ܠܘܩܐ 4

ܣܵܛܵܢܵܐ ܓ̰ܲܪܘܼܒܹܐ ܠܝܼܫܘܿܥ

ܡܬܝ 4‏:1‏‐11؛ ܡܪܩܘܣ 1‏:12‏‐13

1ܕܝܼܪܹܗ ܝܼܫܘܿܥ ܡ̣ܢ ܝܘܿܪܕܢܵܢ ܡܸܠܝܵܐ ܡ̣ܢ ܪܘܼܚܵܐ ܕܩܘܼܕܫܵܐ، ܘܠܘܼܒܸܠ ܠܹܗ ܐܸܠܹܗ ܪܘܼܚܵܐ ܠܒܲܪܝܼܵܐ، 2ܐܲܪܒܥܝܼ ܝܵܘܡܵܢܹ̈ܐ ܦܝܼܫ ܠܹܗ ܓ̰ܘܼܪܒܵܐ ܡ̣ܢ ܐܵܟܹܠܩܲܪܨܵܐ. ܠܵܐ ܐ݇ܟ݂ܝܼܠ ܠܹܗ ܡܸܢܕܝܼ ܒܐܵܢܝܼ ܝܵܘܡܵܢܹ̈ܐ، ܘܐܝܼܡܲܢ ܕܬܘܼܡܸܡ ܠܗܘܿܢ، ܒܚܲܪܬܵܐ ܟܦܝܼܢܹܗ. 3ܘܐ݇ܡܝܼܪܹܗ ܐܸܠܹܗ ܐܵܟܹܠܩܲܪܨܵܐ، ”ܐܸܢ ܒܪܘܿܢܵܐ ܕܐܲܠܵܗܵܐ ܝܘܸܬ، ܦܩܘܿܕ ܠܐܵܗܵܐ ܟܹܐܦܵܐ ܕܗܵܘܹܐ ܠܲܚܡܵܐ.“ 4ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ ܐܸܠܹܗ، ”ܟܬܝܼܒ݂ܵܐ ܝܠܹܗ:

ܠܹܐ ܝܠܵܗ̇ ܒܠܲܚܡܵܐ ܐܲܚܟ̰ܝܼ ܕܟܹܐ ܚܵܝܹܐ ܒܲܪܢܵܫܵܐ، ܐܸܠܵܐ ܒܟܠ ܗܹܡܸܙܡܵܢ ܕܐܲܠܵܗܵܐ.“#ܬܢܝܢ ܢܡܘܣܐ 8‏:3

5ܘܡܘܼܐܣܸܩ ܠܹܗ ܐܸܠܹܗ ܐܵܟܹܠܩܲܪܨܵܐ ܠܛܘܼܪܵܐ ܪܵܡܵܐ، ܘܡܘܼܚܙܹܐ ܠܹܗ ܐܸܠܹܗ ܟܠܲܝܗܝ ܡܲܠܟܘܵܬܹ̈ܐ ܕܐܲܪܥܵܐ ܒܥܕܵܢܵܐ ܟܪܝܼܬܵܐ، 6ܘܐ݇ܡܝܼܪܹܗ ܐܸܠܹܗ، ”ܐܸܠܘܼܟ݂ ܒܸܬ ܝܵܗ݇ܒܹܢ ܟܠܹܗ ܐܵܗܵܐ ܫܘܼܠܛܵܢܵܐ ܘܚܸܩܪܵܐ ܕܐܲܢܹܐ ܡܲܠܟܘܵܬܹ̈ܐ، ܣܵܒܵܒ ܐܸܠܝܼ ܦܝܼܫܵܐ ܝܠܹܗ ܣܘܼܦܝܵܐ، ܘܠܡ̇ܢ ܕܒܵܥܹܝܢ ܒܸܬ ܝܵܗ݇ܒܹܢܹܗ، 7”ܐܸܢ ܟܵܝܦܹܬ ܘܣܵܓ݂ܕܹܬ ܐܸܠܝܼ، ܐܸܠܘܼܟ݂ ܒܸܬ ܝܵܗ݇ܒܹܢܹܗ ܟܠܹܗ.“ 8ܐܝܼܢܵܐ ܝܼܫܘܿܥ ܓ̰ܘܼܘܸܒ ܠܹܗ ܐܸܠܹܗ،

