ܡܬܝ 26

ܝܗܘܼܕܵܝܹ̈ܐ ܒܸܒܥܵܝܵܐܕܩܵܛܠܝܼ ܠܝܼܫܘܿܥ

ܡܪܩܘܣ 14‏:1‏‐2؛ ܠܘܩܐ 22‏:1‏‐2؛ ܝܘܚܢܢ 11‏:45‏‐53

1ܟܲܕ ܬܘܼܡܸܡ ܠܹܗ ܝܼܫܘܿܥ ܟܠܲܝܗܝ ܗܹܡܸܙܡܵܢܘܼ̈ܗܝ، ܐ݇ܡܝܼܪܹܗ ܠܬܲܠܡܝܼܕܘܼ̈ܗܝ: 2”ܒܝܼܕܵܥܵܐ ܝܬܘܿܢ ܕܡ̣ܢ ܒܵܬ݇ܪ ܬܪܹܝ ܝܵܘܡܵܢܹ̈ܐ ܒܸܬ ܗܵܘܹܐ ܥܹܐܕܵܐ ܕܦܸܨܚܵܐ، ܘܒܪܘܿܢܵܐ ܕܐ݇ܢܵܫܵܐ ܒܸܬ ܦܵܐܹܫ ܣܘܼܦܝܵܐ ܘܒܸܬ ܦܵܐܹܫ ܡܸܚܝܵܐ ܠܙܩܝܼܦܵܐ.“#ܡܦܩܢܐ 12‏:1‏‐27

3ܗ̇ܝܓܵܗ ܓ̰ܡܝܼܥ ܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܘܚܘܵܪ̈ܕܸܩܢܹܐ ܕܥܲܡܵܐ ܓܵܘ ܕܵܪܬܵܐ ܕܓܘܼܪܵܐ ܕܟܵܗܢܹ̈ܐ، ܫܸܡܹܗ ܩܲܝܵܦܵܐ. 4ܘܟܠܲܝܗܝ ܣܘܼܙܓܸܪܗܘܿܢ ܥܲܡ ܥܘܼܕܵܠܹ̈ܐ ܕܒܦܸܠܡܵܐ ܕܵܒ݂ܩܝܼ ܠܝܼܫܘܿܥ ܘܩܵܛܠܝܼ ܠܹܗ. 5ܐܝܼܢܵܐ ܐ݇ܡܝܼܪܗܘܿܢ، ”ܠܵܐ ܒܥܹܐܕܵܐ، ܕܠܵܐ ܗܵܘܹܐ ܫܓ݂ܘܼܫܝܵܐ ܓܵܘ ܥܲܡܵܐ.“

ܡܲܪܝܲܡ ܒܸܡܫܵܚܵܐ ܠܝܼܫܘܿܥ

ܡܪܩܘܣ 14‏:3‏‐9؛ ܝܘܚܢܢ 12‏:1‏‐8

6ܘܐ݇ܬܹܐ ܠܹܗ ܝܼܫܘܿܥ ܠܒܹܝܬ ܥܲܢܝܵܐ، ܘܥܒ݂ܝܼܪܹܗ ܓܵܘ ܒܲܝܬܵܐ ܕܫܸܡܥܘܿܢ ܓܸܪܒ݂ܵܢܵܐ. 7ܐ݇ܬܹܐ ܠܵܗ̇ ܠܟܸܣ ܠܹܗ ܚܕܵܐ ܒܲܟ݂ܬܵܐ ܘܥܲܡܘܼܗ̇ ܚܕܵܐ ܫܵܛܝܼܦܬܵܐ ܕܡܸܫܚܵܐ ܕܒܸܣܡܵܐ ܪܵܒܵܐ ܛܝܼܡܵܢܵܐ، ܫܘܼܦܸܟ݂ ܠܵܗ̇ ܥܲܠ ܪܹܫܵܐ ܕܝܼܫܘܿܥ ܟܲܕ ܗ̇ܘ ܝ݇ܬܝܼܒ݂ܵܐ ܠܣܘܼܦܪܵܐ. 8ܐܝܼܢܵܐ ܬܲܠܡܝܼܕܘܼ̈ܗܝ ܟܲܕ ܚܙܹܐ ܠܗܘܿܢ ܐܵܗܵܐ، ܟܪܝܼܒ ܠܗܘܿܢ ܘܐ݇ܡܝܼܪܗܘܿܢ، ”ܩܵܡܘܿܕܝܼ ܟܠܹܗ ܐܵܗܵܐ ܚܘܼܣܪܵܢܵܐ؟ 9”ܣܵܒܵܒ ܘܵܠܹܐ ܝܗ݇ܘܵܐ ܕܦܵܐܹܫ ܗ݇ܘܵܐ ܙܘܼܒܢܵܐ ܐܵܗܵܐ ܡܸܫܚܵܐ ܒܙܘܼܙܹ̈ܐ ܪܵܒܵܐ ܘܝܘܼܗ݇ܒ݂ܵܐ ܠܡܸܣܟܹܢܹ̈ܐ.“

