ACTS 2
2
Níłch'i Diyinii ee hazlį́į́'
1Áádóó Péntekast#Lev. 23:15-21; Deut. 16:9-11. beiníłką́ągo t'áá ádzíłtso [aheełt'éego nitsídadzikeesgo] t'ááłáhígi nidzíiztą́. 2Nít'éé' t'áadoo hooyání ayóó át'éego yiyołígíí nahalingo yá'ąąshdę́ę́' hodiists'ą́ą́', áko kin biyi' nidzíiztání góne' t'áá át'é hadéébįįd. 3Áko t'ááłá'í jinítínígo atsoo' kǫ' nidahalingo hak'ijį' adahwiizle'go dajiiłtsą́. 4T'áá ádzíłtso Níłch'i Diyinii hwii' hadadéébįįd, áko Níłch'i Diyinii yádahwiiłti'go ał'ąą dine'é dabizaad bee yádajiłti'go baa nízhdiikai.
5Íídą́ą́' yádiłhił biyaagi ał'ąą dine'é t'áá ałtso bitahdę́ę́' Jew dine'é dahodísinii Jerúsalemgi kéédahat'į́į́ nít'éé'. 6Áko kót'éego hodiists'ą́ą'go t'óó ahojíyóí áłah dzizlį́į'go t'ááłá'í jinítínígo t'áá hó dahazaadígíí yee yádaałti'go dazdiizts'ą́ą'go bik'ee t'óó hoł dahóóląąd. 7Áko t'áá ádzíłtso haa léit'éego át'éé lá dazniizį́į'go ádajiní, Da' díí yádaałti'ígíísh doo t'áá ałtso Gáliliidę́ę́' dine'é danilį́į da? 8Ákoshą' hait'éego t'ááłá'í niitínígo t'áá nihí danihizaad yee yádaałti'go dasidiits'ą́ą́'? 9Párthiyadę́ę́' dine'é, Míídiyadę́ę́' dine'é, Íílamdę́ę́' dine'é, áádóó Mesopotéímiyagi kéédahat'ínígíí, Judíyagi áádóó Kapadóshiyagi, Pántasgi áádóó Éízhagi,#2:9 Diyin God bizaad biyi' Éízha k'ad kéyah Térkii hoolyéii łahjį' Éízha hoolyéé nít'éé'. 10Fríjiyagi áádóó Pamfíliyagi, Ííjipgi áádóó Líbiyagi Sairíinii binaagóó, índa Romedę́ę́' nidaanéego t'óó átsééd dabighanígíí, Jew dine'é índa Jew dine'é binahagha' yihidiikaígíí, 11Kríitdę́ę́' dine'é áádóó Aréíbiyadę́ę́' dine'é daniidlį́į nidi, t'áá nihí danihizaad bee, Diyin God ayóó ádaat'éego yaa naagháhígíí yaa yádaałti'go dadiits'a'. 12Áko t'áá ádzíłtso t'óó hoł adahayóí, áádóó t'óó hoł daahaadago, áda'ahizhdi'ní, Díí lá ha'át'íí át'éé lá? 13Nidi náádaała' t'óó há nidahałt'i'go ádadííniid, Eiiyee' wáin ániidíii áde dayoodlą́ą́' lá.
Péntekast azlį́į'go Peter yáłti'
14Áko Peter, ídahooł'aahii ła'ts'áadahígíí bił nidzizį́įgo, áłah nilínígíí yéego bich'į' hadzoodzíi'go ájíní, Judíyadóó diné danohłíinii, áádóó Jerúsalemgi kéédahoht'íinii t'áá ánółtso, shizaad dayínółts'ą́ą'go díí nihił béédahodoozįįł. 15Da' jidlą́ danohsin nidi dííyee' doo da'adlą́ą da, jó índa de dah adii'ą́, 16nidi dííyee' Jówel éí Diyin God yá halne'ii kóníigo yee haadzíi'ii át'é:
17Diyin God haadzíi'go ání, Nihodoogáałjį' ayííłką́ągo kódahooníił doo:
nihokáá' dine'é t'áá ałtso shiNíłch'i bik'i hwiidooleeł,
áko nihiye'ké áádóó nihitsi'ké Diyin God yá dahalne' dadooleeł,
áádóó nihitsíłke'é bił ádahat'į́į dooleeł,
índa nihadahastóí nideiyeeł dooleeł;
18éí yoołkáałdi diné shá nidaal'a'ígíí índa asdzání shá nidaal'a'ígíi nidi
t'áá biláahgo shiNíłch'i baa dideesh'áałgo, shá dahalne' dooleeł.
