ܒܪܝܬܐ 37
37
ܝܵܘܣܸܦ ܦܝܵܫܵܐ ܣܸܢܝܵܐ ܒܐܲܚܘܿܢܘܵܬܹ̈ܗ
1ܝ݇ܬܝܼܒ݂ ܠܹܗ ܝܲܥܩܘܿܒ݂ ܒܐܲܪܥܵܐ ܕܡܵܫܵܚܲܛܘܼܝܵܬܹ̈ܐ ܕܒܵܒܘܼܗܝ، ܒܐܲܪܥܵܐ ܕܟܢܲܥܢ. 2ܐܲܢܹܐ ܝܢܵܐ ܬܵܘܠܕܵܬܹ̈ܐ ܕܝܲܥܩܘܿܒ݂: ܝܵܘܣܸܦ ܚܲܕ ܥܠܲܝܡܵܐ ܕܫܒܲܥܣܲܪ ܫܸܢܹ̈ܐ ܝܗ݇ܘܵܐ. ܡܲܪܥܘܼܝܹܐ ܝܗ݇ܘܵܐ ܥܸܪ̈ܒܹܐ ܥܲܡ ܐܲܚܘܿܢܘܵܬܹ̈ܗ، ܒܢܘܿܢܹ̈ܐ ܕܒܸܠܗܵܐ ܘܒܢܘܿܢܹ̈ܐ ܕܙܸܠܦܵܐ، ܒܲܟ݂ܬܵܬܹ̈ܐ ܕܒܵܒܘܼܗܝ. ܘܡܘܼܐܬܹܐ ܠܹܗ ܝܵܘܣܸܦ ܚܲܒܪܵܐ ܚܸܪܒܵܐ ܒܘܼܬ ܕܝܼܲܝܗܝ ܩܵܐ ܒܵܒܲܝܗܝ. 3ܝܼܣܪܵܝܹܠ ܡܘܼܚܸܒ ܠܹܗ ܠܝܵܘܣܸܦ ܒܘܼܫ ܙܵܘܕܵܐ ܡ̣ܢ ܟܠܲܝܗܝ ܒܢܘܿܢܘܼ̈ܗܝ ܐ݇ܚܹܪ̈݇ܢܹܐ، ܣܵܒܵܒ ܒܪܘܿܢܵܐ ܕܣܲܝܒܘܼܬܵܐ ܝܗ݇ܘܵܐ ܐܸܠܹܗ؛ ܘܥܒ݂ܝܼܕ ܠܹܗ ܐܸܠܹܗ ܨܘܼܕܪܵܐ ܡܵܪܹܐ ܪ̈ܲܢܓܹܐ. 4ܘܚܙܹܐ ܠܗܘܿܢ ܐܲܚܘܿܢܘܵܬܹ̈ܗ ܕܡܘܼܚܸܒ ܠܹܗ ܐܸܠܹܗ ܒܵܒܲܝܗܝ ܒܘܼܫ ܙܵܘܕܵܐ ܡ̣ܢ ܟܠܲܝܗܝ، ܣܢܹܐ ܠܗܘܿܢ ܐܸܠܹܗ، ܘܠܵܐ ܡܨܹܐ ܠܗܘܿܢ ܠܗܲܡܙܘܼܡܹܐ ܥܲܡܹܗ ܒܫܠܵܡܵܐ.