10ܐܝܼܢܵܐ ܝܼܫܘܿܥ ܝ݇ܕܝܼܥ ܠܹܗ ܘܐ݇ܡܝܼܪܹܗ ܐܸܠܲܝܗܝ، ”ܩܵܡܘܿܕܝܼ ܡܲܠܝܘܼܨܹܐ ܝܬܘܿܢ ܠܐܵܗܵܐ ܒܲܟ݂ܬܵܐ؟ ܦܘܼܠܚܵܢܵܐ ܛܵܒ݂ܵܐ ܥܒ݂ܝܼܕ ܠܵܗ̇ ܐܸܠܝܼ. 11”ܡܸܣܟܹܢܹ̈ܐ ܒܟܠ ܙܲܒ݂ܢܵܐ ܥܲܡܵܘܟ݂ܘܿܢ ܝܼܢܵܐ، ܐܝܼܢܵܐ ܐܵܢܵܐ ܠܹܐ ܝܘܸܢ ܥܲܡܵܘܟ݂ܘܿܢ ܒܟܠ ܙܲܒ݂ܢܵܐ.#ܬܢܝܢ ܢܡܘܣܐ 15‏:11 12”ܐܵܗܵܐ ܒܲܟ݂ܬܵܐ ܫܘܼܦܸܟ݂ ܠܵܗ̇ ܐܵܗܵܐ ܒܸܣܡܵܐ ܥܲܠ ܦܲܓ݂ܪܝܼ، ܐܲܝܟ݂ ܕܐܸܢ ܥܲܠ ܩܒ݂ܵܪܬܝܼ ܥܒ݂ܝܼܕ ܠܵܗ̇. 13”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܒܟܠ ܥܕܵܢܵܐ ܕܦܵܐܹܫ ܡܘܼܟܪܸܙܵܐ ܐܵܗܵܐ ܐܹܘܲܢܓܲܠܝܼܘܿܢ ܒܟܠܵܗ̇ ܕܘܼܢܝܹܐ، ܒܸܬ ܦܵܐܹܫ ܡܘܼܕܟܸܪܵܐ ܐܵܗܵܐ ܡܸܢܕܝܼ ܕܥܒ݂ܝܼܕ ܠܵܗ̇ ܐܵܗܵܐ ܒܲܟ݂ܬܵܐ.“

ܝܼܗܘܼܕܵܐ ܣܟܲܪܝܘܿܛܵܐܣܲܦܘܼܝܹܐ ܠܝܼܫܘܿܥ

ܡܪܩܘܣ 14‏:10‏‐11؛ ܠܘܩܐ 22‏:3‏‐6

14ܗ̇ܝܓܵܗ ܐ݇ܙܝܼܠ ܠܹܗ ܚܲܕ ܡ̣ܢ ܬܪܸܥܣܲܪ ܬܲܠܡܝܼ̈ܕܹܐ، ܫܸܡܹܗ ܝܼܗܘܼܕܵܐ ܣܟܲܪܝܘܿܛܵܐ، ܠܟܸܣ ܓܘܼܪ̈ܵܢܹܐ ܕܟܵܗܢܹ̈ܐ، 15ܘܐ݇ܡܝܼܪܹܗ ܐܸܠܲܝܗܝ، ”ܡܘܿܕܝܼ ܒܸܬ ܝܵܗ݇ܒ݂ܝܼܬܘܿܢ ܠܝܼ ܕܣܲܦܸܝܢܹܗ ܐܸܠܵܘܟ݂ܘܿܢ؟“ ܘܐܵܢܝܼ ܥܒ݂ܝܼܕ ܠܗܘܿܢ ܩܵܘܠܵܐ ܥܲܡܹܗ ܕܒܸܬ ܝܵܗ݇ܒ݂ܝܼ ܠܹܗ ܬܠܵܬܝܼ ܙܘܼܙܹ̈ܐ ܕܣܹܐܡܵܐ.#ܙܟ݂ܪܝܐ 11‏:12 16ܘܡ̣ܢ ܗ̇ܘ ܝܵܘܡܵܐ ܗܘܹܐ ܠܹܗ ܒܸܛܥܵܝܵܐ ܠܦܸܪܣܲܬ ܕܣܲܦܹܐ ܗ݇ܘܵܐ ܠܹܗ.

ܗܵܕܲܪܬܵܐ ܩܵܐ ܥܹܐܕܵܐ ܕܦܸܨܚܵܐ

ܡܪܩܘܣ 14‏:12‏‐21؛ ܠܘܩܐ 22‏:7‏‐14؛ ܝܘܚܢܢ 13‏:21‏‐30

17ܒܝܵܘܡܵܐ ܩܵܕ݇ܡܵܝܵܐ ܕܦܲܛܝܼܪܹ̈ܐ ܐ݇ܬܹܐ ܠܗܘܿܢ ܬܲܠܡܝܼ̈ܕܹܐ ܠܟܸܣ ܝܼܫܘܿܥ ܘܒܘܼܩܸܪܗܘܿܢ ܡܸܢܹܗ، ”ܐܲܝܟܵܐ ܒܵܥܹܝܬ ܕܗܲܕܪܲܚ ܐܸܠܘܼܟ݂ ܕܐܵܟ݂ܠܹܬ ܦܸܨܚܵܐ؟“ 18ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ ܐܸܠܲܝܗܝ، ”ܙܹܠ݇ܡܘܼܢ ܠܡܕܝܼܢ݇ܬܵܐ ܠܟܸܣ ܦܸܠܵܢ، ܘܐ݇ܡܘܿܪܘܼܢ ܐܸܠܹܗ: ’ܪܲܒܝܼܲܢ ܒܹܐܡܵܪܵܐ ܝܠܹܗ، ܥܕܵܢܝܼ ܡܛܹܐ ܠܵܗ̇، ܒܵܥܹܝܢ ܥܵܒ݂ܕܹܢ ܦܸܨܚܵܐ ܠܟܸܣ ܠܘܼܟ݂ ܥܲܡ ܬܲܠܡܝܼܕܝܼ̈.‘“ 19ܘܥܒ݂ܝܼܕ ܠܗܘܿܢ ܬܲܠܡܝܼ̈ܕܹܐ ܐܲܝܟ݂ ܕܦܩܝܼܕܲܝ ܠܹܗ ܝܼܫܘܿܥ، ܘܗܘܼܕܸܪܗܘܿܢ ܦܸܨܚܵܐ.

