ܒܪܝܬܐ 40

ܝܵܘܣܸܦ ܦܲܫܘܼܩܹܐ ܬܪܹܝ ܚܸܠܡܹ̈ܐ

1ܗܘܹܐ ܠܵܗ̇ ܡ̣ܢ ܒܵܬ݇ܪ ܐܲܢܹܐ، ܫܵܩܝܵܐ ܕܡܲܠܟܵܐ ܕܡܸܨܪܹܝܢ ܘܝܵܦܝܵܢܵܐ ܕܠܲܚܡܹܗ ܡܘܼܟܪܸܒ ܠܗܘܿܢ ܠܡܵܪܲܝܗܝ ܡܲܠܟܵܐ ܕܡܸܨܪܹܝܢ. 2ܘܚܘܼܡܬܸܢܹܗ ܦܸܪܥܘܿܢ ܥܲܠ ܐܵܢܝܼ ܬܪܹܝ ܡܗܲܝܡܢܘܼ̈ܗܝ: ܪܲܒ ܫܵܩܝܹ̈ܐ، ܘܪܲܒ ܝܵܦܝܵܢܹ̈ܐ ܕܠܲܚܡܹܗ. 3ܕܸܪܝܲܝ ܠܹܗ ܓܵܘ ܒܹܝܬ ܢܛܘܼܪܬܵܐ، ܒܒܲܝܬܵܐ ܕܪܹܫ ܢܵܛܘܿܪܹ̈ܐ، ܓܵܘ ܒܹܝܬ ܐܲܣܝܼܪܹ̈ܐ، ܐܲܝܟܵܐ ܕܚܒ݂ܝܼܫܵܐ ܝܗ݇ܘܵܐ ܝܵܘܣܸܦ. 4ܘܡܘܼܬܸܒ݂ ܠܹܗ ܪܲܒ ܕܲܚܫܹ̈ܐ ܠܝܵܘܣܸܦ ܠܟܸܣ ܠܲܝܗܝ، ܕܥܵܒܹܕ ܚܸܠܡܲܬ ܐܸܠܲܝܗܝ. ܘܗܘܹܐ ܠܗܘܿܢ ܓܵܘ ܒܹܝܬ ܢܛܘܼܪܬܵܐ ܩܵܐ ܚܲܕ ܡܸܬܚܵܐ.