ܚܸܠܡܵܐ ܕܝܵܘܣܸܦ
5ܘܚܠܝܼܡ ܠܹܗ ܝܵܘܣܸܦ ܚܸܠܡܵܐ، ܘܟܲܕ ܡܘܼܕܸܥ ܠܹܗ ܠܐܲܚܘܿܢܘܵܬܹ̈ܗ، ܒܘܼܫ ܙܵܘܕܵܐ ܣܢܹܐ ܠܗܘܿܢ ܐܸܠܹܗ. 6ܐ݇ܡܝܼܪܹܗ ܐܸܠܲܝܗܝ، ”ܫܡܸܥܡܘܼܢ ܠܐܵܗܵܐ ܚܸܠܡܵܐ ܕܚܠܝܼܡ ܠܝܼ؛ 7ܟܲܕ ܐܲܚܢܲܢ ܒܹܐܣܵܪܵܐ ܝܘܲܚ ܗ݇ܘܵܘ ܕܲܪ̈ܙܹܐ ܓܵܘ ܚܲܩܠܵܐ، ܗܵܐ ܩܝܼܡ ܠܵܗ̇ ܕܲܪܙܝܼ ܘܟܠܹܐ ܠܵܗ̇ ܬܪܘܼܨܬܵܐ؛ ܘܕܲܪ̈ܙܵܘܟ݂ܘܿܢ ܟܪܝܼܟ݂ ܠܗܘܿܢ ܠܚܵܕܸܪ̈ܘܵܢܹܐ ܕܕܲܪܙܝܼ ܘܟܝܼܦ ܠܗܘܿܢ ܩܵܕ݇ܡܘܼܗ̇.“ 8ܐ݇ܡܝܼܪܗܘܿܢ ܐܸܠܹܗ ܐܲܚܘܿܢܘܵܬܹ̈ܗ، ”ܗܵܐ، ܡܲܠܟܘܼܬܵܐ ܒܸܬ ܥܵܒ݂ܕܹܬ ܥܲܠܲܢ؟ ܝܲܢ ܫܘܼܠܛܵܢܵܐ ܒܸܬ ܥܵܒ݂ܕܹܬ ܥܲܠܲܢ؟“ ܘܣܢܹܐ ܠܗܘܿܢ ܒܘܼܫ ܙܵܘܕܵܐ ܐܸܠܹܗ ܒܘܼܬ ܚܸܠܡܘܼ̈ܗܝ ܘܒܘܼܬ ܗܹܡܸܙܡܵܢܘܼ̈ܗܝ. 9ܘܚܠܝܼܡ ܠܹܗ ܡܸܢܕܪܸܫ ܚܸܠܡܵܐ ܐ݇ܚܹܪ݇ܢܵܐ، ܘܗܘܼܩܹܐ ܠܹܗ ܠܐܲܚܘܿܢܘܵܬܹ̈ܗ، ܘܐ݇ܡܝܼܪܹܗ، ”ܗܵܐ، ܚܠܝܼܡ ܠܝܼ ܚܸܠܡܵܐ ܐ݇ܚܹܪ݇ܢܵܐ: ܫܸܡܫܵܐ ܘܣܲܗܪܵܐ ܘܚܲܕܸܥܣܲܪ ܟܵܘܟ݂ܒܹ̈ܐ ܡܲܟܘܼܦܹܐ ܓܵܢܲܝܗܝ ܐܸܠܝܼ.“ 10ܟܲܕ ܗܘܼܩܹܐ ܠܹܗ ܠܒܵܒܘܼܗܝ ܘܠܐܲܚܘܿܢܘܵܬܹ̈ܗ، ܡܘܼܢܟܸܣ ܠܹܗ ܐܸܠܹܗ ܒܵܒܘܼܗܝ ܘܐ݇ܡܝܼܪܹܗ، ”ܡܘܿܕܝܼ ܝܠܹܗ ܐܵܗܵܐ ܚܸܠܡܵܐ ܕܚܠܝܼܡ ܠܘܼܟ݂؟ ܒܸܬ ܐܵܬܲܚ ܐܵܢܵܐ ܘܝܸܡܘܼܟ݂ ܘܐܲܚܘܿܢܘܵܬܘܼ̈ܟ݂ ܬܪܘܼܨܵܐܝܼܬ ܘܡܲܟܸܦܲܚ ܓܵܢܲܢ ܠܐܲܪܥܵܐ ܐܸܠܘܼܟ݂؟“ 11ܘܒܘܼܚܸܠ ܠܗܘܿܢ ܒܝܼܹܗ ܐܲܚܘܿܢܘܵܬܹ̈ܗ، ܐܝܼܢܵܐ ܒܵܒܘܼܗܝ ܢܛܝܼܪܹܗ ܒܠܸܒܹܗ ܐܵܗܵܐ ܚܲܒܪܵܐ.