20ܐܝܼܡܲܢ ܕܗܘܹܐ ܠܹܗ ܪܲܡܫܵܐ، ܝ݇ܬܝܼܒ݂ܵܐ ܝܗ݇ܘܵܐ ܝܼܫܘܿܥ ܠܣܘܼܦܪܵܐ ܥܲܡ ܬܪܸܥܣܲܪ ܬܲܠܡܝܼܕܘܼ̈ܗܝ. 21ܘܟܲܕ ܒܹܐܟ݂ܵܠܵܐ ܝܗ݇ܘܵܘ، ܐ݇ܡܝܼܪܹܗ ܐܸܠܲܝܗܝ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܚܲܕ ܡܸܢܵܘܟ݂ܘܿܢ ܒܸܬ ܣܲܦܹܐ ܠܝܼ.“ 22ܦܫܝܼܡ ܠܗܘܿܢ ܪܵܒܵܐ، ܘܫܘܼܪܹܐ ܠܗܘܿܢ ܠܒܲܩܘܼܪܹܐ ܡܸܢܹܗ، ܚܲܕ ܒܚܲܕ، ”ܐܵܢܵܐ ܝܘܸܢ، ܡܵܪܝܼ؟“ 23ܘܗ̇ܘ ܓ̰ܘܼܘܸܒ ܠܹܗ ܘܐ݇ܡܝܼܪܹܗ، ”ܗ̇ܘ ܕܒܸܛܡܵܫܵܐ ܝܠܹܗ ܐܝܼܕܹܗ ܥܲܡܝܼ ܒܡܵܐܢܵܐ، ܗ̇ܘ ܒܸܬ ܣܲܦܹܐ ܠܝܼ.#ܡܙܡܘܪ̈ܐ 41‏:9 24”ܒܪܘܿܢܵܐ ܕܐ݇ܢܵܫܵܐ ܒܹܐܙܵܠܵܐ ܝܠܹܗ ܕܵܐܟ݂ܝܼ ܕܝܼܠܹܗ ܟܬܝܼܒ݂ܵܐ ܒܘܼܬ ܕܝܼܹܗ، ܐܝܼܢܵܐ ܘܵܝ ܠܗ̇ܘ ܐ݇ܢܵܫܵܐ ܕܒܐܝܼܕܹܗ ܦܵܐܹܫ ܣܘܼܦܝܵܐ ܒܪܘܿܢܵܐ ܕܐ݇ܢܵܫܵܐ. ܒܘܼܫ ܨܦܵܝܝܼ ܝܗ݇ܘܵܐ ܠܗ̇ܘ ܐ݇ܢܵܫܵܐ ܕܠܵܐ ܦܵܐܹܫ ܗ݇ܘܵܐ ܝ݇ܠܝܼܕܵܐ.“ 25ܒܘܼܩܸܪܹܗ ܝܼܗܘܼܕܵܐ ܣܲܦܝܵܢܵܐ ܘܐ݇ܡܝܼܪܹܗ، ”ܪܲܒܝܼ، ܐܵܢܵܐ ܝܘܸܢ؟“ ܓ̰ܘܼܘܸܒ ܠܹܗ ܝܼܫܘܿܥ، ”ܐܲܢ݇ܬ ܐ݇ܡܝܼܪܘܼܟ݂.“

ܝܼܫܘܿܥ ܫܲܬܐܘܼܣܹܐܐ݇ܟ݂ܵܠ݇ܪܲܡܫܵܐ ܕܡܵܪܲܢ

ܡܪܩܘܣ 14‏:22‏‐26؛ ܠܘܩܐ 22‏:15‏‐20؛ ܐ. ܩܘܪ̈ܢܬܝܐ 11‏:23‏‐25

26ܘܟܲܕ ܒܹܐܟ݂ܵܠܵܐ ܝܗ݇ܘܵܘ، ܫܩܝܼܠ ܠܹܗ ܝܼܫܘܿܥ ܠܲܚܡܵܐ ܘܒܘܼܪܸܟ݂ ܠܹܗ ܘܩܨܹܐ ܠܹܗ، ܘܝܘܼܗ݇ܒܸܠ ܠܹܗ ܠܬܲܠܡܝܼܕܘܼ̈ܗܝ ܘܐ݇ܡܝܼܪܹܗ، ”ܫܩܘܿܠܘܼܢ ܐ݇ܟ݂ܘܿܠܘܼܢ، ܐܵܗܵܐ ܝܠܹܗ ܦܲܓ݂ܪܝܼ.“ 27ܘܫܩܝܼܠ ܠܹܗ ܟܵܣܵܐ، ܘܫܘܼܟܸܪܹܗ ܘܝܘܼܗ݇ܒܸܠ ܠܹܗ ܐܸܠܲܝܗܝ ܘܐ݇ܡܝܼܪܹܗ، ”ܫܩܘܿܠܘܼܢ ܘܫܬܹܝܡܘܼܢ ܡܸܢܹܗ ܟܠܵܘܟ݂ܘܿܢ، 28”ܣܵܒܵܒ ܐܵܗܵܐ ܝܠܹܗ ܕܸܡܝܼ ܕܘܲܥܕܵܐ#ܐܪܡܝܐ 31‏:31‏‐34 ܚܵܕ݇ܬܵܐ ܕܡ̣ܢ ܓܹܒܵܐ ܕܪܵܒܵܐ ܦܝܵܫܵܐ ܝܠܹܗ ܫܘܼܦܟ݂ܵܐ ܠܦܘܼܚܵܠܵܐ ܕܚܛܝܼܵܬܹ̈ܐ. 29”ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܡ̣ܢ ܐܵܕܝܼܵܐ ܠܹܐ ܫܵܬܹܝܢ ܡ̣ܢ ܛܥܘܼܢܬܵܐ ܕܐܵܗܵܐ ܓܸܦܬܵܐ ܗܲܠ ܗ̇ܘ ܝܵܘܡܵܐ ܕܫܵܬܹܝܢܵܗ̇ ܚܲܕܬܵܐ ܥܲܡܵܘܟ݂ܘܿܢ ܒܡܲܠܟܘܼܬܵܐ ܕܒܵܒܝܼ.“ 30ܘܡ̣ܢ ܒܵܬ݇ܪ ܕܫܘܼܒܸܚ ܠܗܘܿܢ، ܦܠܝܼܛ ܠܗܘܿܢ ܘܐ݇ܙܝܼܠ ܠܗܘܿܢ ܠܛܘܼܪܵܐ ܕܙܲܝ̈ܬܹܐ.