5ܘܚܲܕ ܠܲܝܠܹܐ ܬܸܪܘܲܝܗܝ، ܫܵܩܝܵܐ ܘܝܵܦܝܵܢܵܐ ܕܠܲܚܡܵܐ ܕܡܲܠܟܵܐ ܕܡܸܨܪܹܝܢ، ܕܝܼܗ݇ܘܵܘ ܓܵܘ ܒܹܝܬ ܐܲܣܝܼܪܹ̈ܐ، ܚܠܝܼܡ ܠܗܘܿܢ ܚܸܠܡܵܐ، ܟܠ ܚܲܕ ܚܸܠܡܵܐ ܕܓܵܢܹܗ، ܘܟܠ ܚܸܠܡܵܐ ܒܦܘܼܫܵܩܵܐ ܕܓܵܢܹܗ. 6ܐ݇ܬܹܐ ܠܹܗ ܝܵܘܣܸܦ ܠܟܸܣ ܠܲܝܗܝ ܒܨܲܦܪܵܐ ܘܚܸܙܝܲܝ ܠܹܗ ܦܫܝܼܡܹ̈ܐ. 7ܘܒܘܼܩܸܪܹܗ ܡ̣ܢ ܐܵܢܝܼ ܪܵܘܪ̈ܒ݂ܵܢܹܐ ܕܦܸܪܥܘܿܢ ܕܝܼܗ݇ܘܵܘ ܥܲܡܹܗ ܓܵܘ ܒܹܝܬ ܢܛܘܼܪܬܵܐ ܕܒܲܝܬܵܐ ܕܡܵܪܹܗ، ܘܐ݇ܡܝܼܪܹܗ، ”ܩܵܡܘܿܕܝܼ ܦܵܬܘܵܬܵܘ̈ܟ݂ܘܿܢ ܣܸܪܝܹܐ ܝܢܵܐ ܐܸܕܝܘܿܡ؟“ 8ܐ݇ܡܝܼܪܗܘܿܢ ܐܸܠܹܗ، ”ܚܠܝܼܡ ܠܲܢ ܚܸܠܡܹ̈ܐ، ܘܠܲܝܬ ܚܲܕ ܕܦܲܫܸܩ ܠܗܘܿܢ ܐܸܠܲܢ.“ ܐ݇ܡܝܼܪܹܗ ܐܸܠܲܝܗܝ ܝܵܘܣܸܦ، ”ܗܵܐ، ܠܹܐ ܝܢܵܐ ܕܐܲܠܵܗܵܐ ܦܘܼܫܵܩܹ̈ܐ؟ ܗܲܩܸܝܡܘܼܢ ܠܗܘܿܢ ܚܸܠܡܹ̈ܐ ܐܸܠܝܼ ܦܲܪܦܘܼܠܹܐ ܝܘܸܢ.“ 9ܘܗܘܼܩܹܐ ܠܹܗ ܪܲܒ ܫܵܩܝܵܐ ܚܸܠܡܹܗ ܠܝܵܘܣܸܦ، ܘܐ݇ܡܝܼܪܹܗ ܐܸܠܹܗ، ”ܚܙܹܐ ܠܝܼ ܒܚܸܠܡܝܼ، ܘܗܵܐ ܓܸܦܬܵܐ ܩܵܕ݇ܡܝܼ. 10ܘܓܸܦܬܵܐ ܐܝܼܬ ܗ݇ܘܵܐ ܠܵܗ̇ ܬܠܵܬ ܨܸܒܥܵܬܹ̈ܐ، ܘܒܓ̰ܲܠܕܘܼܬܵܐ ܒܘܼܪܛܸܢܵܗ̇، ܘܦܠܝܼܛ ܠܗܘܿܢ ܦܸܩܚܘܼ̈ܗ̇، ܘܡܛܹܐ ܠܗܘܿܢ ܩܘܼܢܛܵܝܦܹ̈ܐ ܕܥܲܢܒ݂ܘܼ̈ܗ̇. 11ܟܵܣܵܐ ܕܦܸܪܥܘܿܢ ܒܐܝܼܕܝܼ ܝܗ݇ܘܵܐ، ܘܫܩܝܼܠ ܠܝܼ ܠܥܲܢܒܹ̈ܐ، ܘܡܪܝܼܟ̰ܲܝ ܠܝܼ ܓܵܘ ܟܵܣܵܐ ܕܦܸܪܥܘܿܢ ܘܝܘܼܗ݇ܒܸܠ ܠܝܼ ܟܵܣܵܐ ܠܐܝܼܕܵܐ ܕܦܸܪܥܘܿܢ.“ 12ܐ݇ܡܝܼܪܹܗ ܐܸܠܹܗ ܝܵܘܣܸܦ، ”ܐܵܗܵܐ ܝܠܹܗ ܦܘܼܫܵܩܹܗ: ܬܠܵܬ ܨܸܒܥܵܬܹ̈ܐ ܬܠܵܬܵܐ ܝܵܘܡܵܢܹ̈ܐ ܝܢܵܐ؛ 13ܡ̣ܢ ܒܵܬ݇ܪ ܬܠܵܬܵܐ ܝܵܘܡܵܢܹ̈ܐ، ܒܸܬ ܡܲܪܸܡ ܦܸܪܥܘܿܢ ܠܪܹܫܘܼܟ݂ ܘܡܲܕܸܪܘܼܟ݂ ܠܫܘܼܠܘܼܟ݂؛ ܘܒܸܬ ܝܵܗ݇ܒܹܬ ܟܵܣܵܐ ܕܦܸܪܥܘܿܢ ܠܐܝܼܕܹܗ، ܐܲܝܟ݂ ܩܵܕ݇ܡܵܝܬܵܐ ܕܝܼܘܸܬ ܗ݇ܘܵܐ ܫܵܩܝܹܗ. 14ܐܝܼܢܵܐ ܕܵܟ݂ܪܹܬ ܠܝܼ ܐܝܼܡܲܢ ܕܐܵܬܝܵܐ ܐܸܠܘܼܟ݂ ܫܵܦܵܩܲܬ، ܘܦܲܪܦܘܼܠܹܐ ܝܘܸܢ ܒܝܼܘܼܟ݂ ܕܥܵܒ݂ܕܹܬ ܐܸܠܝܼ ܪ̈ܲܚܡܹܐ ܘܡܲܕܟܸܪܸܬ ܠܝܼ ܠܦܸܪܥܘܿܢ، ܘܦܲܠܛܸܬ ܠܝܼ ܡ̣ܢ ܐܵܗܵܐ ܒܲܝܬܵܐ. 15ܣܵܒܵܒ ܓܢܵܒ݂ܵܐ ܦܝܼܫ ܠܝܼ ܓܢܝܼܒ݂ܵܐ ܡ̣ܢ ܐܲܪܥܵܐ ܕܥܸܒ݂ܪ̈ܵܝܹܐ؛ ܘܐܘܼܦ ܠܐܲܟ݂ܵܐ ܠܹܐ ܝܘܸܢ ܥܒ݂ܝܼܕܵܐ ܡܸܢܕܝܼ ܕܕܵܪܹܐ ܗ݇ܘܵܐ ܠܝܼ ܒܓܘܼܒܵܐ.“

