YouVersion Logo
Search Icon

ܡܬܝ 27

27
ܝܼܫܘܿܥ ܦܝܵܫܵܐ ܣܘܼܦܝܵܐ ܠܦܝܼܠܵܛܘܿܣ
ܡܪܩܘܣ 15‏:1؛ ܠܘܩܐ 23‏:1‏‐2؛ ܝܘܚܢܢ 18‏:28‏‐32
1ܟܲܕ ܗܘܹܐ ܠܹܗ ܨܲܦܪܵܐ، ܣܘܼܙܓܸܪܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܕܥܲܡܵܐ ܕܩܵܛܠܝܼ ܠܝܼܫܘܿܥ. 2ܘܐ݇ܣܝܼܪܗܘܿܢ ܐܸܠܹܗ ܘܠܘܼܒܸܠ ܠܗܘܿܢ ܘܣܘܼܦܹܐ ܠܗܘܿܢ ܐܸܠܹܗ ܠܦܝܼܠܵܛܘܿܣ ܫܲܠܝܼܛܵܐ.
ܝܼܗܘܼܕܵܐ ܣܟܲܪܝܘܿܛܵܐ ܒܸܚܢܵܩܵܐ ܓܵܢܹܗ
ܣܘܥܪ̈ܢܐ 1‏:18‏‐19
3ܐܝܼܢܵܐ ܟܲܕ ܝܼܗܘܼܕܵܐ ܣܲܦܝܵܢܵܐ ܚܙܹܐ ܠܹܗ ܕܦܝܼܫ ܠܹܗ ܕܝܼܢܵܐ ܝܼܫܘܿܥ، ܦܫܝܼܡ ܠܹܗ. ܐ݇ܙܝܼܠ ܠܹܗ ܘܡܘܼܕܸܪܹܗ ܠܐܵܢܝܼ ܬܠܵܬܝܼ ܙܘܼܙܹ̈ܐ ܕܣܹܐܡܵܐ ܠܓܘܼܪ̈ܵܢܹܐ ܕܟܵܗܢܹ̈ܐ ܘܠܚܘܵܪ̈ܕܸܩܢܹܐ، 4ܘܐ݇ܡܝܼܪܹܗ، ”ܚܛܹܐ ܠܝܼ ܕܣܘܼܦܹܐ ܠܝܼ ܕܸܡܵܐ ܙܲܟܵܝܵܐ.“ ܐܝܼܢܵܐ ܐܵܢܝܼ ܐ݇ܡܝܼܪܗܘܿܢ ܐܸܠܹܗ، ”ܠܲܝܬ ܠܲܢ ܫܘܼܠܵܐ ܡܸܢܘܼܟ݂، ܐܲܢ݇ܬ ܟܹܐ ܝܵܕܥܹܬ ܒܓܵܢܘܼܟ݂.“ 5ܘܪܘܼܦܹܐ ܠܹܗ ܠܙܘܼܙܹ̈ܐ ܕܣܹܐܡܵܐ ܓܵܘ ܗܲܝܟܠܵܐ، ܦܠܝܼܛ ܠܹܗ ܘܐ݇ܙܝܼܠ ܠܹܗ ܚܢܝܼܩܵܐ ܠܹܗ ܓܵܢܹܗ. 6ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܫܩܝܼܠ ܠܗܘܿܢ ܠܙܘܼܙܹ̈ܐ ܕܣܹܐܡܵܐ ܘܐ݇ܡܝܼܪܗܘܿܢ، ”ܠܹܐ ܝܠܵܗ̇ ܚܫܝܼܚܬܵܐ ܕܕܵܪܲܚ ܠܗܘܿܢ ܓܵܘ ܒܹܝܬ ܓܲܙܵܐ ܣܵܒܵܒ ܛܝܼܡܵܐ ܕܕܸܡܵܐ ܝܢܵܐ.“ 7ܘܣܘܼܙܓܸܪܗܘܿܢ ܘܙܒ݂ܝܼܢܗܘܿܢ ܒܝܼܲܝܗܝ ܚܲܩܠܵܐ ܕܦܲܚܵܪܵܐ ܩܵܐ ܒܹܝܬ ܩܒ݂ܘܼܪܹ̈ܐ ܕܢܘܼܟ݂ܪ̈ܵܝܹܐ. 8ܒܘܼܬ ܐܵܗܵܐ ܦܝܼܫ ܠܵܗ̇ ܩܪܝܼܬܵܐ ܗ̇ܝ ܚܲܩܠܵܐ، ”ܚܲܩܠܵܐ ܕܕܸܡܵܐ“ ܗܲܠ ܐܵܗܵܐ ܝܵܘܡܵܐ. 9ܗ̇ܝܓܵܗ ܦܝܼܫ ܠܹܗ ܬܘܼܡܸܡܵܐ ܡܸܢܕܝܼ ܕܐ݇ܡܝܼܪܵܐ ܝܗ݇ܘܵܐ ܒܝܲܕ ܐܹܪܲܡܝܵܐ ܢܒ݂ܝܼܵܐ، ܕܐ݇ܡܝܼܪܹܗ:
