ܒܪܝܬܐ 46

ܝܲܥܩܘܿܒ݂ ܒܸܨܠܵܝܵܐ ܠܡܸܨܪܹܝܢ

1ܫܩܝܼܠ ܠܹܗ ܝܼܣܪܵܝܹܠ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ ܘܐ݇ܬܹܐ ܠܹܗ ܠܒܹܪܫܒܲܥ، ܘܕܒ݂ܝܼܚ ܠܹܗ ܬܵܡܵܐ ܕܸܒ݂ܚܹ̈ܐ ܠܐܲܠܵܗܵܐ ܕܒܵܒܘܼܗܝ ܐܝܼܣܚܵܩ. 2ܘܗܘܼܡܙܸܡ ܠܹܗ ܐܲܠܵܗܵܐ ܠܝܼܣܪܵܝܹܠ ܒܚܸܙܘܵܐ ܒܠܲܝܠܹܐ، ܒܹܐܡܵܪܵܐ، ”ܝܲܥܩܘܿܒ݂، ܝܲܥܩܘܿܒ݂.“ ܓ̰ܘܼܘܸܒ ܠܹܗ ܝܲܥܩܘܿܒ݂، ”ܗܵܐ ܐܵܢܵܐ.“ 3ܐ݇ܡܝܼܪܹܗ ܐܸܠܹܗ ܐܲܠܵܗܵܐ، ”ܐܵܢܵܐ ܝܘܸܢ ܐܲܠܵܗܵܐ ܕܒܵܒܘܼܟ݂؛ ܠܵܐ ܙܵܕܥܹܬ ܡ̣ܢ ܠܸܨܠܵܝܵܐ ܠܡܸܨܪܹܝܢ، ܣܵܒܵܒ ܥܲܡܵܐ ܓܘܼܪܵܐ ܒܸܬ ܥܵܒ݂ܕܹܢܘܼܟ݂ ܬܵܡܵܐ. 4ܐܵܢܵܐ ܒܸܬ ܨܵܠܹܝܢ ܥܲܡܘܼܟ݂ ܠܡܸܨܪܹܝܢ، ܘܐܵܢܵܐ ܒܸܬ ܡܲܐܣܩܸܢܘܼܟ݂ ܡ̣ܢ ܬܵܡܵܐ؛ ܘܐܝܼܕܵܐ ܕܝܵܘܣܸܦ ܒܸܬ ܐܵܟ̰ܡܵܐ ܠܗܘܿܢ ܥܲܝܢܘܼ̈ܟ݂.“ 5ܘܩܝܼܡ ܠܹܗ ܝܲܥܩܘܿܒ݂ ܡ̣ܢ ܒܹܪܫܒܲܥ. ܫܩܝܼܠ ܠܗܘܿܢ ܒܢܘܿܢܹ̈ܐ ܕܝܼܣܪܵܝܹܠ ܠܝܲܥܩܘܿܒ݂ ܒܵܒܲܝܗܝ، ܘܠܝܲܠܘܼܕܲܝ̈ܗܝ ܘܠܒܲܟ݂ܬܵܬܲܝ̈ܗܝ ܒܡܲܪ̈ܟܒ݂ܵܬܹܐ ܕܫܘܼܕܪܲܝ ܝܗ݇ܘܵܐ ܦܸܪܥܘܿܢ ܠܠܲܒܘܼܠܲܝ. 6ܫܩܝܼܠ ܠܗܘܿܢ ܐܘܼܦ ܠܪܸܣܩܲܝܗܝ ܘܠܡܸܢܕܝܼܲܝܗܝ ܕܩܸܢܝܹܗ ܝܗ݇ܘܵܐ ܒܐܲܪܥܵܐ ܕܟܢܲܥܢ، ܘܐ݇ܬܹܐ ܠܗܘܿܢ ܠܡܸܨܪܹܝܢ، ܝܲܥܩܘܿܒ݂ ܘܟܠܲܝܗܝ ܙܲܪ̈ܥܘܼܗܝ ܥܲܡܹܗ، 7ܒܢܘܿܢܘܼ̈ܗܝ ܘܒܢܘܿܢܹ̈ܐ ܕܒܢܘܿܢܘܼ̈ܗܝ ܥܲܡܹܗ، ܘܒܢܵܬܹ̈ܗ ܘܒܢܵܬܹ̈ܐ ܕܒܢܘܿܢܘܼ̈ܗܝ؛ ܟܠܲܝܗܝ ܙܲܪ̈ܥܘܼܗܝ ܡܘܼܝܬܲܝ ܠܹܗ ܥܲܡܹܗ ܠܡܸܨܪܹܝܢ.

