ܒܪܝܬܐ 41

ܦܸܪܥܘܿܢ ܒܸܚܠܵܡܵܐ ܬܪܹܝ ܚܸܠܡܹ̈ܐ

1ܘܗܘܹܐ ܠܵܗ̇ ܡ̣ܢ ܒܵܬ݇ܪ ܬܲܪܬܹܝ ܫܸܢܹ̈ܐ، ܚܠܝܼܡ ܠܹܗ ܦܸܪܥܘܿܢ ܚܸܠܡܵܐ، ܘܗܵܐ، ܟܸܠܝܵܐ ܝܗ݇ܘܵܐ ܒܕܸܦܢܵܐ ܕܢܲܗܪܵܐ. 2ܘܡ̣ܢ ܢܲܗܪܵܐ ܒܹܐܣܵܩܵܐ ܫܒܲܥ ܬܵܘܸܪ̈ܝܵܬܹܐ، ܫܲܦܝܼܪܹ̈ܐ ܒܚܸܙܘܵܐ ܘܛܪ̈ܝܼܨܹܐ، ܒܸܪܥܵܝܵܐ ܒܡܲܪܓܵܐ. 3ܘܗܵܐ، ܫܒܲܥ ܬܵܘܸܪ̈ܝܵܬܹܐ ܐ݇ܚܹܪ̈݇ܢܹܐ ܒܹܐܣܵܩܵܐ ܒܵܬ݇ܪܲܝܗܝ ܡ̣ܢ ܢܲܗܪܵܐ، ܣܸܪ̈ܝܹܐ ܒܚܸܙܘܵܐ ܘܒܲܓܝܼܪܹ̈ܐ؛ ܘܟܠܹܐ ܠܗܘܿܢ ܒܕܸܦܢܵܐ ܕܬܵܘܸܪ̈ܝܵܬܹܐ ܩܲܕ݇ܡܵܝܹ̈ܐ ܥܲܠ ܣܸܦܬܵܐ ܕܢܲܗܪܵܐ. 4ܘܐ݇ܟ݂ܝܼܠ ܠܗܘܿܢ ܐܵܢܝܼ ܬܵܘܸܪ̈ܝܵܬܹܐ ܣܸܪ̈ܝܹܐ ܘܒܲܓܝܼܪܹ̈ܐ ܠܐܵܢܝܼ ܫܒܲܥ ܬܵܘܸܪ̈ܝܵܬܹܐ ܫܲܦܝܼܪܹ̈ܐ ܒܚܸܙܘܵܐ ܘܛܪ̈ܝܼܨܹܐ. ܗ̇ܝܓܵܗ ܪܥܝܼܫ ܠܹܗ ܦܸܪܥܘܿܢ. 5ܘܛܠܝܼܥ ܠܹܗ، ܘܚܠܝܼܡ ܠܹܗ ܓܵܗܵܐ ܕܬܲܪܬܹܝ، ܘܗܵܐ، ܫܲܒ݂ܥܵܐ ܫܸܒܠܹ̈ܐ ܛܪ̈ܝܼܨܹܐ ܘܨܦܵܝܝܼ ܒܹܐܣܵܩܵܐ ܒܚܲܕ ܩܲܨܠܵܐ. 6ܘܗܵܐ، ܫܲܒ݂ܥܵܐ ܫܸܒܠܹ̈ܐ ܒܲܓܝܼܪܹ̈ܐ ܘܢܘܝܼܠܹܐ ܒܦܵܘܚܵܐ ܕܡܲܕܢܚܵܐ، ܡܲܓ̰ܝܘܼܢܹܐ ܒܵܬ݇ܪܲܝܗܝ. 7ܘܒܠܝܼܥ ܠܗܘܿܢ ܫܸܒܠܹ̈ܐ ܒܲܓܝܼܪܹ̈ܐ ܠܫܲܒ݂ܥܵܐ ܫܸܒܠܹ̈ܐ ܛܪ̈ܝܼܨܹܐ ܘܡܸܠܝܹܐ. ܗ̇ܝܓܵܗ ܪܥܝܼܫ ܠܹܗ ܦܸܪܥܘܿܢ، ܘܝ݇ܕܝܼܥ ܠܹܗ ܕܚܸܠܡܵܐ ܝܗ݇ܘܵܐ. 8ܘܗܘܹܐ ܠܹܗ ܨܲܦܪܵܐ، ܘܫܓ݂ܝܼܫ ܠܵܗ̇ ܪܘܼܚܹܗ؛ ܘܫܘܼܕܸܪܹܗ ܘܩܪܹܐ ܠܹܗ ܠܟܠܲܝܗܝ ܚܲܪ̈ܵܫܹܐ ܕܡܸܨܪܹܝܢ ܘܠܟܠܲܝܗܝ ܚܲܟܝܼܡܘܼ̈ܗ̇، ܘܗܘܼܩܹܐ ܠܹܗ ܐܸܠܲܝܗܝ ܚܸܠܡܹܗ. ܐܝܼܢܵܐ ܠܲܝܬ ܗ݇ܘܵܐ ܐܘܼܦ ܚܲܕ ܕܦܲܫܸܩ ܗ݇ܘܵܐ ܠܗܘܿܢ ܐܸܠܹܗ.