ܫܩܝܼܠ ܠܗܘܿܢ ܬܠܵܬܝܼ ܙܘܼܙܹ̈ܐ ܕܣܹܐܡܵܐ، ܛܝܼܡܵܐ ܕܡܘܼܬܒܹܐ ܝܗ݇ܘܵܘ ܥܲܠܘܼܗܝ ܒܢܲܝ̈ ܝܼܣܪܵܝܹܠ،
10ܘܝܘܼܗ݇ܒܲܝ ܠܗܘܿܢ ܒܚܲܩܠܵܐ ܕܦܲܚܵܪܵܐ، ܐܲܝܟ݂ ܕܦܩܝܼܕ ܠܹܗ ܐܸܠܝܼ ܡܵܪܝܵܐ.#ܙܟ݂ܪܝܐ 11‏:12‏‐13؛ ܐܪܡܝܐ 19‏:1‏‐13، 32‏:6‏‐9
ܝܼܫܘܿܥ ܦܝܵܫܵܐ ܨܘܼܚܨܝܼܵܐܒܝܲܕ ܦܝܼܠܵܛܘܿܣ
ܡܪܩܘܣ 15‏:2‏‐5؛ ܠܘܩܐ 23‏:3‏‐5؛ ܝܘܚܢܢ 18‏:33‏‐38
11ܟܠܹܐ ܠܹܗ ܝܼܫܘܿܥ ܩܵܕ݇ܡ ܦܝܼܠܵܛܘܿܣ ܫܲܠܝܼܛܵܐ، ܘܒܘܼܩܸܪܹܗ ܡܸܢܹܗ ܫܲܠܝܼܛܵܐ ܘܐ݇ܡܝܼܪܹܗ، ”ܐܲܢ݇ܬ ܝܼܘܸܬ ܡܲܠܟܵܐ ܕܝܗܘܼܕܵܝܹ̈ܐ؟“ ܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ ܐܸܠܹܗ، ”ܐܲܢ݇ܬ ܐ݇ܡܝܼܪܘܼܟ݂.“ 12ܘܐܝܼܡܲܢ ܕܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܗܲܡܙܘܼܡܹܐ ܝܗ݇ܘܵܘ ܕܲܠܩܘܼܒ݂ܠܹܗ، ܝܼܫܘܿܥ ܫܬܝܼܩܵܐ ܝܗ݇ܘܵܐ. 13ܗ̇ܝܓܵܗ ܐ݇ܡܝܼܪܹܗ ܐܸܠܹܗ ܦܝܼܠܵܛܘܿܣ ”ܒܸܫܡܵܥܵܐ ܝܘܸܬ ܕܵܐܟ݂ܝܼ ܣܵܗܕܘܼܬܵܐ ܒܝܼܵܗ݇ܒ݂ܵܐ ܝܢܵܐ ܥܲܠܘܼܟ݂؟“ 14ܘܠܵܐ ܓ̰ܘܼܘܸܒ ܠܹܗ ܝܼܫܘܿܥ ܐܘܼܦ ܚܕܵܐ ܗܹܡܸܙܡܵܢ. ܥܘܼܓ̰ܸܒ ܠܹܗ ܪܵܒܵܐ ܫܲܠܝܼܛܵܐ.
ܝܼܫܘܿܥ ܝܲܢ ܒܲܪ ܐܲܒܵܐ
ܡܪܩܘܣ 15‏:6‏‐15؛ ܠܘܩܐ 23‏:13‏‐25؛ ܝܘܚܢܢ 18‏:39‏–19‏:16
15ܒܟܠ ܥܹܐܕܵܐ ܕܦܸܨܚܵܐ ܐܝܼܬ ܗ݇ܘܵܐ ܥܵܕܲܬ ܕܫܵܪܹܐ ܗ݇ܘܵܐ ܫܲܠܝܼܛܵܐ ܠܚܲܕ ܐܲܣܝܼܪܵܐ ܩܵܐ ܟܸܢܫܵܐ، ܗ̇ܘ ܕܐܵܢܝܼ ܒܵܥܝܼ ܗ݇ܘܵܘ. 16ܘܐܝܼܬ ܗ݇ܘܵܘ ܠܗܘܿܢ ܚܲܕ ܐܲܣܝܼܪܵܐ ܝ݇ܕܝܼܥܵܐ ܫܸܡܹܗ ܒܲܪ ܐܲܒܵܐ. 17ܟܲܕ ܓ̰ܡܝܼܥܹܐ ܝܗ݇ܘܵܘ، ܒܘܼܩܸܪܹܗ ܡܸܢܲܝܗܝ ܦܝܼܠܵܛܘܿܣ، ”ܡܵܢܝܼ ܒܵܥܹܝܬܘܿܢ ܕܫܵܪܹܝܢ ܐܸܠܵܘܟ݂ܘܿܢ، ܒܲܪ ܐܲܒܵܐ، ܝܲܢ ܝܼܫܘܿܥ ܕܦܝܵܫܵܐ ܝܠܹܗ ܩܸܪܝܵܐ ܡܫܝܼܚܵܐ؟“ 18ܣܵܒܵܒ ܟܹܐ ܝܵܕܹܥ ܗ݇ܘܵܐ ܕܡ̣ܢ ܒܲܚܸܠܵܢܘܼܬܵܐ ܣܘܼܦܝܹܐ ܝܗ݇ܘܵܘ ܠܝܼܫܘܿܥ.
