SAN JUAN 14

Jesús, el camino al Padre

1Oco bairo jã ca-ĩinemowĩ Jesú:

—Mʉjaa seeto majuu yʉre tʉgooñarique paiqueticõaña. Diore tʉgooña nʉcʉbʉgoya. To bairi yʉ quenare tʉgooña nʉcʉbʉgoya. 2Yʉ Pacʉ tʉpʉ mʉja ca-anipa wiiri capee ãa. To ca-mamata mʉjaare yʉ buioboricʉ. Ani majuucõa. To bairi mʉja ca-anipa paʉrire quenoo yuʉ aácʉ yʉ áa. 3Mʉja ca-anipa paʉrire quenooboja yaparori bero mʉjaare yʉ jei atígʉ. Topʉ mʉja quena yʉ ca-anopʉre yʉ mena mʉja anicõa aninucugarã. 4Yʉ cá-aátopʉre mʉja majirã. Dope bairo topʉ ejarique to anicʉtí mʉja ĩi majirã, ca-ĩiwĩ Jesú.

5—Ʉpaʉ, cʉ̃ ca-ĩiwĩ Tomás, —mʉ cá-aátopʉre jã majiquẽe. ¿Dope bairo majuu jã aá majibocʉti mʉ cá-aátopʉre ejagarã?

6Jesú cʉ̃ ca-ĩiwĩ:

—Yʉna yʉ ãa camaja yʉ Pacʉ tʉpʉ na ca-ejaro cá-ácʉ. Yʉ jʉgori jeto yʉ Pacʉ tʉpʉ ejarique ãa. Cariape macajere yʉ buio. Catícõa aninucuriquere ca-joʉ yʉ ãa. Yʉre ca-nʉcʉbʉgorã jeto yʉ Pacʉ tʉpʉ ejagarãma. 7Yʉre majirã yʉ Pacʉ quenare mʉja majigarã. Yucʉ mena, meere, cʉ̃re mʉja maji tʉga. Meere, cʉ̃re ca-tʉjʉcõa aninucurã mʉja ãa, ca-ĩiwĩ Jesú.

8Felipe Jesúre cʉ̃ ca-ĩiwĩ:

—Ʉpaʉ, mʉ Pacʉre jãare iñooña. Cʉ̃re tʉjʉrã to cõona jã ani wariñuugarã, cʉ̃ ca-ĩiwĩ Felipe.

9Jesú cʉ̃ ca-ĩiwĩ tunu:

—Felipe, mʉja mena yoaro yʉ ca-ãmʉ. ¿Yʉre mʉja tʉjʉ majiquẽetí mai? Noa yʉre ca-tʉjʉrã yʉ Pacʉ quenare tʉjʉma. ¿Nope ĩi, mʉ Pacʉre jã iñooña, yʉre mʉ ĩití? 10Yʉ, yʉ Pacʉ mena pʉgarã anibana quena jicãʉna jã ãa. ¿Tiere mʉja majiquẽetí? Yʉ ca-buiorijere yʉ majuuna yʉ buioquẽe. Yʉ Pacʉ yʉpʉre ca-ãcʉ̃ maca cʉ̃na cʉ̃ ca-boorije áami yʉ jʉgori. 11Yʉ, yʉ Pacʉ mena pʉgarã anibana quena jicãʉna jã ca-aniere yʉ ca-ĩi buiorijere api nʉcʉbʉgoya. Tiere api nʉcʉbʉgoquẽna maca yʉ cá-átie macare tʉjʉ nʉcʉbʉgoya. 12Cariapena mʉjaare yʉ ĩi. Yʉre ca-api nʉcʉbʉgorã una yʉ cá-átiere bairona átigarãma na quena. Yʉ cá-átie netoro átigarãma. Yʉ Pacʉ tʉpʉ yʉ cá-aá jʉgoyecʉto maca to bairo átigarãma. 13Nipetirije yʉ jʉgori yʉ wame mena Diore mʉja ca-jeniro mʉjaare yʉ átibojagʉ. Yʉ jʉgori yʉ Pacʉ cʉ̃ ca-tutuarijere na majiato ĩi to bairo mʉjaare yʉ átibojagʉ. 14Noo nipetirije yʉ jʉgori yʉ wame mena Diore mʉja ca-jeniro mʉjaare yʉ átibojagʉ.

