ܠܘܩܐ 5

ܥܵܓ̰ܸܒܘܼܬܵܐ ܕܕܒ݂ܵܩܬܵܐ ܕܢܘܼܢܹ̈ܐ

ܡܬܝ 4‏:18‏‐22؛ ܡܪܩܘܣ 1‏:16‏‐20

1ܟܠܹܐ ܠܹܗ ܝܼܫܘܿܥ ܥܲܠ ܡܲܪܙܵܐ ܕܝܵܡܵܐ ܕܓܹܢܹܣܲܪ، ܘܓ̰ܡܝܼܥ ܠܹܗ ܠܟܸܣ ܠܹܗ ܟܸܢܫܵܐ ܠܸܫܡܵܥܵܐ ܗܹܡܸܙܡܵܢ ܕܐܲܠܵܗܵܐ. 2ܘܚܙܹܐ ܠܹܗ ܬܲܪܬܹܝ ܓܵܡܝܼܹ̈ܐ ܟܸܠܝܹܐ ܥܲܠ ܡܲܪܙܵܐ ܕܝܵܡܵܐ، ܐܝܼܢܵܐ ܨܲܝܵܕܹ̈ܐ ܦܠܝܼܛܹܐ ܝܗ݇ܘܵܘ ܡ̣ܢ ܓܵܘܲܝܗܝ، ܘܚܲܠܘܼܠܹܐ ܝܗ݇ܘܵܘ ܓܲܪ̈ܕܲܝܗܝ. 3ܚܕܵܐ ܡ̣ܢ ܓܵܡܝܼܹ̈ܐ ܕܫܸܡܥܘܿܢ ܟܹܐܦܵܐ ܝܗ݇ܘܵܐ. ܐ݇ܣܝܼܩ ܠܹܗ ܝܼܫܘܿܥ ܘܝ݇ܬܝܼܒ݂ ܠܹܗ ܓܵܘܘܼܗ̇. ܘܛܠܝܼܒ ܠܹܗ ܡ̣ܢ ܫܸܡܥܘܿܢ ܕܪܲܚܩܸܢ ܗ݇ܘܵܐ ܡ̣ܢ ܒܸܪܙܵܐ ܠܓܵܘ ܝܵܡܵܐ. ܘܫܘܼܪܹܐ ܠܹܗ ܠܡܲܠܘܼܦܹܐ ܠܟܸܢܫܵܐ ܡ̣ܢ ܓܵܡܝܼ.

