ܒܪܝܬܐ 42

ܝܲܥܩܘܿܒ݂ ܫܲܕܘܼܪܹܐ ܒܢܘܿܢܘܼ̈ܗܝ ܠܡܸܨܪܹܝܢ ܠܸܙܒ݂ܵܢܵܐ ܕܲܚܠܵܐ

1ܐܝܼܡܲܢ ܕܝ݇ܕܝܼܥ ܠܹܗ ܝܲܥܩܘܿܒ݂ ܕܐܝܼܬ ܗ݇ܘܵܐ ܕܲܚܠܵܐ ܓܵܘ ܡܸܨܪܹܝܢ، ܐ݇ܡܝܼܪܹܗ ܠܒܢܘܿܢܘܼ̈ܗܝ، ”ܩܵܡܘܿܕܝܼ ܒܸܚܝܵܪܵܐ ܝܬܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ؟“ 2ܘܐ݇ܡܝܼܪܹܗ، ”ܫܡܝܼܥܵܐ ܝܘܸܢ ܕܐܝܼܬ ܕܲܚܠܵܐ ܒܡܸܨܪܹܝܢ؛ ܨܠܹܝܡܘܼܢ ܠܬܵܡܵܐ ܘܙܒ݂ܘܿܢܘܼܢ ܠܲܢ ܚܕܵܐ ܟܡܵܝܘܼܬܵܐ ܕܕܲܚܠܵܐ ܡ̣ܢ ܬܵܡܵܐ، ܕܚܵܝܲܚ ܘܠܵܐ ܡܵܝܬܲܚ.“ 3ܘܨܠܹܐ ܠܗܘܿܢ ܥܸܣܪܵܐ ܐܲܚܘܿܢܘܵܬܹ̈ܐ ܕܝܵܘܣܸܦ ܠܸܙܒ݂ܵܢܵܐ ܕܲܚܠܵܐ ܡ̣ܢ ܡܸܨܪܹܝܢ. 4ܐܝܼܢܵܐ ܠܵܐ ܫܘܼܕܸܪܹܗ ܠܒܸܢܝܵܡܹܝܢ، ܐܲܚܘܿܢܵܐ ܕܝܵܘܣܸܦ، ܥܲܡ ܐܲܚܘܿܢܘܵܬܹ̈ܗ، ܣܵܒܵܒ ܒܸܙܕܵܥܵܐ ܝܗ݇ܘܵܐ ܕܩܲܘܸܡ ܐܸܠܹܗ ܚܘܼܙܕܵܓܵܐ. 5ܘܐ݇ܬܹܐ ܠܗܘܿܢ ܒܢܘܿܢܹ̈ܐ ܕܝܼܣܪܵܝܹܠ ܥܲܡ ܐ݇ܢܵܫܹ̈ܐ ܐ݇ܚܹܪ̈݇ܢܹܐ ܠܸܙܒ݂ܵܢܵܐ ܕܲܚܠܵܐ، ܣܵܒܵܒ ܗܘܹܐ ܠܹܗ ܟܸܦܢܵܐ ܒܐܲܪܥܵܐ ܕܟܢܲܥܢ.

