ܠܘܩܐ 18

ܡܲܬܠܵܐ ܕܕܲܝܵܢܵܐ ܘܕܐܲܪܡܸܠܬܵܐ

1ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ ܡܲܬܠܵܐ، ܕܘܵܠܹܐ ܝܠܵܗ̇ ܐ݇ܢܵܫܹ̈ܐ ܨܲܠܝܼ ܨܠܘܿܬܵܐ ܒܟܠ ܥܕܵܢܵܐ ܘܠܵܐ ܣܵܩܕܝܼ. 2”ܚܲܕ ܕܲܝܵܢܵܐ ܐܝܼܬ ܗ݇ܘܵܐ ܓܵܘ ܚܕܵܐ ܡܕܝܼܢ݇ܬܵܐ، ܕܡ̣ܢ ܐܲܠܵܗܵܐ ܠܹܐ ܙܵܕܹܥ ܗ݇ܘܵܐ ܘܡ̣ܢ ܒܢܲܝ̈ܢܵܫܵܐ ܠܹܐ ܢܵܟܹܦ ܗ݇ܘܵܐ. 3”ܚܕܵܐ ܐܲܪܡܸܠܬܵܐ ܐܝܼܬ ܗ݇ܘܵܐ ܒܗ̇ܝ ܡܕܝܼܢ݇ܬܵܐ، ܘܟܹܐ ܐܵܬܝܵܐ ܗ݇ܘܵܐ ܠܟܸܣ ܠܹܗ ܘܐܵܡܪܵܐ ܗ݇ܘܵܐ ܐܸܠܹܗ، ’ܥܒ݂ܘܿܕ ܠܵܗ̇ ܕܝܼܘܵܢܝܼ ܡ̣ܢ ܕܲܠܩܘܼܒ݂ܠܵܝܝܼ.‘ 4”ܠܹܐ ܒܵܥܹܐ ܗ݇ܘܵܐ ܩܵܐ ܚܲܕ ܙܲܒ݂ܢܵܐ ܝܲܪܝܼܟ݂ܵܐ، ܐܝܼܢܵܐ ܡ̣ܢ ܒܵܬ݇ܪ ܗܵܕܵܐ ܐ݇ܡܝܼܪܹܗ ܒܓܵܢܹܗ، ’ܐܘܼܦ ܐܸܢ ܕܡ̣ܢ ܐܲܠܵܗܵܐ ܠܹܐ ܝܘܸܢ ܒܸܙܕܵܥܵܐ، ܘܡ̣ܢ ܒܢܲܝ̈ܢܵܫܵܐ ܠܹܐ ܝܘܸܢ ܒܸܢܟ݂ܵܦܵܐ، 5”’ܒܸܬ ܥܵܒ݂ܕܹܢܵܗ̇ ܕܝܼܘܵܢ ܕܐܵܗܵܐ ܐܲܪܡܸܠܬܵܐ ܣܵܒܵܒ ܡܲܟܟ̰ܘܼܚܝܼ ܝܠܵܗ̇، ܘܕܠܵܐ ܗܵܘܝܵܐ ܒܟܠ ܥܕܵܢܵܐ ܒܹܐܬܵܝܵܐ ܘܡܲܣܩܘܼܕܝܼ.‘“ 6ܘܐ݇ܡܝܼܪܹܗ ܡܵܪܲܢ، ”ܫܡܸܥܡܘܼܢ ܡܘܿܕܝܼ ܐ݇ܡܝܼܪܹܗ ܕܲܝܵܢܵܐ ܥܵܘܵܠܵܐ. 7”ܠܹܐ ܝܬܘܿܢ ܒܸܚܫܵܒ݂ܵܐ ܐܲܠܵܗܵܐ ܒܸܬ ܥܵܒܹܕ ܠܵܗ̇ ܕܝܼܘܵܢ ܕܓܘܼܒܝܘܼ̈ܗܝ، ܐܲܝܢܝܼ ܕܟܹܐ ܦܲܪܦܸܠܝܼ ܒܝܼܹܗ ܒܝܵܘܡܵܐ ܘܒܠܲܝܠܹܐ، ܘܒܸܬ ܡܲܪܝܸܟ݂ ܒܹܐܢܹܗ ܥܲܠܲܝܗܝ؟ 8”ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܒܸܬ ܥܵܒܹܕ ܠܵܗ̇ ܕܝܼܘܵܢܲܝܗܝ ܒܓ̰ܲܠܕܘܼܬܵܐ. ܐܝܼܢܵܐ ܐܝܼܡܲܢ ܕܐܵܬܹܐ ܒܪܘܿܢܵܐ ܕܐ݇ܢܵܫܵܐ، ܒܸܬ ܡܲܫ݇ܟ̰ܸܚ ܗܲܝܡܵܢܘܼܬܵܐ ܥܲܠ ܐܲܪܥܵܐ؟“