ܝܼܫܘܿܥ ܒܹܐܡܵܪܵܐ ܕܫܸܡܥܘܿܢ ܟܹܐܦܵܐ ܒܸܬ ܣܵܪܹܒ݂ ܠܹܗ

ܡܪܩܘܣ 14‏:27‏‐31؛ ܠܘܩܐ 22‏:31‏‐34؛ ܝܘܚܢܢ 13‏:36‏‐38

31ܗ̇ܝܓܵܗ ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܟܠܵܘܟ݂ܘܿܢ ܒܸܬ ܫܵܒ݂ܩܝܼܬܘܿܢ ܠܝܼ ܒܐܵܗܵܐ ܠܲܝܠܹܐ. ܣܵܒܵܒ ܟܬܝܼܒ݂ܵܐ ܝܠܹܗ،

ܒܸܬ ܡܵܚܹܝܢ ܠܪܵܥܝܵܐ ܘܒܸܬ ܦܵܝܫܝܼ ܒܘܼܪܒܸܙܹܐ ܥܸܪ̈ܒܹܐ ܕܦܸܣܩܹܗ.#ܙܟ݂ܪܝܐ 13‏:7

32”ܐܝܼܢܵܐ ܡ̣ܢ ܒܵܬ݇ܪ ܕܦܵܝܫܹܢ ܡܘܼܩܸܡܵܐ، ܒܸܬ ܐܵܙܹܠ݇ܢ ܡܩܵܕ݇ܡ ܕܝܼܵܘܟ݂ܘܿܢ ܠܓܠܝܼܠܵܐ.“ 33ܓ̰ܘܼܘܸܒ ܠܹܗ ܫܸܡܥܘܿܢ ܟܹܐܦܵܐ ܘܐ݇ܡܝܼܪܹܗ ܐܸܠܹܗ، ”ܐܘܼܦ ܐܸܢ ܕܟܠܲܝܗܝ ܫܵܒ݂ܩܝܼ ܠܘܼܟ݂، ܐܵܢܵܐ ܠܹܐ ܫܵܒ݂ܩܹܢܘܼܟ݂.“ 34ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܘܼܟ݂، ܒܐܵܗܵܐ ܠܲܝܠܹܐ، ܡ̣ܢ ܩܵܕ݇ܡ ܕܩܵܪܹܐ ܩܵܪܘܿܝܵܐ، ܬܠܵܬ ܓܵܗܹ̈ܐ ܒܸܬ ܣܵܪܒܹܬ ܠܝܼ.“ 35ܐ݇ܡܝܼܪܹܗ ܐܸܠܹܗ ܫܸܡܥܘܿܢ ܟܹܐܦܵܐ، ”ܐܘܼܦ ܐܸܢ ܕܗܵܘܝܵܐ ܕܡܵܝܬܹܢ ܥܲܡܘܼܟ݂ ܠܹܐ ܣܵܪܒܹܢܘܼܟ݂.“ ܘܗܲܕܟ݂ܵܐ ܐ݇ܡܝܼܪܗܘܿܢ ܐܘܼܦ ܟܠܲܝܗܝ ܬܲܠܡܝܼ̈ܕܹܐ.

ܝܼܫܘܿܥ ܓܵܘ ܓܲܕܣܹܡܵܢ

ܡܪܩܘܣ 14‏:32‏‐42؛ ܠܘܩܐ 22‏:39‏‐46

36ܗ̇ܝܓܵܗ ܐ݇ܬܹܐ ܠܗܘܿܢ ܠܕܘܼܟܵܐ ܕܦܝܵܫܵܐ ܝܠܵܗ̇ ܩܪܝܼܬܵܐ ܓܲܕܣܹܡܵܢ، ܘܐ݇ܡܝܼܪܹܗ ܠܬܲܠܡܝܼܕܘܼ̈ܗܝ، ”ܝ݇ܬܘܿܒ݂ܘܼܢ ܐܲܚܬܘܿܢ ܠܐܲܟ݂ܵܐ ܗܲܠ ܕܐܵܙܹܠ݇ܢ ܘܨܲܠܹܝܢ ܨܠܘܿܬܵܐ.“ 37ܠܘܼܒܸܠ ܠܹܗ ܥܲܡܹܗ ܠܫܸܡܥܘܿܢ ܟܹܐܦܵܐ ܘܠܬܪܹܝ ܒܢܘܿܢܹ̈ܐ ܕܙܲܒ݂ܕܲܝ، ܘܫܘܼܪܹܐ ܠܹܗ ܠܸܦܫܵܡܵܐ ܘܒܸܥܒ݂ܵܪܵܐ ܒܥܵܘܩܵܢܵܐ. 38ܘܐ݇ܡܝܼܪܹܗ ܠܬܲܠܡܝܼܕܘܼ̈ܗܝ، ”ܦܫܝܼܡܬܵܐ ܝܠܵܗ̇ ܓܵܢܝܼ ܗܲܠ ܡܵܘܬܵܐ. ܟܠܹܝܡܘܼܢ ܠܐܲܟ݂ܵܐ ܘܥܒ݂ܘܿܕܘܼܢ ܫܵܗܲܪܬܵܐ ܥܲܡܝܼ.“ 39ܘܪܚܝܼܩ ܠܹܗ ܚܲܕ ܡܸܬܚܵܐ ܡܸܢܲܝܗܝ، ܘܢܦܝܼܠ ܠܹܗ ܥܲܠ ܦܵܬܹܗ ܘܨܘܼܠܹܐ ܠܹܗ، ܒܹܐܡܵܪܵܐ، ”ܝܵܐ ܒܵܒܝܼ، ܐܸܢ ܗܵܘܝܵܐ ܡܲܥܒܸܪ ܡܸܢܝܼ ܐܵܗܵܐ ܟܵܣܵܐ، ܐܝܼܢܵܐ ܠܵܐ ܐܲܝܟ݂ ܕܐܵܢܵܐ ܒܵܣܡܵܐ ܠܝܼ ܐܸܠܵܐ ܐܲܝܟ݂ ܕܐܲܢ݇ܬ ܒܵܣܡܵܐ ܠܘܼܟ݂.“ 40ܘܐ݇ܬܹܐ ܠܹܗ ܠܟܸܣ ܬܲܠܡܝܼܕܘܼ̈ܗܝ ܘܚܸܙܝܲܝ ܠܹܗ ܕܡܝܼܟܹܐ، ܘܐ݇ܡܝܼܪܹܗ ܠܫܸܡܥܘܿܢ ܟܹܐܦܵܐ، ”ܗܲܕܟ݂ܵܐ ܠܵܐ ܡܨܹܐ ܠܵܘܟ݂ܘܿܢ ܥܵܒ݂ܕܝܼܬܘܿܢ ܗ݇ܘܵܘ ܫܵܗܲܪܬܵܐ ܥܲܡܝܼ ܚܕܵܐ ܣܵܥܲܬ؟ 41”ܪܥܘܿܫܘܼܢ ܘܨܲܠܹܝܡܘܼܢ ܕܠܵܐ ܥܵܒ݂ܪܝܼܬܘܿܢ ܠܓ̰ܘܼܪܵܒܵܐ. ܪܘܼܚܵܐ ܟܹܐ ܒܵܥܝܵܐ، ܐܝܼܢܵܐ ܦܲܓ݂ܪܵܐ ܙܲܒܘܼܢ ܝܼܠܹܗ.“