8ܐܲܢܹܐ ܝܢܵܐ ܫܸܡܵܢܹ̈ܐ ܕܒܢܘܿܢܹ̈ܐ ܕܝܼܣܪܵܝܹܠ، ܕܝܼܠܹܗ ܝܲܥܩܘܿܒ݂، ܐܵܢܝܼ ܕܐ݇ܬܹܐ ܠܗܘܿܢ ܠܡܸܨܪܹܝܢ: ܪܐܘܼܒܸܢ، ܒܘܼܟ݂ܪܵܐ ܕܝܲܥܩܘܿܒ݂. 9ܘܒܢܘܿܢܹ̈ܐ ܕܪܐܘܼܒܸܢ: ܚܢܘܿܟ݂، ܘܦܲܠܘܿ، ܘܚܸܨܪܘܿܢ، ܘܟܲܪܡܝܼ. 10ܘܒܢܘܿܢܹ̈ܐ ܕܫܸܡܥܘܿܢ: ܝܲܡܘܼܐܹܝܠ، ܘܝܵܡܹܝܢ، ܘܐܵܗܵܕ، ܘܝܵܟ݂ܝܼܢ، ܘܨܵܚܵܪ، ܘܫܵܐܘܿܠ ܒܪܘܿܢܵܐ ܕܟܢܲܥܢܵܝܬܵܐ. 11ܘܒܢܘܿܢܹ̈ܐ ܕܠܹܘܝܼ: ܓܸܪܫܘܿܢ، ܘܩܵܗܵܬ، ܘܡܪܵܪܝܼ. 12ܘܒܢܘܿܢܹ̈ܐ ܕܝܼܗܘܼܕܵܐ: ܥܝܼܪ، ܘܐܘܿܢܵܢ، ܘܫܹܠܵܐ، ܘܦܲܪܨ، ܘܙܹܪܵܚ. ܐܝܼܢܵܐ ܥܝܼܪ ܘܐܘܿܢܵܢ ܡܝܼܬܹܐ ܝܗ݇ܘܵܘ ܒܐܲܪܥܵܐ ܕܟܢܲܥܢ. ܘܒܢܘܿܢܹ̈ܐ ܕܦܲܪܨ ܝܼܗ݇ܘܵܘ ܚܸܨܪܘܿܢ ܘܚܵܡܘܿܠ. 13ܘܒܢܘܿܢܹ̈ܐ ܕܐܝܼܣܵܟ݂ܵܪ: ܬܘܿܠܵܥ، ܘܦܘܿܐܵܐ، ܘܝܘܼܒ݂، ܘܫܸܡܪܘܿܢ. 14ܘܒܢܘܿܢܹ̈ܐ ܕܙܒ݂ܘܿܠܘܿܢ: ܣܵܪܵܕ، ܘܐܲܠܘܿܢ ܘܝܲܚܠܵܐܹܝܠ. 15ܐܲܢܹܐ ܝܢܵܐ ܒܢܘܿܢܹ̈ܐ ܕܠܲܝܵܐ ܕܝ݇ܠܝܼܕ ܠܵܗ̇ ܠܝܲܥܩܘܿܒ݂ ܒܦܵܕܵܢ ܐܵܪܵܡ، ܥܲܡ ܕܝܼܢܵܐ ܒܪܵܬܹܗ؛ ܟܠܲܝܗܝ ܒܢܘܿܢܘܼ̈ܗܝ ܘܒܢܵܬܹ̈ܗ ܬܠܵܬܝܼ ܘܬܠܵܬܵܐ ܓܵܢܵܬܹ̈ܐ ܝܗ݇ܘܵܘ.

