ܒܪܝܬܐ 43

ܐܲܚܘܿܢܘܵܬܹ̈ܐ ܕܝܵܘܣܸܦ ܒܸܕܝܵܪܵܐ ܠܡܸܨܪܹܝܢ

1ܚܘܼܠܸܢܹܗ ܟܸܦܢܵܐ ܒܐܲܪܥܵܐ. 2ܘܗܘܹܐ ܠܵܗ̇ ܟܲܕ ܦܪܝܼܩ ܠܵܗ̇ ܕܲܚܠܵܐ ܕܡܘܼܐܬܝܘܼܗ̇ ܝܗ݇ܘܵܐ ܡ̣ܢ ܡܸܨܪܹܝܢ، ܐ݇ܡܝܼܪܹܗ ܐܸܠܲܝܗܝ ܒܵܒܲܝܗܝ، ”ܕܘܼܪܘܼܢ ܘܙܒ݂ܘܿܢܘܼܢ ܠܲܢ ܚܲܕ݇ܟ̰ܵܐ ܡܹܐܟ݂ܘܼܠܬܵܐ.“ 3ܐ݇ܡܝܼܪܹܗ ܐܸܠܹܗ ܝܼܗܘܼܕܵܐ، ”ܓܙܵܡܵܐ ܓܙܝܼܡ ܠܹܗ ܥܲܠܲܢ ܗ̇ܘ ܐ݇ܢܵܫܵܐ، ܒܹܐܡܵܪܵܐ، ’ܠܵܐ ܚܵܙܹܝܬܘܿܢ ܦܵܬܝܼ ܐܸܢ ܠܵܐ ܗܵܘܹܐ ܐܲܚܘܿܢܵܘܟ݂ܘܿܢ ܥܲܡܵܘܟ݂ܘܿܢ.‘ 4ܐܸܢ ܫܲܕܪܸܬ ܠܹܗ ܐܲܚܘܿܢܲܢ ܥܲܡܲܢ، ܒܸܬ ܨܵܠܲܚ ܘܙܵܒ݂ܢܲܚ ܠܘܼܟ݂ ܡܹܐܟ݂ܘܼܠܬܵܐ؛ 5ܐܝܼܢܵܐ ܐܸܢ ܠܵܐ ܫܲܕܪܸܬ ܠܹܗ، ܠܹܐ ܨܵܠܲܚ، ܣܵܒܵܒ ܗ̇ܘ ܐ݇ܢܵܫܵܐ ܐ݇ܡܝܼܪܹܗ ܐܸܠܲܢ، ’ܠܵܐ ܚܵܙܹܝܬܘܿܢ ܦܵܬܝܼ ܐܸܢ ܠܵܐ ܗܵܘܹܐ ܐܲܚܘܿܢܵܘܟ݂ܘܿܢ ܥܲܡܵܘܟ݂ܘܿܢ.‘“ 6ܐ݇ܡܝܼܪܹܗ ܝܼܣܪܵܝܹܠ، ”ܩܵܡܘܿܕܝܼ ܥܒ݂ܝܼܕ ܠܵܘܟ݂ܘܿܢ ܣܪܝܼܬܵܐ ܥܲܠܝܼ، ܕܡܘܼܕܸܥ ܠܵܘܟ݂ܘܿܢ ܠܗ̇ܘ ܐ݇ܢܵܫܵܐ ܐܸܢ ܐܝܼܬ ܗ݇ܘܵܐ ܠܵܘܟ݂ܘܿܢ ܐܲܚܘܿܢܵܐ ܐ݇ܚܹܪ݇ܢܵܐ؟“ 7ܓ̰ܘܼܘܸܒ ܠܗܘܿܢ، ”ܒܘܼܩܸܪܹܗ ܗ̇ܘ ܐ݇ܢܵܫܵܐ ܥܲܠܲܢ ܘܥܲܠ ܫܲܪܒܬܲܢ، ܒܹܐܡܵܪܵܐ، ’ܗܹܫ ܚܵܝܵܐ ܝܠܹܗ ܒܵܒܵܘܟ݂ܘܿܢ؟ ܐܝܼܬ ܠܵܘܟ݂ܘܿܢ ܐܲܚܘܿܢܵܐ؟