ܠܘܩܐ 20

ܕܘܼܪܵܫܵܐ ܕܝܼܫܘܿܥ ܥܲܡ ܣܵܦܪܹ̈ܐ ܘܦܪ̈ܝܼܫܹܐ

ܡܬܝ 21‏:23‏‐27؛ ܡܪܩܘܣ 11‏:27‏‐33

1ܒܚܲܕ ܡ̣ܢ ܝܵܘܡܵܢܹ̈ܐ ܟܲܕ ܡܲܠܘܼܦܹܐ ܝܗ݇ܘܵܐ ܝܼܫܘܿܥ ܘܡܲܟܪܘܼܙܹܐ ܓܵܘ ܗܲܝܟܠܵܐ ܩܵܐ ܥܲܡܵܐ، ܩܝܼܡ ܠܗܘܿܢ ܥܲܠܘܼܗܝ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܘܚܘܵܪ̈ܕܸܩܢܹܐ، 2ܘܒܘܼܩܸܪܗܘܿܢ ܡܸܢܹܗ، ”ܐ݇ܡܘܿܪ ܐܸܠܲܢ، ܒܐܲܝܢܝܼ ܫܘܼܠܛܵܢܵܐ ܒܸܥܒ݂ܵܕܵܐ ܝܘܸܬ ܐܲܢܹܐ، ܘܡܵܢܝܼ ܝܘܼܗ݇ܒܸܠ ܠܹܗ ܐܸܠܘܼܟ݂ ܐܵܗܵܐ ܫܘܼܠܛܵܢܵܐ؟“ 3ܓ̰ܘܼܘܸܒ ܠܹܗ ܝܼܫܘܿܥ، ”ܐܘܼܦ ܐܵܢܵܐ ܒܸܬ ܒܲܩܪܸܢܵܘܟ݂ܘܿܢ ܚܲܕ ܒܘܼܩܵܪܵܐ، ܓ̰ܲܘܸܒܘܼܢ ܠܝܼ. 4”ܡܲܥܡܘܿܕܝܼܬܵܐ ܕܝܘܿܚܲܢܵܢ ܡ̣ܢ ܐܲܠܵܗܵܐ ܝܗ݇ܘܵܐ ܝܲܢ ܡ̣ܢ ܒܢܲܝ̈ܢܵܫܵܐ؟“ 5ܘܐܵܢܝܼ ܕܪܝܼܫ ܠܗܘܿܢ ܥܲܡ ܥܘܼܕܵܠܹ̈ܐ ܘܐ݇ܡܝܼܪܗܘܿܢ، ”ܐܸܢ ܐܵܡܪܲܚ، ܡ̣ܢ ܐܲܠܵܗܵܐ، ܒܸܬ ܐܵܡܹܪ ܐܸܠܲܢ، ’ܒܲܣ ܩܵܡܘܿܕܝܼ ܠܵܐ ܗܘܼܡܸܢܵܘܟ݂ܘܿܢ ܒܝܼܹܗ؟‘ 6”ܘܐܸܢ ܐܵܡܪܲܚ، ܡ̣ܢ ܒܢܲܝ̈ܢܵܫܵܐ، ܟܠܹܗ ܥܲܡܵܐ ܒܸܬ ܪܵܓ̰ܹܡ ܠܲܢ، ܣܵܒܵܒ ܗܘܼܡܸܢܹܐ ܝܢܵܐ ܕܝܘܿܚܲܢܵܢ ܢܒ݂ܝܼܵܐ ܝܠܹܗ.“ 7ܓ̰ܘܼܘܸܒ ܠܗܘܿܢ ܐܸܠܹܗ، ”ܠܹܐ ܝܵܕܥܲܚ ܡ̣ܢ ܐܲܝܟܵܐ ܝܗ݇ܘܵܐ.“ 8ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܐܘܼܦ ܐܵܢܵܐ ܠܹܐ ܐܵܡܪܹܢ ܐܸܠܵܘܟ݂ܘܿܢ ܒܐܲܝܢܝܼ ܫܘܼܠܛܵܢܵܐ ܒܸܥܒ݂ܵܕܵܐ ܝܘܸܢ ܐܲܢܹܐ.“