42ܡܸܢܕܪܸܫ ܐ݇ܙܝܼܠ ܠܹܗ ܓܵܗܵܐ ܕܬܲܪܬܹܝ ܘܨܘܼܠܹܐ ܠܹܗ، ܒܹܐܡܵܪܵܐ، ”ܝܵܐ ܒܵܒܝܼ، ܐܸܢ ܠܹܐ ܗܵܘܝܵܐ ܕܥܵܒܹܪ ܡܸܢܝܼ ܐܵܗܵܐ ܟܵܣܵܐ ܐܸܠܵܐ ܕܫܵܬܹܝܢܹܗ، ܫܒ݂ܘܿܩ ܗܵܘܹܐ ܨܸܒ݂ܝܵܢܘܼܟ݂.“ 43ܘܐ݇ܬܹܐ ܠܹܗ ܡܸܢܕܪܸܫ ܘܚܸܙܝܲܝ ܠܹܗ ܕܡܝܼܟܹܐ ܣܵܒܵܒ ܥܲܝܢܲܝ̈ܗܝ ܝܘܼܩܪܸܢܹܐ ܝܗ݇ܘܵܘ ܒܫܸܢܬܵܐ. 44ܫܒ݂ܝܼܩܲܝ ܠܹܗ ܘܐ݇ܙܝܼܠ ܠܹܗ ܡܸܢܕܪܸܫ ܓܵܗܵܐ ܕܬܠܵܬ ܠܨܲܠܘܼܝܹܐ، ܘܬܸܢܝܵܐ ܠܹܗ ܗ̇ܝ ܗܹܡܸܙܡܵܢ ܩܵܕ݇ܡܵܝܬܵܐ. 45ܘܕܝܼܪܹܗ ܠܟܸܣ ܬܲܠܡܝܼܕܘܼ̈ܗܝ ܘܐ݇ܡܝܼܪܹܗ ܐܸܠܲܝܗܝ، ”ܕܡܘܿܟ݂ܘܼܢ ܐܵܕܝܼܵܐ ܘܡܲܢܝܸܚܘܼܢ، ܗܵܐ ܡܛܹܐ ܠܵܗ̇ ܣܵܥܲܬ ܕܒܪܘܿܢܵܐ ܕܐ݇ܢܵܫܵܐ ܦܵܐܹܫ ܣܘܼܦܝܵܐ ܒܐܝܼܕܵܬܹ̈ܐ ܕܚܲܛܵܝܹ̈ܐ. 46”ܩܘܼܡܘܼܢ ܕܐܵܙܲܠ݇ܚ، ܗܵܐ ܐ݇ܬܹܐ ܠܹܗ ܗ̇ܘ ܕܣܲܦܹܐ ܠܝܼ.“