‘ ܘܓ̰ܘܼܘܸܒ ܠܲܢ ܐܸܠܹܗ ܐܲܝܟ݂ ܒܘܼܩܵܪ̈ܘܼܗܝ؛ ܡ̣ܢ ܐܲܝܟܵܐ ܝܵܕܥܲܚ ܗ݇ܘܵܘ ܒܸܬ ܐܵܡܹܪ ܗ݇ܘܵܐ، ’ܡܲܨܠܸܝܡܘܼܢ ܠܐܲܚܘܿܢܵܘܟ݂ܘܿܢ؟‘“ 8ܘܐ݇ܡܝܼܪܹܗ ܝܼܗܘܼܕܵܐ ܠܝܼܣܪܵܝܹܠ ܒܵܒܘܼܗܝ، ”ܫܲܕܸܪ ܠܥܠܲܝܡܵܐ ܥܲܡܝܼ، ܘܩܵܝܡܲܚ ܘܐܵܙܲܠ݇ܚ، ܕܚܵܝܲܚ ܘܠܵܐ ܡܵܝܬܲܚ، ܐܲܚܢܲܢ ܘܐܲܢ݇ܬ، ܘܐܘܼܦ ܝܲܠܘܼܕܲܢ̈. 9ܐܵܢܵܐ ܒܸܬ ܗܵܘܹܝܢ ܡܸܫܬܲܐܠܵܢܵܐ ܩܵܬܹܗ؛ ܡ̣ܢ ܐܝܼܕܝܼ ܛܵܠܒܹܬ ܠܹܗ. ܐܸܢ ܠܵܐ ܡܲܝܬܸܝܢܹܗ ܠܟܸܣ ܠܘܼܟ݂ ܘܡܲܟܠܸܝܢܹܗ ܩܵܕ݇ܡܘܼܟ݂، ܒܸܬ ܗܵܘܹܝܢ ܚܲܛܵܝܵܐ ܐܸܠܘܼܟ݂ ܗܲܠ ܠܥܵܠܲܡ. 10ܣܵܒܵܒ ܐܸܢ ܠܵܐ ܗܵܘܲܚ ܗ݇ܘܵܘ ܥܘܼܪܩܸܠܹܐ، ܐܵܕܝܼܵܐ ܒܸܬ ܗܵܘܲܚ ܗ݇ܘܵܘ ܕܝܼܪܹܐ ܓܵܗܵܐ ܕܬܲܪܬܹܝ.“ 11ܐ݇ܡܝܼܪܹܗ ܐܸܠܲܝܗܝ ܝܼܣܪܵܝܹܠ ܒܵܒܲܝܗܝ، ”ܐܸܢ ܗܲܪ ܗܲܕܟ݂ܵܐ ܝܠܵܗ̇، ܥܒ݂ܘܿܕܘܼܢ ܐܵܗܵܐ: ܫܩܘܿܠܘܼܢ ܡ̣ܢ ܛܥܘܼܢܝܵܬܹ̈ܐ ܨܦܵܝܝܼ ܕܐܲܪܥܵܐ ܓܵܘ ܡܵܐܢܵܘ̈ܟ݂ܘܿܢ، ܘܡܲܨܠܸܝܡܘܼܢ ܡܵܘܗܒ݂ܵܬܹ̈ܐ ܠܗ̇ܘ ܐ݇ܢܵܫܵܐ، ܚܲܕ݇ܟ̰ܵܐ ܫܥܘܿܬܵܐ، ܘܚܲܕ݇ܟ̰ܵܐ ܕܸܒ݂ܫܵܐ، ܗܹܪ̈ܘܿܡܹܐ، ܡܘܼܪܵܐ، ܦܸܣܬܵܩܹ̈ܐ، ܘܫܲܓ݂݇ܕܹ̈ܐ. 12ܘܠܲܒܠܘܼܢ ܙܘܼܙܹ̈ܐ ܚܲܕ ܒܬܪܹܝ؛ ܘܙܘܼܙܵܐ ܕܦܝܼܫ ܠܹܗ ܡܘܼܕܸܪܵܐ ܒܦܘܼܡܵܐ ܕܓ̰ܘܵܠܵܘ̈ܟ݂ܘܿܢ، ܡܲܕܸܪܝܼܬܘܿܢ ܠܹܗ ܥܲܡܵܘܟ݂ܘܿܢ. ܩܵܘܡܵܐ ܕܗܘܝܼܵܐ ܝܠܹܗ ܚܲܕ ܚܸܠܛܵܐ. 13ܘܫܩܘܿܠܘܼܢ ܠܐܲܚܘܿܢܵܘܟ݂ܘܿܢ، ܩܘܼܡܘܼܢ ܘܕܘܼܪܘܼܢ ܠܟܸܣ ܗ̇ܘ ܐ݇ܢܵܫܵܐ. 14ܐܹܝܠ ܫܲܕܲܝ ܝܲܗ݇ܒܸܠ ܠܵܘܟ݂ܘܿܢ ܪ̈ܲܚܡܹܐ ܩܵܕ݇ܡ ܗ̇ܘ ܐ݇ܢܵܫܵܐ، ܕܫܲܕܸܪ ܥܲܡܵܘܟ݂ܘܿܢ ܠܐܲܚܘܿܢܵܘܟ݂ܘܿܢ ܐ݇ܚܹܪ݇ܢܵܐ ܘܠܒܸܢܝܵܡܹܝܢ. ܐܸܢ ܦܝܼܫ ܠܝܼ ܐܵܢܵܐ ܩܛܝܼܥܵܐ ܡ̣ܢ ܝܵܠܹ̈ܕ݇ܐ، ܦܝܼܫ ܠܝܼ ܩܛܝܼܥܵܐ.“ 15ܫܩܝܼܠ ܠܗܘܿܢ ܐܵܢܝܼ ܐ݇ܢܵܫܹ̈ܐ ܠܐܵܢܝܼ ܡܵܘܗܒ݂ܵܬܹ̈ܐ، ܘܙܘܼܙܹ̈ܐ ܚܲܕ ܒܬܪܹܝ ܫܩܝܼܠ ܠܗܘܿܢ ܥܲܡܲܝܗܝ، ܘܐܘܼܦ ܠܒܸܢܝܵܡܹܝܢ. ܩܝܼܡ ܠܗܘܿܢ ܘܨܠܹܐ ܠܗܘܿܢ ܠܡܸܨܪܹܝܢ ܘܟܠܹܐ ܠܗܘܿܢ ܩܵܕ݇ܡ ܝܵܘܣܸܦ.

ܝܵܘܣܸܦ ܒܸܥܒ݂ܵܕܵܐ ܐܲܪܚܘܼܬܵܐ ܩܵܐ ܐܲܚܘܿܢܘܵܬܹ̈ܗ

16ܐܝܼܡܲܢ ܕܚܙܹܐ ܠܹܗ ܝܵܘܣܸܦ ܠܒܸܢܝܵܡܹܝܢ ܥܲܡܲܝܗܝ، ܐ݇ܡܝܼܪܹܗ ܠܡܕܲܒܪܵܢܵܐ ܕܒܲܝܬܹܗ، ”ܡܲܝܬܝܼ ܠܗܘܿܢ ܐܲܢܹܐ ܐ݇ܢܵܫܹ̈ܐ ܠܒܲܝܬܵܐ، ܘܦܪܘܿܡ ܚܲܕ ܥܸܪܒܵܐ، ܘܗܲܕܸܪ ܟܵܘܸܬܪܵܐ، ܣܵܒܵܒ ܥܲܡܝܼ ܒܸܬ ܐܵܟ݂ܠܝܼ ܐܲܢܹܐ ܐ݇ܢܵܫܹ̈ܐ.“ 17ܘܥܒ݂ܝܼܕ ܠܹܗ ܗ̇ܘ ܐ݇ܢܵܫܵܐ ܕܵܐܟ݂ܝܼ ܕܐ݇ܡܝܼܪܹܗ ܐܸܠܹܗ ܝܵܘܣܸܦ، ܘܡܘܼܐܬܹܐ ܠܹܗ ܠܐ݇ܢܵܫܹ̈ܐ ܠܒܲܝܬܵܐ ܕܝܵܘܣܸܦ. 18ܙܕܝܼܥ ܠܗܘܿܢ ܐܵܢܝܼ ܐ݇ܢܵܫܹ̈ܐ ܣܵܒܵܒ ܦܝܼܫ ܠܗܘܿܢ ܡܘܼܐܬܝܹܐ ܠܒܲܝܬܵܐ ܕܝܵܘܣܸܦ، ܘܐ݇ܡܝܼܪܗܘܿܢ، ”ܒܘܼܬ ܥܸܠܬܵܐ ܕܙܘܼܙܹ̈ܐ ܕܦܝܼܫ ܠܗܘܿܢ ܡܘܼܕܸܪܹܐ ܓܵܘ ܓ̰ܘܵܠܲܢ̈ ܒܓܵܗܵܐ ܩܵܕ݇ܡܵܝܬܵܐ، ܦܝܵܫܵܐ ܝܘܲܚ ܡܘܼܐܬܝܹܐ ܠܐܲܟ݂ܵܐ، ܕܡܲܫ݇ܟ̰ܸܚ ܥܸܠܬܵܐ ܒܝܼܲܢ، ܘܢܵܦܹܠ ܥܲܠܲܢ، ܕܥܵܒܹܕ ܠܲܢ ܥܲܒ݂ܕܹ̈ܐ ܘܫܵܩܹܠ ܠܗܘܿܢ ܚܡܵܪ̈ܲܢ.“ 19ܘܩܘܼܪܒܸܢܗܘܿܢ ܠܟܸܣ ܕܗ̇ܘ ܐ݇ܢܵܫܵܐ ܕܝܼܗ݇ܘܵܐ ܪܲܒ ܒܲܝܬܵܐ ܕܝܵܘܣܸܦ، ܘܗܘܼܡܙܸܡ ܠܗܘܿܢ ܥܲܡܹܗ ܩܵܕ݇ܡ ܬܲܪܥܵܐ ܕܒܲܝܬܵܐ. 20ܐ݇ܡܝܼܪܗܘܿܢ، ”ܝܵܐ ܡܵܪܝܼ، ܐܝܼܡܲܢ ܕܨܠܹܐ ܠܲܢ ܩܵܕ݇ܡܵܝܬܵܐ ܠܸܙܒ݂ܵܢܵܐ ܡܹܐܟ݂ܘܼܠܬܵܐ، 21ܐ݇ܬܹܐ ܠܲܢ ܠܒܹܝܬ ܡܲܫܪܝܵܐ ܘܦܬܝܼܚ ܠܲܢ ܠܓ̰ܘܵܠܲܢ̈، ܘܚܙܹܐ ܠܲܢ ܙܘܼܙܹ̈ܐ ܕܟܠ ܐ݇ܢܵܫܵܐ ܐܲܝܟ݂ ܬܩܘܼܠܬܹܗ ܒܦܘܼܡܵܐ ܕܓ̰ܘܵܠܹܗ، ܐܝܼܢܵܐ ܗܵܐ، ܡܘܼܕܸܪܲܝ ܝܘܲܚ ܥܲܡܲܢ. 22ܘܙܘܼܙܹ̈ܐ ܐ݇ܚܹܪ̈݇ܢܹܐ ܡܘܼܐܬܝܹܐ ܝܘܲܚ ܥܲܡܲܢ ܠܸܙܒ݂ܵܢܵܐ ܡܹܐܟ݂ܘܼܠܬܵܐ. ܠܹܐ ܝܵܕܥܲܚ ܡܵܢܝܼ ܡܘܼܬܸܒ݂ ܠܹܗ ܙܘܼܙܲܢ̈ ܒܓ̰ܘܵܠܲܢ̈.“ 23ܓ̰ܘܼܘܸܒ ܠܹܗ ܐܸܠܲܝܗܝ، ”ܗܘܹܝܡܘܼܢ ܒܫܠܵܡܵܐ، ܠܵܐ ܙܵܕܥܝܼܬܘܿܢ؛ ܐܲܠܵܗܵܘܟ݂ܘܿܢ ܘܐܲܠܵܗܵܐ ܕܒܵܒܵܘܟ݂ܘܿܢ ܡܘܼܬܒ݂ܵܐ ܝܠܹܗ ܐܸܠܵܘܟ݂ܘܿܢ ܣܝܼܡܬܵܐ ܒܓ̰ܘܵܠܵܘ̈ܟ݂ܘܿܢ؛ ܡܸܛܝܹܐ ܝܢܵܐ ܙܘܼܙܵܘ̈ܟ݂ܘܿܢ ܠܟܸܣ ܠܝܼ.