ܡܲܬܠܵܐ ܕܟܲܪܡܵܐ ܘܦܲܠܵܚܹ̈ܐ

ܡܬܝ 21‏:33‏‐46؛ ܡܪܩܘܣ 12‏:1‏‐12

9ܘܐ݇ܡܝܼܪܹܗ ܝܼܫܘܿܥ ܐܵܗܵܐ ܡܲܬܠܵܐ ܠܥܲܡܵܐ، ”ܚܲܕ ܐ݇ܢܵܫܵܐ ܢܨܝܼܒ݂ ܠܹܗ ܟܲܪܡܵܐ، ܘܣܘܼܦܹܐ ܠܹܗ ܠܦܲܠܵܚܹ̈ܐ، ܘܐ݇ܙܝܼܠ ܠܹܗ ܠܚܲܕ ܐܲܬܪܵܐ ܪܸܚܩܵܐ ܩܵܐ ܚܲܕ ܙܲܒ݂ܢܵܐ ܝܲܪܝܼܟ݂ܵܐ. 10”ܘܒܥܕܵܢܵܐ ܕܛܥܘܼܢܝܵܬܹ̈ܐ ܫܘܼܕܸܪܹܗ ܪܹܓܹܗ ܠܟܸܣ ܦܲܠܵܚܹ̈ܐ ܕܝܵܗ݇ܒ݂ܝܼ ܠܹܗ ܡ̣ܢ ܛܥܘܼܢܝܵܬܹ̈ܐ ܕܟܲܪܡܵܐ. ܐܝܼܢܵܐ ܦܲܠܵܚܹ̈ܐ ܡܚܹܐ ܠܗܘܿܢ ܐܸܠܹܗ ܘܫܘܼܕܸܪܗܘܿܢ ܣܦܝܼܩܵܐ. 11”ܡܸܢܕܪܸܫ ܫܘܼܕܸܪܹܗ ܪܹܓܵܐ ܐ݇ܚܹܪ݇ܢܵܐ، ܐܝܼܢܵܐ ܐܘܼܦ ܠܗ̇ܘ ܡܚܹܐ ܠܗܘܿܢ ܦܲܠܵܚܹ̈ܐ، ܘܡܘܼܣܠܹܐ ܠܗܘܿܢ ܐܸܠܹܗ، ܘܫܘܼܕܸܪܗܘܿܢ ܣܦܝܼܩܵܐ. 12”ܘܫܘܼܕܸܪܹܗ ܪܹܓܵܐ ܕܬܠܵܬܵܐ، ܐܝܼܢܵܐ ܐܘܼܦ ܠܗ̇ܘ ܕܘܼܪܒܸܢܗܘܿܢ ܘܛܪܝܼܕ ܠܗܘܿܢ. 13”ܘܐ݇ܡܝܼܪܹܗ ܡܵܪܵܐ ܕܟܲܪܡܵܐ، ’ܡܘܿܕܝܼ ܥܵܒ݂ܕܹܢ؟ ܒܸܬ ܫܲܕܪܸܢ ܒܪܘܿܢܝܼ ܡܘܼܚܸܒܵܐ. ܩܵܘܡܵܐ ܒܸܬ ܡܝܲܩܪܝܼ ܠܹܗ.‘ 14”ܐܝܼܢܵܐ ܐܝܼܡܲܢ ܕܚܙܹܐ ܠܗܘܿܢ ܦܲܠܵܚܹ̈ܐ ܠܒܪܘܿܢܵܐ، ܐ݇ܡܝܼܪܗܘܿܢ ܒܓܵܢܲܝܗܝ، ’ܐܵܗܵܐ ܝܠܹܗ ܝܵܪܘܿܬܵܐ. ܬܹܝܡܘܼܢ ܩܵܛܠܲܚ ܠܹܗ ܕܦܵܝܫܵܐ ܝܵܪܬܘܼܬܵܐ ܩܵܬܲܢ.‘ 15”ܦܘܼܠܸܛ ܠܗܘܿܢ ܐܸܠܹܗ ܠܒܲܕܲܪ ܡ̣ܢ ܟܲܪܡܵܐ ܘܩܛܝܼܠ ܠܗܘܿܢ ܐܸܠܹܗ. ܡܘܿܕܝܼ ܒܸܬ ܥܵܒܹܕ ܐܸܠܲܝܗܝ ܡܵܪܵܐ ܕܟܲܪܡܵܐ؟ 16”ܒܸܬ ܐܵܬܹܐ ܘܒܸܬ ܛܲܠܸܩ ܠܐܵܢܝܼ ܦܲܠܵܚܹ̈ܐ، ܘܒܸܬ ܝܲܗ݇ܒܸܠ ܟܲܪܡܵܐ ܠܦܲܠܵܚܹ̈ܐ ܐ݇ܚܹܪ̈݇ܢܹܐ.“ ܐܝܼܡܲܢ ܕܫܡܝܼܥ ܠܗܘܿܢ ܐ݇ܢܵܫܹ̈ܐ ܐܲܢܹܐ ܗܹܡܸܙܡܵܢܹ̈ܐ، ܐ݇ܡܝܼܪܗܘܿܢ، ”ܐܵܗܵܐ ܠܵܐ ܗܵܘܝܵܐ.“ 17ܐܝܼܢܵܐ ܗ̇ܘ ܚܝܼܪܹܗ ܒܝܼܲܝܗܝ ܘܐ݇ܡܝܼܪܹܗ، ”ܡܘܿܕܝܼ ܝܠܵܗ̇ ܡܲܥܢܵܝܵܐ ܕܗ̇ܝ ܕܟܬܝܼܒ݂ܬܵܐ ܝܠܵܗ̇،