4ܐܝܼܡܲܢ ܕܦܪܝܼܩ ܠܹܗ ܡ̣ܢ ܡܲܠܘܼܦܹܐ، ܐ݇ܡܝܼܪܹܗ ܠܫܸܡܥܘܿܢ ܟܹܐܦܵܐ، ”ܛܪܹܝܡܘܼܢ ܓܵܡܝܼ ܠܕܘܼܟܵܐ ܥܲܡܘܼܩܬܵܐ، ܘܕܪܹܝܡܘܼܢ ܓܲܪܕܵܘܟ݂ܘܿܢ ܠܨܲܝܕܵܐ.“ 5ܓ̰ܘܼܘܸܒ ܠܹܗ ܫܸܡܥܘܿܢ ܟܹܐܦܵܐ، ”ܪܲܒܝܼ، ܟܠܹܗ ܠܲܝܠܹܐ ܟܟ̰ܝܼܚ ܠܲܢ ܘܡܸܢܕܝܼ ܠܵܐ ܕܒ݂ܝܼܩ ܠܲܢ، ܐܝܼܢܵܐ ܒܘܼܬ ܗܹܡܸܙܡܵܢܘܼܟ݂ ܒܸܬ ܕܵܪܹܝܢ ܠܓܲܪܕܵܐ.“ 6ܕܪܹܐ ܠܹܗ ܓܲܪܕܵܐ، ܘܕܒ݂ܝܼܩ ܠܗܘܿܢ ܢܘܼܢܹ̈ܐ ܪܵܒܵܐ، ܗܵܕܵܐ ܕܦܪܝܼܛ ܠܹܗ ܓܲܪܕܵܐ. 7ܘܩܪܹܐ ܠܗܘܿܢ ܠܚܲܒ݂ܪ̈ܵܘܵܬܲܝܗܝ ܒܓܵܡܝܼ ܐ݇ܚܹܪ݇ܬܵܐ ܕܐܵܬܝܼ ܗ݇ܘܵܘ ܘܗܲܝܸܪܝܼ ܗ݇ܘܵܘ ܠܗܘܿܢ. ܐ݇ܬܹܐ ܠܗܘܿܢ ܘܡܠܹܐ ܠܗܘܿܢ ܬܲܪܬܹܝ ܓܵܡܝܼܹ̈ܐ ܗܲܠ ܕܫܘܼܪܹܐ ܠܗܘܿܢ ܠܸܛܒܵܥܵܐ. 8ܐܝܼܡܲܢ ܕܚܙܹܐ ܠܹܗ ܫܸܡܥܘܿܢ ܟܹܐܦܵܐ ܐܵܗܵܐ، ܢܦܝܼܠ ܠܹܗ ܩܵܕ݇ܡ ܐܲܩܠܵܬܹ̈ܐ ܕܝܼܫܘܿܥ، ܘܐ݇ܡܝܼܪܹܗ ܐܸܠܹܗ، ”ܦܲܪܦܘܼܠܹܐ ܝܘܸܢ ܒܝܼܘܼܟ݂ ܡܵܪܝܼ ܕܪܵܚܩܹܬ ܡܸܢܝܼ، ܐ݇ܢܵܫܵܐ ܚܲܛܵܝܵܐ ܝܘܸܢ.“ 9ܐ݇ܡܝܼܪܹܗ ܐܵܗܵܐ ܣܵܒܵܒ ܥܘܼܓ̰ܸܒ ܠܹܗ ܗ̇ܘ ܘܟܠܲܝܗܝ ܐܵܢܝܼ ܕܥܲܡܹܗ ܥܲܠ ܨܲܝܕܵܐ ܕܢܘܼܢܹ̈ܐ ܕܕܒ݂ܝܼܩ ܠܗܘܿܢ. 10ܗܲܕܟ݂ܵܐ ܐܘܼܦ ܝܲܥܩܘܿܒ݂ ܘܝܘܿܚܲܢܵܢ ܒܢܘܿܢܹ̈ܐ ܕܙܲܒ݂ܕܲܝ ܕܝܼܗ݇ܘܵܘ ܦܲܠܵܚܹ̈ܐ ܥܲܡ ܫܸܡܥܘܿܢ ܟܹܐܦܵܐ ܥܘܼܓ̰ܸܒ ܠܗܘܿܢ. ܐ݇ܡܝܼܪܹܗ ܝܼܫܘܿܥ ܠܫܸܡܥܘܿܢ ܟܹܐܦܵܐ، ”ܠܵܐ ܙܵܕܥܹܬ، ܡ̣ܢ ܐܵܕܝܼܵܐ ܒܸܬ ܗܵܘܹܝܬ ܒܸܨܝܵܕܵܐ ܐ݇ܢܵܫܹ̈ܐ ܠܚܲܝܹ̈ܐ.“ 11ܐܝܼܡܲܢ ܕܡܘܼܐܬܲܝ ܠܗܘܿܢ ܓܵܡܝܼܹ̈ܐ ܠܡܲܪܙܵܐ، ܫܒ݂ܝܼܩ ܠܗܘܿܢ ܟܠ ܡܸܢܕܝܼ ܘܐ݇ܙܝܼܠ ܠܗܘܿܢ ܒܵܬ݇ܪܹܗ.