6ܫܲܠܝܼܛܵܐ ܝܗ݇ܘܵܐ ܝܵܘܣܸܦ ܥܲܠ ܐܲܪܥܵܐ؛ ܘܗ̇ܘ ܝܼܗ݇ܘܵܐ ܙܲܒܢܵܢܵܐ ܕܕܲܚܠܵܐ ܠܟܠܹܗ ܥܲܡܵܐ ܕܐܲܪܥܵܐ. ܘܐ݇ܬܹܐ ܠܗܘܿܢ ܐܲܚܘܿܢܘܵܬܹ̈ܐ ܕܝܵܘܣܸܦ ܘܡܘܼܟܸܦܵܐ ܠܗܘܿܢ ܓܵܢܲܝܗܝ ܐܸܠܹܗ، ܦܵܬܘܵܬܲܝ̈ܗܝ ܠܐܲܪܥܵܐ. 7ܟܲܕ ܚܙܹܐ ܠܹܗ ܝܵܘܣܸܦ ܠܐܲܚܘܿܢܘܵܬܹ̈ܗ ܝ݇ܕܝܼܥܲܝ ܠܹܗ، ܐܝܼܢܵܐ ܢܘܼܟ݂ܪܸܢܵܐ ܠܹܗ ܓܵܢܹܗ ܐܸܠܲܝܗܝ، ܘܗܘܼܡܙܸܡ ܠܹܗ ܥܲܡܲܝܗܝ ܒܩܸܫܝܘܼܬܵܐ، ܘܒܘܼܩܸܪܹܗ ܡܸܢܲܝܗܝ، ”ܡܐܲܝܟܵܐ ܝܬܘܿܢ ܒܹܐܬܵܝܵܐ؟“ ܐ݇ܡܝܼܪܗܘܿܢ، ”ܡ̣ܢ ܐܲܪܥܵܐ ܕܟܢܲܥܢ، ܠܸܙܒ݂ܵܢܵܐ ܡܹܐܟ݂ܘܼܠܬܵܐ.“ 8ܐܵܦܸܢ ܝ݇ܕܝܼܥܵܐ ܝܗ݇ܘܵܐ ܝܵܘܣܸܦ ܠܐܲܚܘܿܢܘܵܬܹ̈ܗ، ܐܝܼܢܵܐ ܐܵܢܝܼ ܠܵܐ ܩܲܡ ܝܵܕܥܝܼ ܠܹܗ. 9ܕܟ݂ܝܼܪܹܗ ܝܵܘܣܸܦ ܠܚܸܠܡܹ̈ܐ ܕܚܠܝܼܡܲܝ ܝܗ݇ܘܵܐ ܒܘܼܬ ܕܝܼܲܝܗܝ؛ ܘܐ݇ܡܝܼܪܹܗ ܐܸܠܲܝܗܝ، ”ܐܲܚܬܘܿܢ ܓܵܫܘܿܫܹ̈ܐ ܝܬܘܿܢ؛ ܐ݇ܬܝܼܹܐ ܝܬܘܿܢ ܠܸܚܙܵܝܵܐ ܙܲܒܘܼܢܘܼܬܵܐ ܕܐܲܪܥܵܐ.“ 10ܐ݇ܡܝܼܪܗܘܿܢ ܐܸܠܹܗ، ”ܠܵܐ، ܡܵܪܝܼ؛ ܐܝܼܢܵܐ ܪܹ̈ܓܵܘܵܬܘܼܟ݂ ܐ݇ܬܝܼܹܐ ܝܢܵܐ ܠܸܙܒ݂ܵܢܵܐ ܡܹܐܟ݂ܘܼܠܬܵܐ. 11ܟܠܲܢ ܒܢܘܿܢܹ̈ܐ ܕܚܲܕ ܒܵܒܵܐ ܝܘܲܚ، ܫܪܵܪܵܐ ܗܲܡܙܘܼܡܹܐ ܝܘܲܚ؛ ܪܹ̈ܓܵܘܵܬܘܼܟ݂ ܠܹܐ ܝܢܵܐ ܓܵܫܘܿܫܹ̈ܐ.