“ ܗ̇ܝܓܵܗ ܦܘܼܠܸܛ ܠܹܗ ܠܫܸܡܥܘܿܢ ܘܝܘܼܗ݇ܒܸܠ ܠܹܗ ܐܸܠܲܝܗܝ. 24ܡܘܼܐܬܹܐ ܠܹܗ ܐܸܠܲܝܗܝ ܗ̇ܘ ܐ݇ܢܵܫܵܐ ܠܒܲܝܬܵܐ ܕܝܵܘܣܸܦ، ܝܘܼܗ݇ܒܸܠ ܠܹܗ ܐܸܠܲܝܗܝ ܡ̈ܝܼܵܐ ܘܚܘܼܠܸܠ ܠܗܘܿܢ ܐܲܩܠܵܬܲܝ̈ܗܝ، ܘܝܘܼܗ݇ܒܸܠ ܠܹܗ ܡܹܐܟ݂ܠܵܐ ܠܚܡܵܪ̈ܲܝܗܝ. 25ܘܗܘܼܕܸܪܗܘܿܢ ܡܵܘܗܒ݂ܵܬܲܝ̈ܗܝ ܗܲܠ ܕܐ݇ܬܹܐ ܠܹܗ ܝܵܘܣܸܦ ܒܦܲܠܓܵܐ ܕܝܵܘܡܵܐ، ܣܵܒܵܒ ܫܡܝܼܥ ܠܗܘܿܢ ܕܬܵܡܵܐ ܒܸܬ ܐܵܟ݂ܠܝܼ ܗ݇ܘܵܘ ܠܲܚܡܵܐ. 26ܐܝܼܡܲܢ ܕܐ݇ܬܹܐ ܠܹܗ ܝܵܘܣܸܦ ܠܒܲܝܬܵܐ، ܡܘܼܐܬܹܐ ܠܗܘܿܢ ܐܸܠܹܗ ܠܡܵܘܗܒ݂ܵܬܹ̈ܐ ܕܝܼܗ݇ܘܵܘ ܥܲܡܲܝܗܝ، ܘܡܘܼܟܸܦܵܐ ܠܗܘܿܢ ܓܵܢܲܝܗܝ ܠܐܲܪܥܵܐ ܩܵܕ݇ܡܘܼܗܝ. 27ܒܘܼܩܸܪܹܗ ܡܸܢܲܝܗܝ ܒܘܼܬ ܐܲܝܟܲܢܵܝܘܼܬܲܝܗܝ، ܒܹܐܡܵܪܵܐ، ”ܕܵܐܟ݂ܝܼ ܝܠܹܗ ܒܵܒܵܘܟ݂ܘܿܢ ܣܵܒ݂ܵܐ، ܕܗܘܼܡܙܸܡ ܠܵܘܟ݂ܘܿܢ ܒܘܼܬ ܕܝܼܹܗ؟ ܗܹܫ ܚܵܝܵܐ ܝܠܹܗ؟“ 28ܓ̰ܘܼܘܸܒ ܠܗܘܿܢ، ”ܫܠܵܡܵܐ ܝܠܹܗ ܠܪܹܓܘܼܟ݂، ܒܵܒܲܢ، ܗܹܫ ܚܵܝܵܐ ܝܠܹܗ.“ ܘܡܘܼܟܸܦܵܐ ܠܗܘܿܢ ܓܵܢܲܝܗܝ ܘܛܥܝܼܦ ܠܗܘܿܢ ܩܵܕ݇ܡܘܼܗܝ. 29ܘܡܘܼܪܸܡ ܠܹܗ ܥܲܝܢܘܼ̈ܗܝ ܘܚܙܹܐ ܠܹܗ ܠܒܸܢܝܵܡܹܝܢ ܐܲܚܘܿܢܘܼܗܝ، ܒܪܘܿܢܵܐ ܕܝܸܡܹܗ، ܘܐ݇ܡܝܼܪܹܗ، ”ܐܵܗܵܐ ܝܠܹܗ ܐܲܚܘܿܢܵܘܟ݂ܘܿܢ ܙܥܘܿܪܵܐ ܕܗܘܼܡܙܸܡ ܠܵܘܟ݂ܘܿܢ ܐܸܠܝܼ ܒܘܼܬ ܕܝܼܹܗ.“ ܘܐ݇ܡܝܼܪܹܗ ܐܸܠܹܗ، ”ܐܲܠܵܗܵܐ ܥܵܒܹܕ ܫܵܦܵܩܲܬ ܥܲܡܘܼܟ݂، ܒܪܘܿܢܝܼ.