ܐ ܝܢܵܐ؛ ܫܸܢܹ̈ܐ ܕܚܲܝܝܼ̈ ܗܘܝܼܹܐ ܝܢܵܐ ܒܵܨܘܿܪܹ̈ܐ ܘܣܸܪ̈ܝܹܐ، ܘܠܵܐ ܡܛܹܐ ܠܗܘܿܢ ܠܡܸܬܚܵܐ ܕܫܸܢܹ̈ܐ ܕܚܲܝܹ̈ܐ ܕܒܵܒܵܘܵܬܝܼ̈ ܒܝܵܘܡܵܢܹ̈ܐ ܕܡܵܫܵܚܲܛܘܼܬܲܝܗܝ.“ 10ܘܒܘܼܪܸܟ݂ ܠܹܗ ܝܲܥܩܘܿܒ݂ ܠܦܸܪܥܘܿܢ، ܘܦܠܝܼܛ ܠܹܗ ܡ̣ܢ ܩܵܕ݇ܡܘܼܗܝ. 11ܘܡܘܼܬܸܒ݂ ܠܹܗ ܝܵܘܣܸܦ ܠܒܵܒܘܼܗܝ ܘܠܐܲܚܘܿܢܘܵܬܹ̈ܗ، ܘܝܘܼܗ݇ܒܸܠ ܠܹܗ ܐܸܠܲܝܗܝ ܣܵܗܡܵܐ ܒܐܲܪܥܵܐ ܕܡܸܨܪܹܝܢ، ܣܵܗܡܵܐ ܒܘܼܫ ܨܦܵܝܝܼ ܒܐܲܪܥܵܐ ܕܪܲܥܡܣܝܼܣ، ܐܲܝܟ݂ ܕܦܩܝܼܕ ܠܹܗ ܦܸܪܥܘܿܢ. 12ܘܬܘܼܪܣܹܐ ܠܹܗ ܝܵܘܣܸܦ ܠܒܵܒܘܼܗܝ ܘܠܐܲܚܘܿܢܘܵܬܹ̈ܗ، ܘܠܟܠܹܗ ܒܲܝܬܵܐ ܕܒܵܒܘܼܗܝ ܒܠܲܚܡܵܐ، ܐܲܝܟ݂ ܡܸܢܝܵܢܵܐ ܕܒܲܝܬܘܼܬܲܝܗܝ.