“ 12ܐ݇ܡܝܼܪܹܗ ܐܸܠܲܝܗܝ، ”ܠܵܐ، ܐ݇ܬܝܼܹܐ ܝܬܘܿܢ ܠܸܚܙܵܝܵܐ ܙܲܒܘܼܢܘܼܬܵܐ ܕܐܲܪܥܵܐ.“ 13ܓ̰ܘܼܘܸܒ ܠܗܘܿܢ، ”ܪܹ̈ܓܵܘܵܬܘܼܟ݂ ܬܪܸܥܣܲܪ ܐܲܚܘܿܢܘܵܬܹ̈ܐ ܝܘܲܚ، ܒܢܘܿܢܹ̈ܐ ܕܚܲܕ ܐ݇ܢܵܫܵܐ ܓܵܘ ܐܲܪܥܵܐ ܕܟܢܲܥܢ. ܗ̇ܘ ܙܥܘܿܪܵܐ ܥܲܡ ܒܵܒܲܢ ܝܼܠܹܗ ܐܸܕܝܘܿܡ ܝܵܘܡܵܐ، ܘܚܲܕ ܠܹܐ ܝܠܹܗ ܦܝܵܫܵܐ.“ 14ܐܝܼܢܵܐ ܝܵܘܣܸܦ ܐ݇ܡܝܼܪܹܗ ܐܸܠܲܝܗܝ، ”ܐܲܝܟ݂ ܕܐ݇ܡܝܼܪܝܼ ܐܸܠܵܘܟ݂ܘܿܢ، ܓܵܫܘܿܫܹ̈ܐ ܝܬܘܿܢ. 15ܒܐܵܗܵܐ ܒܸܬ ܦܵܝܫܝܼܬܘܿܢ ܨܘܼܚܨܝܼܹܐ. ܒܸܡܝܵܝܵܐ ܝܘܸܢ ܒܚܲܝܹ̈ܐ ܕܦܸܪܥܘܿܢ، ܕܠܹܐ ܦܵܠܛܝܼܬܘܿܢ ܡܐܲܟ݂ܵܐ ܗܲܠ ܕܐܵܬܹܐ ܐܲܚܘܿܢܵܘܟ݂ܘܿܢ ܙܥܘܿܪܵܐ ܠܐܲܟ݂ܵܐ. 16ܫܲܕܪܘܼܢ ܚܲܕ ܡܸܢܵܘܟ݂ܘܿܢ، ܕܡܲܝܬܹܐ ܠܐܲܚܘܿܢܵܘܟ݂ܘܿܢ، ܘܐܲܚܬܘܿܢ ܒܸܬ ܦܵܝܫܝܼܬܘܿܢ ܓܵܘ ܒܹܝܬ ܐܲܣܝܼܪܹ̈ܐ، ܗܲܠ ܕܦܵܝܫܝܼ ܡܘܼܣܒܸܬܹܐ ܗܹܡܸܙܡܵܢܵܘ̈ܟ݂ܘܿܢ، ܕܐܸܢ ܫܪܵܪܵܐ ܗܲܡܙܘܼܡܹܐ ܝܬܘܿܢ؛ ܘܐܸܢ ܠܵܐ، ܒܸܡܝܵܝܵܐ ܝܘܸܢ ܒܚܲܝܹ̈ܐ ܕܦܸܪܥܘܿܢ، ܕܫܲܪܝܼܪܵܐܝܼܬ ܓܵܫܘܿܫܹ̈ܐ ܝܬܘܿܢ.“