ܡܲܬܠܵܐ ܕܦܪܝܼܫܵܐ ܘܡܵܟ݂ܣܵܐ

9ܘܐ݇ܡܝܼܪܹܗ ܝܼܫܘܿܥ ܐܵܗܵܐ ܡܲܬܠܵܐ ܠܕܲܠܩܘܼܒ݂ܠ ܕܐܵܢܝܼ ܕܟܹܐ ܗܲܡܸܢܝܼ ܗ݇ܘܵܘ ܒܓܵܢܲܝܗܝ ܕܙܲܕܝܼܩܹ̈ܐ ܝܗ݇ܘܵܘ ܘܡܲܣܠܝܼ ܗ݇ܘܵܘ ܠܐ݇ܚܹܪ̈݇ܢܹܐ. 10”ܬܪܹܝ ܐ݇ܢܵܫܹ̈ܐ ܐ݇ܣܝܼܩ ܠܗܘܿܢ ܠܗܲܝܟܠܵܐ ܠܨܲܠܘܼܝܹܐ، ܚܲܕ ܦܪܝܼܫܵܐ ܘܗ̇ܘ ܐ݇ܚܹܪ݇ܢܵܐ ܡܵܟ݂ܣܵܐ. 11”ܗ̇ܘ ܦܪܝܼܫܵܐ ܟܸܠܝܵܐ ܝܗ݇ܘܵܐ ܨܲܠܘܼܝܹܐ ܓܵܘ ܓܵܢܹܗ ܗܲܕܟ݂ܵܐ، ’ܝܵܐ ܐܲܠܵܗܵܐ، ܫܲܟܘܼܪܘܼܟ݂ ܝܼܘܸܢ ܕܠܹܐ ܝܘܸܢ ܡܐܲܝܟ݂ ܐ݇ܢܵܫܹ̈ܐ ܐ݇ܚܹܪ̈݇ܢܹܐ، ܚܵܛܘܿܦܹ̈ܐ، ܘܥܵܘܵܠܹ̈ܐ، ܘܙܲܢܵܝܹ̈ܐ، ܘܠܵܐ ܐܲܝܟ݂ ܐܵܗܵܐ ܡܵܟ݂ܣܵܐ. 12”’ܟܹܐ ܨܵܝܡܹܢ ܬܲܪܬܹܝ ܓܵܗܹ̈ܐ ܒܫܲܒܬܵܐ، ܘܟܹܐ ܝܵܗ݇ܒܹܢ ܡܲܥܣܵܪܹ̈ܐ ܥܲܠ ܟܠ ܡܸܢܕܝܼ ܕܩܵܢܹܝܢ.‘ 13”ܐܝܼܢܵܐ ܡܵܟ݂ܣܵܐ ܟܸܠܝܵܐ ܝܗ݇ܘܵܐ ܡ̣ܢ ܪܸܚܩܵܐ، ܘܠܹܐ ܒܵܥܹܐ ܗ݇ܘܵܐ ܐܘܼܦ ܥܲܝܢܘܼ̈ܗܝ ܡܲܪܸܡ ܗ݇ܘܵܐ ܠܗܘܿܢ ܠܫܡܲܝܵܐ، ܐܸܠܵܐ ܒܸܡܚܵܝܵܐ ܝܗ݇ܘܵܐ ܥܲܠ ܨܲܕܪܹܗ، ܒܹܐܡܵܪܵܐ، ’ܝܵܐ ܐܲܠܵܗܵܐ، ܪܲܚܸܡ ܥܲܠܝܼ، ܐܵܢܵܐ ܚܲܛܵܝܵܐ.‘ 14”ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܵܗܵܐ ܡܵܟ݂ܣܵܐ ܨܠܹܐ ܠܹܗ ܠܒܲܝܬܹܗ ܒܘܼܫ ܙܲܕܝܼܩܵܐ ܩܵܕ݇ܡ ܐܲܠܵܗܵܐ ܡ̣ܢ ܕܗ̇ܘ ܦܪܝܼܫܵܐ. ܣܵܒܵܒ ܟܠ ܡ̇ܢ ܕܡܲܪܸܡ ܠܵܗ̇ ܓܵܢܹܗ ܒܸܬ ܦܵܐܹܫ ܡܘܼܟܸܦܵܐ، ܘܟܠ ܡ̇ܢ ܕܡܲܟܸܦ ܓܵܢܹܗ ܒܸܬ ܦܵܐܹܫ ܡܘܼܪܡܵܐ.“

