ܒܪܝܬܐ 38
38
ܒܢܘܿܢܹ̈ܐ ܕܝܼܗܘܼܕܵܐ
1ܗܘܹܐ ܠܵܗ̇ ܒܗ̇ܘ ܙܲܒ݂ܢܵܐ، ܨܠܹܐ ܠܹܗ ܝܼܗܘܼܕܵܐ ܡ̣ܢ ܠܟܸܣ ܐܲܚܘܿܢܘܵܬܹ̈ܗ، ܘܦܝܼܫ ܠܹܗ ܠܟܸܣ ܚܲܕ ܐ݇ܢܵܫܵܐ ܥܲܕܘܼܠܡܵܝܵܐ، ܫܸܡܹܗ ܚܝܼܪܵܐ. 2ܘܚܙܹܐ ܠܹܗ ܬܵܡܵܐ ܝܼܗܘܼܕܵܐ ܒܪܵܬܵܐ ܕܚܲܕ ܐ݇ܢܵܫܵܐ ܟܢܲܥܢܵܝܵܐ، ܫܸܡܹܗ ܫܘܿܥ؛ ܘܓܒ݂ܝܼܪܵܐ ܠܹܗ ܘܥܒ݂ܝܼܪܹܗ ܠܟܸܣ ܠܘܼܗ̇. 3ܘܒܛܝܼܢܵܗ̇ ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܩܪܹܐ ܠܹܗ ܫܸܡܹܗ ܥܝܼܪ. 4ܘܒܛܝܼܢܵܗ̇ ܡܸܢܕܪܸܫ ܘܝ݇ܠܝܼܕ ܠܵܗ̇ ܒܪܘܿܢܵܐ، ܘܩܪܹܐ ܠܵܗ̇ ܫܸܡܹܗ ܐܘܿܢܵܢ. 5ܘܡܸܢܕܪܸܫ ܝ݇ܠܝܼܕ ܠܵܗ̇ ܒܪܘܿܢܵܐ، ܘܩܪܹܐ ܠܵܗ̇ ܫܸܡܹܗ ܫܸܠܵܐ. ܝܼܗܘܼܕܵܐ ܓܵܘ ܟܹܙܝܼܒ݂ ܝܼܗ݇ܘܵܐ ܐܝܼܡܲܢ ܕܝ݇ܠܝܼܕ ܠܵܗ̇ ܐܸܠܹܗ.
ܥܝܼܪ ܒܸܓܒ݂ܵܪܵܐ ܬܵܡܵܪ
6ܘܫܩܝܼܠ ܠܹܗ ܝܼܗܘܼܕܵܐ ܒܲܟ݂ܬܵܐ ܠܥܝܼܪ ܒܘܼܟ݂ܪܹܗ، ܫܸܡܘܼܗ̇ ܬܵܡܵܪ. 7ܐܝܼܢܵܐ ܥܝܼܪ، ܒܘܼܟ݂ܪܵܐ ܕܝܼܗܘܼܕܵܐ ܒܝܼܫܵܐ ܝܗ݇ܘܵܐ ܒܥܲܝܢܹ̈ܐ ܕܡܵܪܝܵܐ، ܘܡܘܼܡܝܸܬ ܠܹܗ ܡܵܪܝܵܐ ܐܸܠܹܗ. 8ܘܐ݇ܡܝܼܪܹܗ ܝܼܗܘܼܕܵܐ ܠܐܘܿܢܵܢ، ”ܥܒ݂ܘܿܪ ܠܟܸܣ ܒܲܟ݂ܬܵܐ ܕܐܲܚܘܿܢܘܼܟ݂، ܘܥܒ݂ܘܿܕ ܘܵܠܝܼܬܵܐ ܕܐܸܕܡܵܐ ܐܸܠܘܼܗ̇، ܘܡܲܩܸܡ ܙܲܪܥܵܐ ܠܐܲܚܘܿܢܘܼܟ݂.