ܕܲܟ݂ܵܝܬܵܐ ܕܚܲܕ ܓܸܪܒ݂ܵܢܵܐ

ܡܬܝ 8‏:1‏‐4؛ ܡܪܩܘܣ 1‏:40‏‐45

12ܐܝܼܡܲܢ ܕܝܼܗ݇ܘܵܐ ܝܼܫܘܿܥ ܓܵܘ ܚܕܵܐ ܡ̣ܢ ܡܕܝܼܢܵܬܹ̈ܐ، ܐ݇ܬܹܐ ܠܹܗ ܠܟܸܣ ܠܹܗ ܚܲܕ ܐ݇ܢܵܫܵܐ ܓܸܪܒ݂ܵܢܵܐ. ܘܟܲܕ ܚܙܹܐ ܠܹܗ ܠܝܼܫܘܿܥ، ܢܦܝܼܠ ܠܹܗ ܥܲܠ ܦܵܬܹܗ، ܘܦܘܼܪܦܸܠ ܠܹܗ ܒܝܼܹܗ، ܒܹܐܡܵܪܵܐ، ”ܡܵܪܝܼ، ܐܸܢ ܒܵܥܹܝܬ، ܡܵܨܹܝܬ ܕܲܟܹܝܬ ܠܝܼ.“ 13ܦܘܼܫܛܵܐ ܠܹܗ ܐܝܼܕܹܗ ܝܼܫܘܿܥ ܘܕܩܝܼܪܹܗ ܒܝܼܹܗ ܘܐ݇ܡܝܼܪܹܗ، ”ܒܸܒܥܵܝܵܐ ܝܘܸܢ، ܦܘܼܫ ܕܸܟ݂ܝܵܐ.“ ܘܗܲܪ ܒܗ̇ܝ ܥܕܵܢܵܐ ܐ݇ܙܝܼܠ ܠܹܗ ܓܸܪܒܹܗ ܡܸܢܹܗ. 14ܘܦܩܝܼܕ ܠܹܗ ܐܸܠܹܗ ܝܼܫܘܿܥ، ”ܠܐ݇ܢܵܫܵܐ ܠܵܐ ܐܵܡܪܹܬ، ܐܸܠܵܐ ܙܹܠ݇ ܡܲܚܙܝܼ ܓܵܢܘܼܟ݂ ܠܟܵܗܢܵܐ، ܘܡܲܩܪܸܒ݂ ܒܘܼܬ ܕܲܟ݂ܵܝܬܘܼܟ݂ ܐܲܝܟ݂ ܕܦܩܝܼܕ ܠܹܗ ܡܘܼܫܹܐ، ܠܣܵܗܕܘܼܬܲܝܗܝ.“#ܟܗܢ̈ܐ 14‏:1‏‐32 15ܐܝܼܢܵܐ ܒܘܼܫ ܦܪܝܼܣ ܠܵܗ̇ ܗܹܡܸܙܡܵܢ ܒܘܼܬ ܕܝܼܹܗ. ܘܓ̰ܵܡܥܝܼ ܗ݇ܘܵܘ ܟܸܢܫܹ̈ܐ ܪܵܒܵܐ ܠܸܫܡܵܥܵܐ ܡܸܢܹܗ ܘܠܸܦܝܵܫܵܐ ܒܘܼܣܡܹܐ ܡ̣ܢ ܡܲܪ̈ܥܲܝܗܝ. 16ܐܝܼܢܵܐ ܗ̇ܘ ܦܠܝܼܛ ܠܹܗ ܠܒܲܪܝܼܵܐ ܠܨܲܠܘܼܝܹܐ.