19Áko wódahdi yádiłhił biyi'di bik'ee t'óó ił ahayóigo ádahooníiłii
índa wóyahdi nahasdzáán bikáa'gi shibee adziilii bee béédahózinii,
dił, áádóó kǫ', índa łid áhí nahalingo ádadeeshłiił;
20jį́honaa'éí bił chahodoołhił,
índa tł'éhonaa'éí dił nahalin dooleeł,
Bóhólníihii nídoodááł t'ah doo beiyíłkaahgóó áhodoonííł.
Jó, éí ayóó át'é índa bik'ee t'óó ił ahayóigo ha'doo'ááł.
21Áko t'áá háiida Bóhólníihii bízhi' bee józhíigo níjooskanígíí yisdáhodoołtééł.#Joel 2:28-32.
22Ízrel dine'é danohłíinii, díí saadígíí dadoohts'į́į́h: Názarethdóó Jesus éí álílee k'ehgo ádahooníiłii, áádóó bik'ee t'óó ił adahayóigo ádahooníiłii, índa Diyin God bibee adziilii bee béédahózinii nihitahgóó baa nijiyáhígíí bee Diyin God nihich'į' hwee lą́ asłį́į'go nihił béédahózin. 23Diyin God t'áá átséedi bił bééhózingo binahat'a' yee nihoní'áanii bik'ehgo díí Jesus nihaa deet'ą́. Áko diné doo yá'ádaashóonii bílák'e dasidoo'ą́, áádóó tsin ałnáoszid bikáa'jį' bił ada'askaalgo dasoołhį́.#Mt. 27:35; Mk. 15:24; Lk. 23:33; Jn. 19:18. 24Nidi Diyin God náábidiisá,#Mt. 28:5,6; Mk. 16:6; Lk. 24:5. háálá daaztsánígíí yee ti'hoo'nííh niiníłt'i', jó, éidí bee bi'dótą' dooleełígíí doo bohónéedzą́ą da. 25Háálá ałk'idą́ą́' David haa halne'go ádííniid:
Bóhólníihii t'áá áłahjį' shilą́ąjį' hojílǫ́ǫgo hweesh'į́,
háálá shinish'náájí hojílǫ́, áko doo shił na'ii'náa da doo.
26Éí bąą shijéí bił hóózhǫǫd, índída shizaad hózhǫ́ǫgo haasdzíí',
áádóó ałdó' shits'íís na'ólíigo hanályį́įh doo.
27Háálá shii' sizíinii doo t'áá hool'áágóó ti'hoo'níihdi hólǫ́ǫgo ádíílíił da,
niDiyin Nilíinii didoołdziłjį' ałdó' doo ninádidíí'áał da.
28Iiná bá honít'i'ígíí shił bééhózingo áshiinilaa;
shił honílǫ́ǫgo t'áá íiyisí baa shił hózhǫ́ǫgo áshidíílííł.#Ps. 16:8-11.
29Peter ánáázhdoo'niid, Shik'isóó, t'áadoo bich'į' ni' nishłíní nihizhé'é David yę́ę binahjį' nihich'į' hadeesdzih, éí daaztsą́ áádóó yóó'ábi'diilyaa, áádóó díí jį́įjį' tséní'ootséél góne' abi'dooltínígi t'ahdii bik'eh haz'ą́. 30Éí Diyin God yá halne'ii jílį́, áádóó hats'ą́ą́dóó náás oochíiłii ła', éí [Christ, diné silį́į'go] hojoo'áałgo dah dzizdáá nít'é'ígi dah dínóodaałgo, Diyin God hach'į' yee ádee hadoodzíi'go hoł bééhózin.#2Sam. 7:12,13; Ps. 132:11. 31Christ daaztsą́ą́dę́ę́' náábidi'doodláłígíí t'áá bítséedi hoł bééhózingo bee hadzoodzíí',
[Hwii' sizíinii] doo t'áá hool'áágóó ti'hoo'níihdi hólǫ́ǫgo áyiilaa da,
hats'íís ałdó' t'áadoo dííłdzid da.#Ps. 16:10.