19ܘܟܲܕ ܝ݇ܬܝܼܒ݂ܵܐ ܝܗ݇ܘܵܐ ܦܝܼܠܵܛܘܿܣ ܥܲܠ ܟܘܼܪܣܝܵܐ ܕܕܝܼܘܵܢ، ܫܘܼܕܸܪܵܗ̇ ܒܲܟ݂ܬܹܗ ܚܲܒܪܵܐ ܐܸܠܹܗ، ܒܹܐܡܵܪܵܐ، ”ܠܵܐ ܗܵܘܹܐ ܠܘܼܟ݂ ܫܘܼܠܵܐ ܒܗ̇ܘ ܙܲܕܝܼܩܵܐ، ܣܵܒܵܒ ܐܸܕܝܘܿܡ ܓܵܘ ܚܸܠܡܝܼ ܪܵܒܵܐ ܓ̰ܘܼܢܓ̰ܸܪܝܼ ܒܘܼܬ ܕܝܼܹܗ.“ 20ܐܝܼܢܵܐ ܓܘܼܪ̈ܵܢܹܐ ܕܟܵܗܢܹ̈ܐ ܘܚܘܵܪ̈ܕܸܩܢܹܐ ܡܘܼܠܸܦ ܠܗܘܿܢ ܠܟܸܢܫܵܐ ܕܛܵܠܒܝܼ ܗ݇ܘܵܘ ܠܒܲܪ ܐܲܒܵܐ ܘܩܵܛܠܝܼ ܗ݇ܘܵܘ ܠܝܼܫܘܿܥ. 21ܒܘܼܩܸܪܹܗ ܫܲܠܝܼܛܵܐ ܡܸܢܲܝܗܝ، ”ܠܐܲܝܢܝܼ ܡ̣ܢ ܐܲܢܹܐ ܬܪܹܝ ܒܵܥܹܝܬܘܿܢ ܕܫܵܪܹܝܢ ܐܸܠܵܘܟ݂ܘܿܢ؟“ ܘܐܵܢܝܼ ܓ̰ܘܼܘܸܒ ܠܗܘܿܢ، ”ܠܒܲܪ ܐܲܒܵܐ.“ 22ܘܒܘܼܩܸܪܹܗ ܦܝܼܠܵܛܘܿܣ، ”ܡܘܿܕܝܼ ܥܵܒ݂ܕܹܢ ܒܝܼܫܘܿܥ ܕܦܝܵܫܵܐ ܝܠܹܗ ܩܸܪܝܵܐ ܡܫܝܼܚܵܐ؟“ ܘܐܵܢܝܼ ܓ̰ܘܼܘܸܒ ܠܗܘܿܢ، ”ܦܵܐܹܫ ܡܸܚܝܵܐ ܠܙܩܝܼܦܵܐ!“ 23ܒܘܼܩܸܪܹܗ ܡܸܢܲܝܗܝ ܦܝܼܠܵܛܘܿܣ، ”ܡܘܿܕܝܼ ܒܝܼܫܬܵܐ ܥܒ݂ܝܼܕܵܐ ܝܠܹܗ؟“ ܐܝܼܢܵܐ ܐܵܢܝܼ ܒܘܼܫ ܙܵܘܕܵܐ ܡܘܼܩܘܸܚ ܠܗܘܿܢ، ܒܹܐܡܵܪܵܐ، ”ܦܵܐܹܫ ܡܸܚܝܵܐ ܠܙܩܝܼܦܵܐ!“
24ܟܲܕ ܚܙܹܐ ܠܹܗ ܦܝܼܠܵܛܘܿܣ ܕܠܹܐ ܝܗ݇ܘܵܐ ܡܲܢܬܘܼܝܹܐ، ܐܸܠܵܐ ܫܓ݂ܘܼܫܝܵܐ ܒܘܼܫ ܒܸܙܝܵܕܵܐ ܝܗ݇ܘܵܐ، ܫܩܝܼܠ ܠܹܗ ܡ̈ܝܼܵܐ ܘܚܘܼܠܸܠ ܠܹܗ ܐܝܼܕܵܬܹ̈ܗ ܩܵܕ݇ܡ ܥܲܝܢܹ̈ܐ ܕܟܸܢܫܵܐ ܘܐ݇ܡܝܼܪܹܗ، ”ܦܪܝܼܩ ܠܝܼ ܡ̣ܢ ܕܸܡܵܐ ܕܐܵܗܵܐ ܙܲܕܝܼܩܵܐ، ܐܲܚܬܘܿܢ ܚܙܹܝܡܘܼܢ ܡܘܿܕܝܼ ܒܸܬ ܥܵܒ݂ܕܝܼܬܘܿܢ.“ 25ܓ̰ܘܼܘܸܒ ܠܹܗ ܟܠܹܗ ܥܲܡܵܐ ܘܐ݇ܡܝܼܪܹܗ، ”ܕܸܡܹܗ ܥܲܠܲܢ ܘܥܲܠ ܒܢܘܿܢܲܢ̈.“ 26ܗ̇ܝܓܵܗ ܦܝܼܠܵܛܘܿܣ ܫܪܹܐ ܠܹܗ ܐܸܠܲܝܗܝ ܠܒܲܪ ܐܲܒܵܐ، ܘܡܘܼܡܚܹܐ ܠܹܗ ܠܝܼܫܘܿܥ ܒܫܵܘܛܹ̈ܐ، ܘܣܘܼܦܹܐ ܠܹܗ ܕܦܵܐܹܫ ܙܩܝܼܦܵܐ.
