ܒܪܝܬܐ 45

ܝܵܘܣܸܦ ܡܲܕܘܼܥܹܐ ܓܵܢܹܗ ܠܐܲܚܘܿܢܘܵܬܹ̈ܗ

1ܠܵܐ ܡܨܹܐ ܠܹܗ ܝܵܘܣܸܦ ܠܸܕܒ݂ܵܩܵܐ ܓܵܢܹܗ ܩܵܕ݇ܡ ܟܠܲܝܗܝ ܐܵܢܝܼ ܕܟܸܠܝܹܐ ܝܗ݇ܘܵܘ ܠܟܸܣ ܠܹܗ، ܘܡܘܼܩܘܸܚ ܠܹܗ، ”ܦܲܠܛܘܼܢ ܠܟܠܲܝܗܝ ܐ݇ܢܵܫܹ̈ܐ ܡ̣ܢ ܠܟܸܣ ܠܝܼ.“ ܘܗܲܕܟ݂ܵܐ ܠܵܐ ܦܝܼܫ ܠܹܗ ܐܘܼܦ ܚܲܕ ܠܟܸܣ ܠܹܗ ܐܝܼܡܲܢ ܕܡܘܼܕܸܥܵܐ ܠܹܗ ܝܵܘܣܸܦ ܓܵܢܹܗ ܠܐܲܚܘܿܢܘܵܬܹ̈ܗ. 2ܡܘܼܪܸܡ ܠܹܗ ܩܵܠܹܗ ܘܒܟܹܐ ܠܹܗ، ܗܲܕܟ݂ܵܐ ܕܫܡܝܼܥ ܠܗܘܿܢ ܡܸܨܪ̈ܵܝܹܐ، ܘܐܘܼܦ ܒܲܝܬܵܐ ܕܦܸܪܥܘܿܢ. 3ܗ̇ܝܓܵܗ ܐ݇ܡܝܼܪܹܗ ܝܵܘܣܸܦ ܠܐܲܚܘܿܢܘܵܬܹ̈ܗ، ”ܐܵܢܵܐ ܝܵܘܣܸܦ ܝܼܘܸܢ. ܗܹܫ ܚܵܝܵܐ ܝܠܹܗ ܒܵܒܝܼ؟“ ܐܝܼܢܵܐ ܠܵܐ ܡܨܹܐ ܠܗܘܿܢ ܐܲܚܘܿܢܘܵܬܹ̈ܗ ܠܓ̰ܲܘܘܼܒܹܗ، ܣܵܒܵܒ ܦܝܼܫ ܠܗܘܿܢ ܫܓ݂ܝܼܫܹܐ ܩܵܕ݇ܡܘܼܗܝ. 4ܘܐ݇ܡܝܼܪܹܗ ܝܵܘܣܸܦ ܠܐܲܚܘܿܢܘܵܬܹ̈ܗ، ”ܩܲܪܒܸܢܘܼܢ ܠܟܸܣ ܠܝܼ.“ ܩܘܼܪܒܸܢܗܘܿܢ، ܘܐ݇ܡܝܼܪܹܗ ܐܸܠܲܝܗܝ، ”ܐܵܢܵܐ ܝܘܸܢ ܝܵܘܣܸܦ ܐܲܚܘܿܢܵܘܟ݂ܘܿܢ، ܕܩܲܡ ܙܲܒܢܝܼܬܘܿܢ ܠܝܼ ܓܵܘ ܡܸܨܪܹܝܢ. 5ܘܐܵܕܝܼܵܐ ܠܵܐ ܦܵܝܫܝܼܬܘܿܢ ܒܚܲܫܵܐ، ܘܠܵܐ ܟܵܪܒܝܼܬܘܿܢ ܥܲܠ ܓܵܢܵܘܟ݂ܘܿܢ ܕܙܘܼܒܸܢܵܘܟ݂ܘܿܢ ܐܸܠܝܼ ܠܐܲܟ݂ܵܐ؛ ܣܵܒܵܒ ܐܲܠܵܗܵܐ ܫܘܼܕܸܪܹܗ ܐܸܠܝܼ ܠܐܲܟ݂ܵܐ ܡ̣ܢ ܩܵܕ݇ܡ ܡܸܢܵܘܟ݂ܘܿܢ ܠܸܢܛܵܪܵܐ ܚܲܝܹ̈ܐ. 6ܣܵܒܵܒ ܗܵܐ، ܬܲܪܬܹܝ ܫܸܢܹ̈ܐ ܟܸܦܢܵܐ ܒܐܲܪܥܵܐ، ܘܗܹܫ ܚܲܡܸܫ ܫܸܢܹ̈ܐ ܐ݇ܚܹܪ̈݇ܢܹܐ ܠܹܐ ܗܵܘܹܐ ܙܪܵܥܵܐ ܘܠܵܐ ܚܨܵܕܵܐ. 7ܘܩܲܡ ܫܲܕܸܪܝܼ ܐܲܠܵܗܵܐ ܡ̣ܢ ܩܵܕ݇ܡ ܡܸܢܵܘܟ݂ܘܿܢ ܕܝܵܗ݇ܒܹܢܵܘܟ݂ܘܿܢ ܣܵܗܡܵܐ ܒܐܲܪܥܵܐ، ܘܠܦܲܨܘܼܝܹܐ ܓܵܢܵܬܹ̈ܐ ܪܵܒܵܐ ܐܸܠܵܘܟ݂ܘܿܢ. 8ܗܲܕܟ݂ܵܐ ܠܵܐ ܐܲܚܬܘܿܢ ܫܘܼܕܸܪܵܘܟ݂ܘܿܢ ܐܸܠܝܼ ܠܐܲܟ݂ܵܐ، ܐܸܠܵܐ ܐܲܠܵܗܵܐ؛ ܘܥܒ݂ܝܼܕ ܠܹܗ ܐܸܠܝܼ ܒܵܒܵܐ ܠܦܸܪܥܘܿܢ، ܘܡܵܪܵܐ ܠܟܠܹܗ ܒܲܝܬܹܗ، ܘܫܲܠܝܼܛܵܐ ܥܲܠ ܟܠܵܗ̇ ܐܲܪܥܵܐ ܕܡܸܨܪܹܝܢ. 9ܡܲܠܝܸܙܘܼܢ ܘܕܘܼܪܘܼܢ ܠܟܸܣ ܒܵܒܝܼ ܘܐ݇ܡܘܿܪܘܼܢ ܐܸܠܹܗ، ’ܗܲܕܟ݂ܵܐ ܒܹܐܡܵܪܵܐ ܝܠܹܗ ܒܪܘܿܢܘܼܟ݂ ܝܵܘܣܸܦ، ”ܩܲܡ ܡܲܬܸܒ݂ ܠܝܼ ܐܲܠܵܗܵܐ ܡܵܪܵܐ ܥܲܠ ܟܠܵܗ̇ ܡܸܨܪܹܝܢ. ܨܠܝܼ ܠܟܸܣ ܠܝܼ، ܠܵܐ ܥܲܪܩܸܠܸܬ. 10ܒܸܬ ܝܵܬܒܹܬ ܒܐܲܪܥܵܐ ܕܓܹܫܵܢ، ܘܒܸܬ ܗܵܘܹܝܬ ܩܘܼܪܒܵܐ ܐܸܠܝܼ، ܐܲܢ݇ܬ ܘܒܢܘܿܢܘܼ̈ܟ݂، ܘܒܢܘܿܢܹ̈ܐ ܕܒܢܘܿܢܘܼ̈ܟ݂، ܘܦܸܣܩܘܼ̈ܟ݂ ܘܒܸܩܪ̈ܵܬܘܼܟ݂، ܘܟܠ ܡܸܢܕܝܼ ܕܐܝܼܬ ܠܘܼܟ݂؛ 11ܘܒܸܬ ܬܲܪܣܹܝܢܘܼܟ݂ ܬܵܡܵܐ، ܣܵܒܵܒ ܗܹܫ ܐܝܼܬ ܚܲܡܸܫ ܫܸܢܹ̈ܐ ܕܟܸܦܢܵܐ ܒܹܐܬܵܝܵܐ. ܠܵܐ ܗܵܘܹܐ ܕܣܵܢܩܝܼܬܘܿܢ، ܐܲܢ݇ܬ ܘܒܲܝܬܘܼܟ݂، ܘܟܠ ܕܐܝܼܬ ܠܘܼܟ݂.“‘ 12ܗܵܐ ܥܲܝܢܵܘ̈ܟ݂ܘܿܢ ܒܸܚܙܵܝܵܐ ܝܢܵܐ، ܘܐܘܼܦ ܥܲܝܢܹ̈ܐ ܕܐܲܚܘܿܢܝܼ ܒܸܢܝܵܡܹܝܢ، ܕܐܵܢܵܐ ܝܘܸܢ ܗܲܡܙܘܼܡܹܐ ܥܲܡܵܘܟ݂ܘܿܢ. 13ܡܲܕܥܝܼܬܘܿܢ ܠܒܵܒܝܼ ܟܠܵܗ̇ ܪܲܒܘܼܬܵܐ ܕܐܝܼܬ ܠܝܼ ܒܡܸܨܪܹܝܢ، ܘܟܠ ܡܸܢܕܝܼ ܕܚܙܹܐ ܠܵܘܟ݂ܘܿܢ. ܡܲܠܝܸܙܘܼܢ ܘܡܲܨܠܸܝܡܘܼܢ ܠܒܵܒܝܼ ܠܐܲܟ݂ܵܐ.“ 14ܘܢܦܝܼܠ ܠܹܗ ܥܲܠ ܩܕܵܠܵܐ ܕܒܸܢܝܵܡܹܝܢ ܐܲܚܘܿܢܘܼܗܝ ܘܒܟܹܐ ܠܹܗ، ܘܐܘܼܦ ܒܸܢܝܵܡܹܝܢ ܒܟܹܐ ܠܹܗ ܥܲܠ ܩܕܵܠܹܗ. 15ܘܢܫܝܼܩ ܠܹܗ ܠܟܠܲܝܗܝ ܐܲܚܘܿܢܘܵܬܹ̈ܗ، ܘܒܟܹܐ ܠܹܗ ܒܘܼܬ ܕܝܼܲܝܗܝ. ܡ̣ܢ ܒܵܬ݇ܪ ܗܵܕܵܐ ܗܘܼܡܙܸܡ ܠܗܘܿܢ ܐܲܚܘܿܢܘܵܬܹ̈ܗ ܥܲܡܹܗ.

16ܚܲܒܪܵܐ ܦܝܼܫ ܠܹܗ ܫܡܝܼܥܵܐ ܒܒܲܝܬܵܐ ܕܦܸܪܥܘܿܢ ܕܐ݇ܬܹܐ ܠܗܘܿܢ ܐܲܚܘܿܢܘܵܬܹ̈ܐ ܕܝܵܘܣܸܦ، ܘܫܦܝܼܪܹܗ ܐܵܗܵܐ ܚܲܒܪܵܐ ܒܥܲܝܢܹ̈ܐ ܕܦܸܪܥܘܿܢ ܘܒܥܲܝܢܹ̈ܐ ܕܪܹ̈ܓܵܘܵܬܹܗ. 17ܘܐ݇ܡܝܼܪܹܗ ܦܸܪܥܘܿܢ ܠܝܵܘܣܸܦ، ”ܐ݇ܡܘܿܪ ܠܐܲܚܘܿܢܘܵܬܘܼ̈ܟ݂، ’ܥܒ݂ܘܿܕܘܼܢ ܗܲܕܟ݂ܵܐ؛ ܡܲܛܥܸܢܘܼܢ ܠܒܥܝܼܪܵܘܟ݂ܘܿܢ، ܘܙܹܠ݇ܡܘܼܢ ܘܡܛܹܝܡܘܼܢ ܠܐܲܪܥܵܐ ܕܟܢܲܥܢ؛ 18ܘܫܩܘܿܠܘܼܢ ܠܒܵܒܵܘܟ݂ܘܿܢ ܘܠܒܲܝܬܘܼܬܵܘܟ݂ܘܿܢ ܘܬܹܝܡܘܼܢ ܠܟܸܣ ܠܝܼ، ܘܒܸܬ ܝܵܗ݇ܒܹܢ ܐܸܠܵܘܟ݂ܘܿܢ ܣܵܗܡܵܐ ܒܘܼܫ ܨܦܵܝܝܼ ܡ̣ܢ ܐܲܪܥܵܐ ܕܡܸܨܪܹܝܢ ܕܐܵܟ݂ܠܝܼܬܘܿܢ ܡ̣ܢ ܫܲܡܝܼܢܘܼܬܘܼܗ̇.‘ 19ܘܐܘܼܦ ܦܝܵܫܵܐ ܝܘܸܬ ܦܩܝܼܕܵܐ ܕܐܵܡܪܹܬ ܠܐܲܚܘܿܢܘܵܬܘܼ̈ܟ݂، ’ܥܒ݂ܘܿܕܘܼܢ ܗܲܕܟ݂ܵܐ، ܫܩܘܿܠܘܼܢ ܠܵܘܟ݂ܘܿܢ ܡܲܪ̈ܟܒ݂ܵܬܹܐ ܡ̣ܢ ܐܲܪܥܵܐ ܕܡܸܨܪܹܝܢ ܩܵܐ ܝܲܠܘܼܕܵܘ̈ܟ݂ܘܿܢ، ܘܩܵܐ ܒܲܟ݂ܬܵܬܵܘ̈ܟ݂ܘܿܢ، ܘܫܩܘܿܠܘܼܢ ܠܒܵܒܵܘܟ݂ܘܿܢ ܘܬܹܝܡܘܼܢ. 20ܘܠܵܐ ܐܵܬܝܵܐ ܠܵܘܟ݂ܘܿܢ ܡܘܼܚܲܒܢܵܐ ܕܡܸܢܕܝܼܵܘܟ݂ܘܿܢ، ܣܵܒܵܒ ܫܵܦܵܩܲܬ ܕܟܠܵܗ̇ ܐܲܪܥܵܐ ܕܝܼܵܘܟ݂ܘܿܢ ܝܼܠܵܗ̇.‘“