ܝܵܘܣܸܦ ܦܝܵܫܵܐ ܫܘܼܕܪܵܐ ܠܟܸܣ ܐܲܚܘܿܢܘܵܬܹ̈ܗ
12ܐ݇ܙܝܼܠ ܠܗܘܿܢ ܐܲܚܘܿܢܘܵܬܹ̈ܐ ܕܝܵܘܣܸܦ ܠܡܲܪܥܘܼܝܹܐ ܥܸܪ̈ܒܹܐ ܕܒܵܒܲܝܗܝ ܒܫܟܹܝܡ. 13ܘܐ݇ܡܝܼܪܹܗ ܝܼܣܪܵܝܹܠ ܠܝܵܘܣܸܦ، ”ܗܵܐ، ܠܹܐ ܝܢܵܐ ܐܲܚܘܿܢܘܵܬܘܼ̈ܟ݂ ܡܲܪܥܘܼܝܹܐ ܥܸܪ̈ܒܹܐ ܒܫܟܹܝܡ؟ ܬܵܐ ܕܫܲܕܪܸܢܘܼܟ݂ ܠܟܸܣ ܠܲܝܗܝ.“ ܐ݇ܡܝܼܪܹܗ ܐܸܠܹܗ، ”ܗܵܐ، ܐܵܢܵܐ.“ 14ܐ݇ܡܝܼܪܹܗ ܐܸܠܹܗ، ”ܙܹܠ݇ ܘܚܙܝܼ ܕܵܐܟ݂ܝܼ ܝܢܵܐ ܐܲܚܘܿܢܘܵܬܘܼ̈ܟ݂ ܘܕܵܐܟ݂ܝܼ ܝܢܵܐ ܥܸܪ̈ܒܹܐ، ܘܡܲܕܸܪ ܐܸܠܝܼ ܚܲܒܪܵܐ.“ ܘܫܘܼܕܸܪܹܗ ܐܸܠܹܗ ܡ̣ܢ ܪܵܘܘܿܠܵܐ ܕܚܸܒ݂ܪܘܿܢ، ܘܗ̇ܘ ܐ݇ܬܹܐ ܠܹܗ ܠܫܟܹܝܡ. 15ܚܲܕ ܐ݇ܢܵܫܵܐ ܚܙܹܐ ܠܹܗ ܐܸܠܹܗ ܛܘܼܠܩܘܼܗ̇ ܐܘܼܪܚܹܗ ܓܵܘ ܕܸܫܬܵܐ؛ ܘܒܘܼܩܸܪܹܗ ܡܸܢܹܗ ܗ̇ܘ ܐ݇ܢܵܫܵܐ ܒܹܐܡܵܪܵܐ، ”ܒܵܬ݇ܪ ܡܘܿܕܝܼ ܝܘܸܬ ܛܥܵܝܵܐ؟“ 16ܓ̰ܘܼܘܸܒ ܠܹܗ، ”ܛܥܵܝܵܐ ܝܘܸܢ ܒܵܬ݇ܪ ܐܲܚܘܿܢܘܵܬܝܼ̈. ܡܲܕܸܥ ܠܝܼ ܦܲܪܦܘܼܠܹܐ ܝܘܸܢ، ܐܲܝܟܵܐ ܝܢܵܐ ܡܲܪܥܘܼܝܹܐ؟“ 17ܐ݇ܡܝܼܪܹܗ ܐܸܠܹܗ ܗ̇ܘ ܐ݇ܢܵܫܵܐ، ”ܫܘܼܢܹܐ ܠܗܘܿܢ ܡܐܲܟ݂ܵܐ، ܣܵܒܵܒ ܫܡܝܼܥ ܠܝܼ ܕܒܹܐܡܵܪܵܐ ܝܗ݇ܘܵܘ، ’ܐܵܙܲܠ݇ܚ ܠܕܘܿܬܵܢ.