ܢܵܛܘܿܪܹ̈ܐ ܡܲܣܚܘܼܪܹܐ ܒܝܼܫܘܿܥ
ܡܪܩܘܣ 15‏:16‏‐20؛ ܝܘܚܢܢ 19‏:2‏‐3
27ܗ̇ܝܓܵܗ ܢܵܛܘܿܪܹ̈ܐ ܕܫܲܠܝܼܛܵܐ ܠܘܼܒܸܠ ܠܗܘܿܢ ܠܝܼܫܘܿܥ ܠܒܹܝܬ ܕܝܼܢܵܐ ܘܓ̰ܘܼܡܸܥ ܠܗܘܿܢ ܥܲܠܘܼܗܝ ܟܠܵܗ̇ ܣܝܼܥܬܵܐ. 28ܘܫܘܼܠܸܚ ܠܗܘܿܢ ܓ̰ܘܼܠܘܼ̈ܗܝ، ܘܡܘܼܠܒܸܫ ܠܗܘܿܢ ܐܸܠܹܗ ܓ̰ܘܼܒܵܐ ܣܡܘܿܩܬܵܐ. 29ܘܓܕܝܼܠ ܠܗܘܿܢ ܟܠܝܼܠܵܐ ܕܟܸܬܘܹ̈ܐ ܘܡܘܼܬܸܒ݂ ܠܗܘܿܢ ܒܪܹܫܹܗ، ܘܙܹܠܵܐ ܒܐܝܼܕܹܗ ܕܝܲܡܝܼܢܵܐ، ܘܒܪܝܼܟ ܠܗܘܿܢ ܩܵܕ݇ܡܘܼܗܝ ܥܲܠ ܒܘܼܪ̈ܟܵܟܲܝܗܝ، ܘܡܘܼܣܚܸܪܗܘܿܢ ܒܝܼܹܗ، ܒܹܐܡܵܪܵܐ، ”ܫܠܵܡܵܐ ܐܸܠܘܼܟ݂، ܝܵܐ ܡܲܠܟܵܐ ܕܝܗܘܼܕܵܝܹ̈ܐ.“ 30ܪܝܼܩ ܠܗܘܿܢ ܓܵܘ ܦܵܬܹܗ، ܘܫܩܝܼܠ ܠܗܘܿܢ ܙܹܠܵܐ ܘܡܚܹܐ ܠܗܘܿܢ ܒܝܼܹܗ ܥܲܠ ܪܹܫܹܗ. 31ܘܡ̣ܢ ܒܵܬ݇ܪ ܕܡܘܼܣܚܸܪܗܘܿܢ ܒܝܼܹܗ، ܫܘܼܠܸܚ ܠܗܘܿܢ ܡܸܢܹܗ ܓ̰ܘܼܒܵܐ ܘܡܘܼܠܒܸܫ ܠܗܘܿܢ ܐܸܠܹܗ ܓ̰ܘܼܠܘܼ̈ܗܝ، ܘܠܘܼܒܸܠ ܠܗܘܿܢ ܐܸܠܹܗ ܕܦܵܐܹܫ ܙܩܝܼܦܵܐ.