ܝܵܘܣܸܦ ܒܸܙܒ݂ܵܢܵܐ ܐܲܪ̈ܥܵܬܹܐ ܕܡܸܨܪܹܝܢ ܩܵܐ ܦܸܪܥܘܿܢ

13ܠܲܝܬ ܗ݇ܘܵܐ ܠܲܚܡܵܐ ܓܵܘ ܟܠܵܗ̇ ܐܲܪܥܵܐ، ܣܵܒܵܒ ܟܸܦܢܵܐ ܝܲܩܘܼܪܵܐ ܝܗ݇ܘܵܐ ܪܵܒܵܐ، ܘܢܘܝܼܠ ܠܵܗ̇ ܐܲܪܥܵܐ ܕܡܸܨܪܹܝܢ ܘܐܘܼܦ ܐܲܪܥܵܐ ܕܟܢܲܥܢ ܡ̣ܢ ܩܵܕ݇ܡ ܟܸܦܢܵܐ. 14ܓ̰ܘܼܡܸܥ ܠܹܗ ܝܵܘܣܸܦ ܠܟܠܲܝܗܝ ܙܘܼܙܹ̈ܐ ܕܦܝܼܫ ܠܗܘܿܢ ܡܫ݇ܟ̰ܝܼܚܹܐ ܓܵܘ ܐܲܪܥܵܐ ܕܡܸܨܪܹܝܢ ܘܒܐܲܪܥܵܐ ܕܟܢܲܥܢ ܡ̣ܢ ܕܲܚܠܵܐ ܕܙܒ݂ܝܼܢܗܘܿܢ ܐ݇ܢܵܫܹ̈ܐ؛ ܘܡܘܼܐܬܹܐ ܠܹܗ ܝܵܘܣܸܦ ܙܘܼܙܹ̈ܐ ܠܒܲܝܬܵܐ ܕܦܸܪܥܘܿܢ. 15ܐܝܼܡܲܢ ܕܦܪܝܼܩ ܠܗܘܿܢ ܙܘܼܙܹ̈ܐ ܡ̣ܢ ܐܲܪܥܵܐ ܕܡܸܨܪܹܝܢ ܘܡ̣ܢ ܐܲܪܥܵܐ ܕܟܢܲܥܢ، ܐ݇ܬܹܐ ܠܗܘܿܢ ܟܠܲܝܗܝ ܡܸܨܪ̈ܵܝܹܐ ܠܟܸܣ ܝܵܘܣܸܦ ܒܹܐܡܵܪܵܐ، ”ܗܲܒ݂݇ܠ ܠܲܢ ܠܲܚܡܵܐ. ܩܵܡܘܿܕܝܼ ܡܵܝܬܲܚ ܩܵܕ݇ܡܘܼܟ݂؟ ܣܵܒܵܒ ܦܪܝܼܩ ܠܗܘܿܢ ܙܘܼܙܲܢ̈.“ 16ܓ̰ܘܼܘܸܒ ܠܹܗ ܝܵܘܣܸܦ، ”ܐܸܢ ܦܪܝܼܩ ܠܗܘܿܢ ܙܘܼܙܵܘ̈ܟ݂ܘܿܢ، ܗܲܒ݂݇ܠܘܼܢ ܪܸܣܩܵܘܟ݂ܘܿܢ، ܘܒܸܬ ܝܵܗ݇ܒܹܢ ܐܸܠܵܘܟ݂ܘܿܢ ܠܲܚܡܵܐ ܡ̣ܢ ܓܹܒܵܐ ܕܪܸܣܩܵܘܟ݂ܘܿܢ.“ 17ܘܡܘܼܐܬܹܐ ܠܗܘܿܢ ܪܸ̈ܣܩܲܝܗܝ ܠܟܸܣ ܝܵܘܣܸܦ؛ ܘܝܘܼܗ݇ܒܸܠ ܠܹܗ ܐܸܠܲܝܗܝ ܠܲܚܡܵܐ ܒܣܘܼܣܵܘܵܬܹ̈ܐ، ܘܒܥܸܪ̈ܒܹܐ، ܘܒܩܸܢܝܵܢܹ̈ܐ، ܘܒܚܡܵܪܹ̈ܐ؛ ܬܘܼܪܣܝܼܲܝ ܠܹܗ ܒܗ̇ܝ ܫܹܢ݇ܬܵܐ ܒܠܲܚܡܵܐ ܡ̣ܢ ܓܹܒܵܐ ܕܪܸܣܩܲܝܗܝ.