”ܟܬܝܼܒ݂ܵܐ ܝܠܹܗ: ܠܡܵܪܝܵܐ ܐܲܠܵܗܘܼܟ݂ ܣܵܓ݂ܕܹܬ، ܘܐܸܠܹܗ ܒܢܲܦ̮ܫܹܗ ܥܵܒ݂ܕܹܬ ܚܸܠܡܲܬ.“#ܬܢܝܢ ܢܡܘܣܐ 6‏:13

9ܗ̇ܝܓܵܗ ܠܘܼܒܸܠ ܠܹܗ ܐܸܠܹܗ ܣܵܛܵܢܵܐ ܠܐܘܿܪܸܫܠܸܡ، ܘܡܘܼܟܠܹܐ ܠܹܗ ܐܸܠܹܗ ܥܲܠ ܟܸܢܦܵܐ ܕܗܲܝܟܠܵܐ، ܘܐ݇ܡܝܼܪܹܗ ܐܸܠܹܗ، ”ܐܸܢ ܐܲܢ݇ܬ ܒܪܘܿܢܵܐ ܕܐܲܠܵܗܵܐ ܝܘܸܬ، ܪܲܦܝܼ ܠܵܗ̇ ܓܵܢܘܼܟ݂ ܠܠܬܸܚܬ،

10”ܣܵܒܵܒ ܟܬܝܼܒ݂ܵܐ ܝܠܹܗ:

ܒܸܬ ܦܵܩܹܕ ܠܡܲܠܲܐܟ݂ܘܼ̈ܗܝ ܕܢܵܛܪܝܼ ܠܘܼܟ݂،

11ܘܥܲܠ ܐܝܼܕܵܬܲܝ̈ܗܝ ܒܸܬ ܛܵܥܢܝܼ ܠܘܼܟ݂، ܕܠܵܐ ܬܲܪܩܸܠܵܐ ܒܟܹܐܦܵܐ ܐܲܩܠܘܼܟ݂.“#ܡܙܡܘܪ̈ܐ 91‏:11‏‐12

12ܐܝܼܢܵܐ ܝܼܫܘܿܥ ܓ̰ܘܼܘܸܒ ܠܹܗ ܘܐ݇ܡܝܼܪܹܗ ܐܸܠܹܗ،

”ܟܬܝܼܒ݂ܵܐ ܝܠܹܗ: ܠܵܐ ܓ̰ܲܪܒܸܬ ܠܡܵܪܝܵܐ ܐܲܠܵܗܘܼܟ݂.“#ܬܢܝܢ ܢܡܘܣܐ 6‏:16

13ܘܟܲܕ ܦܪܝܼܩ ܠܹܗ ܐܵܟܹܠܩܲܪܨܵܐ ܡ̣ܢ ܟܠܲܝܗܝ ܓ̰ܘܼܪ̈ܵܒܘܼܗܝ، ܫܒ݂ܝܼܩ ܠܹܗ ܠܝܼܫܘܿܥ ܩܵܐ ܚܲܕ ܙܲܒ݂ܢܵܐ.

ܝܼܫܘܿܥ ܒܸܦܠܵܚܵܐ ܓܵܘ ܓܠܝܼܠܵܐ

ܡܬܝ 4‏:12‏‐17؛ ܡܪܩܘܣ 1‏:14‏‐15

14ܝܼܫܘܿܥ ܕܝܼܪܹܗ ܠܓܠܝܼܠܵܐ ܒܚܲܝܠܵܐ ܕܪܘܼܚܵܐ، ܘܦܝܼܫ ܠܵܗ̇ ܫܡܝܼܥܬܵܐ ܒܘܼܬ ܕܝܼܹܗ ܒܟܠܹܗ ܐܲܬܪܵܐ ܘܒܟܠܲܝܗܝ ܓܹܒܵܢܹ̈ܐ. 15ܘܟܹܐ ܡܲܠܸܦ ܗ݇ܘܵܐ ܓܵܘ ܟܢܘܼܫܝܵܬܲܝ̈ܗܝ، ܘܟܹܐ ܦܵܐܹܫ ܗ݇ܘܵܐ ܚܩܝܼܪܵܐ ܡ̣ܢ ܟܠ ܐ݇ܢܵܫܵܐ.

