ܠܘܩܐ 19

ܙܲܟܲܝ ܦܝܵܫܵܐ ܫܘܼܚܠܸܦܵܐ

1ܥܒ݂ܝܼܪܹܗ ܝܼܫܘܿܥ ܡ̣ܢ ܓܵܘ ܐܝܼܪܝܼܚܘܿ. 2ܘܐܝܼܬ ܗ݇ܘܵܐ ܬܵܡܵܐ ܚܲܕ ܐ݇ܢܵܫܵܐ ܥܲܬܝܼܪܵܐ ܫܸܡܹܗ ܙܲܟܲܝ، ܓܘܼܪܵܐ ܕܡܵܟ݂ܣܹ̈ܐ. 3ܒܵܥܹܐ ܗ݇ܘܵܐ ܕܚܵܙܹܐ ܗ݇ܘܵܐ ܠܝܼܫܘܿܥ ܡܵܢܝܼ ܝܠܹܗ، ܘܠܹܐ ܡܵܨܹܐ ܗ݇ܘܵܐ ܡ̣ܢ ܟܸܢܫܵܐ، ܣܵܒܵܒ ܟܸܪܝܵܐ ܝܗ݇ܘܵܐ ܒܩܵܘܡܬܵܐ. 4ܪܚܝܼܛ ܠܹܗ ܠܩܵܕ݇ܡܵܐ ܘܐ݇ܣܝܼܩ ܠܹܗ ܠܐܝܼܠܵܢܵܐ ܕܬܹܐܢܹ̈ܐ ܕܚܵܙܹܐ ܗ݇ܘܵܐ ܠܹܗ، ܣܵܒܵܒ ܒܸܬ ܥܵܒܹܪ ܗ݇ܘܵܐ ܡ̣ܢ ܗ̇ܝ ܐܘܼܪܚܵܐ. 5ܐܝܼܡܲܢ ܕܐ݇ܬܹܐ ܠܹܗ ܝܼܫܘܿܥ ܠܗ̇ܝ ܕܘܼܟܵܐ، ܓܘܼܫܸܩ ܠܹܗ ܠܥܸܠܸܠ، ܘܐ݇ܡܝܼܪܹܗ، ”ܙܲܟܲܝ، ܡܲܠܝܸܙ ܘܨܠܝܼ، ܣܵܒܵܒ ܘܵܠܹܐ ܝܠܵܗ̇ ܐܸܕܝܘܿܡ ܝܵܘܡܵܐ ܕܫܵܪܹܝܢ ܓܵܘ ܒܲܝܬܘܼܟ݂.“ 6ܡܘܼܠܝܸܙ ܠܹܗ ܙܲܟܲܝ ܘܨܠܹܐ ܠܹܗ، ܘܩܘܼܒܸܠ ܠܹܗ ܐܸܠܹܗ ܒܚܲܕܘܼܬܵܐ. 7ܐܝܼܢܵܐ ܟܠܲܝܗܝ ܐܵܢܝܼ ܕܚܙܹܐ ܠܗܘܿܢ ܛܘܼܪܛܸܡ ܠܗܘܿܢ ܘܐ݇ܡܝܼܪܗܘܿܢ، ”ܥܒ݂ܝܼܪܹܗ ܘܫܪܹܐ ܠܹܗ ܠܟܸܣ ܐ݇ܢܵܫܵܐ ܚܲܛܵܝܵܐ.“ 8ܘܟܠܹܐ ܠܹܗ ܙܲܟܲܝ ܘܐ݇ܡܝܼܪܹܗ ܠܡܵܪܲܢ، ”ܚܙܝܼ ܡܵܪܝܼ، ܦܲܠܓܵܐ ܕܡܸܢܕܝܼܝܼ ܒܸܬ ܝܵܗ݇ܒܹܢܹܗ ܠܡܸܣܟܹܢܹ̈ܐ، ܘܐܸܢ ܛܠܝܼܡܵܐ ܝܘܸܢ ܠܐ݇ܢܵܫܵܐ، ܒܸܬ ܦܵܪܥܹܢܹܗ ܚܲܕ ܒܐܲܪܒܥܵܐ.“ 9ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܐܸܕܝܘܿܡ ܝܵܘܡܵܐ ܗܘܹܐ ܠܹܗ ܦܘܼܪܩܵܢܵܐ ܠܐܵܗܵܐ ܒܲܝܬܵܐ، ܣܵܒܵܒ ܐܘܼܦ ܐܵܗܵܐ ܒܪܘܿܢܵܐ ܕܐܲܒ݂ܪܵܗܵܡ ܝܼܠܹܗ. 10”ܣܵܒܵܒ ܒܪܘܿܢܵܐ ܕܐ݇ܢܵܫܵܐ ܐ݇ܬܹܐ ܠܹܗ ܕܛܵܥܹܐ ܘܦܲܪܸܩ ܠܗ̇ܘ ܕܝܼܗ݇ܘܵܐ ܛܠܝܼܩܵܐ.“