ܣܲܦܵܝܬܵܐ ܘܕܒ݂ܵܩܬܵܐ ܕܝܼܫܘܿܥ

ܡܪܩܘܣ 14‏:43‏‐50؛ ܠܘܩܐ 22‏:47‏‐53؛ ܝܘܚܢܢ 18‏:3‏‐12

47ܟܲܕ ܝܼܫܘܿܥ ܗܲܡܙܘܼܡܹܐ ܝܗ݇ܘܵܐ، ܗܵܐ ܝܼܗܘܼܕܵܐ، ܚܲܕ ܡ̣ܢ ܬܪܸܥܣܲܪ ܬܲܠܡܝܼ̈ܕܹܐ ܘܟܸܢܫܵܐ ܪܵܒܵܐ ܥܲܡܹܗ، ܐ݇ܬܹܐ ܠܗܘܿܢ ܒܝܲܕ ܣܲܝܦܹ̈ܐ ܘܚܘܼܛܪܹ̈ܐ، ܫܘܼܕܪܹܐ ܒܝܲܕ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܕܥܲܡܵܐ. 48ܘܝܘܼܗ݇ܒ݂ܵܐ ܝܗ݇ܘܵܐ ܐܸܠܲܝܗܝ ܝܼܗܘܼܕܵܐ ܣܲܦܝܵܢܵܐ ܢܝܼܫܲܢܩܵܐ ܒܹܐܡܵܪܵܐ، ”ܠܗ̇ܘ ܕܢܵܫܩܹܢ، ܗ̇ܘ ܝܼܠܹܗ. ܕܵܒ݂ܩܝܼܬܘܿܢ ܠܹܗ.“ 49ܘܐ݇ܬܹܐ ܠܹܗ ܠܟܸܣ ܝܼܫܘܿܥ ܘܐ݇ܡܝܼܪܹܗ، ”ܫܠܵܡܵܐ ܐܸܠܘܼܟ݂، ܪܲܒܝܼ،“ ܘܢܫܝܼܩ ܠܹܗ. 50ܘܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܒܘܼܬ ܐܵܗܵܐ ܐ݇ܬܹܐ ܠܘܼܟ݂ ܚܲܒ݂ܪܝܼ؟“ ܗ̇ܝܓܵܗ ܩܘܼܪܒܸܢܗܘܿܢ ܘܕܒ݂ܝܼܩ ܠܗܘܿܢ ܠܝܼܫܘܿܥ. 51ܚܲܕ ܡ̣ܢ ܐܵܢܝܼ ܕܝܼܗ݇ܘܵܘ ܥܲܡ ܝܼܫܘܿܥ ܕܪܹܐ ܠܹܗ ܐܝܼܕܹܗ ܠܣܲܝܦܹܗ ܘܓܪܝܼܫ ܠܹܗ ܘܡܚܹܐ ܠܹܗ ܠܪܹܓܵܐ ܕܓܘܼܪܵܐ ܕܟܵܗܢܹ̈ܐ ܘܦܪܝܼܡܵܐ ܠܹܗ ܢܵܬܹܗ. 52ܐܝܼܢܵܐ ܝܼܫܘܿܥ ܐ݇ܡܝܼܪܹܗ ܐܸܠܹܗ، ”ܡܲܕܸܪ ܣܲܝܦܘܼܟ݂ ܠܕܘܼܟܹܗ، ܣܵܒܵܒ ܟܠܲܝܗܝ ܐܵܢܝܼ ܕܡܲܦܠܸܚܝܼ ܣܲܝܦܵܐ، ܒܣܲܝܦܵܐ ܒܸܬ ܡܵܝܬܝܼ. 53”ܒܸܚܫܵܒ݂ܵܐ ܝܘܸܬ ܠܹܐ ܡܵܨܹܝܢ ܛܵܠܒܹܢ ܡ̣ܢ ܒܵܒܝܼ ܕܗܲܪ ܐܵܕܝܼܵܐ ܫܲܕܸܪ ܐܸܠܝܼ ܙܵܘܕܵܐ ܡ̣ܢ ܬܪܸܥܣܲܪ ܠܸܓ݂ܝܘܿܢܹ̈ܐ ܕܡܲܠܲܐܟܹ̈ܐ؟ 54”ܐܝܼܢܵܐ ܕܵܐܟ݂ܝܼ ܒܸܬ ܦܵܝܫܝܼ ܬܘܼܡܸܡܹܐ ܟܬܵܒܹ̈ܐ ܕܒܹܐܡܵܪܵܐ ܝܢܵܐ ܘܵܠܹܐ ܝܠܵܗ̇ ܕܗܲܕܟ݂ܵܐ ܗܵܘܹܐ؟“

55ܒܗ̇ܝ ܥܕܵܢܵܐ ܐ݇ܡܝܼܪܹܗ ܝܼܫܘܿܥ ܠܟܸܢܫܵܐ، ”ܐܲܝܟ݂ ܕܥܲܠ ܓܹܢܵܒ݂ܵܐ ܦܠܝܼܛ ܠܵܘܟ݂ܘܿܢ ܒܣܲܝܦܹ̈ܐ ܘܒܚܘܼܛܪܹ̈ܐ ܠܸܕܒ݂ܵܩܝܼ؟ ܟܠ ܝܘܿܡ ܥܲܡܵܘܟ݂ܘܿܢ ܟܹܐ ܝܵܬܒܹܢ ܗ݇ܘܵܐ ܓܵܘ ܗܲܝܟܠܵܐ ܘܡܲܠܦܸܢ ܗ݇ܘܵܐ ܘܠܵܐ ܩܲܡ ܕܵܒ݂ܩܝܼܬܘܿܢ ܠܝܼ. 56”ܐܝܼܢܵܐ ܐܵܗܵܐ ܟܠܵܗ̇ ܗܘܹܐ ܠܵܗ̇ ܕܦܵܝܫܝܼ ܬܘܼܡܸܡܹܐ ܟܬܵܒܹ̈ܐ ܕܢܒ݂ܝܼܹ̈ܐ.“ ܗ̇ܝܓܵܗ ܬܲܠܡܝܼ̈ܕܹܐ ܟܠܲܝܗܝ ܫܒ݂ܝܼܩ ܠܗܘܿܢ ܐܸܠܹܗ ܘܥܪܝܼܩ ܠܗܘܿܢ.