ܝܼܫܘܿܥ ܓܵܘ ܟܢܘܼܫܬܵܐ ܒܢܵܨܪܲܬ

ܡܬܝ 13‏:53‏‐58؛ ܡܪܩܘܣ 6‏:1‏‐6

16ܐ݇ܬܹܐ ܠܹܗ ܝܼܫܘܿܥ ܠܢܵܨܪܲܬ ܐܲܝܟܵܐ ܕܝܼܗ݇ܘܵܐ ܓܘܼܪܘܸܣܵܐ، ܘܥܒ݂ܝܼܪܹܗ ܠܟܢܘܼܫܬܵܐ ܒܝܵܘܡܵܐ ܕܫܲܒܬܵܐ ܕܵܐܟ݂ܝܼ ܕܐܝܼܬ ܗ݇ܘܵܐ ܠܹܗ ܥܵܕܲܬ، ܘܩܝܼܡ ܠܹܗ ܠܸܩܪܵܝܵܐ. 17ܦܝܼܫ ܠܹܗ ܝܘܼܗ݇ܒ݂ܵܐ ܐܸܠܹܗ ܟܬܵܒ݂ܵܐ ܕܐܹܫܲܥܝܵܐ ܢܒ݂ܝܼܵܐ. ܦܬܝܼܚ ܠܹܗ ܟܬܵܒ݂ܵܐ ܘܡܘܼܫ݇ܟ̰ܸܚ ܠܹܗ ܕܘܼܟܵܐ ܐܲܝܟܵܐ ܕܟܬܝܼܒ݂ܵܐ ܝܠܹܗ:

18ܪܘܼܚܵܐ ܕܡܵܪܝܵܐ ܥܲܠܝܼ ܝܠܹܗ، ܣܵܒܵܒ ܩܲܡ ܡܵܫܹܚ ܠܝܼ ܕܡܲܟܪܸܙܸܢ ܠܡܸܣܟܹܢܹ̈ܐ، ܘܩܲܡ ܫܲܕܸܪܝܼ ܕܒܲܣܡܸܢ ܠܬܒ݂ܝܼܪܹ̈ܐ ܕܠܸܒܵܐ، ܘܡܲܟܪܸܙܸܢ ܚܹܐܪܘܼܬܵܐ ܠܐܲܣܝܼܪܹ̈ܐ، ܘܚܙܵܝܬܵܐ ܠܣܸܡܝܹ̈ܐ، ܘܚܹܐܪܘܼܬܵܐ ܠܡܘܼܠܝܸܨܹ̈ܐ،

19ܘܡܲܟܪܸܙܸܢ ܫܹܢ݇ܬܵܐ ܩܘܼܒܸܠܬܵܐ ܕܡܵܪܝܵܐ.#ܐܫܥܝܐ 61‏:1‏‐2

20ܟܪܝܼܟ݂ ܠܹܗ ܠܟܬܵܒ݂ܵܐ ܘܝܘܼܗ݇ܒܸܠ ܠܹܗ ܠܡܫܲܡܫܵܢܵܐ، ܘܝ݇ܬܝܼܒ݂ ܠܹܗ. ܘܟܠܲܝܗܝ ܐܵܢܝܼ ܕܝܼܗ݇ܘܵܘ ܓܵܘ ܟܢܘܼܫܬܵܐ ܚܵܝܪܝܼ ܗ݇ܘܵܘ ܒܝܼܹܗ. 21ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܐܸܕܝܘܿܡ ܦܝܼܫ ܠܹܗ ܬܘܼܡܸܡܵܐ ܐܵܗܵܐ ܟܬܵܒ݂ܵܐ ܐܲܝܟ݂ ܕܫܡܝܼܥ ܠܵܘܟ݂ܘܿܢ.“

22ܘܟܠܲܝܗܝ ܟܹܐ ܗܲܡܙܸܡܝܼ ܗ݇ܘܵܘ ܨܦܵܝܝܼ ܒܘܼܬ ܕܝܼܹܗ، ܘܥܲܓ̰ܒܝܼ ܗ݇ܘܵܘ ܒܗܹܡܸܙܡܵܢܹ̈ܐ ܕܫܵܦܵܩܲܬ ܕܦܵܠܛܝܼ ܗ݇ܘܵܘ ܡ̣ܢ ܦܘܼܡܹܗ، ܘܒܲܩܪܝܼ ܗ݇ܘܵܘ، ”ܠܹܐ ܝܠܹܗ ܐܵܗܵܐ ܒܪܘܿܢܵܐ ܕܝܵܘܣܸܦ؟“ 23ܓ̰ܘܼܘܸܒ ܠܹܗ ܐܸܠܲܝܗܝ ܝܼܫܘܿܥ، ”ܫܲܪܝܼܪܵܐܝܼܬ ܒܸܬ ܐܵܡܪܝܼܬܘܿܢ ܐܸܠܝܼ ܐܵܗܵܐ ܡܲܬܠܵܐ: ’ܐܵܣܝܵܐ ܒܲܣܸܡ ܓܵܢܘܼܟ݂.‘ ܘܒܸܬ ܐܵܡܪܝܼܬܘܿܢ، ’ܟܠ ܡܸܢܕܝܼ ܕܫܡܝܼܥ ܠܲܢ ܕܥܒ݂ܝܼܕ ܠܘܼܟ݂ ܒܟܦܲܪܢܵܚܘܿܡ، ܥܒ݂ܘܿܕ ܐܘܼܦ ܠܐܲܟ݂ܵܐ ܓܵܘ ܡܵܬܘܼܟ݂.‘“ 24ܗ̇ܝܓܵܗ ܝܼܫܘܿܥ ܐ݇ܡܝܼܪܹܗ ܐܸܠܲܝܗܝ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܠܲܝܬ ܢܒ݂ܝܼܵܐ ܕܦܵܐܹܫ ܩܘܼܒܠܵܐ ܓܵܘ ܡܕܝܼܢ݇ܬܹܗ. 25”ܒܫܲܪܝܼܪܘܼܬܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܪܵܒܵܐ ܐܲܪ̈ܡܸܠܝܵܬܹܐ ܐܝܼܬ ܗ݇ܘܵܘ ܓܵܘ ܝܼܣܪܵܝܹܠ ܒܝܵܘܡܵܢܹ̈ܐ ܕܐܹܠܝܼܵܐ ܢܒ݂ܝܼܵܐ ܐܝܼܡܲܢ ܕܫܡܲܝܵܐ ܠܵܐ ܝܘܼܗ݇ܒܸܠ ܠܵܗ̇ ܡܸܛܪܵܐ ܬܠܵܬ ܫܸܢܹ̈ܐ ܘܦܲܠܓܹܐ، ܘܗܘܹܐ ܠܹܗ ܟܸܦܢܵܐ ܓܘܼܪܵܐ ܒܟܠܵܗ̇ ܐܲܪܥܵܐ. 26”ܐܝܼܢܵܐ ܠܟܸܣ ܐܘܼܦ ܚܕܵܐ ܡܸܢܲܝܗܝ ܠܵܐ ܦܝܼܫ ܠܹܗ ܫܘܼܕܪܵܐ ܐܹܠܝܼܵܐ، ܫܒ݂ܘܿܩ ܡ̣ܢ ܠܟܸܣ ܚܕܵܐ ܒܲܟ݂ܬܵܐ ܐܲܪܡܸܠܬܵܐ، ܠܨܲܪܦܲܬ ܕܨܲܝܕܘܿܢ.#ܐ. ܡܠܟ̈ܐ 17‏:1‏‐16 27”ܘܪܵܒܵܐ ܓܸܪ̈ܒ݂ܵܢܹܐ ܐܝܼܬ ܗ݇ܘܵܘ ܓܵܘ ܝܼܣܪܵܝܹܠ ܒܝܵܘܡܵܢܹ̈ܐ ܕܐܹܠܝܼܫܲܥ ܢܒ݂ܝܼܵܐ، ܐܝܼܢܵܐ ܐܘܼܦ ܚܲܕ ܡܸܢܲܝܗܝ ܠܵܐ ܦܝܼܫ ܠܹܗ ܕܘܼܟ݂ܝܵܐ، ܐܸܠܵܐ ܢܲܥܡܵܢ ܐܵܪܵܡܵܝܵܐ.“#ܒ. ܡܠܟ̈ܐ 5‏:1‏‐14