16ܘܒܢܘܿܢܹ̈ܐ ܕܓܵܕ: ܨܸܦܘܿܢ، ܘܚܲܓܝܼ، ܘܫܘܼܢܝܼ، ܘܐܲܨܒܘܿܢ، ܘܥܲܕܝܼ، ܘܐܵܪܘܿܕ، ܘܐܲܪܐܹܠܝܼ. 17ܘܒܢܘܿܢܹ̈ܐ ܕܐܵܫܹܝܪ: ܝܲܡܢܵܐ، ܘܝܲܫܘܵܐ، ܘܝܲܫܘܝܼ، ܘܒܪܝܼܥܵܐ، ܘܣܲܪܲܚ ܚܵܬܲܝܗܝ. ܘܒܢܘܿܢܹ̈ܐ ܕܒܪܝܼܥܵܐ: ܚܵܒ݂ܵܪ، ܘܡܲܠܟܝܼܐܹܝܠ. 18ܐܲܢܹܐ ܝܢܵܐ ܒܢܘܿܢܹ̈ܐ ܕܙܸܠܦܵܐ، ܕܝܘܼܗܒܲܝ ܠܹܗ ܠܵܒ݂ܵܢ ܠܠܲܝܵܐ ܒܪܵܬܹܗ؛ ܘܝ݇ܠܝܼܕܲܝ ܠܵܗ̇ ܐܲܢܹܐ ܠܝܲܥܩܘܿܒ݂، ܐܸܫܬܲܥܣܲܪ ܓܵܢܵܬܹ̈ܐ. 19ܘܒܢܘܿܢܹ̈ܐ ܕܪܵܚܹܝܠ ܒܲܟ݂ܬܵܐ ܕܝܲܥܩܘܿܒ݂ ܝܼܗ݇ܘܵܘ: ܝܵܘܣܸܦ ܘܒܸܢܝܵܡܹܝܢ.

20ܘܠܝܵܘܣܸܦ، ܒܐܲܪܥܵܐ ܕܡܸܨܪܹܝܢ، ܦܝܼܫ ܠܗܘܿܢ ܝ݇ܠܝܼܕܹܐ ܡܢܲܫܹܐ ܘܐܲܦܪܹܝܡ، ܕܝ݇ܠܝܼܕܲܝ ܠܵܗ̇ ܐܸܠܹܗ ܐܵܣܢܲܬ، ܒܪܵܬܵܐ ܕܦܘܿܛܝܼܦܪܲܥ، ܟܵܗܢܵܐ ܕܐܘܿܢ. 21ܘܒܢܘܿܢܹ̈ܐ ܕܒܸܢܝܵܡܹܝܢ: ܒܵܠܵܥ، ܘܒܵܟܵܪ، ܘܐܲܫܒܸܠ، ܘܓܵܪܵܐ، ܘܢܲܥܡܵܢ، ܘܐܲܚܝܼ، ܘܪܘܿܫ، ܘܡܘܼܦܝܼܡ، ܘܚܘܼܦܝܼܡ، ܘܐܵܪܵܕ. 22ܐܲܢܹܐ ܝܼܢܵܐ ܒܢܘܿܢܹ̈ܐ ܕܪܵܚܹܝܠ، ܕܦܝܼܫ ܠܗܘܿܢ ܝ݇ܠܝܼܕܹܐ ܠܝܲܥܩܘܿܒ݂، ܟܠܲܝܗܝ ܐܲܪܒܲܥܣܲܪ ܓܵܢܵܬܹ̈ܐ.