ܝܼܫܘܿܥ ܩܵܕ݇ܡ ܩܲܝܵܦܵܐ ܓܘܼܪܵܐ ܕܟܵܗܢܹ̈ܐ

ܡܪܩܘܣ 14‏:53‏‐65؛ ܠܘܩܐ 22‏:54‏‐55، 22‏:63‏‐71؛ ܝܘܚܢܢ 18‏:13‏‐14، 18‏:19‏‐24

57ܘܐܵܢܝܼ ܕܕܒ݂ܝܼܩ ܠܗܘܿܢ ܠܝܼܫܘܿܥ ܠܘܼܒܸܠ ܠܗܘܿܢ ܐܸܠܹܗ ܠܟܸܣ ܩܲܝܵܦܵܐ، ܓܘܼܪܵܐ ܕܟܵܗܢܹ̈ܐ، ܐܲܝܟܵܐ ܕܣܵܦܪܹ̈ܐ ܘܚܘܵܪ̈ܕܸܩܢܹܐ ܓ̰ܡܝܼܥܹܐ ܝܗ݇ܘܵܘ. 58ܘܫܸܡܥܘܿܢ ܟܹܐܦܵܐ ܐ݇ܙܝܼܠ ܠܹܗ ܒܵܬ݇ܪܹܗ ܡ̣ܢ ܪܸܚܩܵܐ ܗܲܠ ܠܟܸܣ ܕܵܪܬܵܐ ܕܓܘܼܪܵܐ ܕܟܵܗܢܹ̈ܐ. ܘܥܒ݂ܝܼܪܹܗ ܓܵܘ ܕܵܪܬܵܐ ܘܝ݇ܬܝܼܒ݂ ܠܹܗ ܥܲܡ ܦܲܠܵܚܹ̈ܐ ܕܚܵܙܹܐ ܗ݇ܘܵܐ ܡܘܿܕܝܼ ܒܸܬ ܗܵܘܹܐ ܒܚܲܪܬܵܐ.

59ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܘܟܠܹܗ ܟܢܘܼܫܝܵܐ ܛܵܥܝܼ ܗ݇ܘܵܘ ܣܵܗܕܘܼܬܵܐ ܕܕܘܼܓܠܵܐ ܥܲܠ ܝܼܫܘܿܥ ܕܩܵܛܠܝܼ ܗ݇ܘܵܘ ܠܹܗ، 60ܘܠܵܐ ܡܘܼܫ݇ܟ̰ܸܚ ܠܗܘܿܢ. ܐ݇ܬܹܐ ܠܗܘܿܢ ܪܵܒܵܐ ܣܵܗܕܹ̈ܐ ܕܲܓܵܠܹ̈ܐ، ܐܝܼܢܵܐ ܒܚܲܪܬܵܐ ܐ݇ܬܹܐ ܠܗܘܿܢ ܬܪܹܝ ܣܵܗܕܹ̈ܐ، 61ܘܐ݇ܡܝܼܪܗܘܿܢ، ”ܐܵܗܵܐ ܐ݇ܢܵܫܵܐ ܐ݇ܡܝܼܪܹܗ، ’ܡܵܨܹܝܢ ܣܵܬܪܹܢ ܠܗܲܝܟܠܵܐ ܕܐܲܠܵܗܵܐ، ܘܒܬܠܵܬܵܐ ܝܵܘܡܵܢܹ̈ܐ ܒܵܢܹܝܢܹܗ.‘“

62ܘܩܝܼܡ ܠܹܗ ܓܘܼܪܵܐ ܕܟܵܗܢܹ̈ܐ ܘܒܘܼܩܸܪܹܗ ܡ̣ܢ ܝܼܫܘܿܥ، ”ܩܵܡܘܿܕܝܼ ܠܹܐ ܝܘܸܬ ܓ̰ܲܘܘܼܒܹܐ ܡܸܢܕܝܼ ܥܲܠ ܐܲܢܹܐ ܕܒܸܣܗܵܕܵܐ ܝܢܵܐ ܥܲܠܘܼܟ݂؟“ 63ܐܝܼܢܵܐ ܝܼܫܘܿܥ ܫܬܝܼܩܵܐ ܝܗ݇ܘܵܐ. ܘܗܘܼܡܙܸܡ ܠܹܗ ܓܘܼܪܵܐ ܕܟܵܗܢܹ̈ܐ ܘܐ݇ܡܝܼܪܹܗ ܐܸܠܹܗ، ”ܡܲܡܘܼܝܘܼܟ݂ ܝܼܘܸܢ ܒܐܲܠܵܗܵܐ ܚܵܝܵܐ ܕܐܵܡܪܹܬ ܠܲܢ، ܕܐܸܢ ܐܲܢ݇ܬ ܝܼܘܸܬ ܡܫܝܼܚܵܐ، ܒܪܘܿܢܵܐ ܕܐܲܠܵܗܵܐ.“ 64ܐ݇ܡܝܼܪܹܗ ܐܸܠܹܗ ܝܼܫܘܿܥ، ”ܐܲܢ݇ܬ ܐ݇ܡܝܼܪܘܼܟ݂. ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܡ̣ܢ ܐܵܕܝܼܵܐ ܒܸܬ ܚܵܙܹܝܬܘܿܢ ܠܒܪܘܿܢܵܐ ܕܐ݇ܢܵܫܵܐ ܝ݇ܬܝܼܒ݂ܵܐ ܡ̣ܢ ܝܲܡܝܼܢܵܐ ܕܚܲܝܠܵܐ ܘܒܹܐܬܵܝܵܐ ܥܲܠ ܥܢܵܢܵܐ ܕܫܡܲܝܵܐ.“#ܕܢܝܐܝܠ 7‏:13