ܐܲܚܘܿܢܘܵܬܹ̈ܐ ܕܝܵܘܣܸܦ ܓܵܘ ܒܹܝܬ ܢܛܘܼܪܬܵܐ

17ܘܡܘܼܬܒܲܝ ܠܹܗ ܓܵܘ ܒܹܝܬ ܢܛܘܼܪܬܵܐ ܬܠܵܬܵܐ ܝܵܘܡܵܢܹ̈ܐ. 18ܒܝܵܘܡܵܐ ܕܬܠܵܬܵܐ ܐ݇ܡܝܼܪܹܗ ܐܸܠܲܝܗܝ، ”ܥܒ݂ܘܿܕܘܼܢ ܐܵܗܵܐ ܘܚܹܝܡܘܼܢ؛ ܣܵܒܵܒ ܐܵܢܵܐ ܟܹܐ ܙܵܕܥܹܢ ܡ̣ܢ ܐܲܠܵܗܵܐ. 19ܐܸܢ ܫܪܵܪܵܐ ܗܲܡܙܘܼܡܹܐ ܝܬܘܿܢ، ܚܲܕ ܐܲܚܘܿܢܵܘܟ݂ܘܿܢ ܦܵܐܹܫ ܐ݇ܣܝܼܪܵܐ ܒܒܹܝܬ ܢܛܘܼܪܬܵܘܟ݂ܘܿܢ، ܦܵܝܫܵܢܹ̈ܐ ܐܵܙܠ݇ܝܼ ܘܠܲܒܠܝܼ ܕܲܚܠܵܐ ܩܵܐ ܟܸܦܢܵܐ ܕܒܵܬܵܘ̈ܟ݂ܘܿܢ، 20ܘܡܲܝܬܸܝܡܘܼܢ ܠܐܲܚܘܿܢܵܘܟ݂ܘܿܢ ܒܘܼܫ ܙܥܘܿܪܵܐ ܠܟܸܣ ܠܝܼ. ܗ̇ܝܓܵܗ ܒܸܬ ܦܵܝܫܝܼ ܡܘܼܣܒܸܬܹܐ ܗܹܡܸܙܡܵܢܵܘ̈ܟ݂ܘܿܢ، ܘܠܹܐ ܡܵܝܬܝܼܬܘܿܢ.“ ܘܥܒ݂ܝܼܕ ܠܗܘܿܢ ܗܲܕܟ݂ܵܐ. 21ܗ̇ܝܓܵܗ ܐ݇ܡܝܼܪܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܫܲܪܝܼܪܵܐܝܼܬ ܡܵܪ̈ܲܝ ܓܢܵܗܵܐ ܝܘܲܚ ܒܘܼܬ ܐܲܚܘܿܢܲܢ، ܟܲܕ ܚܙܹܐ ܠܲܢ ܐܘܼܠܨܵܢܹܗ، ܐܝܼܡܲܢ ܕܦܘܼܪܦܸܠ ܠܹܗ ܒܝܼܲܢ، ܠܵܐ ܫܡܝܼܥ ܠܲܢ ܐܸܠܹܗ؛ ܒܘܼܬ ܐܵܗܵܐ ܐ݇ܬܹܐ ܠܹܗ ܥܲܠܲܢ ܐܵܗܵܐ ܐܘܼܠܨܵܢܵܐ.“ 22ܐ݇ܡܝܼܪܹܗ ܐܸܠܲܝܗܝ ܪܐܘܼܒܸܢ، ”ܠܵܐ ܐ݇ܡܝܼܪܝܼ ܐܸܠܵܘܟ݂ܘܿܢ ܕܠܵܐ ܚܵܛܹܝܬܘܿܢ ܠܝܵܠܵܕ݇ܐ؟ ܐܝܼܢܵܐ ܠܵܐ ܫܡܝܼܥ ܠܵܘܟ݂ܘܿܢ ܐܸܠܝܼ. ܗܵܐ، ܐܵܕܝܼܵܐ ܕܸܡܹܗ ܦܝܵܫܵܐ ܝܠܹܗ ܛܠܝܼܒܵܐ.“ 23ܘܐܵܢܝܼ ܠܵܐ ܝ݇ܕܝܼܥ ܠܗܘܿܢ ܕܦܲܪܡܘܼܝܹܐ ܝܗ݇ܘܵܐ ܝܵܘܣܸܦ، ܣܵܒܵܒ ܐܝܼܬ ܗ݇ܘܵܐ ܬܲܪܓܡܵܢܵܐ ܒܹܝܠܲܝܗܝ. 24ܘܕܝܼܪܹܗ ܝܵܘܣܸܦ ܡ̣ܢ ܠܟܸܣ ܠܲܝܗܝ ܠܚܲܕ ܓܹܒܵܐ، ܘܒܟܹܐ ܠܹܗ. ܗ̇ܝܓܵܗ ܕܝܼܪܹܗ ܠܟܸܣ ܠܲܝܗܝ ܘܗܘܼܡܙܸܡ ܠܹܗ ܥܲܡܲܝܗܝ، ܘܫܩܝܼܠ ܠܹܗ ܡܸܢܲܝܗܝ ܠܫܸܡܥܘܿܢ ܘܐ݇ܣܝܼܪܹܗ ܐܸܠܹܗ ܩܵܕ݇ܡ ܥܲܝܢܲܝ̈ܗܝ. 25ܘܦܩܝܼܕ ܠܹܗ ܝܵܘܣܸܦ ܕܦܵܝܫܝܼ ܡܸܠܝܹܐ ܓ̰ܘܵܠܲܝ̈ܗܝ ܕܲܚܠܵܐ، ܘܙܘܼܙܹ̈ܐ ܕܟܠ ܚܲܕ ܦܵܝܫܝܼ ܡܘܼܬܒܹܐ ܓܵܘ ܓ̰ܘܵܠܹܗ، ܘܦܵܝܫܝܼ ܝܘܼܗ݇ܒܹܐ ܐܸܠܲܝܗܝ ܙܘܵܕܹ̈ܐ ܩܵܐ ܐܘܼܪܚܵܐ. ܗܲܕܟ݂ܵܐ ܦܝܼܫ ܠܹܗ ܥܒ݂ܝܼܕܵܐ ܐܸܠܲܝܗܝ.

