ܒܪܝܬܐ 39

ܝܵܘܣܸܦ ܓܵܘ ܒܲܝܬܵܐ ܕܦܘܿܛܝܼܦܵܪ

1ܘܝܵܘܣܸܦ ܦܝܼܫ ܠܹܗ ܡܘܼܨܠܝܼܵܐ ܠܡܸܨܪܹܝܢ. ܘܚܲܕ ܡܸܨܪܵܝܵܐ ܫܸܡܹܗ ܦܘܿܛܝܼܦܵܪ، ܚܲܕ ܡ̣ܢ ܓܘܼܪ̈ܵܢܹܐ ܕܚܲܝܠܵܐ ܘܪܹܫ ܢܵܛܘܿܪܹ̈ܐ ܕܦܸܪܥܘܿܢ، ܙܒ݂ܝܼܢܹܗ ܐܸܠܹܗ ܡ̣ܢ ܐܝܼܫܡܲܥܠܵܝܹ̈ܐ ܕܡܘܼܨܠܝܼܹܗ ܝܗ݇ܘܵܘ ܠܬܵܡܵܐ. 2ܗܘܹܐ ܠܹܗ ܡܵܪܝܵܐ ܥܲܡ ܝܵܘܣܸܦ، ܘܡܘܼܢܬܹܐ ܠܹܗ ܗ̇ܘ، ܘܚܝܹܐ ܠܹܗ ܓܵܘ ܒܲܝܬܵܐ ܕܡܵܪܹܗ ܡܸܨܪܵܝܵܐ. 3ܚܙܹܐ ܠܹܗ ܡܵܪܹܗ ܕܡܵܪܝܵܐ ܥܲܡܹܗ ܝܗ݇ܘܵܐ، ܘܟܠ ܡܸܢܕܝܼ ܕܥܒ݂ܝܼܕ ܠܹܗ، ܡܵܪܝܵܐ ܩܲܡ ܝܲܗ݇ܒܸܠ ܠܹܗ ܡܲܢܬܵܝܬܵܐ ܒܐܝܼܕܹܗ. 4ܡܘܼܫ݇ܟ̰ܸܚ ܠܹܗ ܝܵܘܣܸܦ ܫܵܦܵܩܲܬ ܒܥܲܝܢܘܼ̈ܗܝ ܘܥܒ݂ܝܼܕ ܠܹܗ ܚܸܠܡܲܬ ܐܸܠܹܗ، ܘܗ̇ܘ ܩܲܡ ܥܵܒܹܕ ܠܹܗ ܡܕܲܒܪܵܢܵܐ ܥܲܠ ܒܲܝܬܹܗ، ܘܣܘܼܦܹܐ ܠܹܗ ܟܠ ܡܸܢܕܝܼ ܒܐܝܼܕܹܗ. 5ܘܗܘܹܐ ܠܵܗ̇، ܗܵܐ، ܡ̣ܢ ܥܕܵܢܵܐ ܕܥܒ݂ܝܼܕ ܠܹܗ ܐܸܠܹܗ ܡܕܲܒܪܵܢܵܐ ܥܲܠ ܒܲܝܬܹܗ ܘܥܲܠ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ، ܒܘܼܪܸܟ݂ ܠܹܗ ܡܵܪܝܵܐ ܠܒܲܝܬܵܐ ܕܡܸܨܪܵܝܵܐ ܒܘܼܬ ܝܵܘܣܸܦ؛ ܘܗܘܹܐ ܠܵܗ̇ ܒܘܼܪܟܬܵܐ ܕܡܵܪܝܵܐ ܥܲܠ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ، ܒܒܲܝܬܵܐ ܘܒܕܸܫܬܵܐ. 6ܗܲܕܟ݂ܵܐ ܣܘܼܦܹܐ ܠܹܗ ܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ ܒܐܝܼܕܵܐ ܕܝܵܘܣܸܦ؛ ܘܠܲܝܬ ܗ݇ܘܵܐ ܠܹܗ ܚܲܒܪܵܐ ܒܗܸܟ̃ ܡܸܢܕܝܼ ܫܒ݂ܘܿܩ ܡ̣ܢ ܠܲܚܡܵܐ ܕܐܵܟܹܠ ܗ݇ܘܵܐ. ܘܝܵܘܣܸܦ ܫܲܦܝܼܪܵܐ ܝܗ݇ܘܵܐ ܒܚܸܙܘܵܐ ܘܒܩܵܘܡܬܵܐ.

