ܒܪܝܬܐ 44

ܟܵܣܵܐ ܕܝܵܘܣܸܦ

1ܦܩܝܼܕ ܠܹܗ ܝܵܘܣܸܦ ܠܪܲܒ ܒܲܝܬܹܗ، ܒܹܐܡܵܪܵܐ، ”ܡܠܝܼ ܓ̰ܘܵܠܹ̈ܐ ܕܐܲܢܹܐ ܐ݇ܢܵܫܹ̈ܐ ܡܹܐܟ݂ܘܼܠܬܵܐ، ܟܡܵܐ ܕܡܵܨܝܼ ܛܵܥܢܝܼ، ܘܡܲܬܸܒ݂ ܙܘܼܙܹ̈ܐ ܕܟܠ ܚܲܕ ܒܦܘܼܡܵܐ ܕܓ̰ܘܵܠܹܗ. 2ܡܲܬܸܒ݂ ܟܵܣܝܼ، ܟܵܣܵܐ ܕܣܹܐܡܵܐ، ܒܦܘܼܡܵܐ ܕܓ̰ܘܵܠܵܐ ܕܗ̇ܘ ܙܥܘܿܪܵܐ، ܥܲܡ ܙܘܼܙܹ̈ܐ ܕܕܲܚܠܹܗ.“ ܘܥܒ݂ܝܼܕ ܠܹܗ ܐܲܝܟ݂ ܕܝܵܘܣܸܦ ܦܩܝܼܕ ܠܹܗ ܐܸܠܹܗ. 3ܐܝܼܡܲܢ ܕܒܘܼܗܪܸܢܹܗ ܨܲܦܪܵܐ، ܦܝܼܫ ܠܗܘܿܢ ܕܸܪܝܹܐ ܒܐܘܼܪܚܵܐ ܐ݇ܢܵܫܹ̈ܐ، ܥܲܡ ܚܡܵܪ̈ܲܝܗܝ. 4ܐܝܼܡܲܢ ܕܪܚܝܼܩ ܠܗܘܿܢ ܡ̣ܢ ܡܕܝܼܢ݇ܬܵܐ ܚܲܕ ܡܸܬܚܵܐ ܟܸܪܝܵܐ، ܐ݇ܡܝܼܪܹܗ ܝܵܘܣܸܦ ܠܪܲܒ ܒܲܝܬܹܗ، ”ܩܘܼܡ، ܢܦܘܿܠ ܒܵܬ݇ܪ ܕܐܵܢܝܼ ܐ݇ܢܵܫܹ̈ܐ، ܘܐܝܼܡܲܢ ܕܡܵܛܹܝܬ ܠܗܘܿܢ، ܐ݇ܡܘܿܪ ܐܸܠܲܝܗܝ، ’ܩܵܡܘܿܕܝܼ ܦܪܝܼܥ ܠܵܘܟ݂ܘܿܢ ܒܝܼܫܬܵܐ ܡ̣ܢ ܓܹܒܵܐ ܕܛܵܒ݂ܬܵܐ؟ 5ܠܹܐ ܡ̣ܢ ܐܵܗܵܐ ܟܵܣܵܐ ܫܵܬܹܐ ܡܵܪܝܼ، ܘܒܝܼܹܗ ܥܵܒܹܕ ܢܸܚܫܵܐ؟ ܥܒ݂ܝܼܕ ܠܵܘܟ݂ܘܿܢ ܒܝܼܫܬܵܐ ܒܐܵܗܵܐ ܡܸܢܕܝܼ.‘“ 6ܘܡܸܛܝܲܝ ܠܹܗ ܘܗܘܼܡܙܸܡ ܠܹܗ ܥܲܡܲܝܗܝ ܐܲܢܹܐ ܗܹܡܸܙܡܵܢܹ̈ܐ. 7ܐ݇ܡܝܼܪܗܘܿܢ ܐܸܠܹܗ، ”ܩܵܡܘܿܕܝܼ ܗܲܡܙܘܼܡܹܐ ܝܠܹܗ ܡܵܪܝܼ ܐܲܢܹܐ ܗܹܡܸܙܡܵܢܹ̈ܐ؟ ܚܵܣ ܠܪܹ̈ܓܵܘܵܬܘܼܟ݂ ܡ̣ܢ ܠܸܥܒ݂ܵܕܵܐ ܗܲܕܟ݂ܵܐ ܫܘܼܠܵܐ. 8ܗܵܐ، ܙܘܼܙܹ̈ܐ ܕܡܘܼܫ݇ܟ̰ܚܲܝ ܠܲܢ ܒܦܘܼܡܵܐ ܕܓ̰ܘܵܠܲܢ ܡܘܼܕܸܪܲܢ ܐܸܠܘܼܟ݂ ܡ̣ܢ ܐܲܪܥܵܐ ܕܟܢܲܥܢ؛ ܕܵܐܟ݂ܝܼ ܒܸܬ ܓܵܢܒܲܚ ܗ݇ܘܵܘ ܡ̣ܢ ܒܲܝܬܵܐ ܕܡܵܪܘܼܟ݂ ܣܹܐܡܵܐ ܝܲܢ ܕܲܗܒ݂ܵܐ؟ 9ܠܟܸܣ ܟܠ ܚܲܕ ܡ̣ܢ ܪܹ̈ܓܵܘܵܬܘܼܟ݂ ܡܲܫ݇ܟ̰ܸܚ، ܫܒ݂ܘܿܩ ܡܵܐܹܬ، ܘܐܘܼܦ ܐܲܚܢܲܢ ܒܸܬ ܗܵܘܲܚ ܪܹ̈ܓܵܘܵܬܹܐ ܠܡܵܪܝܼ.“ 10ܐ݇ܡܝܼܪܹܗ ܐܸܠܲܝܗܝ، ”ܒܸܬ ܗܵܘܹܐ ܐܲܝܟ݂ ܕܐ݇ܡܝܼܪܵܘܟ݂ܘܿܢ؛ ܥܲܡ ܟܠ ܕܦܵܐܹܫ ܡܫ݇ܟ̰ܝܼܚܵܐ، ܗ̇ܘ ܒܸܬ ܗܵܘܹܐ ܪܹܓܵܐ ܐܸܠܝܼ، ܐܝܼܢܵܐ ܦܵܝܫܵܢܹ̈ܐ ܡܸܢܵܘܟ݂ܘܿܢ ܒܸܬ ܗܵܘܝܼ ܡܘܼܟܫܸܛܹܐ.“ 11ܗ̇ܝܓܵܗ ܟܠ ܐ݇ܢܵܫܵܐ ܡܘܼܠܝܸܙ ܠܹܗ ܘܡܘܼܨܠܝܼܵܐ ܠܹܗ ܓ̰ܘܵܠܹܗ ܠܐܲܪܥܵܐ، ܘܦܬܝܼܚ ܠܹܗ ܟܠ ܐ݇ܢܵܫܵܐ ܠܓ̰ܘܵܠܹܗ. 12ܘܛܥܹܐ ܠܹܗ، ܫܲܪܘܼܝܹܐ ܡ̣ܢ ܓܘܼܪܵܐ ܒܸܚܬܵܡܵܐ ܒܙܥܘܿܪܵܐ. ܘܡܘܼܫ݇ܟ̰ܸܚ ܠܹܗ ܟܵܣܵܐ ܒܓ̰ܘܵܠܵܐ ܕܒܸܢܝܵܡܹܝܢ. 13ܟ̰ܘܼܢܟ̰ܸܪܗܘܿܢ ܓ̰ܘܼܠܲܝ̈ܗܝ، ܘܟܠ ܐ݇ܢܵܫܵܐ ܡܘܼܛܥܸܢܹܗ ܚܡܵܪܹܗ ܘܕܝܼܪܗܘܿܢ ܠܡܕܝܼܢ݇ܬܵܐ.

14ܐܝܼܡܲܢ ܕܐ݇ܬܹܐ ܠܗܘܿܢ ܝܼܗܘܼܕܵܐ ܘܐܲܚܘܿܢܘܵܬܹ̈ܗ ܠܒܲܝܬܵܐ ܕܝܵܘܣܸܦ، ܗ̇ܘ ܗܹܫ ܬܵܡܵܐ ܝܗ݇ܘܵܐ. ܢܦܝܼܠ ܠܗܘܿܢ ܩܵܕ݇ܡܘܼܗܝ ܠܐܲܪܥܵܐ. 15ܐ݇ܡܝܼܪܹܗ ܐܸܠܲܝܗܝ ܝܵܘܣܸܦ، ”ܡܘܿܕܝܼ ܝܠܹܗ ܐܵܗܵܐ ܫܘܼܠܵܐ ܕܥܒ݂ܝܼܕ ܠܵܘܟ݂ܘܿܢ؟ ܠܹܐ ܝܵܕܥܝܼܬܘܿܢ ܕܐ݇ܢܵܫܵܐ ܐܲܝܟ݂ ܕܝܼܝܼ ܟܹܐ ܥܵܒܹܕ ܢܸܚܫܵܐ؟“ 16ܓ̰ܘܼܘܸܒ ܠܹܗ ܝܼܗܘܼܕܵܐ، ”ܡܘܿܕܝܼ ܐܵܡܪܲܚ ܠܡܵܪܝܼ؟ ܡܘܿܕܝܼ ܗܲܡܙܸܡܲܚ؟ ܘܕܵܐܟ݂ܝܼ ܡܲܟܫܸܛܲܚ ܓܵܢܲܢ؟ ܐܲܠܵܗܵܐ ܓܠܹܐ ܠܹܗ ܠܥܵܘܠܵܐ ܕܪܹ̈ܓܵܘܵܬܘܼܟ݂. ܗܵܐ، ܐܲܚܢܲܢ ܪܹ̈ܓܵܘܵܬܹܐ ܝܘܲܚ ܠܡܵܪܝܼ، ܐܲܚܢܲܢ ܘܐܘܼܦ ܗ̇ܘ ܕܦܝܼܫ ܠܹܗ ܡܫ݇ܟ̰ܝܼܚܵܐ ܟܵܣܵܐ ܥܲܡܹܗ.“ 17ܐ݇ܡܝܼܪܹܗ ܝܵܘܣܸܦ، ”ܚܵܣ ܠܝܼ ܕܥܵܒ݂ܕܹܢ ܐܵܗܵܐ. ܐ݇ܢܵܫܵܐ ܕܦܝܼܫ ܠܹܗ ܡܫ݇ܟ̰ܝܼܚܵܐ ܟܵܣܵܐ ܥܲܡܹܗ، ܐܲܚܟ̰ܝܼ ܗ̇ܘ ܒܸܬ ܗܵܘܹܐ ܪܹܓܵܐ ܐܸܠܝܼ؛ ܘܐܲܚܬܘܿܢ ܐ݇ܣܘܿܩܘܼܢ ܒܫܠܵܡܵܐ ܠܟܸܣ ܒܵܒܵܘܟ݂ܘܿܢ.“