ܝܼܫܘܿܥ ܒܲܣܘܼܡܹܐ ܚܲܕ ܫܦܝܼܠܵܐ

ܡܬܝ 9‏:1‏‐8؛ ܡܪܩܘܣ 2‏:1‏‐12

17ܟܲܕ ܡܲܠܘܼܦܹܐ ܝܗ݇ܘܵܐ ܝܼܫܘܿܥ ܒܚܲܕ ܡ̣ܢ ܝܵܘܡܵܢܹ̈ܐ، ܦܪ̈ܝܼܫܹܐ ܘܡܲܠܦܵܢܹ̈ܐ ܕܢܵܡܘܿܣܵܐ ܝ݇ܬܝܼܒܹܐ ܝܗ݇ܘܵܘ ܬܵܡܵܐ، ܐܵܢܝܼ ܕܐ݇ܬܝܼܹܐ ܝܗ݇ܘܵܘ ܡ̣ܢ ܟܠܲܝܗܝ ܡܕܝܼܢܵܬܹ̈ܐ ܕܓܠܝܼܠܵܐ، ܘܕܝܼܗܘܼܕ، ܘܡ̣ܢ ܐܘܿܪܸܫܠܸܡ، ܘܚܲܝܠܵܐ ܕܡܵܪܝܵܐ ܐܝܼܬ ܗ݇ܘܵܐ ܠܒܲܣܘܼܡܲܝ. 18ܘܗܵܐ ܚܲܕ݇ܟܡܵܐ ܐ݇ܢܵܫܹ̈ܐ ܡܘܼܐܬܹܐ ܠܗܘܿܢ ܚܲܕ ܫܦܝܼܠܵܐ ܥܲܠ ܫܘܝܼܬܵܐ، ܘܒܥܹܐ ܠܗܘܿܢ ܕܥܵܒ݂ܪܝܼ ܗ݇ܘܵܘ ܘܡܲܬܒ݂ܝܼ ܗ݇ܘܵܘ ܠܹܗ ܩܵܕ݇ܡ ܝܼܫܘܿܥ. 19ܐܝܼܢܵܐ ܐܝܼܡܲܢ ܕܠܵܐ ܡܘܼܫ݇ܟ̰ܸܚ ܠܗܘܿܢ ܐܘܼܪܚܵܐ ܕܥܵܒ݂ܪܝܼ ܗ݇ܘܵܘ ܒܘܼܬ ܟܸܢܫܵܐ ܪܵܒܵܐ، ܐ݇ܣܝܼܩ ܠܗܘܿܢ ܠܐ݇ܓܵܪܹܐ، ܓܘܼܠܹܐ ܠܗܘܿܢ ܠܫܟܘܼܪܹܐ ܘܦܘܼܫܸܛ ܠܗܘܿܢ ܐܸܠܹܗ ܥܲܡ ܫܘܝܼܬܹܗ ܒܒܹܝܬ݇ ܦܲܠܓܵܐ ܩܵܕ݇ܡ ܝܼܫܘܿܥ. 20ܟܲܕ ܚܙܹܐ ܠܹܗ ܝܼܫܘܿܥ ܗܲܝܡܵܢܘܼܬܲܝܗܝ، ܐ݇ܡܝܼܪܹܗ ܠܗ̇ܘ ܫܦܝܼܠܵܐ، ”ܝܵܐ ܐ݇ܢܵܫܵܐ، ܦܘܼܚܠܹܐ ܝܢܵܐ ܐܸܠܘܼܟ݂ ܚܛܝܼܵܬܘܼ̈ܟ݂.“ 21ܐܝܼܢܵܐ ܣܵܦܪܹ̈ܐ ܘܦܪ̈ܝܼܫܹܐ ܫܘܼܪܹܐ ܠܗܘܿܢ ܒܸܚܫܵܒ݂ܵܐ ܒܓܵܢܲܝܗܝ ܘܒܹܐܡܵܪܵܐ، ”ܡܵܢܝܼ ܝܠܹܗ ܐܵܗܵܐ ܕܒܸܓܕܵܦܵܐ ܝܠܹܗ؟ ܡܵܢܝܼ ܡܵܨܹܐ ܦܲܚܸܠ ܚܛܝܼܵܬܹ̈ܐ ܫܒ݂ܘܿܩ ܡ̣ܢ ܐܲܠܵܗܵܐ؟“ 22ܐܝܼܢܵܐ ܝܼܫܘܿܥ ܝ݇ܕܝܼܥ ܠܹܗ ܚܘܼܫܵܒܲܝ̈ܗܝ، ܘܒܘܼܩܸܪܹܗ ܡܸܢܲܝܗܝ، ”ܡܘܿܕܝܼ ܒܸܚܫܵܒ݂ܵܐ ܝܬܘܿܢ ܒܠܸܒܵܘܟ݂ܘܿܢ؟ 23”ܐܲܝܢܝܼ ܝܠܹܗ ܒܘܼܫ ܦܫܘܼܩܵܐ ܠܹܐܡܵܪܵܐ، ’ܦܘܼܚܠܹܐ ܝܢܵܐ ܐܸܠܘܼܟ݂ ܚܛܝܼܵܬܘܼ̈ܟ݂،‘ ܝܲܢ ܠܹܐܡܵܪܵܐ، ’ܩܘܼܡ ܚܕܘܿܪ؟‘ 24”ܐܝܼܢܵܐ ܕܝܵܕܥܝܼܬܘܿܢ ܕܒܪܘܿܢܵܐ ܕܐ݇ܢܵܫܵܐ ܐܝܼܬ ܠܹܗ ܫܘܼܠܛܵܢܵܐ ܥܲܠ ܐܲܪܥܵܐ ܕܦܲܚܸܠ ܚܛܝܼܵܬܹ̈ܐ“–ܐ݇ܡܝܼܪܹܗ ܠܫܦܝܼܠܵܐ، ”ܐܸܠܘܼܟ݂ ܒܹܐܡܵܪܵܐ ܝܘܸܢ، ܩܘܼܡ، ܫܩܘܿܠ ܫܘܝܼܬܘܼܟ݂ ܘܙܹܠ݇ ܠܒܲܝܬܘܼܟ݂.“ 25ܘܩܝܼܡ ܠܹܗ ܗܲܪ ܒܗ̇ܝ ܥܕܵܢܵܐ ܩܵܕ݇ܡ ܥܲܝܢܲܝ̈ܗܝ، ܘܫܩܝܼܠ ܠܹܗ ܫܘܝܼܬܹܗ ܘܐ݇ܙܝܼܠ ܠܹܗ ܠܒܲܝܬܹܗ ܟܲܕ ܫܲܒܘܼܚܹܐ ܠܐܲܠܵܗܵܐ. 26ܟܠܲܝܗܝ ܥܘܼܓ̰ܸܒ ܠܗܘܿܢ، ܫܘܼܒܸܚ ܠܗܘܿܢ ܠܐܲܠܵܗܵܐ، ܘܦܝܼܫ ܠܗܘܿܢ ܡܸܠܝܹܐ ܙܕܘܼܥܬܵܐ ܘܐ݇ܡܝܼܪܗܘܿܢ، ”ܐܸܕܝܘܿܡ ܚܙܹܐ ܠܲܢ ܕܘܼܡܵܪܹ̈ܐ.“