ܟܹܐܦܵܐ ܕܡܘܼܣܠܹܐ ܠܗܘܿܢ ܒܲܢܵܝܹ̈ܐ، ܗ̇ܘ ܗܘܹܐ ܠܹܗ ܟܹܐܦܵܐ ܕܩܘܼܪܢܝܼܬܵܐ#ܡܙܡܘܪ̈ܐ 118‏:22؟

18”ܟܠ ܡ̇ܢ ܕܢܵܦܹܠ ܥܲܠ ܗ̇ܘ ܟܹܐܦܵܐ ܒܸܬ ܦܵܐܹܫ ܫܡܝܼܛܵܐ، ܘܟܠ ܡ̇ܢ ܕܥܲܠܘܼܗܝ ܢܵܦܹܠ ܗ̇ܘ ܟܹܐܦܵܐ، ܒܸܬ ܦܵܐܹܫ ܛܒ݂ܝܼܚܵܐ.“ 19ܒܗ̇ܝ ܥܕܵܢܵܐ ܒܥܹܐ ܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܕܵܒ݂ܩܝܼ ܗ݇ܘܵܘ ܠܹܗ، ܐܝܼܢܵܐ ܙܕܝܼܥ ܠܗܘܿܢ ܡ̣ܢ ܥܲܡܵܐ ܣܵܒܵܒ ܝ݇ܕܝܼܥ ܠܗܘܿܢ ܕܐܸܠܲܝܗܝ ܐ݇ܡܝܼܪܹܗ ܐܵܗܵܐ ܡܲܬܠܵܐ.