ܡܲܬܠܵܐ ܕܥܸܣܪܵܐ ܟܲܟܪܹ̈ܐ

ܡܬܝ 25‏:14‏‐30

11ܟܲܕ ܫܡܝܼܥ ܠܗܘܿܢ ܐܲܢܹܐ، ܐ݇ܡܝܼܪܹܗ ܐܸܠܲܝܗܝ ܚܲܕ ܡܲܬܠܵܐ ܐ݇ܚܹܪ݇ܢܵܐ، ܣܵܒܵܒ ܩܲܪܒܘܼܢܹܐ ܝܗ݇ܘܵܐ ܠܐܘܿܪܸܫܠܸܡ، ܘܚܵܫܒ݂ܝܼ ܗ݇ܘܵܘ ܒܗ̇ܝ ܥܕܵܢܵܐ ܒܸܬ ܦܵܝܫܵܐ ܗ݇ܘܵܐ ܓܠܝܼܬܵܐ ܡܲܠܟܘܼܬܵܐ ܕܐܲܠܵܗܵܐ. 12ܐ݇ܡܝܼܪܹܗ، ”ܚܲܕ ܐ݇ܢܵܫܵܐ ܡܥܲܠܝܵܐ ܐ݇ܙܝܼܠ ܠܹܗ ܠܚܲܕ ܐܲܬܪܵܐ ܪܸܚܩܵܐ ܕܩܲܒܸܠ ܡܲܠܟܘܼܬܵܐ ܘܕܵܐܹܪ. 13”ܩܪܹܐ ܠܹܗ ܥܸܣܪܵܐ ܪܹ̈ܓܵܘܵܬܹܗ ܘܝܘܼܗ݇ܒܸܠ ܠܹܗ ܐܸܠܲܝܗܝ ܥܸܣܪܵܐ ܟܲܟܪܹ̈ܐ ܘܐ݇ܡܝܼܪܹܗ، ’ܡܲܦܠܸܚܘܼܢ ܠܗܘܿܢ ܗܲܠ ܕܕܵܝܪܹܢ.‘ 14”ܐܝܼܢܵܐ ܒܢܲܝ̈ ܡܕܝܼܢ݇ܬܹܗ ܟܹܐ ܣܵܢܝܼ ܗ݇ܘܵܘ ܠܹܗ، ܘܫܘܼܕܸܪܗܘܿܢ ܡ̣ܢ ܒܵܬ݇ܪ ܡܸܢܹܗ ܐܝܼܙܓܲܕܹ̈ܐ، ܒܹܐܡܵܪܵܐ، ’ܠܹܐ ܒܵܣܡܵܐ ܠܲܢ ܕܐܵܗܵܐ ܐ݇ܢܵܫܵܐ ܥܵܒܹܕ ܡܲܠܟܘܼܬܵܐ ܥܲܠܲܢ.‘