ܦܲܪ̈ܦܲܠܝܵܬܹܐ ܕܝܼܗܘܼܕܵܐ ܩܵܕ݇ܡ ܝܵܘܣܸܦ

18ܩܘܼܪܒܸܢܹܗ ܠܟܸܣ ܠܹܗ ܝܼܗܘܼܕܵܐ ܘܐ݇ܡܝܼܪܹܗ، ”ܝܵܐ ܡܵܪܝܼ، ܦܲܪܦܘܼܠܹܐ ܝܘܸܢ، ܫܒ݂ܘܿܩ ܗܲܡܙܸܡ ܪܹܓܘܼܟ݂ ܚܲܕ ܚܲܒܪܵܐ ܩܵܕ݇ܡ ܡܵܪܝܼ، ܘܠܵܐ ܚܵܝܡܵܐ ܟܲܪܒܘܼܟ݂ ܥܲܠ ܪܹܓܘܼܟ݂، ܣܵܒܵܒ ܐܲܝܟ݂ ܦܸܪܥܘܿܢ ܝܼܘܸܬ ܒܓܵܢܹܗ. 19ܡܵܪܝܼ ܒܘܼܩܸܪܹܗ ܡ̣ܢ ܪܹ̈ܓܵܘܵܬܹܗ، ܒܹܐܡܵܪܵܐ، ’ܐܝܼܬ ܠܵܘܟ݂ܘܿܢ ܒܵܒܵܐ ܝܲܢ ܐܲܚܘܿܢܵܐ؟‘ 20ܘܐ݇ܡܝܼܪܲܢ ܠܡܵܪܝܼ، ’ܐܝܼܬ ܠܲܢ ܒܵܒܵܐ ܣܵܒ݂ܵܐ، ܘܚܲܕ ܝܵܠܵܕ݇ܐ ܕܣܲܝܒܘܼܬܹܗ، ܙܥܘܿܪܵܐ؛ ܐܲܚܘܿܢܘܼܗܝ ܡܝܼܬܵܐ ܝܠܹܗ، ܘܗ̇ܘ ܝܼܠܹܗ ܦܝܼܫܵܐ ܒܢܲܦ̮ܫܹܗ ܡ̣ܢ ܝܵܠܹ̈ܕ݇ܐ ܕܝܸܡܹܗ، ܘܒܵܒܘܼܗܝ ܟܹܐ ܡܲܚܸܒ ܠܹܗ.‘ 21ܘܐ݇ܡܝܼܪܘܼܟ݂ ܠܪܹ̈ܓܵܘܵܬܘܼܟ݂، ’ܡܲܨܠܸܝܡܘܼܢ ܠܹܗ ܠܟܸܣ ܠܝܼ ܕܚܵܙܹܝܢܹܗ.‘ 22ܘܐ݇ܡܝܼܪܲܢ ܠܡܵܪܝܼ، ’ܠܹܐ ܡܵܨܹܐ ܝܵܠܵܕ݇ܐ ܫܵܒܹܩ ܠܒܵܒܘܼܗܝ، ܣܵܒܵܒ ܐܸܢ ܫܵܒܹܩ ܠܹܗ، ܒܸܬ ܡܵܐܹܬ ܒܵܒܘܼܗܝ.‘ 23ܘܐ݇ܡܝܼܪܘܼܟ݂ ܠܪܹ̈ܓܵܘܵܬܘܼܟ݂، ’ܐܸܢ ܠܵܐ ܨܵܠܹܐ ܐܲܚܘܿܢܵܘܟ݂ܘܿܢ ܙܥܘܿܪܵܐ ܥܲܡܵܘܟ݂ܘܿܢ، ܠܵܐ ܚܵܙܹܝܬܘܿܢ ܠܵܗ̇ ܦܵܬܝܼ ܡܸܢܕܪܸܫ.‘ 24ܐܝܼܡܲܢ ܕܐ݇ܣܝܼܩ ܠܲܢ ܠܟܸܣ ܪܹܓܘܼܟ݂ ܒܵܒܝܼ، ܡܘܼܕܸܥ ܠܲܢ ܐܸܠܹܗ ܗܹܡܸܙܡܵܢܹ̈ܐ ܕܡܵܪܝܼ. 25ܘܐ݇ܡܝܼܪܹܗ ܒܵܒܲܢ، ’ܕܘܼܪܘܼܢ ܘܙܒ݂ܘܿܢܘܼܢ ܠܲܢ ܚܲܕ݇ܟ̰ܵܐ ܡܹܐܟ݂ܘܼܠܬܵܐ.‘ 26ܐ݇ܡܝܼܪܲܢ، ’ܠܹܐ ܡܵܨܲܚ ܨܵܠܲܚ. ܐܸܢ ܗܵܘܹܐ ܐܲܚܘܿܢܲܢ ܙܥܘܿܪܵܐ ܥܲܡܲܢ ܒܸܬ ܨܵܠܲܚ؛ ܣܵܒܵܒ ܠܹܐ ܡܵܨܲܚ ܚܵܙܲܚ ܠܵܗ̇ ܦܵܬܵܐ ܕܗ̇ܘ ܐ݇ܢܵܫܵܐ ܐܸܢ ܐܲܚܘܿܢܲܢ ܙܥܘܿܪܵܐ ܠܵܐ ܗܵܘܹܐ ܥܲܡܲܢ.