ܝܼܫܘܿܥ ܒܸܩܪܵܝܵܐ ܠܠܹܘܝܼ (ܡܲܬܲܝ)

ܡܬܝ 9‏:9‏‐13؛ ܡܪܩܘܣ 2‏:13‏‐17

27ܡ̣ܢ ܒܵܬ݇ܪ ܐܲܢܹܐ، ܦܠܝܼܛ ܠܹܗ ܝܼܫܘܿܥ ܘܚܙܹܐ ܠܹܗ ܚܲܕ ܡܵܟ݂ܣܵܐ ܫܸܡܹܗ ܠܹܘܝܼ، ܝ݇ܬܝܼܒ݂ܵܐ ܓܵܘ ܒܹܝܬ ܡܵܟ݂ܣܹ̈ܐ، ܘܐ݇ܡܝܼܪܹܗ ܐܸܠܹܗ، ”ܬܵܐ ܒܵܬ݇ܪܝܼ.“ 28ܗ̇ܘ ܫܒ݂ܝܼܩ ܠܹܗ ܟܠ ܡܸܢܕܝܼ، ܩܝܼܡ ܠܹܗ ܘܐ݇ܙܝܼܠ ܠܹܗ ܒܵܬ݇ܪܹܗ. 29ܥܒ݂ܝܼܕ ܠܹܗ ܐܸܠܹܗ ܠܹܘܝܼ ܓܵܘ ܒܲܝܬܹܗ ܐܲܪܚܘܼܬܵܐ ܓܘܼܪܬܵܐ. ܘܐܝܼܬ ܗ݇ܘܵܐ ܟܸܢܫܵܐ ܪܵܒܵܐ ܕܡܵܟ݂ܣܹ̈ܐ ܘܕܐ݇ܚܹܪ̈݇ܢܹܐ ܝ݇ܬܝܼܒܹܐ ܠܣܘܼܦܪܵܐ ܥܲܡܲܝܗܝ. 30ܐܝܼܢܵܐ ܣܵܦܪܹ̈ܐ ܘܦܪ̈ܝܼܫܹܐ ܛܘܼܪܛܸܡ ܠܗܘܿܢ، ܘܐ݇ܡܝܼܪܗܘܿܢ ܠܬܲܠܡܝܼܕܘܼ̈ܗܝ، ”ܩܵܡܘܿܕܝܼ ܥܲܡ ܡܵܟ݂ܣܹ̈ܐ ܘܚܲܛܵܝܹ̈ܐ ܒܹܐܟ݂ܵܠܵܐ ܝܬܘܿܢ ܘܒܸܫܬܵܝܵܐ؟“ 31ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ ܐܸܠܲܝܗܝ، ”ܐܵܢܝܼ ܕܝܼܢܵܐ ܒܚܘܼܠܡܵܢܵܐ ܠܹܐ ܝܢܵܐ ܣܢܝܼܩܹܐ ܠܐܵܣܝܵܐ، ܐܸܠܵܐ ܐܵܢܝܼ ܕܚܸܪܒܵܐ ܡܪܝܼܥܹܐ ܝܢܵܐ. 32”ܠܵܐ ܐ݇ܬܹܐ ܠܝܼ ܕܩܵܪܹܝܢ ܠܙܲܕܝܼܩܹ̈ܐ، ܐܸܠܵܐ ܠܚܲܛܵܝܹ̈ܐ ܠܬܝܵܒ݂ܘܼܬܵܐ.“

