EXODUS 1
1
Ízrel dine'é Ííjip kéyahdi atídabi'dool'įįd
1Díí Ízrel haye'ké Ííjip kéyahgi yíkaígíí t'ááłá'í nítínígo dabighandóó danilíinii Jéíkab hoł nidahaaznánígíí kódaolyé: 2Rúben, Símiyan, Líívai, Júdah, 3Ísakar, Zébyulan, Bénjamin, 4Dan, Náftalai, Géed índa Ásher daolyé.#Gen. 46:8-27. 5Jéíkab bits'ą́ą́dóó ahii' háá'ahiyoolchíiłii tsosts'idiin yilt'éé lá; Jóseph éí t'áá íídą́ą́' Ííjip kéyahgi jiníyá. 6Áko Jóseph daaztsą́, áádóó bik'isóó índa íídą́ą́' da'ahílchíihii ałdó' ałtso daneezná. 7Nidi Ízrel ba'áłchíní náás da'ahideeshchį́įgo t'óó ahayóí silį́į́' áádóó ayóó át'éego k'ee'ąą deeshzhiizh,#Acts 7:17. áko k'ee'ąą dínéest'ą́ągo t'áá íiyisí bidziil silį́į́'; éí kéyahgi k'ee'ąą náneest'ą́.
8Áko Ííjip kéyahgi Jóseph yę́ę doo yééhósinii aláahgo naat'áanii náánásdlį́į́'.#Acts 7:18. 9Áko éí bidine'é áyidííniid, Shoo, Ízrel dine'é t'óó ahóóyóí áádóó nihiláahgo dabidziil daazlį́į́'. 10Haa'íshą' baa dahoniidzą́ągo át'ée dooleełgi baa nídadíit'įįł,#Acts 7:19. doodago t'áá k'ee'ąą náánoot'į́įłgo áádóó nihich'į' anaa' hazlį́į'go nihida'ana'í yił ałch'odadoo' niiłgo nihik'iidoojah, sha'shin, áko kéyahdóó ałtso yóó'anídahidoo'nééł. 11Éí bąą t'áá íiyisí naanish yídahoniłkadgo yee hade ádahósin doo biniyé naanish binanit'a'í hach'į' nideiznil, áko Páítham índa Rámsiiz hoolyéego Féro#1:11 Féro jiníigo éí Ííjip k'ehjígo aláahgo naat'áanii jiníigo óolyé. bá yódí biniyé kin hadaas'áago ádajiilaa. 12Azhą́ t'áá íiyisí atídajił'į́į nidi t'óó yówehda k'ee'ąą dínéest'ą́ áádóó t'ah yówehígo k'ee'ąą ní'deeshzhiizh. Áko Ííjip dine'é danilíinii Ízrel dine'é t'áá íiyisí yik'ee niseekai. 13Áko Ízrel dine'é naanish yídeiniłkadgo ádił nideílníísh. 14Áko naalte' dajílį́įgo ts'ídá yéego na'anish yee hoda'niighą́ą́'; hashtł'ish áádóó bis ádajile'go índa dáda'ak'ehgóó naanish t'áá ał'ąą baa nidajikai; ts'ídá yéego hondaanish yídahoniłkad.
15Áádóó Ííjip dine'é binanit'a'í éí Hííbrew dine'é asdzání ha'niyóodii léi' yich'į' haadzíí'; éí asdzání ła' Shífrah wolyé índa ła' éí Púwa wolyé. 16Áko ání, Asdzání ha'niyóodii nohłíinii, Hííbrew asdzání nida'iiłchíihgo ííshją́ą́ hadaohsíidgo ashkiigo éí nidaałtseed doo; at'ééd nilį́įgo t'áá dahináa doo. 17Nidi asdzání ha'niyóodii Diyin God yidísin, áko Ííjip binanit'a'í hach'į' yee haadzíi'ii t'áadoo bik'ehgo ádziidzaa da, áko ashiiké nidahachíhígíí t'áá dahináago ájiilaa. 18Ákohgo Ííjip binanit'a'í éí asdzání ha'niyóodii yíká i'ííł'a'go áyidííniid, Ha'át'éegoshą' kóhdzaa; ashiiké yázhí t'áá dahináago óohłaa lá? 19Asdzání ha'niyóodii Féro áyidííniid, Díí Hííbrew asdzání doo Ííjip asdzánígi ádaat'ée da, háálá éí dabiinéigo ha'niyóodii éí t'áadoo yílyeedí t'ahaa'go nida'iiłchííh. 20Áko Diyin God éí asdzání ha'niyóodii yik'ijisdli' índa diné k'ee'ąą nídínéest'ą́ągo yéego bidziil silį́į́'. 21Áko asdzání ha'niyóodii éí Diyin God yidísinígíí biniinaa ha'áłchíní hólǫ́ǫgo áhoolaa. 22Áko Féro éí bidine' é t'áá ałtso yich'į' haadzíi'go áyidííniid, Hííbrew ashkii nidahachíhígíí tooh biih dahołtł'iid doo,#Acts 7:19. nidi at'éékégo éí bíni' dahináa dooleeł.
Currently Selected:
EXODUS 1: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