Jesús promete enviar el Espíritu Santo

15’Yʉre mʉja ca-nʉcʉbʉgoata yʉ ca-rotirijere mʉja átigarã. 16-17Yʉ Pacʉre mʉja yʉ jenibojagʉ, Espíritu Santore na jooya ĩi. Cʉ̃ maca mʉja átinemori, mʉja ca-tʉgooña tutuaro átigʉmi Espíritu Santo. To bairi mʉja mena anicõa aninucugʉmi. Espíritu Santo cariape mʉjaare majiogʉmi. Aperã ati yepa macana yʉre ca-apiʉjaquẽna cʉ̃re majiquẽema. To bairi cʉ̃re cʉgoquetigarãma naa. Mʉja maca cʉ̃re mʉja majigarã. Mʉja mena anigʉmi. Mʉjaapʉre anicõa aninucugʉmi. 18Mʉjaare yʉ aáweoqueticõagʉ. Mʉja mena anigʉ yʉ atígʉ tunu. 19Caberoacã yʉre ca-apiʉjaquẽna yʉre tʉjʉnemoquetigarãma yua. Mʉja maca yʉre mʉja tʉjʉgarã. Ca-catícõa aninucuʉ yʉ ãa. To bairi mʉja quena mʉja catícõa aninucugarã. 20Yʉ Pacʉ cʉ̃ Espíritu Santore joogʉmi mʉjaare. To bairo mʉjaare cʉ̃ ca-jooro caroaro mʉja majigarã yʉ Pacʉ mena jicãʉna jã ca-aniere. To bairi yʉ mena mʉja ca-anie quenare mʉja majigarã. Mʉja mena yʉ ca-anie quenare caroaro mʉja majigarã. 21Nii yʉ ca-rotirijere majii, tiere ca-apiʉjaʉ ucʉ̃ cariapena yʉre ca-maii ãmi. Yʉre ca-maii ucʉ̃re cʉ̃ maigʉmi yʉ Pacʉ. Yʉ quena cʉ̃re yʉ maigʉ. To bairi yʉ ca-aniecʉtiere cʉ̃ yʉ majiogʉ to bairo cariapena yʉre ca-maii ucʉ̃re, ca-ĩiwĩ Jesú.

22Juda ca-wamecʉcʉ, Iscariote mee oco bairo cʉ̃ ca-ĩiwĩ Jesúre:

—Ʉpaʉ, ¿dope bairo ácʉ mʉ ca-aniecʉtiere jãare mʉ majioʉatí, ati yepa macana mʉre ca-apiʉjagaquẽna macare na majioquẽcʉna?

23Oco bairo cʉ̃ ca-ĩi yʉʉwĩ Jesú:

—Yʉre ca-nʉcʉbʉgorã ãnaa yʉ ca-buiorijere mʉja apiʉjagarã. To bairi mʉja maigʉmi yʉ Pacʉ. Jã pʉgarãpʉna mʉja mena jã anicõagarã. 24Yʉre ca-nʉcʉbʉgoquẽna maca yʉ ca-buiorijere apiʉjaquẽema. Mʉjaare yʉ ca-buiorije yʉ ye me ãa. Yʉ Pacʉ yʉre ca-jooricʉ yʉre cʉ̃ ca-buio rotirique maca ãa.

25’Mʉja mena ãcʉ̃ mai atie nipetirijere mʉjaare yʉ buio. 26Yʉ Pacʉre yʉ ca-jeniro maca Espíritu Santore joogʉmi mʉjaare. To bairi Espíritu Santo mʉjaare átinemogʉmi. Mʉja ca-tʉgooña tutuaro mʉja átigʉmi. Nipetirije mʉjaare majiogʉmi. Nipetirije mʉjaare yʉ ca-buiorique quenare mʉja ca-tʉgooña bʉga majiro mʉja átigʉmi.

27’Yucʉacã aácʉ yʉ áa. To cõona caroaro tʉgooña yerijã ani wariñuurique mʉjaare to ãmaro. Mʉjaare yʉ joo mʉja ca-tʉgooña yerijã wariñuucõa anipere. Tiere joʉ ati yepa macana Diore ca-majiquẽna na cá-áti aniere bairo mee mʉjaare yʉ joo. To bairi, “Aácʉ yʉ áa,” yʉ ca-ĩrijere apirã jʉtiriti tʉgooñarique paiqueticõaña. 28“Yʉ Pacʉ tʉpʉ aácʉ yʉ áa,” yʉ ca-ĩiro, meere mʉja api tʉgawʉ. “Cabero mʉja mena anigʉ yʉ atígʉ tunu,” yʉ ca-ĩiro quenare mʉja api tʉgawʉ. Yʉ Pacʉ yʉ netoro ca-ãcʉ̃ ãmi. To bairi yʉ netoro ca-ãcʉ̃ tʉpʉ, yʉ Pacʉ tʉpʉ yʉ cá-aátie quetire apirã ca-wariñuuparã mʉja anibapa. Caroaro yʉre mʉja ca-nʉcʉbʉgoata mʉja wariñuuborã cʉ̃ tʉpʉ yʉ cá-aátiere tʉgooñari. 29Mʉjaare yʉ buio jʉgoyeyewʉ meere. To bairi mʉjaare yʉ ca-buio jʉgoyeyerique cõo to ca-bairo tʉjʉrã, “Cariapena ca-ĩiñupi,” yʉre mʉja ĩi nʉcʉbʉgogarã. 30Ati yepa macana yʉre ca-apiʉjaquẽnare ca-rotii, Sataná atore atí tʉgami. To bairi yoaro mʉjaare yʉ buionemoquetigʉ. Yʉre ca-roti majii aniqueti majuucõami Sataná, ati yepa macajere roti majibacʉ quena. 31Yʉ Pacʉ yʉre cʉ̃ cá-áti rotiriquere yʉ átigʉ. To bairo yʉ cá-áto ati yepa macana yʉ Pacʉre cʉ̃ yʉ ca-nʉcʉbʉgorijere majigarãma, jã ca-ĩi buiowĩ Jesú. To bairo ĩi buio yaparoʉ:

—Wamʉnʉcaña. Jitá, mani aáparo, jã ca-ĩiwĩ Jesú.

Currently Selected:

SAN JUAN 14: TAVNT2

Highlight

Copy