ܒܲܟ݂ܬܵܐ ܕܦܘܿܛܝܼܦܵܪ ܓ̰ܲܪܘܼܒܹܐ ܠܝܵܘܣܸܦ

7ܗܘܹܐ ܠܵܗ̇ ܡ̣ܢ ܒܵܬ݇ܪ ܐܲܢܹܐ، ܫܘܼܗܘܸܬ ܠܵܗ̇ ܒܲܟ݂ܬܵܐ ܕܡܵܪܹܗ ܥܲܠ ܝܵܘܣܸܦ، ܘܐ݇ܡܝܼܪܵܗ̇، ”ܕܡܘܿܟ݂ ܥܲܡܝܼ.“ 8ܐܝܼܢܵܐ ܡܘܼܚܦܸܠ ܠܹܗ ܝܵܘܣܸܦ ܘܐ݇ܡܝܼܪܹܗ ܐܸܠܘܼܗ̇، ”ܚܙܝܼ، ܡܵܪܝܼ ܠܹܐ ܝܵܕܹܥ ܡܘܿܕܝܼ ܐܝܼܬ ܠܟܸܣ ܠܝܼ ܓܵܘ ܒܲܝܬܵܐ، ܒܗ̇ܝ ܕܟܠ ܡܸܢܕܝܼ ܣܘܼܦܝܹܗ ܝܠܹܗ ܒܐܝܼܕܝܼ. 9ܠܲܝܬ ܒܘܼܫ ܓܘܼܪܵܐ ܡܸܢܝܼ ܓܵܘ ܐܵܗܵܐ ܒܲܝܬܵܐ، ܘܠܹܐ ܝܠܹܗ ܚܣܝܼܟ݂ܵܐ ܡܸܢܕܝܼ ܡܸܢܝܼ ܫܒ݂ܘܿܩ ܡܸܢܵܟ݂ܝ، ܣܵܒܵܒ ܒܲܟ݂ܬܹܗ ܝܘܲܬܝ. ܕܵܐܟ݂ܝܼ ܥܵܒ݂ܕܹܢ ܐܵܗܵܐ ܒܝܼܫܬܵܐ ܓܘܼܪܬܵܐ، ܘܚܵܛܹܝܢ ܥܲܠ ܐܲܠܵܗܵܐ؟“ 10ܗܘܼܡܙܸܡ ܠܵܗ̇ ܥܲܡ ܝܵܘܣܸܦ ܡ̣ܢ ܝܵܘܡܵܐ ܠܝܵܘܡܵܐ، ܐܝܼܢܵܐ ܠܵܐ ܫܡܝܼܥ ܠܹܗ ܐܸܠܘܼܗ̇ ܕܕܵܡܹܟ݂ ܗ݇ܘܵܐ ܠܟܸܣ ܠܘܼܗ̇ ܝܲܢ ܕܗܵܘܹܐ ܗ݇ܘܵܐ ܥܲܡܘܼܗ̇.