9ܘܗܘܼܡܙܸܡ ܠܹܗ ܪܲܒ ܫܵܩܝܹ̈ܐ ܠܦܸܪܥܘܿܢ ܒܹܐܡܵܪܵܐ، ”ܐܸܕܝܘܿܡ ܒܸܕܟ݂ܵܪܘܼܗ̇ ܝܘܸܢ ܚܛܝܼܬܝܼ. 10ܟܲܕ ܟܪܝܼܒ ܠܹܗ ܦܸܪܥܘܿܢ ܥܲܠ ܪܹ̈ܓܵܘܵܬܹܗ، ܩܲܡ ܕܵܪܹܐ ܠܝܼ ܘܠܪܲܒ ܝܵܦܝܵܢܹ̈ܐ ܕܠܲܚܡܵܐ ܓܵܘ ܒܹܝܬ ܢܛܘܼܪܬܵܐ، ܒܒܲܝܬܵܐ ܕܪܲܒ ܕܲܚܫܹ̈ܐ. 11ܘܚܠܝܼܡ ܠܲܢ ܚܸܠܡܵܐ ܒܚܲܕ ܠܲܝܠܹܐ، ܐܵܢܵܐ ܘܗ̇ܘ، ܟܠ ܚܲܕ ܐܲܝܟ݂ ܦܘܼܫܵܩܵܐ ܕܚܸܠܡܹܗ. 12ܐܝܼܬ ܗ݇ܘܵܐ ܬܵܡܵܐ ܥܲܡܲܢ ܚܲܕ ܥܠܲܝܡܵܐ ܥܸܒ݂ܪܵܝܵܐ، ܪܹܓܵܐ ܕܪܹܫ ܢܵܛܘܿܪܹ̈ܐ. ܗܘܼܩܹܐ ܠܲܢ ܐܸܠܹܗ، ܘܦܘܼܫܸܩ ܠܹܗ ܐܸܠܲܢ ܚܸܠܡܲܢ̈، ܠܟܠ ܚܲܕ ܐܲܝܟ݂ ܚܸܠܡܹܗ ܦܘܼܫܸܩ ܠܹܗ. 13ܘܕܵܐܟ݂ܝܼ ܕܦܘܼܫܸܩ ܠܹܗ ܐܸܠܲܢ، ܗܘܹܐ ܠܹܗ ܗܵܕܵܐ؛ ܐܵܢܵܐ ܦܝܼܫ ܠܝܼ ܡܘܼܕܸܪܵܐ ܠܫܵܘܦܝܼ، ܘܗ̇ܘ ܦܝܼܫ ܠܹܗ ܬܸܠܝܵܐ.“