ܙܩܵܦܬܵܐ ܕܝܼܫܘܿܥ
ܡܪܩܘܣ 15‏:21‏‐32؛ ܠܘܩܐ 23‏:26‏‐43؛ ܝܘܚܢܢ 19‏:17‏‐27
32ܟܲܕ ܒܸܦܠܵܛܵܐ ܝܗ݇ܘܵܘ، ܬܦܝܼܩ ܠܗܘܿܢ ܒܚܲܕ ܐ݇ܢܵܫܵܐ ܩܸܘܪܝܼܢܵܝܵܐ ܫܸܡܹܗ ܫܸܡܥܘܿܢ. ܥܒ݂ܝܼܕ ܠܗܘܿܢ ܫܘܼܚܪܵܐ ܐܸܠܹܗ ܕܛܵܥܹܢ ܗ݇ܘܵܐ ܠܙܩܝܼܦܵܐ. 33ܘܐ݇ܬܹܐ ܠܗܘܿܢ ܠܕܘܼܟܵܐ ܕܟܹܐ ܦܵܝܫܵܐ ܩܪܝܼܬܵܐ ܓܵܓ݂ܘܿܠܬܵܐ، ܕܦܘܼܫܵܩܘܼܗ̇ ܝܼܠܹܗ ܩܲܪܩܲܦܬܵܐ. 34ܝܘܼܗ݇ܒܸܠ ܠܗܘܿܢ ܐܸܠܹܗ ܚܲܡܪܵܐ ܠܸܫܬܵܝܵܐ، ܚܒ݂ܝܼܛܵܐ ܒܡܪܲܪܬܵܐ، ܐܝܼܢܵܐ ܐܝܼܡܲܢ ܕܛܥܝܼܡ ܠܹܗ ܠܵܐ ܒܥܹܐ ܠܹܗ ܠܸܫܬܵܝܹܗ.#ܡܙܡܘܪ̈ܐ 69‏:21 35ܘܐܝܼܡܲܢ ܕܙܩܝܼܦ ܠܗܘܿܢ، ܦܘܼܠܸܥ ܠܗܘܿܢ ܓ̰ܘܼܠܘܼ̈ܗܝ ܒܕܪܵܝܬܵܐ ܕܦܸܫܟܵܐ.#ܡܙܡܘܪ̈ܐ 22‏:18 36ܘܝ݇ܬܝܼܒ݂ ܠܗܘܿܢ ܒܸܢܛܵܪܵܐ ܐܸܠܹܗ ܬܵܡܵܐ. 37ܡܘܼܬܸܒ݂ ܠܗܘܿܢ ܥܸܠܸܠ ܡ̣ܢ ܪܹܫܹܗ ܟܬܝܼܒ݂ܬܵܐ ܡܲܚܙܘܼܝܹܐ ܥܸܠܬܵܐ ܕܡܵܘܬܹܗ، ”ܐܵܗܵܐ ܝܠܹܗ ܝܼܫܘܿܥ، ܡܲܠܟܵܐ ܕܝܗܘܼܕܵܝܹ̈ܐ.“
38ܘܦܝܼܫ ܠܗܘܿܢ ܙܩܝܼܦܹܐ ܥܲܡܹܗ ܬܪܹܝ ܓܲܝܵܣܹ̈ܐ، ܚܲܕ ܡ̣ܢ ܝܲܡܝܼܢܹܗ ܘܚܲܕ ܡ̣ܢ ܣܸܡܵܠܹܗ. 39ܘܐܵܢܝܼ ܕܒܸܥܒ݂ܵܪܵܐ ܝܗ݇ܘܵܘ ܡ̣ܢ ܠܟܸܣ ܠܹܗ ܓܵܕܦܝܼ ܗ݇ܘܵܘ ܥܲܠܘܼܗܝ، ܘܫܵܥܫܝܼ ܗ݇ܘܵܘ ܪܹ̈ܫܲܝܗܝ،#ܡܙܡܘܪ̈ܐ 22‏:7 40ܘܐܵܡܪܝܼ ܗ݇ܘܵܘ، ”ܝܵܐ ܣܵܬܪܵܢܵܐ ܕܗܲܝܟܠܵܐ ܘܒܵܢܝܵܢܹܗ ܒܬܠܵܬܵܐ ܝܵܘܡܵܢܹ̈ܐ، ܦܲܪܸܩ ܓܵܢܘܼܟ݂ ܐܸܢ ܒܪܘܿܢܵܐ ܕܐܲܠܵܗܵܐ ܝܘܸܬ، ܨܠܝܼ ܡ̣ܢ ܙܩܝܼܦܵܐ.“
41ܗܲܕܟ݂ܵܐ ܐܘܼܦ ܓܘܼܪ̈ܵܢܹܐ ܕܟܵܗܢܹ̈ܐ ܥܲܡ ܣܵܦܪܹ̈ܐ ܘܚܘܵܪ̈ܕܸܩܢܹܐ ܘܦܪ̈ܝܼܫܹܐ ܡܲܣܚܸܪܝܼ ܗ݇ܘܵܘ ܘܐܵܡܪܝܼ ܗ݇ܘܵܘ، 42”ܠܐ݇ܚܹܪ̈݇ܢܹܐ ܦܘܼܪܸܩ ܠܹܗ، ܐܝܼܢܵܐ ܓܵܢܹܗ ܠܹܐ ܡܵܨܹܐ ܦܲܪܸܩ ܠܵܗ̇. ܐܸܢ ܡܲܠܟܵܐ ܕܝܼܣܪܵܝܹܠ ܝܼܠܹܗ، ܨܵܠܹܐ ܡ̣ܢ ܙܩܝܼܦܵܐ ܕܚܵܙܲܚ ܘܗܲܡܸܢܲܚ ܒܝܼܹܗ. 43”ܕܪܹܐ ܠܹܗ ܗܹܒ݂ܝܼܹܗ ܥܲܠ ܐܲܠܵܗܵܐ، ܫܒ݂ܘܿܩ ܐܲܠܵܗܵܐ ܦܲܪܸܩ ܠܹܗ ܐܵܕܝܼܵܐ ܐܸܢ ܟܹܐ ܡܲܚܸܒ ܠܹܗ،#ܡܙܡܘܪ̈ܐ 22‏:8 ܣܵܒܵܒ ܐ݇ܡܝܼܪܹܗ، ’ܒܪܘܿܢܵܐ ܕܐܲܠܵܗܵܐ ܝܘܸܢ.‘“ 44ܗܲܕܟ݂ܵܐ ܐܘܼܦ ܐܵܢܝܼ ܓܲܝܵܣܹ̈ܐ ܕܦܝܼܫ ܠܗܘܿܢ ܙܩܝܼܦܹܐ ܥܲܡܹܗ ܡܲܣܚܸܪܝܼ ܗ݇ܘܵܘ ܒܝܼܹܗ.