‘“ ܘܐ݇ܙܝܼܠ ܠܹܗ ܝܵܘܣܸܦ ܛܥܵܝܵܐ ܒܵܬ݇ܪ ܐܲܚܘܿܢܘܵܬܹ̈ܗ ܘܡܘܼܫ݇ܟ̰ܚܲܝ ܠܹܗ ܓܵܘ ܕܘܿܬܵܢ. 18ܚܙܹܐ ܠܗܘܿܢ ܐܸܠܹܗ ܡ̣ܢ ܪܸܚܩܵܐ، ܘܡ̣ܢ ܩܵܕ݇ܡ ܕܩܲܪܒܸܢ ܗ݇ܘܵܐ ܠܟܸܣ ܠܲܝܗܝ، ܥܒ݂ܝܼܕ ܠܗܘܿܢ ܦܸܠܡܵܐ ܕܩܵܛܠܝܼ ܠܹܗ. 19ܐ݇ܡܝܼܪܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ، ”ܗܵܐ ܐ݇ܬܹܐ ܠܹܗ ܡܵܪܵܐ ܕܚܸܠܡܹ̈ܐ. 20ܬܹܝܡܘܼܢ ܐܵܕܝܼܵܐ ܩܵܛܠܲܚ ܠܹܗ ܘܪܲܦܲܚ ܠܹܗ ܓܵܘ ܚܲܕ ܒܹܐܪܵܐ، ܘܐܵܡܪܲܚ ܗܲܝܘܵܢ ܟܹܘܝܼ ܩܲܡ ܐܵܟ݂ܠܵܐ ܠܹܗ؛ ܘܚܵܙܲܚ ܡܘܿܕܝܼ ܒܸܬ ܗܵܘܝܼ ܚܸܠܡܘܼ̈ܗܝ.“ 21ܫܡܝܼܥ ܠܹܗ ܪܐܘܼܒܸܢ ܘܦܘܼܨܹܐ ܠܹܗ ܐܸܠܹܗ ܡ̣ܢ ܐܝܼܕܵܬܲܝ̈ܗܝ، ܒܹܐܡܵܪܵܐ، ”ܠܵܐ ܩܵܛܠܲܚ ܠܹܗ.“ 22ܘܐ݇ܡܝܼܪܹܗ ܐܸܠܲܝܗܝ ܪܐܘܼܒܸܢ، ”ܠܵܐ ܫܲܦܟ݂ܝܼܬܘܿܢ ܕܸܡܵܐ؛ ܪܲܦܸܝܡܘܼܢ ܠܹܗ ܓܵܘ ܕܐܵܗܵܐ ܒܹܐܪܵܐ ܕܝܼܠܵܗ̇ ܓܵܘ ܒܲܪܝܼܵܐ، ܘܐܝܼܕܵܐ ܠܵܐ ܦܲܫܛܝܼܬܘܿܢ ܐܸܠܹܗ،“ ܣܵܒܵܒ ܒܸܒܥܵܝܵܐ ܝܗ݇ܘܵܐ ܕܦܲܨܹܐ ܗ݇ܘܵܐ ܠܹܗ ܡ̣ܢ ܐܝܼܕܵܬܲܝ̈ܗܝ، ܘܕܡܲܕܸܪ ܗ݇ܘܵܐ ܠܹܗ ܠܒܵܒܘܼܗܝ. 23ܘܐܝܼܡܲܢ ܐ݇ܬܹܐ ܠܹܗ ܝܵܘܣܸܦ ܠܟܸܣ ܐܲܚܘܿܢܘܵܬܹ̈ܗ، ܫܘܼܠܸܚ ܠܗܘܿܢ ܡܸܢܹܗ ܨܘܼܕܪܵܐ ܡܵܪܹܐ ܪ̈ܲܢܓܹܐ ܕܝܼܗ݇ܘܵܐ ܥܲܠܘܼܗܝ، 24ܘܫܩܝܼܠ ܠܗܘܿܢ ܘܪܘܼܦܹܐ ܠܗܘܿܢ ܐܸܠܹܗ ܓܵܘ ܒܹܐܪܵܐ. ܒܹܐܪܵܐ ܣܦܝܼܩܵܐ ܝܗ݇ܘܵܐ، ܠܲܝܬ ܗ݇ܘܵܐ ܓܵܘܹܗ ܡ̈ܝܼܵܐ.