ܝܵܘܣܸܦ ܦܲܫܘܼܩܹܐ ܚܸܠܡܵܐ ܕܦܸܪܥܘܿܢ

14ܫܘܼܕܸܪܹܗ ܦܸܪܥܘܿܢ ܘܩܪܹܐ ܠܹܗ ܠܝܵܘܣܸܦ، ܘܡܘܼܐܬܹܐ ܠܗܘܿܢ ܐܸܠܹܗ ܒܓ̰ܲܠܕܘܼܬܵܐ ܡ̣ܢ ܒܹܝܬ ܐܲܣܝܼܪܹ̈ܐ؛ ܓܪܝܼܥ ܠܹܗ، ܘܫܘܼܚܠܸܦ ܠܹܗ ܓ̰ܘܼܠܘܼ̈ܗܝ، ܘܥܒ݂ܝܼܪܹܗ ܠܟܸܣ ܦܸܪܥܘܿܢ. 15ܐ݇ܡܝܼܪܹܗ ܦܸܪܥܘܿܢ ܠܝܵܘܣܸܦ، ”ܚܠܝܼܡ ܠܝܼ ܚܸܠܡܵܐ، ܘܠܲܝܬ ܚܲܕ ܕܦܲܫܸܩ ܠܹܗ. ܫܡܝܼܥ ܠܝܼ ܒܘܼܬ ܕܝܼܘܼܟ݂، ܕܐܝܼܡܲܢ ܕܫܵܡܥܹܬ ܠܹܗ ܚܸܠܡܵܐ، ܟܹܐ ܡܵܨܹܝܬ ܦܲܫܩܸܬ ܠܹܗ.“ 16ܓ̰ܘܼܘܸܒ ܠܹܗ ܝܵܘܣܸܦ ܠܦܸܪܥܘܿܢ ܒܹܐܡܵܪܵܐ، ”ܠܹܐ ܝܠܵܗ̇ ܒܐܝܼܕܝܼ، ܐܲܠܵܗܵܐ ܒܸܬ ܝܲܗ݇ܒܸܠ ܓ̰ܘܼܘܵܒ ܒܲܣܝܼܡܵܐ ܠܦܸܪܥܘܿܢ.“ 17ܐ݇ܡܝܼܪܹܗ ܦܸܪܥܘܿܢ ܠܝܵܘܣܸܦ، ”ܚܙܹܐ ܠܝܼ ܒܚܸܠܡܝܼ ܐܵܢܵܐ ܟܸܠܝܵܐ ܥܲܠ ܣܸܦܬܵܐ ܕܢܲܗܪܵܐ؛ 18ܘܗܵܐ، ܡ̣ܢ ܢܲܗܪܵܐ ܐ݇ܣܝܼܩ ܠܗܘܿܢ ܫܒܲܥ ܬܵܘܸܪ̈ܝܵܬܹܐ، ܛܪ̈ܝܼܨܹܐ ܘܫܲܦܝܼܪܹ̈ܐ ܒܚܸܙܘܵܐ، ܘܒܸܪܥܵܝܵܐ ܝܗ݇ܘܵܘ ܓܵܘ ܡܲܪܓܵܐ. 19ܘܗܵܐ، ܫܒܲܥ ܬܵܘܸܪ̈ܝܵܬܹܐ ܐ݇ܚܹܪ̈݇ܢܹܐ ܒܹܐܣܵܩܵܐ ܒܵܬ݇ܪܲܝܗܝ، ܡܚܝܼܠܹ̈ܐ ܘܣܸܪ̈ܝܹܐ ܒܚܸܙܘܵܐ ܪܵܒܵܐ، ܘܒܲܓܝܼܪܹ̈ܐ؛ ܗܵܕܵܐ ܕܠܹܐ ܝܘܸܢ ܚܸܙܝܵܐ ܣܸܪ̈ܝܹܐ ܐܲܝܟ݂ ܕܝܼܲܝܗܝ ܒܟܠܵܗ̇ ܐܲܪܥܵܐ ܕܡܸܨܪܹܝܢ. 20ܘܐ݇ܟ݂ܝܼܠ ܠܗܘܿܢ ܐܵܢܝܼ ܬܵܘܸܪ̈ܝܵܬܹܐ ܡܚܝܼܠܹ̈ܐ ܘܣܸܪ̈ܝܹܐ ܠܐܵܢܝܼ ܫܒܲܥ ܬܵܘܸܪ̈ܝܵܬܹܐ ܩܲܕ݇ܡܵܝܹ̈ܐ ܛܪ̈ܝܼܨܹܐ، 21ܐܝܼܢܵܐ ܡ̣ܢ ܒܵܬ݇ܪ ܕܐ݇ܟ݂ܝܼܠܲܝ ܠܗܘܿܢ، ܐܘܼܦ ܚܲܕ ܠܹܐ ܝܵܕܹܥ ܗ݇ܘܵܐ ܕܐ݇ܟ݂ܝܼܠܲܝ ܠܗܘܿܢ، ܒܗ̇ܝ ܕܗܹܫ ܣܸܪܝܹܐ ܝܗ݇ܘܵܘ ܒܚܸܙܘܵܐ ܐܲܝܟ݂ ܩܵܕ݇ܡܵܝܬܵܐ. ܗ̇ܝܓܵܗ ܪܥܝܼܫ ܠܝܼ. 22ܡܸܢܕܪܸܫ ܚܙܹܐ ܠܝܼ ܒܚܸܠܡܝܼ، ܘܗܵܐ، ܫܲܒ݂ܥܵܐ ܫܸܒܠܹ̈ܐ ܡܲܓ̰ܝܘܼܢܹܐ ܒܚܲܕ ܩܲܨܠܵܐ، ܡܸܠܝܹ̈ܐ ܘܨܦܵܝܝܼ؛ 23ܘܗܵܐ، ܡܲܓ̰ܝܘܼܢܹܐ ܒܵܬ݇ܪܲܝܗܝ ܫܲܒ݂ܥܵܐ ܫܸܒܠܹ̈ܐ ܒܪ̈ܝܼܙܹܐ، ܒܲܓܝܼܪܹ̈ܐ ܘܢܘܝܼܠܹܐ ܒܦܵܘܚܵܐ ܕܡܲܕܢܚܵܐ، 24ܘܒܠܝܼܥ ܠܗܘܿܢ ܐܵܢܝܼ ܫܲܒ݂ܥܵܐ ܫܸܒܠܹ̈ܐ ܒܲܓܝܼܪܹ̈ܐ ܠܐܵܢܝܼ ܫܲܒ݂ܥܵܐ ܫܸܒܠܹ̈ܐ ܨܦܵܝܝܼ. ܗܘܼܩܹܐ ܠܝܼ ܚܸܠܡܝܼ ܠܚܲܪ̈ܵܫܹܐ، ܐܝܼܢܵܐ ܠܲܝܬ ܗ݇ܘܵܐ ܚܲܕ ܕܦܲܫܸܩ ܗ݇ܘܵܐ ܠܹܗ ܐܸܠܝܼ.“

25ܐ݇ܡܝܼܪܹܗ ܝܵܘܣܸܦ ܠܦܸܪܥܘܿܢ، ”ܚܲܕ ܝܼܢܵܐ ܚܸܠܡܵܢܹ̈ܐ ܕܦܸܪܥܘܿܢ؛ ܓܠܹܐ ܠܹܗ ܐܲܠܵܗܵܐ ܠܦܸܪܥܘܿܢ ܡܸܢܕܝܼ ܕܗܕܝܼܪܵܐ ܝܠܹܗ ܠܸܥܒ݂ܵܕܵܐ. 26ܐܲܢܹܐ ܫܒܲܥ ܬܵܘܸܪ̈ܝܵܬܹܐ ܨܦܵܝܝܼ، ܫܒܲܥ ܫܸܢܹ̈ܐ ܝܢܵܐ، ܘܫܒܲܥ ܫܸܒܠܹ̈ܐ ܨܦܵܝܝܼ، ܫܒܲܥ ܫܸܢܹ̈ܐ ܝܢܵܐ؛ ܚܲܕ ܝܼܢܵܐ ܚܸܠܡܵܢܹ̈ܐ. 27ܘܐܵܢܝܼ ܫܒܲܥ ܬܵܘܸܪ̈ܝܵܬܹܐ ܡܚܝܼܠܹ̈ܐ ܘܣܸܪ̈ܝܹܐ ܕܒܹܐܣܵܩܵܐ ܝܗ݇ܘܵܘ ܒܵܬ݇ܪܲܝܗܝ، ܫܒܲܥ ܫܸܢܹ̈ܐ ܝܢܵܐ؛ ܘܫܲܒ݂ܥܵܐ ܫܸܒܠܹ̈ܐ ܡܚܝܼܠܹ̈ܐ، ܢܘܝܼܠܹܐ ܒܦܵܘܚܵܐ ܕܡܲܕܢܚܵܐ ܒܸܬ ܗܵܘܝܼ ܫܒܲܥ ܫܸܢܹ̈ܐ ܕܟܸܦܢܵܐ. 28ܐܲܝܟ݂ ܕܐ݇ܡܝܼܪܝܼ ܠܦܸܪܥܘܿܢ، ܡܸܢܕܝܼ ܕܐܲܠܵܗܵܐ ܒܸܥܒ݂ܵܕܹܗ ܝܠܹܗ، ܓܠܹܐ ܠܹܗ ܠܦܸܪܥܘܿܢ. 29ܒܸܬ ܐܵܬܝܼ ܫܒܲܥ ܫܸܢܹ̈ܐ ܕܦܸܪܝܘܼܬܵܐ ܓܘܼܪܬܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ. 30ܘܗ̇ܝܓܵܗ ܒܸܬ ܐܵܬܝܼ ܫܒܲܥ ܫܸܢܹ̈ܐ ܕܟܸܦܢܵܐ ܒܵܬ݇ܪܲܝܗܝ، ܘܒܸܬ ܦܵܝܫܵܐ ܡܘܼܢܫܝܼܬܵܐ ܟܠܵܗ̇ ܗ̇ܝ ܦܸܪܝܘܼܬܵܐ ܒܐܲܪܥܵܐ ܕܡܸܨܪܹܝܢ؛ ܘܟܸܦܢܵܐ ܒܸܬ ܡܲܚܪܸܒ݂ ܠܵܗ̇ ܐܲܪܥܵܐ، 31ܘܒܸܬ ܦܵܝܫܵܐ ܡܘܼܢܫܝܼܬܵܐ ܗ̇ܝ ܦܸܪܝܘܼܬܵܐ ܒܐܲܪܥܵܐ، ܣܵܒܵܒ ܟܸܦܢܵܐ ܕܐܵܬܹܐ ܡ̣ܢ ܒܵܬ݇ܪ ܗܵܕܵܐ ܒܸܬ ܗܵܘܹܐ ܪܵܒܵܐ ܝܲܩܘܼܪܵܐ. 32ܘܬܢܵܝܬܵܐ ܕܚܸܠܡܵܐ ܠܦܸܪܥܘܿܢ ܬܲܪܬܹܝ ܓܵܗܹ̈ܐ، ܐܵܗܵܐ ܝܠܵܗ̇: ܕܡ̣ܢ ܠܟܸܣ ܐܲܠܵܗܵܐ ܦܝܼܫܵܐ ܝܠܹܗ ܡܘܼܩܘܝܼܵܐ ܐܵܗܵܐ ܫܘܼܠܵܐ، ܘܒܸܬ ܥܵܒܹܕ ܠܹܗ ܒܓ̰ܲܠܕܘܼܬܵܐ. 33ܐܵܕܝܼܵܐ ܪܵܫܹܡ ܦܸܪܥܘܿܢ ܚܲܕ ܐ݇ܢܵܫܵܐ ܦܲܪܡܝܼܵܢܵܐ ܘܗܵܘܢܵܢܵܐ، ܘܡܲܬܸܒ݂ ܠܹܗ ܥܲܠ ܐܲܪܥܵܐ ܕܡܸܨܪܹܝܢ. 34ܫܒ݂ܘܿܩ ܢܵܨܹܒ݂ ܦܸܪܥܘܿܢ ܡܕܲܒܪ̈ܵܢܹܐ ܥܲܠ ܐܲܪܥܵܐ ܕܡܸܨܪܹܝܢ، ܘܫܵܩܹܠ ܚܲܕ ܚܡܝܼܫܵܝܵܐ ܡ̣ܢ ܕܲܚܠܵܐ ܕܐܲܪܥܵܐ ܒܫܒܲܥ ܫܸܢܹ̈ܐ ܕܦܸܪܝܘܼܬܵܐ. 35ܫܒ݂ܘܿܩ ܟܲܦܫܝܼ ܠܟܠܵܗ̇ ܡܹܐܟ݂ܘܼܠܬܵܐ ܕܐܲܢܹܐ ܫܒܲܥ ܫܸܢܹ̈ܐ ܨܦܵܝܝܼ ܕܒܹܐܬܵܝܵܐ ܝܢܵܐ، ܘܓ̰ܲܡܥܝܼ ܕܲܚܠܵܐ ܒܡܕܝܼܢܵܬܹ̈ܐ ܠܡܹܐܟ݂ܘܼܠܬܵܐ ܬܚܘܿܬ ܐܝܼܕܵܐ ܕܦܸܪܥܘܿܢ، ܘܢܵܛܪܝܼ ܠܗܘܿܢ. 36ܘܐܵܗܵܐ ܡܹܐܟ݂ܘܼܠܬܵܐ ܦܵܝܫܵܐ ܢܛܝܼܪܬܵܐ ܒܐܲܬܪܵܐ ܩܵܐ ܐܵܢܝܼ ܫܒܲܥ ܫܸܢܹ̈ܐ ܕܟܸܦܢܵܐ ܕܒܹܐܬܵܝܵܐ ܝܢܵܐ ܒܐܲܪܥܵܐ ܕܡܸܨܪܹܝܢ، ܕܠܵܐ ܛܵܠܩܵܐ ܐܲܪܥܵܐ ܒܟܸܦܢܵܐ.“