28ܘܟܲܕ ܐܵܢܝܼ ܕܝܼܗ݇ܘܵܘ ܓܵܘ ܟܢܘܼܫܬܵܐ ܫܡܝܼܥ ܠܗܘܿܢ ܐܲܢܹܐ، ܦܝܼܫ ܠܗܘܿܢ ܡܸܠܝܹܐ ܚܸܡܬܵܐ ܟܠܲܝܗܝ. 29ܩܝܼܡ ܠܗܘܿܢ ܘܦܘܼܠܸܛ ܠܗܘܿܢ ܐܸܠܹܗ ܠܒܲܕܲܪ ܡ̣ܢ ܡܕܝܼܢ݇ܬܵܐ، ܘܡܘܼܐܬܹܐ ܠܗܘܿܢ ܐܸܠܹܗ ܠܓܒ݂ܝܼܢܵܐ ܕܛܘܼܪܵܐ ܐܲܝܟܵܐ ܕܡܕܝܼܢ݇ܬܲܝܗܝ ܒܢܝܼܬܵܐ ܝܗ݇ܘܵܐ ܥܲܠܘܼܗܝ، ܕܪܲܦܝܼ ܗ݇ܘܵܘ ܠܹܗ ܠܠܬܸܚܬ. 30ܐܝܼܢܵܐ ܗ̇ܘ ܥܒ݂ܝܼܪܹܗ ܡ̣ܢ ܓܵܘܲܝܗܝ ܘܐ݇ܙܝܼܠ ܠܹܗ.