ܡܵܘܬܵܐ ܕܝܼܫܘܿܥ
ܡܪܩܘܣ 15‏:33‏‐41؛ ܠܘܩܐ 23‏:44‏‐49؛ ܝܘܚܢܢ 19‏:28‏‐30
45ܘܡ̣ܢ ܣܵܥܲܬ ܕܬܪܸܥܣܲܪ ܗܘܹܐ ܠܹܗ ܚܸܫܟܵܐ ܥܲܠ ܟܠܵܗ̇ ܐܲܪܥܵܐ ܗܲܠ ܣܵܥܲܬ ܕܬܠܵܬ. 46ܘܐܲܝܟ݂ ܣܵܥܲܬ ܕܬܠܵܬ ܡܘܼܩܘܸܚ ܠܹܗ ܝܼܫܘܿܥ ܒܩܵܠܵܐ ܪܵܡܵܐ ܘܐ݇ܡܝܼܪܹܗ، ”ܐܹܝܠܝ، ܐܹܝܠܝ، ܠܡܵܢܵܐ ܫܒܲܩܬܵܢܝ؟“ ܝܲܥܢܹܐ، ”ܐܲܠܵܗܝܼ، ܐܲܠܵܗܝܼ، ܩܵܡܘܿܕܝܼ ܫܒ݂ܝܼܩܸܢܘܼܟ݂؟“#ܡܙܡܘܪ̈ܐ 22‏:1 47ܚܲܕ݇ܟܡܵܐ ܡ̣ܢ ܐ݇ܢܵܫܹ̈ܐ ܕܟܸܠܝܹܐ ܝܗ݇ܘܵܘ ܬܵܡܵܐ، ܐܝܼܡܲܢ ܕܫܡܝܼܥ ܠܗܘܿܢ، ܐ݇ܡܝܼܪܗܘܿܢ، ”ܐܵܗܵܐ ܠܐܹܠܝܼܵܐ ܒܸܩܪܵܝܵܐ ܝܠܹܗ.“ 48ܒܓ̰ܲܠܕܘܼܬܵܐ ܪܚܝܼܛ ܠܹܗ ܚܲܕ ܡܸܢܲܝܗܝ ܘܫܩܝܼܠ ܠܹܗ ܐܸܣܦܘܼܓܵܐ ܘܡܸܠܝܵܐ ܠܹܗ ܚܲܠܵܐ، ܡܘܼܬܒ݂ܵܐ ܠܹܗ ܥܲܠ ܩܲܝܣܵܐ ܘܝܘܼܗ݇ܒ݂ܵܐ ܠܹܗ ܐܸܠܹܗ ܠܸܫܬܵܝܵܐ.#ܡܙܡܘܪ̈ܐ 69‏:12 49ܘܐ݇ܚܹܪ̈݇ܢܹܐ ܐܵܡܪܝܼ ܗ݇ܘܵܘ، ”ܫܒ݂ܘܿܩܘܼܢ ܚܵܙܲܚ ܐܸܢ ܒܸܬ ܐܵܬܹܐ ܐܹܠܝܼܵܐ ܘܦܲܪܸܩ ܠܹܗ.“ 50ܝܼܫܘܿܥ ܡܸܢܕܪܸܫ ܡܘܼܩܘܸܚ ܠܹܗ ܒܩܵܠܵܐ ܪܵܡܵܐ ܘܣܘܼܦܝܵܐ ܠܹܗ ܓܵܢܹܗ.