“ 9ܐܝܼܢܵܐ ܐܘܿܢܵܢ ܝ݇ܕܝܼܥ ܠܹܗ ܕܙܲܪܥܵܐ ܠܹܐ ܗܵܘܹܐ ܗ݇ܘܵܐ ܕܝܼܹܗ؛ ܗܲܕܟ݂ܵܐ ܐܝܼܡܲܢ ܕܥܒ݂ܝܼܪܹܗ ܠܟܸܣ ܒܲܟ݂ܬܵܐ ܕܐܲܚܘܿܢܘܼܗܝ، ܫܘܼܦܸܟ݂ ܠܹܗ ܒܲܪܙܲܪܥܹܗ ܥܲܠ ܐܲܪܥܵܐ، ܕܠܵܐ ܝܲܗ݇ܒܸܠ ܗ݇ܘܵܐ ܙܲܪܥܵܐ ܠܐܲܚܘܿܢܘܼܗܝ. 10ܡܘܼܒܝܸܢܹܗ ܚܸܪܒܵܐ ܒܥܲܝܢܹ̈ܐ ܕܡܵܪܝܵܐ ܡܸܢܕܝܼ ܕܥܒ݂ܝܼܕ ܠܹܗ، ܘܡܘܼܡܝܸܬ ܠܹܗ ܐܘܼܦ ܠܗ̇ܘ. 11ܘܐ݇ܡܝܼܪܹܗ ܝܼܗܘܼܕܵܐ ܠܬܵܡܵܪ ܟܲܠܬܹܗ، ”ܝ݇ܬܘܿܒ݂ ܐܲܪܡܸܠܬܵܐ ܒܒܲܝܬܵܐ ܕܒܵܒܵܟ݂ܝ ܗܲܠ ܕܓܲܪܘܸܣ ܫܸܠܵܐ ܒܪܘܿܢܝܼ،“ ܣܵܒܵܒ ܒܸܙܕܵܥܵܐ ܝܗ݇ܘܵܐ ܕܐܘܼܦ ܗ̇ܘ ܡܵܐܹܬ ܗ݇ܘܵܐ ܐܲܝܟ݂ ܐܲܚܘܿܢܘܵܬܹ̈ܗ. ܒܘܼܬ ܐܵܗܵܐ، ܐ݇ܙܝܼܠ ܠܵܗ̇ ܬܵܡܵܪ ܘܝ݇ܬܝܼܒ݂ ܠܵܗ̇ ܒܒܲܝܬܵܐ ܕܒܵܒܘܼܗ̇.
12ܥܒ݂ܝܼܪܗܘܿܢ ܪܵܒܵܐ ܝܵܘܡܵܢܹ̈ܐ، ܘܡܝܼܬ ܠܵܗ̇ ܒܪܵܬܵܐ ܕܫܘܿܥ، ܒܲܟ݂ܬܵܐ ܕܝܼܗܘܼܕܵܐ. ܘܡ̣ܢ ܒܵܬ݇ܪ ܝܵܘܡܵܢܹ̈ܐ ܕܬܵܥܙܝܼ ܐ݇ܣܝܼܩ ܠܹܗ ܥܲܡ ܚܲܒ݂ܪܹܗ ܚܝܼܪܵܐ ܥܲܕܘܼܠܡܵܝܵܐ ܠܬܲܡܢܲܬ ܠܟܸܣ ܓܵܪ̈ܥܵܢܹܐ ܕܥܸܪ̈ܒܘܼܗܝ. 13ܟܲܕ ܦܝܼܫ ܠܹܗ ܐ݇ܡܝܼܪܵܐ ܠܬܵܡܵܪ، ”ܗܵܐ ܚܸܡܝܵܢܵܟ݂ܝ ܒܹܐܣܵܩܵܐ ܝܠܹܗ ܠܬܲܡܢܲܬ ܠܸܓܪܵܥܵܐ ܥܸܪ̈ܒܘܼܗܝ.“ 14ܫܘܼܠܸܚ ܠܵܗ̇ ܡܥܲܠܘܼܗ̇ ܓ̰ܘܼܠܹ̈ܐ ܕܐܲܪܡܸܠܘܼܬܘܼܗ̇، ܡܘܼܟܸܣ ܠܵܗ̇ ܪܹܫܘܼܗ̇ ܒܫܲܪܦܵܐ، ܘܟܘܼܪܡܸܟ݂ ܠܵܗ̇ ܓܵܢܘܼܗ̇، ܘܝ݇ܬܝܼܒ݂ ܠܵܗ̇ ܒܥܒ݂ܵܪܬܵܐ ܠܥܲܝܢܲܝܸܡ، ܕܝܼܠܵܗ̇ ܥܲܠ ܐܘܼܪܚܵܐ ܕܬܲܡܢܲܬ؛ ܣܵܒܵܒ ܚܙܹܐ ܠܵܗ̇ ܕܫܹܠܵܐ ܓܘܼܪܘܸܣܵܐ ܝܗ݇ܘܵܐ، ܘܗ̇ܝ ܠܹܐ ܝܗ݇ܘܵܐ ܦܝܼܫܬܵܐ ܝܘܼܗ݇ܒܸܠܬܵܐ ܐܸܠܹܗ ܠܒܲܟ݂ܬܵܐ. 15ܚܸܙܝܵܐ ܠܹܗ ܝܼܗܘܼܕܵܐ ܘܚܫܝܼܒ݂ ܠܹܗ ܙܵܢܝܼܬܵܐ ܝܗ݇ܘܵܐ، ܣܵܒܵܒ ܟܘܿܣܝܼܬܘܼܗ̇ ܝܗ݇ܘܵܐ ܦܵܬܘܼܗ̇. 