ܝܼܫܘܿܥ ܦܲܠܘܼܛܹܐ ܕܲܝܘܵܐܓܵܘ ܟܦܲܪܢܵܚܘܿܡ

ܡܪܩܘܣ 1‏:21‏‐28

31ܘܨܠܹܐ ܠܹܗ ܝܼܫܘܿܥ ܠܟܦܲܪܢܵܚܘܿܡ، ܡܕܝܼܢ݇ܬܵܐ ܕܓܵܘ ܓܠܝܼܠܵܐ، ܘܡܲܠܸܦ ܗ݇ܘܵܐ ܠܗܘܿܢ ܒܝܵܘܡܵܢܹ̈ܐ ܕܫܲܒܬܵܐ. 32ܟܹܐ ܥܲܓ̰ܒܝܼ ܗ݇ܘܵܘ ܒܝܘܼܠܦܵܢܹܗ، ܣܵܒܵܒ ܐܝܼܬ ܗ݇ܘܵܐ ܫܘܼܠܛܵܢܵܐ ܒܗܹܡܸܙܡܵܢܘܼ̈ܗܝ. 33ܐܝܼܬ ܗ݇ܘܵܐ ܓܵܘ ܟܢܘܼܫܬܵܐ ܚܲܕ ܐ݇ܢܵܫܵܐ ܕܐܝܼܬ ܗ݇ܘܵܐ ܒܝܼܹܗ ܪܘܼܚܵܐ ܕܫܹܐܕܵܐ ܛܲܡܐܹܐ، ܘܡܘܼܩܘܸܚ ܠܹܗ ܒܩܵܠܵܐ ܪܵܡܵܐ، 34ܘܐ݇ܡܝܼܪܹܗ، ”ܫܒ݂ܘܿܩ ܠܲܢ، ܝܵܐ ܝܼܫܘܿܥ ܢܵܨܪܵܝܵܐ. ܡܵܐ ܠܘܼܟ݂ ܡܸܢܲܢ، ܐ݇ܬܹܐ ܠܘܼܟ݂ ܠܛܲܠܘܼܩܲܢ؟ ܒܝܼܕܵܥܵܐ ܝܘܸܢ ܡܵܢܝܼ ܝܘܸܬ، ܐܲܢ݇ܬ ܝܼܘܸܬ ܩܲܕܝܼܫܵܐ ܕܐܲܠܵܗܵܐ.“ 35ܐܝܼܢܵܐ ܝܼܫܘܿܥ ܢܓ̰ܝܼܘ ܠܹܗ ܒܝܼܹܗ ܘܐ݇ܡܝܼܪܹܗ، ”ܫܬܘܿܩ ܘܦܠܘܿܛ ܡܸܢܹܗ.“ ܘܪܘܼܦܹܐ ܠܹܗ ܐܸܠܹܗ ܫܹܐܕܵܐ ܒܹܝܬ݇ ܦܲܠܓܵܐ، ܘܦܠܝܼܛ ܠܹܗ ܡܸܢܹܗ، ܘܠܵܐ ܚܘܼܙܕܸܓ ܠܹܗ ܐܸܠܹܗ. 36ܥܘܼܓ̰ܵܒܵܐ ܓܘܼܪܵܐ ܕܒ݂ܝܼܩ ܠܹܗ ܠܟܠܲܝܗܝ، ܘܗܲܡܙܸܡܝܼ ܗ݇ܘܵܘ ܚܲܕ ܥܲܡ ܗ̇ܘ ܐ݇ܚܹܪ݇ܢܵܐ ܘܐܵܡܪܝܼ ܗ݇ܘܵܘ، ”ܟܡܵܐ ܚܲܝܠܵܢܹ̈ܐ ܝܢܵܐ ܗܹܡܸܙܡܵܢܘܼ̈ܗܝ؟ ܒܫܘܼܠܛܵܢܵܐ ܘܒܚܲܝܠܵܐ ܒܸܦܩܵܕܵܐ ܝܠܹܗ ܠܪ̈ܘܼܚܹܐ ܛܲܡ̈ܐܹܐ ܘܒܸܦܠܵܛܵܐ ܝܢܵܐ.“ 37ܘܦܪܝܼܣ ܠܹܗ ܚܲܒܪܵܐ ܒܘܼܬ ܕܝܼܹܗ ܒܟܠܹܗ ܐܲܬܪܵܐ ܕܚܵܕܸܪ̈ܘܵܢܲܝܗܝ.