“ 30ܘܡܘܼܠܝܸܙ ܠܹܗ ܝܵܘܣܸܦ ܘܦܠܝܼܛ ܠܹܗ، ܣܵܒܵܒ ܪܘܼܚܪܸܚ ܠܹܗ ܠܸܒܹܗ ܠܐܲܚܘܿܢܘܼܗܝ، ܘܒܥܹܐ ܠܹܗ ܕܘܼܟܵܐ ܠܸܒܟ݂ܵܝܵܐ. ܥܒ݂ܝܼܪܹܗ ܠܬܵܘܵܢܹܗ ܘܒܟܹܐ ܠܹܗ ܬܵܡܵܐ. 31ܗ̇ܝܓܵܗ ܚܘܼܠܸܠ ܠܹܗ ܦܵܬܹܗ ܘܕܝܼܪܹܗ؛ ܘܕܒ݂ܝܼܩܵܐ ܠܹܗ ܓܵܢܹܗ، ܘܐ݇ܡܝܼܪܹܗ، ”ܡܲܬܒ݂ܘܼܢ ܡܹܐܟ݂ܘܼܠܬܵܐ.“ 32ܡܘܼܬܸܒ݂ ܠܗܘܿܢ ܐܸܠܹܗ ܡܹܐܟ݂ܘܼܠܬܵܐ ܒܢܲܦ̮ܫܹܗ، ܘܠܐܵܢܝܼ ܒܢܲܦ̮ܫܲܝܗܝ، ܘܠܡܸܨܪ̈ܵܝܹܐ ܐܵܟ݂ܠܵܢܹ̈ܐ ܕܥܲܡܹܗ ܒܢܲܦ̮ܫܲܝܗܝ، ܣܵܒܵܒ ܡܸܨܪ̈ܵܝܹܐ ܠܹܐ ܐܵܟ݂ܠܝܼ ܗ݇ܘܵܘ ܠܲܚܡܵܐ ܥܲܡ ܥܸܒ݂ܪ̈ܵܝܹܐ، ܣܵܒܵܒ ܛܲܡܐܘܼܬܵܐ ܝܗ݇ܘܵܐ ܠܡܸܨܪ̈ܵܝܹܐ. 33ܝ݇ܬܝܼܒ݂ ܠܗܘܿܢ ܐܵܢܝܼ ܩܵܕ݇ܡܘܼܗܝ؛ ܡܘܼܬܸܒ݂ ܠܹܗ ܐܸܠܲܝܗܝ ܟܠ ܚܲܕ ܐܲܝܟ݂ ܫܸܢܘܼ̈ܗܝ، ܡ̣ܢ ܒܘܼܟ݂ܪܵܐ ܗܲܠ ܒܘܼܫ ܙܥܘܿܪܵܐ. ܘܐܵܢܝܼ ܐ݇ܢܵܫܹ̈ܐ ܚܝܼܪܗܘܿܢ ܚܲܕ ܒܗ̇ܘ ܐ݇ܚܹܪ݇ܢܵܐ ܒܥܘܼܓ̰ܵܒܵܐ. 34ܫܩܝܼܠ ܠܹܗ ܝܵܘܣܸܦ ܣܵܗܡܹ̈ܐ ܡ̣ܢ ܩܵܕ݇ܡܘܼܗܝ ܘܝܘܼܗ݇ܒܸܠ ܠܹܗ ܐܸܠܲܝܗܝ، ܐܝܼܢܵܐ ܠܒܸܢܝܵܡܹܝܢ ܝܘܼܗ݇ܒܸܠ ܠܹܗ ܚܲܡܫܵܐ ܓܵܗܹ̈ܐ ܒܘܼܫ ܙܵܘܕܵܐ ܡ̣ܢ ܟܠ ܚܲܕ ܡܸܢܲܝܗܝ. ܘܫܬܹܐ ܠܗܘܿܢ ܘܚܕܹܐ ܠܗܘܿܢ ܥܲܡܹܗ.

Currently Selected:

ܒܪܝܬܐ 43: ABTAB

Highlight

Copy

Compare