ܐܲܚܘܿܢܘܵܬܹ̈ܐ ܕܝܵܘܣܸܦ ܒܸܕܝܵܪܵܐ ܠܒܲܝܬܵܐ

26ܡܘܼܛܥܸܢܗܘܿܢ ܕܲܚܠܲܝܗܝ ܥܲܠ ܚܡܵܪ̈ܲܝܗܝ، ܘܦܠܝܼܛ ܠܗܘܿܢ ܡ̣ܢ ܬܵܡܵܐ. 27ܓܵܘ ܒܹܝܬ ܡܲܫܪܝܵܐ ܦܬܝܼܚ ܠܹܗ ܚܲܕ ܡܸܢܲܝܗܝ ܠܓ̰ܘܵܠܹܗ ܠܝܼܵܗ݇ܒ݂ܵܐ ܡܹܐܟ݂ܘܼܠܬܵܐ ܠܚܡܵܪܹܗ، ܘܚܙܹܐ ܠܹܗ ܙܘܼܙܘܼ̈ܗܝ ܒܦܘܼܡܵܐ ܕܓ̰ܘܵܠܹܗ. 28ܘܐ݇ܡܝܼܪܹܗ ܠܐܲܚܘܿܢܘܵܬܹ̈ܗ، ”ܙܘܼܙܝܼ̈ ܦܝܼܫܹܐ ܝܢܵܐ ܡܘܼܕܸܪܹܐ، ܗܵܐ، ܓܵܘ ܦܘܼܡܵܐ ܕܓ̰ܘܵܠܝܼ ܝܢܵܐ.“ ܫܓ݂ܝܼܫ ܠܹܗ ܠܸܒܲܝܗܝ، ܘܕܝܼܪܗܘܿܢ ܒܸܪܓܵܕܵܐ ܚܲܕ ܠܟܸܣ ܗ̇ܘ ܐ݇ܚܹܪ݇ܢܵܐ ܒܹܐܡܵܪܵܐ، ”ܐܵܗܵܐ ܡܘܿܕܝܼ ܥܒ݂ܝܼܕ ܠܹܗ ܐܲܠܵܗܵܐ ܐܸܠܲܢ؟“

29ܐܝܼܡܲܢ ܕܐ݇ܬܹܐ ܠܗܘܿܢ ܠܟܸܣ ܝܲܥܩܘܿܒ݂ ܒܵܒܲܝܗܝ ܠܐܲܪܥܵܐ ܕܟܢܲܥܢ، ܡܘܼܕܸܥ ܠܗܘܿܢ ܐܸܠܹܗ ܟܠ ܡܸܢܕܝܼ ܕܩܘܼܘܸܡ ܠܹܗ ܐܸܠܲܝܗܝ، ܒܹܐܡܵܪܵܐ، 30”ܗܘܼܡܙܸܡ ܠܹܗ ܐ݇ܢܵܫܵܐ ܡܵܪܵܐ ܕܗ̇ܝ ܐܲܪܥܵܐ ܥܲܡܲܢ ܒܩܸܫܝܘܼܬܵܐ، ܘܩܲܡ ܚܲܫܒܸܢܲܢ ܓܵܫܘܿܫܹ̈ܐ ܕܐܲܪܥܵܐ. 31ܐܝܼܢܵܐ ܐܲܚܢܲܢ ܐ݇ܡܝܼܪܲܢ ܐܸܠܹܗ، ’ܐ݇ܢܵܫܹ̈ܐ ܫܲܪܝܼܪܹ̈ܐ ܝܘܲܚ، ܠܹܐ ܝܘܲܚ ܓܵܫܘܿܫܹ̈ܐ. 32ܬܪܸܥܣܲܪ ܐܲܚܘܿܢܘܵܬܹ̈ܐ ܝܘܲܚ، ܒܢܘܿܢܹ̈ܐ ܕܒܵܒܲܢ؛ ܚܲܕ ܠܲܝܬ ܦܝܵܫܵܐ، ܘܗ̇ܘ ܒܘܼܫ ܙܥܘܿܪܵܐ ܐܸܕܝܘܿܡ ܝܵܘܡܵܐ ܠܟܸܣ ܒܵܒܲܢ ܝܼܠܹܗ ܒܐܲܪܥܵܐ ܕܟܢܲܥܢ.‘ 33ܘܐ݇ܡܝܼܪܹܗ ܐܸܠܲܢ ܗ̇ܘ ܐ݇ܢܵܫܵܐ ܡܵܪܵܐ ܕܐܲܪܥܵܐ، ’ܒܐܵܗܵܐ ܒܸܬ ܝܵܕܥܹܢ ܕܫܪܵܪܵܐ ܗܲܡܙܘܼܡܹܐ ܝܬܘܿܢ؛ ܫܒ݂ܘܿܩܘܼܢ ܚܲܕ ܡ̣ܢ ܐܲܚܘܿܢܵܘܟ݂ܘܿܢ ܠܟܸܣ ܠܝܼ، ܘܫܩܘܿܠܘܼܢ ܡܹܐܟ݂ܘܼܠܬܵܐ ܩܵܐ ܟܸܦܢܵܐ ܕܒܵܬܵܘ̈ܟ݂ܘܿܢ، ܘܙܹܠ݇ܡܘܼܢ. 34ܘܡܲܝܬܸܝܡܘܼܢ ܠܗ̇ܘ ܐܲܚܘܿܢܵܘܟ݂ܘܿܢ ܒܘܼܫ ܙܥܘܿܪܵܐ ܠܟܸܣ ܠܝܼ، ܘܗ̇ܝܓܵܗ ܒܸܬ ܝܵܕܥܹܢ ܕܠܹܐ ܝܬܘܿܢ ܓܵܫܘܿܫܹ̈ܐ، ܐܸܠܵܐ ܡܗܘܼܡܢܹ̈ܐ ܝܬܘܿܢ؛ ܘܒܸܬ ܡܲܕܸܪܸܢ ܐܲܚܘܿܢܵܘܟ݂ܘܿܢ ܐܸܠܵܘܟ݂ܘܿܢ، ܘܒܸܬ ܙܵܒ݂ܢܝܼܬܘܿܢ ܘܙܲܒܢܝܼܬܘܿܢ ܒܐܲܪܥܵܐ.‘“