18ܐܝܼܡܲܢ ܕܦܪܝܼܩ ܠܵܗ̇ ܗ̇ܝ ܫܹܢ݇ܬܵܐ، ܐ݇ܬܹܐ ܠܗܘܿܢ ܠܟܸܣ ܝܵܘܣܸܦ ܒܫܹܢ݇ܬܵܐ ܕܬܲܪܬܹܝ، ܘܐ݇ܡܝܼܪܗܘܿܢ ܐܸܠܹܗ، ”ܠܹܐ ܛܲܫܲܚ ܡ̣ܢ ܡܵܪܝܼ ܕܬܝܼܡ ܠܗܘܿܢ ܙܘܼܙܲܢ̈؛ ܘܪܸܣܩܵܐ ܕܗܲܝܘܵܢܹ̈ܐ ܗܘܹܐ ܠܹܗ ܠܡܵܪܝܼ؛ ܠܲܝܬ ܦܝܵܫܵܐ ܠܡܵܪܝܼ ܫܒ݂ܘܿܩ ܡ̣ܢ ܓܵܢܵܬܲܢ̈ ܘܐܲܪ̈ܥܵܬܲܢ. 19ܩܵܡܘܿܕܝܼ ܡܵܝܬܲܚ ܩܵܕ݇ܡ ܥܲܝܢܘܼ̈ܟ݂، ܐܲܚܢܲܢ ܘܐܘܼܦ ܐܲܪ̈ܥܵܬܲܢ؟ ܙܒ݂ܘܿܢ ܐܸܠܲܢ ܘܠܐܲܪ̈ܥܵܬܲܢ ܒܠܲܚܡܵܐ، ܘܒܸܬ ܗܵܘܲܚ ܐܲܚܢܲܢ ܘܐܲܪ̈ܥܵܬܲܢ ܥܲܒ݂ܕܹ̈ܐ ܠܦܸܪܥܘܿܢ؛ ܗܲܒ݂݇ܠ ܠܲܢ ܒܲܪܙܲܪܥܵܐ ܕܚܵܝܲܚ، ܘܠܵܐ ܡܵܝܬܲܚ، ܘܐܲܪܥܵܐ ܠܵܐ ܗܵܘܝܵܐ ܚܵܪܵܒܵܐ.“ 20ܘܗܲܕܟ݂ܵܐ ܙܒ݂ܝܼܢܹܗ ܝܵܘܣܸܦ ܠܟܠܵܗ̇ ܐܲܪܥܵܐ ܕܡܸܨܪܹܝܢ ܩܵܐ ܦܸܪܥܘܿܢ، ܣܵܒܵܒ ܟܠܲܝܗܝ ܡܸܨܪ̈ܵܝܹܐ ܙܘܼܒܸܢܗܘܿܢ ܚܲܩܠܵܢܲܝ̈ܗܝ ܡ̣ܢ ܥܸܠܬܵܐ ܕܚܘܼܠܸܢܹܗ ܥܲܠܲܝܗܝ ܟܸܦܢܵܐ. ܘܗܲܕܟ݂ܵܐ ܗܘܹܐ ܠܵܗ̇ ܐܲܪܥܵܐ ܠܦܸܪܥܘܿܢ. 21ܘܠܥܲܡܵܐ ܡܘܼܥܒܸܪܹܗ ܝܵܘܣܸܦ ܠܡܕܝܼܢܵܬܹ̈ܐ، ܡ̣ܢ ܚܲܕ ܬܚܘܼܡܵܐ ܕܡܸܨܪܹܝܢ ܗܲܠ ܬܚܘܼܡܘܼܗ̇ ܐ݇ܚܹܪ݇ܢܵܐ. 22ܐܲܚܟ̰ܝܼ ܐܲܪܥܵܐ ܕܟܵܗܢܹ̈ܐ ܠܵܐ ܙܒ݂ܝܼܢܵܐ ܠܹܗ؛ ܣܵܒܵܒ ܐܵܢܝܼ ܟܹܐ ܦܵܝܫܝܼ ܗ݇ܘܵܘ ܬܘܼܪܣܝܼܹܐ ܡ̣ܢ ܦܸܪܥܘܿܢ ܘܟܹܐ ܐܵܟ݂ܠܝܼ ܗ݇ܘܵܘ ܣܵܗܡܲܝܗܝ ܕܐܵܬܹܐ ܗ݇ܘܵܐ ܡ̣ܢ ܦܸܪܥܘܿܢ؛ ܗܲܕܟ݂ܵܐ ܠܹܐ ܝܗ݇ܘܵܘ ܣܢܝܼܩܹܐ ܕܙܲܒܢܝܼ ܗ݇ܘܵܘ ܠܐܲܪ̈ܥܵܬܲܝܗܝ. 23ܐ݇ܡܝܼܪܹܗ ܝܵܘܣܸܦ ܠܥܲܡܵܐ، ”ܗܵܐ ܐܸܕܝܘܿܡ ܙܒ݂ܝܼܢܝܼ ܐܸܠܵܘܟ݂ܘܿܢ ܘܠܐܲܪ̈ܥܵܬܵܘܟ݂ܘܿܢ ܩܵܐ ܦܸܪܥܘܿܢ. ܐܵܕܝܼܵܐ ܐܝܼܬ ܒܲܪܙܲܪܥܵܐ ܐܸܠܵܘܟ݂ܘܿܢ ܕܙܵܪܥܝܼܬܘܿܢ ܠܗܘܿܢ ܐܲܪ̈ܥܵܬܵܘܟ݂ܘܿܢ. 24ܒܥܕܵܢܵܐ ܕܓ̰ܵܡܲܥܬܵܐ ܕܕܲܚܠܵܐ، ܝܵܗ݇ܒ݂ܝܼܬܘܿܢ ܚܲܕ ܚܡܝܼܫܵܝܵܐ ܠܦܸܪܥܘܿܢ، ܘܐܲܪܒܥܵܐ ܣܵܗܡܹ̈ܐ ܗܵܘܝܼ ܐܸܠܵܘܟ݂ܘܿܢ، ܠܒܲܪܙܲܪܥܵܐ ܕܚܲܩܠܵܐ، ܘܠܡܹܐܟ݂ܘܼܠܬܵܘܟ݂ܘܿܢ، ܘܠܕܐܵܢܝܼ ܕܝܼܢܵܐ ܓܵܘ ܒܵܬܵܘ̈ܟ݂ܘܿܢ، ܘܠܡܹܐܟ݂ܘܼܠܬܵܐ ܕܝܲܠܘܼܕܵܘ̈ܟ݂ܘܿܢ.“ 25ܓ̰ܘܼܘܸܒ ܠܗܘܿܢ ܐܸܠܹܗ، ”ܦܘܼܨܝܲܝ ܝܘܸܬ ܚܲܝܲܢ̈؛ ܐܸܢ ܡܲܫ݇ܟ̰ܚܲܚ ܪ̈ܲܚܡܹܐ ܒܥܲܝܢܹ̈ܐ ܕܡܵܪܝܼ، ܒܸܬ ܗܵܘܲܚ ܥܲܒ݂ܕܹ̈ܐ ܠܦܸܪܥܘܿܢ.“ 26ܘܡܘܼܬܸܒ݂ ܠܹܗ ܝܵܘܣܸܦ ܩܵܢܘܿܢܵܐ ܒܘܼܬ ܐܲܪܥܵܐ ܕܡܸܨܪܹܝܢ، ܕܦܝܵܫܵܐ ܝܠܹܗ ܗܲܠ ܐܸܕܝܘܿܡ ܝܵܘܡܵܐ، ܕܚܲܕ ܚܡܝܼܫܵܝܵܐ ܗܵܘܹܐ ܠܦܸܪܥܘܿܢ. ܐܲܚܟ̰ܝܼ ܐܲܪܥܵܐ ܕܟܵܗܢܹ̈ܐ ܒܢܲܦ̮ܫܘܼܗ̇ ܠܵܐ ܗܘܹܐ ܠܵܗ̇ ܠܦܸܪܥܘܿܢ.