ܐܲܠܵܗܵܐ ܘܩܹܣܲܪ

ܡܬܝ 22‏:15‏‐22؛ ܡܪܩܘܣ 12‏:13‏‐17

20ܫܘܼܕܸܪܗܘܿܢ ܠܟܸܣ ܝܼܫܘܿܥ ܓܵܫܘܿܫܹ̈ܐ ܒܕܡܘܼܬܵܐ ܕܙܲܕܝܼܩܹ̈ܐ ܕܡܲܢܦܸܠܝܼ ܗ݇ܘܵܘ ܠܹܗ ܒܗܹܡܸܙܡܵܢ، ܕܣܲܦܝܼ ܗ݇ܘܵܘ ܠܹܗ ܠܕܝܼܘܵܢ ܘܠܫܘܼܠܛܵܢܵܐ ܕܫܲܠܝܼܛܵܐ، 21ܒܘܼܩܸܪܗܘܿܢ ܡܸܢܹܗ، ”ܡܲܠܦܵܢܵܐ، ܟܹܐ ܝܵܕܥܲܚ ܕܫܪܵܪܵܐ ܟܹܐ ܗܲܡܙܸܡܸܬ ܘܟܹܐ ܡܲܠܦܸܬ، ܘܠܹܐ ܚܵܙܹܝܬ ܦܵܬܵܐ ܐܸܠܵܐ ܒܫܲܪܝܼܪܘܼܬܵܐ ܐܘܼܪܚܵܐ ܕܐܲܠܵܗܵܐ ܟܹܐ ܡܲܠܦܸܬ. 22”ܩܵܢܘܿܢܵܝܬܵܐ ܝܠܵܗ̇ ܕܝܵܗ݇ܒܲܚ ܙܘܼܙܹ̈ܐ ܕܪܹܫܝܼܬܵܐ ܠܩܹܣܲܪ ܝܲܢ ܠܵܐ؟“ 23ܐܝܼܢܵܐ ܗ̇ܘ ܝ݇ܕܝܼܥ ܠܹܗ ܦܸܠܡܲܝܗܝ، ܓ̰ܘܼܘܸܒ ܠܹܗ، ”ܩܵܡܘܿܕܝܼ ܓ̰ܲܪܘܼܒܝܼ ܝܬܘܿܢ؟ 24”ܡܲܚܙܹܝܡܘܼܢ ܠܝܼ ܕܝܼܢܵܪܵܐ.“ ܘܡܘܼܚܙܹܐ ܠܗܘܿܢ ܐܸܠܹܗ. ܘܒܘܼܩܸܪܹܗ، ”ܕܡܵܢܝܼ ܝܠܹܗ ܐܵܗܵܐ ܨܘܼܪܬܵܐ، ܘܕܡܵܢܝܼ ܝܠܵܗ̇ ܐܵܗܵܐ ܟܬܝܼܒ݂ܬܵܐ؟“ ܓ̰ܘܼܘܸܒ ܠܗܘܿܢ ܐܸܠܹܗ، ”ܕܩܹܣܲܪ.“ 25ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܗܲܒ݂݇ܠܘܼܢ ܗܲܕܟ݂ܵܐ ܡܸܢܕܝܼ ܕܩܹܣܲܪ ܠܩܹܣܲܪ، ܘܡܸܢܕܝܼ ܕܐܲܠܵܗܵܐ ܠܐܲܠܵܗܵܐ.“ 26ܘܠܵܐ ܡܨܹܐ ܠܗܘܿܢ ܡܲܢܦܸܠܝܼ ܠܹܗ ܒܗܹܡܸܙܡܵܢ ܩܵܕ݇ܡ ܥܲܡܵܐ. ܥܘܼܓ̰ܸܒ ܠܗܘܿܢ ܥܲܠ ܓ̰ܘܼܘܵܒܹܗ، ܘܫܬܝܼܩ ܠܗܘܿܢ.