65ܗ̇ܝܓܵܗ ܓܘܼܪܵܐ ܕܟܵܗܢܹ̈ܐ ܟ̰ܘܼܢܟ̰ܸܪܹܗ ܓ̰ܘܼܠܘܼ̈ܗܝ ܘܐ݇ܡܝܼܪܹܗ، ”ܓܕܝܼܦ ܠܹܗ! ܐ݇ܚܹܪ݇ܢܵܐ ܠܹܐ ܝܘܲܚ ܣܢܝܼܩܹܐ ܠܣܵܗܕܹ̈ܐ، ܐܵܕܝܼܵܐ ܫܡܝܼܥ ܠܵܘܟ݂ܘܿܢ ܓܘܼܕܵܦܹܗ. 66”ܡܘܿܕܝܼ ܒܸܚܫܵܒ݂ܵܐ ܝܬܘܿܢ؟“ ܓ̰ܘܼܘܸܒ ܠܗܘܿܢ ܘܐ݇ܡܝܼܪܗܘܿܢ، ”ܚܲܝܵܒ݂ܵܐ ܝܠܹܗ ܠܡܵܘܬܵܐ.“ 67ܗ̇ܝܓܵܗ ܪܝܼܩ ܠܗܘܿܢ ܥܲܠ ܦܵܬܹܗ، ܘܩܲܪܦܸܚܝܼ ܗ݇ܘܵܘ ܠܹܗ، ܘܐ݇ܚܹܪ̈݇ܢܹܐ ܡܵܚܝܼ ܗ݇ܘܵܘ ܠܹܗ.#ܐܫܥܝܐ 50‏:6 68ܘܐܵܡܪܝܼ ܗ݇ܘܵܘ، ”ܢܲܒܝܼ ܐܸܠܲܢ، ܡܫܝܼܚܵܐ، ܡܵܢܝܼ ܩܲܡ ܡܵܚܹܐ ܠܘܼܟ݂؟“

ܫܸܡܥܘܿܢ ܟܹܐܦܵܐ ܒܸܣܪܵܒ݂ܵܐ ܠܝܼܫܘܿܥ

ܡܪܩܘܣ 14‏:66‏‐72؛ ܠܘܩܐ 22‏:54‏‐62؛ ܝܘܚܢܢ 18‏:15‏‐18، 18‏:25‏‐27

69ܐܝܼܢܵܐ ܫܸܡܥܘܿܢ ܟܹܐܦܵܐ ܝ݇ܬܝܼܒ݂ܵܐ ܝܗ݇ܘܵܐ ܓܵܘ ܕܵܪܬܵܐ، ܘܐ݇ܬܹܐ ܠܵܗ̇ ܠܟܸܣ ܠܹܗ ܚܕܵܐ ܚܹܕܲܡܬܵܐ ܘܐ݇ܡܝܼܪܵܗ̇ ܐܸܠܹܗ، ”ܐܘܼܦ ܐܲܢ݇ܬ ܥܲܡ ܝܼܫܘܿܥ ܢܵܨܪܵܝܵܐ ܝܘܸܬ ܗ݇ܘܵܐ.“ 70ܐܝܼܢܵܐ ܗ̇ܘ ܣܪܝܼܒ݂ ܠܹܗ ܩܵܕ݇ܡ ܟܠܲܝܗܝ ܘܐ݇ܡܝܼܪܹܗ، ”ܠܹܐ ܝܘܸܢ ܒܝܼܕܵܥܵܐ ܡܘܿܕܝܼ ܒܹܐܡܵܪܵܐ ܝܘܲܬܝ.“ 71ܘܦܠܝܼܛ ܠܹܗ ܒܬܲܪܥܵܐ، ܘܚܙܹܐ ܠܵܗ̇ ܐܸܠܹܗ ܚܕܵܐ ܐ݇ܚܹܪ݇ܬܵܐ ܘܐ݇ܡܝܼܪܵܗ̇، ”ܐܘܼܦ ܐܵܗܵܐ ܥܲܡ ܝܼܫܘܿܥ ܢܵܨܪܵܝܵܐ ܝܗ݇ܘܵܐ.“ 72ܡܸܢܕܪܸܫ ܣܪܝܼܒ݂ ܠܹܗ ܒܡܵܘܡܝܼܬܵܐ، ܒܹܐܡܵܪܵܐ، ”ܠܹܐ ܝܵܕܥܹܢ ܠܐܵܗܵܐ ܐ݇ܢܵܫܵܐ.“ 73ܘܡ̣ܢ ܒܵܬ݇ܪ ܚܲܕ ܡܸܬܚܵܐ، ܐ݇ܬܹܐ ܠܗܘܿܢ ܐܵܢܝܼ ܕܟܸܠܝܹܐ ܝܗ݇ܘܵܘ ܬܵܡܵܐ، ܘܐ݇ܡܝܼܪܗܘܿܢ ܠܫܸܡܥܘܿܢ ܟܹܐܦܵܐ، ”ܫܲܪܝܼܪܵܐܝܼܬ ܐܘܼܦ ܐܲܢ݇ܬ ܡܸܢܲܝܗܝ ܝܘܸܬ، ܣܵܒܵܒ ܗܲܡܙܲܡܬܘܼܟ݂ ܡܲܕܘܼܥܹܐ ܝܠܵܗ̇.“ 74ܗ̇ܝܓܵܗ ܫܘܼܪܹܐ ܠܹܗ ܠܡܲܚܪܘܼܡܹܐ ܘܠܸܡܝܵܝܵܐ، ”ܠܹܐ ܝܵܕܥܹܢ ܠܐܵܗܵܐ ܐ݇ܢܵܫܵܐ.“ ܘܗܲܪ ܒܗ̇ܝ ܥܕܵܢܵܐ ܩܪܹܐ ܠܹܗ ܩܵܪܘܿܝܵܐ. 75ܘܕܟ݂ܝܼܪܹܗ ܫܸܡܥܘܿܢ ܟܹܐܦܵܐ ܗܹܡܸܙܡܵܢ ܕܝܼܫܘܿܥ ܕܐ݇ܡܝܼܪܵܐ ܝܗ݇ܘܵܐ ܐܸܠܹܗ، ”ܡ̣ܢ ܩܵܕ݇ܡ ܕܩܵܪܹܐ ܩܵܪܘܿܝܵܐ ܒܸܬ ܣܵܪܒܹܬ ܠܝܼ ܬܠܵܬ ܓܵܗܹ̈ܐ.“ ܘܦܠܝܼܛ ܠܹܗ ܠܒܲܕܲܪ ܘܒܟܹܐ ܠܹܗ ܒܡܲܪܝܼܪܘܼܬܵܐ.

Currently Selected:

ܡܬܝ 26: ABTAB

Highlight

Copy