15”ܡ̣ܢ ܒܵܬ݇ܪ ܕܦܝܼܫ ܠܹܗ ܥܒ݂ܝܼܕܵܐ ܡܲܠܟܵܐ، ܕܝܼܪܹܗ ܘܦܩܝܼܕ ܠܹܗ ܕܦܵܝܫܝܼ ܩܸܪܝܹܐ ܐܵܢܝܼ ܪܹ̈ܓܵܘܵܬܹܐ ܕܝܘܼܗ݇ܒ݂ܵܐ ܝܗ݇ܘܵܐ ܐܸܠܲܝܗܝ ܙܘܼܙܹ̈ܐ، ܕܝܵܕܹܥ ܗ݇ܘܵܐ ܡܘܿܕܝܼ ܟܠ ܚܲܕ ܡܸܢܲܝܗܝ ܩܸܢܝܵܐ ܝܗ݇ܘܵܐ. 16ܐ݇ܬܹܐ ܠܹܗ ܗ̇ܘ ܩܵܕ݇ܡܵܝܵܐ ܘܐ݇ܡܝܼܪܹܗ، ’ܡܵܪܝܼ، ܟܲܟܪܘܼܟ݂ ܩܢܹܐ ܠܹܗ ܥܸܣܪܵܐ ܟܲܟܪܹ̈ܐ ܐ݇ܚܹܪ̈݇ܢܹܐ.‘ 17”ܐ݇ܡܝܼܪܹܗ ܐܸܠܹܗ ܡܵܪܹܗ، ’ܛܘܼܒ݂ܵܐ ܐܸܠܘܼܟ݂ ܪܹܓܵܐ ܛܵܒ݂ܵܐ، ܣܵܒܵܒ ܗܘܹܐ ܠܘܼܟ݂ ܡܗܘܼܡܢܵܐ ܒܚܲܕ ܡܸܢܕܝܼ ܙܥܘܿܪܵܐ، ܗܘܝܼ ܡܕܲܒܪܵܢܵܐ ܥܲܠ ܥܣܲܪ ܡܕܝܼܢܵܬܹ̈ܐ.‘ 18”ܐ݇ܬܹܐ ܠܹܗ ܗ̇ܘ ܕܬܪܹܝ ܘܐ݇ܡܝܼܪܹܗ، ’ܡܵܪܝܼ، ܟܲܟܪܘܼܟ݂ ܩܢܹܐ ܠܹܗ ܚܲܡܫܵܐ ܟܲܟܪܹ̈ܐ ܐ݇ܚܹܪ̈݇ܢܹܐ.‘ 19”ܐܘܼܦ ܠܗ̇ܘ ܐ݇ܡܝܼܪܹܗ، ’ܗܘܝܼ ܡܕܲܒܪܵܢܵܐ ܥܲܠ ܚܲܡܸܫ ܡܕܝܼܢܵܬܹ̈ܐ.‘ 20”ܐ݇ܬܹܐ ܠܹܗ ܗ̇ܘ ܐ݇ܚܹܪ݇ܢܵܐ ܘܐ݇ܡܝܼܪܹܗ، ’ܡܵܪܝܼ، ܗܵܐ، ܫܩܘܿܠ ܟܲܟܪܘܼܟ݂ ܕܗܘܹܐ ܠܹܗ ܠܟܸܣ ܠܝܼ، ܟܲܕ ܐ݇ܣܝܼܪܵܐ ܒܝܵܠܸܚܬܵܐ، 21”’ܣܵܒܵܒ ܙܕܝܼܥ ܠܝܼ ܡܸܢܘܼܟ݂، ܕܐ݇ܢܵܫܵܐ ܩܸܫܝܵܐ ܝܘܸܬ. ܟܹܐ ܫܵܩܠܹܬ ܡ̣ܢ ܐܲܝܟܵܐ ܕܠܵܐ ܡܘܼܬܸܒ݂ ܠܘܼܟ݂، ܘܟܹܐ ܚܵܨܕܹܬ ܡܸܢܕܝܼ ܡ̣ܢ ܐܲܝܟܵܐ ܕܠܵܐ ܙܪܝܼܥ ܠܘܼܟ݂.