ܝܵܘܡܵܢܹ̈ܐ ܐ݇ܚܵܪ̈ܵܝܹܐ ܕܝܲܥܩܘܿܒ݂

27ܘܝ݇ܬܝܼܒ݂ ܠܹܗ ܝܼܣܪܵܝܹܠ ܒܐܲܪܥܵܐ ܕܡܸܨܪܹܝܢ، ܒܐܲܪܥܵܐ ܕܓܹܫܵܢ، ܘܩܫܹܐ ܠܗܘܿܢ ܡܘܼܠܟܵܢܹ̈ܐ ܓܵܘܘܼܗ̇، ܘܦܪܹܐ ܠܗܘܿܢ ܘܙܝܼܕ ܠܗܘܿܢ ܪܵܒܵܐ. 28ܚܝܹܐ ܠܹܗ ܝܲܥܩܘܿܒ݂ ܒܐܲܪܥܵܐ ܕܡܸܨܪܹܝܢ ܫܒܲܥܣܲܪ ܫܸܢܹ̈ܐ؛ ܘܗܘܹܐ ܠܗܘܿܢ ܚܲܝܹ̈ܐ ܕܝܲܥܩܘܿܒ݂ ܐܸܡܵܐܐ ܘܐܲܪܒܥܝܼ ܘܫܒܲܥ ܫܸܢܹ̈ܐ. 29ܐܝܼܡܲܢ ܕܩܘܼܪܒܸܢܹܗ ܝܼܣܪܵܝܹܠ ܠܸܡܝܵܬܵܐ، ܩܪܹܐ ܠܹܗ ܠܒܪܘܿܢܹܗ ܝܵܘܣܸܦ ܘܐ݇ܡܝܼܪܹܗ ܐܸܠܹܗ، ”ܐܵܕܝܼܵܐ ܐܸܢ ܡܘܼܫ݇ܟ̰ܚܵܐ ܝܘܸܢ ܪ̈ܲܚܡܹܐ ܒܥܲܝܢܘܼ̈ܟ݂، ܦܲܪܦܘܼܠܹܐ ܝܘܸܢ، ܡܲܬܸܒ݂ ܐܝܼܕܘܼܟ݂ ܬܚܘܿܬ ܥܸܛܡܝܼ،#47‏:29 ܚܲܕ ܪܹܐܙܵܐ ܕܗܲܡܙܲܡܬܵܐ ܒܠܸܫܵܢܵܐ ܥܸܒ݂ܪܵܝܵܐ ܒܡܲܥܢܵܝܵܐ ܕܡܵܘܡܵܝܬܵܐ ܘܥܒ݂ܘܿܕ ܐܸܠܝܼ ܫܵܦܵܩܲܬ ܘܫܪܵܪܵܐ، ܦܲܪܦܘܼܠܹܐ ܝܘܸܢ، ܕܠܵܐ ܩܵܒ݂ܪܹܬ ܠܝܼ ܒܡܸܨܪܹܝܢ. 30ܒܵܥܹܝܢ ܕܵܡܟܹܢ ܥܲܡ ܒܵܒܵܘܵܬܝܼ̈. ܠܲܒܠܸܬ ܠܝܼ ܡ̣ܢ ܡܸܨܪܹܝܢ، ܘܩܵܒ݂ܪܹܬ ܠܝܼ ܓܵܘ ܒܹܝܬ ܩܒ݂ܘܼܪ̈ܲܝܗܝ.“ ܐ݇ܡܝܼܪܹܗ ܝܵܘܣܸܦ، ”ܐܵܢܵܐ ܒܸܬ ܥܵܒ݂ܕܹܢ ܐܲܝܟ݂ ܛܠܵܒܬܘܼܟ݂.“ 31ܘܐ݇ܡܝܼܪܹܗ ܝܲܥܩܘܿܒ݂ ܐܸܠܹܗ، ”ܝ݇ܡܝܼ ܐܸܠܝܼ.“ ܘܝ݇ܡܹܐ ܠܹܗ ܐܸܠܹܗ. ܘܡܘܼܟܸܦ ܠܹܗ ܝܼܣܪܵܝܹܠ ܪܹܫܹܗ ܥܲܠ ܪܹܫܵܐ ܕܫܘܝܼܬܹܗ.

Currently Selected:

ܒܪܝܬܐ 47: ABTAB

Highlight

Copy

Compare