‘ 27ܘܐ݇ܡܝܼܪܹܗ ܪܹܓܘܼܟ݂ ܒܵܒܝܼ ܐܸܠܲܢ، ’ܟܹܐ ܝܵܕܥܝܼܬܘܿܢ ܕܒܲܟ݂ܬܝܼ ܗܘܼܨܸܠ ܠܵܗ̇ ܐܸܠܝܼ ܬܪܹܝ ܒܢܘܿܢܹ̈ܐ؛ 28ܚܲܕ ܦܠܝܼܛ ܠܹܗ ܡ̣ܢ ܠܟܸܣ ܠܝܼ، ܘܐ݇ܡܝܼܪܝܼ، ”ܫܲܪܝܼܪܵܐܝܼܬ ܦܪܵܛܵܐ ܦܝܼܫܵܐ ܝܠܹܗ ܦܪܝܼܛܵܐ؛“ ܘܐ݇ܚܹܪ݇ܢܵܐ ܠܹܐ ܝܘܸܢ ܚܸܙܝܹܗ. 29ܐܸܢ ܫܵܩܠܝܼܬܘܿܢ ܠܹܗ ܐܘܼܦ ܐܵܗܵܐ ܡܸܢܝܼ، ܘܬܵܦܹܩ ܒܝܼܹܗ ܚܘܼܙܕܵܓܵܐ، ܒܸܬ ܡܲܨܠܸܝܬܘܿܢ ܠܵܗ̇ ܣܲܝܒܘܼܬܝܼ ܦܫܝܼܡܬܵܐ ܠܫܝܘܿܠ.‘ 30ܐܵܕܝܼܵܐ ܐܸܢ ܕܵܝܪܹܢ ܠܟܸܣ ܪܹܓܘܼܟ݂ ܒܵܒܝܼ، ܘܝܵܠܵܕ݇ܐ ܠܵܐ ܗܵܘܹܐ ܥܲܡܲܢ، ܘܟܲܕ ܓܵܢܹܗ ܐ݇ܣܝܼܪܬܵܐ ܝܠܵܗ̇ ܒܓܵܢܵܐ ܕܝܵܠܵܕ݇ܐ، 31ܒܸܬ ܗܵܘܝܵܐ ܟܲܕ ܚܵܙܹܐ ܕܠܲܝܬ ܝܵܠܵܕ݇ܐ، ܒܸܬ ܡܵܐܹܬ؛ ܘܒܸܬ ܡܲܨܠܝܼ ܪܹ̈ܓܵܘܵܬܘܼܟ݂ ܠܣܲܝܒܘܼܬܵܐ ܕܪܹܓܘܼܟ݂ ܒܵܒܲܢ ܦܫܝܼܡܬܵܐ ܠܫܝܘܿܠ. 32ܣܵܒܵܒ ܪܹܓܘܼܟ݂ ܗܘܹܐ ܠܹܗ ܡܸܫܬܲܐܠܵܢܵܐ ܕܝܵܠܵܕ݇ܐ ܠܟܸܣ ܒܵܒܝܼ، ܐܝܼܡܲܢ ܕܐ݇ܡܝܼܪܝܼ ܐܸܠܹܗ، ’ܐܸܢ ܠܵܐ ܡܲܝܬܸܝܢܹܗ ܠܟܸܣ ܠܘܼܟ݂، ܗܵܘܹܝܢ ܚܲܝܵܒ݂ܵܐ ܠܒܵܒܝܼ ܟܠܲܝܗܝ ܝܵܘܡܵܢܹ̈ܐ ܕܚܲܝܝܼ̈.‘ 33ܘܐܵܕܝܼܵܐ ܦܲܪܦܘܼܠܹܐ ܝܘܸܢ ܒܝܼܘܼܟ݂، ܫܵܒ݂ܩܹܬ ܪܹܓܘܼܟ݂ ܦܵܐܹܫ ܥܲܒ݂ܕܵܐ ܠܡܵܪܝܼ ܡ̣ܢ ܓܹܒܵܐ ܕܝܵܠܵܕ݇ܐ، ܘܝܵܠܵܕ݇ܐ ܕܵܐܹܪ ܥܲܡ ܐܲܚܘܿܢܘܵܬܹ̈ܗ. 34ܣܵܒܵܒ ܕܵܐܟ݂ܝܼ ܕܵܝܪܹܢ ܠܟܸܣ ܒܵܒܝܼ ܟܲܕ ܝܵܠܵܕ݇ܐ ܠܵܐ ܥܲܡܝܼ؟ ܒܸܙܕܵܥܵܐ ܝܘܸܢ ܕܚܵܙܹܝܢ ܠܒܝܼܫܬܵܐ ܕܡܵܛܝܵܐ ܠܒܵܒܝܼ.“

Currently Selected:

ܒܪܝܬܐ 44: ABTAB

Highlight

Copy

Compare