ܡܲܬܠܵܐ ܕܓ̰ܘܼܠܵܐ ܘܓܘܼܕܹ̈ܐ

ܡܬܝ 9‏:14‏‐17؛ ܡܪܩܘܣ 2‏:18‏‐22

33ܐܝܼܢܵܐ ܐܵܢܝܼ ܐ݇ܡܝܼܪܗܘܿܢ ܐܸܠܹܗ، ”ܬܲܠܡܝܼ̈ܕܹܐ ܕܝܘܿܚܲܢܵܢ ܟܹܐ ܨܵܝܡܝܼ ܪܵܒܵܐ ܘܟܹܐ ܨܲܠܝܼ، ܘܗܵܕܵܐ ܐܘܼܦ ܕܦܪ̈ܝܼܫܹܐ، ܐܝܼܢܵܐ ܕܝܼܘܼܟ݂ ܟܹܐ ܐܵܟ݂ܠܝܼ ܘܫܵܬܝܼ؟“ 34ܓ̰ܘܼܘܸܒ ܠܹܗ ܐܸܠܲܝܗܝ ܝܼܫܘܿܥ، ”ܠܹܐ ܡܵܨܹܝܬܘܿܢ ܡܲܥܒܸܕܝܼܬܘܿܢ ܚܲܒ݂ܪ̈ܵܘܵܬܹܐ ܕܚܸܬܢܵܐ ܨܵܝܡܝܼ ܟܡܵܐ ܕܚܸܬܢܵܐ ܥܲܡܲܝܗܝ ܝܠܹܗ. 35”ܐܝܼܢܵܐ ܒܸܬ ܐܵܬܝܼ ܝܵܘܡܵܢܹ̈ܐ ܕܒܸܬ ܦܵܐܹܫ ܫܩܝܼܠܵܐ ܚܸܬܢܵܐ ܡܸܢܲܝܗܝ، ܗ̇ܝܓܵܗ ܒܸܬ ܨܵܝܡܝܼ.“

36ܘܐ݇ܡܝܼܪܹܗ ܐܸܠܲܝܗܝ ܡܲܬܠܵܐ، ”ܐ݇ܢܵܫܵܐ ܠܹܐ ܦܵܪܹܛ ܥܵܪܵܝܬܵܐ ܡ̣ܢ ܠܒ݂ܝܼܫܬܵܐ ܚܲܕܬܵܐ ܘܕܵܪܹܐ ܠܵܗ̇ ܥܲܠ ܓ̰ܘܼܠܵܐ ܥܲܬܝܼܩܵܐ. ܣܵܒܵܒ ܬܸܪܘܲܝܗܝ ܠܹܐ ܕܵܒ݂ܩܝܼ ܥܲܡ ܥܘܼܕܵܠܹ̈ܐ، ܘܥܲܬܝܼܩܵܐ ܒܸܬ ܟ̰ܲܢܟ̰ܸܪ ܠܚܵܕ݇ܬܵܐ. 37”ܘܠܹܐ ܕܵܪܹܐ ܐ݇ܢܵܫܵܐ ܚܲܡܪܵܐ ܚܵܕ݇ܬܵܐ ܓܵܘ ܓܘܼܕܹ̈ܐ ܥܲܬܝܼܩܹ̈ܐ، ܣܵܒܵܒ ܚܲܡܪܵܐ ܚܵܕ݇ܬܵܐ ܒܸܬ ܒܵܙܹܥ ܠܓܘܼܕܹ̈ܐ، ܘܚܲܡܪܵܐ ܒܸܬ ܬܵܦܹܟ݂، ܘܓܘܼܕܹ̈ܐ ܒܸܬ ܚܵܪܒ݂ܝܼ. 38ܐܝܼܢܵܐ ܟܹܐ ܕܵܪܝܼ ܚܲܡܪܵܐ ܚܵܕ݇ܬܵܐ ܒܓܘܼܕܹ̈ܐ ܚܵܕ݇ܬܹ̈ܐ، ܘܬܸܪܘܲܝܗܝ ܟܹܐ ܦܵܝܫܝܼ ܢܛܝܼܪܹܐ. 39ܘܐ݇ܢܵܫܵܐ ܠܹܐ ܒܵܥܹܐ ܕܫܵܬܹܐ ܚܲܡܪܵܐ ܚܵܕ݇ܬܵܐ ܡ̣ܢ ܒܵܬ݇ܪ ܕܗܵܘܹܐ ܫܸܬܝܵܐ ܚܲܡܪܵܐ ܥܲܬܝܼܩܵܐ، ܣܵܒܵܒ ܟܹܐ ܐܵܡܹܪ ܕܥܲܬܝܼܩܵܐ ܒܘܼܫ ܒܲܣܝܼܡܵܐ ܝܠܹܗ.“

Currently Selected:

ܠܘܩܐ 5: ABTAB

Highlight

Copy