ܝܼܫܘܿܥ ܒܲܪܘܼܟܹܐ ܝܵܠܹ̈ܕ݇ܐ ܙܥܘܿܪܹ̈ܐ

ܡܬܝ 19‏:13‏‐15؛ ܡܪܩܘܣ 10‏:13‏‐16

15ܡܘܼܐܬܹܐ ܠܗܘܿܢ ܐ݇ܢܵܫܹ̈ܐ ܝܵܠܹ̈ܕ݇ܐ ܙܥܘܿܪܹ̈ܐ ܠܟܸܣ ܝܼܫܘܿܥ ܕܡܲܬܸܒ݂ ܗ݇ܘܵܐ ܐܝܼܕܵܐ ܥܲܠܲܝܗܝ. ܐܝܼܢܵܐ ܬܲܠܡܝܼ̈ܕܹܐ ܐܝܼܡܲܢ ܕܚܸܙܝܲܝ ܠܗܘܿܢ ܡܘܼܢܟܸܣܲܝ ܠܗܘܿܢ. 16ܐܝܼܢܵܐ ܝܼܫܘܿܥ ܩܸܪܝܲܝ ܠܹܗ ܘܐ݇ܡܝܼܪܹܗ ܐܸܠܲܝܗܝ، ”ܫܒ݂ܘܿܩܘܼܢ ܝܵܠܹ̈ܕ݇ܐ ܙܥܘܿܪܹ̈ܐ ܐܵܬܝܼ ܠܟܸܣ ܠܝܼ ܘܠܵܐ ܡܲܟܠܹܝܬܘܿܢ ܠܗܘܿܢ، ܣܵܒܵܒ ܡܲܠܟܘܼܬܵܐ ܕܐܲܠܵܗܵܐ ܩܵܐ ܐܵܢܝܼ ܝܠܵܗ̇ ܕܝܼܢܵܐ ܡܐܲܝܟ݂ ܕܐܲܢܹܐ. 17”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܡ̇ܢ ܕܠܵܐ ܩܲܒܸܠ ܡܲܠܟܘܼܬܵܐ ܕܐܲܠܵܗܵܐ ܐܲܝܟ݂ ܚܲܕ ܝܵܠܵܕ݇ܐ ܙܥܘܿܪܵܐ ܠܹܐ ܥܵܒܹܪ ܓܵܘܘܼܗ̇.“