‘ 22”ܓ̰ܘܼܘܸܒ ܠܹܗ ܐܸܠܹܗ ܡܵܪܹܗ، ’ܡ̣ܢ ܦܘܼܡܘܼܟ݂ ܒܸܬ ܕܵܝܢܹܢܘܼܟ݂ ܝܵܐ ܪܹܓܵܐ ܒܝܼܫܵܐ. ܒܝܼܕܵܥܵܐ ܝܘܸܬ ܗ݇ܘܵܐ ܕܐ݇ܢܵܫܵܐ ܩܸܫܝܵܐ ܝܘܸܢ، ܟܹܐ ܫܵܩܠܹܢ ܡܸܢܕܝܼ ܡ̣ܢ ܐܲܝܟܵܐ ܕܠܵܐ ܡܘܼܬܸܒ݂ ܠܝܼ، ܘܟܹܐ ܚܵܨܕܹܢ ܡܸܢܕܝܼ ܡ̣ܢ ܐܲܝܟܵܐ ܕܠܵܐ ܙܪܝܼܥ ܠܝܼ، 23”’ܒܲܣ ܩܵܡܘܿܕܝܼ ܠܵܐ ܡܘܼܬܸܒ݂ ܠܘܼܟ݂ ܙܘܼܙܝܼ ܠܟܸܣ ܨܲܪ̈ܵܦܹܐ ܕܐܵܬܹܝܢ ܗ݇ܘܵܐ ܘܫܵܩܠܹܢ ܗ݇ܘܵܐ ܠܹܗ ܥܲܡ ܙܵܘܕܘܼܢܝܹܗ؟‘ 24”ܘܐ݇ܡܝܼܪܹܗ ܠܐܵܢܝܼ ܕܟܸܠܝܹܐ ܝܗ݇ܘܵܘ ܠܟܸܣ ܠܹܗ، ’ܫܩܘܿܠܘܼܢ ܡܸܢܹܗ ܟܲܟܪܵܐ ܘܗܲܒ݂݇ܠܘܼܢ ܠܹܗ ܠܗ̇ܘ ܕܐܝܼܬ ܠܹܗ ܥܸܣܪܵܐ ܟܲܟܪܹ̈ܐ.‘ 25”ܘܐܵܢܝܼ ܐ݇ܡܝܼܪܗܘܿܢ ܐܸܠܹܗ، ’ܡܵܪܲܢ، ܗ̇ܘ ܐܝܼܬ ܠܹܗ ܥܸܣܪܵܐ ܟܲܟܪܹ̈ܐ.‘ 26”ܓ̰ܘܼܘܸܒ ܠܹܗ ܐܸܠܲܝܗܝ، ’ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܟܠ ܡ̇ܢ ܕܐܝܼܬ ܠܹܗ ܒܸܬ ܦܵܐܹܫ ܝܘܼܗ݇ܒ݂ܵܐ ܐܸܠܹܗ، ܘܡ̇ܢ ܕܠܲܝܬ ܠܹܗ، ܐܘܼܦ ܗ̇ܘ ܕܐܝܼܬ ܠܹܗ ܒܸܬ ܦܵܐܹܫ ܫܩܝܼܠܵܐ ܡܸܢܹܗ. 27”’ܐܝܼܢܵܐ ܕܸܫܡܸܢܝܼ̈، ܐܵܢܝܼ ܕܠܵܐ ܒܣܝܼܡ ܠܵܗ̇ ܠܗܘܿܢ ܕܗܵܘܹܝܢ ܗ݇ܘܵܐ ܡܲܠܟܵܐ ܥܲܠܲܝܗܝ، ܡܲܝܬܹܝܡܘܼܢ ܠܗܘܿܢ ܠܐܲܟ݂ܵܐ، ܘܩܛܘܿܠܘܼܢ ܠܗܘܿܢ ܩܵܕ݇ܡܝܼ.‘“