32Díí Jesus jílíinii lą́ą Diyin God nááhodiisáago nihí t'áá áníiltso dabíínáałgo bił béédahózinii daniidlį́. 33Áko Diyin God binish'náájí dah honeesdáago ayóó ájít'é áhoolaa, áádóó aTaa' éí Níłch'i Diyinii yee nihoní'áanii hwee hazlį́į'go nihaazhdiní'ą́, áko díí k'ad daah'į́ áádóó dadoohts'a'. 34Háálá yá'ąąshgóó ííyáii éí doo David át'į́į da, nidi David t'áá bí ání,
Bóhólníihii éí shiBóhólníihii áyidííniid,
Shinish'náájí dah sínídá,
35nida'ana'í bik'i dííníl'eezgo ániishłaajį'.#2:34,35 Bik'i dííníl'eezgo ániishłaajį', nínígíí éí, Ná bik'eh díshdlį́į'jį', níigo ání. Ps. 110:1.
36Éí bąą tsin ałnáoszid bikáa'jį' Jesus bił ada'soołkaal nít'éé' yę́ę Diyin God éí Bóhólníihii áádóó Christ nilį́įgo áyiilaa, díí Ízrel dine'é t'áá ałtso t'áadoo naaki nilíní bił béédahózin le'.
37Áko éí deidiizts'ą́ą'go bijéí t'áá íiyisí dajishishiigi ádaadzaago yínííł daazlį́į́', áko Peter índa ła' daal'aadii danilínígíí ádeidííniid, Nihik'isóó, ákoshą' haa dadii'nííł? 38Áko Peter áhodííniid, T'ááłá'í nootínígo łahgo át'éego Diyin God bich'į' tsíńdahidohkeesgo Jesus Christ bízhi' bee tó bee danihi'dólzį́į́h, áko Diyin God bich'į' ádił da'soohsí'ígíí nihá yóó'iididoo'ááł, áádóó Níłch'i Diyinii nihaa deet'áanii nihíí' dadooleeł. 39Háálá éí nihí áádóó niha'áłchíní índa nízaadi nidaakaii bił nihíí' dadooleełgo yee nihoní'ą́, Bóhólníihii nihiDiyin God hágo deididooniiłígíí t'áá ałtso baa deet'ą́. 40Áádóó lą'ígóó saad bee bich'į' hadziisdzíí' índa biyahoozhniiłįįhgo ájíní, Díí tsi'na'aldeehgo oochíłígíí bits'ą́ąjį' yisdáhóhkááh. 41Áko hazaad dayoosdląądgo yaa bił dahózhónígíí tó bee dabi'doolzį́į́', áko éí bijį́ táadi mííl daats'í ánéelą́ą'go hodiikai. 42Áko t'áadoo ádahozdiilzéhí daal'aadii yee nida'nitinígíí bik'ehgóó ádajít'é índa ahił dajídlį́įgo bááh ninádajiitihgo nídajidį́į́h#2:42 Bóhólníihii bihodílzingo adánígíí t'áá yaa ninákahgo ahił ídlį́įgo adánígíí nídeiyiił'aah nít'éé'. áádóó sonídazdilzįįhgo hoolzhish.
Da'joodláanii ahił dajídlį́įgo kééhojit'į́
43Áko diné t'áá ałtso t'óó bił adahayóigo ádá dahodílzin, áádóó bik'ee t'óó ił adahayóigo ádahooníiłii índa Diyin God bibee adziilii bee béédahózinii daal'aadii binahjį' lą'í ádaalyaa. 44Áádóó da'oodlánígíí t'áá ałtso bee dahólóonii bił ałts'ą́ą́' da'dzíłk'iizgo t'ááłáhígi kééhojit'į́į́ nít'éé';#Acts 4:32-35. 45ha'át'íhída bee hódahólníihii índa hanaalye'é haa nidahaaznii', áko diné t'áá ałtso t'ááłá'í nítínígo choideidooł'įįłii bee ádaadinii bitaa dadziznii'. 46T'áá ákwíí jį́ aheełt'éego nitsídadzikeesgo kin bii' sohodizin bił haz'ánígóó ałnáádajikah, índa hoł dahózhǫ́ǫgo áádóó ahił dajídlį́įgo dahooghangóó bááh ninádajiitih áádóó nída'jidį́į́h, 47Diyin God baa dahojiniihgo diné t'áá ałtso hoł danilį́įgo hoolzhish. Áko t'áá ákwíí jį́ yisdáhákáhígíí Bóhólníihii hóyiyiinííł.
Currently Selected:
ACTS 2: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