ܥܘܼܬܪܵܐ ܘܡܲܠܟܘܼܬܵܐ ܕܐܲܠܵܗܵܐ

ܡܬܝ 19‏:16‏‐30؛ ܡܪܩܘܣ 10‏:17‏‐31

18ܒܘܼܩܸܪܹܗ ܚܲܕ ܡ̣ܢ ܓܘܼܪ̈ܵܢܹܐ، ܘܐ݇ܡܝܼܪܹܗ ܐܸܠܹܗ، ”ܡܲܠܦܵܢܵܐ ܛܵܒ݂ܵܐ، ܡܘܿܕܝܼ ܥܵܒ݂ܕܹܢ ܕܝܵܪܬܹܢ ܚܲܝܹ̈ܐ ܕܠܥܵܠܲܡ؟“ 19ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ، ”ܩܵܡܘܿܕܝܼ ܒܸܩܪܵܝܝܼ ܝܘܸܬ ܛܵܒ݂ܵܐ؟ ܠܲܝܬ ܛܵܒ݂ܵܐ ܐܸܠܵܐ ܚܲܕ، ܐܲܠܵܗܵܐ. 20”ܟܹܐ ܝܵܕܥܹܬ ܦܘܼܩܕܵܢܹ̈ܐ: ܠܵܐ ܩܵܛܠܹܬ، ܠܵܐ ܙܵܢܹܝܬ، ܠܵܐ ܓܵܢܒܹܬ، ܠܵܐ ܝܵܗ݇ܒܹܬ ܣܵܗܕܘܼܬܵܐ ܕܕܘܼܓܠܵܐ، ܡܝܲܩܸܪ ܠܒܵܒܘܼܟ݂ ܘܠܝܸܡܘܼܟ݂.“#ܡܦܩܢܐ 20‏:12‏‐16؛ ܬܢܝܢ ܢܡܘܣܐ 5‏:16‏‐20 21ܓ̰ܘܼܘܸܒ ܠܹܗ ܐܸܠܹܗ، ”ܐܲܢܹܐ ܟܠܲܝܗܝ ܢܛܝܼܪܲܝ ܝܘܸܢ ܡ̣ܢ ܝܵܠܕ݇ܘܼܬܝܼ.“ 22ܐܝܼܡܲܢ ܕܫܡܝܼܥ ܠܹܗ ܝܼܫܘܿܥ، ܐ݇ܡܝܼܪܹܗ ܐܸܠܹܗ، ”ܚܲܕ ܡܸܢܕܝܼ ܒܵܨܘܿܪܵܐ ܝܠܹܗ ܐܸܠܘܼܟ݂: ܙܲܒܸܢ ܟܠ ܡܸܢܕܝܼ ܕܐܝܼܬ ܠܘܼܟ݂ ܘܗܲܒ݂݇ܠ ܠܹܗ ܠܡܸܣܟܹܢܹ̈ܐ، ܘܒܸܬ ܗܵܘܹܐ ܠܘܼܟ݂ ܣܝܼܡܬܵܐ ܒܫܡܲܝܵܐ، ܘܬܵܐ ܒܵܬ݇ܪܝܼ.“ 23ܐܝܼܢܵܐ ܗ̇ܘ ܐܝܼܡܲܢ ܕܫܡܝܼܥ ܠܹܗ ܐܲܢܹܐ، ܦܫܝܼܡ ܠܹܗ، ܣܵܒܵܒ ܪܵܒܵܐ ܥܲܬܝܼܪܵܐ ܝܗ݇ܘܵܐ. 24ܟܲܕ ܚܙܹܐ ܠܹܗ ܝܼܫܘܿܥ ܕܦܫܝܼܡ ܠܹܗ، ܐ݇ܡܝܼܪܹܗ، ”ܟܡܵܐ ܥܲܣܩܵܐ ܝܠܵܗ̇ ܠܐܵܢܝܼ ܕܐܝܼܬ ܠܗܘܿܢ ܥܘܼܬܪܵܐ ܕܥܵܒ݂ܪܝܼ ܠܡܲܠܟܘܼܬܵܐ ܕܐܲܠܵܗܵܐ. 25”ܒܘܼܫ ܦܫܘܼܩܬܵܐ ܝܠܵܗ̇ ܠܓܘܼܡܠܵܐ ܠܸܥܒ݂ܵܪܵܐ ܒܢܸܩܒܵܐ ܕܚܡܵܛܵܐ ܡ̣ܢ ܕܥܲܬܝܼܪܵܐ ܥܵܒܹܪ ܠܡܲܠܟܘܼܬܵܐ ܕܐܲܠܵܗܵܐ.“ 26ܐܵܢܝܼ ܕܫܡܝܼܥ ܠܗܘܿܢ ܐ݇ܡܝܼܪܗܘܿܢ، ”ܒܲܣ ܡܵܢܝܼ ܡܵܨܹܐ ܦܵܪܹܩ؟“ 27ܓ̰ܘܼܘܸܒ ܠܹܗ ܝܼܫܘܿܥ، ”ܟܠ ܡܸܢܕܝܼ ܕܠܹܐ ܝܠܹܗ ܡܸܬܡܲܨܝܵܢܵܐ ܠܟܸܣ ܒܢܲܝ̈ܢܵܫܵܐ، ܡܸܬܡܲܨܝܵܢܵܐ ܝܠܹܗ ܠܟܸܣ ܐܲܠܵܗܵܐ.“ 28ܐ݇ܡܝܼܪܹܗ ܐܸܠܹܗ ܫܸܡܥܘܿܢ ܟܹܐܦܵܐ، ”ܐܲܚܢܲܢ ܫܒ݂ܝܼܩ ܠܲܢ ܟܠ ܡܸܢܕܝܼ ܘܐ݇ܬܹܐ ܠܲܢ ܒܵܬ݇ܪܘܼܟ݂.“ 29ܓ̰ܘܼܘܸܒ ܠܹܗ ܝܼܫܘܿܥ ܐܸܠܲܝܗܝ، ”ܬܪܘܼܨܵܐ ܒܹܐܡܵܪܵܐ ܝܘܸܢ، ܠܲܝܬ ܐ݇ܢܵܫܵܐ ܕܫܵܒܹܩ ܒܲܝܬܵܐ ܝܲܢ ܐܲܒ݂ܵܗܹ̈ܐ ܝܲܢ ܐܲܚܘܿܢܘܵܬܹ̈ܐ ܝܲܢ ܒܲܟ݂ܬܵܐ ܝܲܢ ܒܢܘܿܢܹ̈ܐ، ܒܘܼܬ ܡܲܠܟܘܼܬܵܐ ܕܐܲܠܵܗܵܐ، 30”ܘܠܵܐ ܩܲܒܸܠ ܪܵܒܵܐ ܒܘܼܫ ܙܵܘܕܵܐ ܒܐܵܗܵܐ ܙܲܒ݂ܢܵܐ، ܘܒܙܲܒ݂ܢܵܐ ܕܐܵܬܹܐ، ܚܲܝܹ̈ܐ ܕܠܥܵܠܲܡ.“