21ܥܒ݂ܝܼܕ ܠܗܘܿܢ ܗܲܕܟ݂ܵܐ ܒܢܘܿܢܹ̈ܐ ܕܝܼܣܪܵܝܹܠ. ܝܘܼܗ݇ܒܸܠ ܠܹܗ ܐܸܠܲܝܗܝ ܝܵܘܣܸܦ ܡܲܪ̈ܟܒ݂ܵܬܹܐ ܒܚܲܒܪܵܐ ܕܦܸܪܥܘܿܢ، ܘܝܘܼܗ݇ܒܸܠ ܠܹܗ ܐܸܠܲܝܗܝ ܙܘܵܕܹ̈ܐ ܩܵܐ ܐܘܼܪܚܵܐ. 22ܠܟܠ ܚܲܕ ܐ݇ܢܵܫܵܐ ܝܘܼܗ݇ܒܸܠ ܠܹܗ ܕܲܣܬܵܐ ܕܓ̰ܘܼܠܹ̈ܐ؛ ܐܝܼܢܵܐ ܠܒܸܢܝܵܡܹܝܢ ܝܘܼܗ݇ܒܸܠ ܠܹܗ ܬܠܵܬܡܵܐܐ ܙܘܼܙܹ̈ܐ ܕܣܹܐܡܵܐ ܘܚܲܡܸܫ ܕܲܣܬܹ̈ܐ ܕܓ̰ܘܼܠܹ̈ܐ. 23ܘܩܵܐ ܒܵܒܘܼܗܝ ܫܘܼܕܸܪܹܗ ܐܲܢܹܐ: ܥܸܣܪܵܐ ܚܡܵܪܹ̈ܐ ܡܘܼܛܥܸܢܹܐ ܡ̣ܢ ܛܵܒ݂ܵܬܹ̈ܐ ܕܡܸܨܪܹܝܢ، ܘܥܸܣܪܵܐ ܚܡܵܪ̈ܝܵܬܹܐ ܡܘܼܛܥܸܢܹܐ ܕܲܚܠܵܐ ܘܠܲܚܡܵܐ ܘܡܹܐܟ݂ܘܼܠܬܵܐ ܠܒܵܒܘܼܗܝ ܩܵܐ ܐܘܼܪܚܵܐ. 24ܫܘܼܕܸܪܹܗ ܠܐܲܚܘܿܢܘܵܬܹ̈ܗ، ܘܟܲܕ ܐܵܢܝܼ ܒܹܐܙܵܠܵܐ ܐ݇ܡܝܼܪܹܗ ܐܸܠܲܝܗܝ، ”ܠܵܐ ܡܲܩܪܸܨܝܼܬܘܿܢ ܒܐܘܼܪܚܵܐ.“