51ܘܗܵܐ، ܣܸܬܪܹ̈ܐ ܕܗܲܝܟܠܵܐ ܦܝܼܫ ܠܗܘܿܢ ܟ̰ܠܝܼܦܹܐ ܠܬܪܹܝ ܣܵܗܡܹ̈ܐ، ܡ̣ܢ ܠܥܸܠܸܠ ܗܲܠ ܠܠܬܸܚܬ، ܘܐܲܪܥܵܐ ܫܥܝܼܫ ܠܵܗ̇، ܘܟܹܐܦܹ̈ܐ ܦܝܼܫ ܠܗܘܿܢ ܟ̰ܠܝܼܦܹܐ.#ܡܦܩܢܐ 26‏:31‏‐33 52ܘܒܹܝܬ ܩܒ݂ܘܼܪܹ̈ܐ ܦܝܼܫ ܠܗܘܿܢ ܦܬܝܼܚܹܐ، ܘܦܲܓ݂ܪܹ̈ܐ ܕܪܵܒܵܐ ܩܲܕܝܼܫܹ̈ܐ ܕܕܡܝܼܟܹܐ ܝܗ݇ܘܵܘ ܩܝܼܡ ܠܗܘܿܢ، 53ܘܦܠܝܼܛ ܠܗܘܿܢ ܡ̣ܢ ܒܹܝܬ ܩܒ݂ܘܼܪܹ̈ܐ ܡ̣ܢ ܒܵܬ݇ܪ ܩܝܵܡܬܵܐ ܕܡܫܝܼܚܵܐ ܘܥܒ݂ܝܼܪܗܘܿܢ ܠܡܕܝܼܢ݇ܬܵܐ ܩܲܕܝܼܫܬܵܐ، ܘܦܝܼܫ ܠܗܘܿܢ ܚܸܙܝܹܐ ܒܪܵܒܵܐ. 54ܪܲܒ ܐܸܡܵܐܐ ܘܐܵܢܝܼ ܕܥܲܡܹܗ ܕܒܸܢܛܵܪܵܐ ܝܗ݇ܘܵܘ ܠܝܼܫܘܿܥ، ܐܝܼܡܲܢ ܕܚܙܹܐ ܠܗܘܿܢ ܪܵܘܕܵܢܵܐ ܘܡܸܢܕܝܼܵܢܹ̈ܐ ܕܗܘܹܐ ܠܗܘܿܢ، ܙܕܝܼܥ ܠܗܘܿܢ ܪܵܒܵܐ ܘܐ݇ܡܝܼܪܗܘܿܢ، ”ܫܲܪܝܼܪܵܐܝܼܬ ܐܵܗܵܐ ܒܪܘܿܢܵܐ ܕܐܲܠܵܗܵܐ ܝܗ݇ܘܵܐ.“
55ܐܝܼܬ ܗ݇ܘܵܘ ܬܵܡܵܐ ܒܲܟ݂ܬܵܬܹ̈ܐ ܪܵܒܵܐ ܕܒܸܚܝܵܪܵܐ ܝܗ݇ܘܵܘ ܡ̣ܢ ܪܸܚܩܵܐ، ܐܵܢܝܼ ܕܐ݇ܬܝܼܹܐ ܝܗ݇ܘܵܘ ܒܵܬ݇ܪ ܝܼܫܘܿܥ ܡ̣ܢ ܓܠܝܼܠܵܐ ܕܥܵܒ݂ܕܝܼ ܗ݇ܘܵܘ ܠܹܗ ܚܸܠܡܲܬ. 56ܡܸܢܲܝܗܝ ܝܼܗ݇ܘܵܘ ܡܲܪܝܲܡ ܡܲܓ݂ܕܠܵܝܬܵܐ، ܘܡܲܪܝܲܡ ܝܸܡܵܐ ܕܝܲܥܩܘܿܒ݂ ܘܕܝܘܿܣܹܐ، ܘܝܸܡܵܐ ܕܒܢܘܿܢܹ̈ܐ ܕܙܲܒ݂ܕܲܝ.