11ܐܝܼܢܵܐ ܚܲܕ ܝܵܘܡܵܐ ܟܲܕ ܥܒ݂ܝܼܪܹܗ ܝܵܘܣܸܦ ܠܒܲܝܬܵܐ ܠܸܥܒ݂ܵܕܵܐ ܫܘܼܠܹܗ، ܠܲܝܬ ܗ݇ܘܵܐ ܐ݇ܚܹܪ݇ܢܵܐ ܡ̣ܢ ܗܲܕܵܡܹ̈ܐ ܒܒܲܝܬܵܐ ܬܵܡܵܐ. 12ܘܕܒ݂ܝܼܩ ܠܵܗ̇ ܐܸܠܹܗ ܒܠܒ݂ܝܼܫܬܹܗ، ܒܹܐܡܵܪܵܐ، ”ܕܡܘܿܟ݂ ܥܲܡܝܼ.“ ܐܝܼܢܵܐ ܫܒ݂ܝܼܩ ܠܹܗ ܠܒ݂ܝܼܫܬܹܗ ܒܐܝܼܕܘܼܗ̇، ܘܥܪܝܼܩ ܠܹܗ ܘܦܠܝܼܛ ܠܹܗ ܠܒܲܕܲܪ. 13ܐܝܼܡܲܢ ܕܚܙܹܐ ܠܵܗ̇ ܕܫܒ݂ܝܼܩ ܠܹܗ ܠܒ݂ܝܼܫܬܹܗ ܒܐܝܼܕܘܼܗ̇ ܘܥܪܝܼܩ ܠܹܗ ܠܒܲܕܲܪ، 14ܩܪܹܐ ܠܵܗ̇ ܠܐ݇ܢܵܫܹ̈ܐ ܕܒܲܝܬܘܼܗ̇، ܘܐ݇ܡܝܼܪܵܗ̇ ܐܸܠܲܝܗܝ، ”ܚܙܹܝܡܘܼܢ، ܡܘܼܐܬܹܐ ܠܹܗ ܠܟܸܣ ܠܲܢ ܐ݇ܢܵܫܵܐ ܥܸܒ݂ܪܵܝܵܐ ܠܸܓܚܵܟܵܐ ܒܝܼܲܢ؛ ܐ݇ܬܹܐ ܠܹܗ ܠܟܸܣ ܠܝܼ ܠܸܕܡܵܟ݂ܵܐ ܥܲܡܝܼ، ܘܐܵܢܵܐ ܡܘܼܩܘܸܚ ܠܝܼ ܒܩܵܠܵܐ ܪܵܡܵܐ. 15ܟܲܕ ܫܡܝܼܥ ܠܹܗ ܕܡܘܼܪܸܡ ܠܝܼ ܩܵܠܝܼ ܘܡܘܼܩܘܸܚ ܠܝܼ، ܫܒ݂ܝܼܩ ܠܹܗ ܠܒ݂ܝܼܫܬܹܗ ܠܟܸܣ ܠܝܼ، ܘܥܪܝܼܩ ܠܹܗ ܘܦܠܝܼܛ ܠܹܗ ܠܒܲܕܲܪ.“ 16ܡܘܼܬܸܒ݂ ܠܵܗ̇ ܠܒ݂ܝܼܫܬܹܗ ܠܟܸܣ ܠܘܼܗ̇ ܗܲܠ ܕܐ݇ܬܹܐ ܠܹܗ ܡܵܪܹܗ ܠܒܲܝܬܵܐ، 17ܘܗܘܼܩܹܐ ܠܵܗ̇ ܐܸܠܹܗ ܗܲܪ ܐܲܢܹܐ ܗܹܡܸܙܡܵܢܹ̈ܐ، ܘܐ݇ܡܝܼܪܵܗ̇، ”ܪܹܓܵܐ ܥܸܒ݂ܪܵܝܵܐ ܕܡܘܼܐܬܹܐ ܠܘܼܟ݂ ܠܟܸܣ ܠܲܢ ܥܒ݂ܝܼܪܹܗ ܠܟܸܣ ܠܝܼ ܠܸܓܚܵܟܵܐ ܒܝܼܝܼ. 18ܐܝܼܢܵܐ ܐܝܼܡܲܢ ܕܡܘܼܪܸܡ ܠܝܼ ܩܵܠܝܼ ܘܡܘܼܩܘܸܚ ܠܝܼ، ܫܒ݂ܝܼܩ ܠܹܗ ܠܒ݂ܝܼܫܬܹܗ ܠܟܸܣ ܠܝܼ ܘܥܪܝܼܩ ܠܹܗ ܠܒܲܕܲܪ.“ 19ܐܝܼܡܲܢ ܕܫܡܝܼܥ ܠܹܗ ܡܵܪܹܗ ܚܲܒܪܹ̈ܐ ܕܒܲܟ݂ܬܹܗ ܗܘܼܡܙܸܡ ܠܵܗ̇ ܥܲܡܹܗ، ܒܹܐܡܵܪܵܐ، ”ܗܲܕܟ݂ܵܐ ܥܒ݂ܝܼܕ ܠܹܗ ܪܹܓܘܼܟ݂ ܐܸܠܝܼ،“ ܚܝܼܡ ܠܵܗ̇ ܟܲܪܒܹܗ.