ܝܵܘܣܸܦ ܦܝܵܫܵܐ ܡܘܼܪܡܵܐ

37ܫܦܝܼܪܹܗ ܐܵܗܵܐ ܚܲܒܪܵܐ ܒܥܲܝܢܹ̈ܐ ܕܦܸܪܥܘܿܢ ܘܒܥܲܝܢܹ̈ܐ ܕܟܠܲܝܗܝ ܪܹ̈ܓܵܘܵܬܹܗ. 38ܘܐ݇ܡܝܼܪܹܗ ܦܸܪܥܘܿܢ ܠܪܹ̈ܓܵܘܵܬܹܗ، ”ܡܵܨܲܚ ܡܲܫ݇ܟ̰ܚܲܚ ܐܲܝܟ݂ ܐܵܗܵܐ ܐ݇ܢܵܫܵܐ ܕܐܝܼܬ ܒܝܼܹܗ ܪܘܼܚܵܐ ܕܐܲܠܵܗܵܐ؟“ 39ܐ݇ܡܝܼܪܹܗ ܦܸܪܥܘܿܢ ܠܝܵܘܣܸܦ، ”ܒܗ̇ܝ ܕܐܲܠܵܗܵܐ ܕܡܘܼܕܸܥ ܠܹܗ ܐܸܠܘܼܟ݂ ܟܠܹܗ ܐܵܗܵܐ، ܠܲܝܬ ܐ݇ܢܵܫܵܐ ܒܘܼܫ ܦܲܪܡܝܼܵܢܵܐ ܘܗܵܘܢܵܢܵܐ ܡܸܢܘܼܟ݂؛ 40ܐܲܢ݇ܬ ܒܸܬ ܗܵܘܹܝܬ ܥܲܠ ܒܲܝܬܝܼ، ܘܟܠܹܗ ܥܲܡܝܼ ܒܸܬ ܫܵܡܹܥ ܐܸܠܘܼܟ݂؛ ܐܲܚܟ̰ܝܼ ܒܬܪܘܿܢܘܿܣ ܒܸܬ ܗܵܘܹܝܢ ܒܘܼܫ ܓܘܼܪܵܐ ܡܸܢܘܼܟ݂.“ 41ܘܐ݇ܡܝܼܪܹܗ ܦܸܪܥܘܿܢ ܠܝܵܘܣܸܦ، ”ܚܙܝܼ ܐܵܢܵܐ ܒܸܪܫܵܡܘܼܟ݂ ܝܼܘܸܢ ܥܲܠ ܟܠܵܗ̇ ܐܲܪܥܵܐ ܕܡܸܨܪܹܝܢ.“ 42ܘܦܘܼܠܸܛ ܠܹܗ ܦܸܪܥܘܿܢ ܠܥܸܙܲܩܬܵܐ ܡܥܲܠ ܐܝܼܕܹܗ ܘܡܸܚܝܵܐ ܠܹܗ ܒܐܝܼܕܵܐ ܕܝܵܘܣܸܦ، ܘܡܘܼܠܒܸܫ ܠܹܗ ܐܸܠܹܗ ܓ̰ܘܼܠܹ̈ܐ ܕܟܸܬܵܢܵܐ ܪ̈ܲܩܝܼܩܹܐ، ܘܡܘܼܬܸܒ݂ ܠܹܗ ܬܵܘܩܵܐ ܕܕܲܗܒ݂ܵܐ ܒܩܕܵܠܹܗ. 43ܡܘܼܬܸܒ݂ ܠܹܗ ܐܸܠܹܗ ܒܡܲܪܟܲܒ݂ܬܹܗ ܬܪܲܝܵܢܝܼܬܵܐ، ܘܡܘܼܩܘܸܚ ܠܗܘܿܢ ܩܵܕ݇ܡܘܼܗܝ، ”ܒܪܘܿܟܘܼܢ.“ ܗܲܕܟ݂ܵܐ ܡܘܼܬܸܒ݂ ܠܹܗ ܐܸܠܹܗ ܥܲܠ ܟܠܵܗ̇ ܐܲܪܥܵܐ ܕܡܸܨܪܹܝܢ. 44ܐ݇ܡܝܼܪܹܗ ܦܸܪܥܘܿܢ ܠܝܵܘܣܸܦ، ”ܐܵܢܵܐ ܝܘܸܢ ܦܸܪܥܘܿܢ، ܘܕܠܵܐ ܦܣܵܣܵܐ ܕܝܼܘܼܟ݂ ܐ݇ܢܵܫܵܐ ܠܹܐ ܡܲܪܸܡ ܐܝܼܕܹܗ ܝܲܢ ܐܲܩܠܹܗ ܓܵܘ ܟܠܵܗ̇ ܐܲܪܥܵܐ ܕܡܸܨܪܹܝܢ.“ 45ܘܩܪܹܐ ܠܹܗ ܦܸܪܥܘܿܢ ܫܸܡܵܐ ܕܝܵܘܣܸܦ، ܨܲܦܢܲܬ ܦܲܥܢܲܚ،#41‏:45 ܥܸܒ݂ܪܵܐܝܼܬ ܒܡܲܥܢܵܝܵܐ: ܐܲܠܵܗܵܐ ܟܹܐ ܗܲܡܙܸܡ ܘܚܵܝܵܐ ܝܠܹܗ ܘܝܘܼܗ݇ܒ݂ܵܐ ܠܹܗ ܐܸܠܹܗ ܐܵܣܢܲܬ ܒܪܵܬܵܐ ܕܦܘܿܛܝܼܦܪܲܥ، ܟܵܗܢܵܐ ܕܐܘܿܢ، ܠܒܲܟ݂ܬܵܐ. ܘܩܢܹܐ ܠܹܗ ܝܵܘܣܸܦ ܫܘܼܠܛܵܢܵܐ ܥܲܠ ܐܲܪܥܵܐ ܕܡܸܨܪܹܝܢ.