ܩܒ݂ܵܪܬܵܐ ܕܝܼܫܘܿܥ
ܡܪܩܘܣ 15‏:42‏‐47؛ ܠܘܩܐ 23‏:50‏‐56؛ ܝܘܚܢܢ 19‏:38‏‐42
57ܟܲܕ ܗܘܹܐ ܠܹܗ ܪܲܡܫܵܐ، ܐ݇ܬܹܐ ܠܹܗ ܚܲܕ ܐ݇ܢܵܫܵܐ ܥܲܬܝܼܪܵܐ ܡ̣ܢ ܪܵܡܬܵܐ، ܫܸܡܹܗ ܝܵܘܣܸܦ، ܕܦܝܼܫܵܐ ܝܗ݇ܘܵܐ ܬܘܼܠܡܸܕܵܐ ܒܝܲܕ ܝܼܫܘܿܥ. 58ܐܵܗܵܐ ܐ݇ܬܹܐ ܠܹܗ ܠܟܸܣ ܦܝܼܠܵܛܘܿܣ ܘܛܠܝܼܒ ܠܹܗ ܦܲܓ݂ܪܵܐ ܕܝܼܫܘܿܥ. ܘܦܝܼܠܵܛܘܿܣ ܦܩܝܼܕ ܠܹܗ ܕܦܵܐܹܫ ܝܘܼܗ݇ܒ݂ܵܐ ܐܸܠܹܗ. 59ܫܩܝܼܠ ܠܹܗ ܝܵܘܣܸܦ ܠܦܲܓ݂ܪܵܐ ܘܟܪܝܼܟ݂ ܠܹܗ ܒܟܸܬܵܢܵܐ ܕܸܟ݂ܝܵܐ. 60ܘܡܘܼܬܸܒ݂ ܠܹܗ ܓܵܘ ܒܹܝܬ ܩܒ݂ܘܼܪܵܐ ܚܵܕ݇ܬܵܐ ܕܓܵܢܹܗ، ܢܩܝܼܪܵܐ ܓܵܘ ܩܵܝܵܐ، ܘܡܘܼܚܕܸܪܹܗ ܟܹܐܦܵܐ ܓܘܼܪܵܐ ܥܲܠ ܬܲܪܥܵܐ ܕܒܹܝܬ ܩܒ݂ܘܼܪܵܐ ܘܐ݇ܙܝܼܠ ܠܹܗ. 61ܐܝܼܬ ܗ݇ܘܵܐ ܬܵܡܵܐ ܡܲܪܝܲܡ ܡܲܓ݂ܕܠܵܝܬܵܐ ܘܚܕܵܐ ܡܲܪܝܲܡ ܐ݇ܚܹܪ݇ܬܵܐ ܝ݇ܬܝܼܒܹܐ ܠܒܲܠܩܘܼܒ݂ܠ ܕܩܲܒ݂ܪܵܐ.
62ܘܒܩܵܝܕܲܡܬܵܐ، ܕܝܼܗ݇ܘܵܐ ܡ̣ܢ ܒܵܬ݇ܪ ܝܵܘܡܵܐ ܕܗܵܕܲܪܬܵܐ، ܓ̰ܡܝܼܥ ܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܘܦܪ̈ܝܼܫܹܐ ܠܟܸܣ ܦܝܼܠܵܛܘܿܣ، 63ܘܐ݇ܡܝܼܪܗܘܿܢ ܐܸܠܹܗ، ”ܡܵܪܲܢ، ܒܸܕܟ݂ܵܪܵܐ ܝܘܲܚ ܕܗ̇ܘ ܡܲܚܠܸܛܵܢܵܐ، ܟܲܕ ܚܵܝܵܐ ܝܗ݇ܘܵܐ، ܐ݇ܡܝܼܪܹܗ ܕܡ̣ܢ ܒܵܬ݇ܪ ܬܠܵܬܵܐ ܝܵܘܡܵܢܹ̈ܐ ܒܸܬ ܩܵܐܹܡ. 64”ܒܘܼܬ ܐܵܗܵܐ، ܦܩܘܿܕ ܕܦܵܐܹܫ ܢܛܝܼܪܵܐ ܒܹܝܬ ܩܒ݂ܘܼܪܵܐ ܗܲܠ ܝܵܘܡܵܐ ܕܬܠܵܬܵܐ، ܕܠܵܐ ܐܵܬܝܼ ܬܲܠܡܝܼܕܘܼ̈ܗܝ ܘܓܵܢܒ݂ܝܼ ܠܹܗ ܒܠܲܝܠܹܐ، ܘܐܵܡܪܝܼ ܠܥܲܡܵܐ ܕܩܝܼܡ ܠܹܗ ܡ̣ܢ ܓܵܘ ܡܝܼܬܹ̈ܐ. ܘܐܵܗܵܐ ܚܸܠܛܵܐ ܐ݇ܚܵܪܵܝܵܐ ܒܸܬ ܗܵܘܹܐ ܒܘܼܫ ܚܸܪܒܵܐ ܡ̣ܢ ܗ̇ܘ ܩܵܕ݇ܡܵܝܵܐ.“ 65ܐ݇ܡܝܼܪܹܗ ܦܝܼܠܵܛܘܿܣ، ”ܫܩܘܿܠܘܼܢ ܢܵܛܘܿܪܹ̈ܐ، ܙܹܠ݇ܡܘܼܢ ܘܢܛܘܿܪܘܼܢ ܠܹܗ ܕܵܐܟ݂ܝܼ ܕܝܵܕܥܝܼܬܘܿܢ.“ 66ܘܐܵܢܝܼ ܐ݇ܙܝܼܠ ܠܗܘܿܢ ܘܢܛܝܼܪܗܘܿܢ ܠܩܲܒ݂ܪܵܐ، ܘܚܬܝܼܡ ܠܗܘܿܢ ܠܟܹܐܦܵܐ ܩܵܕ݇ܡ ܥܲܝܢܹ̈ܐ ܕܢܵܛܘܿܪܹ̈ܐ.

Currently Selected:

ܡܬܝ 27: ABTAB

Highlight

Share

Copy

None

Want to have your highlights saved across all your devices? Sign up or sign in