ܝܼܫܘܿܥ ܓܵܗܵܐ ܕܬܠܵܬ ܡܲܚܒܘܼܪܹܐ ܒܘܼܬ ܡܵܘܬܹܗ ܘܩܝܵܡܬܹܗ

ܡܬܝ 20‏:17‏‐19؛ ܡܪܩܘܣ 10‏:32‏‐34

31ܠܘܼܒܸܠ ܠܹܗ ܝܼܫܘܿܥ ܠܬܪܸܥܣܲܪ ܬܲܠܡܝܼܕܘܼ̈ܗܝ ܘܐ݇ܡܝܼܪܹܗ ܐܸܠܲܝܗܝ، ”ܗܵܐ ܒܹܐܣܵܩܵܐ ܝܘܲܚ ܠܐܘܿܪܸܫܠܸܡ، ܘܒܸܬ ܦܵܝܫܝܼ ܬܘܼܡܸܡܹܐ ܟܠܲܝܗܝ ܐܵܢܝܼ ܕܦܝܼܫܹܐ ܝܢܵܐ ܟܬܝܼܒܹܐ ܒܝܲܕ ܢܒ݂ܝܼܹ̈ܐ ܒܘܼܬ ܒܪܘܿܢܵܐ ܕܐ݇ܢܵܫܵܐ. 32”ܒܸܬ ܦܵܐܹܫ ܣܘܼܦܝܵܐ ܠܐܸܡܘܵܬܹ̈ܐ، ܒܸܬ ܡܲܣܚܸܪܝܼ ܒܝܼܹܗ ܘܒܸܬ ܪܵܝܩܝܼ ܥܲܠ ܦܵܬܹܗ. 33”ܒܸܬ ܡܵܚܝܼ ܠܹܗ ܒܫܵܘܛܹ̈ܐ، ܘܒܸܬ ܩܵܛܠܝܼ ܠܹܗ، ܘܒܝܵܘܡܵܐ ܕܬܠܵܬܵܐ ܒܸܬ ܩܵܐܹܡ.“ 34ܐܝܼܢܵܐ ܐܵܢܝܼ ܠܵܐ ܦܘܼܪܡܹܐ ܠܗܘܿܢ ܐܘܼܦ ܚܕܵܐ ܡ̣ܢ ܐܲܢܹܐ، ܣܵܒܵܒ ܛܫܝܼܬܵܐ ܝܗ݇ܘܵܐ ܡܸܢܲܝܗܝ ܐܵܗܵܐ ܗܹܡܸܙܡܵܢ، ܘܠܹܐ ܝܗ݇ܘܵܘ ܒܝܼܕܵܥܵܐ ܡܸܢܕܝܼܵܢܹ̈ܐ ܕܦܝܵܫܵܐ ܝܗ݇ܘܵܘ ܐ݇ܡܝܼܪܹܐ ܐܸܠܲܝܗܝ.