46ܝܵܘܣܸܦ ܒܲܪ ܬܠܵܬܝܼ ܫܸܢܹ̈ܐ ܝܗ݇ܘܵܐ ܐܝܼܡܲܢ ܕܫܘܼܪܹܐ ܠܹܗ ܠܚܸܠܡܲܬ ܩܵܐ ܦܸܪܥܘܿܢ، ܡܲܠܟܵܐ ܕܡܸܨܪܹܝܢ. ܘܦܠܝܼܛ ܠܹܗ ܝܵܘܣܸܦ ܡ̣ܢ ܩܵܕ݇ܡ ܦܸܪܥܘܿܢ ܘܚܕܝܼܪܹܗ ܒܟܠܵܗ̇ ܐܲܪܥܵܐ ܕܡܸܨܪܹܝܢ. 47ܝܘܼܗ݇ܒܸܠ ܠܵܗ̇ ܐܲܪܥܵܐ ܡܲܗܨܘܼܠܹ̈ܐ ܪܵܒܵܐ ܒܡܸܬܚܵܐ ܕܫܒܲܥ ܫܸܢܹ̈ܐ ܕܦܸܪܝܘܼܬܵܐ. 48ܘܓ̰ܘܼܡܸܥ ܠܹܗ ܠܟܠܵܗ̇ ܡܹܐܟ݂ܘܼܠܬܵܐ ܒܡܸܬܚܵܐ ܕܐܲܢܹܐ ܫܒܲܥ ܫܸܢܹ̈ܐ ܕܦܸܪܝܘܼܬܵܐ ܕܗܘܹܐ ܠܗܘܿܢ ܒܐܲܪܥܵܐ ܕܡܸܨܪܹܝܢ، ܘܟܘܼܦܸܫ ܠܹܗ ܡܹܐܟ݂ܘܼܠܬܵܐ ܓܵܘ ܡܕܝܼܢܵܬܹ̈ܐ؛ ܡܘܼܬܸܒ݂ ܠܹܗ ܡܹܐܟ݂ܘܼܠܬܵܐ ܒܟܠ ܡܕܝܼܢ݇ܬܵܐ ܡ̣ܢ ܕܸܫܝܵܬܹ̈ܐ ܕܚܵܕܸܪ̈ܘܵܢܘܼܗ̇. 49ܓ̰ܘܼܡܸܥ ܠܹܗ ܕܲܚܠܵܐ ܐܲܝܟ݂ ܣܹܠܵܐ ܕܝܵܡܵܐ ܒܦܸܪܝܘܼܬܵܐ ܪܲܒܬܵܐ، ܗܲܠ ܕܠܵܐ ܡܨܹܐ ܠܹܗ ܠܸܡܢܵܝܘܼܗ̇، ܣܵܒܵܒ ܠܹܐ ܐܵܬܝܵܐ ܗ݇ܘܵܐ ܠܸܡܢܵܝܵܐ.

50ܡ̣ܢ ܩܵܕ݇ܡ ܕܐܵܬܝܵܐ ܗ݇ܘܵܐ ܫܹܢ݇ܬܵܐ ܕܟܸܦܢܵܐ، ܝܵܘܣܸܦ ܩܲܡ ܗܵܘܹܐ ܠܹܗ ܬܪܹܝ ܒܢܘܿܢܹ̈ܐ، ܕܗܘܼܨܸܠ ܠܵܗ̇ ܐܸܠܹܗ ܐܵܣܢܲܬ ܒܪܵܬܵܐ ܕܦܘܿܛܝܼܦܪܲܥ ܟܵܗܢܵܐ ܕܐܘܿܢ. 51ܘܩܪܹܐ ܠܹܗ ܝܵܘܣܸܦ ܫܸܡܵܐ ܕܒܪܘܿܢܹܗ ܒܘܼܟ݂ܪܵܐ، ܡܢܲܫܹܐ،#41‏:51 ܫܸܡܵܐ ܕܡܢܲܫܹܐ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܥܸܠܬܵܐ ܠܡܲܢܫܘܼܝܹܐ ܒܠܸܫܵܢܵܐ ܥܸܒ݂ܪܵܝܵܐ ܣܵܒܵܒ ܐ݇ܡܝܼܪܹܗ، ”ܐܵܗܵܐ ܥܒ݂ܝܼܕ ܠܹܗ ܐܲܠܵܗܵܐ ܕܡܲܢܫܸܝܢ ܠܟܠܹܗ ܐܘܼܠܨܵܢܝܼ، ܘܠܟܠܹܗ ܒܲܝܬܵܐ ܕܒܵܒܝܼ.“ 52ܘܫܸܡܵܐ ܕܗ̇ܘ ܕܬܪܹܝ ܩܪܹܐ ܠܹܗ ܐܲܦܪܹܝܡ،#41‏:52 ܫܸܡܵܐ ܕܐܲܦܪܹܝܡ ܩܵܠܹܗ ܒܸܕܡܵܝܵܐ ܝܠܹܗ ܠܚܲܒܪܵܐ ܕܦܸܪܝܵܐ ܬܪܹܝ ܬܵܩܹ̈ܐ ܒܠܸܫܵܢܵܐ ܥܸܒ݂ܪܵܝܵܐ ܣܵܒܵܒ ܐ݇ܡܝܼܪܹܗ، ”ܩܲܡ ܡܲܦܪܹܐ ܠܝܼ ܐܲܠܵܗܵܐ ܒܐܲܪܥܵܐ ܕܐܘܼܠܨܵܢܝܼ.“