23ܘܒܪܘܿܢܵܐ ܕܕܵܢ: ܚܘܿܫܝܼܡ. 24ܘܒܢܘܿܢܹ̈ܐ ܕܢܲܦ̮ܬܵܠܝܼ: ܝܲܚܨܵܐܹܝܠ، ܘܓܘܼܢܝܼ، ܘܝܵܨܵܪ، ܘܫܵܠܝܼܡ. 25ܐܲܢܹܐ ܝܢܵܐ ܒܢܘܿܢܹ̈ܐ ܕܒܸܠܗܵܐ، ܕܝܘܼܗܒܲܝ ܠܹܗ ܠܵܒ݂ܵܢ ܠܪܵܚܹܝܠ ܒܪܵܬܹܗ؛ ܝ݇ܠܝܼܕ ܠܵܗ̇ ܐܲܢܹܐ ܠܝܲܥܩܘܿܒ݂، ܟܠܲܝܗܝ ܫܒܲܥ ܓܵܢܵܬܹ̈ܐ.

26ܟܠܲܝܗܝ ܓܵܢܵܬܹ̈ܐ ܕܐ݇ܬܹܐ ܠܗܘܿܢ ܥܲܡ ܝܲܥܩܘܿܒ݂ ܠܡܸܨܪܹܝܢ، ܕܦܠܝܼܛ ܠܗܘܿܢ ܡ̣ܢ ܚܲܨܹܗ، ܫܒ݂ܘܿܩ ܡ̣ܢ ܒܲܟ݂ܬܵܬܹ̈ܐ ܕܒܢܘܿܢܹ̈ܐ ܕܝܲܥܩܘܿܒ݂، ܐܸܫܬܝܼ ܘܐܸܫܸܬ ܓܵܢܵܬܹ̈ܐ ܝܗ݇ܘܵܘ. 27ܘܒܢܘܿܢܹ̈ܐ ܕܝܵܘܣܸܦ ܕܦܝܼܫ ܠܗܘܿܢ ܝ݇ܠܝܼܕܹܐ ܐܸܠܹܗ ܒܡܸܨܪܹܝܢ، ܬܪܹܝ ܓܵܢܵܬܹ̈ܐ ܝܗ݇ܘܵܘ؛ ܟܠܲܝܗܝ ܓܵܢܵܬܹ̈ܐ ܕܒܲܝܬܵܐ ܕܝܲܥܩܘܿܒ݂ ܕܐ݇ܬܹܐ ܠܗܘܿܢ ܠܡܸܨܪܹܝܢ، ܫܲܒ݂ܥܝܼ ܓܵܢܵܬܹ̈ܐ ܝܗ݇ܘܵܘ.