ܥܒ݂ܵܪܬܵܐ ܕܝܼܫܘܿܥ ܠܐܘܿܪܸܫܠܸܡ

ܡܬܝ 21‏:1‏‐11؛ ܡܪܩܘܣ 11‏:1‏‐11؛ ܝܘܚܢܢ 12‏:12‏‐19

28ܟܲܕ ܗܘܼܡܙܸܡ ܠܹܗ ܝܼܫܘܿܥ ܐܲܢܹܐ، ܦܠܝܼܛ ܠܹܗ ܠܐܘܼܪܚܹܗ ܘܐ݇ܙܝܼܠ ܠܹܗ ܩܵܕ݇ܡܵܐ ܩܵܕ݇ܡܲܝܗܝ ܒܹܐܣܵܩܵܐ ܠܐܘܿܪܸܫܠܸܡ. 29ܐܝܼܡܲܢ ܕܡܛܹܐ ܠܹܗ ܠܒܹܝܬ ܦܵܓܹ̈ܐ ܘܠܒܹܝܬ ܥܲܢܝܵܐ، ܠܓܹܒܵܐ ܕܛܘܼܪܵܐ ܕܦܝܵܫܵܐ ܝܠܹܗ ܩܸܪܝܵܐ ܛܘܼܪܵܐ ܕܙܲܝ̈ܬܹܐ، ܫܘܼܕܸܪܹܗ ܬܪܹܝ ܡ̣ܢ ܬܲܠܡܝܼܕܘܼ̈ܗܝ، 30ܘܐ݇ܡܝܼܪܹܗ ܐܸܠܲܝܗܝ، ”ܙܹܠ݇ܡܘܼܢ ܠܡܵܬܵܐ ܕܝܼܠܵܗ̇ ܠܒܲܠܩܘܼܒ݂ܠܲܢ، ܘܐܝܼܡܲܢ ܕܥܵܒ݂ܪܝܼܬܘܿܢ ܓܵܘܘܼܗ̇، ܒܸܬ ܡܲܫ݇ܟ̰ܚܝܼܬܘܿܢ ܓ̰ܲܥܫܵܐ ܐ݇ܣܝܼܪܵܐ ܗ̇ܘ ܕܐ݇ܢܵܫܵܐ ܗܸܟ̃ ܠܹܐ ܝܠܹܗ ܪܟܝܼܒ݂ܵܐ ܥܲܠܘܼܗܝ. ܫܪܹܝܡܘܼܢ ܘܡܲܝܬܹܝܡܘܼܢ ܠܹܗ. 31”ܘܐܸܢ ܐ݇ܢܵܫܵܐ ܒܲܩܸܪܵܘܟ݂ܘܿܢ، ’ܩܵܡܘܿܕܝܼ ܒܸܫܪܵܝܵܐ ܝܬܘܿܢ ܐܸܠܹܗ؟‘ ܓ̰ܲܘܸܒܝܼܬܘܿܢ ܠܹܗ، ’ܡܵܪܲܢ ܣܢܝܼܩܵܐ ܝܠܹܗ ܐܸܠܹܗ.‘“ 32ܘܐ݇ܙܝܼܠ ܠܗܘܿܢ ܐܵܢܝܼ ܕܦܝܼܫ ܠܗܘܿܢ ܫܘܼܕܪܹܐ ܘܡܘܼܫ݇ܟ̰ܸܚ ܠܗܘܿܢ ܕܵܐܟ݂ܝܼ ܕܐ݇ܡܝܼܪܹܗ ܐܸܠܲܝܗܝ ܝܼܫܘܿܥ. 33ܘܟܲܕ ܒܸܫܪܵܝܵܐ ܝܗ݇ܘܵܘ ܠܓ̰ܲܥܫܵܐ، ܒܘܼܩܸܪܗܘܿܢ ܡܵܪ̈ܵܘܵܬܹܗ، ”ܩܵܡܘܿܕܝܼ ܒܸܫܪܵܝܵܐ ܝܬܘܿܢ ܠܐܵܗܵܐ ܓ̰ܲܥܫܵܐ؟“ 34ܓ̰ܘܼܘܸܒ ܠܗܘܿܢ ܐܸܠܲܝܗܝ، ”ܡܵܪܲܢ ܣܢܝܼܩܵܐ ܝܠܹܗ ܐܸܠܹܗ.“ 35ܘܡܘܼܐܬܹܐ ܠܗܘܿܢ ܠܟܸܣ ܝܼܫܘܿܥ ܘܕܪܹܐ ܠܗܘܿܢ ܥܲܠ ܓ̰ܲܥܫܵܐ ܓ̰ܘܼܠܲܝ̈ܗܝ، ܘܪܟܝܼܒ݂ ܠܹܗ ܝܼܫܘܿܥ ܥܲܠܘܼܗܝ. 36ܟܲܕ ܒܹܐܙܵܠܵܐ ܝܗ݇ܘܵܐ ܝܼܫܘܿܥ، ܐܵܢܝܼ ܕܥܲܡܹܗ ܫܲܘܝܼ ܗ݇ܘܵܘ ܓ̰ܘܼܠܲܝ̈ܗܝ ܒܐܘܼܪܚܵܐ.