ܚܲܕܘܼܬܵܐ ܕܝܼܣܪܵܝܹܠ

25ܐ݇ܣܝܼܩ ܠܗܘܿܢ ܡ̣ܢ ܡܸܨܪܹܝܢ، ܘܐ݇ܬܹܐ ܠܗܘܿܢ ܠܐܲܪܥܵܐ ܕܟܢܲܥܢ ܠܟܸܣ ܝܲܥܩܘܿܒ݂ ܒܵܒܲܝܗܝ. 26ܡܘܼܕܸܥ ܠܗܘܿܢ ܐܸܠܹܗ ܘܐ݇ܡܝܼܪܗܘܿܢ، ”ܗܹܫ ܝܵܘܣܸܦ ܚܵܝܵܐ ܝܠܹܗ، ܘܗ̇ܘ ܝܼܠܹܗ ܫܲܠܝܼܛܵܐ ܥܲܠ ܟܠܵܗ̇ ܐܲܪܥܵܐ ܕܡܸܨܪܹܝܢ.“ ܫܥܝܼܫ ܠܹܗ ܠܸܒܹܗ، ܣܵܒܵܒ ܠܵܐ ܗܘܼܡܸܢܹܗ ܐܸܠܲܝܗܝ. 27ܐܝܼܢܵܐ ܐܝܼܡܲܢ ܕܐ݇ܡܝܼܪܗܘܿܢ ܐܸܠܹܗ ܟܠܲܝܗܝ ܗܹܡܸܙܡܵܢܹ̈ܐ ܕܝܵܘܣܸܦ ܕܗܘܼܡܙܸܡܲܝ ܝܗ݇ܘܵܐ ܥܲܡܲܝܗܝ، ܘܐܝܼܡܲܢ ܕܚܙܹܐ ܠܹܗ ܠܡܲܪ̈ܟܒ݂ܵܬܹܐ ܕܫܘܼܕܪܲܝ ܝܗ݇ܘܵܐ ܝܵܘܣܸܦ ܠܠܲܒܘܼܠܲܝ، ܚܝܹܐ ܠܵܗ̇ ܪܘܼܚܵܐ ܕܝܲܥܩܘܿܒ݂ ܒܵܒܲܝܗܝ، 28ܘܐ݇ܡܝܼܪܹܗ ܝܼܣܪܵܝܹܠ، ”ܡܵܠܝܵܢܬܵܐ ܝܠܵܗ̇، ܗܹܫ ܝܵܘܣܸܦ ܒܪܘܿܢܝܼ ܚܵܝܵܐ ܝܠܹܗ. ܒܸܬ ܐܵܙܹܠ݇ܢ ܘܚܵܙܹܝܢܹܗ ܡ̣ܢ ܩܵܕ݇ܡ ܕܡܵܝܬܹܢ.“

Currently Selected:

ܒܪܝܬܐ 45: ABTAB

Highlight

Copy

Compare