ܝܼܫܘܿܥ ܡܫܝܼܚܵܐ ܒܲܣܘܼܡܹܐ ܚܡܵܬܵܐ ܕܫܸܡܥܘܿܢ ܟܹܐܦܵܐ

ܡܬܝ 8‏:14‏‐17؛ ܡܪܩܘܣ 1‏:29‏‐34

38ܦܠܝܼܛ ܠܹܗ ܝܼܫܘܿܥ ܡ̣ܢ ܟܢܘܼܫܬܵܐ، ܘܥܒ݂ܝܼܪܹܗ ܠܒܲܝܬܵܐ ܕܫܸܡܥܘܿܢ ܟܹܐܦܵܐ. ܘܚܡܵܬܵܐ ܕܫܸܡܥܘܿܢ ܡܪܝܼܥܬܵܐ ܝܗ݇ܘܵܐ ܒܚܲܡܚܲܡܬܵܐ ܚܲܝܠܵܢܬܵܐ، ܘܐ݇ܡܝܼܪܗܘܿܢ ܐܸܠܹܗ ܒܘܼܬ ܕܝܼܘܼܗ̇. 39ܘܟܠܹܐ ܠܹܗ ܝܼܫܘܿܥ ܠܥܸܠܸܠ ܡܸܢܘܼܗ̇، ܘܢܓ̰ܝܼܘ ܠܹܗ ܒܚܲܡܚܲܡܬܵܐ ܘܩܲܡ ܫܵܒ݂ܩܵܐ ܠܵܗ̇. ܘܗܲܪ ܒܗ̇ܝ ܥܕܵܢܵܐ ܩܝܼܡ ܠܵܗ̇ ܘܥܒ݂ܝܼܕ ܠܵܗ̇ ܚܸܠܡܲܬ ܐܸܠܲܝܗܝ. 40ܘܒܓܢܵܝܬܵܐ ܕܫܸܡܫܵܐ، ܟܠܲܝܗܝ ܐܵܢܝܼ ܕܐܝܼܬ ܗ݇ܘܵܘ ܠܗܘܿܢ ܡܲܪ̈ܥܵܢܹܐ ܒܡܲܪ̈ܥܹܐ ܦܪ̈ܝܼܫܹܐ، ܡܘܼܐܬܝܲܝ ܠܗܘܿܢ ܠܟܸܣ ܠܹܗ. ܘܗ̇ܘ ܡܘܼܬܸܒ݂ ܠܹܗ ܐܝܼܕܹܗ ܥܲܠ ܟܠ ܚܲܕ ܡܸܢܲܝܗܝ ܘܒܘܼܣܡܲܝ ܠܹܗ. 41ܐܘܼܦ ܫܹܐܕܹ̈ܐ ܟܹܐ ܦܵܠܛܝܼ ܗ݇ܘܵܘ ܡ̣ܢ ܪܵܒܵܐ، ܘܡܲܩܘܸܚܝܼ ܗ݇ܘܵܘ، ܒܹܐܡܵܪܵܐ، ”ܐܲܢ݇ܬ ܝܼܘܸܬ ܡܫܝܼܚܵܐ، ܒܪܘܿܢܵܐ ܕܐܲܠܵܗܵܐ.“ ܐܝܼܢܵܐ ܗ̇ܘ ܟܹܐ ܡܲܢܟܸܣ ܗ݇ܘܵܐ ܠܗܘܿܢ ܘܠܹܐ ܫܵܒܹܩ ܗ݇ܘܵܐ ܕܗܲܡܙܸܡܝܼ ܗ݇ܘܵܘ، ܣܵܒܵܒ ܟܹܐ ܝܵܕܥܝܼ ܗ݇ܘܵܘ ܕܗ̇ܘ ܝܼܠܹܗ ܡܫܝܼܚܵܐ.

ܝܼܫܘܿܥ ܡܲܟܪܘܼܙܹܐܓܵܘ ܡܕܝܼܢܵܬܹ̈ܐ

ܡܪܩܘܣ 1‏:35‏‐39

42ܒܨܲܦܪܵܐ ܦܠܝܼܛ ܠܹܗ ܘܐ݇ܙܝܼܠ ܠܹܗ ܠܒܲܪܝܼܵܐ، ܘܟܸܢܫܹ̈ܐ ܛܵܥܝܼ ܗ݇ܘܵܘ ܒܵܬ݇ܪܹܗ. ܘܐ݇ܬܹܐ ܠܗܘܿܢ ܠܟܸܣ ܠܹܗ، ܘܕܒ݂ܝܼܩ ܠܗܘܿܢ ܐܸܠܹܗ ܕܠܵܐ ܐܵܙܹܠ ܗ݇ܘܵܐ ܡ̣ܢ ܠܟܸܣ ܠܲܝܗܝ. 43ܐܝܼܢܵܐ ܝܼܫܘܿܥ ܐ݇ܡܝܼܪܹܗ ܐܸܠܲܝܗܝ، ”ܘܵܠܹܐ ܝܠܵܗ̇ ܕܡܲܟܪܸܙܸܢ ܡܲܠܟܘܼܬܵܐ ܕܐܲܠܵܗܵܐ ܓܵܘ ܡܕܝܼܢܵܬܹ̈ܐ ܐ݇ܚܹܪ̈݇ܢܹܐ، ܣܵܒܵܒ ܒܘܼܬ ܐܵܗܵܐ ܦܝܼܫ ܠܝܼ ܫܘܼܕܪܵܐ.“ 44ܘܟܹܐ ܡܲܟܪܸܙ ܗ݇ܘܵܐ ܓܵܘ ܟܢܘܼܫܝܵܬܹ̈ܐ ܕܓܠܝܼܠܵܐ.

Currently Selected:

ܠܘܩܐ 4: ABTAB

Highlight

Copy