37ܐܝܼܡܲܢ ܕܡܛܹܐ ܠܹܗ ܠܡܲܨܠܵܝܬܵܐ ܕܛܘܼܪܵܐ ܕܙܲܝ̈ܬܹܐ، ܫܘܼܪܹܐ ܠܹܗ ܟܠܹܗ ܟܸܢܫܵܐ ܕܬܲܠܡܝܼ̈ܕܹܐ ܒܸܚܕܵܝܵܐ ܘܫܲܒܘܼܚܹܐ ܠܐܲܠܵܗܵܐ ܒܩܵܠܵܐ ܪܵܡܵܐ ܒܘܼܬ ܟܠܲܝܗܝ ܚܲܝܠܹ̈ܐ ܓܘܼܪܹ̈ܐ ܕܚܙܹܐ ܠܗܘܿܢ. 38ܘܐܵܡܪܝܼ ܗ݇ܘܵܘ،

”ܒܪܝܼܟ݂ܵܐ ܝܠܹܗ ܡܲܠܟܵܐ ܕܒܹܐܬܵܝܵܐ ܝܠܹܗ ܒܫܸܡܵܐ ܕܡܵܪܝܵܐ. ܫܠܵܡܵܐ ܒܫܡܲܝܵܐ ܘܫܘܼܒ݂ܚܵܐ ܒܲܡܪ̈ܵܘܡܹܐ.“#ܡܙܡܘܪ̈ܐ 118‏:26

39ܐܝܼܢܵܐ ܐ݇ܢܵܫܹ̈ܐ ܡ̣ܢ ܦܪ̈ܝܼܫܹܐ ܡ̣ܢ ܓܵܘܵܐ ܕܟܸܢܫܹ̈ܐ ܐܵܡܪܝܼ ܗ݇ܘܵܘ ܠܹܗ، ”ܪܲܒܝܼ، ܡܲܫܬܸܩ ܠܬܲܠܡܝܼܕܘܼ̈ܟ݂.“ 40ܓ̰ܘܼܘܸܒ ܠܹܗ ܐܸܠܲܝܗܝ، ”ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܸܢ ܐܲܢܹܐ ܫܵܬܩܝܼ، ܟܹܐܦܹ̈ܐ ܒܸܬ ܡܲܩܘܸܚܝܼ.“