ܝܵܘܣܸܦ ܦܝܵܫܵܐ ܕܵܪܝܵܐ ܓܵܘ ܒܹܝܬ ܐܲܣܝܼܪܹ̈ܐ

20ܘܫܩܝܼܠ ܠܹܗ ܐܸܠܹܗ ܡܵܪܹܗ ܘܕܪܹܐ ܠܹܗ ܒܒܹܝܬ ܐܲܣܝܼܪܹ̈ܐ، ܐܲܝܟܵܐ ܕܐܲܣܝܼܪܹ̈ܐ ܕܡܲܠܟܵܐ ܕܸܪܝܲܝ ܝܗ݇ܘܵܘ. ܘܗܘܹܐ ܠܹܗ ܬܵܡܵܐ. 21ܘܗܘܹܐ ܠܹܗ ܡܵܪܝܵܐ ܥܲܡ ܝܵܘܣܸܦ، ܘܡܘܼܚܙܹܐ ܠܹܗ ܐܸܠܹܗ ܫܵܦܵܩܲܬ، ܘܝܘܼܗ݇ܒܸܠ ܠܹܗ ܐܸܠܹܗ ܪ̈ܲܚܡܹܐ ܒܥܲܝܢܹ̈ܐ ܕܓܘܼܪܵܐ ܕܒܹܝܬ ܐܲܣܝܼܪܹ̈ܐ. 22ܘܣܘܼܦܹܐ ܠܹܗ ܓܘܼܪܵܐ ܕܒܹܝܬ ܐܲܣܝܼܪܹ̈ܐ ܒܐܝܼܕܵܐ ܕܝܵܘܣܸܦ ܠܟܠܲܝܗܝ ܐܲܣܝܼܪܹ̈ܐ ܕܝܼܗ݇ܘܵܘ ܬܵܡܵܐ؛ ܘܟܠ ܡܸܢܕܝܼ ܕܦܵܐܹܫ ܗ݇ܘܵܐ ܥܒ݂ܝܼܕܵܐ ܬܵܡܵܐ، ܗ̇ܘ ܝܼܗ݇ܘܵܐ ܡܸܫܬܲܐܠܵܢܵܐ. 23ܓܘܼܪܵܐ ܕܒܹܝܬ ܐܲܣܝܼܪܹ̈ܐ ܐ݇ܚܹܪ݇ܢܵܐ ܠܵܐ ܬܘܼܚܡܸܢܹܗ ܠܟܠ ܡܸܢܕܝܼ ܕܝܼܗ݇ܘܵܐ ܒܐܝܼܕܵܐ ܕܝܵܘܣܸܦ، ܣܵܒܵܒ ܡܵܪܝܵܐ ܥܲܡܹܗ ܝܗ݇ܘܵܐ، ܘܟܠ ܡܸܢܕܝܼ ܕܥܵܒܹܕ ܗ݇ܘܵܐ، ܡܵܪܝܵܐ ܟܹܐ ܝܲܗ݇ܒܸܠ ܗ݇ܘܵܐ ܠܹܗ ܟܲܫܝܼܪܘܼܬܵܐ ܒܝܼܹܗ.

Currently Selected:

ܒܪܝܬܐ 39: ABTAB

Highlight

Copy

Compare