16ܩܘܼܪܒܸܢܹܗ ܠܟܸܣ ܠܘܼܗ̇ ܒܡܲܪܙܵܐ ܕܐܘܼܪܚܵܐ، ܘܐ݇ܡܝܼܪܹܗ، ”ܬܵܐ، ܥܵܒ݂ܪܹܢ ܠܟܸܣ ܠܵܟ݂ܝ،“ ܣܵܒܵܒ ܠܵܐ ܝ݇ܕܝܼܥ ܠܹܗ ܕܟܲܠܬܹܗ ܝܗ݇ܘܵܐ. ܒܘܼܩܸܪܵܗ̇ ܗ̇ܝ، ”ܡܘܿܕܝܼ ܒܸܬ ܝܵܗ݇ܒܹܬ ܠܝܼ ܕܥܵܒ݂ܪܹܬ ܠܟܸܣ ܠܝܼ؟“ 17ܐ݇ܡܝܼܪܹܗ، ”ܒܸܬ ܫܲܕܪܸܢ ܐܸܠܵܟ݂ܝ ܚܲܕ ܓܸܕܝܵܐ ܡ̣ܢ ܦܸܣܩܵܐ.“ ܐ݇ܡܝܼܪܵܗ̇، ”ܗܲܒ݂݇ܠ ܠܝܼ ܪܲܗܒ݂ܘܿܢܵܐ ܗܲܠ ܕܫܲܕܪܸܬ ܠܹܗ ܐܸܠܝܼ.“ 18ܒܘܼܩܸܪܹܗ، ”ܡܘܿܕܝܼ ܪܲܗܒ݂ܘܿܢܵܐ ܝܵܗ݇ܒܹܢܵܟ݂ܝ؟“ ܐ݇ܡܝܼܪܵܗ̇، ”ܚܵܬܡܘܼܟ݂، ܘܐܲܣܘܼܪܹܗ، ܘܚܘܼܛܪܘܼܟ݂ ܕܝܼܠܹܗ ܒܐܝܼܕܘܼܟ݂.“ ܝܘܼܗ݇ܒܸܠ ܠܹܗ ܐܸܠܘܼܗ̇، ܘܥܒ݂ܝܼܪܹܗ ܠܟܸܣ ܠܘܼܗ̇، ܘܒܛܝܼܢܵܗ̇ ܡܸܢܹܗ. 19ܩܝܼܡ ܠܵܗ̇ ܘܐ݇ܙܝܼܠ ܠܵܗ̇، ܘܫܩܝܼܠ ܠܵܗ̇ ܡܥܲܠܘܼܗ̇ ܫܲܪܦܘܼܗ̇، ܘܠܒ݂ܝܼܫ ܠܵܗ̇ ܓ̰ܘܼܠܹ̈ܐ ܕܐܲܪܡܸܠܘܼܬܘܼܗ̇. 20ܐܝܼܡܲܢ ܕܫܘܼܕܸܪܹܗ ܝܼܗܘܼܕܵܐ ܓܸܕܝܵܐ ܒܐܝܼܕܵܐ ܕܚܲܒ݂ܪܹܗ ܥܲܕܘܼܠܡܵܝܵܐ، ܠܸܫܩܵܠܵܐ ܠܪܲܗܒ݂ܘܿܢܵܐ ܡ̣ܢ ܐܝܼܕܵܐ ܕܗ̇ܝ ܒܲܟ݂ܬܵܐ، ܠܵܐ ܡܘܼܫ݇ܟ̰ܚܵܐ ܠܹܗ. 21ܒܘܼܩܸܪܹܗ ܡ̣ܢ ܐ݇ܢܵܫܹ̈ܐ ܕܗ̇ܝ ܕܘܼܟܵܐ، ”ܐܲܝܟܵܐ ܝܠܵܗ̇ ܙܵܢܝܼܬܵܐ ܕܝܼܗ݇ܘܵܐ ܒܥܲܝܢܲܝܸܡ، ܒܡܲܪܙܵܐ ܕܐܘܼܪܚܵܐ؟