ܝܵܘܣܸܦ ܒܸܬܦܵܩܵܐ ܒܒܵܒܘܼܗܝ

28ܫܘܼܕܸܪܹܗ ܝܲܥܩܘܿܒ݂ ܠܝܼܗܘܼܕܵܐ ܩܵܕ݇ܡܘܼܗܝ ܠܟܸܣ ܝܵܘܣܸܦ، ܠܸܚܙܵܝܵܐ ܕܵܐܟ݂ܝܼ ܡܵܛܝܼ ܠܓܹܫܵܢ. ܘܐܝܼܡܲܢ ܕܐ݇ܬܹܐ ܠܗܘܿܢ ܠܐܲܪܥܵܐ ܕܓܹܫܵܢ، 29ܐ݇ܣܝܼܪܹܗ ܝܵܘܣܸܦ ܠܡܲܪܟܲܒ݂ܬܹܗ ܘܐ݇ܣܝܼܩ ܠܹܗ ܠܐܘܼܪܚܵܐ ܕܝܼܣܪܵܝܹܠ ܒܵܒܘܼܗܝ ܠܓܹܫܵܢ. ܐܝܼܡܲܢ ܕܚܙܹܐ ܠܹܗ ܐܸܠܹܗ، ܢܦܝܼܠ ܠܹܗ ܥܲܠ ܩܕܵܠܵܐ ܕܒܵܒܘܼܗܝ، ܘܒܟܹܐ ܠܹܗ ܪܵܒܵܐ ܥܕܵܢܵܐ. 30ܘܐ݇ܡܝܼܪܹܗ ܝܼܣܪܵܝܹܠ ܠܝܵܘܣܸܦ، ”ܫܒ݂ܘܿܩ ܡܵܝܬܹܢ ܐܵܕܝܼܵܐ، ܡ̣ܢ ܒܵܬ݇ܪ ܕܚܙܹܐ ܠܝܼ ܠܦܵܬܘܼܟ݂، ܘܝ݇ܕܝܼܥ ܠܝܼ ܕܗܹܫ ܐܲܢ݇ܬ ܚܵܝܵܐ ܝܘܸܬ.“ 31ܐ݇ܡܝܼܪܹܗ ܝܵܘܣܸܦ ܠܐܲܚܘܿܢܘܵܬܹ̈ܗ ܘܠܒܢܲܝ̈ ܒܲܝܬܵܐ ܕܒܵܒܘܼܗܝ، ”ܒܸܬ ܐܵܣܩܹܢ ܘܡܲܕܥܸܢ ܠܦܸܪܥܘܿܢ، ܘܐܵܡܪܹܢ ܐܸܠܹܗ ܕܐܲܚܘܿܢܘܵܬܝܼ̈ ܘܒܢܲܝ̈ ܒܲܝܬܵܐ ܕܒܵܒܝܼ ܕܝܼܗ݇ܘܵܘ ܒܐܲܪܥܵܐ ܕܟܢܲܥܢ، ܐ݇ܬܝܼܹܐ ܝܢܵܐ ܠܟܸܣ ܠܝܼ؛ 32ܐܲܢܹܐ ܐ݇ܢܵܫܹ̈ܐ ܪ̈ܵܥܝܹܐ ܝܢܵܐ، ܣܵܒܵܒ ܗܘܝܼܹܐ ܝܢܵܐ ܐ݇ܢܵܫܹ̈ܐ ܕܪܸܣܩܵܐ؛ ܘܦܸܣܩܲܝ̈ܗܝ ܘܒܸܩܪ̈ܵܬܲܝܗܝ ܘܟܠ ܡܸܢܕܝܼ ܕܐܝܼܬ ܠܗܘܿܢ ܡܘܼܝܬܲܝ ܝܢܵܐ ܥܲܡܲܝܗܝ. 33ܘܐܝܼܡܲܢ ܕܩܵܪܹܐ ܠܵܘܟ݂ܘܿܢ ܦܸܪܥܘܿܢ ܘܒܲܩܸܪܵܘܟ݂ܘܿܢ، ’ܡܘܿܕܝܼ ܝܠܹܗ ܫܘܼܠܵܘܟ݂ܘܿܢ؟‘ 34ܐܵܡܪܝܼܬܘܿܢ، ’ܪܹ̈ܓܵܘܵܬܘܼܟ݂ ܗܘܝܼܹܐ ܝܢܵܐ ܐ݇ܢܵܫܹ̈ܐ ܕܪܸܣܩܵܐ ܗܵܐ ܡ̣ܢ ܝܵܠܕ݇ܘܼܬܲܢ ܘܗܲܠ ܐܵܕܝܼܵܐ، ܐܲܚܢܲܢ ܘܐܘܼܦ ܒܵܒܵܘܵܬܲܢ̈،‘ ܕܝܵܬܒ݂ܝܼܬܘܿܢ ܒܐܲܪܥܵܐ ܕܓܹܫܵܢ، ܣܵܒܵܒ ܛܲܡܐܵܐ ܝܠܹܗ ܠܡܸܨܪ̈ܵܝܹܐ ܟܠ ܡܲܪܥܝܵܢܵܐ ܕܥܸܪ̈ܒܹܐ.“

Currently Selected:

ܒܪܝܬܐ 46: ABTAB

Highlight

Copy

Compare