ܝܵܘܣܸܦ ܦܝܵܫܵܐ ܙܘܼܒܢܵܐ ܩܵܐ ܐܝܼܫܡܲܥܠܵܝܹ̈ܐ
25ܘܝ݇ܬܝܼܒ݂ ܠܗܘܿܢ ܠܹܐܟ݂ܵܠܵܐ ܠܲܚܡܵܐ، ܘܓܘܼܫܸܩ ܠܗܘܿܢ ܘܚܙܹܐ ܠܗܘܿܢ، ܘܗܵܐ ܟܲܪܘܵܢ ܕܐܝܼܫܡܲܥܠܵܝܹ̈ܐ ܒܹܐܬܵܝܵܐ ܡ̣ܢ ܓܸܠܥܵܕ، ܓܘܼܡܠܲܝ̈ܗܝ ܛܥܝܼܢܹܐ ܗܹܪ̈ܘܿܡܹܐ، ܫܥܘܿܬܵܐ، ܘܡܘܼܪܵܐ، ܒܸܨܠܵܝܵܐ ܒܐܘܼܪܚܲܝܗܝ ܠܙܲܒܘܼܢܲܝ ܓܵܘ ܡܸܨܪܹܝܢ. 26ܘܐ݇ܡܝܼܪܹܗ ܝܼܗܘܼܕܵܐ ܠܐܲܚܘܿܢܘܵܬܹ̈ܗ، ”ܡܘܿܕܝܼ ܝܘܼܬܪܵܢܵܐ ܐܝܼܬ ܕܩܵܛܠܲܚ ܠܐܲܚܘܿܢܲܢ ܘܟܲܣܲܚ ܠܕܸܡܹܗ؟ 27ܬܹܝܡܘܼܢ ܙܲܒܢܲܚ ܠܹܗ ܠܐܲܢܹܐ ܐܝܼܫܡܲܥܠܵܝܹ̈ܐ، ܘܐܝܼܕܲܢ ܠܵܐ ܪܵܝܡܵܐ ܥܲܠܘܼܗܝ، ܣܵܒܵܒ ܐܲܚܘܿܢܲܢ ܘܒܸܣܪܲܢ ܝܼܠܹܗ.“ ܘܡܘܼܨܝܸܬ ܠܗܘܿܢ ܐܲܚܘܿܢܘܵܬܹ̈ܗ ܐܸܠܹܗ. 28ܐܝܼܡܲܢ ܕܬܲܓܵܪܹ̈ܐ ܡܸܕܝܵܢܵܝܹ̈ܐ ܥܒ݂ܝܼܪܗܘܿܢ، ܓܪܝܼܫ ܠܗܘܿܢ ܐܲܚܘܿܢܘܵܬܹ̈ܗ ܠܝܵܘܣܸܦ ܘܡܘܼܐܣܸܩ ܠܗܘܿܢ ܐܸܠܹܗ ܡ̣ܢ ܒܹܐܪܵܐ؛ ܘܙܘܼܒܸܢܗܘܿܢ ܐܸܠܹܗ ܠܐܝܼܫܡܲܥܠܵܝܹ̈ܐ ܒܥܸܣܪܝܼ ܙܘܼܙܹ̈ܐ ܕܣܹܐܡܵܐ؛ ܘܐܵܢܝܼ ܡܘܼܐܬܹܐ ܠܗܘܿܢ ܠܝܵܘܣܸܦ ܠܡܸܨܪܹܝܢ. 29ܕܝܼܪܹܗ ܪܐܘܼܒܸܢ ܠܒܹܐܪܵܐ، ܘܗܵܐ، ܚܙܹܐ ܠܹܗ ܕܝܵܘܣܸܦ ܠܹܐ ܝܗ݇ܘܵܐ ܬܵܡܵܐ، ܘܟ̰ܘܼܢܟ̰ܸܪܹܗ ܠܓ̰ܘܼܠܘܼ̈ܗܝ. 30ܕܝܼܪܹܗ ܠܟܸܣ ܐܲܚܘܿܢܘܵܬܹ̈ܗ ܘܐ݇ܡܝܼܪܹܗ، ”ܝܵܠܵܕ݇ܐ ܠܲܝܬ! ܠܐܲܝܟܵܐ ܐܵܙܹܠ݇ܢ ܐܵܢܵܐ؟