“ ܓ̰ܘܼܘܸܒ ܠܗܘܿܢ، ”ܠܲܝܬ ܗܘܝܼܬܵܐ ܙܵܢܝܼܬܵܐ ܠܐܲܟ݂ܵܐ.“ 22ܘܕܝܼܪܹܗ ܠܟܸܣ ܝܼܗܘܼܕܵܐ ܘܐ݇ܡܝܼܪܹܗ، ”ܠܵܐ ܡܘܼܫ݇ܟ̰ܚܵܐ ܠܝܼ؛ ܘܐܘܼܦ ܐ݇ܢܵܫܹ̈ܐ ܕܗ̇ܝ ܕܘܼܟܵܐ ܐ݇ܡܝܼܪܗܘܿܢ، ’ܠܲܝܬ ܗܘܝܼܬܵܐ ܙܵܢܝܼܬܵܐ ܠܐܲܟ݂ܵܐ.‘“ 23ܐ݇ܡܝܼܪܹܗ ܝܼܗܘܼܕܵܐ، ”ܫܒ݂ܘܿܩ ܚܲܡܝܵܐ ܠܗܘܿܢ ܡܸܢܕܝܼܵܢܹ̈ܐ ܩܵܐ ܓܵܢܘܼܗ̇. ܠܵܐ ܗܵܘܝܵܐ ܕܗܵܘܲܚ ܥܸܠܬܵܐ ܕܓܸܚܟܵܐ. ܚܙܹܐ ܠܘܼܟ݂، ܫܘܼܕܸܪܝܼ ܠܐܵܗܵܐ ܓܸܕܝܵܐ، ܐܝܼܢܵܐ ܐܲܢ݇ܬ ܠܵܐ ܡܘܼܫ݇ܟ̰ܚܵܐ ܠܘܼܟ݂.“
24ܗܘܹܐ ܠܵܗ̇ ܡ̣ܢ ܒܵܬ݇ܪ ܬܠܵܬܵܐ ܝܲܪ̈ܚܹܐ، ܦܝܼܫ ܠܹܗ ܡܘܼܕܸܥܵܐ ܝܼܗܘܼܕܵܐ ܒܹܐܡܵܪܵܐ، ”ܙܢܹܐ ܠܵܗ̇ ܬܵܡܵܪ ܟܲܠܬܘܼܟ݂؛ ܘܐܘܼܦ ܒܛܝܼܢܬܵܐ ܝܠܵܗ̇ ܡ̣ܢ ܙܵܢܝܘܼܬܵܐ.“ ܐ݇ܡܝܼܪܹܗ ܝܼܗܘܼܕܵܐ، ”ܦܲܠܛܘܼܢ ܠܵܗ̇، ܘܦܵܝܫܵܐ ܡܘܼܩܸܕܬܵܐ.“ 25ܟܲܕ ܒܸܦܝܵܫܵܐ ܝܗ݇ܘܵܐ ܦܘܼܠܸܛܬܵܐ، ܫܘܼܕܸܪܵܗ̇ ܚܲܒܪܵܐ ܠܚܸܡܝܵܢܘܼܗ̇، ܒܹܐܡܵܪܵܐ، ”ܒܛܝܼܢܬܵܐ ܝܘܵܢ ܡ̣ܢ ܐ݇ܢܵܫܵܐ ܕܐܲܢܹܐ ܡܸܢܕܝܼܵܢܹ̈ܐ ܕܝܼܹܗ ܝܢܵܐ.“ ܗ̇ܝܓܵܗ ܐ݇ܡܝܼܪܵܗ̇، ”ܚܙܝܼ، ܦܲܪܦܘܼܠܹܐ ܝܘܵܢ، ܕܡܵܢܝܼ ܝܢܵܐ ܐܲܢܹܐ، ܚܵܬܡܵܐ، ܘܐܲܣܘܼܪܘܼܗ̇، ܘܚܘܼܛܪܵܐ؟“ 26ܘܝ݇ܕܝܼܥ ܠܹܗ ܝܼܗܘܼܕܵܐ ܘܐ݇ܡܝܼܪܹܗ، ”ܒܘܼܫ ܙܲܕܝܼܩܬܵܐ ܝܠܵܗ̇ ܡܸܢܝܼ، ܒܘܼܬ ܐܵܗܵܐ، ܠܵܐ ܝܘܼܗ݇ܒ݂ܵܐ ܠܝܼ ܠܫܹܠܵܐ ܒܪܘܿܢܝܼ.“ ܘܠܵܐ ܥܒ݂ܝܼܪܹܗ ܗ̇ܘ ܠܟܸܣ ܠܘܼܗ̇ ܐ݇ܚܹܪ݇ܢܵܐ.