ܝܼܫܘܿܥ ܒܲܣܘܼܡܹܐ ܚܲܕ ܐ݇ܢܵܫܵܐ ܣܸܡܝܵܐ

ܡܬܝ 20‏:29‏‐34؛ ܡܪܩܘܣ 10‏:46‏‐52

35ܟܲܕ ܩܘܼܪܒܸܢܹܗ ܝܼܫܘܿܥ ܠܐܝܼܪܝܼܚܘܿ، ܗܵܐ ܚܲܕ ܣܸܡܝܵܐ ܝ݇ܬܝܼܒ݂ܵܐ ܝܗ݇ܘܵܐ ܥܲܠ ܡܲܪܙܵܐ ܕܐܘܼܪܚܵܐ ܒܸܓܒ݂ܵܝܵܐ. 36ܐܝܼܡܲܢ ܕܫܡܝܼܥ ܠܹܗ ܟܸܢܫܵܐ ܒܸܥܒ݂ܵܪܵܐ، ܒܘܼܩܸܪܹܗ، ”ܡܘܿܕܝܼ ܝܠܹܗ ܐܵܗܵܐ؟“ 37ܓ̰ܘܼܘܸܒ ܠܗܘܿܢ ܐܸܠܹܗ، ”ܝܼܫܘܿܥ ܢܵܨܪܵܝܵܐ ܒܸܥܒ݂ܵܪܵܐ ܝܠܹܗ.“ 38ܡܘܼܩܘܸܚ ܠܹܗ ܘܐ݇ܡܝܼܪܹܗ، ”ܝܼܫܘܿܥ، ܒܪܘܿܢܵܐ ܕܕܵܘܝܼܕ، ܪܲܚܸܡ ܥܲܠܝܼ.“ 39ܐܵܢܝܼ ܕܒܹܐܙܵܠܵܐ ܝܗ݇ܘܵܘ ܡ̣ܢ ܩܵܕ݇ܡ ܝܼܫܘܿܥ ܢܓ̰ܝܼܘ ܠܗܘܿܢ ܒܝܼܹܗ ܕܫܵܬܹܩ ܗ݇ܘܵܐ. ܐܝܼܢܵܐ ܗ̇ܘ ܒܘܼܫ ܙܵܘܕܵܐ ܡܲܩܘܸܚ ܗ݇ܘܵܐ، ”ܝܵܐ ܒܪܘܿܢܵܐ ܕܕܵܘܝܼܕ، ܪܲܚܸܡ ܥܲܠܝܼ.“ 40ܘܟܠܹܐ ܠܹܗ ܝܼܫܘܿܥ ܘܦܩܝܼܕ ܠܹܗ ܕܡܲܝܬܝܼ ܗ݇ܘܵܘ ܠܹܗ ܠܟܸܣ ܠܹܗ. ܘܐܝܼܡܲܢ ܕܐ݇ܬܹܐ ܠܹܗ، ܒܘܼܩܸܪܹܗ ܡܸܢܹܗ، 41”ܡܘܿܕܝܼ ܒܵܥܹܝܬ ܕܥܵܒ݂ܕܹܢ ܐܸܠܘܼܟ݂؟“ ܘܗ̇ܘ ܓ̰ܘܼܘܸܒ ܠܹܗ، ”ܡܵܪܝܼ، ܒܵܥܹܝܢ ܕܚܵܙܹܝܢ.“ 42ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܚܙܝܼ. ܗܲܝܡܵܢܘܼܬܘܼܟ݂ ܩܲܡ ܒܲܣܡܵܐ ܠܘܼܟ݂.“ 43ܒܗ̇ܝ ܥܕܵܢܵܐ ܚܙܹܐ ܠܹܗ، ܘܐ݇ܬܹܐ ܠܹܗ ܒܵܬ݇ܪ ܝܼܫܘܿܥ ܫܲܒܘܼܚܹܐ ܠܐܲܠܵܗܵܐ. ܘܐܘܼܦ ܟܠܲܝܗܝ ܐܵܢܝܼ ܕܚܙܹܐ ܠܗܘܿܢ ܫܲܒܚܝܼ ܗ݇ܘܵܘ ܠܐܲܠܵܗܵܐ.

Currently Selected:

ܠܘܩܐ 18: ABTAB

Highlight

Copy