ܒܘܼܩܵܪܵܐ ܒܘܼܬ ܩܝܵܡܬܵܐ ܘܓܒ݂ܵܪܵܐ

ܡܬܝ 22‏:23‏‐33؛ ܡܪܩܘܣ 12‏:18‏‐27

27ܐ݇ܬܹܐ ܠܗܘܿܢ ܠܟܸܣ ܝܼܫܘܿܥ ܚܲܕ݇ܟܡܵܐ ܙܲܕܘܼܩܵܝܹ̈ܐ، ܐܵܢܝܼ ܕܟܹܐ ܐܵܡܪܝܼ ܕܠܲܝܬ ܩܝܵܡܬܵܐ، ܘܒܘܼܩܸܪܗܘܿܢ ܡܸܢܹܗ، 28”ܡܲܠܦܵܢܵܐ، ܡܘܼܫܹܐ ܟܬܝܼܒ݂ ܠܹܗ ܐܸܠܲܢ، ܐܸܢ ܐܲܚܘܿܢܵܐ ܕܐ݇ܢܵܫܵܐ ܡܵܐܹܬ ܘܐܝܼܬ ܠܹܗ ܒܲܟ݂ܬܵܐ ܐܝܼܢܵܐ ܠܲܝܬ ܠܹܗ ܒܢܘܿܢܹ̈ܐ، ܓܵܒܹܪ ܐܲܚܘܿܢܘܼܗܝ ܠܒܲܟ݂ܬܹܗ ܘܡܲܩܸܡ ܒܢܘܿܢܹ̈ܐ ܠܐܲܚܘܿܢܘܼܗܝ.#ܬܢܝܢ ܢܡܘܣܐ 25‏:5 29”ܐܝܼܬ ܗ݇ܘܵܘ ܫܲܒ݂ܥܵܐ ܐܲܚܘܿܢܘܵܬܹ̈ܐ. ܗ̇ܘ ܩܵܕ݇ܡܵܝܵܐ ܓܒ݂ܝܼܪܹܗ ܒܲܟ݂ܬܵܐ ܘܡܝܼܬ ܠܹܗ ܕܠܵܐ ܒܢܘܿܢܹ̈ܐ. 30”ܐܲܚܘܿܢܵܐ ܕܬܪܹܝ ܓܒ݂ܝܼܪܵܐ ܠܹܗ، ܐܝܼܢܵܐ ܐܘܼܦ ܗ̇ܘ ܡܝܼܬ ܠܹܗ ܕܠܵܐ ܒܢܘܿܢܹ̈ܐ. 31”ܗ̇ܘ ܕܬܠܵܬܵܐ ܓܒ݂ܝܼܪܵܐ ܠܹܗ، ܗܲܕܟ݂ܵܐ ܗܲܠ ܫܲܒ݂ܥܘܿܢܬܲܝܗܝ. ܟܠܲܝܗܝ ܡܝܼܬ ܠܗܘܿܢ ܕܠܵܐ ܒܢܘܿܢܹ̈ܐ. 32”ܒܚܲܪܬܵܐ ܐܘܼܦ ܒܲܟ݂ܬܵܐ ܡܝܼܬ ܠܵܗ̇. 33”ܒܝܵܘܡܵܐ ܕܩܝܵܡܬܵܐ، ܠܡܵܢܝܼ ܒܸܬ ܗܵܘܝܵܐ ܗ̇ܝ ܒܲܟ݂ܬܵܐ؟ ܣܵܒܵܒ ܫܲܒ݂ܥܘܿܢܬܲܝܗܝ ܓܒ݂ܝܼܪܵܐ ܠܗܘܿܢ.“ 34ܓ̰ܘܼܘܸܒ ܠܹܗ ܐܸܠܲܝܗܝ ܝܼܫܘܿܥ، ”ܒܢܘܿܢܹ̈ܐ ܕܐܵܗܵܐ ܥܵܠܡܵܐ ܟܹܐ ܓܵܒ݂ܪܝܼ ܘܡܲܓܒܸܪܝܼ. 35”ܐܝܼܢܵܐ ܐܵܢܝܼ ܕܝܼܢܵܐ ܚܫܝܼܚܹܐ ܠܗ̇ܘ ܥܵܠܡܵܐ ܐ݇ܚܹܪ݇ܢܵܐ، ܘܠܩܝܵܡܬܵܐ ܡ̣ܢ ܓܵܘ ܡܝܼܬܹ̈ܐ، ܠܹܐ ܓܵܒ݂ܪܝܼ ܘܠܹܐ ܡܲܓܒܸܪܝܼ. 36”ܐܘܼܦ ܡܝܵܬܵܐ ܠܹܐ ܡܵܨܝܼ ܡܵܝܬܝܼ ܐ݇ܚܹܪ݇ܢܵܐ، ܣܵܒܵܒ ܐܲܝܟ݂ ܡܲܠܲܐܟܹ̈ܐ ܝܢܵܐ، ܘܒܢܘܿܢܹ̈ܐ ܕܐܲܠܵܗܵܐ ܝܢܵܐ، ܣܵܒܵܒ ܗܘܹܐ ܠܗܘܿܢ ܒܢܘܿܢܹ̈ܐ ܕܩܝܵܡܬܵܐ. 37”ܐܝܼܢܵܐ ܒܘܼܬ ܩܝܵܡܬܵܐ ܕܡܝܼܬܹ̈ܐ، ܐܘܼܦ ܡܘܼܫܹܐ ܡܘܼܕܸܥ ܠܹܗ ܓܵܘ ܦܵܣܘܿܩܵܐ ܕܣܲܢܝܵܐ، ܟܲܕ ܩܪܹܐ ܠܹܗ ܠܡܵܪܝܵܐ، ’ܐܲܠܵܗܵܐ ܕܐܲܒ݂ܪܵܗܵܡ، ܘܐܲܠܵܗܵܐ ܕܐܝܼܣܚܵܩ، ܘܐܲܠܵܗܵܐ ܕܝܲܥܩܘܿܒ݂.‘#ܡܦܩܢܐ 3‏:6 38”ܐܲܠܵܗܵܐ ܠܹܐ ܝܠܹܗ ܐܲܠܵܗܵܐ ܕܡܝܼܬܹ̈ܐ ܐܸܠܵܐ ܕܚܵܝܹ̈ܐ، ܣܵܒܵܒ ܩܵܬܹܗ ܟܠܲܝܗܝ ܚܵܝܹ̈ܐ ܝܢܵܐ.“ 39ܓ̰ܘܼܘܸܒ ܠܗܘܿܢ ܐ݇ܢܵܫܹ̈ܐ ܡ̣ܢ ܣܵܦܪܹ̈ܐ ܘܐ݇ܡܝܼܪܗܘܿܢ، ”ܡܲܠܦܵܢܵܐ، ܫܲܦܝܼܪܵܐ ܗܲܡܙܘܼܡܹܐ ܝܘܸܬ.“ 40ܘܐ݇ܚܹܪ݇ܢܵܐ ܠܵܐ ܩܘܼܫܕܸܪܗܘܿܢ ܠܒܲܩܘܼܪܹܐ ܡܸܢܹܗ ܒܘܼܩܵܪܵܐ.