53ܦܪܝܼܩ ܠܗܘܿܢ ܫܒܲܥ ܫܸܢܹ̈ܐ ܕܦܸܪܝܘܼܬܵܐ ܕܗܘܹܐ ܠܵܗ̇ ܒܐܲܪܥܵܐ ܕܡܸܨܪܹܝܢ؛ 54ܘܫܘܼܪܹܐ ܠܗܘܿܢ ܫܒܲܥ ܫܸܢܹ̈ܐ ܕܟܸܦܢܵܐ، ܕܵܐܟ݂ܝܼ ܕܐ݇ܡܝܼܪܵܐ ܝܗ݇ܘܵܐ ܝܵܘܣܸܦ. ܗܘܹܐ ܠܹܗ ܟܸܦܢܵܐ ܒܟܠܲܝܗܝ ܐܲܪ̈ܥܵܬܹܐ ܐ݇ܚܹܪ̈݇ܢܹܐ؛ ܐܝܼܢܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ ܐܝܼܬ ܗ݇ܘܵܐ ܠܲܚܡܵܐ. 55ܐܝܼܡܲܢ ܕܟܦܝܼܢܵܗ̇ ܟܠܵܗ̇ ܐܲܪܥܵܐ ܕܡܸܨܪܹܝܢ، ܡܘܼܩܘܸܚ ܠܹܗ ܥܲܡܵܐ ܠܦܸܪܥܘܿܢ ܒܸܛܠܵܒܵܐ ܠܲܚܡܵܐ؛ ܘܐ݇ܡܝܼܪܹܗ ܦܸܪܥܘܿܢ ܠܟܠܲܝܗܝ ܡܸܨܪ̈ܵܝܹܐ، ”ܙܹܠ݇ܡܘܼܢ ܠܟܸܣ ܝܵܘܣܸܦ؛ ܡܸܢܕܝܼ ܕܐܵܡܹܪ ܐܸܠܵܘܟ݂ܘܿܢ، ܥܒ݂ܘܿܕܘܼܢ.“ 56ܗܘܹܐ ܠܹܗ ܟܸܦܢܵܐ ܥܲܠ ܟܠܵܗ̇ ܦܵܬܵܐ ܕܐܲܪܥܵܐ؛ ܘܦܬܝܼܚ ܠܹܗ ܝܵܘܣܸܦ ܠܐܵܘܨܪܹ̈ܐ، ܘܙܘܼܒܸܢܹܗ ܕܲܚܠܵܐ ܠܡܸܨܪ̈ܵܝܹܐ، ܣܵܒܵܒ ܚܘܼܠܸܢܹܗ ܟܸܦܢܵܐ ܒܐܲܪܥܵܐ ܕܡܸܨܪܹܝܢ. 57ܘܟܠܲܝܗܝ ܐܲܬܪ̈ܵܘܵܬܹܐ ܐ݇ܬܹܐ ܠܗܘܿܢ ܠܡܸܨܪܹܝܢ ܠܟܸܣ ܝܵܘܣܸܦ ܠܸܙܒ݂ܵܢܵܐ ܕܲܚܠܵܐ، ܣܵܒܵܒ ܚܘܼܠܸܢܹܗ ܟܸܦܢܵܐ ܒܟܠܵܗ̇ ܐܲܪܥܵܐ.

Currently Selected:

ܒܪܝܬܐ 41: ABTAB

Highlight

Copy

Compare