ܬܵܡܵܪ ܗܲܨܘܼܠܹܐ ܦܲܪܨ ܘܙܲܪܚ
27ܐܝܼܡܲܢ ܕܗܘܹܐ ܠܹܗ ܙܲܒ݂ܢܵܐ ܕܗܵܨܲܠܬܘܼܗ̇، ܐܝܼܬ ܗ݇ܘܵܘ ܓ̰ܲܡܹ̈ܐ ܒܟܹܪ݇ܣܘܼܗ̇. 28ܐܝܼܡܲܢ ܕܝܼܗ݇ܘܵܐ ܗܲܨܘܼܠܹܐ، ܦܠܝܼܛ ܠܵܗ̇ ܐܝܼܕܵܐ ܕܚܲܕ ܡܸܢܲܝܗܝ، ܘܫܩܝܼܠ ܠܵܗ̇ ܚܲܝܬܵܐ ܓܕܵܠܵܐ ܣܡܘܿܩܢܵܝܵܐ ܘܐ݇ܣܝܼܪܵܗ̇ ܥܲܠ ܐܝܼܕܹܗ، ܘܐ݇ܡܝܼܪܵܗ̇، ”ܐܵܗܵܐ ܦܠܝܼܛ ܠܹܗ ܩܵܕ݇ܡܵܝܵܐ.“ 29ܐܝܼܢܵܐ ܐܝܼܡܲܢ ܕܡܘܼܕܸܪܵܐ ܠܹܗ ܐܝܼܕܹܗ، ܦܠܝܼܛ ܠܹܗ ܐܲܚܘܿܢܘܼܗܝ، ܘܐ݇ܡܝܼܪܵܗ̇، ”ܕܵܐܟ݂ܝܼ ܬܪܝܼܥ ܠܘܼܟ݂! ܥܲܠܘܼܟ݂ ܬܪܵܥܬܵܐ.“ ܘܦܝܼܫ ܠܹܗ ܩܸܪܝܵܐ ܫܸܡܹܗ ܦܲܪܨ.#38:29 ܥܸܒ݂ܪܵܐܝܼܬ ܒܡܲܥܢܵܝܵܐ: ܬܪܵܥܬܵܐ 30ܡ̣ܢ ܒܵܬ݇ܪ ܡܸܢܹܗ ܦܠܝܼܛ ܠܹܗ ܒܲܪ ܐܲܚܘܿܢܘܼܗܝ، ܘܥܲܠ ܐܝܼܕܹܗ ܓܕܵܠܵܐ ܣܡܘܿܩܢܵܝܵܐ؛ ܘܦܝܼܫ ܠܹܗ ܩܸܪܝܵܐ ܫܸܡܹܗ ܙܹܪܵܚ#38:30 ܥܸܒ݂ܪܵܐܝܼܬ ܒܡܲܥܢܵܝܵܐ: ܒܲܗܪܵܐ ܣܡܘܿܩܢܵܝܵܐ ܕܕܸܢܚܵܐ ܝܲܢ ܙܪܵܩܵܐ ܕܫܸܡܫܵܐ .
Currently Selected:
ܒܪܝܬܐ 38: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