ܡܫܝܼܚܵܐ، ܒܪܘܿܢܵܐ ܕܡܵܢܝܼ ܝܠܹܗ؟

ܡܬܝ 22‏:41‏‐46؛ ܡܪܩܘܣ 12‏:35‏‐37

41ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܕܵܐܟ݂ܝܼ ܟܹܐ ܐܵܡܪܝܼ ܣܵܦܪܹ̈ܐ ܕܡܫܝܼܚܵܐ ܒܪܘܿܢܵܐ ܕܕܵܘܝܼܕ ܝܼܠܹܗ؟ 42”ܕܵܘܝܼܕ ܒܓܵܢܹܗ ܐ݇ܡܝܼܪܹܗ ܓܵܘ ܟܬܵܒ݂ܵܐ ܕܡܲܙܡܘܿܪܹ̈ܐ:

ܐ݇ܡܝܼܪܹܗ ܡܵܪܝܵܐ ܠܡܵܪܝܼ، ’ܝ݇ܬܘܿܒ݂ ܡ̣ܢ ܝܲܡܝܼܢܝܼ،

43ܗܲܠ ܕܡܲܬܒܸܢ ܕܸܫܡܸܢܘܼ̈ܟ݂ ܟܘܼܒ݂ܫܵܐ ܬܚܘܿܬ ܐܲܩܠܵܬܘܼ̈ܟ݂.‘#ܡܙܡܘܪ̈ܐ 110‏:1

44”ܐܸܢ ܕܵܘܝܼܕ ܗܲܕܟ݂ܵܐ ܒܸܩܪܵܝܹܗ ܝܠܹܗ ܡܵܪܝܵܐ، ܕܵܐܟ݂ܝܼ ܒܸܬ ܗܵܘܹܐ ܒܪܘܿܢܹܗ؟“

ܝܼܫܘܿܥ ܡܲܢܟ݂ܘܼܣܹܐ ܠܣܵܦܪܹ̈ܐ

ܡܬܝ 23‏:1‏‐36؛ ܡܪܩܘܣ 12‏:38‏‐40؛ ܠܘܩܐ 11‏:37‏‐54

45ܘܟܲܕ ܟܠܹܗ ܥܲܡܵܐ ܒܸܫܡܵܥܵܐ، ܐ݇ܡܝܼܪܹܗ ܝܼܫܘܿܥ ܠܬܲܠܡܝܼܕܘܼ̈ܗܝ، 46”ܗܘܹܝܡܘܼܢ ܗܸܫܝܵܪ ܡ̣ܢ ܣܵܦܪܹ̈ܐ ܕܟܹܐ ܒܵܣܡܵܐ ܠܗܘܿܢ ܠܸܚܕܵܪܵܐ ܒܠܒ݂ܝܼܫܝܵܬܹ̈ܐ ܝܲܪ̈ܝܼܟܹܐ، ܘܟܹܐ ܡܲܚܸܒܝܼ ܫܠܵܡܵܐ ܒܫܘܼܩܹ̈ܐ، ܘܪܹܫܵܐ ܕܡܵܘܬܒܹ̈ܐ ܓܵܘ ܟܢܘܼܫܝܵܬܹ̈ܐ ܘܒܡܸܫܬܘܼܝܵܬܹ̈ܐ. 47”ܟܹܐ ܐܵܟ݂ܠܝܼ ܒܵܬܹ̈ܐ ܕܐܲܪ̈ܡܸܠܝܵܬܹܐ ܘܡܲܚܙܝܼ ܓܵܢܲܝܗܝ ܒܡܲܪܝܲܟ݂ܬܵܐ ܕܨܠܵܘܵܬܲܝ̈ܗܝ ܒܕܲܓܵܠܘܼܬܵܐ. ܐܲܢܹܐ ܒܸܬ ܦܵܝܫܝܼ ܕܝܼܢܹܐ ܒܩܸܫܝܘܼܬܵܐ.“

Currently Selected:

ܠܘܩܐ 20: ABTAB

Highlight

Copy