35ܗܘܹܐ ܠܵܗ̇ ܐܵܢܝܼ ܟܲܕ ܣܲܦܘܼܩܹܐ ܝܗ݇ܘܵܘ ܓ̰ܘܵܠܲܝ̈ܗܝ، ܟܠ ܚܲܕ ܚܙܹܐ ܠܹܗ ܟܸܬܪܵܐ ܕܙܘܼܙܘܼ̈ܗܝ ܒܓ̰ܘܵܠܹܗ. ܐܝܼܡܲܢ ܕܚܙܹܐ ܠܗܘܿܢ ܠܟܸܬܪܹ̈ܐ ܕܙܘܼܙܲܝ̈ܗܝ، ܐܵܢܝܼ ܘܒܵܒܲܝܗܝ ܙܕܝܼܥ ܠܗܘܿܢ. 36ܘܐ݇ܡܝܼܪܹܗ ܐܸܠܲܝܗܝ ܝܲܥܩܘܿܒ݂ ܒܵܒܲܝܗܝ، ”ܩܛܝܼܥ ܠܵܘܟ݂ܘܿܢ ܐܸܠܝܼ ܡ̣ܢ ܝܵܠܹ̈ܕ݇ܐ: ܝܵܘܣܸܦ ܠܲܝܬ، ܘܫܸܡܥܘܿܢ ܠܲܝܬ، ܘܒܸܬ ܫܵܩܠܝܼܬܘܿܢ ܐܘܼܦ ܠܒܸܢܝܵܡܹܝܢ؟ ܥܲܠܝܼ ܐ݇ܬܹܐ ܠܗܘܿܢ ܟܠܲܝܗܝ ܐܲܢܹܐ!“ 37ܐ݇ܡܝܼܪܹܗ ܪܐܘܼܒܸܢ ܠܒܵܒܘܼܗܝ، ”ܠܬܸܪܘܲܝܗܝ ܒܢܘܿܢܝܼ̈ ܡܲܡܝܸܬܸܬ ܐܸܢ ܠܵܐ ܡܲܝܬܸܝܢܹܗ ܠܟܸܣ ܠܘܼܟ݂؛ ܣܲܦܹܐ ܠܹܗ ܒܐܝܼܕܝܼ، ܘܐܵܢܵܐ ܒܸܬ ܡܲܕܸܪܸܢܹܗ ܐܸܠܘܼܟ݂.“ 38ܐ݇ܡܝܼܪܹܗ ܝܲܥܩܘܿܒ݂، ”ܠܹܐ ܨܵܠܹܐ ܒܪܘܿܢܝܼ ܥܲܡܵܘܟ݂ܘܿܢ، ܣܵܒܵܒ ܐܲܚܘܿܢܘܼܗܝ ܡܝܼܬܵܐ ܝܠܹܗ؛ ܐܲܚܟ̰ܝܼ ܗ̇ܘ ܒܢܲܦ̮ܫܹܗ ܦܝܼܫܵܐ ܝܠܹܗ ܫܒ݂ܝܼܩܵܐ. ܐܸܢ ܬܵܦܹܩ ܒܝܼܹܗ ܚܘܼܙܕܵܓܵܐ ܒܐܘܼܪܚܵܐ ܕܐܵܙܠ݇ܝܼܬܘܿܢ ܒܝܼܘܼܗ̇، ܒܸܬ ܡܲܨܠܸܝܬܘܿܢ ܠܣܲܝܒܘܼܬܝܼ ܦܫܝܼܡܬܵܐ ܠܫܝܘܿܠ.“

Currently Selected:

ܒܪܝܬܐ 42: ABTAB

Highlight

Copy

Compare