“ 31ܗ̇ܝܓܵܗ ܫܩܝܼܠ ܠܗܘܿܢ ܠܨܘܼܕܪܵܐ ܕܝܵܘܣܸܦ، ܘܩܛܝܼܠ ܠܗܘܿܢ ܓܸܕܝܵܐ ܕܥܸܙܵܐ، ܘܛܡܝܼܫ ܠܗܘܿܢ ܠܨܘܼܕܪܵܐ ܓܵܘ ܕܸܡܵܐ. 32ܫܘܼܕܸܪܗܘܿܢ ܠܨܘܼܕܪܵܐ ܡܵܪܹܐ ܪ̈ܲܢܓܹܐ ܘܡܘܼܐܬܝܵܐ ܠܗܘܿܢ ܠܟܸܣ ܒܵܒܲܝܗܝ ܘܐ݇ܡܝܼܪܗܘܿܢ، ”ܐܵܗܵܐ ܡܘܼܫ݇ܟ̰ܚܵܐ ܠܲܢ؛ ܐܵܕܝܼܵܐ ܚܙܝܼ ܐܸܢ ܨܘܼܕܪܵܐ ܕܒܪܘܿܢܘܼܟ݂ ܝܼܠܵܗ̇ ܝܲܢ ܠܵܐ.“ 33ܘܝ݇ܕܝܼܥܵܐ ܠܹܗ ܗ̇ܘ ܘܐ݇ܡܝܼܪܹܗ، ”ܨܘܼܕܪܵܐ ܕܒܪܘܿܢܝܼ ܝܠܵܗ̇! ܗܲܝܘܵܢ ܟܹܘܝܼ ܐ݇ܟ݂ܝܼܠܬܹܗ ܠܵܗ̇. ܦܪܵܛܵܐ ܦܝܼܫܵܐ ܝܠܹܗ ܦܪܝܼܛܵܐ ܝܵܘܣܸܦ!“ 34ܘܟ̰ܘܼܢܟ̰ܸܪܹܗ ܝܲܥܩܘܿܒ݂ ܓ̰ܘܼܠܘܼ̈ܗܝ، ܘܠܒ݂ܝܼܫ ܠܹܗ ܣܲܩܵܐ، ܘܥܒ݂ܝܼܕ ܠܹܗ ܬܵܥܙܝܼ ܥܲܠ ܒܪܘܿܢܹܗ ܒܝܵܘܡܵܢܹ̈ܐ ܪܵܒܵܐ. 35ܐ݇ܬܹܐ ܠܗܘܿܢ ܟܠܲܝܗܝ ܒܢܘܿܢܘܼ̈ܗܝ ܘܟܠܲܝܗܝ ܒܢܵܬܘܼ̈ܗܝ ܠܝܼܵܗ݇ܒܹܗ ܠܸܒܵܐ، ܐܝܼܢܵܐ ܡܘܼܚܦܸܠ ܠܹܗ ܠܸܫܩܵܠܵܐ ܠܸܒܵܐ، ܘܐ݇ܡܝܼܪܹܗ، ”ܒܸܬ ܨܵܠܹܝܢ ܠܫܝܘܿܠ ܠܟܸܣ ܒܪܘܿܢܝܼ ܟܲܕ ܒܸܥܒ݂ܵܕܵܐ ܬܵܥܙܝܼ.“ ܘܗܲܕܟ݂ܵܐ ܒܟܹܐ ܠܹܗ ܥܲܠܘܼܗܝ ܒܵܒܘܼܗܝ.
36ܘܡܸܕܝܵܢܵܝܹ̈ܐ ܙܘܼܒܸܢܗܘܿܢ ܠܝܵܘܣܸܦ ܒܡܸܨܪܹܝܢ ܠܦܘܿܛܝܼܦܵܪ، ܪܵܪܒ݂ܵܐ ܕܦܸܪܥܘܿܢ، ܪܹܫ ܢܵܛܘܿܪܹ̈ܐ.
Currently Selected:
ܒܪܝܬܐ 37: ABTAB
Highlight
Share
Compare
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