16ܐܝܼܡܲܢ ܕܚܙܹܐ ܠܹܗ ܪܲܒ ܝܵܦܝܵܢܹ̈ܐ ܕܨܦܵܝܝܼ ܦܘܼܫܸܩ ܠܹܗ ܚܸܠܡܵܐ، ܐ݇ܡܝܼܪܹܗ ܠܝܵܘܣܸܦ، ”ܐܘܼܦ ܐܵܢܵܐ ܚܙܹܐ ܠܝܼ ܒܚܸܠܡܝܼ، ܗܵܐ ܬܠܵܬܵܐ ܣܵܠܹ̈ܐ ܕܠܲܚܡܵܐ ܚܘܵܪܵܐ ܥܲܠ ܪܹܫܝܼ. 17ܓܵܘ ܣܵܠܵܐ ܥܸܠܵܝܵܐ ܐܝܼܬ ܗ݇ܘܵܐ ܟܠ ܚܕܵܐ ܡܹܐܟ݂ܘܼܠܬܵܐ ܝ݇ܦܝܼܬܵܐ ܩܵܐ ܦܸܪܥܘܿܢ، ܐܝܼܢܵܐ ܛܲܝܪܹ̈ܐ ܒܹܐܟ݂ܵܠܵܐ ܝܗ݇ܘܵܘ ܡ̣ܢ ܣܵܠܵܐ ܕܥܲܠ ܪܹܫܝܼ.“ 18ܓ̰ܘܼܘܸܒ ܠܹܗ ܝܵܘܣܸܦ، ܒܹܐܡܵܪܵܐ، ”ܐܵܗܵܐ ܝܠܹܗ ܦܘܼܫܵܩܵܐ ܕܚܸܠܡܘܼܟ݂: ܬܠܵܬܵܐ ܣܵܠܹ̈ܐ ܬܠܵܬܵܐ ܝܵܘܡܵܢܹ̈ܐ ܝܢܵܐ. 19ܡ̣ܢ ܒܵܬ݇ܪ ܬܠܵܬܵܐ ܝܵܘܡܵܢܹ̈ܐ ܦܸܪܥܘܿܢ ܒܸܬ ܡܲܪܸܡ ܠܹܗ ܪܹܫܘܼܟ݂ ܡܥܲܠܘܼܟ݂، ܘܬܵܠܹܐ ܠܘܼܟ݂ ܥܲܠ ܩܲܝܣܵܐ، ܘܒܸܬ ܐܵܟ݂ܠܵܐ ܦܵܪܲܚܬܵܐ ܒܸܣܪܘܼܟ݂ ܡ̣ܢ ܥܲܠܘܼܟ݂.“ 20ܘܗܘܹܐ ܠܵܗ̇ ܒܝܵܘܡܵܐ ܕܬܠܵܬܵܐ، ܝܵܘܡܵܐ ܕܒܹܝܬ ܝܲܠܕܹܗ، ܥܒ݂ܝܼܕ ܠܹܗ ܦܸܪܥܘܿܢ ܡܸܫܬܘܼܬܵܐ ܠܟܠܲܝܗܝ، ܘܡܘܼܪܸܡ ܠܹܗ ܪܹܫܵܐ ܕܪܲܒ ܫܵܩܝܹ̈ܐ، ܘܫܩܝܼܠ ܠܹܗ ܪܹܫܵܐ ܕܪܲܒ ܝܵܦܝܵܢܹ̈ܐ، ܒܹܝܠ ܪܹ̈ܓܵܘܵܬܹܗ. 21ܡܘܼܕܸܪܹܗ ܠܪܲܒ ܫܵܩܝܹ̈ܐ ܠܫܘܼܠܹܗ، ܘܗ̇ܘ ܝܘܼܗ݇ܒܸܠ ܠܹܗ ܟܵܣܵܐ ܠܐܝܼܕܵܐ ܕܦܸܪܥܘܿܢ. 22ܘܠܪܲܒ ܝܵܦܝܵܢܹ̈ܐ ܬܠܹܐ ܠܹܗ ܥܲܠ ܩܲܝܣܵܐ، ܐܲܝܟ݂ ܕܦܘܼܫܸܩ ܠܹܗ ܐܸܠܲܝܗܝ ܝܵܘܣܸܦ. 23ܐܝܼܢܵܐ ܠܵܐ ܕܟ݂ܝܼܪܹܗ ܪܲܒ ܫܵܩܝܵܐ ܠܝܵܘܣܸܦ، ܘܡܘܼܢܫܹܐ ܠܹܗ ܐܸܠܹܗ.

Currently Selected:

ܒܪܝܬܐ 40: ABTAB

Highlight

Copy

Compare