ܝܼܫܘܿܥ ܒܸܒܟ݂ܵܝܵܐܥܲܠ ܐܘܿܪܸܫܠܸܡ

41ܟܲܕ ܩܘܼܪܒܸܢܹܗ ܝܼܫܘܿܥ ܠܡܕܝܼܢ݇ܬܵܐ ܘܚܸܙܝܵܐ ܠܹܗ، ܒܟܹܐ ܠܹܗ ܥܲܠܘܼܗ̇، 42ܘܐ݇ܡܝܼܪܹܗ، ”ܛܘܼܒ݂ܵܐ ܕܝܵܕܥܲܬܝ ܗ݇ܘܵܐ ܐܲܢ݇ܬ ܒܐܵܗܵܐ ܝܵܘܡܵܐ ܡܘܿܕܝܼ ܒܸܬ ܡܲܝܬܹܐ ܗ݇ܘܵܐ ܥܲܠܵܟ݂ܝ ܫܠܵܡܵܐ! ܐܝܼܢܵܐ ܐܵܕܝܼܵܐ ܛܸܫܝܵܐ ܝܠܹܗ ܡܸܢܵܟ݂ܝ. 43”ܒܸܬ ܐܵܬܝܼ ܥܲܠܵܟ݂ܝ ܝܵܘܡܵܢܹ̈ܐ ܕܒܸܬ ܚܲܪܕܝܼ ܠܵܟ݂ܝ ܕܸܫܡܸܢܵܟ݂ܝ̈، ܡܵܚܝܼ ܫܘܼܪܵܐ ܠܚܵܕܸܪ̈ܘܵܢܵܟ݂ܝ، ܘܚܵܠܨܝܼ ܠܵܟ݂ܝ ܡ̣ܢ ܟܠ ܓܹܒܵܐ. 44”ܒܸܬ ܬܵܠܚܝܼ ܠܵܟ݂ܝ ܘܒܢܘܿܢܵܟ݂ܝ̈ ܓܵܘܵܟ݂ܝ. ܠܹܐ ܫܵܒ݂ܩܝܼ ܓܵܘܵܟ݂ܝ ܟܹܐܦܵܐ ܥܲܠ ܟܹܐܦܵܐ ܣܵܒܵܒ ܠܵܐ ܝ݇ܕܝܼܥ ܠܵܟ݂ܝ ܙܲܒ݂ܢܵܐ ܕܣܲܚܒܲܪܬܵܟ݂ܝ.“

ܝܼܫܘܿܥ ܕܲܟ݂ܘܼܝܹܐ ܠܗܲܝܟܠܵܐ

ܡܬܝ 21‏:12‏‐17؛ ܡܪܩܘܣ 11‏:15‏‐19؛ ܝܘܚܢܢ 2‏:13‏‐22

45ܥܒ݂ܝܼܪܹܗ ܝܼܫܘܿܥ ܠܗܲܝܟܠܵܐ ܘܫܘܼܪܹܐ ܠܹܗ ܠܦܲܠܘܼܛܹܐ ܠܐܵܢܝܼ ܕܒܸܙܒ݂ܵܢܵܐ ܝܗ݇ܘܵܘ ܘܙܲܒܘܼܢܹܐ. 46ܘܐ݇ܡܝܼܪܹܗ ܐܸܠܲܝܗܝ،

”ܟܬܝܼܒ݂ܵܐ ܝܠܹܗ ܕܒܲܝܬܝܼ ܒܸܬ ܗܵܘܹܐ ܒܲܝܬܵܐ ܕܨܠܘܿܬܵܐ، ܐܝܼܢܵܐ ܐܲܚܬܘܿܢ ܥܒ݂ܝܼܕ ܠܵܘܟ݂ܘܿܢ ܓܸܦܝܼܬܵܐ ܕܓܹܢܵܒܹ̈ܐ.“#ܐܫܥܝܐ 56‏:7؛ ܐܪܡܝܐ 7‏:11

47ܘܟܠ ܝܵܘܡܵܐ ܟܹܐ ܡܲܠܸܦ ܗ݇ܘܵܐ ܒܗܲܝܟܠܵܐ، ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܘܪܹ̈ܫܵܢܹܐ ܕܥܲܡܵܐ ܒܵܥܝܼ ܗ݇ܘܵܘ ܠܛܲܠܘܼܩܹܗ. 48ܐܝܼܢܵܐ ܠܵܐ ܡܨܹܐ ܠܗܘܿܢ ܡܲܫ݇ܟ̰ܚܝܼ ܗ݇ܘܵܘ ܚܕܵܐ ܐܘܼܪܚܵܐ ܕܵܐܟ݂ܝܼ ܩܵܛܠܝܼ ܗ݇ܘܵܘ ܠܹܗ، ܣܵܒܵܒ ܟܠܲܝܗܝ ܒܸܫܡܵܥܵܐ ܝܗ݇ܘܵܘ ܠܗܹܡܸܙܡܵܢܘܼ̈ܗܝ.

Currently Selected:

ܠܘܩܐ 19: ABTAB

Highlight

Copy